ཐང་རྒྱལ་སྒྲུབ་ཐབས་དག་སྣང་དུ་བབ་ཚུལ།
༈ གྲུབ་པའི་དབང་ཕྱུག་ཐང་སྟོང་རྒྱལ་པོའི་སྒྲུབ་ཐབས་ཟབ་མོ་འདི་ཉིད་དག་སྣང་དུ་བབས་པའི་ཚུལ། ཕྲན་བདག་ཉིད་རང་ལོ་ཉེར་བདུན་པ་ཆུ་ཕག་གི་ལོའི་ཟླ་བ་བརྒྱད་པའི་ནང་དགེ་སྦྱོང་ཤཱཀྱ་ཆོས་འཕེལ་ལས་བླ་མ་དགོངས་པ་འདུས་པའི་བཀླག་ལུང་ཞུ་བའི་སྐབས་ཉིན་གཅིག་གྲུབ་པའི་དབང་ཕྱུག་ཐང་རྒྱལ་ཉིད་རི་དྭགས་བསེ་རུའི་པགས་པ་གསེར་གྱི་འོད་ལམ་མེ་བ་གཅིག་གི་སྟེང་ན་བཞུགས་པ་དེ་ཡང་སྐུ་གཅེར་བུ་སྨུག་ནག་ཁྲོ་འཛུམ་བཞད་པ་རུས་རྒྱན་ཅན། ཕྱག་གཉིས་ཀྱི་གཡས་སྐྱབས་སྦྱིན་གཡོན་ཚེ་བུམ་ལྟེ་བའི་ཐད་ཀར་འཛིན་པ་ཞབས་ཕྱེད་སྐྱིལ་དབུ་སྐྲ་ཐོར་ཅོག་སྦ་སྨྱུག་གི་ཚལ་བུས་བསྡམས་པ་ཞིག་གི་ཞལ་མཐོང་བ་ལ་མོས་གུས་ཚད་མེད་པ་སྐྱེས་ནས་གསོལ་བ་དྲག་པོ་བཏབ་པས་གསོལ་འདེབས་ཤིག་གནང་བ་བློ་ནས་མ་བརྗེད་པ་བྲིས་པའང་ཡོད་ཅིང་། སླར་གསོལ་འདེབས་འབུམ་བསགས་པས་རྐྱེན་བྱས་ནས་རྨི་ལམ་དུ་ཡང་ཡང་མཇལ་ཞིང་ཁྱད་པར་གཡུ་མཁར་ཐེག་ཆེན་ཆོས་འཁོར་ལེགས་གྲུབ་གླིང་དུ་དབྱར་གནས་པའི་སྐབས་ཤིག་གཞུང་དང་མཐུན་པ་ཞིག་གིས་ཞལ་བསྟན་ཅིང་རྗེས་གནང་བྱིན་རླབས་ཐོབ་པ་ལ་བརྟེན་ནས་ལྷ་རྩེ་བླ་མ་མཚམས་པ་གྱང་ཁང་བ་སངས་རྒྱས་དཔལ་ལྡན་ལ་གདམས་ངག་གི་སྐྱེས་སུ་ཕུལ་བ་ཟོལ་མེད་བྱིན་རླབས་མཁའ་འགྲོའི་ཁ་རླངས་དྲོད་མ་ཡལ་བའོ།།