ཐང་རྒྱལ་བརྒྱུད་པའི་གསོལ་འདེབས་ནོར་བུའི་རྒྱལ་མཚན།
༄༅།། ཐང་རྒྱལ་བརྒྱུད་པའི་གསོལ་འདེབས་ནོར་བུའི་རྒྱལ་མཚན་བཞུགས་སོ།། ཨོཾ་ཨཱཿཧཱུྃ༔ འོག་མིན་བདེ་ཆེན་པདྨོ་བཀོད་པ་ནས། །ཆོས་སྐུ་འོད་དཔག་མེད་ལ་གསོལ་བ་འདེབས། །འཆི་མེད་གཉུག་མ་རང་བྱུང་གདོད་མའི་གཤིས། །མངོན་གྱུར་འོད་སྐུར་འགྲུབ་པར་བྱིན་གྱིས་རློབས། །འོད་ལྔ་མ་འདྲེས་སྟུག་པོ་བཀོད་པ་ནས། །ལོངས་སྐུ་ཚེ་མཐའ་ཡས་ལ་གསོལ་བ་འདེབས། །ལྷུན་གྲུབ་རྟག་པ་མི་ཤིགས་རྡོ་རྗེའི་སྐུས། །མཁའ་བཞིན་འགྲོ་དོན་འབྱུང་བར་བྱིན་གྱིས་རློབས། །ལྷོ་ནུབ་རྔ་ཡབ་སྤྲུལ་པའི་ཕོ་བྲང་ནས། །པདྨ་ཐོད་ཕྲེང་རྩལ་ལ་གསོལ་བ་འདེབས། །ལྷ་འདྲེ་མི་གསུམ་མི་བསྲུན་གདུག་པའི་དཔུང་། །མཐུ་སྟོབས་ནུས་མཐུས་འཇོམས་པར་བྱིན་གྱིས་རློབས། །གསང་ཆེན་བཀའ་གཏེར་བཀའ་ཡི་སྡུད་པོ་མཆོག །ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས། །དོན་དམ་ཕྱག་རྒྱ་ཆེན་པོའི་རང་ཞལ་ཉིད། །ཚེ་འདིར་མངོན་དུ་འགྱུར་བར་བྱིན་གྱིས་རློབས། །གང་འདུལ་ཞིང་ཁམས་གངས་ལྗོངས་གདུལ་བྱའི་དཔལ། །ཐང་སྟོང་རྒྱལ་པོའི་ཞབས་ལ་གསོལ་བ་འདེབས། །འཇིགས་རུང་སྐྱེ་འཆི་བརྒལ་དཀའི་ཆུ་བོ་ལས། །ཐུགས་རྗེས་གྲུ་བོས་སྒྲོལ་བར་བྱིན་གྱིས་རློབས། །གསང་ཆེན་སྨིན་གྲོལ་ཆོས་ཀྱི་སྐྱེད་ཚལ་ནས། །བྱང་ཆུབ་རྡོ་རྗེའི་ཞབས་ལ་གསོལ་བ་འདེབས། །གང་འབྲེལ་འཕྱུགས་མེད་ཐར་པའི་ལམ་མཆོག་ལ། །ཐོགས་མེད་མྱུར་དུ་འགོད་པར་བྱིན་གྱིས་རློབས། །མཚོ་རྒྱལ་བྱིན་རླབས་དགོངས་པའི་ཆོས་མཛོད་ནས། །ལུང་རིག་གླིང་པའི་ཞབས་ལ་གསོལ་བ་འདེབས། །རྟག་ཏུ་གཞན་ཕན་རྒྱལ་སྲས་ལམ་བཟང་ལ། །མི་ལྡོག་མོས་པ་བརྟན་པར་བྱིན་གྱིས་རློབས། །ཚེ་གཅིག་བྱང་ཆུབ་བསྒྲུབས་པའི་དཔའ་བརྟུལ་ཅན། །སངས་རྒྱས་དཔལ་ལྡན་ཞབས་ལ་གསོལ་བ་འདེབས། །ཟབ་ཆོས་བརྒྱུད་འཛིན་སྐུ་ཚེ་མཐར་ཕྱིན་ནས། །རང་གཞན་དོན་གཉིས་འགྲུབ་པར་བྱིན་གྱིས་རློབས། །ཞེས་པའང་ལྷ་གྲོགས་དད་ཅན་ཟུང་གིས་བསྐུལ་ངོར། །དགེ་སྦྱོང་ལུང་རྟོགས་མིང་གིས་བྲིས་པ་དུས་ཀུན་ཏུ་དགེ་བར་གྱུར་ཅིག་གུ།