རྗེ་བཙུན་འཇམ་པའི་དབྱངས་དང་འབྲེལ་བའི་བླ་མའི་རྣལ་འབྱོར།
༈ རྗེ་བཙུན་འཇམ་པའི་དབྱངས་དང་འབྲེལ་བའི་བླ་མའི་རྣལ་འབྱོར་བཞུགས། མཆོག་གསུམ་ངོ་བོ་བླ་མ་འཇམ་དབྱངས་ལ། །བྱང་ཆུབ་བར་དུ་གུས་པས་སྐྱབས་སུ་མཆི། །དེང་ནས་ཇི་སྲིད་རྫོགས་སངས་རྒྱས་ཀྱི་བར། །རྩེ་གཅིག་བླ་མའི་རྣལ་འབྱོར་སྒོམ་པར་བྱ། །རང་ཉིད་ཐ་མལ་གནས་པའི་སྤྱི་གཙུག་ཏུ། །སྣ་ཚོགས་པདྨ་སྟོང་ལྡན་ཟླ་བའི་སྟེང་། །དྷཱི༔ཡིག་དམར་སེར་འོད་ཀྱི་འཕྲོ་འདུ་ལས། །འཕགས་མཆོད་བྱིན་རླབས་ཚུར་བསྡུས་འགྲོ་སྒྲིབ་སྦྱངས། །རྩ་བའི་བླ་མ་རྗེ་བཙུན་འཇམ་དཔལ་དབྱངས། །དམར་སེར་གུར་གུམ་མདོག་ཅན་གཞོན་ཚུལ་མཛེས། །ཞལ་གཅིག་ཞི་འཛུམ་ཕྱག་གཉིས་ཆོས་འཁོར་རྒྱས། །ཨུཏྤལ་ཡུ་བ་ནས་འཛིན་འདབ་མ་ནི། །སྙན་གྱི་ཐད་གར་རབ་ཏུ་རྒྱས་པའི་སྟེང་། །ཤེས་རབ་རང་བཞིན་རལ་གྲི་གླེགས་བམ་བསྣམས། །ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས། །རིན་ཆེན་རྒྱན་ལྡན་དར་གྱིས་ཆས་གོས་ལྔ། །ལོངས་སྐུའི་རྒྱན་རྫོགས་སྐྱབས་ཀུན་བདག་ཉིད་ཆེ། །ཐུགས་ཀྱིས་དགོངས་པས་བདག་སོགས་ལས་ངན་འགྲོ། །འདྲེན་པའི་དེད་དཔོན་ཆེན་པོར་བཞུགས་པར་བསམ། །ཀྱཻ་མ་དྲིན་ཆེན་བླ་མ་འཇམ་པའི་དབྱངས། །བདག་ཅག་ལས་ཉོན་བག་ཆགས་ཀྱིས་ནོན་འགྲོ། །ཁྱེད་ཀྱི་བརྩེ་ཆེན་ཐུགས་རྗེས་ཉེར་གཟིགས་ནས། །སྡུག་བསྔལ་འཁོར་བའི་མཚོ་ལས་བསྒྲལ་དུ་གསོལ། །ཨོཾ་ཨཱཿམ་ཧཱ་གུ་རུ་མཉྫུ་ཤྲཱི་སརྦ་སིདྡྷི་ཕ་ལ་ཧཱུྃ༔ ཅེས་ཅི་མང་བཟླས་ཤིང་མཐར་གང་བློ་མས་ལན་གསུམ་བསྟོད་ཅིང་མི་དམིགས་པའི་ངང་ལ་མཉམ་པར་འཇོག་ཅིང་ཐུན་མཚམས་སུ་དགེ་བ་བསྔོ། ཞེས་པའང་སྒྲུབ་བརྩོན་ཀ་རུ་ཎི་ཀས་བསྐུལ་ངོར་བན་སྤྲང་སྡོམ་བུ་པ་རྒྱ་སྤྲུལ་གྱིས་སྨྲས་པ་དགེའོ།།