ཐུགས་རྗེ་ཆེན་པོའི་བརྒྱུད་འདེབས་དངོས་གྲུབ་མཆོག་སྩོལ་རྒྱ་སྤྲུལ་གསུམ་པས་མཛད་པ།
ཐུགས་རྗེ་ཆེན་པོའི་བརྒྱུད་འདེབས་དངོས་གྲུབ་མཆོག་སྩོལ་བཞུགས༔ སྙིང་རྗེའི་རང་གཟུགས་འགྲོ་ཀུན་སྐྱོབས་པའི་ལྷ་ལ་འདུད༔ ཨོཾ་ཨཱ་ཧཱུྃ༔ཧྲཱིཿ ངོ་བོ་རྣམ་དག་ཆོས་དབྱིངས་ནམ་མཁའ་ཆེ༔ རང་བཞིན་གསལ་བ་ལྷུན་གྲུབ་འགགས་མེད་རྩལ༔ རྩོལ་མེད་སྙིང་རྗེ་ལོངས་སྐུ་ཐུགས་རྗེའི་དཔལ༔ དབྱེར་མེད་སྐུ་གསུམ་ལྷ་ལ་གསོལ་བ་འདེབས༔ ཆོས་ཅན་རྟགས་ཀྱིས་འགྲོ་ལ་རྗེས་བརྩེ་བའི༔ དུས་གསུམ་རྒྱལ་བ་ཐམས་ཅད་བསྐྱེད་པའི་ཡབ༔ རིགས་བདག་འོད་དཔག་མེད་ལ་གསོལ་བ་འདེབས༔ སྟོང་ཉིད་སྙིང་རྗེས་འགྲོ་ལ་ཉེར་དགོངས་པའི༔ རྣམ་གྲོལ་བྱང་ཆུབ་ལམ་ལ་འགོད་མཛད་ལྷ༔ ལོངས་སྐུ་སྤྱན་རས་གཟིགས་ལ་གསོལ་བ་འདེབས༔ སྣ་ཚོགས་སྤྲུལ་པས་འགྲོ་བ་འདྲེན་པའི་དཔལ༔ གང་ལ་གང་འདོད་དངོས་གྲུབ་མཆོག་སྩོལ་ལྷ༔ སྤྲུལ་སྐུ་མཚོ་སྐྱེས་རྡོ་རྗེར་གསོལ་བ་འདེབས༔ བརྗོད་མེད་ཤེས་རབ་དུས་གསུམ་བསྐྱེད་པའི་མ༔ རྒྱལ་བ་ཀུན་གྱི་སྐྱེ་མེད་དབྱིངས་ཀྱི་ཡུམ༔ འཇིགས་བརྒྱད་གཡུལ་སེལ་ལྷ་ལ་གསོལ་བ་འདེབས༔ མ་རུངས་སེམས་ཅན་ལས་བཞིས་སྒྲོལ་མཛད་པའི༔ རྟ་མཆོག་ཧེ་རུ་ཀ་ལ་གསོལ་བ་འདེབས༔ འགྲོ་རྣམས་བདེ་སྟོང་བྱང་ཆུབ་སྩོལ་མཛད་པའི༔ རྡོ་རྗེ་ཕག་མོ་ཆེ་ལ་གསོལ་བ་འདེབས༔ ཐབས་མཆོག་སྙིང་རྗེས་མཆོག་སྩོལ་རྡོ་རྗེ་ཆེ༔ ཤེས་རབ་སྟོང་ཉིད་ལྷན་སྐྱེས་བྷ་གའི་དབྱིངས༔ རྩོལ་མེད་མཉམ་སྦྱོར་བདེ་ཆེན་དབྱེར་མེད་ལ༔ བྱང་སེམས་མཆོག་སྩོལ་ལྷ་ལ་གསོལ་བ་འདེབས༔ མཆོག་ཐུན་དགའ་བཞིའི་དངོས་གྲུབ་བསྩལ་དུ་གསོལ༔ ཅེས་པ་འདི་གཏེར་ཆེན་ལུང་རིག་གླིང་པའི་གསུང་ཆོས་དབང་ལུང་བྱེད་སྐབས་མཆོག་སྤྲུལ་རྟ་ཁྱུང་ལགས་ནས་བསྐུལ་བ་དང་མཐུན་རྐྱེན་སོགས་སྦྱར་བས་ལུང་རྟོགས་ནས་ཤར་མར་བྲིས་པ་སརྦ་མངྒ་ལཾ༔ དགེའོ༔ དགེའོ༔ དགེའོ༔