དབང་ཆོག་འབྲེལ་ཚད་དོན་ལྡན།
དམ་ཆོས་ཡང་ཟབ་པདྨའི་ཐུགས་ཐིག་ལས༔ འཕགས་མཆོག་ཐུགས་རྗེ་ཆེན་པོའི་དབང་ཆོག་འབྲེལ་ཚད་དོན་ལྡན་བཞུགས༔
ན་མོ་ཨརྱཱ་པ་ལོ་ཡེ། རྒྱལ་ཀུན་བྱམས་བརྩེའི་རང་གཟུགས་མཆོག༔ བླ་མ་སྤྱན་རས་གཟིགས་ལ་འདུད༔ འགྲོ་བའི་དོན་དུ་པདྨ་ངས༔ ཟབ་རྒྱས་དམ་ཆོས་དཔག་མེད་དང༔ ཁྱད་པར་འཕགས་པའི་སྒྲུབ་ཐབས་ནི༔ བྱེ་མའི་གྲངས་དང་མཉམ་པ་བརྩམས༔ འགའ་ཞིག་དངོས་གཏེར་གབ་རྒྱས་གདབ༔ འདི་ནི་མུ་རུབ་བཙན་པོ་དང༔ ཐུགས་ཀྱི་གཟུངས་མ་མཁར་ཆེན་བཟའ༔ དགེ་སློང་ནམ་མཁའི་སྙིང་པོ་སོགས༔ སྐལ་ལྡན་ཉི་ཤུ་རྩ་ལྔ་ལ༔ ཡབ་མེས་སྲོང་བཙན་སྒམ་པོའི་ལུགས༔ འཕགས་མཆོག་ཕྱག་སྟོང་སྤྱན་སྟོང་གི༔ སྒྲུབ་ཐབས་དབང་དང་ལས་ཚོགས་སོགས༔ ཤིན་ཏུ་ཡང་ཟབ་སྙིང་གི་ཁྲག༔ སྤེལ་བར་ཕངས་པའི་ཆོས་ཡིན་ཀྱང༔ བདག་ལ་འགྲོ་བའི་དོན་ལས་མེད༔ བསམ་ཡས་བར་ཁང་གཡུ་ཞལ་དུ༔ དགའ་སྟོན་ཆོས་ཀྱི་སྐྱེས་སུ་བྱིན༔ མི་བརྗེད་གཟུངས་ཐོབ་མཚོ་རྒྱལ་མས༔ ཟབ་དོན་སྙིང་གི་སྒྲོམ་དུ་སྦོས༔ མ་འོངས་ཁྱོད་ཀྱི་སྤྲུལ་པ་འགས༔ སྙིགས་དུས་འགྲོ་བའི་དོན་མཛད་ཚེ༔ ཕྲིན་ལས་སྤྲུལ་པ་རྒྱལ་གྱི་མིང༔ མ་ངེས་སྤྱོད་འཆང་བྱང་ཆུབ་སེམས༔ ལས་ལྡན་དེ་དང་འཕྲད་པ་རུ༔ སྨོན་ལམ་རྒྱས་ཐོབ་སྐལ་ལྡན་དེས༔ བསྟན་འཛིན་སྐུ་ཚེ་བསྲིང་བ་དང༔ འབྲེལ་ཚད་དོན་དང་ལྡན་པའི་ཕྱིར༔ འགྲོ་དོན་ཕྱི་བཤོལ་མེད་པར་མཛོད༔ ས་མ་ཡཱ༔ དབང་ཆོག་ཟབ་མོ་སྒྲུབ་པ་ལ༔ རྫས་རྣམས་རང་གཞུང་དག་ཏུ་ཤེས༔ དབང་གཏོར་རིན་ཆེན་འབར་བའི་དབྱིབས༔ རྩེ་ཟླུམ་ལྟོ་ལྡིར་རྩ་བ་བརྟན༔ ལྷུན་ཆགས་པདྨའི་ཕྲ་ཚོམ་ཅན༔ རྒྱན་ལྡན་དེ་ཡི་མཐའ་མ་རུ༔ གཡས་གཡོན་མདུན་རྒྱབ་བཤོས་བུ་བཞི༔ ཤིན་ཏུ་མཛེས་པའི་དཀར་ཚོན་བསྒྱུར༔ རིལ་བུ་ཅི་མང་དར་གུར་ཕུབ༔ བདག་ཉིད་པདྨའི་སྐུ་བརྙན་འཛུགས༔ སྨན་རཀ་ཉེར་སྤྱོད་མཐའ་ནས་བསྐོར༔ བསྲུང་མའི་མཆོད་གཏོར་ཚོགས་ཀྱི་རྫས༔ མ་ཚང་མེད་པར་འདུ་བྱས་ལ༔ རྣལ་འབྱོར་བདེ་བའི་སྟན་ལ་འདུག༔ ཆོ་གའི་གཞུང་བསྲང་བསྙེན་མཚམས་སུ༔ བུམ་པ་སོ་ལྔའི་རྫས་ལྡན་པ༔ མ་ཧཱ་ཤུ་ནྱའི་སྔགས་ཀྱིས་བསང༔ སྟོང་གསལ་རང་བྱུང་ཆོས་དབྱིངས་བུམ་པ་ཆེ༔ འགགས་མེད་ཚད་དང་མཚན་ཉིད་ཡོངས་རྫོགས་པའི༔ ནང་ནི་སྤྲུལ་པའི་ཞིང་ཁམས་པོ་ཊ་ལ༔ རིན་ཆེན་སྣ་ཚོགས་ལས་གྲུབ་བཀོད་མཛེས་དབུས༔ ཧྲཱིཿཡིག་དཀར་པོ་ཟླ་བ་ཞུན་མ་ལྟར༔ གསལ་འཚེར་འོད་ཀྱི་ཕུང་པོར་འབར་བ་ལས༔ སྐད་ཅིག་དྲན་རྫོགས་འཕགས་མཆོག་སྤྱན་རས་གཟིགས༔ ཕྱག་སྟོང་སྤྱན་སྟོང་འཁོར་དང་སྤྲུལ་པར་བཅས༔ དྭངས་པའི་མཚོ་ལ་གཟའ་སྐར་ཤར་བ་བཞིན༔ གསལ་བརྟན་ཏིང་འཛིན་ཡེང་མེད་དེའི་ཐུགས་ཀར༔ ཧྲཱིཿདཀར་མཐའ་མར་གཟུངས་སྔགས་གཡས་བསྐོར་ལས༔ འོད་འཕྲོས་འཕགས་མཆོད་བྱིན་རླབས་ཚུར་འདུས་པས༔ སྐུ་དང་སྔགས་ལས་བདུད་རྩིའི་རྒྱུན་བབས་ཏེ༔ བུམ་པ་གང་ཞིང་སླར་ཡང་འོད་འཕྲོས་པས༔ འགྲོ་དྲུག་སྒྲིབ་སྦྱང་འཕགས་པའི་སྐུ་རུ་གྱུར༔ ཅེས་བསམ་གཟུངས་བཟླས་གཟུངས་ཐག་བུམ་པར་གདགས༔ མཐར་ནི་མཆོད་བསྟོད་ལྷ་ཉིད་འོད་ཞུ་བས༔ བུམ་པའི་ཆུ་དང་དབྱེར་མེད་འདྲེས་པར་བསམ༔ ལས་བུམ་རྟ་མགྲིན་པདྨ་འཛིན་པར་བསྐྱེད༔ ཨོཾ་ཧྲཱིཿབཛྲ་ཀྲོ་ཏ་ཧྱ་གྷྲྀ་ཝ་ཧུ་ལུ་ཧུ་ལུ་ཧཱུྃ་ཕཊ༔ མཆོད་བསྟོད་མཆོད་ཡོན་ཕུལ་བས་ཡེ་ཤེས་གཤེགས༔ དམ་ཚིག་འོད་ཞུ་བདུད་རྩིའི་རྒྱུན་དུ་དམིགས༔ བསྲུང་མ་གསོལ་ཞིང་ཚོགས་ཀྱིས་ཐུགས་དམ་བསྐང༔ ཉམ་ཆགས་བཤགས་ཤིང་སྙན་གསན་འདི་བཞིན་དབབ༔ ཀྱེ་ཧོ༔ འཕགས་མཆོག་ཐུགས་རྗེའི་བདག་ཉིད་སྤྱན་རས་གཟིགས༔ བདག་གིས་ཁྱེད་ལ་རྩེ་གཅིག་གསོལ་འདེབས་ཤིང༔ བསྙེན་སྒྲུབ་ལས་སྦྱོར་རྡོ་རྗེའི་སློབ་མ་ལ༔ དངོས་གྲུབ་དབང་གིས་སྨིན་ཅིང་གྲོལ་འདོད་ན༔ རྗེས་སུ་བརྩེ་བའི་ཞུགས་ཀྱིས་ཉེར་དགོངས་ནས༔ ཚད་མེད་བྱིན་རླབས་ཆར་ཆེན་དབབ་ཏུ་གསོལ༔ བདུད་བགེགས་བར་ཆད་དབྱིངས་སུ་བསལ་དུ་གསོལ༔ ཚེ་འདིར་སྐུ་བཞིའི་འབྲས་བུ་སྩལ་དུ་གསོལ༔ འབྲེལ་ཚད་དོན་དང་ལྡན་པར་མཛད་དུ་གསོལ༔ དབང་འདིས་རྒྱུད་སྨིན་གྲོལ་བར་མཛད་དུ་གསོལ༔ ཅེས་པས་ལན་གསུམ་གསོལ་བཏབ་རྗེས༔ དབང་ལེན་སློབ་མ་སྨིན་པའི་ཕྱིར༔ བདག་དང་འཕགས་པ་དབྱེར་མེད་བསམ༔ དེ་ནས་དབང་ཞུ་མདུན་དུ་འཁོད༔ ཁྲུས་བྱ་བགེགས་ལ་གཏོར་མ་སྦྱིན༔ བཀའ་བསྒོ་མཚམས་གཅོད་བསྲུང་འཁོར་བསྒོམ༔ སྤྱི་དང་བྱེ་བྲག་ཆོས་བཤད་ཀྱིས༔ བློ་བཅོས་རྡོ་རྗེ་སློབ་དཔོན་ལ༔ ཕྱི་ནང་རིན་ཆེན་མཎྚལ་འབུལ༔ སྙན་པས་གསོལ་འདེབས་འདི་བཞིན་བྱ༔ ཀྱེ་ཧོ༔ འཕགས་མཆོག་སྟོན་པ་རྡོ་རྗེ་རྒྱལ་པོ་ལགས༔ གསང་སྔགས་རྩ་བ་སྨིན་བྱེད་དབང་གིས་ནི༔ བདག་རྒྱུད་སྒྲིབ་བཞིའི་དྲི་མ་སྦྱང་པ་དང༔ སྐུ་བཞིའི་ས་བོན་ཐེབ་པར་མཛད་དུ་གསོལ༔ ཅེས་པས་གསོལ་འདེབས་ལན་དུ་བླ་མ་ཡིས༔ ཀྱེ་ཀྱེ་གསང་བ་བས་ཀྱང་ཆེས་གསང་བ༔ ཡང་ཟབ་མཁའ་འགྲོའི་ཐུགས་བཅུད་ཟབ་མོ་ཡི༔ འཕགས་པའི་དབང་གིས་དབང་གིས་སྨིན་ཅིང་གྲོལ་འདོད་ན༔ གང་སྨྲས་དམ་ཚིག་སྡོམ་ལ་གནས་ནུས་སམ༔ སླར་ཡང་སློབ་མས་མོས་གུས་དང་བཅས་ཏེ༔ གདུང་བའི་དབྱངས་ཀྱིས་དམ་བཅའ་འདི་ལྟར་ཕུལ༔ ཀྱེ་ཧོ༔ འགྲོ་མགོན་འཕགས་མཆོག་སྙིང་རྗེའི་ལྷའི༔ དབང་བསྐུར་ཟབ་མོས་བདག་རྒྱུད་སྨིན་མཛད་ན༔ བླ་མས་ཇི་ལྟར་བསྒོ་བ་དེ་བཞིན་དུ༔ ནམ་ཡང་ཡལ་བར་མི་འདོར་བདག་སྒྲུབ་བོ༔ ཅེས་པའི་ལན་དུ་འདི་བཞིན་བརྡ་སྤྲོད་བྱ༔ ཨེ་མ་ངོ་མཚར་དམ་བསྲུང་སྐྱེས་བུའི་མཆོག༔ འཕགས་པ་མཆོག་འདི་ཡི་དམ་ལྷ་རུ་ཟུངས༔ སྲོག་བཞིན་སྨོན་འཇུག་སེམས་བསྐྱེད་འདོར་མི་རུང༔ རྟེན་བཞེངས་སྲོག་བསླུ་བསྙུང་གནས་སྐུ་གསལ་ཐོབ༔ གཟུངས་སྔགས་རྒྱུན་ཟློས་གཞན་ལ་ཕན་པ་སྒྲུབ༔ དེས་ནི་དབང་གི་འབྲས་བུ་ཆུད་མི་ཟ༔ དེ་བས་རྟག་ཏུ་ནན་ཏན་མཛད་འཚལ་ལོ༔ དེ་ནས་དམ་ཆུ་བླུད་པ་ནི༔ ནང་མཆོད་བསྲེས་པའི་བསང་ཆུ་སྦྱིན༔ ཧོ་འདི་ནི་ཤིན་ཏུ་བསྲེག་བྱེད་དམ་ཚིག་ཆུ༔ བསྲུང་ན་མཆོག་ཐུན་དངོས་གྲུབ་ཚེ་འདིར་ཐོབ༔ ཉམས་ན་སྙིང་འགས་མནར་མེད་སྡུག་བསྔལ་མྱོང༔ དེ་བས་རྡོ་རྗེ་བདུད་རྩིའི་ཆུ་འདི་འཐུང༔ མ་ཉམས་སྙིང་གི་དཀྱིལ་དུ་དམ་བཅའ་ཟུངས༔ བཛྲ་ས་མ་ཡཱ་ཡཀྴ་ཀྲོ་ཏ་སིདྡྷི་ཧཱུྃ༔ གདོང་གཡོག་དགབ་ཅིང་མེ་ཏོག་ཐོགས༔ སྡོམ་དང་དམ་ཚིག་དབང་གི་གཞི༔ སྐྱབས་སུ་འགྲོ་ཞིང་སེམས་བསྐྱེད་བླངས༔ རྒྱུན་བཤགས་ཡན་ལག་བདུན་པ་འབུལ༔ དངོས་གཞི་དབང་གི་བྱིན་རླབས་མཆོག༔ འབེབས་ཕྱིར་དམིགས་པ་འདི་བཞིན་འབོག༔ ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅ཧཾ༔ འཁོར་འདས་ཀྱི་ཆོས་ཐམས་ཅད་རང་བཞིན་གྱིས་འོད་གསལ་བའི་སྟོང་པ་ཉིད་དུ་གྱུར༔ སྟོང་པའི་ངང་ལས་ཕྱི་སྣོད་ཀྱི་འཇིག་རྟེན་ཕོ་བྲང་རི་བོ་ཏ་ལའི་གཞལ་མེད་ཁང་ཆེན་པོར་གྱུར་པའི་དབུས་སུ༔ པདྨ་དང་ཉི་ཟླའི་གདན་ལ་ཁྱེད་རང་གི་རིག་པ་དྭངས་ཤེལ་གྱི་རྡོ་རྗེ་རྩེ་ལྔ་པ་ཧྲཱིཿཡིག་དཀར་པོ་མར་མེ་ལྟར་འབར་བ་ལས་འོད་ཟེར་ཁ་ཏོག་ལྔ་ལྡན་ཕྱོགས་བཅུར་འཕྲོས་པས༔ འཕགས་པ་མཆོད༔ སེམས་ཅན་གྱི་དོན་བྱས༔ རིགས་དྲུག་གི་སེམས་ཅན་ཐམས་ཅད་འཕགས་པའི་གོ་འཕང་ལ་བཀོད༔ ཚུར་འདུས་པ་ལས་འཕགས་མཆོག་སྙིང་རྗེའི་གཏེར་མཛོད་སྤྱན་རས་གཟིགས་ཞལ་བཅུ་གཅིག་པའི་སྐུར་གསལ་བའི་གནས་གསུམ་ལས་འཕྲོས་པའི་འོད་ཀྱིས་ཕྱོགས་བཅུའི་རྒྱལ་བ་སྲས་དང་བཅས་པའི་ཚོགས་མ་ལུས་པ་ཐམས་ཅད་འཕགས་པ་ཐུགས་རྗེ་ཆེན་པོའི་སྐུ་གསུང་ཐུགས་ཀྱི་རྣམ་པར་མདུན་གྱི་མཁའ་ལ་འོད་དང་གཟི་བརྗིད་ཆོས་ཀྱི་སྒྲ་དབྱངས་མཁྱེན་བརྩེའི་བྱིན་ནུས་དང་བཅས་ཏེ་བཛྲ་ས་མཱ་ཛ༔ སྤྱན་འདྲེན་ཚིག་གམ་ཡང་ན་འདི་ཡིས་དབབ༔ ཧཱུྃ་ཧྲཱིཿ ཆོས་དབྱིངས་ལྷུན་གྲུབ་འོད་གསལ་འདུས་མ་བྱས༔ ཀུན་ཁྱབ་རྟག་པ་རྒྱུན་གྱི་ཕོ་བྲང་ནས༔ དུས་གསུམ་རྒྱལ་བའི་ཡབ་གཅིག་སྤྱན་རས་གཟིགས༔ ཚད་མེད་ཐུགས་རྗེ་ཆེན་པོས་ཉེར་དགོངས་ལ༔ སྐལ་ལྡན་ལུས་ངག་ཡིད་ལ་བྱིན་ཆེན་ཕོབ༔ མཆོག་ཐུན་དངོས་གྲུབ་དུས་འདིར་སྩལ་དུ་གསོལ༔ ཨོཾ་ཨཱརྱ་ལོ་ཀི་ཤྭ་ར་ཛྙཱ་ན་བཛྲ་ཨ་ཝེ་ཤ་ཡ་ཕེཾ་ཕེཾ༔ ཨ་ཨཱ༔ ཅེས་བརྗོད་སྤྱན་དྲངས་ལྷ་རྣམས་སློབ་མར་བསྟིམས༔ ཏིཥྛ་བཛྲ༔ ཅེས་བརྗོད་རྒྱས་གདབ་བྱ༔ དེ་ནས་དཀྱིལ་འཁོར་ཤར་སྒོ་རུ༔ འཁོད་པའི་མོས་པས་སྒོ་དབྱེའི་ཕྱིར༔ བླ་མར་གསོལ་འདེབས་འདི་བཞིན་ཞུ༔ ཀྱེ་ཧོ་རྡོ་རྗེ་སློབ་དཔོན་དགོངས་མཛོད་ཅིག༔ མ་རིག་སྒྲིབ་པས་རྨོངས་པ་བདག་ཉིད་ལ༔ ཡང་དག་དོན་གྱི་ལྷ་ཞལ་སྟོན་པའི་ཕྱིར༔ ཚད་མེད་སྙིང་རྗེ་ཆེན་པོའི་སྒོ་དབྱེ་གསོལ༔ ཞེས་ཞུས་བླ་མས་གནང་བ་སྦྱིན་པ་དང༔ ཕྱག་མཚན་རྡོ་རྗེས་ནང་དུ་ཁྲིད་པར་བསམ༔ ཨེ་མ་སྐལ་ལྡན་དད་པའི་མྱུ་གུ་མཆོག༔ སྙིང་རྗེ་ཆེན་པོའི་ཤར་སྒོ་ནས་ཞུགས་ཏེ༔ རང་རིག་འདུ་འབྲལ་མེད་པའི་ཡི་དམ་ལྷ༔ ད་ལྟ་ཉིད་དུ་ཡང་དག་བལྟ་བར་གྱིས༔ དེ་ནས་རིགས་ཀྱི་མཚན་མ་བརྟགས་པའི་ཕྱིར༔ དཀྱིལ་འཁོར་ལྷ་ལ་མེ་ཏོག་འབུལ་བ་ནི༔ ཧོ༔ ཚེ་རབས་སྔོན་ནས་འབྲེལ་བའི་ཡི་དམ་ལྷ༔ གང་ཡིན་དེ་ལ་རིག་པའི་མེ་ཏོག་འབུལ༔ ད་ལྟ་མ་འོངས་བྱང་ཆུབ་སྙིང་པོའི་བར༔ དེ་དང་མི་འབྲལ་དངོས་གྲུབ་མཆོག་འགྲུབ་ཤོག༔ བཛྲ་པུཥྤེ་པྲ་ཏིཥྩ་ཧོ༔ ཞེས་དོར་དབུས་དང་ཕྱོགས་བཞིར་བབས་པ་བརྟགས་བྱས་ཏེ༔ རིགས་ཀྱི་མིང་བཏགས་མཆོག་དང་ལས་བཞི་ལ༔ དབང་ངོ་ཞེས་བརྗོད་མིག་དར་བསལ་བ་ནི༔ ཨེ་མ་བུ་ཁྱོད་མ་རིག་ལིང་ཏོག་གིས༔ ཐོག་མེད་ནས་སྒྲིབ་གདོད་མའི་ཞལ་མ་མཇལ༔ དེ་ཕྱིར་མིག་དར་གཉིས་འཛིན་མཚོན་འདི་བསལ༔ ཐོགས་མེད་ཀུན་གཟིགས་ཡེ་ཤེས་སྤྱན་ཐོབ་ཤོག༔ དེ་ནས་མཎྚལ་འབུལ་ཞིང་གསོལ་འདེབས་ནི༔ སྐྱབས་མཆོག་སྤྱན་རས་གཟིགས་དང་དབྱེར་མེད་པའི༔ དྲིན་ཆེན་རྡོ་རྗེའི་བླ་མ་དགོངས་སུ་གསོལ༔ གསང་སྔགས་ཕྱི་ནང་དབང་གི་ཐོག་མ་རུ༔ རིགས་ལྔའི་དབང་གི་རྗེས་གནང་སྩལ་དུ་གསོལ༔ ཞེས་ཞུས་དང་པོ་ཆུ་ཡི་དབང་སྦྱིན་ཅིང༔ ཆུ་ལྷག་རིགས་བདག་སྣང་མཐའི་ངོ་བོར་མོས༔ ཧཱུྃ་ཧྲཱིཿ བཀྲ་ཤིས་བུམ་པ་སྟོང་གསལ་གཞལ་ཡས་ཁང༔ རང་བྱུང་ལྷུན་གྲུབ་འཕགས་པའི་ལྷ་ཚོགས་བཞུགས༔ སྐལ་ལྡན་སློབ་བུ་ཁྱོད་ལ་དབང་བསྐུར་བས༔ ཞེ་སྡང་སྒྲིབ་དག་ཐུགས་ཀྱི་དབང་ཐོབ་ཤོག༔ ཨོཾ་བུདྡྷ་ཀ་ལ་ཤ་ཨ་བྷི་ཥིཉྩ་ཧཱུྃ༔ གཉིས་པ་དབུ་རྒྱན་མགོ་བོར་བསྐོན་བྱས་ཏེ༔ ཧཱུྃ་ཧྲཱིཿ རྒྱལ་ཀུན་འགྲོ་དོན་མཛད་ཕྱིར་རྒྱལ་ཚབ་ཀྱི༔ དབང་རྟགས་ཅོད་པཎ་རིན་ཆེན་པྲོག་ཞུ་ཡིས༔ སྐལ་ལྡན་སྐྱེས་བུ་ཁྱོད་ལ་མངའ་གསོལ་བས༔ ང་རྒྱལ་སྒྲིབ་དག་ཡོན་ཏན་དབང་ཐོབ་ཤོག༔ ཨོཾ་རཏྣ་མུ་ཀུ་ཊ་ཨ་བྷི་ཥིཉྩ་ཧཱུྃ༔ གསུམ་པ་རྡོ་རྗེ་ལག་གཡས་གཏད་བྱས་ནས༔ ཧཱུྃ་ཧྲཱིཿ མི་ཤིག་འགྱུར་མེད་རང་བྱུང་རིག་པའི་གཤིས༔ ཡེ་ཤེས་ལྔ་ལྡན་རྡོ་རྗེ་རྩེ་ལྔ་བས༔ སྐལ་ལྡན་སློབ་བུ་མཆོག་ལ་དབང་བསྐུར་བས༔ འདོད་ཆགས་སྒྲིབ་དག་གསུང་གི་དབང་ཐོབ་ཤོག༔ ཨོཾ་བཛྲ་ཀ་རུ་ཎ་ཨ་བྷི་ཥིཉྩ་ཧཱུྃ༔ བཞི་པ་དྲིལ་བུ་ལག་པ་གཡོན་དུ་གཏད༔ ཧཱུྃ་ཧྲཱིཿ སྟོང་ཉིད་ཀུན་ལ་ཁྱབ་པའི་ཆོས་ཀྱི་དབྱིངས༔ མ་འགགས་ཤེས་བྱ་ཀུན་སྒྲོག་དྲིལ་བུ་ཡིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ ཕྲག་ཏོག་སྒྲིབ་དག་ཕྲིན་ལས་དབང་ཐོབ་ཤོག༔ ཨོཾ་གཎྚེ་པྲཛྙཱ་ཨ་བྷི་ཥིཉྩ་ཧཱུྃ༔ ལྔ་པ་རྡོར་དྲིལ་བསྣོལ་མ་ལག་ཏུ་གཏད༔ གསང་བའི་མིང་བཏགས་ཡིད་ལ་དྲན་བྱས་ཏེ༔ ཧཱུྃ་ཧྲཱིཿ དབྱངས་ཀྱི་ཡི་གེ་ཤེས་རབ་སྟོང་པ་ཉིད༔ གསལ་བྱེད་ཡི་གེ་ཐབས་མཆོག་བདེ་བ་ཆེ༔ ཟུང་འཇུག་གསང་བའི་མིང་གི་དབང་བསྐུར་བས༔ གཏི་མུག་སྒྲིབ་དག་སྐུ་ཡི་དབང་ཐོབ་ཤོག༔ ཨོཾ་ན་མཿདྷརྨ་དྷརྟུ་ཨ་བྷི་ཥིཉྩ་ཧཱུྃ༔ དེ་ལྟར་རིགས་ལྔའི་དབང་བསྐུར་བས་ཉོན་མོངས་དུག་ལྔ་གནས་སུ་དག་ནས༔ སྐུ་གསུང་ཐུགས་ཡོན་ཏན་ཕྲིན་ལས་ལྔ་ལ་དབང་འབྱོར་ཞིང་དབང་བཞིའི་སྣོད་དུ་འགྱུར་བའི་དབང་དམ་པ་ཐོབ་པར་གྱུར་ཅིག༔ དངོས་གཞི་བུམ་པའི་དབང་དོན་དུ༔ མཎྚལ་འབུལ་ཞིང་གསོལ་གདབ་ནི༔ ན་མོ༔ སྐུ་བཞིའི་བདག་ཉིད་སློབ་དཔོན་གྱིས༔ ལུས་སྒྲིབ་སྦྱང་བྱེད་བུམ་པའི་དབང༔ བདག་ལ་མྱུར་དུ་སྩལ་ནས་ཀྱང༔ སྤྲུལ་པའི་སྐུ་མཆོག་འགྲུབ་པར་མཛོད༔ ཞེས་པས་གསོལ་བཏབ་བུམ་དབང་ནི༔ ཧཱུྃ་ཧྲཱིཿ འཁོར་འདས་མཐའ་བྲལ་ཀུན་ཟླུམ་བུམ་པ་རུ༔ འདུས་མ་བྱས་པའི་དཀྱིལ་འཁོར་ལྷ་ཚོགས་བཞུགས༔ བརྡ་རྟགས་རྫོགས་པའི་དབང་མཆོག་འདི་ཕུལ་བས༔ ལུས་ཀྱི་སྒྲིབ་དག་སྤྲུལ་པའི་སྐུ་འགྲུབ་ཤོག༔ རྩ་སྔགས་ཤམ་བུར་འདི་ཉིད་བཏགས༔ ཨོཾ་པདྨ་ཀ་ལ་ཤ་ཨ་བྷི་ཥིཉྩ་ཧཱུྃ༔ བཀྲ་ཤིས་བརྗོད་ཅིང་མེ་ཏོག་འཐོར་བར་བྱ༔ དེ་ནས་མདུན་མཁར་དཀྱིལ་འཁོར་ལྷ་ཡི་ཚོགས༔ རང་ཤར་སྤྲུལ་པའི་ལྷ་རྣམས་ཉི་མ་ལས༔ འོད་བཞིན་འཕྲོས་ནས་བྱིན་རླབས་ཞུགས་པར་བསམ༔ དང་པོ་གཙོ་བོའི་སྐུ་སྤྱི་བོར་བཞག་ཏེ༔ ཧཱུྃ་ཧྲཱིཿ འགྲོ་དྲུག་སེམས་ཅན་སྡུག་བསྔལ་སེལ་མཛད་པ༔ རྒྱལ་ཀུན་སྙིང་རྗེའི་རང་གཟུགས་སྤྱན་རས་གཟིགས༔ སྐལ་ལྡན་སློབ་བུ་ཁྱོད་ལ་དབང་བསྐུར་བས༔ མཆོག་གི་དངོས་གྲུབ་ཚེ་འདིར་འགྲུབ་པར་ཤོག༔ གཟུངས་རིང་མཇུག་ཏུ། ཨཱརྱ་ལོ་ཀི་ཤྭ་ར་ཨ་བྷི་ཥིཉྩ་ཧཱུྃ༔ རིགས་བདག་སྣང་མཐའི་སྐུ་སྤྱི་བོར་བཞག་ཏེ༔ ཧཱུྃ་ཧྲཱིཿ ཆགས་མེད་སྐྱོན་བྲལ་རྒྱལ་ཀུན་རིགས་ཀྱི་བདག༔ བླ་མ་སྣང་མཐའ་ཡས་པའི་དབང་བསྐུར་བས༔ ཤེས་བྱའི་སྒྲིབ་དག་ཆོས་སྐུའི་རང་ཞལ་མཐོང༔ བརྗོད་བྲལ་གདོད་མའི་མགོན་དང་དབྱེར་མེད་ཤོག༔ ཨོཾ་ཨ་མི་དྷེ་ཝ་ཨ་བྷི་ཥིཉྩ་ཧཱུྃ༔ ཐབས་ཀྱི་ངོ་བོ་སྲས་མཆོག་ནོར་བུ་འཛིན་པའི་སྐུ་སྤྱི་བོར་བཞག་ཏེ༔ ཧཱུྃ་ཧྲཱིཿ ཐབས་ཀྱི་ངོ་བོ་སྲས་ཀྱི་ཚུལ༔ ནོར་བུ་འཛིན་པའི་དབང་བསྐུར་བས༔ གཞན་ཕན་སྨོན་འཇུག་མཐར་ཕྱིན་ནས༔ སྙིང་རྗེ་ཆེན་པོར་དབང་འབྱོར་ཤོག༔ ཨོཾ་མ་ཎི་དྷ་ར་ཨ་བྷི་ཥིཉྩ་ཧཱུྃ༔ ཤེས་རབ་ངོ་བོ་སྲས་མོ་རིགས་སྔགས་འཛིན་མའི་སྐུ་སྤྱི་བོར་བཞག་ཏེ༔ ཧཱུྃ་ཧྲཱིཿ ཤེས་རབ་རང་བཞིན་བུ་མོའི་གཟུགས༔ རིགས་སྔགས་འཛིན་མའི་དབང་བསྐུར་བས༔ ཆོས་ཀུན་སྒྱུ་མར་རྟོགས་པ་ཡི༔ ཤེས་རབ་ཆེན་པོར་དབང་འབྱོར་ཤོག༔ ཨོཾ་བིདྱཱ་གུ་ཧྱ་དྷ་རི་ཨ་བྷི་ཥིཉྩ་ཧཱུྃ༔ ཁྲོ་ཆེན་རྟ་མཆོག་རྒྱལ་པོའི་སྐུ་སྙིང་ཀར་བཞག་ཏེ༔ ཧཱུྃ་ཧྲཱིཿ དབང་གི་ལྷ་མཆོག་སྲིད་གསུམ་ཟིལ་གྱིས་གནོན༔ ཁམས་གསུམ་དབང་མཛད་རྟ་མགྲིན་རྒྱལ་པོ་ཡིས༔ སྐལ་ལྡན་དམ་པ་ཁྱོད་ལ་དབང་བསྐུར་བས༔ བདག་ཏུ་ལྟ་བའི་འཛིན་པ་དབྱིངས་གྲོལ་ཤོག༔ ཨོཾ་བཛྲ་ཀྲོ་ཏ་ཧྱ་གྷྲྀ་ཝ་ཨ་བྷི་ཥིཉྩ་ཧཱུྃ༔ ཁྲོ་རྒྱལ་བདུད་རྩི་འཁྱིལ་བའི་སྐུ་ལྟག་པར་བཞག་ཏེ༔ ཧཱུྃ་ཧྲཱིཿ དུག་ཆེན་ཉོན་མོངས་རྟོག་པ་ལྔ་པོ་རྣམས༔ ཡེ་ཤེས་རང་བྱུང་བདུད་རྩིར་བསྒྱུར་མཛད་པ༔ ཁྲོ་རྒྱལ་དཔའ་བོ་མཆོག་གི་དབང་བསྐུར་བས༔ བདུད་བཞིའི་གཡུལ་ལས་རྣམ་རྒྱལ་དབང་ཐོབ་ཤོག༔ ཨོཾ་བཛྲ་ཨ་མྲྀ་ཏ་ཀུཎྜ་ལི་ཨ་བྷི་ཥིཉྩ་ཧཱུྃ༔ ཐུགས་སྤྲུལ་པདྨ་འབྱུང་གནས་དབང་བསྐུར་ཏེ༔ ཧཱུྃ་ཧྲཱིཿ རབ་འབྱམས་རྒྱལ་བ་སྲས་བཅས་མ་ལུས་པའི༔ སྤྱི་གཟུགས་མཚོ་སྐྱེས་རྡོ་རྗེའི་དབང་བསྐུར་བས༔ ལྷ་སྲིན་དྲེགས་པ་མ་ལུས་ཚར་བཅད་ནས༔ གང་བསམ་ཆོས་བཞིན་འགྲུབ་པའི་དབང་ཐོབ་ཤོག༔ ཨོཾ་ཨཱ༔མ་ཧཱ་གུ་རུ་པདྨ་སཾ་བྷ་ཝ་ཨ་བྷི་ཥིཉྩ་ཧཱུྃ༔ དེ་ལྟར་རྩ་བའི་ལྷ་ཡི་དབང་བསྐུར་ཏེ༔ འཁོར་གྱི་ལྷ་རྣམས་སྒྲུབ་གཞུང་གཞན་ལས་ཤེས༔ གསང་དབང་གཟུངས་སྔགས་ཡི་གེ་མགྲིན་པར་བཞག༔ ཧཱུྃ་ཧྲཱིཿ ཆོས་ཀུན་སྙིང་པོ་ཡི་གེའི་གཟུགས་སུ་ཤར༔ སྐལ་ལྡན་ཁྱོད་ཀྱི་མགྲིན་པར་དབང་བསྐུར་བས༔ ཐ་མལ་ལས་རླུང་སྔགས་སུ་གནས་དག་ནས༔ གྲགས་སྟོང་གསུང་གིས་འགྲོ་བ་འདུལ་བར་ཤོག༔ ཨོཾ་མ་ཎི་པདྨེ་ཧཱུྃ་ཧྲཱིཿ རྩ་སྔགས་མཇུག་ཏུ་གཟུངས་རིང་ཤམ་བུ་རུ༔ ཝཀྐ་ཨ་བྷི་ཥིཉྩ་ཧཱུྃ༔ སླར་ཡང་གསོལ་བ་འདེབས་པ་འདི་བཞིན་མཛོད༔ ཨེ་མ་ཧོ༔ ངོ་མཚར་རྨད་བྱུང་གསང་བ་སྔགས་ཀྱི་ལམ༔ མྱོང་བས་གྲོལ་བ་བདེ་སྟོང་བྱང་ཆུབ་སེམས༔ སྐལ་ལྡན་བདག་གི་རྩ་ཡི་སྒྲིབ་དག་ནས༔ རླུང་སྔགས་ལོངས་སྐུར་འགྲུབ་པའི་དབང་བསྐུར་སྩོལ༔ ཅེས་པས་གསོལ་བ་བཏབ་རྗེས་ཐོད་པ་ཡི༔ བདུད་རྩི་ཡབ་ཡུམ་བྱང་སེམས་ལྕེ་ལ་བཞག༔ ཧཱུྃ་ཧྲཱིཿ རང་བྱུང་མ་བཅོས་ཆོས་དབྱིངས་ཀ་པཱ་ལར༔ དུག་ལྔ་རང་གྲོལ་བདུད་རྩིའི་བཅུད་ཀྱིས་གཏམས༔ སྐལ་ལྡན་ཁྱོད་ཀྱི་མགྲིན་པར་དབང་བསྐུར་བས༔ རྩ་ཁམས་དོན་གྱི་ཡི་གེར་མྱུར་སྨིན་ཤོག༔ རྩ་སྔགས་ཤམ་བུར། ཨ་མྲི་ཏ་ཝཀྐ་ཨ་བྷི་ཥིཉྩ་ཧཱུྃ༔ དུག་ལྔ་ལམ་ཁྱེར་ཤེར་དབང་ཞུ་བའི་ཕྱིར༔ གསོལ་བ་གདབ་པའི་ཚིག་འདིས་མཎྚལ་འབུལ༔ ཀྱེ་ཧོ༔ ཚོགས་དྲུག་དཔའ་བོ་ཡུལ་དྲུག་ཕྱག་རྒྱར་སྦྱོར༔ དངོས་འཛིན་དུག་ལྔའི་སྐྱོན་སྤངས་སྔགས་ཀྱི་ལམ༔ རྩ་རླུང་ཐིག་ལེ་བདེ་སྟོང་ལམ་ཁྱེར་དབང༔ ད་ལྟ་ཉིད་དུ་བདག་ལ་སྩལ་དུ་གསོལ༔ དེ་ནས་བླ་མས་མུ་ཏྲའི་གཟུགས་བསྟན་ཏེ༔ ཧོ་གསང་ལས་ཆེས་གསང་ཡང་ཟབ་རྡོ་རྗེའི་ཐེག༔ འབད་རྩོལ་བྲལ་བར་ཐབས་དང་བརྡ་ཙམ་གྱིས༔ ཆོས་ཀུན་ཕྱག་རྒྱ་ཆེན་པོར་ངོ་སྤྲོད་པའི༔ བདེ་སྟོང་ཟུང་འཇུག་བརྗོད་བྲལ་དོན་ལ་ལྟོས༔ མ་ཧཱ་མུ་ཏྲ་སུ་ཁ་ཛྙཱ་ན་ཨ་བྷི་ཥིཉྩ་ཧཱུྃ༔ ཅེས་པས་བརྡ་སྤྲད་ཡུམ་དོན་མཉམ་བཞག་བྱ༔ དེ་ནས་ཡང་དག་ཚིག་གི་དབང་མཆོག་ནི༔ མན་ཤེལ་མེ་ལོང་བརྡས་མཚོན་སྙིང་ཀར་གཏུགས༔ ཨེ་མ་ཧོ༔ ཆོས་ཀུན་ངོ་བོ་སྤྲོས་བྲལ་ཀ་ནས་དག༔ རང་བཞིན་ལྷུན་གྲུབ་འོད་གསལ་འདུས་མ་བྱས༔ སྟོང་པའི་རང་རྩལ་རོལ་བ་འགགས་པ་མེད༔ སྐུ་གསུམ་འདུ་འབྲལ་མེད་པའི་དགོངས་པའོ༔ དྷརྨ་དྷརྟུ་ཨ་བྷི་ཥིཉྩ་ཧཱུྃ༔ ཡོངས་རྫོགས་གཏོར་མའི་དབང་བསྐུར་ཞིང༔ གནས་གསུམ་གཏུག་ཅིང་ལག་ཏུ་གཏད༔ ཧྲཱིཿ འཁོར་འདས་དངོས་འཛིན་བརྗོད་བྲལ་དབྱིངས་སུ་གཏོར༔ ཀུན་ཁྱབ་འགགས་མེད་རྟེན་འབྲེལ་བདེན་པའི་མཐུ༔ ཤེས་པ་དྲུག་ལྡན་གཏོར་མའི་དབང་བསྐུར་བས༔ མཆོད་བསྟོད་གཞན་དོན་ཕྲིན་ལས་མྱུར་འགྲུབ་ཤོག༔ བྷ་ལིངྟ་ཀཱ་ཡ་ཨ་བྷི་ཥིཉྩ་ཧཱུྃ༔ བརྒྱུད་པའི་མཚན་བརྗོད་སྨོན་ལམ་གདབ༔ སྒྲུབ་ཡིག་ཕྱག་ཏུ་ཕུལ་བྱས་ཏེ༔ ཨེ་མ་ཟབ་ཆོས་བརྒྱུད་པ་འཛིན་པའི་སྐལ་ལྡན་དམ་པ་ཁྱོད་ཀྱིས༔ འཕགས་པ་ཐུགས་རྗེ་ཆེན་པོ་ཞལ་བཅུ་གཅིག་པའི་ལྷ་སྐུ་བསྒོམ་པ་དང་༔ སྔགས་རྒྱུན་དུ་བཟླ་བ་དང༔ ཏིང་འཛིན་གསལ་སྟོང་དབྱེར་མེད་ཀྱི་དོན་ལ་རྟག་ཏུ་གོམས་པར་མཛོད་ཅིག༔ ཟབ་ཆོས་འདིའི་སྒོ་ནས་གཞན་ལ་ཕན་པ་ལྷུར་བླངས་ཏེ༔ དབང་ལུང་དང་བསྔགས་པ་བརྗོད་པ་དང༔ ཡི་གེ་དྲུག་པའི་གཟུངས་ཀྱི་ཕན་ཡོན༔ སྙིང་རྗེ་ཆེན་པོའི་སྒོ་ནས་འཕགས་པ་སྤྱན་རས་གཟིགས་ཀྱི་ཆོས་སྤྱོད་བཅུ་ལ་འབད་ཅིང་དོན་གཉིས་ལྷུན་གྲུབ་ཁམས་གསུམ་ཆོས་ཀྱི་རྒྱལ་པོར་མངའ་གསོལ་བས་དེ་བཞིན་དུ་མཛོད་ཅིག༔ ཅེས་བརྗོད་དབྱངས་གསལ་རྟེན་འབྲེལ་སྙིང་པོ་བརྗོད༔ མེ་ཏོག་དོར་ཞིང་མཐའ་རྟེན་རིམ་བཞིན་གཏད༔ ཤིས་བརྗོད་ཁས་བླངས་མཎྚལ་དགའ་སྟོན་བྱ༔ ས་མ་ཡཱ༔ ཨེ་མ་ཤིན་ཏུ་ཡང་ཟབ་ཐུགས་ཀྱི་གཏེར༔ བདག་ཉིད་མཁས་པ་པདྨ་འབྱུང་གནས་ཀྱིས༔ འཕགས་པ་མཆོག་ལ་ལུང་ཞུས་རྒྱུད་དོན་བསྡུས༔ གཞན་དོན་ལྷུར་བླངས་སྒྲུབ་ཐབས་གྲངས་མང་བརྩམས༔ མ་འོངས་མཚོ་རྒྱལ་ཀླུ་དབང་སྨོན་ལམ་མཐུས༔ འགྲོ་མང་དོན་འགྲུབ་བསྟན་འཛིན་ཚེ་གེགས་བསལ༔ གང་འབྲེལ་ཡང་དག་ལམ་འགོད་གདོན་མི་ཟ༔ གུ་ཧྱ༔ ཅེས་པའང་བདག་འདྲ་ཤཱཀྱའི་དགེ་སྦྱོང་ལུང་རིག་གླིང་པས་ཁ་བྱང་དུ་གསལ་བ་ལྟར་བསྟན་འཛིན་ཆོས་ཀྱི་བདག་པོའི་བཞེད་སྐོང་དང་། རིག་འཛིན་འཕུར་འགྲོའི་བསྐུལ་བྱང་བྱུང་བ་བཞིན། དབྱིངས་རིག་སྟོང་གསལ་འགགས་པ་མེད་པའི་སྒྲོམ་ནས་བཏོན་ཏེ་སྤེལ་བའི་དགེ་བས་འགྲོ་ཀུན་སྤྱན་རས་གཟིགས་ཀྱི་གོ་འཕང་ཐོབ་པའི་རྒྱུར་གྱུར་ཅིག སརྦ་མངྒ་ལཾ།