རིག་འཛིན་ལུང་རིག་གླིང་པའི་བླ་སྒྲུབ་དངོས་གྲུབ་འདོད་འཇོ།

༄༅། རིག་འཛིན་ལུང་རིག་གླིང་པའི་བླ་སྒྲུབ་དངོས་གྲུབ་འདོད་འཇོ་བཞུགས།

ཨེ་མ་ཧོ། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །བླ་མའི་སྐུ་གསུང་ཐུགས་ལ་སྐྱབས་སུ་མཆི། །སེམས་ཅན་དོན་དུ་བླ་མེད་བླ་མ་སྒྲུབ། །ཚེ་འདིར་སངས་རྒྱས་ཐོབ་པར་སེམས་བསྐྱེད་དོ། །བདག་ལུས་ཐ་མལ་སྤྱི་གཙུག་པད་ཟླའི་སྟེང་། །སྐྱབས་གནས་ཀུན་འདུས་ཨོ་རྒྱན་ཆེན་པོ་དང་། །དབྱེར་མེད་དྲིན་ཆེན་བླ་མ་སྤྲུལ་པའི་སྐུ། །དཀར་དམར་མདངས་ལྡན་ཞི་ཁྲོ་བཞད་པའི་ཞལ། །ཆོས་གོས་རྣམ་གསུམ་པན་ཞུ་དམར་པོ་མཛེས། །ཆོས་འཆད་ཕྱག་རྒྱས་པད་སྟེང་རྡོ་དྲིལ་བསྣམས། །བསླབ་གསུམ་ཡོངས་རྫོགས་རྡོ་རྗེའི་སྐྱིལ་ཀྲུང་བཞུགས། །རྩ་གསུམ་དཀྱིལ་འཁོར་སྤྲོ་བསྡུའི་བྱེད་པོ་མཆོག །འདི་ཕྱིའི་རེ་ལྟོས་སྐྱབས་གནས་གཞན་མ་མཆིས། །དེང་ནས་བྱང་ཆུབ་སྙིང་པོ་མ་ཐོབ་བར། །གང་དང་གང་དུ་སྐྱེས་པ་དེ་དང་དེར། །ཚེ་རབས་ཀུན་ཏུ་དགེ་བའི་བཤེས་མཛད་ནས། །ཐར་པའི་ལམ་དུ་འདྲེན་པར་མཛད་དུ་གསོལ། །གལ་ཏེ་ལས་དབང་དྲག་པོ་མཐུ་བཙན་པས། །ཉོན་མོངས་དབང་གྱུར་སྡིག་པའི་གྲོགས་དང་འགྲོགས། །མི་དགེ་བཅུ་སྤྱོད་ཐར་བའི་ལམ་སྟོར་ན། །དགེ་བའི་གྲོགས་པོ་མཛད་པར་ཁྱེད་རང་མཁྱེན། །ལུས་ལ་མི་འདོད་རྐྱེན་ངན་ནད་བྱུང་ཚེ། །འཆི་མེད་སྨན་གྱིས་གསོ་བར་ཁྱེད་རང་མཁྱེན། །དབུལ་ཕོངས་བཀྲེས་ཤིང་སྐོམ་པས་ཉམས་ཐག་ན། །འདོད་དགུའི་ཆར་ཆེན་འབེབས་པར་ཁྱེད་རང་མཁྱེན། །འཆི་ཚེ་མ་དག་སྣང་བས་བསླུས་གྱུར་ན། །སྐུ་གསུམ་ཞིང་ཁམས་སྟོན་པར་ཁྱེད་རང་མཁྱེན། །བར་དོར་སྒྲ་འོད་ཟེར་གྱིས་འཇིགས་སྐྲག་ན། །སྐྱེ་མེད་ངོ་སྤྲོད་མཛད་པར་ཁྱེད་རང་མཁྱེན། །ངན་སོང་གནས་སུ་སྡུག་བསྔལ་མྱོང་སྲིད་ན། །མཐོ་རིས་གནས་སུ་སྤོར་བར་ཁྱེད་རང་མཁྱེན། །གཞན་དོན་དོར་ཞིང་རང་དོན་ལྷུར་ལེན་ཚེ། །ཐེག་ཆེན་ཆོས་ལ་བསྐུལ་བར་ཁྱེད་རང་མཁྱེན། །ཟབ་ལམ་བསྒོམ་ཀྱང་ཉམས་རྟོགས་དྲོད་མེད་ན། །ཟག་མེད་བདེ་ལ་སྦྱོར་བར་ཁྱེད་རང་མཁྱེན། །རྒྱལ་སྲས་སྤྱོད་པ་རྩལ་ཆེན་མ་རྫོགས་ན། །ས་ལམ་མཐའ་རུ་ཕྱིན་པ་ཁྱེད་རང་མཁྱེན། །ཟ་ཉལ་འགྲོ་འདུག་སྤྱོད་ལམ་རྣམ་བཞིའི་སྐབས། །ཡང་དག་དོན་དང་ལྡན་པར་ཁྱེད་རང་མཁྱེན། །དེ་ལྟར་རྩེ་གཅིག་གུས་པས་གསོལ་བཏབ་མཐུས། །ཚེ་འདིར་དོན་གཉིས་འགྲུབ་པར་བྱིན་གྱིས་རློབས། ། ཨོཾ་ཨཱ༔ཧཱུྃ་མ་ཧཱ་གུ་རུ་ཨ་གཾ་བིདྱཱ་དྭཱི་པ་སརྦ་སིདྡྷི་ཧཱུྃ། ཞེས་ཅི་ནུས་སུ་བཟླས་མཐར། སྐྱབས་ཀུན་འདུས་པའི་བདག་ཉིད་བླ་མ་ལ། །རྩེ་གཅིག་གསོལ་བ་བཏབ་པས་གནས་བཞི་ལས། །ཨོཾ་དཀར་ཨཱ༔དམར་ཧཱུྃ་མཐིང་ཧྲཱིཿལྗང་འོད། །རང་མདོག་བདག་གི་གནས་བཞིར་ཐིམ་པ་ཡིས། །ལུས་ངག་ཡིད་གསུམ་ཀུན་གཞིའི་སྒྲིབ་པ་དག །བུམ་གསང་ཤེས་རབ་བཞི་པའི་དབང་རྣམས་ཐོབ། །ཆོས་ལོངས་སྤྲུལ་གསུམ་ངོ་བོ་ཉིད་ཀྱི་སྐུ། །ཡེ་ནས་རང་ལ་གནས་པ་མངོན་དུ་གྱུར། །སྐུ་ལྔའི་བདག་ཉིད་བླ་མ་རྡོ་རྗེ་འཆང་། །རང་རིག་བདེ་གཤེགས་སྙིང་པོའི་རང་ཞལ་མཇལ། །མཐའ་ཡས་འགྲོ་བ་འདྲེན་པའི་དཔལ་དུ་ཤོག །ཅེས་པའང་སྒྲུབ་བརྩོན་ཚེ་དབང་གྲགས་པ་དང་། ཆུང་ནས་འབྲེལ་འདྲིས་ཆེ་བའི་བཙུན་ཆུང་རིག་འཛིན་མིང་ཅན་གཉིས་ནས་ནན་ཏན་ཆེན་པོས་བསྐུལ་ངོར་ཁྱི་སོ་ལ་ཡང་མོས་པ་བྱས་པས་རིང་བསྲེལ་བྱུང་བ་གཏན་ཚིགས་བྱས་ནས་རྒྱ་སྤྲུལ་མིང་སྙོམ་ལས་པས་སྨྲས་པ་དུས་ཀུན་དགེ་བར་གྱུར་ཅིག