དབང་གི་མཚམས་སྦྱོར།
༄༅། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་བདེ་བླག་ཉིད་དུ་རྟོགས་པའི་ཕྱིར་ཡི་དམ་ཐུགས་རྗེ་ཆེན་པོའི་དབང་བསྐུར་ཟབ་མོ་ཞུ་བར་བྱ་བསམ་པའི་སེམས་བསྐྱེད་རྣམ་པར་དག་པས་གསན་པར་ཞུ། དེ་ཡང་རང་ཅག་གི་སྟོན་པ་ཐབས་ལ་མཁས་པ་ཐུགས་རྗེ་ཆེན་པོ་དེ་ཉིད་ཀྱིས་གདུལ་བྱའི་སེམས་ཅན་ཐམས་ཅད་ཀྱི་ཁམས་དང་དབང་པོ་དང་མཐུན་པའི་ཆོས་བསམ་གྱིས་མི་ཁྱབ་པ་བསྟན་པ་དེ་ཡང་མདོར་བསྡུ་ན། རྒྱུ་ཕ་རོལ་དུ་ཕྱིན་པའི་ཐེག་པ་དང་། འབྲས་བུ་གསང་སྔགས་རྡོ་རྗེ་ཐེག་པ་གཉིས་ལས། འདིར་རྒྱུ་ཕ་རོལ་ཏུ་ཕྱིན་པ་ནི་སངས་རྒྱས་པའི་ལམ་ལ་ཐག་རིང་བ་དང་། འབྲས་བུ་གསང་སྔགས་རྡོ་རྗེ་ཐེག་པ་ནི་ཁྱད་པར་དུ་འཕགས་པ་སྟེ། ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་དང་། གསང་སྔགས་ལའང་གསར་རྙིང་གཉིས་ལས། འདིར་གསར་མ་ལས་ཆེ་བ་དྲུག་ལྡན་གྱིས་ཁྱད་པར་དུ་འཕགས་པའི་རྙིང་མ་ཡིན་ལ། རྙིང་མ་ལའང་བཀའ་གཏེར་དག་སྣང་གི་སྐོར་ཚོ་གསུམ་ལས། འདིར་ཟབ་མོ་དགོངས་པའི་གཏེར་གྱི་ཕྱོགས་སུ་གཏོགས་པ་ཡིན་ཏེ། དེ་ཡང་འདིར་མཁའ་འགྲོ་ཡེ་ཤེས་མཚོ་རྒྱལ་གྱི་སྐྱེ་བའི་ཕྲེང་བ་དུ་མ་བརྒྱུད་པ་ནས་གཏེར་སྟོན་རཏྣ་གླིང་པའི་ཡང་སྤྲུལ་དུ་བསྔགས་པའི་གཏེར་སྟོན་ལུང་རིག་གླིང་པ་དེ་ཉིད་ཀྱིས་དབྱིངས་རིག་སྟོང་གསལ་འགགས་པ་མེད་པའི་སྒྲོམ་ནས་བཏོན་པའི་ཐུགས་རྗེ་ཆེན་པོ་ཟླ་གཞོན་སྤྲིན་བྲལ་འདི་ཉིད་ཀྱི་ལོ་རྒྱུས། སྤྱིར་ཐུགས་རྗེ་ཆེན་པོའི་ལོ་རྒྱུས་སྤྱིར་བཏང་ལྟར་ཡིན་ལ། ཆོས་བཀའ་འདི་ཉིད་ཀྱི་དབང་དུ་བྱས་ན། རང་གཞུང་ལས། ལང་གྲོ་དཀོན་མཆོག་འབྱུང་གནས་དང༔ བདག་ཉིད་མཚོ་རྒྱལ་ཕྲིན་ལས་སྤྲུལ༔ གཅིག་བསྡུས་འགྲོ་ཕན་སེམས་དཔའི་རིགས༔ དཔལ་གྱི་མིང་ཅན་རྣལ་འབྱོར་དེར༔ དག་སྣང་ཆོས་ཀྱི་གཏེར་ཁ་རྡོལ༔ ཞེས་དང་། འགྲོ་བའི་དོན་དུ་པདྨ་ངས༔ ཟབ་རྒྱས་དམ་ཆོས་དཔག་མེད་དང༔ ཁྱད་པར་འཕགས་པའི་སྒྲུབ་ཐབས་ནི༔ བྱེ་མའི་གྲངས་དང་མཉམ་པ་བརྩམས༔ འགའ་ཞིག་དངོས་གཏེར་གབ་རྒྱས་གདབ༔ འདི་ནི་མུ་རུབ་བཙན་པོ་དང༔ ཐུགས་ཀྱི་གཟུངས་མ་མཁར་ཆེན་བཟའ༔ དགེ་སློང་ནམ་མཁའི་སྙིང་པོ་སོགས༔ སྐལ་ལྡན་ཉི་ཤུ་རྩ་ལྔ་ལ༔ ཡབ་མེས་སྲོང་བཙན་སྒམ་པོའི་ལུགས༔ འཕགས་མཆོག་ཕྱག་སྟོང་སྤྱན་སྟོང་གི༔ སྒྲུབ་ཐབས་དབང་དང་ལས་ཚོགས་སོགས༔ ཤིན་ཏུ་ཡང་ཟབ་སྙིང་གི་ཁྲག༔ སྤེལ་བར་ཕངས་པའི་ཆོས་ཡིན་ཀྱང༔ བདག་ལ་འགྲོ་བའི་དོན་ལས་མེད༔ བསམ་ཡས་བར་ཁང་གཡུ་ཞལ་དུ༔ དགའ་སྟོན་ཆོས་ཀྱི་སྐྱེས་སུ་བྱིན༔ མི་བརྗེད་གཟུངས་ཐོབ་མཚོ་རྒྱལ་མས༔ ཟབ་དོན་སྙིང་གི་སྒྲོམ་དུ་སྦོས༔ མ་འོངས་ཁྱོད་ཀྱི་སྤྲུལ་པ་འགས༔ སྙིགས་དུས་འགྲོ་བའི་དོན་མཛད་ཚེ༔ ཕྲིན་ལས་སྤྲུལ་པ་རྒྱལ་གྱི་མིང༔ མ་ངེས་སྤྱོད་འཆང་བྱང་ཆུབ་སེམས༔ ལས་ལྡན་དེ་དང་འཕྲད་པ་རུ༔ སྨོན་ལམ་རྒྱས་ཐོབ་སྐལ་ལྡན་དེས༔ བསྟན་འཛིན་སྐུ་ཚེ་བསྲིང་བ་དང༔ འབྲེལ་ཚད་དོན་དང་ལྡན་པའི་ཕྱིར༔ འགྲོ་དོན་ཕྱི་བཤོལ་མེད་པར་མཛོད༔ ཞེས་གསུངས་པས་རྡོ་རྗེའི་ལུང་གིས་བསྔགས་པའི་ཆོས་ཟབ་མོ་འདི་ཉིད་ནི་བྱིན་རླབས་ཀྱི་ན་བུན་མ་ཡལ་བ། དངོས་གྲུབ་ཀྱི་དྲོད་མ་ཉམས་པ། རྒྱུད་པ་ལ་སེལ་མེད་པ། མཁའ་འགྲོའི་ཞལ་དྲོད་མ་ཉམས། བྱིན་རླབས་ཀྱི་ཚན་ཁ་གཞན་ལས་འཕགས་པ་འདི་ཉིད་ཀྱི་དབང་བསྐུར་ཟབ་མོ་བྱེད་པ་ལ་བདག་གིས་བགྱི་འོས་རྣམས་བླ་མ་དམ་པའི་ཕྱག་བཞེས་བཞིན་སྔོན་དུ་སོང་གྲུབ། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པའི་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་དྲུང་དུ་སྨིན་བྱེད་ཀྱི་དབང་བསྐུར་ཟབ་མོ་ཞུ་བའི་ཡོན་དུ་མཎྚལ་འབུལ་བར་ཞུ། ཅེས་པ་འདི་བླ་མ་རིག་འཛིན་བཟང་པོས་མཛད་པ་དགེའོ།། སརྦ་མངྒ་ལཾ།།