འཇམ་པའི་དབྱངས་ཀྱི་གསོལ་འདེབས་གཏི་མུག་མུན་སེལ་ཡེ་ཤེས་འོད་ཀྱི་སྒྲོན་མེ།
༄༅༔ དམ་ཆོས་ཡང་ཟབ་པདྨའི་ཐུགས་བཅུད་ལས༔ འཇམ་པའི་དབྱངས་ཀྱི་གསོལ་འདེབས་གཏི་མུག་མུན་སེལ་ཡེ་ཤེས་འོད་ཀྱི་སྒྲོན་མེ་བཞུགས༔
༄༅༔ ན་མོ་གུ་རུ་ཝཀྐི་ཤྭ་རི་མུཾ༔ གདོད་ནས་གཏི་མུག་དྲི་བྲལ་ཆོས་ཀྱི་དབྱིངས༔ ཀུན་ཏུ་བཟང་པོ་ཡབ་ཡུམ་ལ་གསོལ་བ་འདེབས༔ གཟུང་འཛིན་གློ་བུར་འཁྲུལ་རྟོག་མུན་པའི་ཚོགས༔ ད་ལྟ་ཉིད་དུ་སངས་པར་བྱིན་གྱིས་རློབས༔ གུ་རུ་མཉྫུ་ཤྲཱི་པྲཛྙཱ་སརྦ་སིདྡྷི་ཧཱུྃ༔ རང་བྱུང་ལྷུན་གྲུབ་སྐུ་ལྔའི་འཕྲོ་འདུ་ལས༔ ལོངས་སྐུ་རིགས་ལྔ་གཙོ་འཁོར་ལ་གསོལ་བ་འདེབས༔ དུག་ལྔའི་སྒྲིབ་མུན་འཁོར་བའི་རབ་རིབ་སྤྲིན༔ སྤྲོས་བྲལ་དབྱིངས་སུ་གྲོལ་བར་བྱིན་གྱིས་རློབས༔ གུ་རུ་མཉྫུ་ཤྲཱི་པྲཛྙཱ་སརྦ་སིདྡྷི་ཧཱུྃ༔ གང་འདུལ་རོལ་རྩལ་མཁྱེན་པའི་འོད་ཟེར་འབར༔ འཇམ་དཔལ་དབྱངས་ཅན་རིགས་ལྔ་ལ་གསོལ་བ་འདེབས༔ བློ་གྲོས་ཆོས་ཀྱི་པདྨོ་འདབ་བརྒྱ་བ༔ ཐོགས་མེད་མྱུར་དུ་ཕྱེ་བར་བྱིན་གྱིས་རློབས༔ གུ་རུ་མཉྫུ་ཤྲཱི་པྲཛྙཱ་སརྦ་སིདྡྷི་ཧཱུྃ༔ དུས་གསུམ་རྒྱལ་བའི་རྒྱལ་ཚབ་འགྲོ་བའི་མགོན༔ མཁས་པ་བློ་ལྡན་མཆོག་སྲེད་ལ་གསོལ་བ་འདེབས༔ རིག་པའི་གནས་ལྔ་ཤེས་བྱའི་ཆོས་ཁམས་ཀུན༔ རྩོལ་མེད་བློ་ལ་འཆར་བར་བྱིན་གྱིས་རློབས༔ གུ་རུ་མཉྫུ་ཤྲཱི་པྲཛྙཱ་སརྦ་སིདྡྷི་ཧཱུྃ༔ འཕགས་ཡུལ་ཐུབ་པའི་བསྟན་འཛིན་འགྲན་ཟླ་བྲལ༔ འཛམ་གླིང་མཛེས་རྒྱན་མཆོག་གཉིས་ལ་གསོལ་བ་འདེབས༔ མདོ་རྒྱུད་ལུང་དང་རིགས་པའི་ང་རོ་ཡིས༔ རྒོལ་ངན་མཐའ་དག་འཇོམས་ནུས་བྱིན་གྱིས་རློབས༔ གུ་རུ་མཉྫུ་ཤྲཱི་པྲཛྙཱ་སརྦ་སིདྡྷི་ཧཱུྃ༔ བོད་ཡུལ་བསྟན་པའི་སྒྲོན་མེ་གངས་ལྗོངས་མིག༔ ཁྲི་སྲོང་ལོ་པཎ་མཆོག་རྣམས་ལ་གསོལ་བ་འདེབས༔ བསླབ་གསུམ་ནོར་བུས་བདག་རྒྱུད་རབ་གཏམས་ནས༔ འགྲོ་བློའི་དབུལ་བ་སེལ་བར་བྱིན་གྱིས་རློབས༔ གུ་རུ་མཉྫུ་ཤྲཱི་པྲཛྙཱ་སརྦ་སིདྡྷི་ཧཱུྃ༔ ཕྱོགས་བཅུ་ཀུན་ནས་གཏི་མུག་འགྲོ་རྣམས་ལ༔ ཕན་མཛད་བརྒྱུད་གསུམ་བླ་མ་ལ་གསོལ་བ་འདེབས༔ ཆོས་དང་ཆོས་མིན་འབྱེད་པའི་ཤེས་རབ་མིག༔ འགྲིབ་མེད་ཀུན་ཏུ་གསལ་བར་བྱིན་གྱིས་རློབས༔ གུ་རུ་མཉྫུ་ཤྲཱི་པྲཛྙཱ་སརྦ་སིདྡྷི་ཧཱུྃ༔ ཐར་ལམ་ཆོས་ཀྱི་སྒྲོན་མེས་ས་གསུམ་འགྲོ༔ འདྲེན་མཛད་སྐྱེ་འཕགས་དགེ་འདུན་ལ་གསོལ་བ་འདེབས༔ ས་བཅུ་ལམ་ལྔའི་དཔལ་ཡོན་མ་ལུས་ཀུན༔ སྐད་ཅིག་ཉིད་ལ་བགྲོད་པར་བྱིན་གྱིས་རློབས༔ དེ་ལྟར་གསོལ་བཏབ་བྱིན་རླབས་བསླུ་མེད་མཐུས༔ བདག་ཅག་ལས་ངན་འགྲོ་རྣམས་སྲིད་མཚོ་ལས༔ མགོན་པོ་ཁྱེད་རྣམས་ཐུགས་རྗེ་ཡེ་ཤེས་གྲུས༔ ཐར་པའི་གླིང་མཆོག་བསྒྲོད་པར་བྱིན་གྱིས་རློབས༔ ཤེས་རབ་གསུམ་གྱི་གསེར་ཐུར་དྲི་བྲལ་བས༔ རྨོངས་པའི་ལིང་ཏོག་མ་ལུས་མྱུར་བསལ་བས༔ ཡེ་ཤེས་སྤྱན་གྱིས་སྲིད་ཞིའི་དེ་ཉིད་དོན༔ ད་ལྟ་ཉིད་དུ་མཐོང་བར་བྱིན་གྱིས་རློབས༔ ཐོག་མེད་ནས་བསགས་ལས་ཉོན་བག་ཆགས་བཅས༔ མགོན་ཁྱེད་ཐུགས་རྗེ་བདག་གིས་བརྩོན་པའི་མཐུས༔ གློ་བུར་སྤྲིན་བཞིན་སྤྲོས་བྲལ་དབྱིངས་དག་ནས༔ སྐུ་གཉིས་མྱུར་དུ་འགྲུབ་པར་བྱིན་གྱིས་རློབས༔ བདག་ཉིད་མཐོང་ཐོས་དྲན་རེག་འགྲོ་བ་ཀུན༔ ཚེ་རབས་ཀུན་ཏུ་འཇམ་དབྱངས་མགོན་ཁྱེད་ཀྱིས༔ ཚད་མེད་བརྩེ་བས་རྗེས་སུ་ཉེར་བཟུང་ནས༔ སྒྲིབ་སྦྱང་ཡོན་ཏན་རྫོགས་པར་བྱིན་གྱིས་རློབས༔ དེ་ལྟར་འཇམ་པའི་དབྱངས་ཀྱི་གསོལ་འདེབས་འདིར༔ འབད་པས་ཤེས་རབ་སྣང་བ་རྒྱས་པར་ངེས༔ དག་སྣང་ཟབ་ཆོས་ཐུགས་བཅུད་ཆ་ལག་ཏུ༔ པདྨའི་བྱིན་གྱིས་བརླབས་པའི་མཐུ་ལས་བྱུང་༔