བླ་མའི་རྣལ་འབྱོར་གྱི་ལྷན་ཐབས་རིན་ཆེན་ཕྲ་ཚོམ།
༄༅། བླ་མའི་རྣལ་འབྱོར་གྱི་ལྷན་ཐབས་རིན་ཆེན་ཕྲ་ཚོམ་བཞུགས། བླ་མ་ལ་ཕྱག་འཚལ་ལོ་བྱིན་གྱིས་རློབས་ཤིག དུས་ནམ་ཡང་རུང་བར་མོས་གུས་དྲག་པོས་བློ་སེམས་བླ་མའི་ཕྱོགས་སུ་གཏད་ནས་ངག་ཏུ། བླ་མ་མཁྱེན། བླ་མ་མཁྱེན། བླ་མ་རིན་པོ་ཆེ་མཁྱེན་ནོ། དལ་འབྱོར་ལུས་རྟེན་ལན་གཅིག་ཐོབ་དུས་སུ། །སྙིང་པོའི་ལྷ་ཆོས་ཡང་དག་མ་འགྲུབ་ན། །སླར་ཡང་ངན་འགྲོ་བཟོད་དཀའི་དུཿཁས་མནར། །གསོལ་བ་འདེབས་སོ་གུ་རུ་པད་འབྱུང་མཁྱེན། །བྱིན་གྱིས་རློབས་ཤིག་གྲུབ་དབང་རྫོགས་ཆེན་པ། །ལུས་ཀྱི་སྡོང་པོ་འཆི་བདག་སྟ་རེས་གསེས། །དབུགས་ཀྱི་ན་བུན་བར་ཆད་རླུང་གིས་གཡེངས། །ནོར་རྫས་བཞག་ནས་གཅིག་པུར་འགྲོ་བའི་ཚེ། །གསོལ་བ་འདེབས་སོ་གུ་རུ་པད་འབྱུང་མཁྱེན། །བྱིན་གྱིས་རློབས་ཤིག་གྲུབ་དབང་རྫོགས་ཆེན་པ། །གཉེན་བཤེས་ཚོང་དུས་མགྲོན་པོ་བཞིན་དུ་འབྲལ། །གང་ལ་བསམ་ཀྱང་འདུས་བྱས་སྙིང་པོས་སྟོང་། །ཇི་ལྟར་བྱས་ཀྱང་ཚེ་ལ་བཤོལ་ཐབས་མེད། །གསོལ་བ་འདེབས་སོ་གུ་རུ་པད་འབྱུང་མཁྱེན། །བྱིན་གྱིས་རློབས་ཤིག་གྲུབ་དབང་རྫོགས་ཆེན་པ། །ཆོས་ལམ་ཞུགས་ཀྱང་སོ་ཐར་བྱང་སེམས་དང་། །གསང་སྔགས་ཟབ་མོ་བསྲུང་སྡོམ་དམ་ཚིག་རྣམས། །ཉམས་པའི་སྐྱོན་གྱིས་འཕྲལ་ཕུག་སྡུག་བསྔལ་སྐྱེད། །གསོལ་བ་འདེབས་སོ་གུ་རུ་པད་འབྱུང་མཁྱེན། །བྱིན་གྱིས་རློབས་ཤིག་གྲུབ་དབང་རྫོགས་ཆེན་པ། །ཁྱེད་ཤེས་དད་པ་བྱིན་རླབས་འཇུག་པའི་རྒྱུ། །ཉོན་མོངས་དབང་གིས་ལོག་ལྟས་བསླད་གྱུར་ན། །ཐུགས་རྗེའི་ལྕགས་ཀྱུས་འདྲེན་པར་དཀའ་བའི་ཕྱིར། །བདག་གི་སྐྱིད་སྡུག་ལེགས་ཉེས་བདེ་སྡུག་རྣམས། །ཁྱོད་ལ་གཏད་དོ་གྲུབ་དབང་རྫོགས་ཆེན་པ། །པདྨ་རིག་འཛིན་འགྲོ་བའི་མགོན་པོ་མཁྱེན། །འགྱུར་མེད་ཐེག་མཆོག་བསྟན་པའི་རྩ་ལག་མཁྱེན། །ངེས་དོན་བསྟན་འཛིན་སྙིགས་མའི་མུན་སེལ་མཁྱེན། །རྒྱལ་བ་དགོངས་བརྒྱུད་ཆོས་སྐུའི་བླ་མ་མཁྱེན། །རིག་འཛིན་བརྡ་བརྒྱུད་ལོངས་སྐུའི་བླ་མ་མཁྱེན། །གཏད་རྒྱ་སྨོན་ལམ་དབང་བརྒྱུད་བླ་མ་མཁྱེན། །བརྒྱུད་པ་དགུ་ལྡན་མི༵་འགྱུ༵ར་བདེ་བ་ཆེ། །སྟོང་ཆེན་ན༵མ་མཁ༵འི་དཔལ་མོར་ཟུང་འཇུག་ངང་། །འགགས་མེད་རྡོ༵་རྗེ༵་གསུམ་གྱི་རོལ་གར་ཅན། །རྩ་གསུམ་ཀུན་འདུས་རྩ་བའི་བླ་མ་མཁྱེན། །དམ་པས་རྗེས་བཟུང་ལུ༵ང་རྟོ༵གས་བསྟ༵ན་པ༵འི་ཚལ། །བཤད་སྒྲུབ་ཉི༵ན་བྱེ༵ད་སྣང་བས་གསལ་མཛད་པ། །སྤྲུལ་པའི་སྐུ་མཆོག་མཁས་གྲུབ་དཔ༵ལ་བཟ༵ང་པོ༵། །སློབ་དཔོན་པདྨའི་བརྒྱུད་འཛིན་བླ་མ་མཁྱེན། །དལ་འབྱོར་སྙིང་པོ་ལོན་པར་བྱིན་གྱིས་རློབས། །མི་རྟག་རྒྱུད་ལ་སྐྱེ་བར་བྱིན་གྱིས་རློབས། །ལས་འབྲས་བསླུ་མེད་ཤེས་པར་བྱིན་གྱིས་རློབས། །འཁོར་བར་ཞེན་པ་ལྡོག་པར་བྱིན་གྱིས་རློབས། །ཅེས་བློ་ལྡོག་རྣམ་པ་བཞིའི་དོན་བསམ་མཐར་དངོས་གཞི་ནི། ཨོཾ་ཨཱ༔ཧཱུྃ༔ བདག་ལུས་ཐ་མལ་མ་ཡིན་མཁའ་འགྲོ་མ༔ ཞེས་སོགས་ནས་མཚན་སྔགས་ཡིག་བརྒྱ་དབྱངས་གསལ་མཐར། རྗེ་བཙུན་བླ་མའི་གསང་གསུམ་མཛད་ཕྲིན་ཚོགས། །མཐོང་ཐོས་དྲན་རེག་ངན་འགྲོའི་སྡུག་བསྔལ་གྲོལ། །རྣམ་མཁྱེན་མཆོག་ལ་འགོད་པའི་བཀའ་དྲིན་ཅན། །སྐུ་གསུམ་ཀུན་འདུས་བླ་མའི་ཡོན་ཏན་ཚོགས། །བདག་དང་མོས་པའི་སྐལ་ལྡན་ལུས་ངག་ལ། །ད་ལྟ་ཉིད་དུ་འཇུག་པར་བྱིན་གྱིས་རློབས། །ཐུགས་ཀྱི་དགོངས་པ་པཎ་གྲུབ་རྫོགས་སངས་རྒྱས། །མཁྱེན་བརྩེ་ནུས་པའི་དཔལ་འབར་བྱིན་རླབས་ཀྱིས། །རྨོངས་པའི་མུན་སེལ་མཁྱེན་རབ་སྣང་བ་རྒྱས། །ཚེ་འདིར་གདོད་མའི་གྲོལ་གཞི་མངོན་གྱུར་ཤོག །མོས་གུས་གདུང་བས་བླ་མ་རྡོ་རྗེ་སེམས། །དགྱེས་ཤིང་འཛུམ་པའི་སྨིན་མཚམས་ནས་འཕྲོས་པའི། །འོད་ཟེར་དཀར་པོ་སྤོས་རེང་དུ་བ་ལྟར། །བདག་གི་སྤྱི་བོ་ནས་ཞུགས་ལུས་སྒྲིབ་དག །བུམ་པའི་དབང་ཐོབ་སྐུ་ཡི་ས་བོན་ཐེབས། །མགྲིན་པ་ལས་བྱུང་འོད་ཟེར་དམར་པོའི་ཚོགས། །བདག་གི་ལྕེ་ལ་བབས་པས་ངག་སྒྲིབ་དག །གསང་བའི་དབང་ཐོབ་གསུང་གི་བྱིན་རླབས་ཞུགས། །ཐུགས་ལས་འོད་ཟེར་མཐིང་ག་ནམ་མཁའི་མདོག །བདག་གི་སྙིང་གར་ཐིམ་པས་ཡིད་སྒྲིབ་དག །ཤེར་དབང་ཐོབ་ནས་ཐུགས་ཀྱི་དགོངས་པ་འཕོས། །སླར་ཡང་རྡོར་སེམས་འོད་དུ་ཞུ་བ་ལས། །རང་ལུས་རྣལ་འབྱོར་མ་དང་དབྱེར་མེད་གྱུར། །སྒྲིབ་པ་ཀུན་དག་ཚིག་དབང་དམ་པ་ཐོབ། །སྐུ་བཞིའི་དགོངས་དོན་མངོན་གྱུར་ཨེ་མ་ཧོ། །དཔལ་ལྡན་རྩ་བའི་བླ་མ༴སོགས། དཔལ་ལྡན་བླ་མའི་རྣམ་པར་ཐར་པ་ལ། །སྐད་ཅིག་ཙམ་ཡང་ལོག་ལྟ་མི་སྐྱེ༴སོགས། སྐྱེ་བ་ཀུན་ཏུ༴སོགས། དམ་པའི་གསུང་ཚིག་གསེར་གྱི་སྙན་རྒྱན་ལ། །བླུན་ཚིག་མགྲོན་བུའི་ཕྲ་འདི་མཛེས་མིན་ཀྱང་། །དད་པ་ཅན་ལ་ཕན་ཐོགས་འབྱུང་སྙམ་པའི། །ལྷག་བསམ་དག་པས་རྒྱ་སྤྲུལ་མིང་གིས་བྲིས། །དགེའོ། །དགེའོ། །དགེའོ། །