བཀའ་སྲུང་མགོན་པོ་ཕྱག་དྲུག་པའི་གཏོར་འབུལ་ཕྲིན་ལས་ཀུན་འགྲུབ།
འཕགས་མཆོག་ཕྱག་ན་པདྨོར་འདུད༔ ཐུགས་རྗེ་ཆེན་པོའི་སྒྲུབས་ཐབས་ཀྱི༔ བཀའ་སྲུང་མགོན་པོ་ཕྱག་དྲུག་པའི༔ གཏོར་འབུལ་ཕྲིན་ལས་ཀུན་འགྲུབ་བསྟན༔ ས་མ་ཡཱ༔ རིན་ཆེན་སྣོད་དུ་གཙང་ཕྱེ་ལ༔ ཟླུམ་གཏོར་གཙོ་འཁོར་ལྔ་པ་བཤམས༔ དཀར་མངར་ཤ་ཁྲག་ལ་ཕུག་དང་༔ རིན་ཆེན་བརྡར་བའི་གསེར་སྐྱེམས་བྲན༔ རཾ་ཡཾ་ཁཾ་གིས་མི་གཙང་སྦྱངས༔ ཨོཾ་ཨཱཿ ཧཱུྃ་གིས་བདུད་རྩིར་བསྒྱུར༔ རང་ཉིད་འཕགས་པའི་སྐུ་རུ་བསྒོམ༔ ཐུགས་ཀའི་འོད་ཀྱིས་འོག་མིན་དང་༔ རི་རབ་རྩེ་དང་དུར་ཁྲོད་བརྒྱད༔ བོད་ཡུལ་གཙུག་ལག་ཆོས་འཁོར་ནས༔ མགོན་པོ་འཁོར་བཅས་སྤྱན་དྲངས་གྱུར༔ ཧཱུྃ་བྷྱོ༔ འགྲོ་དྲུག་སྙིང་རྗེས་སྒྲོལ་བའི་ཐུགས་རྗེ་ཅན༔ སྤྱན་རས་གཟིགས་དབང་གདུལ་དཀའ་འདུལ་བའི་ཕྱིར༔ དཔལ་མགོན་ནག་པོ་ཆེན་པོའི་སྐུར་བཞེངས་པ༔ དད་པ་དམ་ཚིག་དབང་གིས་གནས་འདིར་གཤེགས༔ བྱི་ན་ཡ་ཀ་ལོག་འདྲེན་ཟླ་ཉིའི་ཁྲིར༔ རབ་གཏུམ་འགྱིང་བའི་གར་གྱིས་བཞུགས་སུ་གསོལ༔ ཁྲག་གི་ཡོན་ཆབ་དབང་པོའི་མེ་ཏོག་བཞད༔ ཚིལ་ཆེན་དུད་སྤྲིན་དུར་ཁྲོད་སྣང་གསལ་འབར༔ ཀླད་མཁྲིས་དྲི་དང་ཤ་རུས་ཞལ་ཟས་སྤུངས༔ དཔའ་གཏུམ་མི་དང་རྟ་ནག་གཡག་རྒོད་ངར༔ འདབ་ཆགས་མི་སྡུག་གཅན་གཟན་ཟློས་གར་བསྒྱུར༔ དར་ནག་བ་དན་འཕན་གདུགས་རྒྱལ་མཚན་གཡོ༔ ཐོད་རྔ་རྐང་གླིང་རྔ་ཆེན་འབྲུག་ལྟར་ལྡིར༔ སྐུ་གསུང་ཐུགས་རྟེན་དམ་རྫས་རྫ་ལྟར་བསྙིལ༔ མཁའ་དབྱིངས་དོག་པོར་བྱེད་པའི་མཆོད་སྤྲིན་འདིས༔ དཔལ་ལྡན་མགོན་པོ་ཕྱག་དྲུག་ཡབ་དང་ཡུམ༔ སྤྲུལ་པ་ལྷ་ཀླུ་གཉན་གསུམ་སྡེ་བརྒྱད་དཔུང་༔ འགོ་བའི་ལྷ་ལྔ་དམ་ཅན་རྒྱ་མཚོའི་ཚོགས༔ མ་ལུས་འཁོར་དང་བཅས་ལ་དགྱེས་མཆོད་འབུལ༔ ཐུགས་དམ་བསྐངས་ཤིང་ཉམས་ཆག་ཉེས་ལྟུང་བཤགས༔ ལོག་འདྲེན་བདུད་ལས་རྒྱལ་ཕྱིར་དབུ་འཕང་བསྟོད༔ རྣལ་འབྱོར་འདོད་དོན་སྒྲུབ་པར་མངའ་གསོལ་ལོ༔ མཐིང་ནག་ཁྲོ་གཏུམ་མི་བཟད་སྲིན་པོའི་གཟུགས༔ གཡས་དཀར་གཡོན་དམར་འཇིགས་པའི་གད་རྒྱངས་སྒྲོག༔ དང་པོའི་ཕྱག་གཉིས་བིང་ཆེན་ཐོད་ཁྲག་དང་༔ བར་བས་ཉི་ཟླ་མཐའ་གཉིས་གླང་གདོང་གི༔ མགོ་དང་མཇུག་མ་རླུང་གི་ཞགས་པ་འཆང་༔ དར་ནག་བེར་གསོལ་ཞབས་གཉིས་འདོར་སྟབས་བསྒྲད༔ ལྷུ་ཚིགས་རུས་རྒྱན་ཁྲལ་ཁྲོལ་སྟག་ཤམ་བརྗིད༔ རྡོ་རྗེ་རོ་ལངས་ཡུམ་དང་རྣམ་པར་བརྩེ༔ སྐུ་གསུང་ཐུགས་ཀྱི་སྤྲུལ་པ་ལྷ་ཀླུ་གཉན༔ སྡེ་བརྒྱད་བྲན་གཡོག་སྤྲུལ་འཁོར་བཅས་ལ་བསྟོད༔ ཞི་རྒྱས་དབང་དྲག་ཕྲིན་ལས་རྣམ་པ་བཞིས༔ ཕན་བདེའི་འབྱུང་གནས་རྒྱལ་བསྟན་བླ་རུ་འདེགས༔ དུས་གསུམ་དྲེགས་ལྡན་འགྲོ་རྣམས་བདེ་སྐྱིད་འཕེལ༔ ཆོས་མཐུན་རྣལ་འབྱོར་ཚེ་བསྲིང་འབྱོར་པ་རྒྱས༔ བསྟན་འགྲོའི་དཔལ་ལ་སྡང་བའི་དགྲ་བགེགས་ཀྱི༔ དོན་སྙིང་ཁོང་ནས་ཕྱུངས་ལ་ཞལ་དུ་གསོལ༔ ཅི་བཅོལ་ཕྲིན་ལས་ཐོགས་མེད་མྱུར་འགྲུབ་ནས༔ དོན་གཉིས་ཕུན་སུམ་ཚོགས་པའི་རྒྱལ་རྔ་བརྡུང་༔ གང་འདོད་སྨོན་པའི་ལས་ཀུན་འགྲུབ་པར་མཛོད༔ ཅེས་བརྗོད་གཏོར་མ་གཙང་སར་གཤེགས༔ འདི་ནི་འཇིག་རྟེན་རང་རྒྱུད་པའི༔ དྲེགས་པ་གཞན་ལས་ཁྱད་དུ་འཕགས༔ མཆོད་བསྟོད་བརྟེན་པ་ཙམ་གྱིས་ཀྱང་༔ བར་ཆད་སེལ་ཞིང་བསམ་པ་འགྲུབ༔ ཁྱད་པར་ཟབ་ཆོས་ཉམས་བླངས་པའི༔ གང་ཟག་མཆོག་དམན་སུ་ཡིན་ཀྱང་༔ སྡོང་གྲོགས་བྱེད་པར་གདོན་མི་ཟ༔ དེ་ཕྱིར་གཅེས་པར་ཉམས་སུ་ལོངས༔ ཞེས་ཐུགས་རྗེ་ཆེན་པོའི་བཀའ་སྲུང་རྒྱུན་ཁྱེར་འདི་ཡང་རིག་འཛིན་འཇའ་ཚོན་སྙིང་པོའི་ཆོས་བདག་པདྨའི་མིང་ཅན་གྱི་ཡང་སྲིད་ལུང་ཟིན་སྤྲུལ་པའི་གང་ཟག་གཞན་ཕན་བཟང་པོས་བསྐུལ་ངོར༔ མཁའ་འགྲོའི་དབྱིངས་མཛོད་ཀྱི་བཀའ་བབ་རིག་འཛིན་ལུང་རིག་གླིང་པས་སྤེལ་བ་དམ་ལྡན་ཆོས་རྒྱུད་འཛིན་པའི་གྲོགས་སུ་ཤོག༔ དགེའོ༔ དགེའོ༔ དགེའོ༔