བཅུ་གཅིག་ཞལ་གྱི་རྒྱུན་ཁྱེར་ནོར་བུའི་གཙུག་རྒྱན།
ཐུགས་སྒྲུབ་ཟླ་གཞོན་སྤྲིན་བྲལ་ལས༔ བཅུ་གཅིག་ཞལ་གྱི་རྒྱུན་ཁྱེར་ནོར་བུའི་གཙུག་རྒྱན་བཞུགས༔
ན་མོ་ལོ་ཀི་ཤྭ་ར་ཡ༔ རབ་འབྱམས་རྒྱལ་བའི་ཡབ་གཅིག་པུ༔ གངས་ཅན་མུན་སེལ་ལྷ་ཡི་མཆོག༔ འཕགས་པ་ཐུགས་རྗེ་ཆེན་པོ་ཡི༔ ཐུགས་སྒྲུབ་ཡང་སྙིང་འདི་རུ་སྟོན༔ ས་མ་ཡཱ༔ གང་ཟག་སྤྲོས་མེད་རྣལ་འབྱོར་བས༔ འགྲོ་ཀུན་ངན་སོང་སྒོ་གཅོད་ཅིང༔ ཐར་པའི་གོ་འཕང་ལ་དམིགས་ནས༔ སྦྱོར་དངོས་རྗེས་གསུམ་རྩ་བ་ནི༔ ཉམས་ལེན་དམིགས་པ་འདི་ཁོ་ན༔ སྒྲུབ་རྫས་མི་དགོས་སྣོད་བཅུད་ཀུན༔ ལྷ་ཡི་སྒྲུབ་ཁང་ཡོ་བྱད་ལ༔ ཐོག་མར་འཁོར་བར་ངེས་འབྱུང་བློས༔ ཕ་མ་འགྲོ་དྲུག་མ་ལུས་པ༔ སངས་རྒྱས་གོ་འཕང་ལ་འགོད་ཕྱིར༔ ཚོགས་ཞིང་མཁའ་ཁྱབ་རྒྱལ་བ་ལ༔ སྐྱབས་སུ་འགྲོ་ཞིང་སེམས་བསྐྱེད་ཅིང༔ བདུན་གྱི་ཚོགས་བསགས་ངག་འདོན་ནི༔ དམིགས་འདོན་ཡ་བྲལ་མ་སོང་བར༔ ན་མོ༔ བདག་སོགས་འགྲོ་བ་སེམས་ཅན་མ་ལུས་པ༔ དཀོན་མཆོག་ཀུན་འདུས་བླ་མ་སྤྱན་རས་གཟིགས༔ མི་འབྲལ་གུས་པས་བྱང་ཆུབ་སྙིང་པོའི་བར༔ ཁྱེད་ཤེས་དད་པས་སྙིང་ནས་སྐྱབས་སུ་མཆི༔ སྡུག་བསྔལ་གསུམ་གྱི་རྦ་ཀློང་རབ་འཁྲུགས་པའི༔ མཐའ་མེད་འཁོར་བའི་རྒྱ་མཚོ་ཆེན་པོ་ལས༔ མཐའ་ཡས་འགྲོ་ཀུན་སངས་རྒྱས་གོ་འཕང་ལ༔ འགོད་ཕྱིར་སྨོན་འཇུག་བྱང་ཆུབ་སེམས་བསྐྱེད་དོ༔ གདོད་ནས་རང་རིག་རྫོགས་སངས་རྒྱས་ཉིད་ཀྱང༔ གློ་བུར་འཁྲུལ་བས་ལས་ཉོན་སྒྲིབ་བསལ་ཕྱིར༔ རང་ལུས་གྲངས་མེད་སྤྲུལ་ཏེ་ཚོགས་ཞིང་ལྷར༔ སྒོ་གསུམ་གུས་པ་ཆེན་པོས་ཕྱག་འཚལ་ཞིང༔ ལུས་དང་ལོངས་སྤྱོད་དགེ་ཚོགས་མཆོད་སྤྲིན་འབུལ༔ རང་གཞན་སྒྲིབ་ཀུན་སྟོབས་བཞིས་བཤགས་ཤིང་སྦྱངས༔ སྐྱེས་འཕགས་དགེ་ལ་སྤྲོ་བས་རྗེས་ཡི་རང༔ དུས་གསུམ་སྟོན་པར་རྟག་ཏུ་ཆོས་གསུང་བསྐུལ༔ འཆི་མེད་ཀློང་ནས་འགྲོ་ངོར་རྟག་བཞུགས་གསོལ༔ བདག་གི་དགེ་ཚོགས་ཆོས་དབྱིངས་ཀློང་དུ་བསྔོ༔ བདག་གཞན་མ་ལུས་གདོད་མའི་བྱང་ཆུབ་སེམས༔ རང་རིག་འཕགས་པའི་གོ་འཕང་མངོན་འགྱུར་ཤོག༔ ས་མ་ཡཱ༔ དངོས་གཞི་རང་དང་ལྷ་དབྱེར་མེད༔ གཞན་ནས་བཙལ་ཏེ་སྒྲུབ་མེད་ཀྱང༔ རང་བཞིན་ཤེས་པས་རང་གསལ་གདབ༔ མ་ཡེངས་དམིགས་པ་འདི་ལྟར་བསྒོམ༔ ཧྲཱིཿ སྣོད་ཀྱི་འཇིག་རྟེན་ཐ་མལ་འཁྲུལ་སྣང་དག༔ འཕགས་པའི་བཞུགས་གནས་ཕོ་བྲང་པོ་ཏ་ལ༔ བདེ་ཆེན་ཞིང་གི་དཔལ་དང་ཡོན་ཏན་རྫོགས༔ བཅུད་ཀྱི་སེམས་ཅན་ཕོ་མོར་སྣང་བ་ཀུན༔ ཡེ་ནས་སེམས་དཔའ་སེམས་མའི་རྣམ་པར་བལྟ༔ རང་ཉིད་ཐ་མལ་སྒོ་གསུམ་དྲན་རྫོགས་སུ༔ སྣ་ཚོགས་པདྨ་ཉི་ཟླའི་གདན་དབུས་སུ༔ ཧྲཱིཿདཀར་ལས་བྱུང་འཕགས་པ་སྤྱན་རས་གཟིགས༔ བཅུ་གཅིག་ཞལ་ཅན་སྟོན་ཟླ་ལྟ་བུར་དཀར༔ རྩ་ཞལ་རང་མདོག་གཡས་ལྗང་གཡོན་དམར་བ༔ དེ་སྟེང་ཞལ་གསུམ་གསེར་མདོག་རྒྱས་པའི་ཚུལ༔ དེ་སྟེང་དབང་དྲག་ཞལ་གསུམ་དབུས་སྨུག་ནག༔ གཡས་གཡོན་དམར་པོ་རྗེས་སུ་ཆགས་པའི་ཉམས༔ དེ་སྟེང་ཁྲོ་ཞལ་ནག་པོ་རྔམ་པའི་གཟུགས༔ དེ་སྟེང་རིགས་བདག་ཨ་མི་དྷེ་ཝའི་ཞལ༔ གཙུག་ཏོར་དང་བཅས་མགུལ་བ་ཡན་མཛེས་འཛུམ༔ རྩ་བའི་ཕྱག་བརྒྱད་དང་པོ་གཉིས་ཐལ་སྦྱར༔ སྟོང་པ་ཉིད་དང་སྙིང་རྗེ་དབྱེར་མེད་མཚོན༔ དེ་འོག་གཡས་གཡོན་ཤེལ་ཕྲེང་པདྨ་དཀར༔ འགྲོ་དྲུག་འདྲེན་དང་ཆགས་མེད་སྐྱོན་བྲལ་བརྡ༔ དེ་འོག་ཕྱག་གཉིས་མཆོག་སྦྱིན་སྤྱི་བླུགས་སྦྲེངས༔ ཕན་བདེའི་ཆུ་ཡིས་དམྱལ་མེ་ཆིལ་ཆིལ་གསོད༔ དེ་འོག་གཡས་གཡོན་འཁོར་ལོ་མདའ་གཞུ་བསྣམས༔ ཆོས་ཀྱི་འཁོར་ལོ་ཐབས་ཤེས་ཟུང་འཇུག་སྟོན༔ ཞབས་གཉིས་མཉམ་བཞེངས་འགྲོ་བའི་དོན་ལ་དགོངས༔ ཡན་ལག་ཕྱག་སྟོང་མཆོག་སྦྱིན་སྤྱན་རས་མཚན༔ ཉིན་མཚན་རྟག་པར་འགྲོ་ལ་གཟིགས་པའི་བརྡ༔ འདོད་ཡོན་མ་སྤངས་ནོར་བུ་རིན་པོ་ཆེའི༔ དབུ་རྒྱན་སྙན་ཆ་དོ་ཤལ་སེ་མོ་དོ༔ ཕྱག་ཞབས་གདུ་བུ་དཔུང་རྒྱན་མགུལ་རྒྱན་དང༔ སྣ་ཚོགས་དར་གྱི་སྟོད་གཡོག་སྨད་དཀྲིས་དང༔ ཅོད་པཎ་ཟི་ལྡིར་སྐྲ་ཆིངས་ཕུ་དུང་སྒེག༔ མཚན་དཔེ་ཡོངས་རྫོགས་འོད་ཀྱི་ཕུང་པོར་འབར༔ དབུ་གཙུག་རིགས་བདག་སངས་རྒྱས་སྣང་མཐའ་ཡས༔ གཡས་གཡོན་འགྲོ་དོན་གྲོགས་བགྱིད་རྗེ་བཙུན་མ༔ སྒྲོལ་མ་དཀར་ལྗང་གཡས་གཡོན་མདུན་རྒྱབ་ཏུ༔ རྟ་མགྲིན་བདུད་རྩི་འཁྱིལ་དང་སངས་རྒྱས་སྟོང༔ གདུལ་བྱའི་བློ་འཚམས་རྡུལ་སྙེད་འཁོར་གྱིས་བསྐོར༔ གནས་གསུམ་ཡི་གེ་དཀར་དམར་མཐིང་གསུམ་ལས༔ འོད་ཟེར་འཇའ་ཚོན་ལྟ་བུ་ཕྱོགས་བཅུར་འཕྲོས༔ རབ་འབྱམས་ཞིང་གི་རྒྱལ་བ་སྲས་བཅས་ཀུན༔ ཐུགས་ཀྱི་རྒྱུད་བསྐུལ་འཕགས་པའི་རྣམ་པར་བྱོན༔ རང་གི་བསྐྱེད་པའི་སྐུ་དང་དབྱེར་མེད་གྱུར༔ ཧྲཱིཿ དུས་གསུམ་རྒྱལ་བ་སྲས་བཅས་མ་ལུས་ཀུན༔ སྐྱེ་མེད་ཀློང་བཞུགས་གཤེགས་བཞུད་མི་མངའ་ཡང༔ འགགས་མེད་དབྱིངས་ནས་སྤྱན་འདྲེན་གནས་འདིར་གཤེགས༔ ཡེ་ནས་འབྲལ་མེད་ངང་དེར་རྟག་བཞུགས་གསོལ༔ ལྷ་དང་རང་ཞེས་སོ་སོར་མི་འཛིན་པར༔ རང་བབས་རོ་མཉམ་ལྟ་བའི་ཀློང་ཕྱག་འཚལ༔ ཡུལ་དྲུག་འདོད་པའི་ཡོན་ཏན་མ་ལུས་པ༔ རང་ཤར་མཆོད་པའི་ཕྱག་རྒྱས་མཉེས་པར་བགྱི༔ འདོད་ཡོན་མ་སྤངས་ཞེན་པ་མེད་བཞིན་དུ༔ བདེ་སྟོང་ཟག་མེད་ཀློང་དུ་བཞེས་སུ་གསོལ༔ གཟུགས་སྣང་ཐམས་ཅད་སྣང་སྟོང་འཕགས་པའི་སྐུ༔ སྒྲ་གྲགས་མ་ལུས་གྲགས་སྟོང་རྒྱལ་བའི་གསུང༔ དྲན་རྟོག་ཀུན་ཀྱང་ཤར་གྲོལ་ཆོས་སྐུའི་ཐུགས༔ གསང་གསུམ་དག་པ་དྲན་པས་བསྟོད་པར་བགྱི༔ སྒྲིབ་སྦྱང་སྔགས་ཀྱི་རིམ་པ་ནི༔ ཐུགས་ཀར་ཟླ་བའི་གདན་ལ་ཧྲཱིཿདཀར་པོ༔ མར་མེ་འབར་བཞིན་དྭངས་གསལ་ལམ་མེར་བསྒོམ༔ དེ་མཐར་གཟུངས་སྔགས་ཤེལ་དཀར་ཕྲེང་བ་ལ༔ ཉི་ཟེར་ཕོག་ལྟར་འོད་ལྔའི་རང་མདངས་ཅན༔ སྔགས་ལས་སྒྲ་དབྱངས་དྲིལ་བུ་སྙན་འཁྲོལ་བཞིན༔ བར་མ་ཆད་པར་སྒྲོག་བསམ་དེ་ཡི་ངང༔ ན་མོ་རཏྣ་དྲ་ཡཱ་ཡ། ན་མཿཨཱརྱ་ཛྙཱ་ན་སཱ་ག་ར། བཻ་རོ་ཙ་ན། བ་ཡུ་ཧ་རཱ་ཛ་ཡ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ན་མཿསརྦ་ཏ་ཐཱ་ག་ཏེ་བྷྱ། ཨརྷ་ཏེ་བྷྱཿ སམྱཀྶཾ་བུདྡྷེ་བྷྱཿ ན་མཿཨརྱ་ཨ་ཝ་ལོ་ཀི་ཏེ་ཤྭ་ར་ཡ། བོ་དྷི་ས་ཏྭ་ཡ། མ་ཧཱ་ས་ཏྭ་ཡ། མ་ཧཱ་ཀ་རུ་ཎི་ཀཱ་ཡ། ཏདྱ་ཐཱ། ཨོཾ་དྷ་ར་དྷ་ར། དྷི་རི་དྷི་དི། དྷུ་རུ་དྷུ་རུ། ཨིཊྚེ་ཝཊྚེ། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ་ཀུ་སུ་མ་ཝ་ར། ཨི་ལི་མི་ལི། ཙི་ཏི་ཛྭ་ལ་མ་པ་ན་ཡེ་སྭ་ཧཱ། དེ་ཡི་ངང་ལས་ཡེངས་མེད་བཟླས་པར་འབད༔ སྐབས་སུ་ལས་སྦྱོར་དམིགས་པ་ནི༔ སྔགས་ཀྱི་འོད་ཟེར་གཟུངས་ཀྱི་རང་སྒྲར་བཅས༔ དམྱལ་བ་ཡི་དྭགས་དུད་འགྲོའི་ཡུལ་དུ་འཕྲོས༔ དེ་རུ་སྡུག་བསྔལ་སྤྱོད་པའི་སེམས་ཅན་གྱི༔ ཚ་གྲང་བཀྲེས་སྐོམ་ཟ་གསོད་བཀོལ་སྤྱོད་སྦྱངས༔ ཀུན་ཀྱང་པོ་ཊ་ལ་ཡི་ཞིང་ཁམས་སུ༔ འཕགས་པ་སྤྱན་རས་གཟིགས་ཀྱི་སྐུ་རུ་གྱུར༔ སྔགས་ཀྱི་འུར་སྒྲས་སྟོང་གསུམ་གང་བར་བསམ༔ དེ་ཡི་ངང་ནས་མ་ཡེངས་བཟླས་པར་བྱ༔ དེ་བཞིན་ལྷ་མ་ཡིན་དང་ལྷ་དང་མིའི༔ འཐབ་རྩོད་འཕོ་ལྟུང་སྐྱེ་འཆིའི་སྡུག་བསྔལ་སྦྱངས༔ ཀུན་ཀྱང་འཕགས་པའི་སྐུ་གསུང་ཐུགས་ཀྱི་ངང༔ ཟག་མེད་བདེ་བ་ཆེན་པོའི་སྔགས་སྒྲ་སྒྲོག༔ དེ་ལྟར་དམིགས་པ་རེས་མོས་ཀྱི༔ འཁྲུལ་སྣང་མ་ལུས་གནས་དག་ནས༔ དོན་གྱི་ལྷ་དང་མཇལ་ནས་ནི༔ འགྲོ་ཀུན་ཕན་བདེའི་གཞི་རུ་འགྱུར༔ ས་མ་ཡཱ༔ རྒྱ་རྒྱ་རྒྱ༔ སྔགས་ཀྱི་ཕན་ཡོན་བསྟན་པ་ནི༔ ཐེ་ཚོམ་མེད་པའི་གང་ཟག་གིས༔ སྔགས་འདི་འབུམ་ཕྲག་གཅིག་བཟླས་ན༔ ཤིན་ཏུ་ལྕི་ཞིང་བྱང་དཀའ་བའི༔ ཉན་ཐོས་པ་ཡི་རྩ་ལྟུང་བཞི༔ བྱང་ཞིང་དག་པར་འགྱུར་ཞེས་ན༔ ལྟུང་བ་གཞན་ལ་སྨོས་ཅི་དགོས༔ ཞེ་སྡང་དྲག་པོས་སྲོག་བཅད་པའི༔ སེམས་ཅན་དེ་ལ་རབ་དམིགས་ནས༔ བྱམས་པའི་སེམས་ཀྱིས་སྔགས་འདི་འབུམ༔ བཟླས་པས་ལས་སྒྲིབ་བྱང་གྱུར་ནས༔ གཉིས་ཀ་མཐོ་རིས་ཐོབ་འགྱུར་ན༔ ཀུན་སློང་ཕལ་པ་སྨོས་ཅི་དགོས༔ གསང་སྔགས་རྩ་བ་བླ་མ་ལ༔ འགལ་འཁྲུལ་སོང་བར་མ་གྱུར་བས༔ ཡན་ལག་དམ་ཚིག་གང་ཉམས་ཀྱང༔ སྔགས་འདི་གནོང་འགྱོད་དང་བཅས་པས༔ འབུམ་དུ་བཟླས་ན་བྱང་བར་འགྱུར༔ གནས་སྐབས་གཟུགས་མཛེས་ལོངས་སྤྱོད་འཕེལ༔ རིགས་རྒྱུད་དར་ཞིང་སྙན་གྲགས་སོགས༔ འདོད་དོན་གང་འདོད་ལ་དམིགས་ནས༔ སྔགས་འདི་གང་བཟླས་དེས་འགྲུབ་འགྱུར༔ མཛེ་ལ་སོགས་པའི་ནད་ཀྱི་རིགས༔ ཀུན་ཀྱང་སྔགས་འདིས་བྱང་བར་འགྱུར༔ གཟུངས་འདི་བྱེ་བའི་གྲངས་ཐེམས་ན༔ གང་ཟག་དབང་པོ་རབ་འབྲིང་ཐ༔ འདི་འམ་འཆི་ཁ་བར་དོ་རུ༔ འཕགས་པ་མཆོག་དང་ཞལ་མཇལ་ནས༔ ཐེ་ཚོམ་མེད་པར་གྲོལ་ངེས་སོ༔ རྗེས་སུ་སྤྱོད་ལམ་ལམ་ཁྱེར་དང༔ ཤིས་བརྗོད་བསྡུ་རིམ་དགེ་བསྔོ་རྣམས༔ དྲན་པས་ཟིན་བཞིན་ངག་འདོན་ནི༔ ཧྲཱིཿ སྤྱོད་ལམ་རྣམ་བཞི་གང་དང་གང་དུའང༔ འགྲོ་བ་གཞན་ལ་གནོད་སེམས་སྤུ་ཙམ་སྤངས༔ བདག་གིས་སེམས་ཅན་ཐམས་ཅད་སྡུག་བསྔལ་དང༔ བྲལ་ཏེ་གནས་སྐབས་མཐོ་རིས་ཡོན་ཏན་དང༔ མཐར་ཐུག་སངས་རྒྱས་ཐོབ་པར་བྱའོ་ཞེས༔ དམ་བཅའ་ཡིད་ལ་བཟུང་ཞིང་ངག་ཏུ་སྨྲ༔ དེ་བཞིན་མཆོག་གསུམ་བདེན་པས་འགྲུབ་གྱུར་ཅིག༔ སེམས་ཅན་ཀུན་གྱི་ལུས་ཀྱི་སྒྲིབ་དག་ནས༔ འཕགས་པའི་སྐུ་རུ་འགྲུབ་པའི་བཀྲ་ཤིས་ཤོག༔ སེམས་ཅན་ཀུན་གྱི་ངག་གི་སྒྲིབ་དག་ནས༔ འཕགས་པའི་གསུང་དུ་འགྲུབ་པའི་བཀྲ་ཤིས་ཤོག༔ སེམས་ཅན་ཀུན་གྱི་ཡིད་ཀྱི་སྒྲིབ་དག་ནས༔ འཕགས་པའི་ཐུགས་སུ་འགྲུབ་པའི་བཀྲ་ཤིས་ཤོག༔ སྣོད་བཅུད་ལྷར་འཛིན་མི་དམིགས་སྟོང་པའི་ངང༔ རང་བབས་ཀློང་དུ་རང་གྲོལ་ཆེན་པོར་བལྟ༔ དུས་གསུམ་རྣམ་དཀར་རང་གཞན་སུས་བགྱིས་པ༔ ཀུན་ཀྱང་བདག་གཞན་འགྲོ་བ་མ་ལུས་རྣམས༔ རིགས་བདག་སྤྱན་རས་གཟིགས་དང་དབྱེར་མེད་པར༔ ཕྱམ་གཅིག་རྫོགས་སངས་རྒྱས་པའི་རྒྱུར་བསྔོ་འོ༔ ས་མ་ཡཱ༔ ཨེ་མ་ཡང་ཟབ་ཐུགས་ཀྱི་གཏེར༔ པདྨས་ཇོ་མོ་མཚོ་རྒྱལ་ལ༔ ཕྱི་རབས་སྐལ་ལྡན་དོན་དུ་གདམས༔ དབྱིངས་ཀྱི་སྒྲོམ་གཅིག་སྦས་པའི་ཆོས༔ དུས་བབས་རིག་རྩལ་ཌཱཀྐིའི་བརྡ༔ རྗེས་འཇུག་དོན་དང་ལྡན་ཕྱིར་བཀོད༔ བཀའ་འདི་ཕྱག་དྲུག་མགོན་པོས་སྲུངས༔ གཏེར་འདི་དུད་སོལ་ལྷ་མོས་འཚོས༔ བཀའ་རྐུན་ལོག་སྲེད་སྙིང་ཁྲག་འཕོས༔ ལས་ཅན་ཉམས་ལེན་སྲུངས་ཤིག་རྒྱ༔ གུ་ཧྱ༔ པདྨས་ལུང་ཟིན་དག་སྣང་གི་ཆོས་ལ་དབང་བའི་སྐལ་ལྡན་ལུང་རིག་གླིང་པས་ཉམས་སྣང་གསང་བ་མཁའ་འགྲོའི་ཆོས་མཛོད་ལས་ཕབ་པ་དགེ་བར་གྱུར་ཅིག