བླ་མའི་རྣལ་འབྱོར་ཐར་པའི་མྱུ་གུ།
༄༅།། བླ་མའི་རྣལ་འབྱོར་ཐར་པའི་མྱུ་གུ་བཞུགས་སོ།། ཨེ་མ་ཧོ། རང་གི་སྤྱི་བོར་པདྨ་ཟླ་བའི་སྟེང་། །སྡོམ་གསུམ་རྒྱུད་ལ་འབོགས་མཛད་བླ་མ་རྗེ། །ཐུབ་དབང་ཤཱཀྱ་སེང་གེ་གསེར་གྱི་མདོག །མཚན་བཟང་སུམ་ཅུ་དཔེ་བྱད་བརྒྱད་ཅུས་སྤྲས། །ཆོས་གོས་གསུམ་གསོལ་ས་གནོན་མཉམ་བཞག་མཛད། །རྡོ་རྗེ་སྐྱིལ་ཀྲུང་གཡོ་མེད་ངང་དུ་བཞུགས། །འཁོར་དུ་གནས་བརྟན་བཅུ་དྲུག་ལ་སོགས་པ། །འདུལ་འཛིན་བརྒྱུད་པའི་བླ་མ་རྣམས་ཀྱིས་བསྐོར། །དག་པ་རབ་འབྱམས་འཇའ་འོད་ཀློང་ན་བཞུགས། །གསོལ་བ་འདེབས་སོ་ཐུབ་དབང་རིན་པོ་ཆེ། །བྱིན་གྱིས་རློབས་ཤིག་འཕགས་པའི་གནས་བརྟན་རྣམས། །བདག་ནི་ལས་ཉོན་འཁྲུལ་བའི་དབང་སོང་མཐུས། །ཉེས་ལྟུང་མེ་འབར་ངན་འགྲོའི་རྒྱུར་གྱུར་པ། །སྙིང་ནས་བཤགས་སོ་ཚངས་པའི་དངོས་གྲུབ་སྩོལ། །དེང་ནས་གཟུང་སྟེ་འཁོར་བའི་བཙོན་རར་འདིར། །ངེས་འབྱུང་བློ་ཡིས་ཚུལ་ཁྲིམས་ཞིང་ས་ལ། །ཏིང་འཛིན་ས་བོན་ཐོས་བསམ་ཤེས་རབ་ཀྱིས། །སྨིན་པར་བྱེད་ལ་གཅིག་ཏུ་བརྩོན་པ་ལས། །ཐར་པའི་མྱུ་གུ་རྒྱ་ཆེར་འཁྲུངས་པ་དང་། །རྣམ་མཁྱེན་འབྲས་བུ་འཕེལ་བར་བྱིན་གྱིས་རློབས། །ཐུབ་དབང་ཐུགས་ཀར་ཉ་རྒྱས་ཟླ་བའི་སྟེང་། །ཧཱུྃཿཡིག་མཐའ་མར་གཟུངས་སྔགས་གསེར་གྱི་མདོག །གཡས་བསྐོར་བདུད་རྩིའི་རྒྱུན་བབས་བདག་ལུས་ཁྱབ། །ནད་གདོན་ཞི་ཞིང་ཚེ་བསོད་རྒྱས་པར་བསམ། །ཏདྱ་ཐཱ། ཨོཾ་མུ་ནེ་མུ་ནེ་མ་ཧཱ་མུ་ནེ་ཤཱཀྱ་མུ་ནེ་སྭཱ་ཧཱ། ཞེས་དང་ཨོ་རྒྱན་ཆེན་པོའི་གསོལ་འདེབས་ལས། རྒྱ་གར་རྡོ་རྗེ་གདན་གྱི་ཕོ་བྲང་དུ༔ རྒྱུ་འབྲས་བདེན་པས་འགྲོ་བའི་དོན་མཛད་ཅིང་༔ སྡེ་སྣོད་གསུམ་གྱི་བསྟན་པའི་རྒྱལ་མཚན་བཙུགས༔ ཉན་ཐོས་བྱང་ཆུབ་སེམས་དཔའི་འཁོར་གྱིས་བསྐོར༔ སྤྲུལ་སྐུ་ཤཱཀྱ་ཐུབ་པ་ལ་གསོལ་བ་འདེབས༔ ཨོ་རྒྱན་པདྨ་འབྱུང་གནས་ལ་གསོལ་བ་འདེབས༔ ཚིག་དྲུག་པོས་གསོལ་བ་བཏབ་མཐར་ནི་བླ་མ་རང་རིག་དང་། དབྱེར་མེད་ངང་ནས་བཟང་སྤྱོད་སྨོན་ལམ་བརྗོད། ཅེས་པ་འདི་ཡང་རང་གི་དད་འདུན་དང་དོན་གཉེར་དམ་པའི་རིགས་ཅན་དེས་བསྐུལ་ངོར། །གྲུབ་དབང་རྫོགས་ཆེན་སློབ་འབངས་ཐ་ཤལ་བ། །སྤྲུལ་མིང་ལུང་རྟོགས་བསྟན་པའི་མིང་ཅན་དེས། །ལྷག་བསམ་དག་པས་བྲིས་པ་དགེ་གྱུར་ཅིག །སརྦ་མངྒ་ལམ། ༈ ཨརྒྷཾ་སོགས་ནས།ཤཔྟའི་བར་གྱིས་མཆོད། མཉམ་མེད་སྟོན་པ་ཐུབ་དབང་གསེར་གྱི་མདོག །ས་གནོན་མཉམ་བཞག་རྡོ་རྗེ་དཀྱིལ་ཀྲུང་བཞུགས། །མཚན་ཐོས་ཙམ་གྱིས་ངན་འགྲོའི་སྐྱེ་སྒོ་གཅོད། །ལྷ་མིའི་གཙུག་གི་རྒྱན་ལ་ཕྱག་འཚལ་བསྟོད། །བདེ་བར་གཤེགས་པ་ཁྱེད་སྐུ་སོགས་ནས།བཀྲ་ཤིས་འཕེལ་བར་མཛད་དུ་གསོལ། དགེའོ།།