ཐང་སྟོང་རྒྱལ་པོའི་ཚེ་དབང་འབྱུང་ལྔའི་བཅུད་དྲིལ།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ ཐང་སྟོང་རྒྱལ་པོའི་ཚེ་དབང་འབྱུང་ལྔའི་བཅུད་དྲིལ་བཞུགས་སོ༔

ཐུགས་དམ་ཚེ་ཡི་ལྷ་ལ་འདུད༔ ཕྱི་ལྟར་རྣལ་འབྱོར་ཐང་སྟོང་རྒྱལ༔ ནང་དུ་འཕགས་པ་སྤྱན་རས་གཟིགས༔ གསང་བ་རྟ་མགྲིན་དབང་གི་རྒྱལ༔ ཡང་གསང་པད་འབྱུང་ཚེ་དཔག་མེད༔ དབྱེར་མེད་གཅིག་བསྡུས་ཐང་རྒྱལ་གྱི༔ ཚེ་དབང་འབྱུང་ལྔའི་བཅུད་དྲིལ་བསྟན༔ ས་མ་ཡཱ༔ དབེན་པའི་གནས་སུ་མཎྜལ་སྟེང་༔ ཚོམ་བུ་ལྷ་གྲངས་བཀོད་པའི་སྟེང་༔ དབུས་སུ་བུམ་པ་བཅུད་ལྡན་དང་༔ ཤར་དུ་རྡོ་རྗེ་ལྷོར་གཏོར་མ༔ ནུབ་ཏུ་དྲིལ་བུ་བྱང་ཕུར་བུ༔ སྐུ་དང་སྒྲུབ་སྔགས་རིམ་པ་གསུམ༔ ཚེ་རིལ་ཚེ་ཆང་མདའ་དར་བཀོད༔ ཕྱི་ནང་མཆོད་པས་མཐའ་ནས་བསྐོར༔ བསྙེན་སྒྲུབ་གཞུང་བཞིན་བུམ་པ་རུ༔ ལྷ་བསྒོམ་སྔགས་བཟླས་མཆོད་ཅིང་བསྟོད༔ དབང་བླངས་སློབ་མར་བདུད་རྩི་འཁྱིལ༔ ལས་བུམ་ཁྲུས་བྱ་བགེགས་གཏོར་བཏང་༔ སྲུང་འཁོར་སྤྱི་མཐུན་ཆོས་བཤད་དང་༔ གྲུབ་དབང་གསང་གསུམ་ལོ་རྒྱུས་བཤད༔ མཎྜལ་ཕུལ་ནས་གསོལ་གདབ་ནི༔ འཆི་མེད་རིག་འཛིན་ཐང་སྟོང་རྒྱལ༔ བདག་ཅག་སྲོག་གི་བར་ཆད་ལ༔ འཇིགས་པས་ཁྱེད་ལ་གསོལ་འདེབས་ན༔ བརྩེ་ཆེན་ཐུགས་ཀྱིས་ཚེ་དབང་སྩོལ༔ ལན་གསུམ་ཞུ་ཞིང་སློབ་དཔོན་གྱིས༔ སྐྱབས་སེམས་སྡོམ་བཟུང་དམིགས་པ་འབོག༔ སློབ་མས་སྐྱབས་སེམས་ཚོགས་བསགས་བྱ༔ དངོས་གཞི་བྱིན་རླབས་འཇུག་པའི་སྒོ༔ སློབ་དཔོན་ཐུགས་རྗེའི་འོད་ཟེར་གྱིས༔ སློབ་མའི་དངོས་འཛིན་དྲི་མ་སྦྱངས༔ སྐད་ཅིག་གྲུབ་དབང་སྐུ་རུ་བསྒོམ༔ ཐུགས་ཀར་ཨོ་རྒྱན་ཚེ་མཐའ་ཡས༔ པད་ཞྭ་བེར་ཕོད་ཚེ་བུམ་ཅན༔ མཚོ་རྒྱལ་མནྡྷ་ར་བ་འཁྲིལ༔ གནས་གསུམ་འོད་ཟེར་རབ་འཕྲོས་པས༔ རྔ་ཡབ་གླིང་ནས་སྤྱན་དྲངས་བསམ༔ བྱིན་འབེབས་ཚིག་འདོན་སྤོས་རོལ་བྱ༔ ༈ དེ་ནས་བྱིན་རླབས་ཀྱི་གཞི་ཡེ་ཤེས་དབབ་པ་ཡིན་པས་དེའི་སླད་དུ་དམིགས་པ་འདི་བཞིན་དུ་མཛོད་ཅིག །ཨོཾ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅ཧཾ༔ སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་གནས་ཁང་དག་པའི་ཞིང་ཁམས་པདྨ་འོད་ཀྱི་གཞལ་ཡས་ཁང་དྭངས་གསལ་སྒྲིབ་པ་མེད་པར་གསལ་བའི་དབུས་སུ། ཁྱེད་རང་གི་རིག་པ་ཡི་གེ་ཧཱུྃ་སྨུག་ནག་ཡོངས་སུ་གྱུར་པ་ལས། །རིན་ཆེན་ཁྲི་རྐང་ཁྲི་སྙན་ས་ལེའི་པགས་པས་གཡོགས་པའི་སྟེང་། སྣ་ཚོགས་པདྨ་དང་ཉི་ཟླ་བརྩེགས་པའི་གདན་ལ་རྒྱལ་ཀུན་འདུས་པའི་སྤྱི་གཟུགས་གྲུབ་པའི་དབང་ཕྱུག་ཐང་སྟོང་རྒྱལ་པོ་ཁྲོ་འཛུམ་བཞད་པའི་ཉམས་ཅན། ཕྱག་གཡས་སྐྱབས་སྦྱིན་ཕྱག་རྒྱས་ལྕགས་སྒྲོག་བསྣམས་ཤིང་། གཡོན་པས་མཉམ་བཞག་ཟག་མེད་བདུད་རྩིས་བཀང་བའི་ཚེ་བུམ་ཐུགས་ཀར་འཛིན་ཅིང་། ཞབས་གཉིས་ཕྱེད་སྐྱིལ་རོལ་པའི་སྟབས་ཀྱིས་འགྱིང་བ། སྐུ་སྟོད་ལ་སྒོམ་ཐག་དབང་མདོག་དཀྲིས་ཤིང་རས་དཀར་གྱི་བླ་གོས་འཆང་བ། སྐུ་སྨད་ལ་ཨཾ་རག་ནམ་མཁའི་མདོག་ཅན་གསོལ་བ། རྫི་སྨིན་སྨ་ར་དུང་ལྟར་དཀར་ཞིང་དབུ་སྐྲ་ཐོར་ཅོག་དར་དམར་གྱི་སྐྲ་ཆིངས་ཅན། གཞན་སྣང་ཟིལ་གྱིས་གནོན་པའི་བརྡར་སྤྱན་རྩ་དམར་པོས་ཧུ་རེ་གཟིགས་པ་དེ་ལྟ་བུ་གསལ་བའི་ཐུགས་ཀར་ཨོ་རྒྱན་ཚེ་དཔག་མེད་དཀར་དམར་བཅུ་དྲུག་ལོན་པའི་ལང་ཚོས་སྒེག་ཅིང་། ཞལ་གཅིག་ཕྱག་གཉིས་མཉམ་བཞག་གི་ཕྱག་རྒྱས་ཚེ་བུམ་བདུད་རྩིས་བཀང་བ་ཐུགས་ཀར་འཛིན་པ་སྐུ་ལ་དར་དཀར་གྱི་གསང་གོས། ཟབ་བེར་མཐིང་ཀ ཆོས་གོས་དམར་པོ་སྟེ་ཐེག་གསུམ་རྫོགས་པའི་ན་བཟས་བཀླུབས་ཤིང་། དབུ་ཞྭ་པདྨ་མཐོང་གྲོལ་རྒོད་སྒྲོ་དར་སྣས་བརྒྱན་པ། ཞབས་གཉིས་བརྐྱང་བསྐུམ་དུ་བཞུགས་པའི་གཡས་སུ་མནྡྷ་ར་བ་དང་། གཡོན་དུ་ཡེ་ཤེས་མཚོ་རྒྱལ་བདེ་སྟོང་དབྱེར་མེད་ཀྱི་ཀློང་དུ་ཟག་བྲལ་ཡེ་ཤེས་མཉམ་པ་ཉིད་དུ་འཁྲིལ་བ། དེ་ལྟར་དུ་གསལ་བའི་སྤྱི་བོར་རྒྱལ་བ་ཀུན་གྱི་སྐུའི་ངོ་བོ་ཨོཾ་དཀར་པོ། མགྲིན་པར་གསུང་གི་ངོ་བོ་ཨཱཿདམར་པོ། ཐུགས་ཀར་ཐུགས་ཀྱི་ངོ་བོ་ཧཱུྃ་མཐིང་ཀ་གསུམ་གསལ་བ་ལས་འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས་པས་ལྷོ་ནུབ་པདྨ་འོད་སོགས་སྐུ་གསུམ་དག་པའི་ཞིང་ན་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་གྲུབ་བརྒྱའི་སྤྱི་གཟུགས་ཧེ་རུ་ཀ་པའི་སྐུ་ཡིག་ཕྱག་མཚན་གྱི་རྣམ་པར་ཁ་བ་བུ་ཡུག་འཚུབས་པ་བཞིན་བྱོན་ནས་བསྐྱེད་པའི་སྐུ་ལ་སིབ་སིབ་ཐིམ་པའི་མོས་པ་མཛོད་ཅིག །ཧཱུྃ་ཧྲཱིཿ བྱིན་ཆེན་ངོ་མཚར་ཁྱད་པར་འཕགས་པའི་གནས། །བདེ་ཆེན་ཞིང་དང་རི་བོ་པོ་ཊ་ལ། །པདྨ་འོད་དང་གྲུབ་པའི་གནས་རྣམས་ནས། །སྣང་བ་མཐའ་ཡས་འཕགས་པ་སྤྱན་རས་གཟིགས། །པདྨ་འབྱུང་གནས་གྲུབ་ཆེན་ཐང་སྟོང་རྒྱལ། །འཆི་མེད་གྲུབ་པའི་ལྷ་དང་རིག་པ་འཛིན། །གནས་འདིར་སྤྱན་འདྲེན་བྱིན་ཆེན་དབབ་ཏུ་གསོལ། །འགྱུར་མེད་སྐུ་ཡི་བྱིན་ཆེན་ལུས་ལ་ཕོབ། །འགག་མེད་གསུང་གི་བྱིན་ཆེན་ངག་ལ་ཕོབ། །འཁྲུལ་མེད་ཐུགས་ཀྱི་བྱིན་ཆེན་ཡིད་ལ་ཕོབ། །ཚེ་འདིར་ཕྱག་རྒྱ་ཆེན་པོའི་དངོས་གྲུབ་ཀྱིས། །དོན་གཉིས་ལྷུན་གྱིས་གྲུབ་པའི་བྱིན་ཆེན་ཕོབ། །ཨོཾ་ཨཱཿཧཱུྃ་མ་ཧཱ་གུ་རུ་བྷུ་མི་རཱ་ཛ་དྷརྟུ་ཨཱ་ཡུརྫྙཱ་ན་སརྦ་སིདྡྷི་ཕ་ལ་ཧཱུྃ། རྩ་སྔགས་ཤམ་བུར་ཛྙཱ་ན་བཛྲ་ཨ་བེ་ཤ་ཡ་ཕེཾ་ཕེཾ་ཧྲཱིཾ་ཧྲཱིཾཿ ཞེས་གདུང་ཤུགས་དྲག་པོ་དང་བཅས་པས་རོལ་མོ་དྲག་ཏུ་འཁྲོལ་ལ་བྱིན་ཆེན་དབབ་པར་བྱའོ།། ༈ སློབ་མར་བསྟིམས་ནས་སྔགས་རྒྱས་བཏབ༔ བདག་དང་སློབ་མ་ལྷར་གསལ་བའི༔ གནས་ལྔ་ལས་འཕྲོས་འོད་ཟེར་གྱིས༔ འབྱུང་ལྔ་རྒྱལ་དང་དེ་སྲས་དང་༔ སེམས་ཅན་ཀུན་གྱི་ཚེ་བཅུད་བསྡུས༔ དར་སྣ་ལྔ་ཡི་མདའ་དར་གཡབ༔ ཚེ་འགུགས་འདོན་ཅིང་ཚེ་ཉམས་དང་༔ བྲོས་འཐོར་ཡར་གས་སོར་ཆུད་ནས༔ ཚེ་ཡི་རིག་འཛིན་ཐོབ་བསམ་བསྟིམས༔ སླར་ཡང་སློབ་མས་མཎྜལ་ཕུལ༔ ཀྱཻ་རིག་འཛིན་གྲུབ་ཐོབ་ཡོངས་ཀྱི་རྗེ༔ ཚེ་དཔག་མེད་མགོན་ཐང་སྟོང་རྒྱལ༔ སྐུ་གསུང་ཐུགས་ཡོན་ཕྲིན་ལས་ཀྱི༔ རྗེས་གནང་བྱིན་རླབས་བདག་ལ་སྩོལ༔ བླ་མས་བུམ་པ་སྤྱི་བོར་བཞག༔ ཧཱུྃ༔ བུམ་པའི་རང་བཞིན་བདེ་གཤེགས་ཕོ་བྲང་ལ༔ བུམ་བཅུད་ཚེ་ལྷ་རིག་འཛིན་འོད་དུ་ཞུ༔ སློབ་མའི་ཚངས་བུག་ནས་ཞུགས་ལུས་ཀུན་གང༔ དུས་མིན་འཆི་བའི་བར་ཆད་ཀུན་སེལ་ཤོག༔ རྩ་སྔགས་ཤམ་བུར་ཀཱ་ཡ་ཨ་བྷི་ཥིཉྩ་ཧཱུྃ༔ དེ་ནས་རྗེས་འབྲེལ་ཚེ་རིལ་བྱིན༔ ཧྲཱིཿ དཀར་མངར་ཚེ་ཡི་བཅུད་འདྲིལ་རིལ་བུ་འདི༔ སྔོན་གྱི་དྲང་སྲོང་གྲུབ་པའི་ཚེ་ཡི་ཟས༔ སློབ་མའི་མགྲིན་པ་ནས་ཞུགས་ལུས་ཀུན་གང༔ དུས་མིན་འཆི་བའི་ཚེ་གེགས་ལས་གྲོལ་ཤོག༔ རྩ་སྔགས་ཤམ་བུར་ཨ་ཡུ་ར་ས་ཨ་བྷི་ཥིཉྩ་ཧཱུྃ༔ དྲིལ་བུ་མགྲིན་པར་བཞག་བྱས་ཏེ༔ ཧྲཱིཿ ཆོས་ཀྱི་དབྱངས་སྙན་གསུང་དབྱངས་དྲིལ་བུའི་སྒྲས༔ ཚེ་ལ་མོས་པ་སློབ་མའི་ཚེ་སྲོག་ལ༔ བར་ཆད་བདུད་ཀྱི་གྲོས་ངན་མཐར་བསྐྲད་ནས༔ ཚེ་འདིར་ཆོས་རྔས་བསྟན་འགྲོའི་གསོ་བྱེད་ཤོག༔ རྩ་སྔགས་ཤམ་བུ་ཝཀྐ་ཨ་བྷི་ཥིཉྩ་ཧཱུྃ༔ དེ་དང་རྗེས་འབྲེལ་ཚེ་ཆང་བྱིན༔ ཧྲཱིཿ མངར་གསུམ་དྭངས་མའི་བཅུད་བསྡུས་ཚེ་ཡི་ཆང་༔ རིག་སྔགས་གྲུབ་པ་རྣམས་ཀྱི་ཚེ་ཡི་སྐྱེམས༔ སློབ་མའི་ངག་གི་འཁོར་ལོར་ལེགས་བྱིན་པས༔ དུས་མིན་ཚེ་ཡི་བར་ཆད་གྲོལ་བར་ཤོག༔ རྩ་སྔགས་ཤམ་བུར་ཨ་ཡུ་གནྡྷེ་ཨ་བྷི་ཥིཉྩ་ཧཱུྃ༔ རྡོ་རྗེ་དར་སྔོན་སྙིང་ཁར་གཏུགས༔ ཧྲཱིཿ དུས་གསུམ་རྟོག་པས་མི་ཤིགས་ཆོས་བདུན་གྱི༔ རང་བཞིན་རིག་པ་རྟག་བརྟན་མཚོན་པའི་བརྡ༔ རྡོ་རྗེ་རྩེ་ལྔ་སྙིང་གར་དབང་བསྐུར་བས༔ ཀ་དག་འཕོ་མེད་རྡོ་རྗེའི་ཚེ་ཐོབ་ཤོག༔ གཏོར་མ་སྐུ་གཟུགས་དང་བཅས་སྤྱི་བོར་བཞག༔ ཧཱུྃ་ཧྲཱིཿ སྒྲུབ་པའི་གཏོར་མ་རྟ་མཆོག་ཧེ་རུ་ཀ༔ པདྨ་འབྱུང་གནས་ཚེ་དཔག་མེད་མགོན་དང་༔ དབྱེར་མེད་ཐང་སྟོང་རྒྱལ་པོའི་དབང་བསྐུར་བས༔ ཚེ་འདིར་མཁའ་སྤྱོད་འགྲུབ་པའི་དཔལ་ཐོབ་ཤོག༔ རྩ་སྔགས་ཤམ་བུར་ཀཱ་ཡ་ཝཀྐ་ཙིཏྟ་ཨ་བྷི་ཥིཉྩ་ཧཱུྃ༔ ཕུར་པ་གནས་ལྔར་དབང་བསྐུར་ཏེ༔ ཧྲཱིཿ ལུས་ཀྱི་གནས་ལྔ་རྡོ་རྗེའི་གྲོང་ཁྱེར་དུ༔ ཕྱི་རོལ་འདྲེ་ལྔའི་བར་ཆད་སྲུང་བ་དང་༔ བདུད་བཞི་ལོག་འདྲེན་དབྱིངས་སུ་སྒྲོལ་བའི་ཕྱིར༔ རྟ་མཆོག་སྒྲུབ་ཕུར་དབང་གིས་གེགས་སེལ་ཤོག༔ རྩ་སྔགས་ཤམ་བུར་ཀཱི་ལ་ཡ་ཨ་བྷི་ཥིཉྩ་ཧཱུྃ༔ རྒྱས་གདབ་ལ་སོགས་སྤྱི་དང་མཐུན༔ མཐའ་རྟེན་རིན་ཆེན་རྫས་རྟགས་བྱིན༔ མེ་ཏོག་འཐོར་ཞིང་ཤིས་པ་བརྗོད༔ དམ་ཚིག་སྲོག་གཅོད་རྟེན་གཞོམ་སྤང་༔ སྲོག་སྐྱབས་རྟེན་གསོ་ཚེ་ལྷ་བསྙེན༔ ཐང་སྟོང་གསོལ་འདེབས་ཡི་དམ་བཟུང་༔ གཙོ་བོས་དམ་ཚིག་གང་བསྒྲགས་པ༔ དེ་དག་ཐམས་ཅད་བདག་གི་བགྱི༔ གདོན་གྱིས་ཟིན་པའི་མི་ཡིན་ཀྱང་༔ ཐེ་ཚོམ་མེད་པར་ཉམས་བླངས་ན༔ ལོ་ལྔར་གེགས་ཞི་ཚེ་ཡང་འཕེལ༔ སྔོན་ལས་མ་གཏོགས་འཕྲལ་གྱི་རྐྱེན༔ སེལ་བར་མི་འགྱུར་གང་ཡང་མེད༔ དེ་ཕྱིར་རང་གི་སྙིང་ལ་ཆོངས༔ སྐལ་ལྡན་བྱུང་ན་བརྟགས་ལ་སྤེལ༔ སྡིག་ཅན་རྣམས་ལ་གུ་ཧྱ་རྒྱ༔ མཚོ་རྒྱལ་དགོངས་པའི་ཆ་ལག་ཏུ༔ རིག་པ་སྟོང་གསལ་སྒྲོམ་ནས་བཏོན༔ བསླུ་བར་མི་འགྱུར་ཐ་ཚིག་གོ༔ ས་མ་ཡཱ༔ ཞེས་པའང་སྐལ་ལྡན་ལུང་རིག་གླིང་པའི་དག་སྣང་མའོ།།