ཡང་སྙིང་ཡིད་བཞིན་ནོར་བུ།
ཡང་ཟབ་འཕགས་པའི་ཐུགས་སྒྲུབ་ལས༔ ཡང་སྙིང་ཡིད་བཞིན་ནོར་བུ་བཞུགས༔
རྒྱལ་ཀུན་ཐུགས་རྗེའི་རང་གཟུགས་མཆོག༔ འཕགས་པ་མཆོག་ལ་ཕྱག་འཚལ་ནས༔ ཐུགས་རྗེ་ཆེན་པོའི་ཐུགས་སྒྲུབ་མཆོག༔ གཅིག་ཆོག་ཡིད་བཞིན་ནོར་བུ་བསྟན༔ ས་མ་ཡཱ༔ ཤིན་ཏུ་དབེན་ཅིང་ཉམས་དགའི་སར༔ དཀྱིལ་འཁོར་དབུས་སུ་ལྔ་ཚོམ་བཀོད༔ རིན་ཆེན་འབར་བའི་མཆོད་གཏོར་དང་༔ སྨན་རཀ་ཉེར་སྤྱོད་མཆོད་པས་བསྐོར༔ སྐུ་གསུང་ཐུགས་རྟེན་ཡིད་འོང་བཀྲམ༔ རྣལ་འབྱོར་བདེ་བའི་སྟན་ལ་འདུག༔ ངེས་འབྱུང་ཐར་པ་ལ་འདུན་པས༔ སྦྱོར་དངོས་རྗེས་གསུམ་ལྷག་བསམ་གྱིས༔ རྩེ་གཅིག་སྒྲུབ་པ་གལ་ཆེ་ཞིང་༔ སྤྲོས་མེད་རྒྱུན་གྱི་ཉམས་ལེན་ལ༔ སྒྲུབ་རྫས་མི་དགོས་ལུས་དཀྱིལ་དུ༔ དམིགས་པ་ཁོ་ནས་ཆོག་པའོ༔ དང་པོ་སྦྱོར་བའི་ཆོས་ལ་གསུམ༔ ཐོག་མར་སྐྱབས་སུ་འགྲོ་བ་ནི༔ ན་མོ༔ འགྲོ་དྲུག་དེང་ནས་བྱང་ཆུབ་བར༔ རྣམ་མཁྱེན་གོ་འཕང་ལ་འགོད་ཕྱིར༔ སངས་རྒྱས་ཆོས་དང་ཚོགས་མཆོག་ལ༔ སྒོ་གསུམ་གུས་པས་སྐྱབས་སུ་མཆི༔ གཉིས་པ་སེམས་མཆོག་བསྐྱེད་པ་ནི༔ ཧོ༔ འཁོར་བ་སྡུག་བསྔལ་རྒྱ་མཚོ་ལས༔ འགྲོ་ཀུན་བདག་གིས་བསྒྲལ་ནས་ཀྱང་༔ འཕགས་མཆོག་གོ་འཕང་ལ་འགོད་ཕྱིར༔ བྱང་ཆུབ་སྙིང་པོར་སེམས་བསྐྱེད་དོ༔ གསུམ་པ་ཚོགས་བསག་བྱ་བ་ནི༔ ཨེ་མ་ཧོ༔ སྤྱན་རས་གཟིགས་དབང་ལྷ་ཚོགས་རྣམས༔ ཐུགས་རྗེའི་དབང་གིས་མདུན་མཁར་སྤྱོན༔ བཀོད་ལེགས་སྤྲུལ་པའི་གདན་ལ་བཞུགས༔ བདག་གིས་འགྲོ་དྲུག་སྒྲིབ་སྦྱང་སླད༔ ཉམས་ཆག་སྡིག་པ་སོ་སོར་བཤགས༔ དུས་གསུམ་དགེ་ལ་རྗེས་ཡི་རང༔ གྲངས་མེད་ལུས་སྤྲུལ་ལྷ་ཕྱག་འཚལ༔ ཀུན་བཟང་རྣམ་རོལ་མཆོད་སྤྲིན་འབུལ༔ མཁའ་བཞིན་འགྲོ་ངོར་བཞུགས་གསོལ་འདེབས༔ ཆོས་ཀུན་གཅིག་བསྡུས་རྒྱལ་སྲས་ཀྱི༔ ལམ་མཆོག་ཆོས་འཁོར་བསྐོར་བར་བསྐུལ༔ དུས་གསུམ་དགེ་རྩ་འགྲོ་ལ་བསྔོ༔ ཕྱམ་གཅིག་སངས་རྒྱས་མྱུར་འགྲུབ་ཤོག༔ དངོས་གཞིར་རྣམ་གྲངས་བདུན་གྱིས་བསྟན༔ དང་པོ་ལྷ་སྣང་གསལ་བ་ནི༔ ཧྲཱིཿ ཆོས་ཀུན་མི་དམིགས་སྟོང་པའི་ངང་༔ མ་རྟོགས་འགྲོ་ལ་སྙིང་རྗེའི་གདངས༔ ཟུང་འཇུག་སྣང་སྟོང་རིག་རྩལ་ལས༔ ལྷུན་གྲུབ་བདེ་ཆེན་ཞིང་གི་དབུས༔ རང་བྱུང་ཕོ་བྲང་པོ་ཊ་ལ༔ མཚན་ཉིད་ཡོངས་རྫོགས་ད་ལ་རུ༔ པདྨ་འདབ་དྲུག་ཟླ་སྟེང་ལ༔ ཐ་མལ་མ་བཅོས་རིག་པ་ནི༔ མཆོག་གསུམ་ཀུན་འདུས་སྤྱན་རས་གཟིགས༔ དཀར་གསལ་མཚན་དཔེ་རྫོགས་པའི་སྐུ༔ ཞལ་གཅིག་འཛུམ་པས་འགྲོ་ལ་གཟིགས༔ ཕྱག་བཞིའི་དང་པོ་ཐལ་མོ་སྦྱར༔ འོག་མས་ཤེལ་ཕྲེང་པད་དཀར་འཛིན༔ ཞབས་གཉིས་མཉམ་པའི་སྐྱིལ་མོ་ཀྲུང་༔ ལོངས་སྤྱོད་རྫོགས་སྐུའི་རྒྱན་ཀུན་གསོལ༔ འདབ་དྲུག་ཟླ་གདན་ཟླུམ་བསྐོར་བའི༔ མདུན་དུ་ལྷ་ཡི་ཐུབ་པ་དཀར༔ པི་ཝཾ་སྙན་སྒྲོག་ཆོས་གོས་གསོལ༔ ང་རྒྱལ་འཇོམས་པའི་ཆོས་ཚུལ་སྟོན༔ ལྷ་རྣམས་ལྟུང་བའི་འཇིགས་ལས་སྒྲོལ༔ མདུན་གཡས་ལྷ་མིན་ཐུབ་པ་སྔོ༔ གོ་མཚོན་བསྣམས་ཤིང་ཆོས་གོས་གསོལ༔ ཕྲག་དོག་འཇོམས་པའི་ཆོས་ཚུལ་སྟོན༔ ལྷ་མིན་འཐབ་རྩོད་འཇིགས་ལས་སྒྲོལ༔ གཡས་སུ་མི་ཡི་ཐུབ་པ་སེར༔ ལྷུང་བཟེད་འཁར་སིལ་ཆོས་གོས་གསོལ༔ འདོད་ཆགས་འཇོམས་པའི་ཆོས་ཚུལ་སྟོན༔ མི་རྣམས་འཁོར་བའི་འཇིགས་ལས་སྒྲོལ༔ རྒྱབ་ཏུ་ཡི་དྭགས་ཐུབ་པ་དམར༔ ཕྱག་མཚན་སྒྲོམ་བུ་ཆོས་གོས་གསོལ༔ སེར་སྣ་འཇོམས་པའི་ཆོས་ཚུལ་སྟོན༔ ཡི་དྭགས་བཀྲེས་སྐོམ་འཇིགས་ལས་སྒྲོལ༔ གཡོན་དུ་བྱོལ་སོང་ཐུབ་པ་ལྗང་༔ གླེགས་བམ་སྐྱབས་སྦྱིན་ཆོས་གོས་གསོལ༔ གཏི་མུག་འཇོམས་པའི་ཆོས་ཚུལ་སྟོན༔ དུད་འགྲོ་གསོད་གཅོད་འཇིགས་ལས་སྒྲོལ༔ རྒྱབ་གཡོན་དམྱལ་བའི་ཐུབ་པ་ནག༔ མེ་ཆུའི་ཕྱག་རྟགས་ཆོས་གོས་གསོལ༔ ཞེ་སྡང་འཇོམས་པའི་ཆོས་ཚུལ་སྟོན༔ དམྱལ་བ་ཚ་གྲང་འཇིགས་ལས་སྒྲོལ༔ ཀུན་ཀྱང་བཞེངས་པའི་ཚུལ་དུ་བསྐྱེད༔ སྒོ་བཞིར་ཚད་མེད་རྣམ་བཞིའི་འཕྲུལ༔ སྤྲུལ་པའི་ལྷ་མོ་ཆེན་མོ་བཞི༔ ལྷ་ཡི་བུ་མོ་མཛེས་སྡུག་གཟུགས༔ དར་དང་རིན་ཆེན་རྒྱན་ཆས་སྤྲས༔ ལྕགས་ཀྱུ་ཞགས་པ་ལྕགས་སྒྲོག་དྲིལ༔ གཡས་རྣམས་རང་རྟགས་མཁའ་ལ་ཕྱར༔ གཡོན་རྣམས་དག་བྱེད་ཁྲུས་བུམ་བསྣམས༔ གཙོ་བོའི་སྤྱི་བོར་པད་ཟླའི་སྟེང་༔ རིགས་བདག་སྣང་བ་མཐའ་ཡས་དམར༔ ཐུགས་ཀར་ཉི་སྟེང་ཡེ་ཤེས་སེམས༔ དཔའ་བོ་རྟ་མགྲིན་ཁྲོ་བོའི་ཆས༔ དམར་གསལ་པད་ཕྲེང་སྡིགས་མཛུབ་གདེངས༔ གཞན་ཡང་སངས་རྒྱས་བྱང་ཆུབ་སེམས༔ བླ་མ་ཡི་དམ་མཁའ་འགྲོ་དང་༔ དམ་ཅན་ཆོས་སྲུང་རང་མོས་ལྷ༔ གཙོ་བོ་གཅིག་པུའི་ཆོ་འཕྲུལ་ཏེ༔ མ་བསྐྱེད་ཡོངས་གྲུབ་ཆེན་པོར་གསལ༔ གཉིས་པ་སྤྱན་འདྲེན་སྤོས་རོལ་དང་༔ དད་མོས་བློ་ཡིས་འདི་སྐད་དོ༔ ཧྲཱིཿ འཁོར་འདས་རོ་མཉམ་རིག་པའི་གཤིས༔ ཚད་མེད་སྙིང་རྗེར་ཤར་བའི་ལྷ༔ ཐུགས་རྗེའི་མངའ་བདག་སྤྱན་རས་གཟིགས༔ ཚོགས་དྲུག་རང་གྲོལ་ཐུབ་པ་དྲུག༔ ཚད་མེད་རྣམ་བཞི་སྒོ་སྲུང་ཚུལ༔ སྐྱབས་ཀུན་གཅིག་འདུས་སྣང་མཐའ་ཡས༔ བར་ཆད་བདུད་འདུལ་རྟ་མཆོག་རྒྱལ༔ སྤྲུལ་བ་ཡང་སྤྲུལ་འཁོར་དང་བཅས༔ གནས་འདིར་སྤྱན་འདྲེན་གཤེགས་སུ་གསོལ༔ སྒྲུབ་མཆོག་སྒོ་གསུམ་བྱིན་གྱིས་རློབས༔ མཆོག་དང་ཐུན་མོང་དངོས་གྲུབ་སྩོལ༔ ཨརྱ་ལོ་ཀི་ཤྭ་ར་བཛྲ་ས་མ་ཡཱ་ཛཿཛ༔ གཉིས་པ་བཞུགས་སུ་གསོལ་བ་ནི༔ ཧྲཱིཿ དམ་ཚིག་བསྐྱེད་པའི་དཀྱིལ་འཁོར་ལ༔ རང་བྱུང་ཡེ་ཤེས་དབྱིངས་ཀྱི་ལྷ༔ འདུ་འབྲལ་མེད་པར་བརྟན་བཞུགས་ནས༔ འགྲོ་དྲུག་དབྱིངས་སུ་གྲོལ་བར་མཛོད༔ བཛྲ་ས་མ་ཡཱ་ཏིཥྛ་ལྷན༔ གསུམ་པ་བརྡ་ཕྱག་འཚལ་བ་ནི༔ ཧྲཱིཿ ལྷ་ཚོགས་རང་བྱུང་སེམས་ཀྱི་རྩལ༔ རང་ལས་སྤྲུལ་པའི་ལྷ་རྣམས་ཀྱི༔ ལྟ་བའི་རང་ཞལ་མཇལ་བའི་ཕྱིར༔ སྒོ་གསུམ་གུས་པས་བརྡ་ཕྱག་འཚལ༔ ཨ་ཏི་པུ་ཧོ༔ པྲ་ཏིཥྩ་ཧོ༔ བཞི་བ་མཆོད་ཚོགས་འབུལ་བ་ནི༔ ཧྲཱིཿ མེ་ཏོག་དྲི་ཞིམ་གསལ་བའི་འོད༔ དྲི་བཟང་བྱུག་པ་བདུད་རྩིའི་ཟས༔ སྒྲ་སྙན་བསྟོད་དབྱངས་རོལ་མོའི་སྒྲ༔ འདོད་ལྔ་ཕྱི་ཡི་མཆོད་པ་འབུལ༔ རང་བྱུང་འཆི་མེད་སྨན་གྱི་མཆོག༔ ཉོན་མོངས་ཆགས་བྲལ་རཀྟ་དམར༔ སྣང་སྟོང་དབྱེར་མེད་བྷ་ལིང་ཏ༔ གསང་སྔགས་ནང་གི་དམ་རྫས་འབུལ༔ ཡུལ་དྲུག་བདེ་སྟོང་ཡེ་ཤེས་རྫོགས༔ བདག་རྟོག་སྐྱེ་མེད་ཀློང་དུ་སྒྲོལ༔ ཐམས་ཅད་རང་བྱུང་སེམས་ཀྱི་འཕྲུལ༔ བློ་འདས་གསང་བའི་མཆོད་པ་འབུལ༔ བཞེས་ནས་མཆོག་ཐུན་དངོས་གྲུབ་སྩོལ༔ ཨོཾ་བཛྲ་ཨརྒྷཾ་སོགས་ནས་ཤཔྟ་ཨ་མྲྀ་ཏ་རཀྟ་བྷ་ལིངྟ་ཏ་ན་ག་ན་མ་ཧཱ་དྷརྨ་དྷརྟུ་པཱུ་ཛ་ཧོ༔ ལྔ་པ་གུས་པས་བསྟོད་པ་ནི༔ ཧྲཱིཿ མཐོང་ན་མི་མཐུན་མེད་པའི་སྐུ༔ ཐོས་པས་རྣམ་གྲོལ་ལེགས་བཤད་གསུང་༔ དྲན་པས་སྲིད་ཞིའི་གདུང་སེལ་ཐུགས༔ འཕགས་པ་མཆོག་ལ་ཕྱག་འཚལ་བསྟོད༔ འཁོར་བ་སྡུག་བསྔལ་རྦ་ཀློང་དུ༔ རྣམ་པར་འཁྱམས་པའི་འགྲོ་བ་དྲུག༔ ཐབས་མཁས་ཐུགས་རྗེས་སྒྲོལ་མཛད་པའི༔ ཐུབ་པ་དྲུག་ལ་ཕྱག་འཚལ་བསྟོད༔ བྱམས་དང་སྙིང་རྗེས་དབང་དུ་སྡུད༔ དགའ་བས་སེམས་ཅན་ཐར་པར་འདྲེན༔ བཏང་སྙོམས་འཁོར་འདས་མཉམ་པར་སྟོན༔ ཚད་མེད་ལྷ་མོ་བཞི་ལ་བསྟོད༔ བྱམས་བརྩེའི་ཐུགས་ཀྱིས་འགྲོ་ཀུན་སྐྱོང་༔ ས་བཅུའི་མཐར་སོན་སྲིད་ལས་གྲོལ༔ སངས་རྒྱས་བྱང་སེམས་རྩ་གསུམ་ལྷ༔ མ་ལུས་ཀུན་ལ་ཕྱག་འཚལ་བསྟོད༔ དྲུག་པ་ཉེས་ཚོགས་བཤགས་པ་ནི༔ ཧྲཱིཿ འཁོར་ཚེ་ཐོག་མ་མེད་པ་ནས༔ ཉེས་ལྟུང་སྒྲིབ་ཚོགས་ཅི་བསགས་པ༔ ཐམས་ཅད་འཕགས་པའི་སྤྱན་སྔར་བཤགས༔ དག་ཚངས་མཆོག་གི་དབུགས་དབྱུང་གསོལ༔ ཡི་གེ་བརྒྱ་བས་ནོངས་པ་བཤགས༔ བདུན་པ་འཛབ་ཀྱི་དམིགས་པ་ནི༔ ཧྲཱིཿ འཕགས་པའི་ཐུགས་ཀར་ཡེ་ཤེས་སེམས༔ དེ་ཡི་ཐུགས་དབུས་པད་ཟླའི་སྟེང༔ ཧྲཱིཿདཀར་ཡིག་དྲུག་སྔགས་ཀྱིས་བསྐོར༔ འོད་འཕྲོས་ཁམས་གསུམ་ལས་ཉོན་སྦྱངས༔ གཟུགས་སྣང་སྐུ་ལ་སྒྲ་གྲགས་སྔགས༔ དྲན་རྟོག་རང་བྱུང་འཕགས་པའི་ཐུགས༔ དམིགས་པ་རྩེ་གཅིག་སྔགས་འདིར་འབད༔ ཨོཾ་མ་ཎི་པདྨེ་ཧཱུྃ་ཧྲཱིཿ སྔགས་ཀྱི་རྒྱལ་པོ་ཡི་གེ་དྲུག༔ རྒྱལ་བ་ཀུན་གྱི་གསུང་གི་དབྱིག༔ འགྲོ་དྲུག་ལས་ཉོན་སྦྱང་བའི་མཆོག༔ འདི་ལ་བརྩོན་པའི་སྐལ་ལྡན་དེ༔ རྒྱལ་ཀུན་ཐུགས་ཀྱི་སྲས་སུ་དགོངས༔ དཀར་ཕྱོགས་ལྷ་དང་སྲུང་མས་སྐྱོབས༔ ནག་ཕྱོགས་གདུག་ཞི་བྱམས་སེམས་ལྡན༔ ཚེ་འདིར་གང་སྨོན་ཡིད་བཞིན་འགྲུབ༔ འཕོས་ཚེ་དག་པའི་ཞིང་ཁམས་བགྲོད༔ ས་བཅུའི་ཡོན་ཏན་རིམ་བཞིན་འཕེལ༔ དེ་ཕྱིར་སྔགས་ཀྱི་གྲངས་ཚད་ལ༔ ངེས་མེད་རྒྱུན་དུ་ཉམས་ལེན་མཛོད༔ ས་མ་ཡཱ༔ རྗེས་ཀྱི་རིམ་པ་གསུམ་གྱིས་བསྟན༔ དང་པོ་བསྡུ་རིམ་བྱ་བ་ནི༔ ཧྲཱིཿ སྣང་བའི་ངོ་བོ་གཞལ་ཡས་ཁང་༔ རིམ་ཡལ་འཁོར་རྣམས་གཙོ་བོར་ཐིམ༔ དེ་ཡང་ཡེ་ཤེས་སེམས་དཔའ་དང་༔ ཐུགས་སྲོག་མཁའ་ལ་འཇའ་ཚོན་བཞིན༔ རང་བྱུང་གདོད་མའི་གཤིས་སུ་ཐིམ༔ བློ་འདས་རང་བབ་ཆེན་པོར་བཞག༔ ཨ་ཨཿ ཐུན་སྐབས་སྒྱུ་མའི་ལྷ་རུ་ལྡང་༔ གཉིས་པ་བསྔོ་སྨོན་བྱ་བ་ནི༔ ཧྲཱིཿ དུས་གསུམ་ཀུན་ཏུ་རྣམ་དཀར་དགེ༔ ཅི་བགྱིས་མཐའ་ཡས་འགྲོ་ལ་བསྔོ༔ ཀུན་ཀྱང་ལས་ཉོན་སྒྲིབ་དག་ནས༔ འཕགས་པའི་གོ་འཕང་མྱུར་ཐོབ་ཤོག༔ གསུམ་པ་ཤིས་པ་བརྗོད་པ་ནི༔ ཧྲཱིཿ ཉོན་ཤེས་སྒྲིབ་བྲལ་སངས་རྒྱས་ཀྱང་༔ བྱམས་བརྩེས་གང་འདུལ་སྤྲུལ་སྐུར་སྟོན༔ འཕགས་མཆོག་ཐུགས་རྗེའི་དཀྱིལ་འཁོར་ལྷས༔ དུས་གསུམ་དགེ་བའི་ཤིས་པ་སྩོལ༔ ཅེས་སོགས་ཤིས་བརྗོད་མཐའ་རྒྱས་བྱ༔ དབང་དང་འབྲེལ་ན་ཚོགས་བསྐང་སོགས༔ ཐུགས་སྒྲུབ་རང་གཞུང་ཉིད་དང་བསྟུན༔ ས་མ་ཡཱ༔ ཤིན་ཏུ་བྱིན་རླབས་ཟབ་མྱུར་ཆོས༔ ཚིག་ལ་མི་ལྟོས་དོན་གྱི་གནད༔ མཚོ་རྒྱལ་ཁྱེད་ཀྱི་སྙིང་ལ་སྦོས༔ པདྨ་བདག་གི་ཐུགས་བསྐྱེད་མཐུས༔ མ་འོངས་སྐལ་ལྡན་ཆོས་ཀྱི་བདག༔ འདི་འཕྲད་འཁོར་བ་དོངས་སྤྲུག་ཤོག༔ གུ་ཧྱ༔ བརྡ་ཐིམ༔ དུས་བབས་ཀྱི་གཏེར་འདོན་ལུང་རིག་གླིང་པ་རྩལ་གྱིས་དབྱིངས་རིག་སྟོང་པའི་སྒྲོམ་ནས་བཏོན་པའོ༔ མངྒ་ལཾ༔