བསྙུང་བར་གནས་པའི་གནས་པའི་ཆོ་ག་སྒྲིབ་གཉིས་མྱུར་གྲོལ།
ཡང་ཟབ་འཕགས་པའི་ཐུགས་སྒྲུབ་ལས༔ བསྙུང་བར་གནས་པའི་གནས་པའི་ཆོ་ག་སྒྲིབ་གཉིས་མྱུར་གྲོལ་ཞེས་བྱ་བཞུགས༔འཕགས་མཆོག་སྙིང་རྗེའི་ལྷ་ལ་འདུད༔ བསྙུང་གནས་ཆོ་ག་ཟབ་མོ་འདི༔ ཉམས་སུ་ལེན་འདོད་སྐལ་ལྡན་དེས༔ དབེན་པར་རས་བྲིས་དཀྱིལ་འཁོར་རམ༔ ཡང་ན་འབྲུ་ཡི་ཚོམ་བུ་བཀོད༔ བུམ་པ་ཉེར་ལྔའི་བཅུད་ལྡན་ལ༔ དཔག་བསམ་བདུད་རྩིའི་ཤིང་བཙུགས་ཤིང༔ སྣ་ལྔའི་གཟུངས་ཐག་མགུལ་དར་དཀྲིས༔ གཡས་སུ་འཕགས་པའི་སྐུ་བྲིས་འབུར༔ གཡོན་དུ་གཟུངས་རིང་དངུལ་བྲིས་དང༔ རྒྱབ་ཏུ་མེ་ལོང་ཤེལ་རྡོ་དང༔ མདུན་དུ་བཤོས་ཟླུམ་གཙང་མ་ནི༔ དཀར་མངར་རྒྱན་ལྡན་འཁོར་དྲུག་བསྐོར༔ བུར་སྦྲང་ཤིང་ཏོག་སྨན་སྣས་བརྒྱན༔ མཐའ་བསྐོར་བདུག་སྤོས་སྔོན་འགྲོ་བའི༔ ཉེར་སྤྱོད་མཆོད་པས་མཛེས་པར་བྱ༔ དེ་ནས་རྣལ་འབྱོར་བདེ་བའི་ངང༔ སེམས་བསྐྱེད་ལྡན་པས་སྟན་ལ་འདུག༔ ས་ག་ཟླ་བ་དེ་ལས་གཞན༔ གང་ཡང་རུང་བའི་ཚེས་བདུན་ནམ༔ ཉེར་དགུ་བཅུ་བཞིར་མགོ་བརྩམས་ནས༔ བརྩམས་པ་དེ་ཉིད་མཐར་ཕྱིན་ཕྱིར༔ གཞི་བདག་མགྲོན་ལ་བསང་བརྔན་དང༔ སྡེ་བརྒྱད་བཤོས་བུས་བརྔན་པར་བྱ༔ སྐྱ་རེངས་དང་པོ་ཤར་བའི་ཚེ༔ རྣམ་པར་འཇོམས་པའི་ཁྲུས་ནས་ཕྱུང༔ ཡན་ལག་ལྔ་ལྡན་ཕྱག་གསུམ་འཚལ༔ བླ་མ་འམ་ནི་རྟེན་གསུམ་ལ༔ ཐུགས་རྗེ་ཆེན་པོའི་འདུ་ཤེས་བསྐྱེད༔ འབྲུ་དང་རཏྣའི་མཎྚལ་འབུལ༔ ཕྱོགས་བཅུ་ན་བཞུགས་པའི་རྐང་གཉིས་ཀྱི་མཆོག་སྟོན་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམས་དང༔ འཁོར་བ་དང་ཞི་བའི་མཐའ་ལས་སྒྲོལ་བར་བྱེད་པ་འདོད་ཆགས་དང་བྲལ་བའི་མཆོག་དམ་པའི་ཆོས་རྣམས་དང༔ རང་ཉིད་ཀྱི་རྒྱུད་ལེགས་པར་གྲོལ་ནས་གཞན་ཐར་བའི་ལམ་ལ་འགོད་པར་མཛད་པ་ཚོགས་ཀྱི་མཆོག་དགེ་འདུན་འདུས་པའི་སྡེ་རྣམས་དང༔ མཆོག་གསུམ་ཀུན་འདུས་ཀྱི་བདག་ཉིད་བླ་མ་འཕགས་པ་སྤྱན་རས་གཟིགས་དབང་ཕྱུག་གཙོ་འཁོར་སྤྲུལ་བར་བཅས་པ་ཐམས་ཅད་བདག་ལ་དགོངས་སུ་གསོལ༔ ཇི་ལྟར་སྔོན་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་འགྲོ་བ་རྣམས་བླ་ན་མེད་པའི་ས་ལ་འགོད་པར་མཛད་པའི་ཆེད་དུ༔ དགེ་སྡིག་གི་གསོ་སྦྱོང་ཇི་ལྟར་མཛད་པ་དེ་བཞིན་དུ༔ བདག་ཆེ་གེ་མོ་ཞེས་བགྱི་བས་ཀྱང༔ དུས་ད་ནང་ནས་བཟུང་སྟེ་སང་ཉི་མའི་སྐྱ་རེངས་དང་པོ་མ་ཤར་གྱི་བར་དུ༔ འགྲོ་བ་རྣམས་ཀྱི་ལས་ཉོན་བག་ཆགས་དང་བཅས་པ་ཡོངས་སུ་བྱང་ཞིང་སངས་རྒྱས་ཀྱི་ཆོས་ཁམས་རྒྱ་མཚོ་ལྟ་བུ་རྒྱུད་ལ་འཐོབ་པར་བྱ་བའི་ཕྱིར༔ གསོ་སྦྱོང་ཡན་ལག་བརྒྱད་པ་ཡང་དག་པར་བགྱིའོ༔ དེའང་མི་དང་དུད་འགྲོའི་བྱེ་བྲག་རྣམས་ཀྱི་སྲོག་དངོས་སམ་བརྒྱུད་ནས་གཅོད་པ་ལས་སླར་ལྡོག་པར་བགྱིའོ༔ དེ་བཞིན་དུ་གཞན་གྱི་ནོར་རྫས་དངོས་སུ་རྐུ་བའམ་ཐབས་ཀྱིས་ལེན་པ་ལས་སླར་ལྡོག་པར་བགྱིའོ༔ བུད་མེད་ལ་དངོས་སུ་དངོས་སུ་སྤྱོད་པའམ་གཞན་ཚངས་པར་སྤྱོད་པའི་ཚུལ་ལས་ཉམས་པ་འཁྲིག་པའི་ཆོས་ཐམས་ཅད་ལས་སླར་ལྡོག་པར་བགྱིའོ༔ མིའི་ཆོས་ལས་བླ་མར་གྱུར་པའི་རྫུན་ཆེན་པོ་དང་གཞན་གྱི་རྒྱུད་ཆུད་འཛའ་བར་བྱེད་པའི་རྫུན་གྱི་ཚིག་ཐམས་ཅད་དང་གཞན་འབྱེད་པར་བྱེད་པ་སོགས་ངག་གི་མི་དགེ་བ་མཐའ་དག་ལས་སླར་ལྡོག་པར་བགྱིའོ༔ དེ་བཞིན་དུ་ཆང་གི་བྱེ་བྲག་དང་ཐ་མ་ཁ་སོགས་ཆོས་དང་འགལ་བའི་ཁ་ཟས་ཐམས་ཅད་དང༔ གླུའི་བྱེ་བྲག་དང་རིན་པོ་ཆེ་དང་སྨན་ལ་སོགས་པའི་རྒྱན་སྣ་ཚོགས་གདག་པ་དང༔ དྲི་ཞིམ་པོས་ལུས་དང་དབང་པོའི་སྒོར་བྱུག་པ་འགྱེད་པ་དང༔ ཁྲི་དང་སྟན་མཐོན་པོ་རིན་ཐང་ཅན་ལ་འདུག་པ་དང༔ ཉི་མ་ཕྱེད་ཡོལ་བ་སོགས་དུས་མ་ཡིན་པར་ཁ་ཟས་བཟའ་བ་ཚུལ་མ་ཡིན་པ་རྣམས་ལས་སླར་ལྡོག་པར་བགྱིའོ༔ རྒྱུ་ཆུང་ངུའི་བསླབ་པ་དེ་ལྟ་བུའང་སེམས་བསྐྱེད་ཁྱད་པར་ཅན་དང་འབྲེལ་བའི་མཐུས༔ ནམ་བྱང་ཆུབ་སྙིང་པོའི་གོ་འཕང་མངོན་དུ་མ་བྱས་ཀྱི་བར་དུ་མི་ཟད་ཅིང་དགེ་རྩ་ཐམས་ཅད་གོང་འཕེལ་དུ་གསོ་བ་དང༔ སྡིག་པའི་བྱེ་བྲག་ཐམས་ཅད་མིང་མེད་དུ་སྦྱོང་བ་ལ་ཐབས་ཀྱི་མཆོག་ཡང་དག་པར་བླང་བར་བགྱིའོ༔ ལན་གསུམ་བརྗོད་ཅིང་དོན་ཞགས་ཀྱི༔ ཚུལ་ཁྲིམས་རྣམ་པར་དག་པའི་གཟུངས༔ ཉི་ཤུ་རྩ་གཅིག་དག་པར་བཟླ༔ དེ་རྗེས་ཁྲུས་དང་གོས་གསར་བགོ༔ པུས་མོ་སར་བཙུགས་འདི་བཞིན་དམིགས༔ ངག་ཏུ་ཚིག་གིས་གསལ་གདབ་ནི༔ ཨེ་མ་ཧོ༔ མདུན་གྱི་མཁའ་ལ་ཕོ་བྲང་པོ་ཊ་ལ༔ གཞལ་མེད་ཁང་དབུས་པདྨ་ཟླ་གདན་སྟེང༔ བཀའ་དྲིན་གསུམ་ལྡན་རྩ་བའི་བླ་མ་དང་༔ དབྱེར་མེད་སྐྱབས་ཀུན་བདག་ཉིད་སྤྱན་རས་གཟིགས༔ སངས་རྒྱས་བྱང་སེམས་གསུང་རབ་དམ་པའི་ཆོས༔ ཉན་རང་སྤྲུལ་པ་ཆོས་སྐྱོང་དང་བཅས་གསལ༔ དེ་ནས་ཐོག་མར་སྐྱབས་འགྲོ་ནི༔ ཁྱེད་ཤེས་རེ་ལྟོས་བློ་གཏད་དེ༔ ཀྱཻ༔ མཐའ་མེད་འཁོར་བ་སྡུག་བསྔལ་རྦ་ཀློང་དུ༔ སྐྱེ་ཤིའི་སྣང་བ་རྨི་ལམ་ལྟར་བརྒྱུད་ཀྱང༔ སྡུག་བསྔལ་བདེ་བར་འཁྲུལ་བའི་བདག་སོགས་འགྲོ༔ སྐྱབས་ཀྱི་དམ་པ་དཀོན་མཆོག་རྩ་བ་གསུམ༔ ཀུན་འདུས་བླ་མ་སྤྱན་རས་གཟིགས་དབང་ལ༔ བྱང་ཆུབ་སྙིང་པོའི་བར་དུ་སྐྱབས་སུ་མཆི༔ གཉིས་པ་བྱང་ཆུབ་སེམས་བསྐྱེད་ནི༔ ཧོ༔ བདག་ཉིད་ཐར་བར་འདོད་པ་བློ་དམན་ལས༔ རྣམ་པར་ལོག་ཏེ་མཐའ་ཡས་མ་རྒན་འགྲོ༔ གནས་སྐབས་བདེ་དང་མཐར་ཐུག་རྫོགས་སངས་རྒྱས༔ དོན་དུ་གཉེར་ནས་ཕ་རོལ་ཕྱིན་དྲུག་ལམ༔ རྒྱལ་བའི་སྲས་ཀྱི་སྤྱོད་ལ་འཇུག་པར་བགྱི༔ གསུམ་པ་ཡན་ལག་བདུན་པ་ནི༔ ཕལ་བོ་ཆེ་ལས་བྱུང་བཞིན་དུ༔ ཚིག་རྗེས་དོན་ལ་གཞོལ་དེ་བྱ༔ རིན་ཆེན་མཎྚལ་བཀོད་ལེགས་ལ༔ སྨན་དང་འབྲུ་ཡི་ཚོམ་བུ་བཀོད༔ ཏྲཾ༔ ཕྱི་སྣོད་རི་རབ་གླིང་བཞི་གླིང་ཕྲན་དང༔ རྒྱལ་སྲིད་བདུན་དང་བཀྲ་ཤིས་རྟགས་རྫས་བརྒྱད༔ སྒེག་མོ་གླུ་གར་མེ་ཏོག་བདུག་སྤོས་མ༔ སྣང་གསལ་དྲི་ཡི་བྱུག་པ་འགྱེད་མཁས་པའི༔ མཆོད་པའི་ལྷ་མོ་ཞལ་ཟས་བདུད་རྩིའི་ཚོགས༔ ངོ་མཚར་གོས་རྒྱན་ཁང་བཟང་རིན་ཆེན་ཁྲི༔ མེ་ཏོག་སྐྱེད་ཚལ་འདོད་འཇོའི་བ་མོ་དང༔ སྟོབས་ལྡན་གླང་པོ་ཅང་ཤེས་མྱུར་བའི་ཤུགས༔ བསིལ་གྲིབ་འབབས་སྟེགས་མཆོད་པའི་ཡོ་བྱད་ཀུན༔ ཀུན་བཟང་རྣམ་རོལ་བླ་མ་མཆོག་གསུམ་ལྷར༔ གུས་པས་འབུལ་ལོ་བདག་ལུས་ལོངས་སྤྱོད་བཅས༔ དགྱེས་པ་ཆེན་པོའི་ཐུགས་ཀྱིས་ཡོངས་བཞེས་ནས༔ འགྲོ་ཀུན་བླ་མ་ལོངས་སྐུའི་དཔལ་ཡོན་ལ༔ མྱུར་དུ་འགོད་པའི་དངོས་གྲུབ་སྩལ་དུ་གསོལ༔ གུ་རུ་རཏྣ་མཎྚ་ལ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱ༔ཧཱུྃ༔ སླར་ཡང་སོ་བྱང་སྔགས་གསུམ་གྱི༔ ཉེས་ལྟུང་སྡིག་པ་སྦྱོང་བའི་ཕྱིར༔ ཕུང་པོ་གསུམ་པ་ཚར་གསུམ་དང༔ སྤྱི་བཤགས་ཡིག་བརྒྱ་ཉེར་གཅིག་བརྗོད༔ རྗེས་སུ་སྡིག་པའི་རང་བཞིན་ནི༔ སྐྱེ་འགགས་གནས་པ་མེད་པའི་ཕྱིར༔ ཆོས་ཀྱི་དབྱིངས་དང་མཉམ་པར་བལྟ༔ ཚོགས་ཞིང་རང་བཞིན་མི་དམིགས་བཞག༔ ས་མ་ཡཱ༔ དེ་ཡིས་སྦྱོར་བའི་ཆོས་རྣམས་རྫོགས༔ དངོས་གཞིའི་ཐོག་མར་རང་ཉིད་ནི༔ ལྷག་པའི་ལྷ་ཡི་ཏིང་འཛིན་གསལ༔ ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅ཧཾ༔ འཁོར་འདས་གཉིས་ཀྱི་ཆོས་རྣམས་ཀུན༔ གདོད་ནས་མ་སྐྱེས་རང་བཞིན་སྟོང༔ གང་དུ་མི་གནས་གར་མི་འགྲོ༔ རང་བབས་མ་བཅོས་རང་མདངས་བསྐྱང༔ མ་ཧཱ་ཀ་རུ་ཎི་ཀ་ས་མ་ཏཱི་ཧཱུྃ༔ སྟོང་ཉིད་བློ་འདས་མ་རྟོགས་པས༔ ཁམས་གསུམ་འཁོར་བར་འཁྱམས་པའི་འགྲོར༔ དམིགས་མེད་སྙིང་རྗེ་ཆེན་ཆེན་པོའི་གདངས༔ སྲིད་གསུམ་ཡོངས་ལ་ཁྱབ་པར་བསྒོམ༔ ཨོཾ་མ་ཎི་པདྨེ་ཧཱུྃ་ཧྲཱིཿ སྟོང་ཉིད་སྙིང་རྗེ་ཟུང་འཇུག་ངང༔ བརྗོད་པ་སྔགས་ཀྱི་རྐྱེན་བྱས་ཏེ༔ ཕྱི་སྣོད་རི་བོ་ཏ་ལའི་ཞིང༔ རིན་ཆེན་སྣ་བདུན་གཞལ་ཡས་ཁང༔ པདྨ་དཀར་པོ་ཟླ་གདན་ལ༔ རང་སེམས་འཕགས་པ་སྤྱན་རས་གཟིགས༔ པདྨ་རིགས་ཀྱི་སེམས་དཔའ་དམར༔ ཞལ་གཅིག་ཕྱག་བཞི་འཛུམ་མདངས་རྒྱས༔ ཕྱག་བཞིའི་དང་པོ་གཉིས་ཐལ་སྦྱར༔ ཨུཏྤལ་དམར་པོའི་སྡོང་བུ་འཛིན༔ འགྱུར་མེད་ཡི་གེ་ཧྲཱིཿཡིག་མཚན༔ གཡས་འོག་པདྨའི་ཕྲེང་བ་འཛིན༔ གཡོན་འོག་པདྨ་དཀར་པོ་བསྣམས༔ ཞབས་གཉིས་གཡས་བརྐྱང་གཡོན་བསྐུམ་ཚུལ༔ རོལ་པའི་སྟབས་ཀྱིས་དགྱེས་པར་བཞུགས༔ རིགས་བདག་སྣང་བ་མཐའ་ཡས་དམར༔ སྤྲུལ་སྐུ་ཚངས་པར་སྤྱོད་པའི་ཆས༔ ཕྱག་གཉིས་མཉམ་བཞག་ལྷུང་བཟེད་ནང༔ འཆི་མེད་བདུད་རྩིས་བཀང་བ་བསྣམས༔ འཁོར་དུ་སངས་རྒྱས་བྱང་སེམས་དང༔ ཉན་རང་ཆོས་སྲུང་སྤྲིན་ལྟར་འཐིབ༔ གནས་གསུམ་ཡི་གེ་འབྲུ་གསུམ་ལས༔ འོད་འཕྲོས་ཕྱོགས་བཅུའི་རྒྱལ་བ་ཀུན༔ འོད་དཔག་མེད་དང་སྤྱན་རས་གཟིགས༔ རང་མོས་ལྷག་པའི་ལྷ་རུ་གྱུར༔ ཁབ་ལེན་རྡོ་ཡིས་ལྕགས་ཕྱེ་བཞིན༔ རང་དང་དབྱེར་མེད་གཅིག་པར་གྱུར༔ དེ་ནས་ཀུན་བརྟག་བསྐྱེད་པའི་ལྷར༔ ཡོངས་གྲུབ་ཡེ་ཤེས་རྒྱས་གདབ་ནི༔ ཧཱུྃ་ཧྲཱིཿ ཀུན་བརྟགས་བློ་ཡིས་བསྐྱེད་པའི་ལྷ་རྣམས་ཀྱི༔ གནས་གསུམ་འོད་ཟེར་དཀར་དམར་མཐིང་འཕྲོས་པས༔ རང་བཞིན་དབྱིངས་ནས་དོན་དམ་ཡེ་ཤེས་ལྷ༔ རིགས་ལྔའི་རྣམ་པར་སྤྱན་དྲངས་ཡུམ་རྣམས་ཀྱིས༔ རིན་ཆེན་བུམ་བཟང་བདུད་རྩིས་ཁྲུས་བྱས་པས༔ ཉོན་ཤེས་སྒྲིབ་དག་རིགས་བདག་སྣང་མཐའ་ཡས༔ གཙོར་གྱུར་རིགས་ལྔའི་ལྷ་ཡིས་དབུ་བརྒྱན་གྱུར༔ རིགས་ལྔ་ཡུམ་བཅས་རང་གི་གནས་ལྔར་ཐིམ༔ ཨོཾ་པདྨ་དྷ་རཱི་ཨ་བྷི་ཥིཉྩ་ཧཱུྃ༔ དེ་ནས་མཆོད་སོགས་ཡན་ལག་བདུན༔ བཟང་སྤྱོད་སྨོན་ལམ་ཇི་བཞིན་བྱ༔ མཎྚལ་རྒྱས་བསྡུས་གང་རུང་འབུལ༔ ཚིག་འདིས་གུས་པའི་བློ་ཡིས་བསྟོད༔ ཧྲཱིཿ སྔོན་ཚེ་ཐོག་མའི་བསྐལ་པ་དང་པོ་ལ༔ དྭངས་པའི་རྒྱ་མཚོར་པདྨའི་སྦུབས་སུ་བལྟམས༔ བཟང་པོ་མཆོག་གི་བླ་མར་ཐུགས་བསྐྱེད་ནས༔ འགྲོ་དྲུག་དོན་དུ་སྤྱན་རས་མི་ཟུམ་པར༔ རྟག་པར་གཟིགས་ནས་རླབས་ཆེན་སྤྱོད་པ་ལས༔ ཐུགས་བསྐྱེད་དམ་བཅའ་མཛད་ལ་ཕྱག་འཚལ་བསྟོད༔ ངན་སོང་འཁོར་བ་ལན་གསུམ་དོང་སྤྲུགས་ཀྱང༔ ལས་སྣང་གློ་བུར་སེམས་ཅན་མཐའ་མེད་ལ༔ ཅུང་ཟད་ཞུམ་པས་དམན་སེམས་བསྐྱེད་ཚུལ་བསྟན༔ དབུ་དང་སྐུ་ལུས་ཚལ་བར་གས་པ་ཡང༔ བླ་མ་སྣང་མཐའ་རང་གིས་ཐུགས་བསྐྱེད་མཐུས༔ ཕྱག་སྟོང་སྤྱན་སྟོང་སྐལ་བཟང་འདྲེན་པ་སྟོང༔ ངོ་མཚར་མཛད་པ་བསྟན་ལ་ཕྱག་འཚལ་བསྟོད༔ རྒྱལ་ཀུན་གསུང་གི་ཆོས་ཕུང་བསམ་ཡས་པ༔ འགྲོ་དྲུག་སྒྲིབ་སྦྱོང་ཡི་གེ་དྲུག་པ་ཞེས༔ མཐོང་ཐོས་དྲན་པས་འགྲོ་བའི་སྡུག་བསྔལ་ཀུན༔ སེལ་མཛད་སྙིང་པོ་མཆོག་ཏུ་ཡོངས་བསྡུས་པ༔ རིགས་སྔགས་རྒྱལ་པོ་ཡེ་ཤེས་དྲུག་སྦྱིན་པའི༔ གཟུངས་མཆོག་སྒྲིབ་པ་སྦྱོང་ལ་ཕྱག་འཚལ་བསྟོད༔ དེ་ནས་བཟླས་པ་བྱ་བ་ནི༔ རང་ཉིད་འཕགས་པའི་ཐུགས་ཀར་འདབ་དྲུག་དཀྱིལ༔ ཟླ་བའི་གདན་ལ་སྙིང་པོ་ཧྲཱིཿདཀར་དམར༔ མཐའ་སྐོར་ཡི་གེ་དྲུག་པ་གཡས་སུ་འཁོར༔ སྔགས་ཀྱི་སྒྲ་དང་འོད་ཟེར་དཀར་པོ་འཕྲོས༔ འགྲོ་དྲུག་སྒྲིབ་སྦྱོང་འཕགས་པའི་གོ་འཕང་བཀོད༔ ཚུར་འདུས་ཧྲཱིཿར་ཐིམ་ཡེངས་མེད་ཏིང་འཛིན་ངང༔ ཨོཾ་མ་ཎི་པདྨེ་ཧཱུྃ་ཧྲཱིཿ རྩ་སྔགས་སྟོང་རྩ་ལྔ་རུ་བཟླ༔ དེ་ནས་མདུན་བསྐྱེད་གསལ་གདབ་ནི༔ ཧྲཱིཿ མདུན་བསྐྱེད་དཀྱིལ་འཁོར་མི་དམིགས་སྟོང་པའི་ངང༔ བྷྲུཾ༔ཡིག་ལས་བྱུང་སྤྲུལ་པའི་གཞལ་མེད་ཁང༔ སྒོ་གྲུ་རྟ་བབས་འདོད་སྣམ་ཕ་གུ་དང༔ དྲྭ་ཕྱེད་མདའ་ཡབ་ཆོས་འཁོར་རི་དྭགས་གདུགས༔ རྒྱལ་མཚན་བ་དན་དྲིལ་གཡེར་རྡོ་རྗེའི་ཕྲེང༔ ཁྲུས་རྗིང་རིན་ཆེན་རི་བོ་པད་ཕྲེང་སོགས༔ མཚན་ཉིད་ཡོངས་རྫོགས་པད་ཟླའི་གདན་གྱི་ཁར༔ རང་སྲོག་ཧྲཱིཿལས་ཧྲཱིཿཡིག་ཟླ་བའི་མདོག༔ ཡིག་དྲུག་སྔགས་ཀྱི་སྒྲ་དང་བཅས་ཏེ་བབས༔ འོད་ཟེར་འཕྲོ་འདུས་འཕགས་མཆོད་བྱིན་རླབས་བསྡུས༔ ཚུར་ཐིམ་སླར་ཡང་འགྲོ་དྲུག་འོད་ཀྱིས་ཁྱབ༔ གསེར་མདོག་འདབ་དྲུག་ཧྲཱིཿམཚན་ཡིག་དྲུག་སྔགས༔ འོད་ཟེར་ཕུང་པོར་ཡོངས་འདུས་སྤྱན་རས་གཟིགས༔ བཅུ་གཅིག་ཞལ་ཅན་འཛུམ་མདངས་ཟླ་ལྟར་དཀར༔ རྩ་བའི་ཞལ་ནི་དུང་མདོག་འོད་སྟོང་འབར༔ གཡས་ལྗང་གཡོན་དམར་དེ་སྟེང་རྩ་ཞལ་ལྗང༔ གཡས་དམར་གཡོན་དཀར་དེ་སྟེང་རྩ་ཞལ་སྔོ༔ གཡས་སེར་གཡོན་མཐིང་དེ་སྟེང་ཁྲོ་ཞལ་ནག༔ སྤྱན་གསུམ་ཁྲོ་གཉེར་སྨ་ར་མེ་སྟག་འཕྲོ༔ ཞལ་གདངས་མཆེ་གཙིགས་རྔམ་པའི་ང་རོ་རྒོད༔ དེ་སྟེང་ཆོས་སྐུ་ཞི་ཞལ་དམར་གསལ་བཞད༔ རྩ་ཕྱག་བརྒྱད་ཀྱི་དང་པོ་གཉིས་ཐལ་སྦྱར༔ གཡས་གསུམ་ཤེལ་ཕྲེང་འཁོར་ལོ་མཆོག་སྦྱིན་གྱིས༔ སྤྱི་བླུགས་བདུད་རྩིའི་རྒྱུན་འབེབས་གཡོན་པ་གསུམ༔ པད་དཀར་སྡོང་བུ་མདའ་གཞུ་སྐྱབས་སྦྱིན་མཛད༔ ཐབས་ཤེས་ཞབས་གཉིས་མཉམ་པའི་སྟབས་ཀྱིས་བཞེངས༔ རིན་ཆེན་དབུ་རྒྱན་སྙན་མགུལ་ཕྱག་ཞབས་བརྒྱན༔ ནོར་བུའི་དོ་ཤལ་གསེར་གྱི་སྐ་རགས་མཛེས༔ དར་དམར་ཤམ་ཐབས་ལྗང་གུའི་སྟོད་གཡོགས་དང༔ དཀར་པོའི་གར་གོས་རི་དྭགས་ལྤགས་པས་བཀབ༔ པདྨའི་རྒྱན་ཕྲེང་རཏྣའི་ཕྲ་ཚོམ་སྤྲས༔ མཚན་དཔེ་ཡོངས་རྫོགས་སྣང་མཐས་དབུ་གཙུག་བརྒྱན༔ ཕྱོགས་བཞིར་པད་ཟླའི་གདན་ལ་ས་བོན་ལས༔ ཤར་དུ་མི་བསྐྱོད་སྔོན་པོ་ས་གནོན་མཛད༔ ལྷོ་རུ་རིན་འབྱུང་སེར་པོ་མཆོག་སྦྱིན་རྒྱ༔ ནུབ་ཏུ་སྣང་མཛད་དཀར་པོ་ཆོས་འཆད་ཚུལ༔ བྱང་དུ་དོན་གྲུབ་ལྗང་གུ་སྐྱབས་སྦྱིན་ཕྱག༔ སྤྲུལ་སྐུའི་ཚུལ་འཆང་གཞན་ཡང་སངས་རྒྱས་དང༔ བྱང་སེམས་ཉན་རང་ཆོས་སྲུང་སྤྲིན་ལྟར་འཐིབ༔ གནས་གསུམ་ཡི་གེའི་འོད་ཀྱིས་དབང་གི་ལྷ༔ སྤྱན་དྲངས་བདུད་རྩིའི་རྒྱུན་གྱིས་ཁྲུས་གསོལ་བས༔ སྐུ་གང་སྒྲིབ་དག་ཆུ་ལྷག་ཡར་ལུད་པས༔ སྣང་མཐའ་གཙོར་གྱུར་རིགས་ལྔས་དབུ་བརྒྱན་གྱུར༔ དེ་ནས་སྤྱན་འདྲེན་སྤོས་རོལ་བཅས༔ གདུང་བའི་དབྱངས་ཀྱིས་འདི་སྐད་དོ༔ ཧྲཱིཿ བདེ་གཤེགས་ཐམས་ཅད་མཉམ་ཉིད་ཐུགས་རྗེའི་རྩལ༔ གདུལ་བྱའི་འགྲོ་ལ་ལྷག་པར་བརྩེ་བའི་ཉམས༔ སྤྱན་རས་གཟིགས་དབང་སྤྲུལ་འཁོར་བཅས་པ་རྣམས༔ གདུང་བའི་དབྱངས་ཀྱིས་ཐུགས་དམ་རྒྱུད་བསྐུལ་ན༔ སྨོན་ལམ་སྟོབས་དང་ཚད་མེད་སྙིང་རྗེའི་མཐུས༔ རྣལ་འབྱོར་མོས་པའི་གནས་འདིར་གཤེགས་སུ་གསོལ༔ བདག་ཅག་ལས་ཉོན་བག་ཆགས་ཤུགས་དྲག་པོས༔ བཟོད་དཀའ་འཁོར་བའི་རྒྱ་མཚོར་ལྷུང་བ་རྣམས༔ མྱུར་མགྱོགས་ཐུགས་རྗེའི་ཕྱག་གིས་ཉེར་དྲངས་ནས༔ ས་ལམ་ཡོན་ཏན་འཐོབ་ཕྱིར་གཤེགས་སུ་གསོལ༔ ལས་ཉོན་རྒྱུ་ལས་བསྐྱེད་པའི་ནད་མཚོན་དང༔ ལོ་དང་ཕྱུགས་ཉེས་མི་འདོད་ཆར་འབེབ་ཚེ༔ རྫོགས་ལྡན་བདེ་བས་འགྲོ་ཀུན་དབུགས་དབྱུང་ནས༔ སྙིགས་མའི་རྒུད་པ་འཇོམས་ཕྱིར་གཤེགས་སུ་གསོལ༔ ཨོཾ་ཨཱརྱ་ལོ་ཀི་ཤྭ་ར་མ་ཧཱ་ཀ་རུ་ཎི་ཀ་ཛྙཱ་ན་བཛྲ་ཨ་བེ་ཤ་ཡ་ཕཻཾ་ཕཻཾ༔ སྤྱན་དྲངས་ལྷ་དེ་བཞུགས་གསོལ་ནི༔ ཧཱུྃ་ཧྲཱིཿ ཕྱོགས་བཅུ་ཀུན་ན་ལེགས་བཞུགས་བཅོམ་ལྡན་འདས༔ ལྷ་ཡི་ལྷ་མཆོག་རྒྱལ་བ་སྲས་དང་བཅས༔ ཀུན་འདུས་སྤྱན་རས་གཟིགས་དབང་སྙིང་རྗེའི་ལྷ༔ བསྐྱེད་པའི་རྟེན་དང་དབྱེར་མེད་བརྟན་བཞུགས་ནས༔ མཆོག་དང་ཐུན་མོང་དངོས་གྲུབ་མྱུར་ཐོབ་མཛོད༔ ཨོཾ་ཤྲི་བཛྲ་ཛྙཱ་ན་ལོ་ཀི་ཤྭ་ར་ཛཿཧཱུྃ་བཾ་ཧོ༔ དེ་ནས་དག་བྱེད་ཁྲུས་གསོལ་ནི༔ སྐུ་རྟེན་གཟུགས་བརྙན་མེ་ལོང་ལ༔ ཤར་བ་ཁྲུས་བུམ་བདུད་རྩིས་འཁྲུ༔ ཧྲཱིཿ ཡོན་ཏན་འབུམ་ཕྲག་དུ་མའི་གཏེར་འཆང་བའི༔ མཚན་དཔེའི་དཔལ་འབར་རྒྱལ་བའི་སྐུ་མཆོག་ལ༔ ཉོན་མོངས་དྲི་མའི་སྐྱོན་གྱིས་གོས་མིན་ཀྱང༔ དག་བྱེད་བཟང་པོའི་ཁྲུས་ཆབ་འདི་གསོལ་བས༔ འགྲོ་ཀུན་ལས་ཉོན་དྲི་མ་ཡོངས་དག་ནས༔ དྲི་བྲལ་མཚན་དཔེའི་གཟི་བརྗིད་ཕུན་ཚོགས་ཤོག༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥི་ག་ཏེ་ས་མ་ཡཱ་ཤྲཱི་ཡེ་ཧཱུྃ༔ གཞན་ཡང་ཁྲུས་གསོལ་ཅི་རིགས་ཚིག༔ བརྗོད་རྗེས་ཁྲུས་ཆུས་བདག་གཞན་བཀྲུ༔ ཧྲཱིཿ རྒྱལ་ཀུན་སྦྱིན་སོགས་ཕྱིན་དྲུག་ཡོན་ཏན་དྲིས༔ ལེགས་བསྒོས་ཁྲུས་ཆབ་ཡོན་ཏན་བདུད་རྩིས་ཆུས༔ བདག་གཞན་ཉོན་དྲུག་སྒྲིབ་པ་ཀུན་དག་ནས༔ ཡེ་ཤེས་དྲུག་གི་དཔལ་ཡོན་ཐོབ་པར་ཤོག༔ དེ་ནས་ལྷ་ལ་གོས་འབུལ་ནི༔ མདངས་ལྡན་དར་གྱི་ན་བཟའ་ཐོགས༔ ཧྲཱིཿ ཀུན་མཁྱེན་རྒྱལ་བ་བཟོད་པའི་གོས་མཆོག་གིས༔ ཀུན་ནས་མཛེས་ཤིང་བསོད་ནམས་བརྒྱ་ཕྲག་ལྡན༔ འཆི་མེད་པཉྩ་ལི་ཀས་ཉེར་བཀླུབས་ཀྱང༔ བདག་ཅག་བཀྲེན་ལྡན་ལོངས་སྤྱོད་མཆོག་ཐོབ་ཕྱིར༔ ཁ་ཏོག་ལྔ་ལྡན་ན་བཟའ་གསོལ་བར་བགྱི༔ ཨོཾ་བཛྲ་ཝསྟྲ་པཱུ་ཛི་ཏེ་ཨ་ཧཱུྃ༔ དེ་ནས་གཙང་ལྡན་དཀར་མངར་གྱི༔ བཤོས་གཙང་འབུལ་བ་འབྲུ་གསུམ་གྱི༔ བྱིན་རླབས་སྔོན་སོང་འདི་བཞིན་ཕུལ༔ ཧྲཱིཿ རོ་བརྒྱ་ལྡན་པ་འཆི་མེད་ཟས་ལྟ་བུའི༔ བྲོ་བ་མཆོག་གིས་རྟག་ཏུ་འཚོ་གཞེས་ཤིང༔ ཏིང་འཛིན་ཟག་མེད་བཟའ་བས་དགྱེས་གྱུར་པ༔ རྒྱལ་མཆོག་ལྗགས་ལ་བཀྲེས་སྐོམ་མི་སྲིད་ཀྱང༔ འགྲོ་ཀུན་དབུལ་བས་ཉམས་ཐག་བསལ་སླད་དུ༔ བཤོས་གཙང་ལྷ་ཡི་ཞལ་ཟས་འབུལ་བར་བགྱི༔ ཨོཾ་བཛྲ་ནེ་ཝི་ཏྱེ་པཱུ་ཛ་ཨཱ༔ཧཱུྃ༔ དེ་ནས་རྒྱལ་སྲིད་སྣ་བདུན་འབུལ་བ་ནི༔ ཧྲཱིཿ མཁའ་ལ་འགྲོ་ཞིང་རྩིབས་ལྡན་གསེར་འཁོར་མཆོག༔ མཆོག་ཏུ་མཛེས་སྡུག་བག་ཡོད་བཙུན་མོའི་རྒྱལ༔ རྒྱལ་པོའི་བཀའ་མཐུན་བློ་མཆོག་ཁྱིམ་བདག་དཔལ༔ དཔལ་ལྡན་མྱུར་བའི་ཤུགས་འཆང་ཅང་ཤེས་རྟ༔ སྟོབས་ལྡན་ལྷུན་ཆགས་བརྟན་བརྗིད་གླང་པོ་ཆེ༔ བདུད་དགྲའི་གཡུལ་ལས་རྣམ་རྒྱལ་དམག་དཔོན་མཆོག༔ ཡིད་བཞིན་འདོད་རྒུའི་དཔལ་སྟེར་རིན་པོ་ཆེ༔ མཚུངས་མེད་རྒྱལ་བ་ཆོས་ཀྱི་འཁོར་ལོས་བསྒྱུར༔ སྲིད་ཞིའི་བདེ་ལེགས་འབྱུང་གནས་འཕགས་མཆོག་ལ༔ འགྲོ་ཀུན་བསོད་ནམས་རྒྱ་མཚོར་དབང་བསྒྱུར་ཕྱིར༔ གུས་པས་འབུལ་ལོ་བརྩེ་བས་བཞེས་སུ་གསོལ༔ ཨོཾ་སཔྟ་མ་ཧཱ་རཏྣ་པཱུ་ཛི་ཏེ་ཨཱ༔ཧཱུྃ༔ རྟགས་མཆོག་བརྒྱད་ཀྱི་མངའ་དབུལ་ནི༔ ཧྲཱིཿ བཀྲ་ཤིས་གདུགས་མཆོག་ཚ་བའི་གདུང་བ་སེལ༔ བཀྲ་ཤིས་གསེར་ཉ་སྒྲིབ་བྲལ་མིག་དང་ལྡན༔ བཀྲ་ཤིས་གཏེར་བུམ་དགོས་འདོད་ཀུན་འབྱུང་དཔལ༔ བཀྲ་ཤིས་པདྨ་བསུང་ཞིམ་འདབ་སྟོང་རྒྱས༔ བཀྲ་ཤིས་དུང་དཀར་སྙན་པའི་སྒྲ་དབྱངས་སྒྲོགས༔ བཀྲ་ཤིས་དཔལ་བེའུ་ཟབ་གསང་གཏེར་གྱི་མཛོད༔ བཀྲ་ཤིས་རྒྱལ་མཚན་མི་ནུབ་བསྟན་པའི་བརྡ༔ བཀྲ་ཤིས་འཁོར་ལོ་རྩིབས་སྟོང་མུ་ཁྱུད་ལྡན༔ དུས་གསུམ་བཀྲ་ཤིས་ཀུན་འབྱུང་འཕགས་མཆོག་ལ༔ འགྲོ་ཀུན་མི་ཤིས་མཚན་མ་ཉེར་ཞིའི་ཕྱིར༔ བསོད་ནམས་བསགས་སླད་འབུལ་ལོ་བཞེས་སུ་གསོལ༔ ཨོཾ་མངྒ་ལ་བྷ་ག་ཨཥྚ་པཱུ་ཛི་ཏེ་ཨཱ༔ཧཱུྃ༔ རྫས་མཆོག་བརྒྱད་པོ་དབུལ་བ་ནི༔ ཧྲཱིཿ ཡུངས་དཀར་བགེགས་འཇོམས་གསང་སྔགས་རྒྱལ་བའི་རྫས༔ ཤིང་མཆོག་བི་ཛ་བིལ་བ་དཔལ་འབྱུང་རྫས༔ སྔོ་ལྗང་ཡིད་འོང་ཀུ་ཤ་དག་བྱེད་རྫས༔ ལི་ཁྲི་དམར་པོ་དབང་སྡུད་དབང་གི་རྫས༔ ཁྱུ་མཆོག་མགྲིན་པའི་བདུད་རྩི་གྷི་ཝཾ་རྫས༔ མདོག་ལྡན་བཀྲེས་སྐོམ་ཀུན་སེལ་ཞོ་ཡི་རྫས༔ མུན་སེལ་གཟུགས་སྟོན་མཐོང་བྱེད་མེ་ལོང་རྫས༔ གཡས་འཁྱིལ་རིམ་ནད་ཀུན་འཇོམས་དུང་དཀར་རྫས༔ སྲིད་ན་མཚུངས་མེད་བསོད་ནམས་གཏེར་མཆོག་ལ༔ གུས་པས་ཚོགས་གཉིས་རྫོགས་སླད་དབུལ་བར་བགྱི༔ ཨོཾ་མངྒ་ལ་ཤྲཱི་པཱུ་ཛི་ཏེ་ཨཱ༔ཧཱུྃ༔ གཞན་ཡང་རིན་ཆེན་རྒྱན་རྣམས་དང༔ ཉེར་སྤྱོད་རྣམ་ལྔ་འབུལ་བ་ནི༔ ཧྲཱིཿ ནོར་བུའི་པྲོག་ཞུ་གསེར་གཡུའི་སྙན་རྒྱན་མཛེས༔ རིན་ཆེན་གདུ་བུ་སྣ་ཚོགས་སེ་མོ་དོ༔ མགུལ་རྒྱན་དོ་ཤལ་རིན་ཐང་མཐའ་ཡས་པ༔ ལྷ་ཀླུའི་དབང་པོས་འགྲན་དུ་མེད་པ་ཡི༔ ཡོན་ཏན་ཀུན་རྫོགས་འཕགས་པ་མཆོག་ལ་འབུལ༔ འཕགས་ནོར་བདུན་སོགས་ལེགས་རྒུའི་དཔལ་ཐོབ་ཤོག༔ ཨོཾ་རཏྣ་ཨ་ལངྐ་ར་པཱུ་ཛི་ཏེ་ཨཱ༔ཧཱུྃ༔ ཧྲཱིཿ ངོ་མཚར་མཛེས་སྡུག་ཡིད་འོང་འདབ་སྟོང་བཞད༔ བསུང་ཞིམ་དྲི་སོགས་མཁོ་བའི་ཡོ་བྱད་རྫས༔ དབང་པོའི་སྐྱོན་སྤངས་སྤྱན་ལྔའི་བདག་ཉིད་ལ༔ གུས་པས་འབུལ་ལོ་བརྩེ་བས་དགྱེས་བཞེས་ནས༔ བདག་སོགས་མངོན་ཤེས་དྲུག་པའི་དཔལ་ཐོབ་ཤོག༔ ཨོཾ་བཛྲ་པུཥྤེ་དྷུཔྤེ་སོགས་ནས། ཤཔྟ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱ༔ཧཱུྃ༔ གླིང་བཞི་བཀོད་ལེགས་མཎྚལ་དབུལ་བ་ནི༔ ཧྲཱིཿ གསེར་གྱི་ས་གཞི་གཙང་བྱེད་སྤོས་ཆུས་བྱུགས༔ གླིང་བཞི་རི་རབ་ཉི་ཟླ་བྱེ་བ་བརྒྱ༔ ལྷ་མིའི་དཔལ་འབྱོར་སྲིད་པའི་ཡོ་བྱད་རྫས༔ མ་ལུས་ཐུགས་རྗེ་ཆེན་པོའི་ལྷ་ལ་འབུལ༔ འགྲོ་ཀུན་ཁམས་གསུམ་རྒྱལ་པོ་མྱུར་ཐོབ་ཤོག༔ ཨོཾ་མཎྚལ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཨཱ༔ཧཱུྃ༔ དེ་ནས་བཟླས་པ་བྱ་བ་ནི༔ ཐོག་མར་བགྲང་ཕྲེང་བྱིན་རླབས་ནི༔ ཨོཾ་ཨཱ༔ཧཱུྃ༔ བགྲང་ཕྲེང་མི་དམིགས་སྟོང་པའི་ངང༔ ཕྲེང་ཐག་ལུང་རྟོགས་དམ་པའི་ཆོས༔ ཕྲེང་བ་འཕགས་ཚོགས་འདུས་པའི་སྡེ༔ མདོ་འཛིན་འཕགས་པའི་ལྷ་ཚོགས་ལ༔ སངས་རྒྱས་བྱང་སེམས་བྱིན་རླབས་རྫོགས༔ མེ་ཏོག་འཐོར་ཞིང་དབྱངས་གསལ་དང༔ ཡིག་དྲུག་ཉེར་གཅིག་དེ་བཞིན་དུ༔ ཨོཾ་རུ་ཙི་ར་མ་ཎ་པྲ་ཝརྟ་ན་ཡེ་སྭཱཧཱ༔ མཐར་ནི་ཡེ་དྷར་ལན་བདུན་བརྗོད༔ དཀོན་མཆོག་གསུམ་དང་དབྱེར་མེད་བསམ༔ མོས་གུས་བསྐྱེད་ཅིང་བཟླས་དམིགས་ནི༔ མདུན་བསྐྱེད་བཅུ་གཅིག་ཞལ་གྱི་ཐུགས་ཀ་རུ༔ ཡེ་ཤེས་སེམས་དཔའ་འཕགས་མཆོག་ནམ་མཁའི་རྒྱལ༔ རྒྱན་སྤང་དམར་གསལ་ཞལ་གཅིག་ཕྱག་གཉིས་པ༔ མཆོག་སྦྱིན་པད་དཀར་ཡུ་བ་ཐུགས་ཀར་འཛིན༔ དེ་ཡི་ཐུགས་ཀར་པདྨ་དཀར་པོའི་དཀྱིལ༔ ཟླ་སྟེང་དམ་ཚིག་སེམས་དཔའ་ཧྲཱིཿདཀར་མཐར༔ ཆོས་བསྐོར་ཚུལ་དུ་གཟུངས་རིང་ཁ་ཏོག་ལྔ༔ འོད་ཟེར་འཕྲོ་འདུས་སེམས་ཅན་ལས་ཉོན་སྦྱངས༔ ཀུན་ཀྱང་འཕགས་པའི་གསང་གསུམ་མངོན་གྱུར་བསམ༔ ཐོག་མར་ཡིག་དྲུག་སྟོང་རྩ་བཟླ༔ དེ་ནས་གཟུངས་རིང་སུམ་བརྒྱ་དང༔ ཉེར་བདུན་བཟླ་ཞིང་ཐུན་གྱི་མཐར༔ དེ་ནས་བདག་མདུན་ཕྱག་སོར་ལས༔ བདུད་རྩིའི་རྒྱུན་བབས་ཁྲུས་བུམ་གང༔ སླར་ཡང་ཡིག་དྲུག་གཟུངས་རིང་ཐུང༔ ཨ་བྷི་ཥིཉྩ་སྔགས་ཤམ་བཏགས༔ ཅི་མང་བཟླ་ཞིང་བདག་བསྐྱེད་ནི༔ ཧྲཱིཿར་གྱུར་མདུན་བསྐྱེད་ཐུགས་ཀར་བསྟིམས༔ འཕགས་པའི་བསྟོད་པ་རྒྱས་བསྡུས་ནི༔ ཉི་ཤུ་རྩ་གཅིག་བརྗོད་པར་བྱ༔ དེ་ནས་འདོད་དོན་གསོལ་གདབ་ནི༔ ཧྲཱིཿ ཐུགས་རྗེའི་བདག་ཉིད་འཕགས་པ་སྤྱན་རས་གཟིགས༔ འཁོར་དང་བཅས་པ་བདག་ལ་དགོངས་སུ་གསོལ༔ བདག་དང་འགྲོ་ཀུན་བྱང་ཆུབ་མ་ཐོབ་པར༔ ཁྱེད་ཀྱི་བརྩེ་ཆེན་ཐུགས་ཀྱིས་རྗེས་བཟུང་ནས༔ སྡུག་བསྔལ་ཉམས་ཐག་གནས་སྐབས་ཐམས་ཅད་དུ༔ མགོན་སྐྱབས་དཔུང་གཉེན་དམ་པ་མཛད་དུ་གསོལ༔ ལས་དང་ཉོན་མོངས་བག་ཆགས་བཙོན་ར་རུ༔ དབང་མེད་བདག་ལྟས་རྟག་ཏུ་ཞུགས་པའི་ཚེ༔ ཐབས་མཁས་ཐུགས་རྗེའི་ཕྱག་གིས་ཉེར་དྲངས་ནས༔ ས་བཅུའི་རྒྱལ་སར་དབུགས་དབྱུང་མཛད་དུ་གསོལ༔ སྙིགས་དུས་འདྲེ་གདོན་མི་ཡི་ཁོག་ཞུགས་ནས༔ ཆོས་མིན་སྡིག་པའི་ལས་ལ་རྒྱུན་དུ་སྤྱོད༔ ནད་མུག་མཚོན་འཁྲུགས་འཇིགས་པས་ཉེར་གདུང་ཚེ༔ རྒྱུ་འབྲས་དགེ་བའི་ལམ་ལ་བསྒྱུར་དུ་གསོལ༔ རྒྱལ་བའི་བསྟན་དང་བསྟན་འཛིན་འདུས་པའི་སྡེ༔ མི་ཉམས་ཐུགས་མཐུན་ཡོན་སྦྱོར་ལྟོས་བཅས་ཀུན༔ འདི་ཕྱིར་བདེ་སྐྱིད་ཕུན་ཚོགས་དཔལ་ཡོན་ལ༔ མགོན་པོ་ཁྱོད་ཀྱིས་སྤྱོད་པར་མཛད་དུ་གསོལ༔ ཅེས་པས་གསོལ་བ་ལན་གསུམ་གདབ༔ གཏོར་མ་ཆ་ལྔ་བདུད་རྩིར་དམིགས༔ ནམ་མཁའ་མཛོད་ཀྱི་སྔགས་རྒྱས་བརླབས༔ དང་པོ་དཀོན་མཆོག་གསུམ་ལ་འབུལ༔ གཉིས་པ་གཟུངས་རིང་ལན་གསུམ་ཤམ༔ བྷ་ལིངྟ་བཏགས་འཕགས་པར་འབུལ༔ གསུམ་པ་ཆོས་སྐྱོང་བཞི་པ་ནི༔ གཞི་བདག་ལྔ་པ་བགེགས་རིགས་ལ༔ ཁ་འབར་མ་ཡི་སྔགས་ཀྱིས་བསྔོ༔ ཚིག་ཕྲད་བསྒྱུར་བ་རིག་པས་འཕྲུལ༔ རྗེས་ནི་ལྷ་ལ་ཁྲུས་གསོལ་ཞིང༔ དེ་ཡི་བུམ་ཆུ་བདག་གིས་བཏུང༔ ཧྲཱིཿ ཐུགས་རྗེའི་བདག་ཉིད་འཕགས་པའི་ཕྱག་སོར་ལས༔ ཟག་མེད་བདུད་རྩིའི་རྒྱུན་བབས་སྒྲིབ་གཉིས་སྦྱངས༔ སྐུ་གཉིས་དཔལ་ཐོབ་སྒོ་གསུམ་གནས་སུ་དག༔ མཆོག་གི་དངོས་གྲུབ་ཚེ་འདིར་ཐོབ་པར་ཤོག༔ ཡིག་དྲུག་སྔགས་ཀྱིས་ཁྲུས་བྱ་ཞིང༔ སྤྲོ་ན་ཕྱིན་དྲུག་ཁྲུས་སྔགས་སྦྱར༔ དེ་ནས་བསྐྱེད་པའི་མདུན་བསྐྱེད་ལྷ༔ རྟེན་ལ་བསྟིམས་སམ་གཤེགས་གསོལ་ནི༔ ཧྲཱིཿ ཇི་ལྟར་ནོར་བུ་རྒྱ་མཚོར་གཤེགས་བཞིན་དུ༔ བདག་ཅག་བསམ་པ་མཐར་ཕྱིན་ལྷག་པའི་ལྷ༔ རྫུ་འཕྲུལ་སྟོབས་ཀྱིས་རི་བོ་ཏ་ལར་གཤེགས༔ འགྲོ་བའི་དོན་དུ་སླར་ཡང་འབྱོན་པར་གསོལ༔ བཛྲ་མཱུཾ༔ དེ་ནས་བསྔོ་བས་རྒྱས་གདབ་ནི༔ ཧྲཱིཿ འཕགས་མཆོག་སྤྱན་རས་གཟིགས་ཀྱི་ཐུགས་བསྐྱེད་དང༔ བདག་ཅག་རྣམ་དཀར་བསགས་དང་གསོག་འགྱུར་ཀུན༔ འགྲོ་ཀུན་རྣམ་མཁྱེན་སངས་རྒྱས་ཐོབ་ཕྱིར་བསྔོ༔ མ་ལུས་ཕྱམ་གཅིག་གདོད་མའི་སར་འགོད་ཤོག༔ བཀྲ་ཤིས་གླུ་དབྱངས་བརྗོད་བཞིན་དུ༔ མེ་ཏོག་སིལ་མ་ཕྱོགས་ཀུན་འཐོར༔ ཧྲཱིཿ དྭངས་པའི་མཁའ་ལ་སྐྱོན་བྲལ་ཟླ་བ་ལྟར༔ དྲི་མེད་ཡོན་ཏན་ཀུན་ལྡན་སྤྱན་རས་གཟིགས༔ གང་གི་ཐུགས་བསྐྱེད་སྨོན་ལམ་ནུས་པའི་མཐུས༔ རྒྱལ་བསྟན་དར་ཞིང་རྒྱས་པའི་བཀྲ་ཤིས་ཤོག༔ འགྲོ་ཀུན་སྨིན་ཅིང་གྲོལ་བའི་བཀྲ་ཤིས་ཤོག༔ ནད་མུག་མཚོན་འཁྲུགས་ཞི་བའི་བཀྲ་ཤིས་ཤོག༔ འབྲེལ་ཚད་འགྲོ་ལ་ཕན་པའི་བཀྲ་ཤིས་ཤོག༔ དགེ་བཅུའི་དཔལ་ལ་སྤྱོད་པའི་བཀྲ་ཤིས་ཤོག༔ ཕྱོགས་རྣམས་ཀུན་ཏུ་ཕྱག་ན་པདྨོ་ཡི༔ མཚན་ཙམ་འཛིན་པའི་འགྲོ་བ་མ་ལུས་ཀུན༔ གནས་སྐབས་ཉེས་སྐྱོན་ཀུན་ལས་གྲོལ་བ་དང༔ མཐར་ཐུག་དོན་གཉིས་ལྷུན་གྲུབ་བཀྲ་ཤིས་ཤོག༔ ས་མ་ཡཱ༔ དེ་ལྟར་སྒྲིབ་སྦྱོང་ཟས་སྐོམ་རྒྱུན་བཅད་ནས༔ ཡེངས་མེད་སྒོ་གསུམ་བསྙུང་བར་གནས་པའི་ཐབས༔ དོན་ཡོད་ཞགས་པའི་རྒྱུད་ཀྱི་དགོངས་དོན་བཞིན༔ བདག་ཉིད་རྒྱ་གར་མཁས་པ་ཨོ་རྒྱན་རྗེས༔ ཐུགས་ཀྱི་གཟུངས་མ་ཡེ་ཤེས་མཚོ་རྒྱལ་སོགས༔ སྐལ་ལྡན་རྗེ་འབངས་གུས་ལྡན་ཡོངས་ལ་གདམས༔ ད་ལྟ་རྒྱ་བོད་མཁས་གྲུབ་རྒྱ་མཚོ་ཡིས༔ ཟབ་ཆོས་མདོ་སྔགས་ཉི་མ་བོད་དུ་ཤར༔ མ་འོངས་སྙིགས་དུས་སྡིག་པའི་རྒྱུན་འབྱམས་ནས༔ ལས་ཉོན་མུན་པའི་སྨག་ལ་འཁྱམས་པའི་ཚེ༔ ང་སྤྲུལ་འགའ་ཡིས་ཟབ་ཆོས་གཏེར་ཁ་འདོན༔ ལ་ལས་མི་འབྱིན་བཀའ་རྙིང་བསྟན་རྒྱུན་སྤེལ༔ ཁྱད་པར་མཚོ་རྒྱལ་ཁྱོད་ཀྱི་ཕྲིན་ལས་སྤྲུལ༔ དམན་པའི་ཚུལ་འཛིན་སྦས་པའི་གང་ཟག་གིས༔ དག་སྣང་གཏེར་ཁ་རྡོལ་བའི་ཆ་རྐྱེན་དུ༔ གདམས་པ་འདི་ཉིད་མི་བརྗེད་སྙིང་སྒྲོམ་སྦོས༔ དུས་བབས་འཕགས་པའི་སྤྲུལ་པས་ཉེར་བསྐུལ་ཚེ༔ འདི་འཕྲད་སྐྱེས་བུའི་ཚེ་འཕྲང་གེགས་བསལ་ནས༔ འགྲོ་མང་ཐར་བའི་ལམ་ལ་འགོད་པར་ཤོག༔ གུ་ཧྱ༔ བརྡ་ཐིམ༔