འཇམ་དབྱངས་རིགས་ལྔའི་རྒྱུན་ཁྱེར་ཤེས་རབ་ཉི་མ།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ འཇམ་དབྱངས་རིགས་ལྔའི་རྒྱུན་

ཁྱེར་ཤེས་རབ་ཉི་མ་བཞུགས༔

རབ་འབྱམས་རྒྱལ་བའི་ཐུགས་ཀྱི་དབྱིངས༔ ཉོན་ཤེས་སྒྲིབ་པའི་སྐྱོན་ལས་གྲོལ༔ འཇམ་དཔལ་ཡེ་ཤེས་སེམས་དཔའ་ལ༔ རང་བཞིན་ཤེས་པའི་ངང་ནས་འདུད༔ མ་འོངས་སྐལ་ལྡན་རིགས་ཀྱི་བུ༔ ཡང་གསང་ཆོས་ལ་སྤྱོད་པའི་ཚེ༔ གནས་ལྔ་རིག་པའི་མཛོད་སྒོ་འབྱེད༔ གདམས་པ་ཟབ་མོ་འདིར་སྤྱོད་ཅིག༔ ས་མ་ཡཱ༔ དཔལ་ལྡན་བླ་མ་མགོན་པོ་འཇམ་པའི་དབྱངས༔ སྤྲོས་བཅས་སྤྲོས་མེད་རྣལ་འབྱོར་པའི༔ བློ་ཡི་རིམ་པ་ལྟར་དུ་སྤྱོད༔ འདི་ནི་སྤྲོས་མེད་ལུས་དཀྱིལ་ཏེ༔ སྦྱོར་བ་ཐོ་རངས་མལ་ནས་ལངས༔ རླུང་རོ་བསལ་ཞིང་བླ་མ་ལ༔ མོས་གུས་མཆི་མ་འཁྲུག་པར་བྱ༔ འཁོར་བ་སྡུག་བསྔལ་རྒྱ་མཚོ་ལས༔ འགྲོ་ཀུན་སྒྲོལ་ཕྱིར་སྐྱབས་སེམས་དང་༔ ཡན་ལག་བདུན་གྱི་ཚོགས་བསག་ནི༔ ཧྲཱིཿ དེང་བཟུང་བྱང་ཆུབ་སྙིང་པོ་མ་ཐོབ་བར༔ གཟུང་འཛིན་འཁོར་བའི་སྡུག་བསྔལ་ལས་སྒྲོལ་ཕྱིར༔ བསླུ་མེད་དཀོན་མཆོག་གསུམ་ལ་སྐྱབས་སུ་མཆི༔ མཐའ་ཡས་འགྲོ་བ་སྒྲོལ་བར་དམ་བཅའ་འོ༔ སྐུ་གསུམ་ལྷ་ལ་གུས་པས་ཕྱག་འཚལ་ཞིང་༔ ཕྱི་ནང་ལུས་དང་ལོངས་སྤྱོད་མཆོད་པར་འབུལ༔ གཟུང་འཛིན་སྒྲིབ་པའི་བག་ཆགས་དབྱིངས་སུ་བཤགས༔ དུས་གསུམ་རྒྱལ་བའི་དགེ་ལ་རྗེས་སུ་རངས༔ ཟག་མེད་ཆོས་ཀྱི་འཁོར་ལོ་བསྐོར་བར་བསྐུལ༔ མཁའ་བཞིན་གཡོ་མེད་འགྲོ་ངོར་བཞུགས་གསོལ་འདེབས༔ དགེ་རྩ་དམིགས་མེད་ཆོས་དབྱིངས་ཀློང་དུ་བསྔོ༔ དེ་ཡིས་སྦྱོར་བའི་ཆོས་རྣམས་ཚང་༔ དངོས་གཞི་ཨ་ཏི་རྫོགས་པ་ཆེ༔ སྐད་ཅིག་དྲན་རྫོགས་ཏིང་འཛིན་ནི༔ ཨ༔ སྐད་ཅིག་དྲན་རྫོགས་གནས་ཡུལ་རྣམ་དག་ཞིང་༔ བདེ་ཆེན་ཞིང་ལྟར་བཀོད་ལེགས་ཕུན་ཚོགས་དབུས༔ རིན་ཆེན་གཞལ་ཡས་སྒོ་གྲུ་རྟ་བབས་རྒྱན༔ འཇམ་དཔལ་ཞིང་གི་ཡོན་ཏན་དཔག་མེད་ལྡན༔ དེ་དབུས་པདྨ་འདབ་བཞི་ཟླ་གདན་སྟེང་༔ ཨཿཡིག་དམར་པོ་ལི་ཁྲིའི་མདངས་འཛིན་པའི༔ འོད་ཀྱིས་འཕགས་མཆོད་བྱིན་རླབས་དངོས་གྲུབ་བསྡུས༔ འགྲོ་ཀུན་མུན་སེལ་ཡོངས་གྱུར་རང་གི་སེམས༔ ཆུ་ལས་ཉ་མོ་ལྡང་བཞིན་འཇམ་པའི་དབྱངས༔ ཞལ་གཅིག་ཕྱག་བཞི་ཞི་འཛུམ་བཅུ་དྲུག་ཉམས༔ གཞོན་ནུ་ཟུར་ཕུད་ལྔ་བ་རྩ་ཕྱག་གཉིས༔ ཤེས་རབ་རལ་གྲི་གླེགས་བམ་ཨུཏྤལ་བསྣམས༔ འོག་གཉིས་ཨུཏྤལ་མདའ་གཞུ་འགེངས་པའི་ཚུལ༔ ཞབས་གཉིས་སྐྱིལ་ཀྲུང་དར་དང་རིན་ཆེན་བརྒྱན༔ མདུན་ནས་གཡས་སྐོར་ཡི་གེ་འབྲུ་བཞི་ལས༔ འཇམ་དཔལ་དཀར་སེར་མཐིང་ལྗང་གཙོ་དང་མཚུངས༔ རང་རྟགས་ཕྱག་མཚན་གྱིས་བརྒྱན་རལ་པོད་དང་༔ ཨུཏྤལ་མདའ་གཞུ་ཡེ་ཤེས་སྤྱན་གསུམ་ལྡན༔ གཞན་ཡང་ལྷ་དང་དྲང་སྲོང་ཤེས་བྱའི་དཔལ༔ ཐོགས་མེད་སྩོལ་མཛད་སྐྱབས་འོས་ཀུན་གྱིས་བསྐོར༔ མ་འདྲེས་མཁའ་ལ་ཤར་བའི་དབང་གཞུ་བཞིན༔ གནས་གསུམ་ཡི་གེ་འབྲུ་གསུམ་ལས་འཕྲོས་པས༔ རབ་འབྱམས་ཞིང་དང་རི་བོ་རྩེ་ལྔ་སོགས༔ འཇམ་དབྱངས་རིགས་ལྔའི་ལྷ་ཚོགས་ཐུགས་རྒྱུད་བསྐུལ༔ དམ་ཚིག་དབང་གི་མདུན་མཁར་སྤྱན་དྲངས་གྱུར༔ སྤྱན་འདྲེན་བཞུགས་གསོལ་ཕྱག་མཆོད་ནི༔ ཨོཾ་ཨཱཿཧཱུྃ༔ ཨ་ལ་ལ་ཧོ༔ མི་དམིགས་སྤྲོས་བྲལ་ཆོས་སྐུའི་ཀློང་ཡངས་ནས༔ མ་འགགས་རང་རྩལ་ཡེ་ཤེས་འོད་ལྔའི་གདངས༔ རྩོལ་མེད་ཐུགས་རྗེའི་གཏེར་མངའ་འཇམ་པའི་དབྱངས༔ རིགས་ལྔ་སྒྱུ་འཕྲུལ་གར་གྱིས་གཤེགས་སུ་གསོལ༔ ཡེ་ནས་རང་དང་འབྲལ་མེད་རྟག་བཞུགས་ཀྱང་༔ རང་ངོ་མ་མཐོང་བག་ཆགས་གློ་བུར་སྒྲིབ༔ རང་གདངས་རང་བཞིན་མེད་པར་བསལ་བྱའི་ཕྱིར༔ དམ་ཡེ་བརྟན་བཞུགས་འཕྲུལ་དགའི་བརྡ་ཕྱག་འཚལ༔ ཕྱི་ནང་ཚོགས་དྲུག་ཡུལ་གྱི་མཆོད་པའི་རྫས༔ དངོས་འབྱོར་ཡིད་སྤྲུལ་བླ་མེད་ཏིང་འཛིན་འཕྲུལ༔ མི་ཟད་ནམ་མཁའ་མཛོད་ཀྱི་སྒོ་ཕྱེས་ནས༔ མཁྱེན་རབ་མཛོད་འཛིན་འཇམ་པའི་དབྱངས་ལ་འབུལ༔ ཨོཾ་བཛྲ་མ་ཧཱ་སརྦ་པཱུ་ཛ་ཧོ༔ བསྟོད་ཅིང་ཛཔ྄་དབྱངས་བཟླ་བ་ནི༔ ཨོཾ་མི་འགྱུར་མཚན་དཔེ་བཅུ་དྲུག་གཞོན་ནུའི་སྐུ༔ ཨཿམ་བཅོས་འགགས་མེད་དྲུག་ཅུའི་དབྱངས་ལྡན་གསུང་༔ ཧཱུྃ་མི་དམིགས་མཁྱེན་བརྩེས་ཀུན་ཁྱབ་སྤྲོས་བྲལ་ཐུགས༔ སྐུ་གསུང་ཐུགས་ཀྱི་བདག་ཉིད་ཁྱེད་ལ་བསྟོད༔ རྒྱལ་ཀུན་ཐུགས་ཀྱི་གསང་བ་རྡོ་རྗེའི་དབྱིངས༔ བདག་ལྟའི་གཤེད་གྱུར་བདག་མེད་ཆོས་སྒྲ་སྒྲོག༔ ཡེ་ཤེས་སེམས་དཔའ་འཇམ་དབྱངས་རིགས་ལྔའི་ལྷ༔ གཙོ་འཁོར་སྤྲུལ་པར་བཅས་ལ་བསྟོད་པར་བགྱི༔ གཙོ་བོའི་ཐུགས་ཀར་པད་ཟླའི་སྟེང་དུ་ཧྲཱིཿ ནམ་མཁའི་མདོག་ཅན་ཡོངས་གྱུར་དབྱངས་ཅན་མ༔ སྔོ་བསང་བཻཌཱུརྱ་ཡི་རྒྱུད་མང་བསྣམས༔ བཞེངས་སྟབས་ཅན་གྱི་ཐུགས་ཀར་ཉི་གདན་ལ༔ ཨཿཡིག་དམར་སེར་རྩ་བའི་སྔགས་ཀྱིས་བསྐོར༔ ཨ་ར་པ་ཙ་ན་དྷཱིཿ འབྲུ་འབུམ་བཟླས་པས་ལྷ་ཞལ་མཇལ༔ དམིགས་པའི་སྤྲོ་བསྡུ་གཞན་ལས་ཤེས༔ སྐབས་སུ་མཆོད་བསྟོད་ཐུན་སྐབས་སུ༔ གླུར་བླངས་རྒྱུད་བཀླགས་དངོས་གྲུབ་བསྐུལ༔ ཀྱཻ་དགོངས་ཤིག་མ་རིག་མུན་སེལ་འཇམ་པའི་དབྱངས༔ ཡེ་ཤེས་ལྔ་ཡི་རང་རྩལ་སྤྲུལ་པའི་འཁོར༔ སྦས་ཚུལ་ཐུགས་ཀྱི་ཡུམ་མཆོག་དབྱངས་ཅན་མ༔ བདག་གིས་ཁྱེད་རྣམས་ལྷག་པའི་ལྷར་བརྟེན་ནས༔ བསྙེན་སྒྲུབ་གནད་བསྣུན་ཐུགས་དམ་བསྐུལ་ལགས་ན༔ མཁྱེན་རབ་ལྷ་ལ་སྙེམས་པ་མི་མངའ་ཡང་༔ ཞི་བའི་དབྱིངས་སུ་མནལ་བར་མི་མཛད་ཅིང་༔ ཐུགས་རྗེ་འགགས་མེད་གཟུགས་སྐུའི་ཞལ་སྟོན་ཅིང་༔ གྲགས་སྟོང་ཚངས་པའི་དབྱངས་ཀྱིས་ཆོས་སྟོན་ལ༔ མཁྱེན་བརྩེའི་དགོངས་པ་བདག་ལ་ཉེར་འཕོས་ནས༔ དུས་འདིར་བདག་ལ་མཆོག་ཐུན་དངོས་གྲུབ་སྩོལ༔ རྩ་སྔགས་ཤམ་དུ་འདི་ཉིད་བཏགས༔ ཀཱ་ཡ་ཝཀྐ་ཙིཏྟ་སིདྡྷི་ཧཱུྃ༔ རྗེས་ལ་རྫོགས་པའི་རིམ་པ་འདི་ལྟ་སྟེ༔ ཧོ༔ སྣང་བའི་ཆོས་ཀུན་སྟོང་པ་ཆེན་པོའི་ངང་༔ སྐྱེ་འགག་གནས་གསུམ་བྲལ་བ་ཆོས་ཀྱི་དབྱིངས༔ དུས་གསུམ་བློ་འདས་ཁྱབ་བརྡལ་མཉམ་པ་ཉིད༔ རང་བབ་གཉུག་མའི་རང་གཤིས་ཨ་ལ་ལ༔ དགེ་བའི་རྩ་བ་འགྲོ་ལ་འདི་བཞིན་བསྔོ༔ དུས་གསུམ་ཀུན་ཏུ་སྒོ་གསུམ་དགེ་བའི་ལས༔ བདག་གིས་ཅི་བསགས་མཐའ་ཡས་འགྲོ་ལ་བསྔོ༔ གནས་སྐབས་བློ་ཡི་མུན་སེལ་ཤེས་རབ་རྒྱས༔ མཐར་ཐུག་འཇམ་པའི་རྡོ་རྗེ་མངོན་གྱུར་ཤོག༔ བཀྲ་ཤིས་བརྗོད་པ་ནི༔ ཨེ་མ་ཧོ༔ ཤེས་བྱ་ཀུན་གཟིགས་རྗེ་བཙུན་འཇམ་པའི་དབྱངས༔ ངག་གི་ལྷ་མོ་བློ་གྲོས་རྒྱ་མཚོའི་གཏེར༔ མཐའ་ཡས་འགྲོ་བའི་གཏི་མུག་མུན་པ་སེལ༔ ཡེ་ཤེས་སྣང་བ་རྒྱས་པའི་བཀྲ་ཤིས་ཤོག༔ ས་མ་ཡཱ༔ རྒྱ་རྒྱ་རྒྱ༔ འཇམ་དབྱངས་རྒྱུན་ཁྱེར་ཤེས་རབ་ཉི་མ་ཞེས་བྱ་བ་འདི་ཆོས་བདག་འཇིགས་མེད་རྡོ་རྗེའི་ངོར༔ རིག་འཛིན་ལུང་རིག་གླིང་པས་དག་སྣང་ལས་ཕབ་པའོ༔