ཐང་རྒྱལ་ཚེ་སྒྲུབ་འཆི་མེད་རྡོ་རྗེའི་ཀ་བ།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ གྲུབ་ཆེན་ཐང་སྟོང་རྒྱལ་པོའི་ཚེ་སྒྲུབ་འཆི་མེད་རྡོ་རྗེའི་ཀ་བ་བཞུགས༔

རྒྱལ་བ་ཀུན་དང་རོ་མཉམ་ཡང༔ གང་འདུལ་གྲུབ་པའི་དབང་ཕྱུག་ཚུལ༔ ཐང་སྟོང་རྒྱལ་པོའི་བླ་སྒྲུབ་ཀྱི༔ འཆི་མེད་ཚེ་སྒྲུབ་ཟབ་མོ་བསྟན༔ ས་མ་ཡཱ༔ དེ་ཡང་གངས་རི་གཏན་ཆགས་དང་༔ གཡུ་མཚོ་གཏན་འཁྱིལ་བྲག་རི་བརྟན༔ ཉམས་དགའ་ཤར་གྱི་འོད་སྔ་ཞིང་༔ ཉེར་སྡུད་འཕྱི་ཞིང་དབེན་ལ་འཇམ༔ དཀར་ཕྱོགས་གཞི་བདག་གིས་བསྲུང་བའི༔ གནས་མཆོག་ཉམས་དགའ་བག་དྲོ་བ༔ གྲུབ་ཐོབ་སྐྱེས་བུས་ཞབས་བཅགས་སར༔ དཀྱིལ་འཁོར་བཀོད་ལེགས་མདའ་གང་སྟེང་༔ འབྲས་དཀར་ཚོམ་བུ་བརྒྱད་བཀོད་དབུས༔ ཟངས་བུམ་ཆོས་སྨན་སེལ་མེད་དང་༔ ཉེར་ལྔའི་ཆུ་ཡིས་སུམ་ཆ་བཀང་༔ ཤར་དུ་རྡོ་རྗེ་དར་སྔོན་དྲིལ༔ ལྷོ་རུ་བླ་མའི་གཏོར་མ་ལ༔ སྐུ་གཟུགས་དར་གྱི་ཅོད་པཎ་གདགས༔ ནུབ་ཏུ་དྲིལ་བུ་ལེ་བརྒན་དར༔ བྱང་དུ་ཕུར་བུ་རང་སྔགས་གདགས༔ ཤར་ལྷོར་དཀར་མངར་ཚེའི་རིལ་བུ༔ ལྷོ་ནུབ་ཐོད་པར་ཚེ་བཅུད་ཆང༔ ནུབ་བྱང་མདའ་དར་སྣ་ལྔ་དང་༔ བྱང་ཤར་གསལ་བའི་སྒྲོན་མེ་རྣམས༔ སྒྲུབ་པའི་རྫས་ཀྱི་ཡོ་བྱད་བསགས༔ མཐའ་བསྐོར་སྨན་རཀ་ཉེར་སྤྱོད་ལྔ༔ སྤྱན་གཟིགས་ཡིད་འོང་རྟེན་དུ་བཀྲམ༔ རང་ཉིད་བདེ་བའི་སྟན་ལ་འདུག༔ གྲིབ་ཅན་མི་དང་རྫས་རྣམས་ཀུན༔ རྒྱང་རིང་བསྐྲད་ནས་སྤོས་དུད་གཏོང༔ སྔགས་ལ་ནུས་པ་འབྱུང་བའི་ཕྱིར༔ རྒྱབ་ཆོས་རིམ་གྲོ་འདི་བཞིན་བྱ༔ ཤར་དུ་འཇམ་དཔལ་མཚན་བརྗོད་དང་༔ ལྷོ་རུ་རྣམ་པར་རྒྱལ་མའི་གཟུངས༔ ནུབ་ཏུ་དམ་སྐོང་ཡི་གེ་བརྒྱ༔ བྱང་དུ་བདུད་ཟློག་ཤེར་སྙིང་གདུགས༔ ཁྲིམས་ལྡན་སྔགས་པ་བཞི་ཡིས་སྒྲུབ༔ ཆོ་ག་དངོས་ཀྱི་རིམ་པ་ལ༔ སྦྱོར་བ་དངོས་གཞི་རྗེས་དང་གསུམ༔ དང་པོ་སྦྱོར་བའི་ཆོས་ལ་བདུན༔ ཐོག་མར་སྐྱབས་ཡུལ་སྤྱན་དྲངས་ཏེ༔ སྐྱབས་སུ་འགྲོ་བ་འདི་ལྟར་བྱ༔ ན་མོ༔ སྲིད་གསུམ་ལས་ཀྱིས་མནར་བའི་བདག་གཞན་འགྲོ༔ མཆོག་གསུམ་ཀུན་འདུས་འཆི་མེད་ཚེ་ཡི་ལྷ༔ གྲུབ་པའི་དབང་ཕྱུག་ཐང་སྟོང་རྒྱལ་པོ་ལ༔ བྱང་ཆུབ་སྙིང་པོའི་བར་དུ་སྐྱབས་སུ་མཆི༔ སེམས་བསྐྱེད་རིམ་པ་འདི་ལྟར་བྱ༔ ཧོ༔ ལྷན་སྐྱེས་ཀུན་བརྟགས་དབང་གིས་བདེན་པའི་དོན༔ ལོག་པར་རྟོག་པའི་མར་གྱུར་མཁའ་ཁྱབ་འགྲོ༔ རྣམ་གྲོལ་རྫོགས་སངས་རྒྱས་ཀྱི་གོ་འཕང་ལ༔ འགོད་ཕྱིར་བླ་མའི་རྣལ་འབྱོར་བསྒོམ་པར་བྱ༔ སྡོམ་གསུམ་གསོ་སྦྱོང་རིམ་པ་ནི༔ ཧོ༔ ཚེ་ཡི་བར་ཆད་དབྱིངས་སུ་གྲོལ་ནས་ཀྱང༔ འཆི་མེད་རིག་འཛིན་ཚེ་འདིར་འགྲུབ་པའི་ཕྱིར༔ སོ་ཐར་བྱང་སེམས་སྔགས་ཀྱི་འདུལ་ཁྲིམས་རྣམས༔ མི་ཉམས་གསོ་ཞིང་ཉེས་ལྟུང་སྦྱོང་ཕྱིར་དུ༔ རྡོ་རྗེ་སེམས་དཔའ་གསང་ཆེན་རིགས་གཅིག་གི༔ སྒོམ་བཟླས་ཟབ་མོས་སྒྲིབ་གཉིས་ཡོངས་དག་བྱ༔ ཡི་གེ་བརྒྱ་པ་ཉེར་གཅིག་བཟླས༔ དེ་ནས་བགེགས་རིགས་ལན་ཆགས་ལ༔ འབྲུ་གསུམ་སྔགས་ཀྱིས་གཏོར་མ་བསྔོ༔ ཧཱུྃ་ཧྲཱིཿ ང་ནི་ཡེ་ནས་གཉུག་མའི་ཧེ་རུ་ཀ༔ དབང་ཆེན་ཁྲོ་བོའི་རྒྱལ་པོ་རྟ་མགྲིན་ཏེ༔ གནས་འདིར་ཚེ་ཡི་རིག་འཛིན་སྒྲུབ་པ་ལ༔ བར་དུ་གཅོད་པའི་གདོན་བགེགས་ལོག་འདྲེན་རྣམས༔ བླ་གླུད་ཆངས་བུ་མར་མེས་ཚིམས་པར་གྱིས༔ ཚེ་རྐུ་སྲོག་ལ་འཇབ་པའི་གནོད་སེམས་སྤོངས༔ སྟོང་གསུམ་རི་རབ་གླིང་བཞིའི་ཕ་མཐར་དེངས༔ གལ་ཏེ་བཀའ་ལས་འདས་ཤིང་འདིར་འཚེ་ན༔ ཁྲོ་ཚོགས་མེ་དཔུང་མཚོན་ཆའི་དབལ་ཟེར་གྱིས༔ ལུས་སེམས་རྡུལ་དུ་བརླག་པར་གདོན་མི་ཟ༔ དྲག་སྔགས་ཡུངས་ཐུན་དག་གིས་བྲབ༔ བསྲུང་བའི་འཁོར་ལོ་འདི་བཞིན་བསྒོམ༔ ཧོ༔ སྤྲོས་བྲལ་སྟོང་ཆེན་ཀློང་ལས་རང་ཤར་བའི༔ རིག་རྩལ་རྡོ་རྗེའི་གུར་ཁང་སྲ་ཞིང་བརྟན༔ ཀུན་བརྟགས་འབྱུང་པོས་གློ་བུར་གླགས་མི་རྙེད༔ མི་ཆོད་མི་ཤིགས་ཆོས་བདུན་ལྡན་པར་གྱུར༔ བཛྲ་རཀྵ་རཀྵ་ཧཱུྃ༔ དེ་ནས་གནས་དང་ཡོ་བྱད་ལ༔ དབྱིངས་ནས་བྱིན་འབེབས་འདི་བཞིན་བྱ༔ ཧོ༔ སྐུ་གསུམ་སྟོན་མཆོག་ཐུགས་རྗེས་རྒྱུད་བསྐུལ་ནས༔ མ་དག་ཐ་མལ་སྣང་ཞེན་སྒོ་གསུམ་པོ༔ ཡེ་གྲོལ་ལྷ་སྔགས་ཏིང་འཛིན་རང་རྩལ་དུ༔ འཆི་མེད་ཚེ་ཡི་བྱིན་ཆེན་དབབ་ཏུ་གསོལ༔ གཉིས་འཛིན་རྟོག་པས་བསྡུ་བའི་ཡོ་བྱད་རྫས༔ ཡེ་ཤེས་ལྔ་ཡི་རོལ་པར་ཡོངས་ཤར་ནས༔ སྣང་སྟོང་བདེ་བ་ཆེན་པོའི་དམ་རྫས་སུ༔ འཆི་མེད་ཚེ་ཡི་བྱིན་ཆེན་དབབ་ཏུ་གསོལ༔ ཨོཾ་ཨཱཿཧཱུྃ་མ་ཧཱ་སརྦ་པཱུ་ཛ་ཧོ༔ ཨ་ཝེ་ཤ་ཡ་ཕེཾ༔ མཆོད་རྫས་བྱིན་བརླབ་རིམ་པ་ནི༔ སྭ་བྷ་ཝ་ཡི་སྔགས་ཀྱིས་སྦྱངས༔ ཧོ༔ ཕྱི་ནང་སྣོད་བཅུད་མཆོད་པའི་ཡོ་བྱད་ཀུན༔ ཏིང་འཛིན་དམིགས་པས་མ་དག་འབག་རྩོག་སྦྱངས༔ འབྲུ་གསུམ་སྔགས་ཀྱིས་ཡེ་ཤེས་བདུད་རྩིར་བསྒྱུར༔ ཀུན་བཟང་མཆོད་པའི་སྤྲིན་བཞིན་གནས་གྱུར་ཅིག༔ ཨོཾ་ཨཱཿཧཱུྃ་མ་ཧཱ་སརྦ་པཱུ་ཛ་ཧོ༔ སྤྲོ་ན་ཉེར་སྤྱོད་སྨན་གཏོར་རཀ༔ སོ་སོའི་སྔགས་ཀྱིས་བྱིན་གྱིས་བརླབས༔ ས་མ་ཡཱ༔ དངོས་གཞིའི་རིམ་པ་ལའང་བདུན༔ དང་པོ་ཏིང་འཛིན་རྣམ་གསུམ་གྱིས༔ སྣོད་བཅུད་ལྷ་རུ་བསྐྱེད་པ་ནི༔ ཨོཾ་ཨཱཿཧཱུྃ༔ འདི་ལྟར་དངོས་པོར་སྣང་བའི་ཆོས་རྣམས་ཀུན༔ ཡེ་ནས་མ་སྐྱེས་སྤྲོས་བྲལ་བློ་ལས་འདས༔ རང་བཞིན་བརྗོད་མེད་ནམ་མཁའ་ལྟ་བུ་ལ༔ དེ་ལྟར་མ་རྟོགས་མཐའ་ཡས་འགྲོ་བ་ཀུན༔ དངོས་པོ་མཚན་འཛིན་སྐྱེ་རྒ་ན་འཆིས་མནར༔ དེ་རྣམས་ཚེ་ཡི་རིག་འཛིན་ལ་འགོད་ཕྱིར༔ རང་སེམས་སྣང་སྟོང་འོད་གསལ་ཧཱུྃ་སྨུག་ནག༔ དེ་ལས་རཾ་ཡཾ་ཁཾ་འཕྲོས་མ་དག་པའི༔ དངོས་འཛིན་མཚན་མ་མ་ལུས་བསྲེགས་གཏོར་བཀྲུས༔ ཨེ་ཝཾ་ཡིག་འབྲུ་འོད་ལྔའི་མདངས་ལྡན་པ༔ སྣོད་བཅུད་དག་པའི་རང་བཞིན་པདྨ་བཀོད༔ ལྟ་ན་སྡུག་ཅིང་རྨད་བྱུང་མཆོད་སྤྲིན་གཏིབས༔ རིན་ཆེན་ཕོ་བྲང་ཤར་ཤེལ་ལྷོ་བཻ་ཌཱུར༔ ནུབ་ཕྱོགས་པད་རག་བྱང་ཕྱོགས་དབང་སྔོན་མདོག༔ དབུས་ཉིད་དྭངས་མ་འོད་ལྔའི་རང་བཞིན་འབར༔ དབུས་སུ་པད་ཉི་ཟླ་བ་རིན་ཆེན་ཁྲི༔ བཀོད་ལེགས་ཁྲི་སྙན་པགས་པས་གཡོགས་པའི་སྟེང༔ ཧཱུྃ་ལས་འོད་འཕྲོས་རྩ་གསུམ་བྱིན་རླབས་བསྡུས༔ འགྲོ་བའི་སྒྲིབ་སྦྱངས་འཆི་བདག་བདུད་དཔུང་བཅོམ༔ སྐད་ཅིག་གནས་གྱུར་ཚེ་ཡི་རིག་པ་འཛིན༔ རྒྱལ་བ་ཀུན་དངོས་པདྨ་ཐོད་ཕྲེང་རྩལ༔ དབང་ཆེན་རྟ་མཆོག་རྒྱལ་པོ་ཧེ་རུ་ཀ༔ ཀུན་འདུས་གྲུབ་ཆེན་ཐང་སྟོང་རྒྱལ་པོའི་སྐུ༔ སྨུག་ནག་ཁྲོ་འཛུམ་རྫི་སྨིན་ཨག་ཚོམ་དཀར༔ དུང་མདོག་དབུ་སྐྲ་ཕྱམ་གྲོལ་སྙན་རྒྱན་མཛེས༔ ཕྱག་གཡས་སྐྱབས་སྦྱིན་འཇིགས་སྐྱོབ་ལྕགས་སྒྲོག་དང་༔ གཡོན་པས་ཚེ་བུམ་འཆི་མེད་བདུད་རྩིས་གཏམས༔ སྐུ་སྟོད་དབང་མདོག་སྒོམ་ཐག་དྲ་བས་སྤྲས༔ དར་སྔོན་སྨད་དཀྲིས་རུས་པའི་རྒྱན་དྲུག་གསོལ༔ ཕྱེད་སྐྱིལ་རྩ་རླུང་ཐིག་ལེ་གནས་དག་བརྡར༔ སྣང་སྟོང་ཟག་མེད་འཇའ་ལུས་རྡོ་རྗེའི་སྐུ༔ ཐུགས་ཀར་དྭངས་མ་འོད་ལྔའི་ཐིག་ལེའི་དབུས༔ པད་ཟླའི་གདན་ལ་འཆི་མེད་རྡོ་རྗེའི་སྐུ༔ བྱུ་རུའི་ལྷུན་པོར་ཉི་མས་འཁྱུད་པའི་མདངས༔ ལོངས་སྤྱོད་རྫོགས་སྐུ་མཉམ་བཞག་ཚེ་བུམ་བསྣམས༔ སྤྱི་བོར་དབང་ཆེན་ཁྲོ་རྒྱལ་ཧེ་རུ་ཀ༔ ཕྱོགས་བཞིར་ཡེ་ཤེས་མཁའ་འགྲོ་དཀར་སེར་དམར༔ ལྗང་གསལ་རུས་རྒྱན་གར་སྟབས་མདའ་དར་བསྣམས༔ བདེ་བའི་ཉམས་ཅན་ཁ་ཊཱཾ་ཡབ་སྦས་ཚུལ༔ མཚམས་བཞིར་ལྕགས་ཀྱུ་ཞགས་པ་ལྕགས་སྒྲོག་དྲིལ༔ དབང་ཆེན་རིགས་བཞི་ཁྲོ་གཏུམ་དཔའ་བོའི་ཆས༔ རྟ་མགོ་ལྗང་ཞུར་རྟ་སྐད་སྒྲ་ཆེན་འབྱིན༔ བདུད་བཞིའི་གདན་ལ་འགྱིང་སྟབས་ཕྱག་རྒྱ་གདེངས༔ བར་མཚམས་སྟེང་འོག་ཚེ་ཡི་རིག་འཛིན་དང་༔ ཡི་དམ་མཁའ་འགྲོ་དམ་ཅན་སྤྲིན་ལྟར་གཏིབས༔ གནས་གསུམ་རྡོ་རྗེ་གསུམ་མཚན་ཡི་གེ་ལས༔ དཀར་དམར་མཐིང་གསུམ་འོད་ཟེར་དབང་པོའི་གཞུ༔ མཁའ་ལ་ཤར་ལྟར་ཕྱོགས་བཅུར་རབ་འཕྲོས་པས༔ རབ་འབྱམས་རྒྱལ་བ་ཐམས་ཅད་སྤྱན་དྲངས་ཏེ༔ མདུན་གྱི་ནམ་མཁར་དགྱེས་བཞིན་བཞུགས་པར་བསམ༔ དམ་ཚིག་རྟེན་ལ་བཞུགས་གསོལ་ནི༔ ཧཱུྃ་ཧྲཱིཿ རྒྱལ་བ་ཀུན་གྱི་བདག་ཉིད་གྲུབ་བརྒྱའི་རྗེ༔ ཡེ་ནས་རང་དང་འདུ་འབྲལ་མེད་པ་རུ༔ རང་བྱུང་རིག་པའི་ཀློང་དུ་རོ་གཅིག་པར༔ རང་ཞལ་ཤེས་པའི་ངང་དུ་ཏིཥྛ་ལྷན༔ ཛཿཧཱུྃ་བྃ་ཧོས་དབྱེར་མེད་བསམ༔ དམ་ཚིག་ལྷ་ཡི་བརྡ་ཕྱག་ནི༔ ཧོ༔ གདོད་ནས་རིག་པ་ལྷ་དང་དབྱེར་མེད་ཀྱང་༔ གློ་བུར་ངར་འཛིན་དབྱིངས་སུ་གྲོལ་བ་དང་༔ བསོད་ནམས་ཚོགས་ཆེན་ཡོངས་སུ་རྫོགས་པའི་ཕྱིར༔ སྒོ་གསུམ་གུས་པའི་ཚུལ་གྱིས་བརྡ་ཕྱག་འཚལ༔ ཨ་ལ་ལ་ཧོ༔ མཆོད་པ་རྣམ་གསུམ་འབུལ་བ་ནི༔ ཨོཾ་ཨཱཿཧཱུྃ༔ དབང་པོ་དྲུག་གི་ཡུལ་ལ་ཉེར་སྤྱོད་པའི༔ མཛེས་པའི་གཟུགས་དང་སྙན་འཇེབས་ཡིད་འོང་སྒྲ༔ ལྷན་སྐྱེས་ཟག་མེད་དྲི་བསུང་རོ་ལྡན་ཟས༔ བདེ་སྟོང་རེག་བྱ་བརྗོད་བྲལ་འོད་གསལ་གདེང༔ རང་བྱུང་རིག་པའི་རྩལ་དུ་ཤེས་པས་འབུལ༔ ཨོཾ་བཛྲ་ཨརྒྷཾ་སོགས་ཤཔྟ་མ་ཧཱ་སརྦ་པཱུ་ཛ་ཧོ༔ ཧཱུྃ་ཧྲཱིཿ རོ་རྐྱང་དབུ་མར་མ་དག་ཁམས་དང་རླུང་༔ ལུས་ངག་ཡིད་གསུམ་འཁྲུལ་བའི་རྒྱུ་རྐྱེན་ལས༔ དུག་གསུམ་བག་ཆགས་དབྱིངས་སུ་སྦྱང་བའི་ཕྱིར༔ སྨན་གཏོར་རཀྟའི་མཆོད་པ་འབུལ་ལོ་བཞེས༔ མ་ཧཱ་པཉྩ་རཀྟ་བྷ་ལིང་ཏ་པཱུ་ཙ་ཁ་ཁ་ཁཱ་ཧི་ཁཱ་ཧི༔ ཨོཾ་ཨཱཿཧཱུྃ༔ ཕུང་ཁམས་སྣང་སྟོང་ལྷ་རུ་གནས་འགྱུར་ནས༔ སྒྲ་གྲགས་ཡེ་ཤེས་རླུང་གི་རོལ་མོར་འཁྲོལ༔ ཡིད་རྟོག་ཏིང་འཛིན་འཁོར་འདས་མཉམ་པའི་ངང༔ རང་བཞིན་ཤེས་པའི་མཆོད་པ་འབུལ་ལོ་བཞེས༔ ཨོཾ་ཨཱཿཧཱུྃ༔དྷརྨ་དྷརྟུ་པཱུ་ཛ་ཧོ༔ དེ་ནས་བསྟོད་པ་བྱ་བ་ནི༔ ཨེ་མ་ཧོ༔ གྲུབ་བརྒྱའི་དབང་ཕྱུག་ཐང་སྟོང་རྒྱལ་པོ་ནི༔ ཆོས་སྐུ་སྐྱེ་མེད་ལོངས་སྐུ་གསལ་བའི་འོད༔ སྤྲུལ་སྐུ་བསྟན་འགྲོར་ཕན་བདེའི་དཔལ་དུ་ཤར༔ སྐུ་གསུམ་འདུ་འབྲལ་མེད་ལ་ཕྱག་འཚལ་བསྟོད༔ སྐུ་མཆོག་སྲ་བརྟན་མི་འཇིག་རྡོ་རྗེའི་ཆོས༔ གསུང་དབྱངས་གཅིག་ལས་དུ་མར་འཕྲོ་ཞིང་སྡུད༔ ཐུགས་གསང་ཆོས་དབྱིངས་བརྗོད་འབྲལ་སྙིང་རྗེའི་འཕྲུལ༔ འཆི་མེད་གྲུབ་བརྒྱའི་གཙོ་ལ་ཕྱག་འཚལ་བསྟོད༔ ཕྱོགས་བཞིར་འབྱུང་བཞིའི་ཚེ་བཅུད་སྡུད་ལ་དབང༔ དྲི་ཟ་གཤིན་རྗེ་ཀླུ་དབང་གནོད་སྦྱིན་འདུལ༔ ཡེ་ཤེས་མཁའ་འགྲོའི་སྡེ་བཞི་རྒྱལ་ཀུན་གྱི༔ གསང་གསུམ་བྱིན་རླབས་ཐོགས་མེད་སྩོལ་ལ་བསྟོད༔ འགུགས་འཆིང་སྡོམ་མྱོས་ལས་བཞིའི་ཕྲིན་ལས་ཀྱིས༔ བདུད་བཞིའི་བར་ཆད་མ་ལུས་དབྱིངས་སུ་འདུལ༔ ཁམས་གསུམ་དབང་སྡུད་སྲིད་གསུམ་ཟིལ་གནོན་པའི༔ ཚེ་ཡི་བར་ཆད་སྲུང་ལ་ཕྱག་འཚལ་བསྟོད༔ བྱིན་རླབས་མཆོག་སྩོལ་རིག་འཛིན་བླ་མ་དང་༔ དངོས་གྲུབ་མཆོག་སྦྱིན་ཡི་དམ་རྒྱུད་སྡེའི་ལྷ༔ ཕྲིན་ལས་མཆོག་འགྲུབ་ཌཱཀྐི་དམ་ཅན་ལ༔ འཆི་མེད་རིག་འཛིན་སྒྲུབ་ཕྱིར་གུས་པས་བསྟོད༔ བསྙེན་དང་སྒྲུབ་པ་ལས་སྦྱོར་རོ༔ གྲུབ་པའི་དབང་ཕྱུག་ཐུགས་གསང་ཡེ་ཤེས་སེམས༔ འཆི་མེད་ལྷ་ཡི་ཐུགས་ཀར་པད་ཉིའི་སྟེང་༔ པདྨ་དམར་པོ་རྡོ་རྗེ་རྩེ་ལྔའི་སྦུབས༔ ཧཱུྃ་སྨུག་མཐའ་ལ་གསང་སྔགས་གཟུངས་ཀྱིས་བསྐོར༔ འོད་འཕྲོས་འབྱུང་ལྔའི་དྭངས་མ་ཚུར་ལ་བསྡུས༔ རྔུབས་པའི་རླུང་ལ་ཡི་གེ་ཨོཾ༔ གནས་པ་ཨཱཿལ་འབྱིན་པ་ཧཱུྃ༔ ཡིད་བཟླས་འགོག་བཟླས་དབྱངས་ཀྱིས་བཟླས༔ ཨོཾ་ཨཱཿཧཱུྃ་མ་ཧཱ་གུ་རུ་བྷུ་མི་རཱ་ཛ་དྷརྟུ་ཨ་ཡུརྫྙཱ་ན་སརྦ་སིདྡྷི་ཕ་ལ་ཧཱུྃ༔ འབུམ་ཕྲག་ལྔ་བདུན་གྲངས་བསྙེན་ནོ༔ རྩ་སྔགས་བསྡུས་པ་འདི་བཞིན་ནོ༔ ཨོཾ་ཨཱཿཧཱུྃ་མ་ཧཱ་གུ་རུ་ཨ་ཡུརྫྙཱ་ན་སིདྡྷི་ཧཱུྃ༔ ཞེས་པ་བྱེ་བ་གསུམ་གྲངས་བཟླ༔ རྟགས་ནི་ཞལ་མཐོང་གསུང་ཐོས་ཤིང་༔ མི་དམིགས་ཏིང་འཛིན་མཉམ་བཞག་ངང༔ རྨི་ལམ་བུམ་བཅུད་བདུད་རྩི་འཐུང༔ ཉི་ཟླ་ཤར་དང་གཏེར་རྙེད་སོགས༔ དགེ་བའི་མཚན་མ་འབྱུང་བར་ངེས༔ དེ་ཚེ་སྒྲུབ་པའི་དམིགས་པ་ནི༔ སྔགས་ཕྲེང་གཡས་སུ་འཁོར་ལས་འོད་ཟེར་འཕྲོས༔ རབ་འབྱམས་རྒྱལ་བ་སྲས་བཅས་བྱིན་རླབས་དང་༔ ཁྱད་པར་ཚེ་ཡི་དྭངས་བཅུད་མ་ལུས་པ༔ ཨ་ནྲྀ་ཧཱུྃ་གསུམ་རྣམ་པར་འུབ་ཀྱིས་བསྡུས༔ བདག་གི་བླ་ཚེ་སྲོག་དབུགས་ཡར་བ་བཀུག༔ ཉམས་པ་གསོས་ཤིང་ཡར་ངོའི་ཟླ་ལྟར་འཕེལ༔ འཆི་མེད་ཚེ་ཡི་གྲུབ་པ་མཆོག་བརྙེས་གྱུར༔ ཉེ་བའི་བསྙེན་པ་འདི་བཞིན་བཟླ༔ ཨོཾ་ཨ་མ་ར་ཎི་ཛི་ཝནྟི་ཡེ་སྭཱ་ཧཱ༔ ཞེས་པ་འབུམ་ཕྲག་བདུན་དུ་བཟླ༔ སྒྲུབ་པའི་རྟགས་རྣམས་མྱུར་དུ་འབྱུང་༔ དེ་ནས་ལས་སྦྱོར་དམིགས་པ་ནི༔ ཐུགས་ལས་འོད་ཟེར་སྣ་ཚོགས་ཕྱོགས་བཅུར་འཕྲོས༔ མཁའ་འགྲོ་རིགས་བཞི་དྲི་ཟ་གཤིན་རྗེ་ཀླུ༔ གནོད་སྦྱིིན་རྣམས་ཀྱི་ལག་ནས་ཚེ་ཕྲོགས་ཏེ༔ ཧེད་ཀྱིས་སྔངས་དང་ཡེད་ཀྱིས་བརྒྱལ་བ་དང་༔ ཡུད་ཀྱིས་ཕྲོགས་པའི་བླ་ཚེ་སོར་ཆུད་གྱུར༔ ཚེ་གཟུངས་རྒྱས་པ་འབུམ་དྲུག་བཟླ༔ ཏིང་འཛིན་མེ་ལ་བཟླས་པ་རླུང་༔ མཉམ་པར་སྦྱོར་བའི་ཐབས་མཁས་ཀྱིས༔ འཆི་མེད་ཚེ་ཡི་མཆོག་འགྲུབ་འགྱུར༔ ས་མ་ཡཱ༔ རྒྱ་རྒྱ་རྒྱ༔ ཐུན་སྐབས་མཆོད་ཅིང་ལེགས་པར་བསྟོད༔ དངོས་གྲུབ་བླང་བའི་རིམ་པ་ནི༔ ཨེ་མ་ཧོ༔ བྱིན་རླབས་ཀུན་གྱི་རྩ་བ་བླ་མ་མཆོག༔ མཆོག་ཐུན་དངོས་གྲུབ་སྩོལ་བའི་ཡི་དམ་ལྷ༔ ལྷ་དང་མཁའ་འགྲོ་དམ་ཅན་ཀུན་འདུས་རྗེ༔ རྗེ་བཙུན་གྲུབ་དབང་ཐང་སྟོང་རྒྱལ་པོ་ཡི༔ མི་ཤིགས་སྐུ་ཡི་བྱིན་རླབས་ལུས་ལ་སྩོལ༔ འགག་མེད་གསུང་གི་བྱིན་རླབས་ངག་ལ་སྩོལ༔ བརྗོད་བྲལ་ཐུགས་ཀྱི་བྱིན་རླབས་ཡིད་ལ་སྩོལ༔ རྩ་སྔགས་ཤམ་དུ་འདི་ལྟར་བཏགས༔ ཀཱ་ཡ་ཝཀྐ་ཙིཏྟ་སིདྡྷི་ཧཱུྃ༔ ས་མ་ཡཱ༔ རྗེས་ལ་ཚོགས་ཀྱི་འཁོར་ལོ་བསྐོར༔ དང་པོ་བྱིན་གྱིས་བརླབ་པ་ནི༔ ཟག་མེད་ཨ་མྲྀ་ཏ་ཡིས་བྲན༔ རཾ་ཡཾ་ཁཾ༔ ཚོགས་སྣོད་ཡི་གེ་ཨོཾ་ལས་རིན་ཆེན་སྣོད༔ ཚོགས་རྫས་ཨཱཿལས་ཟག་མེད་བདུད་རྩིར་གྱུར༔ ཧཱུྃ་གིས་ཀུན་བཟང་མཆོད་པའི་སྤྲིན་ལྟ་བུ༔ ལྷ་ཚོགས་དབང་ལྔ་དགྱེས་པའི་རྫས་སུ་གྱུར༔ ཨོཾ་ཨཱཿཧཱུྃ༔ ལན་གསུམ༔ དེ་ནས་ཚོགས་ཞིང་སྤྱན་འདྲེན་ནི༔ ཧྲཱིཿ འོག་མིན་རྣམ་དག་སྤྲུལ་པའི་ཞིང་ཁམས་ནས༔ སྐུ་གསུམ་བླ་མ་རིག་འཛིན་བརྒྱུད་པར་བཅས༔ ཡི་དམ་ལྷ་ཚོགས་མཁའ་འགྲོ་ཆོས་སྐྱོང་དང༔ ཁྱད་པར་འཆི་མེད་རིག་འཛིན་ཐང་སྟོང་རྒྱལ༔ ཚེ་ཡི་དངོས་གྲུབ་སྩོལ་ཕྱིར་གཤེགས་སུ་གསོལ༔ ཨོཾ་གུ་རུ་དྷེ་ཝ་ཌཱཀྐི་ནི་བྷུ་མི་རཱ་ཛ་དྷརྟུ་བཛྲ་ཨ་བེ་ཤ་ཡ་ཕེཾ་ཕེཾ༔ དང་པོ་ཚོགས་ཕུད་འབུལ་བ་ནི༔ ཧོ༔ སྲིད་ཞིའི་ཁམས་ཀྱི་འདོད་ཡོན་ལྔ༔ ཟག་མེད་བདུད་རྩིར་རབ་སྦྱར་ནས༔ ཚོགས་རྫས་རྟེན་དང་དབྱེར་མེད་པར༔ རྩ་གསུམ་ཚེ་ཡི་ལྷ་ལ་འབུལ༔ བཞེས་ནས་འཆི་མེད་དངོས་གྲུབ་སྩོལ༔ ག་ན་ཙཀྲ་པཱུ་ཛ་ཁཱ་ཧི༔ གཉིས་པ་ཚོགས་བཤགས་འབུལ་བ་ནི༔ ཧོ༔ བདག་གི་ཚེ་རབས་ཐོག་མེད་ནས༔ སྒོ་གསུམ་བག་མེད་དམ་ཉམས་པ༔ སྙིང་ནས་འགྱོད་པ་དྲག་པོས་བཤགས༔ དག་ནས་ཚངས་པའི་དངོས་གྲུབ་སྩོལ༔ སརྦ་ས་མ་ཡཱ་ཤུདྡྷེ་ཨ༔ དེ་ནས་ཚོགས་རྫས་ཐ་མ་ལ༔ ལོག་འདྲེན་བཀུག་གཞུག་སྒྲོལ་གྲིས་གཏུབས༔ ཧཱུྃ་ཧཱུྃ༔ ཞིང་བཅུའི་དགྲ་བགེགས་ཐུགས་རྗེ་ལྕགས་ཀྱུས་བཀུག༔ བྱམས་པས་འཆིངས་ཤིང་དགའ་བའི་སྒྲོག་ཏུ་བཅུག༔ བཏང་སྙོམས་ཆེན་པོས་མྱོས་སྡོམ་མཚོན་ཆས་བསྒྲལ༔ ལས་ངན་རྒྱུན་བཅད་གདོད་མའི་དབྱིངས་སུ་སྤོར༔ སརྦ་ཤ་ཏྲུན་མཱ་ར་ཡ་ཕཊ༔ ཤ་ཁྲག་དྭངས་མ་བདུད་རྩིར་བྱིན་བརླབས་ནས༔ སྐྱེ་མེད་དབྱིངས་ཀྱི་ལྷ་ཚོགས་ཞལ་དུ་བསྟབས༔ ཧ་ལ་པཉྩ་པཱུ་ཛ་ཁཱ་ཧི༔ ཞེས་བསྟབས་རྣལ་འབྱོར་ཕུང་ཁམས་ལྷར༔ ཚོགས་རྫས་དགའ་བཞིའི་ཡེ་ཤེས་ཀྱི༔ ཤེར་དབང་བཟའ་བའི་དམ་ཚིག་སྤྱད༔ དེ་ནས་ལྷག་མ་བསྔོ་བ་ནི༔ ཁ་ཕྲུ་གདབ་ཅིང་འདི་སྐད་དོ༔ ཕེཾ༔ འཆི་མེད་དཀྱིལ་འཁོར་ལྷག་སྡུད་ཕོ་ཉ་བ༔ མ་བདུན་སྲིང་བཞི་འབར་མ་ཆེན་མོ་བརྒྱད༔ དཀར་ནག་གིང་ལིང་དུར་ཁྲོད་གནས་ཉུལ་རྣམས༔ དཔལ་གྱི་ཕ་འབབ་ཚོགས་ལྷག་འདི་བཞེས་ལ༔ ལས་བཞིའི་ཕྲིན་ལས་གང་བཅོལ་འགྲུབ་པར་མཛོད༔ སརྦ་ཨུཥྩི་ཊ་བྷ་ལིང་ཏ་ཁཱ་ཧི༔ རྗེས་ལ་ཐུགས་དམ་བསྐུལ་བ་ནི༔ ཧཱུྃ་ཧྲཱིཿ དམིགས་མེད་སྟོང་ཆེན་ཆོས་ཀྱི་དབྱིངས་ཉིད་ལས༔ ཐུགས་རྗེ་ཆེན་པོར་བྱམས་སྡང་མི་མངའ་ཡང་༔ ལོག་རྟོག་འཁྲུལ་བའི་ལས་ངན་རྒྱུན་གཅོད་ཕྱིར༔ མངོན་སྤྱོད་དྲག་པོའི་ཕྲིན་ལས་དུས་ལ་བབས༔ སྐྱེ་མེད་ཀློང་ནས་སྐུ་ནི་གར་དགུས་སྒེག༔ འགག་མེད་ཀློང་ནས་གསུང་ནི་ཧཱུྃ་ཕཊ་ལྡིར༔ བརྗོད་མེད་ཀློང་ནས་ཐུགས་ནི་སྙིང་རྗེས་ཁྲོས༔ སྒྲོལ་བྱེད་ཕོ་ཉས་ལོག་འདྲེན་དགུགས་ཤིང་གཟིར༔ ཟ་བྱེད་དཔའ་མོས་ཉམས་པའི་ལུས་སྲོག་རོལ༔ ཚེ་ཡི་བར་ཆད་བདུད་སྡེ་རྨིང་མེད་བརླགས༔ གྲུབ་བརྒྱའི་ཁྱུ་མཆོག་ཐང་སྟོང་རྒྱལ་པོ་ཡི༔ བརྟུལ་ཞུགས་དྲག་པོས་དགྲ་བགེགས་ཚར་ཆོད་ཅིག༔ སརྦ་དུཥྚན་མཱ་ར་ཡ་རྦད༔ ཆད་མདོ་བསྒྲགས་ཤིང་གཏོར་མ་འབུལ༔ ཧཱུྃ་ཧྲཱིཿ ཡེ་ཐོག་གྲོལ་གཞི་ཐོག་མའི་དུས་ཀྱི་ཚེ༔ ཤེས་རིག་སྟོན་པ་ཀུན་བཟང་ཆོས་ཀྱི་སྐུས༔ རང་གསལ་ལྷན་སྐྱེས་ཡེ་ཤེས་ལྔ་ཡི་ལྷར༔ རང་བབས་རྩོལ་བྲལ་དགོངས་པས་བྱིན་བརླབས་ནས༔ གློ་བུར་དུག་ལྔའི་འདྲེ་གདོན་ཚར་ཆོད་ཅེས༔ བརྗོད་བྲལ་ཀློང་ནས་ཐ་ཚིག་དང་པོ་བསྒྲགས༔ ཧཱུྃ་བྷྱོ༔ དེ་འོག་རང་སྣང་ལོངས་སྐུའི་ཞིང་ཁམས་ལྔར༔ རིག་པ་འཁྲུལ་བྲལ་ཤེལ་ལ་འཇའ་ཚོན་བཞིན༔ ལྔ་ལྡན་ལོངས་སྐུའི་སྟོན་པ་ཡབ་ཡུམ་གྱིས༔ རང་གསལ་ས་བཅུའི་སེམས་དཔའི་ཚོགས་རྣམས་ལ༔ རང་བབས་གཉུག་མའི་འོད་ཟེར་ཆེན་པོའི་དབང་༔ བསྐུར་ཐོབ་བྲལ་བར་བརྡའ་ཡིས་བྱིན་བརླབས་ཚེ༔ ང་བདག་ལྷན་སྐྱེས་ཤེས་སྒྲིབ་ཕྲ་མོའི་བགེགས༔ གཞི་མེད་ཀློང་དུ་རྨིང་མེད་མཛོད་ཅིག་ཅེས༔ གསལ་སྣང་འགགས་མེད་ཐ་ཚིག་གཉིས་པ་བསྒྲགས༔ ཧཱུྃ་བྷྱོ༔ དེ་འོག་གྲོལ་འཁྲུལ་སོ་སོར་གྱེས་པའི་ཚེ༔ གདུལ་བྱའི་ཞིང་དུ་འདུལ་བྱེད་སྟོན་པ་ཤར༔ དཀར་ནག་ལྷ་འདྲེས་ཕན་གནོད་སྒྱུ་མའི་འཕྲུལ༔ རྟོག་པའི་རྗེས་འགྲོ་སྣ་ཚོགས་བསྟན་པའི་དུས༔ ཞི་དང་ཁྲོ་བོ་ཆགས་པའི་རྣམ་རོལ་གྱིས༔ བསྟན་འགྲོར་ཕན་བདེའི་དམ་བཅའ་ལྷུར་བླངས་ཚེ༔ བཀའ་གཏེར་སྲུང་མ་དམ་ཅན་རྒྱ་མཚོ་ཡིས༔ དམ་བཅས་བཞིན་དུ་གང་བཅོལ་ཕྲིན་ལས་མཛོད༔ ཨ་ཡ་མ་དུ་རུ་ཙ་ཤ་ན་བྷ་ལིང་ཏ་ཁཱ་ཧི༔ དེ་ནས་བཤལ་ཆུ་བསྟན་མར་བྲན༔ བདུད་རྩིར་བྱིན་བརླབས་འདི་སྐད་དོ༔ ཧཱུྃ་ཧྲཱིཿ ཕྱི་ལྟར་ལོ་སྐོར་ཟླ་བ་བཅུ་གཉིས་དང་༔ ནང་ལྟར་དུས་སྦྱོར་འཕོ་བ་བཅུ་གཉིས་དང་༔ གསང་བ་འཁྲུལ་གཞི་རྟེན་འབྲེལ་བཅུ་གཉིས་པོ༔ གནས་དག་མ་མོ་བསྟན་མ་བཅུ་གཉིས་རྣམས༔ མཚན་མ་རྫས་ཀྱི་གཏོར་མའི་བཤལ་ཆུ་བཞེས༔ དུས་སྦྱོར་རླུང་སྲོག་དབུ་མའི་དབྱིངས་སུ་ཚུད༔ ས་བཅུའི་ཡོན་ཏན་བཅུ་གཉིས་མངོན་གྱུར་མཛོད༔ མ་མ་ཧྲིང་ཧྲིང་བྷ་ལིང་ཏ་ཁཱ་ཧི༔ གཏོར་གཞོང་འོག་ཏུ་བྱུར་སྲི་མནན༔ ཧཱུྃ་ཧཱུྃ༔ གཏོར་གཞོང་རི་རབ་གླིང་བཞིའི་འོག༔ དགྲ་བགེགས་བྱུར་སྲི་མ་ལུས་མནན༔ བསྐལ་པའི་བར་དུ་ཁྱོད་མི་གཏོང༔ ཇི་སྲིད་བྱང་ཆུབ་སེམས་སྐྱེས་ནས༔ ཐར་པའི་མྱུ་གུ་གསར་འཁྲུངས་ཚེ༔ གསང་ཆེན་ཆོས་ཀྱི་གདུལ་བྱར་འགྱུར༔ ཨོཾ་ལཾ༔ ཨཱཿལཾ༔ ཧཱུྃ་ལཾ༔ སྟྭཾ་བྷ་ཡ་ནན༔ དེ་ནས་མཆོད་བསྟོད་དངོས་གྲུབ་བླངས༔ ནོངས་པ་བཤགས་པ་འདི་ལྟར་བྱ༔ ཨོཾ༔ ལུས་ཀྱི་མི་དགེས་སྐུ་ཡི་དམ་ཚིག་ཉམས༔ གསལ་དག་བརྟན་ཐོབ་བསྐྱེད་རིམ་ཀློང་དུ་བཤགས༔ ཨཱཿངག་གི་མི་དགེས་གསུང་གི་དམ་ཚིག་ཉམས༔ རླུང་སྔགས་རྡོ་རྗེའི་བཟླས་བརྗོད་ཀློང་དུ་བཤགས༔ ཧཱུྃ༔ཡིད་ཀྱི་མི་དགེས་ཐུགས་ཀྱི་དམ་ཚིག་ཉམས༔ དཔེ་དོན་འོད་གསལ་རྫོགས་རིམ་ཀློང་དུ་བཤགས༔ ཡི་གེ་འབྲུ་གསུམ་བརྒྱ་ཕྲག་དང་༔ མཇུག་ཏུ་ཡི་གེ་བརྒྱ་པ་བཟླ༔ དེ་ནས་བསྐྱེད་རིམ་བསྡུ་བ་ནི༔ ཧོ༔ ཕྱི་སྣོད་འོད་ཞུ་འཁོར་གྱི་ལྷ་ལ་ཐིམ༔ དེ་ཡང་འོད་ཞུ་གཙོ་བོ་དེ་ཐུགས་སྲོག༔ རིམ་པས་སྟོང་ཆེན་ནཱ་དའི་དབྱིངས་སུ་བསྡུ༔ གདོད་ནས་མ་སྐྱེས་སྤྲོས་བྲལ་ཀློང་དུ་ཨཱཿ སླར་ཡང་རྗེས་ཐོབ་གྲུབ་པའི་བརྟུལ་ཞུགས་ཀྱིས༔ སྤྱོད་ལམ་རྣམ་བཞིའི་འགྲོ་བའི་དོན་བྱའོ༔ དེ་ནས་དགེ་བ་བསྔོ་བ་ནི༔ ཨེ་མ་ཧོ༔ བདག་གཞན་འགྲོ་བ་ཀུན་གྱིས་དུས་གསུམ་དུ༔ ཟག་བཅས་ཟག་མེད་དགེ་བ་ཅི་བསགས་པ༔ མ་གྱུར་འགྲོ་བའི་དོན་དུ་ཡོངས་བསྡུས་ནས༔ རྣམ་གྲོལ་རྫོགས་སངས་རྒྱས་པའི་རྒྱུ་རུ་བསྔོ༔ མཐར་ནི་སྨོན་ལམ་འདི་ལྟར་གདབ༔ ཨེ་མ་ཧོ༔ འཆི་མེད་མགོན་པོ་ཐང་སྟོང་རྒྱལ་པོ་ཡི༔ ལྷ་སྔགས་ཏིང་འཛིན་གཅིག་ཏུ་བརྩོན་པའི་མཐུས༔ བསྟན་འཛིན་ཞབས་བརྟན་དུས་མིན་བར་ཆད་སེལ༔ བདག་གཞན་ཚེ་ཡི་རིག་འཛིན་མཆོག་འགྲུབ་ཤོག༔ མཐའ་རྒྱན་ཤིས་བརྗོད་བྱ་བ་ནི༔ ཨེ་མ་ཧོ༔ སྐུ་གསུམ་ཞིང་ནས་འགྲོ་བའི་དོན་ལ་དགོངས༔ ཚེ་མཐའ་ཡས་པ་ཨོ་རྒྱན་ཐང་རྒྱལ་རྗེའི༔ གསང་གསུམ་མི་ཟད་རྒྱན་གྱི་འཁོར་ལོ་ཡིས༔ དུས་གསུམ་ཀུན་ཏུ་དགེ་བའི་ཤིས་པ་སྩོལ༔ ཚེ་ཡི་བར་ཆད་ཞི་བའི་བཀྲ་ཤིས་ཤོག༔ ཚེ་བཅུད་གོང་དུ་འཕེལ་རྒྱས་བཀྲ་ཤིས་ཤོག༔ ཚེ་དཔལ་དབང་དུ་འདུ་བའི་བཀྲ་ཤིས་ཤོག༔ ཚེ་བདུད་དབྱིངས་སུ་སྒྲོལ་ནུས་བཀྲ་ཤིས་ཤོག༔ གཟུགས་སྣང་ཚེ་དཔག་མེད་པའི་ལྷ་རུ་ཤེས༔ སྒྲ་གྲགས་འཆི་མེད་མགོན་པོའི་གསུང་དུ་གྲོལ༔ དྲན་རྟོག་འཇིགས་བྲལ་གཉུག་མའི་ཀློང་དུ་དག༔ དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག༔ ས་མ་ཡཱ༔ རྒྱ་རྒྱ་རྒྱ༔ ཤིན་ཏུ་ཟབ་མྱུར་བྱིན་རླབས་ཆེ༔ དགོངས་གཏེར་ཐུགས་ཀྱི་ཐིག་ལེའི་བཅུད༔ མོས་གུས་བརྡའ་གྲོལ་རྐྱེན་གྱིས་བསྐུལ༔ མཚོ་རྒྱལ་ཌཱཀྐིའི་བྱིན་རླབས་ལས༔ ཨོ་རྒྱན་མི་གཟུགས་ཐང་རྒྱལ་གྱི༔ ཚེ་སྒྲུབ་ཁྱད་འཕགས་བསླུ་མེད་ཆོས༔ ཤིན་ཏུ་གསང་ཞིང་ཉམས་བླངས་ན༔ དུས་མིན་འཆི་བའི་གེགས་ལས་གྲོལ༔ བཀའ་སྲུང་སྔགས་ཀྱི་བདག་མོར་གཏད༔ གུ་ཧྱ༔ ཞེས་པའང་སྐལ་ལྡན་ལུང་རིག་གླིང་པའི་དག་སྣང་མའོ།།