འཕགས་པ་ཐུགས་རྗེ་ཆེན་པོའི་སྒྲུབ་ཐབས་ཟླ་གཞོན་སྤྲིན་བྲལ།
དམ་ཆོས་ཡང་ཟབ་པདྨའི་ཐུགས་ཐིག་ལས༔ འཕགས་པ་ཐུགས་རྗེ་ཆེན་པོའི་སྒྲུབ་ཐབས་ཟླ་གཞོན་སྤྲིན་བྲལ་བཞུགས༔
དུས་གསུམ་རྒྱལ་བ་ཀུན་གྱི་ཡབ༔ ཚད་མེད་ཐུགས་རྗེ་ཆེན་པོ་ཡིས༔ འགྲོ་དྲུག་སྡུག་བསྔལ་སེལ་མཛད་པ༔ འཕགས་པ་སྤྱན་རས་གཟིགས་ལ་འདུད༔ བདག་ཉིད་མཚོ་སྐྱེས་སྤྲུལ་པའི་སྐུས༔ འགྲོ་རྣམས་འཁོར་བ་ལས་སྒྲོལ་ཕྱིར༔ བྱང་ཆུབ་སེམས་མཆོག་གོམས་མཐར་ཕྱིན༔ འཕགས་མཆོག་སྒྲུབ་ཐབས་དཔག་ཡས་བརྩམས༔ ཕལ་ཆེར་ས་འོག་གཏེར་དུ་སྦས༔ ཁྱད་པར་གཟུངས་མ་མཚོ་རྒྱལ་དང་༔ ལྷ་སྲས་མུ་རུབ་བཙན་པོ་ལ༔ དབྱིངས་རིག་དབྱེར་མེད་དགོངས་པའི་གཏེར༔ ལས་འཕྲོ་ཅན་ལ་གཏད་དོ་རྒྱ༔ ས་མ་ཡཱ༔ ཤིན་ཏུ་དབེན་ཞིང་དྭངས་པའི་ས༔ དགྲ་འདྲེའི་འཚེ་བ་མེད་པ་རུ༔ དཀྱིལ་འཁོར་བློ་དང་འཚམས་པ་ལ༔ སྒོ་རྫོགས་མཚན་ཉིད་ཡོངས་རྫོགས་སམ༔ ཡང་ན་ཚོམ་བུར་བརྟེན་ཀྱང་རུང་༔ སྐུ་རྟེན་བུམ་པ་བཅུད་ལྡན་ཁར༔ བྲིས་འབུར་གང་རུང་སྐུ་གཟུགས་དང་༔ གསུང་རྟེན་འབྲུ་དྲུག་དར་དམར་དཀྲིས༔ ཐུགས་རྟེན་མན་ཤེལ་ཟུར་དྲུག་པ༔ ཡོན་ཏན་གཏོར་མ་དཀར་པོ་ནི༔ ལྷ་གྲངས་ཡོངས་རྫོགས་དར་གུར་ཕུབ༔ སྨན་རཀ་ཉེར་སྤྱོད་རྣམ་ལྔ་དང་༔ ཕྲིན་ལས་ཕྱག་མཚན་ཤེལ་དཀར་ཕྲེང་༔ གཞན་ཡང་བཀོད་ལེགས་ཡོ་བྱད་བཤམས༔ ངེས་འབྱུང་རྩ་བ་མི་རྟག་དང་༔ འཁོར་བའི་སྡུག་བསྔལ་ཡང་ཡང་བསམ༔ འགྲོ་ལ་ཕན་པའི་སྙིང་རྗེའི་སེམས༔ རྒྱུན་དུ་འབྲལ་མེད་བསྒོམ་པ་སོགས༔ རང་རྒྱུད་སྣོད་དུ་རུང་བ་གཅེས༔ འདི་ལ་སྦྱོར་དངོས་རྗེས་གསུམ་ལས༔ དང་པོ་སྦྱོར་བའི་ཆོས་དགུ་ནི༔ བཀའ་བསྒོ་མཚམས་གཅོད་སྐྱབས་སེམས་བདུན༔ སྡོམ་བཟུང་བྱིན་འབེབས་མཆོད་བྱིན་བརླབས༔ དམ་བཤགས་དང་པོ་གཞི་བགེགས་ལ༔ དཀར་དམར་གཏོར་མ་སྔགས་ཀྱིས་བརླབས༔ ལྟ་བའི་གདེང་གིས་འདི་སྐད་དོ༔ ཧཱུྃ་ཧྲཱིཿ གཉིས་འཛིན་དབང་གིས་མ་རིག་འཁྲུལ་བའི་འདྲེ༔ མཆོད་པའི་གྲལ་ལ་མི་དབང་ལན་ཆགས་བགེགས༔ གཏོར་མར་ལོངས་སྤྱོད་རྒྱ་མཚོའི་ཕ་མཐར་དེངས༔ གལ་ཏེ་མི་འགྲོ་གནོད་སེམས་འདིར་འདུག་ན༔ སྟོང་ཉིད་ངང་ལས་རང་ཤར་ཐུགས་རྗེའི་ལྷ༔ དབང་ཆེན་ཁྲོ་རྒྱལ་འབར་བའི་ཏིང་འཛིན་གྱིས༔ ལུས་སྲོག་རྡུལ་དུ་བརླག་པར་གདོན་མི་ཟ༔ ཧཱུྃ་བཞིའི་སྔགས་རོལ་གུ་གུལ་དུད༔ དམིགས་པ་ཡུངས་ཐུན་དང་བཅས་བསྐྲད༔ དེ་ནས་བསྲུང་བའི་མཚམས་གཅོད་ནི༔ ཧཱུྃ་ཧྲཱིཿ ཕྱི་མཚམས་མི་ཤིགས་རྡོ་རྗེའི་གུར་ཁང་ལ༔ ནང་དབྱིངས་སྟོང་པའི་བསྲུང་བྱ་སྲུང་བྱེད་བྲལ༔ ཀུན་རྫོབ་སྣང་བ་ཁྲོ་མཚོན་མེ་རིས་གཏམས༔ ལོག་འདྲེན་འབྱུང་པོས་ནམ་ཡང་གླགས་མི་རྙེད༔ བཛྲ་རཀྵ་རཀྵ་བྷྲཱུཾ༔ ཐོག་མར་སྐྱབས་ཡུལ་འཕགས་པའི་ཚོགས༔ མདུན་གྱི་ནམ་མཁར་སྤྱན་དྲངས་ལ༔ ཧཱུྃ་ཧྲཱིཿ མཆོག་གསུམ་ཀུན་འདུས་བླ་མ་སྤྱན་རས་གཟིགས༔ ཚད་མེད་སྙིང་རྗེའི་ལྷ་མཆོག་འཁོར་བཅས་ལ༔ བདག་གཞན་འགྲོ་ཀུན་བྱང་ཆུབ་མ་ཐོབ་བར༔ སྒོ་གསུམ་གུས་པས་རྩེ་གཅིག་སྐྱབས་སུ་མཆི༔ དེ་ནས་དམིགས་ཡུལ་འགྲོ་བ་ཀུན༔ འཁོར་མཚོ་ལས་སྒྲོལ་རྫོགས་བྱང་ལ༔ འགོད་ཕྱིར་སྨོན་འཇུག་སེམས་བསྐྱེད་ངང་༔ ཧཱུྃ་ཧྲཱིཿ ཕ་མ་འགྲོ་དྲུག་སེམས་ཅན་མ་ལུས་པ༔ རྣམ་མཁྱེན་རྒྱལ་བའི་གོ་འཕང་ལ་འགོད་ཕྱིར༔ ཚད་མེད་བཞི་བསྒོམ་འཕགས་པ་མཆོག་བསྒྲུབས་ནས༔ ཡང་དག་མཐའ་བྲལ་དོན་དམ་སེམས་བསྐྱེད་དོ༔ ཚོགས་ཞིང་སྤྱན་སྔར་ཡན་ལག་བདུན༔ ཚོགས་བསགས་རྣམས་ཀྱང་འདིར་འདུས་ཕྱིར༔ དུག་ལྔ་སེར་སྣ་ཐེ་ཚོམ་རྣམས༔ སྦྱང་བའི་ཐབས་མཆོག་འདོན་སྒོམ་སྦྲགས༔ ཧཱུྃ་ཧྲཱིཿ འཕགས་མཆོག་སྐྱབས་ཀྱི་དམ་པ་ཐམས་ཅད་ལ༔ སྒོ་གསུམ་གུས་པས་ཡན་ལག་ལྔ་ཕྱག་འཚལ༔ དངོས་འབྱོར་ཡིད་སྤྲུལ་མཆོད་སྤྲིན་རྒྱ་མཚོ་འབུལ༔ བསླབ་གསུམ་དམ་ལས་འགལ་བའི་ཉེས་ཚོགས་བཤགས༔ འཕགས་པ་གསུམ་གྱི་དགེ་ལ་རྗེས་ཡི་རང་༔ རྟག་ཏུ་ཐེག་ཆེན་ཆོས་འཁོར་བསྐོར་བར་བསྐུལ༔ སེམས་ཅན་དོན་ཕྱིར་བསྐལ་བརྒྱར་བརྟན་བཞུགས་གསོལ༔ དགེ་ཚོགས་འགྲོ་ཀུན་སངས་རྒྱས་ཐོབ་ཕྱིར་བསྔོ༔ དམ་ཚིག་གནས་ཀུན་ཡང་ཡང་བཟུང་༔ ཧཱུྃ་ཧྲཱིཿ འགྲོ་ལ་གནོད་སྤང་སོ་ཐར་སྡོམ་པ་དང་༔ གཞན་ཕན་མཆོག་ཏུ་བརྩོན་པའི་བྱང་ཆུབ་སེམས༔ སྣང་སྲིད་དག་མཉམ་གསང་སྔགས་དམ་ཚིག་སྡོམ༔ མ་ལུས་བདག་ཉིད་ཡང་དག་བཟུང་བར་བགྱི༔ བཛྲ་ས་མ་ཡཱ་ཨཱ༔ བྱིན་ཆེན་བདག་གནས་ཡོ་བྱད་ལ༔ དབབ་ཕྱིར་སྤོས་རོལ་དབྱངས་དང་བཅས༔ ཧཱུྃ་ཧྲཱིཿ ནུབ་ཕྱོགས་བདེ་ཆེན་པདྨོ་བཀོད་ཞིང་ནས༔ ཆོས་སྐུ་སྣང་བ་མཐའ་ཡས་བྱིན་ཕོབ་ཅིག༔ ཤར་ཕྱོགས་རི་བོ་ཏ་ལའི་རྩེ་མོ་ནས༔ ལོངས་སྐུ་སྤྱན་རས་གཟིགས་དབང་བྱིན་ཕོབ་ཅིག༔ ལྷུན་གྲུབ་པདྨ་འོད་ཀྱི་ཕོ་བྲང་ནས༔ སྤྲུལ་སྐུ་མཚོ་སྐྱེས་རྡོ་རྗེས་བྱིན་ཕོབ་ཅིག༔ ལྷུན་གྲུབ་བདེ་བ་ཆེན་པོའི་གཞལ་ཡས་ནས༔ མངའ་བདག་ཆོས་རྒྱལ་ཡབ་སྲས་བྱིན་ཕོབ་ཅིག༔ ལྷན་སྐྱེས་གཉུག་མ་དགའ་བཞིའི་ཁང་བཟང་ནས༔ མཁའ་འགྲོ་ཡེ་ཤེས་མཚོ་རྒྱལ་བྱིན་ཕོབ་ཅིག༔ བདག་སོགས་ལུས་ངག་ཡིད་ལ་བྱིན་གྱིས་རློབས༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ ཨོཾ་ཨཱཿཧཱུྃ༔ཧྲཱིཿ ཛྙཱ་ན་བཛྲ་ཨ་བེ་ཤ་ཡ་ཨ་ཨཱ༔ ཞེས་བརྗོད་མཆོད་པའི་འབག་རྩོག་རྣམས༔ རཾ་ཡཾ་ཁཾ༔གིས་བསྲེགས་གཏོར་བཀྲུས༔ ཨོཾ་ཨཱཿཧཱུྃ༔གིས་སྦྱངས་སྤེལ་བསྒྱུར༔ ཧཱུྃ་ཧྲཱིཿ རང་བྱུང་དབྱིངས་ནས་འབྲུ་གསུམ་སྤྲོ་བསྡུ་ཡིས༔ ཕྱི་ནང་གསང་མཆོད་ཟག་མེད་བདུད་རྩིར་བསྒྱུར༔ དངོས་འཛིན་ཡོངས་གྲོལ་རྒྱལ་བའི་ཡེ་ཤེས་ཀྱི༔ རྩལ་སྣང་བདེ་བ་ཆེན་པོའི་རྫས་སུ་གྱུར༔ མ་ཧཱ་སརྦ་པཱུ་ཙ་ཧོ༔ དམ་ལས་འགལ་བའི་ཉེས་ཚོགས་རྣམས༔ དོན་ཀུན་བསྒྲུབ་ལ་འདི་བཞིན་བཤགས༔ ཧཱུྃ་ཧྲཱིཿ བླ་མ་མཁན་སློབ་སངས་རྒྱས་བྱང་ཆུབ་སེམས༔ སྐྱབས་ཀུན་སྤྱན་སྔར་ཁས་བླངས་དམ་ཚིག་སྡོམ༔ བག་མེད་ཉོན་མོངས་དབང་གིས་ཉེས་པ་ཀུན༔ མི་འཆབ་འགྱོད་པའི་སེམས་ཀྱིས་མཐོལ་ལོ་བཤགས༔ དག་ཚངས་མཆོག་གི་དངོས་གྲུབ་དུས་འདིར་སྩོལ༔ ཡི་གེ་བརྒྱ་པ་བདུན་ནམ་ཉེར་གཅིག་བཟླ༔ དབང་པོ་རབ་འབྲིང་ཐ་མས་ཚུལ་བཞིན་བཤགས༔ ས་མ་ཡཱ༔ རྒྱ་རྒྱ་རྒྱ༔ དེ་ནས་དངོས་གཞིར་རྣམ་གྲངས་དགུ༔ དང་པོ་སྐད་ཅིག་དྲན་རྫོགས་སུ༔ བརྫུས་སྐྱེས་སྦྱོང་བ་ཆེན་པོའི་དོན༔ ལྟ་བའི་གདེང་དང་མ་བྲལ་བས༔ ཧཱུྃ་ཧྲཱིཿ འཁོར་འདས་ཆོས་ཀུན་མ་སྐྱེས་སྤྲོས་དང་བྲལ༔ དེ་ཉིད་མ་རྟོགས་འགྲོ་ལ་སྙིང་རྗེའི་གདངས༔ ཟུང་འཇུག་རྩལ་ལས་ཕྱི་སྣོད་པོ་ཊ་ལ༔ རིན་ཆེན་སྣ་བདུན་ལས་གྲུབ་བདེ་ཆེན་ཞིང་༔ སྤྲུལ་པའི་བྱ་དང་ལྗོན་ཤིང་ཆུ་མཚོས་བརྒྱན༔ ངོ་མཚར་བཀོད་ལེགས་མཆོད་སྤྲིན་འཁྲིགས་པའི་དབུས༔ འཇའ་ཚོན་ཤར་བཞིན་དྭངས་ཤེལ་ལས་གྲུབ་པའི༔ ཕོ་བྲང་ཚད་མེད་རྣམ་བཞིའི་སྒོ་བཞིར་ལྡན༔ འཕགས་ལམ་རྟ་བབས་བྱང་ཆུབ་ཤར་བུ་དཀར༔ བཅུ་དྲུག་དགའ་བའི་འདོད་སྣམ་དམར་པོས་མཛེས༔ དྲན་པ་ཉེར་བཞག་གྲུ་ཆད་ཁྱམས་དང་བཅས༔ ཆོས་དབྱིངས་འགྱུར་མེད་གདུགས་ཏོག་ཆོས་འཁོར་དང་༔ ཐབས་ཤེས་ཟུང་འབྲེལ་རི་དྭགས་ཕོ་མོས་མཚན༔ འཕགས་ལམ་ཡན་ལག་དར་འཕན་རྒྱལ་མཚན་གཡོ༔ ཡོན་ཏན་ཡོངས་རྫོགས་ནོར་བུའི་ཏོ་ར་ཎ༔ བརྡའ་རྟགས་རྫོགས་པའི་གཞལ་མེད་ཉམས་དགའ་བ༔ དེ་དབུས་པདྨ་དཀར་པོ་ཟླ་གདན་ལ༔ རང་སེམས་དྲན་རྫོགས་འཕགས་མཆོག་བཅུ་གཅིག་ཞལ༔ གངས་རིའི་ཕུང་པོར་ཉི་མ་ཤར་ལྟར་དཀར༔ རྩ་ཞལ་འཛུམ་མདངས་བལྟ་བས་ཆོག་མི་ཤེས༔ དབུ་གསུམ་ཞི་བ་ཆོས་སྐུ་དཀར་ལ་དྭངས༔ དེ་སྟེང་རྒྱས་པ་ལོངས་སྐུའི་ཞལ་གསུམ་སེར༔ སྒེག་པའི་ཉམས་ཅན་བཞད་མདངས་མུ་ལེར་གསལ༔ དེ་སྟེང་དབང་མཆོག་སྤྲུལ་སྐུའི་ཞལ་གཉིས་དམར༔ དཔའ་བའི་ཚུལ་ཅན་འོད་ཟེར་ཕུང་པོར་འཁྲིགས༔ དེ་སྟེང་གཉུག་མ་གཞི་ཡི་ཞལ་གཉིས་ནག༔ དྲག་པོར་ཁྲོས་པའི་གཙུག་རྒྱན་སྣང་མཐའ་ཡས༔ རྒྱན་སྤངས་དམར་གསལ་མགུལ་བར་བཅས་པས་མཛེས༔ རྩ་བའི་ཕྱག་བཅུའི་དང་པོ་གཉིས་ཐལ་སྦྱར༔ དེ་འོག་གཡས་གཡོན་བགྲང་ཕྲེང་པདྨ་དཀར༔ མཆོག་སྦྱིན་སྤྱི་བླུགས་འོད་ཟེར་སྤྲུལ་པའི་གཟུགས༔ རིན་ཆེན་དོ་ཤལ་ཐབས་ཤེས་མདའ་གཞུ་བསྣམས༔ ཡན་ལག་སོ་དྲུག་གཡས་ཕྱག་བཅོ་བརྒྱད་པོ༔ སྟེང་ནས་རིམ་བཞིན་རྔ་ཡབ་གདུགས་དང་འཕན༔ ཁང་བཟང་དར་གྱི་རྒྱལ་མཚན་སྤྲིན་དཀར་པོ༔ པདྨའི་ཕྲེང་བ་རྡོ་རྗེ་གཏེར་གྱི་བུམ༔ ནོར་བུ་གསེར་གྱི་འཁོར་ལོ་ཨུཏྤལ་དམར༔ ཀླུ་ཤིང་རིན་ཆེན་སྙེ་མ་དབང་གི་ཞགས༔ སངས་རྒྱས་སྤྲུལ་གཟུགས་ཉི་ཟླ་གཡོན་ཕྱག་རྣམས༔ དར་གྱི་ལྡ་ལྡི་ཤིང་འབྲས་ལྕུག་མ་དུང་༔ བདུད་རྩིའི་ཐོད་དབྱུག་གྲི་ཕུབ་གླེགས་བམ་རྔ༔ སྐྱབས་སྦྱིན་གསེར་གྱི་གཏུན་ཤིང་གཤོལ་དང་མེ༔ རྩེ་གསུམ་ལྕགས་ཀྱུ་རྒུན་འབྲུམ་ལྗོན་ཤིང་སྟེ༔ མ་ངེས་ཕྱག་མཚན་བརྡ་རྟགས་འགྲོ་བ་འདུལ༔ ཉིང་ལག་ཕྱག་སྟོང་མཆོག་སྦྱིན་སྤྱན་རས་མཚན༔ ཞབས་གཉིས་ཐབས་ཤེས་དབྱེར་མེད་མཉམ་པར་བཞེངས༔ རི་དྭགས་པགས་པས་ནུ་གཡོན་ལེགས་པར་བཀབ༔ བྱང་ཆུབ་ཡན་ལག་བདུན་གྱི་རིན་ཆེན་བརྒྱན༔ ཟག་མེད་ཕུང་པོའི་དར་གོས་རྣམ་པ་ལྔ༔ ཆོས་ཀུན་སྟོང་པར་མཉམ་བརྡལ་དོ་ཤལ་སོགས༔ ལོངས་སྤྱོད་རྫོགས་སྐུའི་རྒྱན་ཆས་བཅུ་གསུམ་རྫོགས༔ ཐུགས་ཀར་པད་ཉིའི་གདན་ལ་ཡེ་ཤེས་སེམས༔ རྟ་མགྲིན་དམར་པོ་པད་ཕྲེང་སྡིགས་མཛུབ་གདེངས༔ ཁྲོ་བོའི་ཆས་རྫོགས་དེ་ཡི་ཐུགས་ཀ་རུ༔ ཧྲཱིཿཡིག་དཀར་པོ་སྔགས་ཀྱི་ཕྲེང་བ་ནི༔ འོད་ལྔའི་ཕྲེང་ཐག་རང་སྒྲ་དང་བཅས་པ༔ གཡས་སུ་འཁོར་བས་ཏིང་འཛིན་གསལ་བརྟན་ངང་༔ མཐའ་སྐོར་པད་ཟླའི་གདན་ལ་སངས་རྒྱས་སྟོང་༔ ཀུན་ཀྱང་ཚངས་པར་སྤྱོད་པའི་ཆ་ལུགས་ཅན༔ མཚན་དཔེའི་དཔལ་འབར་དཀར་སེར་དམར་ལྗང་མཐིང་༔ མཆོག་སྦྱིན་མཉམ་བཞག་ས་གནོན་ཕྱག་རྒྱ་མཛད༔ ཁྱམས་ལ་ཉེ་བའི་སྲས་བརྒྱད་སེམས་དཔའི་ཚུལ༔ སྐུ་མདོག་སྣ་ཚོགས་ཕྱག་མཚན་དུ་མས་མཛེས༔ གཙོ་བོའི་གཡས་གཡོན་ནོར་འཛིན་གསང་སྔགས་འཆང་༔ མདུན་དུ་སྤྲུལ་སྐུ་པདྨ་སཾ་བྷ་ཝ༔ རྒྱབ་ཏུ་ཁྲོ་ཆེན་བདུད་རྩི་འཁྱིལ་བ་དང་༔ བསྐལ་བཟང་སངས་རྒྱས་བྱང་སེམས་དགྲ་བཅོམ་ཚོགས༔ ཕྱོགས་དང་སྟེང་འོག་ཐུབ་དྲུག་སྒོ་མ་སོགས༔ འགྲོ་བའི་སྐྱབས་གྱུར་གཙོ་འཁོར་སྤྲུལ་པར་བཅས༔ གནས་གསུམ་འབྲུ་གསུམ་ཐུགས་སྲོག་ཧྲཱིཿཡིག་ལས༔ འོད་ཟེར་དཀར་དམར་མཐིང་གསུམ་འཕྲོས་པ་ཡིས༔ རང་བཞིན་གནས་ནས་འཕགས་མཆོག་སྙིང་རྗེའི་གཏེར༔ མ་ལུས་འཁོར་བཅས་བཛྲ་ས་མ་ཛ༔ དེ་ནས་སྤོས་དུད་གཏོར་ཞིང་རོལ་མོ་འཁྲོལ༔ གདུང་ཤུགས་དྲག་པོའི་དབྱངས་ཀྱིས་འདི་སྐད་དོ༔ ཧཱུྃ་ཧྲཱིཿ ཆོས་དབྱིངས་སྤྲོས་དང་བྲལ་བའི་ཕོ་བྲང་ནས༔ ཐོག་མའི་མགོན་པོ་འོད་སྣང་ཚེ་མཐའ་ཡས༔ རང་བྱུང་ལྷུན་གྲུབ་རི་བོ་གྲུ་འཛིན་ཞིང་༔ འཕགས་མཆོག་ཐུགས་རྗེའི་གཏེར་མཛོད་གཙོ་དང་འཁོར༔ འགྲོ་འདུལ་སྤྲུལ་པའི་ཕོ་བྲང་པདྨ་འོད༔ གུ་རུ་ཐོད་ཕྲེང་རིགས་ལྔ་རྗེ་འབངས་གྲོགས༔ སྐུ་གསུམ་བླ་མ་ཡི་དམ་ཞི་དང་ཁྲོ༔ དཔའ་བོ་མཁའ་འགྲོ་ཆོས་སྐྱོང་དམ་ཅན་ཚོགས༔ ཐུགས་རྗེའི་དབང་གིས་གནས་འདིར་སྤྱན་འདྲེན་གཤེགས༔ བྱིན་རླབས་ཤུགས་ཀྱིས་བདག་ཅག་རྗེས་བཟུང་འཚལ༔ ནུས་པའི་སྟོབས་ཀྱིས་བགེགས་དང་བར་ཆད་སོལ༔ མཆོག་ཐུན་དངོས་གྲུབ་དུས་འདིར་སྩལ་དུ་གསོལ༔ ཨརྱ་ལོ་ཀི་ཤྭ་ར་ཨེ་ཧྱ་ཧི་བཛྲ་ས་མ་ཡཱ་ཛ་ཛ༔ ཛཿཧཱུྃ་བཾ་ཧོ༔ དམ་ཚིག་ཡེ་ཤེས་དབྱེར་མེད་དུ༔ བཞུགས་གསོལ་ཚིག་འདིས་གསལ་ཡང་གདབ༔ ཧཱུྃ་ཧྲཱིཿ རང་བྱུང་དབྱིངས་ནས་རང་ཤར་ཡེ་ཤེས་ལྷ༔ ཀུན་བརྟགས་བསྐྱེད་རིམ་ལ་བརྟེན་དམ་ཚིག་པར༔ གཞན་དབང་ཐུགས་རྗེ་ཆེན་པོས་བརྟན་བཞུགས་ནས༔ ཡོངས་གྲུབ་འདུ་འབྲལ་མེད་པར་ཏིཥྛ་ལྷན༔ དེ་ནས་དཀྱིལ་འཁོར་ལྷ་ཚོགས་ལ༔ ཕྱག་འཚལ་འཕྲུལ་དགའི་རྣམ་རོལ་གྱིས༔ ཧཱུྃ་ཧྲཱིཿ གདོད་ནས་རང་ཉིད་ལྷ་དང་འབྲལ་མེད་ཀྱང་༔ གློ་བུར་འཁྲུལ་བས་སོ་སོར་བཟུང་བའི་མཐུས༔ མ་རིག་གཉིས་འཛིན་བག་ཆགས་བསལ་བའི་ཕྱིར༔ རང་བབ་ལྟ་བའི་ངང་དུ་མཇལ་ཕྱག་འཚལ༔ ཨ་ཏི་པཱུ་ཧོ༔ པྲ་ཏི་ཛ་ཧོ༔ མཆོད་པ་ལའང་རྣམ་གྲངས་གསུམ༔ ཕྱི་དང་ནང་དང་གསང་བའོ༔ དང་པོ་ཕྱི་མཆོད་འབུལ་བ་ནི༔ ཧཱུྃ་ཧྲཱིཿ ཀུན་ཏུ་བཟང་པོའི་རྣམ་འཕྲུལ་ཇི་བཞིན་དུ༔ མཛེས་པའི་མེ་ཏོག་སྣ་ཚོགས་སྤྱན་ལ་འབུལ༔ སྒྲ་སྙན་དབྱངས་དང་རོལ་མོ་སྙན་ལ་འབུལ༔ ལྷན་སྐྱེས་སྦྱར་བའི་དྲི་ཆབ་ཤངས་ལ་འབུལ༔ རོ་བརྒྱའི་བཟའ་བ་ཞལ་ཟས་ལྗགས་ལ་འབུལ༔ དྲི་ཆབ་དྭངས་བསིལ་མཆོད་ཡོན་སྐུ་ལ་འབུལ༔ སྣང་གསལ་མུན་སེལ་མར་མེ་ཐུགས་ལ་འབུལ༔ ཐུགས་རྗེ་ཚད་མེད་འཕགས་མཆོག་ལྷ་ཚོགས་རྣམས༔ བཞེས་ནས་མཆོག་ཐུན་དངོས་གྲུབ་མྱུར་འགྲུབ་མཛོད༔ ཨོཾ་བཛྲ་ཨརྒྷཾ་ནས་ཤཔྟ་པཱུ་ཛ་མེ་གྷ་ས་མུ་ཏྲ་སྤ་ར་ཎ་ས་མ་ཡེ་ཨཱཿཧཱུྃ༔ གཉིས་པ་ནང་མཆོད་འབུལ་བ་ནི༔ ཧཱུྃ་ཧྲཱིཿ རོ་རྐྱང་དབུ་མ་གསུམ་གྱི་དྭངས་མའི་བཅུད༔ བྱང་སེམས་དཀར་དམར་རླུང་ལྔའི་བྱེད་ལས་མཚོན༔ རྩ་བརྒྱད་ཡན་ལག་སྟོང་སྦྱར་ཨ་མྲྀ་ཏ༔ ཉོན་མོངས་རྒྱུ་དྲུག་དབྱིངས་བསྒྲལ་རུ་དྷི་ར༔ ཕྱི་ནང་དངོས་འཛིན་གཏོར་བླུགས་བྷ་ལིང་ཏ༔ བཞེས་ནས་སྐུ་གསུམ་ཡེ་ཤེས་མངོན་གྱུར་མཛོད༔ མ་ཧཱ་པཉྩ་ཨ་མྲྀ་ཏ་རཀྟ་བྷ་ལིང་ཏ་སརྦ་པཱུ་ཙ་ཨཱ་ཧཱུྃ༔ གསུམ་པ་གསང་བའི་མཆོད་པ་ནི༔ ཧཱུྃ་ཧྲཱིཿ སྣང་སྟོང་ཐབས་ཤེས་ཡབ་ཡུམ་མཉམ་པར་སྦྱོར༔ སྡུག་བསྔལ་ཚོར་བ་བདེ་བ་ཆེན་པོར་བསྒྲལ༔ མཆོད་ཡུལ་མཆོད་བྱེད་མཆོད་རྫས་རང་རིག་གཤིས༔ ཡེ་སྟོང་ཕྱག་རྒྱ་ཆེན་པོའི་མཆོད་པ་བཞེས༔ ཨོཾ་ཨཱཿཧཱུྃ་མ་ཧཱ་མུ་ཏྲ་སརྦ་པཱུ་ཙ་ཧོ༔ གསང་གསུམ་ཡོན་ཏན་རྗེས་དྲན་ནས༔ དཀྱིལ་འཁོར་འཁོར་ལོར་ཚིག་འདིས་བསྟོད༔ ཧཱུྃ་ཧྲཱིཿ ངོ་བོ་ཆོས་སྐུ་མཐའ་བརྒྱད་སྤྲོས་དང་བྲལ༔ རང་བཞིན་ལོངས་སྐུ་མཁྱེན་བརྩེའི་དཔལ་ཡོན་རྫོགས༔ ཐུགས་རྗེ་འགགས་མེད་སྤྲུལ་སྐུའི་འགྲོ་ཁམས་འདུལ༔ སྐུ་གསུམ་ཡོན་ཏན་རྫོགས་ལ་ཕྱག་འཚལ་བསྟོད༔ རྒྱལ་བ་ཀུན་གྱི་ཚད་མེད་ཐུགས་རྗེའི་འཕྲུལ༔ འགྲོ་བ་མ་ལུས་སྐྱོབས་མཛད་སྤྱན་རས་གཟིགས༔ ཞི་དང་ཁྲོ་བོའི་རྣམ་རོལ་ཅིར་ཡང་སྟོན༔ ཡི་དམ་ལྷག་པའི་ལྷ་མཆོག་ཁྱེད་ལ་བསྟོད༔ ཞལ་ནི་བཅུ་གཅིག་ཀུན་ཏུ་འོད་དང་ལྡན༔ རྩ་བའི་ཕྱག་ནི་སྟོང་ཉིད་སྙིང་རྗེའི་ངང་༔ རྣམ་པར་ཐར་པ་བརྒྱད་ཀྱི་བདག་ཉིད་ཅན༔ བཅོ་བརྒྱད་གཡས་ཕྱག་ཁམས་ཀྱི་སྒྲིབ་པ་སྦྱངས༔ གཡོན་རྣམས་མ་འདྲེས་ཐུན་མིན་དཔལ་ཡོན་རྫོགས༔ སྐུ་མདོག་དཀར་པོ་ཉོན་ཤེས་སྒྲིབ་པ་བྲལ༔ ཞབས་གཉིས་སྲིད་ཞིའི་མཐའ་ལ་མི་གནས་ཕྱིར༔ བཞེངས་པའི་སྟབས་ཀྱིས་འགྲོ་བ་འདུལ་ལ་བསྟོད༔ ཕྱག་སྟོང་འཁོར་ལོས་སྒྱུར་བའི་རྒྱལ་པོ་སྟོང་༔ སྤྱན་སྟོང་བསྐལ་པ་བཟང་པོའི་སངས་རྒྱས་སྟོང་༔ གང་ལ་གང་འདུལ་དེ་ལ་དེར་སྟོན་པའི༔ བཙུན་པ་སྤྱན་རས་གཟིགས་ལ་ཕྱག་འཚལ་བསྟོད༔ སྙིང་རྗེ་ཚད་མེད་རི་དྭགས་པགས་པ་གསོལ༔ འདོད་ཡོན་མ་སྤང་རྒྱན་ཆ་དུ་མས་སྤུད༔ དུག་ལྔ་གནས་དག་སྦྲུལ་གྱིས་ཕྱག་ཞབས་བརྒྱན༔ བསྐལ་བཟང་འདྲེན་པ་མཆོག་ལ་ཕྱག་འཚལ་བསྟོད༔ ཐབས་ཤེས་ངོ་བོ་སྲས་མཆོག་ནོར་བུ་འཛིན༔ ཤེས་རབ་སྟོང་དབྱིངས་སྲས་མོ་རིག་སྔགས་འཆང་༔ གངས་ཅན་གསལ་མཛད་ཐུགས་སྤྲུལ་པདྨ་རྒྱལ༔ ཉོན་མོངས་དུག་སེལ་ཁྲོ་ཆེན་བདུད་རྩི་འཁྱིལ༔ སངས་རྒྱས་སྟོང་རྩ་ཉེ་བའི་སྲས་ཆེན་བརྒྱད༔ ཚད་མེད་སྒོ་མ་ཐུབ་དྲུག་སྤྲུལ་པར་བཅས༔ ཡེ་ཤེས་གཅིག་ལས་ཆོ་འཕྲུལ་མ་ངེས་སྟོན༔ དཀྱིལ་འཁོར་ཡོངས་རྫོགས་ལྷ་ལ་ཕྱག་འཚལ་བསྟོད༔ འཛབ་ཀྱི་དགོངས་པ་རང་གཞུང་གི༔ བསྐྱེད་པའི་སྐབས་ལས་ཤེས་པར་བྱ༔ བཟླས་པའི་སྙིང་པོ་ཡི་གེ་དྲུག༔ གྲངས་ཀྱི་བསྙེན་པ་ཕྱག་སྟོང་གཟུངས༔ ན་མོ་རཏྣ་ཏྲཱ་ཡ་ཡཱ༔ ན་མོ་ཨཱརྱ་སོགས། འབྲུ་འབུམ་བདུན་ལྔ་གསུམ་ལ་སོགས༔ དམིགས་པ་རྩེ་གཅིག་གིས་བཟླས་ན༔ སྐལ་བ་ལྡན་པའི་གང་ཟག་དེ༔ མཐོང་ངམ་ལུས་གྲིབ་ཆུ་ལ་འགབ༔ རྫི་ཕྱོགས་སོང་བའི་འགྲོ་བ་རྣམས༔ མི་དགེ་བཅུ་དང་མཚམས་མེད་ལྔར༔ སྤྱོད་པའི་སྡིག་པ་ཅན་ཡིན་ཀྱང་༔ ཕྱི་མ་ཐར་ལམ་མཆོག་ཐོབ་ན༔ དད་མོས་བྱེད་ལ་ལྟ་ཅི་སྨོས༔ དེ་བས་འདི་ལ་རྟག་ཏུ་བརྩོན་པར་གྱིས༔ ས་མ་ཡཱ༔ རྗེས་ཀྱི་རིམ་པ་དགུ་ཡིས་བསྟན༔ དང་པོ་དཀར་གསུམ་བཟའ་བཏུང་རིགས༔ ཤ་ཆང་ལ་སོགས་གང་ཡང་རུང་༔ བཤམས་ལ་ཚིག་འདིས་བྱིན་གྱིས་བརླབས༔ ཧཱུྃ་ཧྲཱིཿ བདག་ཉིད་ལྷར་གསལ་ཐུགས་ལས་རཾ་ཡཾ་ཁཾ༔ འཕྲོས་པས་ཚོགས་ཀྱི་དྲི་མ་བསྲེགས་གཏོར་བཀྲུས༔ ཨོཾ་གྱིས་སྣོད་དུ་མ་དག་མཚན་འཛིན་སྦྱངས༔ ཨཱཿཡིས་ཀུན་བཟང་མཆོད་པའི་སྤྲིན་དུ་སྤེལ༔ ཧཱུྃ་གིས་ལྷ་ཚོགས་དགྱེས་བསྐྱེད་མཆོག་ཏུ་བསྒྱུར༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ གཉིས་པ་ཚོགས་ཞིང་སྤྱན་འདྲེན་དང་༔ ཚོགས་འབུལ་བཤགས་པ་ལོག་རྟོག་བསྒྲལ༔ བཞི་པ་ཚོགས་ཞིང་སྤྱན་འདྲེན་ནི༔ ཧཱུྃ་ཧྲཱིཿ འོག་མིན་མཁའ་སྤྱོད་སྤྲུལ་པའི་ཕོ་བྲང་དང་༔ གནས་ཡུལ་དུར་ཁྲོད་བརྒྱད་སོགས་དག་ཞིང་ནས༔ འགྲོ་འདུལ་ཐུགས་རྗེ་ཆེན་པོ་སྤྱན་རས་གཟིགས༔ སངས་རྒྱས་བྱང་སེམས་རྩ་གསུམ་སྲུང་མའི་ཚོགས༔ འདོད་ཡོན་ལྔ་ལྡན་ཚོགས་མཆོད་བཞེས་སླད་དུ༔ ཚད་མེད་མཁྱེན་པའི་སྤྱན་གྱིས་ཉེར་གཟིགས་ནས༔ དམིགས་མེད་བརྩེ་བའི་ཐུགས་ཀྱིས་འདིར་སྤྱོན་ཅིག༔ གནས་འདིར་རྫུ་འཕྲུལ་སྟོབས་ཀྱིས་གཤེགས་པའི་ཚེ༔ མཚན་དཔེའི་སྐུ་ལ་འོད་ལྔ་ལམས་སེ་ལམ༔ ཚངས་པའི་དབྱངས་ཀྱི་ཆོས་སྒྲ་ལྷངས་སེ་ལྷང་༔ མཁྱེན་བརྩེའི་ཐུགས་དབྱིངས་གཡོ་མེད་ཏ་ལ་ལ༔ དར་གྱི་ཅོད་པཎ་རླུང་བསྐྱོད་པུ་རུ་རུ༔ རིན་ཆེན་རུས་རྒྱན་སྒྲ་སྙན་སི་ལི་ལི༔ སྤོས་དུད་དྲི་ཞིམ་ངད་ལྡན་ཡ་ལ་ལ༔ བགེགས་དང་ལོག་འདྲེན་བར་ཆད་བསལ་བ་དང་༔ ཚེ་འདིར་མཆོག་གི་དངོས་གྲུབ་སྩལ་དུ་གསོལ༔ ཚོགས་ཁང་འདི་ནི་ཕོ་བྲང་པོ་ཊ་ལ༔ ཚོགས་རྫས་ཡོ་བྱད་ཀུན་བཟང་མཆོད་པའི་སྤྲིན༔ བདག་ཅག་སྐལ་ལྡན་གསུམ་ལྡན་རིག་པ་འཛིན༔ ལྷ་སྔགས་ཏིང་འཛིན་ཡེ་བབས་རིག་པའི་རྩལ༔ འདིར་སྤྱོན་དམ་རྫས་ཚོགས་ཀྱི་མཆོད་པ་བཞེས༔ བཛྲ་ཨ་ར་ལི་ཛྙཱ་ན་ཨ་བེ་ཤ་ཡ་ཕེཾ་ཕེཾ༔ དེ་ནས་ཚོགས་ཕུད་ལྷ་མོ་ལྔས༔ འདོད་ཡོན་རྣམ་ལྔའི་ལྷ་ཚོགས་མཆོད༔ ཧཱུྃ་ཧྲཱིཿ རྩ་གསུམ་ཀུན་འདུས་སྤྱན་རས་གཟིགས་དབང་ལ༔ འདོད་ཡོན་རྣམ་ལྔ་ཚོགས་ཀྱི་མཆོད་པ་འབུལ༔ དུག་ལྔ་ཡེ་ཤེས་ལྔ་རུ་གནས་འགྱུར་ནས༔ སྐུ་ལྔ་ཚེ་འདིར་འགྲུབ་པའི་དངོས་གྲུབ་སྩོལ༔ མ་ཧཱ་ག་ན་ཙཀྲ་པཱུ་ཛ་ཁཱ་ཧི༔ བར་བ་དམ་སྡོམ་ཉམས་ཆག་ཀུན༔ ཚོགས་ཀྱི་ཡོ་བྱད་ལ་བརྟེན་ནས༔ བཤགས་པའི་རྒྱལ་པོ་འདི་སྐད་དོ༔ ཧཱུྃ་ཧྲཱིཿ ངོ་བོ་ཡེ་དག་འཁོར་འདས་ཆོས་སྐུའི་ཀློང་༔ ཡོངས་གྲུབ་གཉུག་མའི་དེ་ཉིད་མ་རྟོགས་པས༔ ང་བདག་འཛིན་པས་དུག་གསུམ་འབྲས་བུ་སྨིན༔ སྒོ་གསུམ་ལ་བརྟེན་དམ་ཉམས་འགལ་རལ་འདས༔ གསུམ་ལྡན་བླ་མ་ཡི་དམ་མཁའ་འགྲོ་ལྷ༔ ལེགས་ཉེས་སྟངས་འཛིན་མཁའ་འགྲོ་ཆོས་སྐྱོང་ལ༔ ཚོགས་ཀྱི་ཡོ་བྱད་འབུལ་ཞིང་བཤགས་པར་བགྱི༔ དག་ནས་ཚངས་པ་མཆོག་གི་དངོས་དངོས་གྲུབ་སྩོལ༔ བཛྲ་ས་མ་ཡཱ་ཤུདྡྷེ་ཨ༔ ཚོགས་རྫས་ཐ་མར་དགྲ་བགེགས་བསྟིམ༔ བསྒྲལ་ཞིང་ཤ་ཁྲག་བདུད་རྩིར་བསྒྱུར༔ བསྒྲལ་མཆོད་སྦྱོར་བས་མཐའ་སྡུད་ཅན༔ གསང་སྔགས་སྤྱི་ཡི་དམ་ཚིག་ཡིན༔ ཧཱུྃ་ཧྲཱིཿ ཉོན་མོངས་རྒྱུ་ལས་ཡུལ་དྲུག་རྐྱེན་དང་བཅས༔ སྨོན་ལམ་ལོག་པས་མཚམས་སྦྱར་ཞིང་བཅུའི་དགྲ༔ ཆོས་སྲིད་བདེ་ལེགས་བར་གཅོད་ཐར་ལམ་བགེགས༔ ཐམས་ཅད་རང་རིག་འཕགས་པའི་ཐུགས་རྗེའི་འཕྲུལ༔ དབང་ཆེན་ཁྲོ་རྒྱལ་རྟ་མཆོག་དཔའ་བོས་བསྒྲལ༔ རྣམ་ཤེས་དྭངས་མ་རྒྱལ་བའི་སྲས་སུ་བསྐྲུན༔ ཕུང་པོ་ཤ་ཁྲག་སྙིགས་མ་བདུད་རྩིར་སྦྱར༔ རྩ་གསུམ་དཀྱིལ་འཁོར་ལྷ་ཚོགས་ཞལ་དུ་བསྟབས༔ སརྦ་ཤ་ཏྲུན་མཱ་ར་ཡ་རྦད༔ མ་ཧཱ་པཉྩ་ཁཱ་ཧི་ཁཱ་ཧི༔ གསུམ་པ་མཆེད་དང་ལྕམ་དྲལ་ལ༔ ལས་ཀྱི་རྡོ་རྗེས་ཚིག་འདིས་འབུལ༔ ཧོཿ བཟའ་བཏུང་སྣང་བ་བདེ་ཆེན་ཡབ༔ སྟོང་ཉིད་ཤེས་རབ་ཡུམ་གྱི་མཁའ༔ མཉམ་སྦྱོར་ཚོགས་ཀྱི་ལོངས་སྤྱོད་རོལ༔ རང་བཞིན་གཅིག་པར་ཨ་ལ་ལ༔ ཞེས་ཕུལ་བླ་མས་པད་སྐོར་དང་༔ རྩེ་གསུམ་ཕྱག་རྒྱས་བླངས་ཤིང་སྤྱོད༔ ཧོ༔ རང་བཞིན་མེད་པའི་ཆོས་རྣམས་ལ༔ གཙང་དམེར་འཛིན་པ་འཁྲུལ་བའི་བློ༔ དེ་ཉིད་དབྱིངས་སུ་རོ་གཅིག་ཕྱིར༔ གསང་བའི་དམ་རྫས་ངོ་མཚར་ཆེ༔ ཨ་ལ་ལ་ཧོ༔ ཞེས་པས་དབང་བཞིའི་ཉམས་ལེན་ལྟར༔ ཐ་མར་འཛིན་པ་དོར་དེ་སྤྱོད༔ བཞི་བ་ལྷག་མ་མགྲོན་ལ་བསྔོ༔ ཐ་ཚིག་བསྒྲགས་པ་འདི་སྐད་དོ༔ ཧཱུྃ་ཧྲཱིཿ དཀྱིལ་འཁོར་ཆེན་པོའི་ཕྱི་ཉུལ་མུ་རན་སྐྱོང་༔ ཚོགས་ཀྱི་ལྷག་མ་སྡུད་པའི་མཁའ་འགྲོ་གིང་༔ དཀར་སེར་དམར་ལྗང་སྐུ་མདོག་སྤྲུལ་བསྒྱུར་ངོམ༔ སྔོན་ཚེ་བདག་འཛིན་རུ་ཏྲ་བསྒྲལ་བའི་ཚེ༔ དཔལ་ཆེན་དབང་གི་བཀའ་ལུང་ཇི་བཞིན་དུ༔ ལྷག་གཏོར་བཞེས་ལ་རྣལ་འབྱོར་བར་ཆད་སོལ༔ ཨོཾ་ཨུཙྪི་ཊ་བྷ་ལིངྟ་ཁཱ་ཧི༔ དཀྱིལ་འཁོར་ལྷ་ཚོགས་མ་ལུས་པ༔ ཐམས་ཅད་དབྱིངས་ནས་ཚིག་འདིས་བསྐུལ༔ ཧཱུྃ་ཧྲཱིཿ བཞེངས་ཤིག་བཞེངས་ཤིག་ཐུགས་རྗེའི་ཀློང་ནས་བཞེངས༔ བསྐུལ་ལོ་བསྐུལ་ལོ་སེམས་ཅན་དོན་ལ་བསྐུལ༔ ད་ལྟ་རྩོད་དུས་ལྔ་བརྒྱའི་ཐ་མ་འདིར༔ གདུལ་དཀའི་སེམས་ཅན་དུག་ལྔའི་ཡོ་ལང་ངོམ༔ བག་མེད་ཤུགས་ཀྱིས་བསླབ་གསུམ་ཡལ་བར་དོར༔ མི་དགེ་བཅུ་དང་མཚམས་མེད་ལྔ་ལ་སྤྱོད༔ ཚེ་འདིར་མི་མཐུན་རྐྱེན་མང་ཚེ་འཕོས་ནས༔ ངན་སོང་གསུམ་སྤྱོད་སྡུག་བསྔལ་ཆར་འབེབས་ཚེ༔ བརྩེ་ཆེན་ཐུགས་རྗེས་ཡལ་བར་འདོར་ཕོད་དམ༔ དེ་ཕྱིར་གསང་གསུམ་ཕྲིན་ལས་རྣམ་བཞིའི་འཕྲུལ༔ ཅིར་ཡང་བསྒྱུར་བས་འཁོར་མཛོད་དོང་སྤྲུགས་མཛོད༔ དེ་ནས་ཆད་མདོ་བྱ་བ་ནི༔ གཏོར་མ་སྨན་དང་རཀྟ་བྲན༔ ཧཱུྃ་ཧྲཱིཿ སྔོན་ཚེ་བསྐལ་པ་དང་པོ་འདས་པའི་དུས༔ འོག་མིན་གནས་མཆོག་བདེ་ཆེན་ཞིང་ཁམས་སུ༔ བཅོམ་ལྡན་རིགས་བདག་སྣང་བ་མཐའ་ཡས་ཀྱིས༔ རང་སྣང་པདྨ་རིགས་ཀྱི་འཁོར་ཚོགས་ལ༔ རང་བྱུང་དགོངས་པས་བྱིན་གྱིས་བརླབས་པའི་ཚེ༔ ཁྱད་ཆོས་དྲུག་ལྡན་སྟོན་འཁོར་དགོངས་པ་མཉམ༔ ཉོན་ཤེས་ཡེ་དག་སྲིད་ཞི་ཁྱབ་བརྡལ་ཀློང་༔ གློ་བུར་འཁྲུལ་བའི་འཁོར་བ་དོང་སྤྲུགས་ཞེས༔ རང་བབས་དམ་བཅའ་བྱ་རྩོལ་བྲལ་བ་ལྟར༔ རྣམ་དག་ཆོས་ཉིད་གཏོར་མ་འདི་བཞེས་ལ༔ གཞི་ཡི་གནས་ལུགས་རང་ངོ་འཕྲོད་པར་མཛོད༔ དེ་འོག་བདག་འཛིན་རུ་ཏྲ་སྡེ་གསུམ་གྱིས༔ སྐྱེ་འགྲོ་ཐམས་ཅད་ལོག་པའི་ལམ་ཁྲིད་ཚེ༔ རང་བྱུང་གཞི་ལས་གཡོས་པ་མེད་བཞིན་དུ༔ གཞི་སྣང་དབང་ཆེན་ཁྲོ་བོའི་བརྟུལ་ཞུགས་ཀྱིས༔ དྲེགས་པ་རང་རྒྱུད་འདུལ་བའི་ཚུལ་བསྟན་ཚེ༔ དབང་ཕྱུག་ཁྱོ་ཤུག་བྲན་དང་བཅས་པ་ཡིས༔ གསང་ཆེན་བསྟན་སྲུང་རྣལ་འབྱོར་གྲོགས་བྱེད་ཅེས༔ ཇི་ལྟར་ཁས་བླངས་དམ་བཅས་དེ་བཞིན་དུ༔ དཔལ་ཆེན་བཀའ་བཞིན་མཆོད་གཏོར་འདི་བཞེས་ལ༔ བསྟན་པའི་དགྲ་སྒྲོལ་རྣལ་འབྱོར་སྐུ་ཚེ་སྲིངས༔ མཆོག་ཐུན་དངོས་གྲུབ་སྒྲུབ་པའི་བར་ཆད་སོལ༔ རྣམ་བཞིའི་ཕྲིན་ལས་ཡིད་བཞིན་འགྲུབ་པར་མཛོད༔ ཧཱུྃ་ཧྲཱིཿ དེ་འོག་བསྐལ་པ་ཐ་མའི་དུས་ཀྱི་ཚེ༔ རྒྱལ་ཀུན་སྙིང་རྗེའི་རང་གཟུགས་སྤྱན་རས་གཟིགས༔ ཚད་མེད་ཐུགས་རྗེས་འགྲོ་ཀུན་སྒྲོལ་ལོ་ཞེས༔ འཁོར་བ་ལན་གསུམ་སྟོངས་པར་མཛད་ན་ཡང་༔ ལས་སྣང་སེམས་ཅན་གློ་བུར་འཁྲུལ་བ་ལ༔ གྲངས་དང་ཐོག་མཐའ་མངོན་པར་མ་གྱུར་པས༔ དེ་ཚེ་དམན་སེམས་ཅུང་ཟད་སྐྱེས་ཚུལ་བསྟན༔ དབུ་དང་སྐུ་ལུས་དུམ་བུར་གྱུར་པ་ཡང་༔ ཐུགས་བསྐྱེད་མཐུ་ཡིས་ཞལ་བཟང་བཅུ་གཅིག་དང་༔ ཕྱག་སྟོང་སྤྱན་སྟོང་འགྲོ་དོན་མཐའ་ཡས་པའི༔ ངོ་མཚར་མཛད་པ་རྨད་བྱུང་དེ་མཐོང་ཚེ༔ འཇིག་རྟེན་སྐྱོང་བའི་མེས་པོ་ཚངས་པ་དང་༔ ཀླུ་རྒྱལ་འཇོག་པོ་སྲེད་མེད་བུ་སོགས་ཀྱིས༔ མ་འོངས་འཕགས་པའི་མཚན་ཙམ་འཛིན་པ་ཡང་༔ བསྲུང་སྐྱོབས་ལེགས་ཚོགས་སྤེལ་བར་མཛད་དོ་ཞེས༔ ཇི་ལྟར་ཁས་བླངས་དམ་བཅའ་མཛད་པ་བཞིན༔ མཆོད་གཏོར་འདི་བཞེས་ས་ལམ་བར་ཆད་སོལ༔ མཐུན་རྐྱེན་རང་གཞན་དོན་གཉིས་འགྲུབ་པར་མཛོད༔ དེ་འོག་བར་གྱི་བསྐལ་པ་རྩོད་ལྡན་དུས༔ རང་བྱུང་མཚོ་སྐྱེས་སྤྲུལ་སྐུ་པདྨ་འབྱུང་༔ འཇམ་དབྱངས་མངའ་བདག་ཚངས་པས་སྤྱན་དྲངས་ཚེ༔ མི་འགྱུར་ལྷུན་འགྲུབ་བསམ་ཡས་དབུ་རྩེ་རུ༔ དབྱངས་ཅན་སྤྲུལ་པ་ཡེ་ཤེས་མཚོ་རྒྱལ་དང་༔ ལག་ན་རྡོ་རྗེ་མུ་རུབ་བཙན་པོ་སོགས༔ སྐལ་ལྡན་སྤྲུལ་པའི་རྗེ་འབངས་ཉེར་ལྔ་དང་༔ ཆོས་བློན་རྣམ་ལྔ་བྲན་དང་བཅས་པ་ལ༔ ཡབ་མེས་སྲོང་བཙན་ཐུགས་དམ་འཕགས་མཆོག་གི༔ སྒྲུབ་ཐབས་དབང་དང་གདམས་ངག་བསྩལ་པའི་ཚེ༔ སྔགས་ཀྱི་སྲུང་མ་ནམ་མཁའི་རལ་ཅན་དང་༔ ལྷ་ལྡན་དཀོར་སྲུང་དཔལ་ལྡན་དུད་སོལ་སོགས༔ གསང་སྔགས་བཀའ་སྲུང་ཆོས་སྐྱོང་མ་ལུས་པས༔ མ་འོངས་སློབ་དཔོན་རྒྱུད་འཛིན་ཐམས་ཅད་དང་༔ ཁྱད་པར་འཕགས་པའི་ཟབ་ཆོས་འཆད་ཉན་དང་༔ སྒྲུབ་ལ་བརྩོན་པའི་རྣལ་འབྱོར་དམ་པ་ཡི༔ སྐུ་ཚེའི་བར་ཆད་སེལ་བར་མ་ཆད་དམ༔ བསྟན་པའི་དམ་སྲི་འདུལ་བར་མ་ཆད་དམ༔ མཐུན་རྐྱེན་དགེ་ལེགས་སྤེལ་བར་མ་ཆད་དམ༔ ཇི་ལྟར་ཁས་བླངས་དམ་བཅའ་དྲན་གྱིས་ལ༔ མཆོད་གཏོར་བཞེས་ལ་རྣམ་བཞིའི་ཕྲིན་ལས་མཛོད༔ དེ་འོག་ལྔ་བདོའི་རྩུབ་འགྱུར་དུས་ཀྱི་ཚེ༔ རང་སྣང་རི་བོ་གྲུ་འཛིན་རྩེ་མོ་རུ༔ ཚེ་རབས་བླ་མ་པདྨ་དྲག་པོ་དང་༔ གངས་ཅན་སྐྱབས་གཅིག་ལོ་ཀི་ཤྭ་ར་དང་༔ ལྷ་སྲས་ཟློས་གར་རྒྱལ་བའི་གདུང་འཚོབ་མཆོག༔ སྤྲུལ་པའི་གང་ཟག་བྱང་ཆུབ་གླིང་པ་ཡིས༔ སྐལ་ལྡན་སློབ་མ་ལུང་རིག་གླིང་པ་ལ༔ སྨོན་ལམ་གཏད་རྒྱ་འཕགས་པའི་སྒྲུབ་ཐབས་ཀྱི༔ སྨིན་གྲོལ་གདམས་པས་རྗེས་སུ་བཟུང་བའི་ཚེ༔ ལྷ་ཀླུའི་དབང་པོ་ཆོས་སྐྱོང་ཐམས་ཅད་དང་༔ ཁྱད་པར་དུད་སོལ་ལྷ་མོ་ཀླུ་རྒྱལ་སོགས༔ ཐུགས་ཐིག་ཟབ་མོའི་སྲུང་མ་ཐམས་ཅད་ཀྱིས༔ ཆོས་འདིའི་རྒྱུད་འཛིན་སྡེ་དང་བཅས་པ་ཡང་༔ སྲུང་སྐྱོབ་མཆོག་ཐུན་དངོས་གྲུབ་སྦྱིན་ནོ་ཞེས༔ ཇི་ལྟར་ཁས་བླངས་དམ་བཅས་དེ་བཞིན་དུ༔ བར་ཆད་སེལ་ལ་ལེགས་ཚོགས་སྤེལ་བ་དང་༔ གདམས་པ་འདིས་ཟིན་འགྲོ་དོན་སྨིན་པར་མཛོད༔ བཤལ་ཆུའི་གཏོར་མས་བསྟན་མར་བྲན༔ འབྲུ་གསུམ་སྔགས་ཀྱིས་བདུད་རྩིར་བརླབས༔ ཧཱུྃ་ཧྲཱིཿ སློབ་དཔོན་ཆེན་པོ་པདྨ་འབྱུང་གནས་ཀྱིས༔ གངས་ཅན་ཡུལ་དུ་ཐུབ་བསྟན་རྒྱལ་མཚན་བཙུགས༔ བོད་ཁམས་མཐའ་དབུས་ཀུན་ལ་གནས་པ་ཡི༔ ལྷ་མོ་ཀླུ་མོ་བདུད་མོའི་ཚུལ་འཛིན་པའི༔ བསྟན་མ་བཅུ་གཉིས་འཁོར་དང་བཅས་པ་རྣམས༔ འདིར་སྤྱོན་བཤལ་ཆུའི་གཏོར་མ་བཞེས་ནས་ཀྱང་༔ བོད་ཡུལ་རྟག་ཆད་ལྟ་བའི་མུ་སྟེགས་དང་༔ མཐའ་དམག་འཁྲུག་རྩོད་ནད་ཡམས་དལ་ཁ་ཟློག༔ བླ་མཆོད་སྡེ་གཉིས་བསྟན་པ་མཐའ་རྒྱས་མཛོད༔ མ་མ་ལ་ལ་ལེ་ལེ་ཏིང་ཏིང་བྷ་ལིང་ཏ་ཁཱ་ཧི༔ གཏོར་གཞོང་ཁ་སྦུབ་ལྷུན་པོར་བསམ༔ འོག་ཏུ་དམ་སྲི་བཀུག་ནས་མནན༔ ཧཱུྃ་ཧྲཱིཿ མ་རིག་གསུམ་གྱིས་བསྐྲུན་པའི་དམ་སྲིའི་ཚོགས༔ བདག་མེད་རྟོགས་པའི་རི་རབ་འོག་ཏུ་མནན༔ བྱང་ཆུབ་ཐར་པའི་མྱུ་གུ་མ་སྨིན་པར༔ བསྐལ་པའི་མཐར་ཡང་བཏང་བར་མི་བྱའོ༔ ཨོཾ་ལཾ༔ ཨཱཿལཾ༔ ཧཱུྃ་ལཾ༔ སྟྭཾ་བྷ་ཡ་ནན་ནན༔ དྲུག་པ་གྲུབ་ནས་དངོས་གྲུབ་ནི༔ མཆོད་གསོ་ལྷ་སྣང་གསལ་བརྟན་ངང་༔ ཧཱུྃ་ཧྲཱིཿ ཚད་མེད་སྙིང་རྗེའི་ལྷ་གཅིག་སྤྱན་རས་གཟིགས༔ འགྲོ་དྲུག་དོང་ནས་སྤྲུགས་པའི་དངོས་གྲུབ་སྩོལ༔ ཐབས་མཆོག་སྲས་ཀྱི་ངོ་བོ་ནོར་བུ་འཛིན༔ ཤེས་བྱའི་ཆོས་ཀུན་མཁྱེན་པའི་དངོས་གྲུབ་སྩོལ༔ ཤེས་རབ་སྲས་མོ་མནྟྲ་གུ་ཧྱ་དྷ༔ སྟོང་ཆེན་བློ་འདས་རྟོགས་པའི་དངོས་གྲུབ་སྩོལ༔ བར་ཆད་བགེགས་འདུལ་དབང་ཆེན་བདུད་རྩི་འཁྱིལ༔ བདུད་བཞིའི་གཡུལ་ལས་རྒྱལ་བའི་དངོས་གྲུབ་སྩོལ༔ དྲི་མེད་སྤྲུལ་སྐུ་གུ་རུ་རིན་པོ་ཆེ༔ ཟག་མེད་འཇའ་ལུས་འགྲུབ་པའི་དངོས་གྲུབ་སྩོལ༔ མཆོག་གི་དངོས་གྲུབ་ཁ་སྦྱོར་ཡན་ལག་བདུན༔ ཐུན་མོང་གྲུབ་པ་བརྒྱད་དང་ཕྲིན་ལས་བཞི༔ མདོར་ན་རང་དོན་ཆོས་སྐུའི་དཔལ་ཐོབ་ནས༔ གཞན་དོན་གཟུགས་སྐུ་འགྲུབ་པའི་དངོས་གྲུབ་སྩོལ༔ རྩ་སྔགས་ཤམ་བུར་ཀཱ་ཝ་ཙིཏྟ་སིདྡྷི་བཏགས་བཟླས་ཚེ་རྫས་རོལ༔ བདུན་པ་གཤེགས་གསོལ་བསྡུ་རིམ་ངང་༔ རྟེན་ལ་བསྟིམ་སོགས་གཞུང་གཞན་ནམ༔ ཡང་ན༔ ཧཱུྃ་ཧྲཱིཿ ཕྱི་སྣོད་གཞལ་ཡས་ནང་བཅུད་ལྷ་རྣམས་དང་༔ འཁོར་ཚོགས་གཙོ་བོ་ཡེ་ཤེས་ཏིང་འཛིན་སེམས༔ ཧྲཱིཿཡིག་རིམ་ཡལ་ཐིག་ལེ་ནཱ་ད་དང་༔ དེ་ཡང་མི་དམིགས་སྤྲོས་དང་བྲལ་བར་བཞག༔ ཨ་ཨ༔ ཆད་མཐའ་བསལ་ཕྱིར་རྒྱུན་སྤྱོད་ལྷ༔ སླར་ཡང་གཉུག་མའི་ལྷ་སྐུ་འཕགས་པ་མཆོག༔ ཞལ་གཅིག་ཕྱག་གཉིས་གནས་གསུམ་འབྲུ་གསུམ་མཚན༔ བྱམས་དང་སྙིང་རྗེའི་སེམས་མཆོག་མ་བྲལ་བས༔ དུས་གསུམ་འགྲོ་བ་གདུལ་བར་དམ་བཅའ་འོ༔ བརྒྱད་པ་བསྔོ་བས་རྒྱས་གདབ་པ༔ ཐེག་མཆོག་ལམ་གྱི་ཁྱད་པར་ཆོས༔ ཧཱུྃ་ཧྲཱིཿ བདག་གཞན་དུས་གསུམ་དགེ་བ་མ་ལུས་པ༔ གཅིག་ཏུ་བསྡུས་ཤིང་འགྲོ་བ་མ་ལུས་ཀུན༔ རྣམ་མཁྱེན་རྒྱལ་བའི་གོ་འཕང་ཐོབ་པ་དང་༔ རྒྱལ་བསྟན་མི་ནུབ་དར་ཞིང་རྒྱས་ཕྱིར་བསྔོ༔ དགུ་པ་མེ་ཏོག་འཐོར་བ་དང་༔ བཀྲ་ཤིས་མཐའ་རྒྱས་བྱ་བ་ནི༔ ཧཱུྃ་ཧྲཱིཿ འོག་མིན་ནུབ་ཕྱོགས་བདེ་ཆེན་ཕོ་བྲང་ནས༔ ཆོས་སྐུ་སྣང་བ་མཐའ་ཡས་བཀྲ་ཤིས་ཤོག༔ ཤར་ཕྱོགས་པོ་ཊ་ལ་ཡི་གཞལ་ཡས་ནས༔ འཕགས་མཆོག་ནམ་མཁའི་རྒྱལ་པོའི་བཀྲ་ཤིས་ཤོག༔ ལྷོ་ནུབ་པདྨ་འོད་ཀྱི་ཁང་བཟང་ནས༔ གུ་རུ་མཚོ་སྐྱེས་སྤྲུལ་སྐུའི་བཀྲ་ཤིས་ཤོག༔ བསམ་ཡས་ལྷུན་གྱིས་གྲུབ་པའི་ཕོ་བྲང་ནས༔ ཆོས་རྒྱལ་ཁྲི་སྲོང་ཡབ་སྲས་བཀྲ་ཤིས་ཤོག༔ སྒྲགས་མདའ་དྷུ་མ་ཐ་ལའི་གྲོང་ཁྱེར་ནས༔ གཟུངས་མ་ཡེ་ཤེས་མཚོ་རྒྱལ་བཀྲ་ཤིས་ཤོག༔ བསྐལ་བཟང་འདྲེན་པ་སྟོང་རྩ་འཁོར་དང་བཅས༔ འགྲོ་འདུལ་སྐུ་གསུམ་སྟོན་པའི་བཀྲ་ཤིས་ཤོག༔ ཟབ་ཆོས་སྲུང་མ་རྣལ་འབྱོར་བུ་བཞིན་སྐྱོང་༔ དཔལ་ལྡན་སྔགས་ཀྱི་སྲུང་མའི་བཀྲ་ཤིས་ཤོག༔ བརྒྱུད་གསུམ་བླ་མ་ཡི་དམ་མཁའ་འགྲོ་དང་༔ རྣལ་འབྱོར་མཆེད་ལྕམ་ཚོམ་བུ་གཅིག་ཏུ་འདུས༔ མི་འབྲལ་བདེ་གཤེགས་སྙིང་པོའི་རོ་གཅིག་པས༔ སྲིད་ཞི་དཔལ་ཀུན་རྫོགས་པའི་བཀྲ་ཤིས་ཤོག༔ དེ་ལྟར་ཡང་ཟབ་པདྨའི་ཐུགས་བཅུད་མཆོག༔ དབྱངས་ཅན་རྣམ་རོལ་ཡེ་ཤེས་མཚོ་རྒྱལ་ལ༔ ཐུགས་རྗེའི་བདག་ཉིད་མ་ཧཱ་གུ་རུས་གདམས༔ དུས་བབ་ལས་སྐལ་ལྡན་པའི་གང་ཟག་དང་༔ ཟབ་ཆོས་འདི་འཕྲད་ཚུལ་བཞིན་ཉམས་བླངས་ན༔ བསྟན་འགྲོའི་བདེ་སྐྱིད་རེ་ཞིག་གསོ་ཡང་སྲིད༔ དད་ལྡན་ཕོ་མོ་འདི་ཡི་དབང་ལུང་དང་༔ འབྲེལ་དེའི་གནས་སྐབས་ཚེ་ཆོས་གེགས་ཞི་ནས༔ མཐར་ཐུག་ཡང་དག་ལམ་དུ་འགོད་པར་ངེས༔ ས་མ་ཡཱ༔ རྒྱ་རྒྱ་རྒྱ༔ བཀའ་ཡི་སྲུང་མ་མགོན་པོ་ཕྱག་དྲུག་དང་༔ དུད་སོལ་ལྷ་མོས་བཀའ་འདི་ཡང་དག་སྲུངས༔ ཆོས་བདག་ལས་སྐལ་ལྡན་པའི་གང་ཟག་རྣམས༔ མཐོང་ཐོས་དྲན་རེག་བྱང་ཆུབ་ལམ་འགོད་ཤོག༔ ༈ ཨེ་མ་སྐལ་ལྡན་ལུང་རིག་གླིང་པ་བདག །རེས་འགའ་རྟོག་གེའི་ཚིག་ལ་གཙོ་བོར་བཟུང་། །བླ་མའི་ཚུལ་བཟུང་དད་ཟས་གཤིན་དཀོར་བསྡུས། །བླུན་རྨོངས་འགྲོ་འགས་གཙུག་ཏུ་བཀུར་ན་ཡང་། །ལས་ངན་རྣམ་སྨིན་བཟོད་པར་དཀའ་སྙམ་སྐྲག །འོན་ཀྱང་སྐལ་བ་མི་དམན་ལས་འཕྲོ་བཟང་། །ཟོལ་མེད་གདམས་པར་འཕྲད་པས་ཉམས་རེ་སྤྲོ། །ཁྱེད་ཅག་མཆོག་དམན་དད་ལྡན་ཐུགས་ཉམས་སུ། །ལེགས་པར་བླངས་ན་འདི་ཕྱི་བདེ་འམ་སྙམ། །ཐེ་ཚོམ་མ་མཛད་ཡང་དག་ལམ་ཐོབ་འགྱུར། །དགེའོ། །དགེའོ། །དགེའོ། །མངྒ་ལཾ། བཀྲ་ཤིས།