གཤིན་ཆོག་ཐར་ལམ་ཐེམ་སྐས།

༄༅། བྲགམབྷཱིརཱརྱསྱཙིཏྟབིདྷིཥུཿ ཨཱཛཿཀལྤམོཀྵཔརིསོཔཱནཾབིཧརཏིསྨཿ

༄༅། བྲ ག མ བྷཱི རཱ རྱ སྱ ཙི ཏྟ བི དྷི ཥུཿ ཨཱ ཛཿ ཀལྤ མོཀྵ པརི སོཔཱ ནཾབི ཧ ར ཏིསྨཿ

༄༅། ཡང་ཟབ་འཕགས་པའི་ཐུགས་སྒྲུབ་ལས༔ གཤིན་ཆོག་ཐར་ལམ་ཐེམ་སྐས་བཞུགས༔

མཐའ་ཡས་རྒྱལ་བ་ཐམས་ཅད་ཀྱི༔ ཐུགས་རྗེའི་གཏེར་མཛོད་འགྲོ་བའི་མགོན༔ བླ་མ་འཕགས་པ་སྤྱན་རས་གཟིགས༔ ཐུགས་དམ་ལྷ་ལ་ཕྱག་འཚལ་ལོ༔ གང་དེའི་ཕྲིན་ལས་ཆོ་ག་ཡི༔ གཤིན་ཆོག་ཐར་ལམ་ཐེམ་སྐས་བསྟན༔ འདི་ལ་སྦྱོར་དངོས་རྗེས་དང་གསུམ༔ སེམས་བསྐྱེད་ལྡན་པས་དང་དུ་ལོངས༔ ས་མ་ཡཱ༔ དང་པོ་དཀྱིལ་འཁོར་གཞུང་བཞིན་ལ༔ གཤིན་པོ་རྗེས་སུ་འཛིན་པའི་ཐབས༔ ཚེ་འདས་གཟུགས་དང་མིང་བྱང་ལ༔ བླ་གཡུ་མེ་ལོང་དར་གོས་བརྒྱན༔ བགེགས་སྦྱངས་ལན་ཆགས་གཏོར་མ་དང༔ སྡིག་སྦྱངས་ཏིལ་དང་ཁྲུས་ཆབ་བཤམས༔ གཞུང་གི་བཟླས་པ་ཚུལ་བཞིན་བྱ༔ ལས་བུམ་བསྒྲུབ་ཅིང་མཆོད་བསྟོད་དང༔ ལོངས་སྤྱོད་ཚོགས་ཀྱི་འཁོར་ལོ་བསྐོར༔ བཀའ་གཏེར་སྲུང་མར་གཏོར་འབུལ་སོགས༔ བདག་འཇུག་རྒྱས་བསྡུས་སྔོན་དུ་སོང༔ གཉིས་པ་དངོས་གཞིར་འཇུག་པ་ལ༔ ཕྱི་ནང་སྣོད་བཅུད་འཁོར་འདས་ཆོས༔ སྭ་བྷ་ཝ་ཡི་སྔགས་ཀྱིས་སྦྱངས༔ རང་ཉིད་ཐུགས་རྗེ་ཆེན་པོར་བསྐྱེད༔ ཚེ་ལས་འདས་པའི་མིང་བྱང་ནི༔ བསྐྱེད་འགུག་ལ་སོགས་འདི་བཞིན་བརྗོད༔ ཧྲཱིཿ མི་དམིགས་སྤྲོས་བྲལ་སྟོང་པའི་ངང་ཉིད་ལས༔ པད་ཟླའི་སྟེང་དུ་ནྲྀ་ལས་ཚེ་འདས་ཀྱི༔ མིང་བྱང་དངོས་གཟུགས་ཇི་ལྟ་བ་བཞིན་ལས༔ དད་གུས་ཐལ་མོ་སྦྱར་ཏེ་འདིར་འཁོད་གྱུར༔ ༧ བདག་ཉིད་འཕགས་པའི་ཐུགས་ཀའི་ཧྲཱིཿཡིག་ལས། །འོད་ཟེར་དཀར་པོ་ཟླ་བ་ཞུན་མ་ལྟར། །འཕྲོས་པས་འགྲོ་དྲུག་གནས་ནས་ཚེ་འདས་ཀྱི། །རྣམ་ཤེས་བཀུགས་ནས་རྟེན་དང་གཉིས་མེད་གྱུར། །ཅེས་བསམ་བདེན་བརྗོད་འགུག་གཞུག་འདི་ལྟར་རོ༔ ན་མོ༔ རྐང་གཉིས་གཙོ་བོ་རྫོགས་པའི་སངས་རྒྱས་དང༔ འདོད་ཆགས་བྲལ་བ་ཞི་གྱུར་དམ་པའི་ཆོས༔ ཚོགས་གཉིས་མཐར་སོན་འཕགས་པའི་དགེ་འདུན་དེ༔ དཀོན་མཆོག་གསུམ་དང་རྩ་བརྒྱུད་བླ་མའི་ཚོགས༔ ཡི་དམ་ཐུགས་རྗེ་ཆེན་པོ་སྤྱན་རས་གཟིགས༔ མཁའ་འགྲོ་ཆོས་སྐྱོང་དམ་ཅན་རྒྱ་མཚོ་དང༔ ཆོས་ཉིད་རྣམ་དག་ལྷག་བསམ་དགེ་བའི་སྟོབས༔ བསླུ་མེད་རྒྱུ་འབྲས་ནུས་པའི་བདེན་པའི་བདེན་མཐུ་ཡིས༔ འཇིག་རྟེན་འདི་ནས་བར་དོར་འཁྱམ་པའི་འགྲོ༔ མིང་བྱང་གཟུགས་ལ་བཀོད་པའི་ཚེ་འདས་ཀྱི༔ རྣམ་ཤེས་འཇིག་རྟེན་བདུན་པོ་གར་གནས་ཀྱང༔ དམིགས་རྟེན་མཚན་བྱང་འདི་ལ་གཉིས་མེད་ཁུག༔ བསླུ་མེད་དཀོན་མཆོག་ཐུགས་རྗེའི་བདེན་པའི་མཐུས༔ རྒྱུ་འབྲས་ཆོས་ལ་ཉན་པའི་སྐལ་ལྡན་གྱུར༔ ནྲྀ་ཨ་ཀརྴ་ཡ་ཛ་ཛ༔ ཛཿཧཱུྃ་བཾ་ཧོ༔ ཅེས་པ་ལན་བདུན་ལྔ་གསུམ་སྐབས་བསྟུན་བརྗོད༔ ཚེ་འདས་ཉིད་ཀྱིས་བག་ཕེབ་ཉན་པར་བསམ༔ དེ་ནས་བདེན་བཞིའི་ཆོས་བཤད་འདི་ལྟར་བརྗོད༔ ཀྱཻ་མ་ཉོན་ཅིག་ཚེ་འདས་རིགས་ཀྱི་བུ༔ འཛམ་གླིང་འདིར་སྐྱེས་དལ་འབྱོར་མི་ལུས་ཐོབ༔ རྒྱུ་འབྲས་ཆོས་ཀྱི་མཚན་ཉིད་ཐོས་ལགས་ཀྱང༔ ཚུལ་བཞིན་མ་བསྒྲུབ་གློ་བུར་འཆི་བས་བཅོམ༔ འཇིགས་རུང་ཆ་མེད་བར་དོའི་གནས་སུ་འཁྱམས༔ རྣམ་ཤེས་རྟེན་མེད་བྱ་སྒྲོ་རླུང་ཁྱེར་བཞིན༔ མི་བཟད་གཏུམ་པ་གཤིན་རྗེའི་གྲོགས་དང་འགྲོགས༔ དགེ་སྡིག་རྒྱུ་འབྲས་མེ་ལོང་གཟུགས་བཞིན་གསལ༔ ལས་ཀྱི་རྣམ་སྨིན་རང་ཉིད་གཅིག་པུས་མྱོང་༔ སྐྱབས་མགོན་ཟླ་གྲོགས་གཅིག་ཀྱང་མ་མཆིས་པས༔ གཅེས་པའི་རྒྱུ་ལུས་བརྩེ་བའི་གཉེན་དང་གྲོགས༔ བསགས་པའི་ནོར་རྫས་ཐམས་ཅད་ཤུལ་དུ་ལུས༔ བག་ཆགས་ངན་པའི་དབང་གིས་ཞེན་ཅིང་ཆགས༔ སྡུག་བསྔལ་དྲག་པོས་མནར་བའི་ཉམས་ཐག་ཁྱོད༔ བསླུ་མེད་དཀོན་མཆོག་གསུམ་ལ་སྐྱབས་སུ་སོང༔ མི་ཡུལ་དབང་ཆོས་འབྲེལ་བའི་བླ་མ་དང༔ ད་ལྟའི་འདྲེན་པ་སངས་རྒྱས་དངོས་སུ་བསྒོམ༔ སྐྱོན་མཐོང་ལོག་ལྟ་སྤུ་རྩེ་ཙམ་ཡང་སྤོངས༔ སྔོན་གྱི་འབྲེལ་བའི་ཡི་དམ་ལྷ་མཆོག་དང༔ དགེ་བའི་བྱ་བ་གང་བསགས་དྲན་པར་གྱིས༔ སྔར་བྱས་སྡིག་རྣམས་འགྱོད་པ་དྲག་པོས་བཤགས༔ ཕྱིན་ཆད་སྡོམ་སེམས་བརྟན་པོ་ཡིད་ལ་ཟུངས༔ བར་དོའི་སྐབས་འདིར་སྐྱེ་གནས་ངན་པ་རུ༔ དབང་མེད་ལས་ཀྱི་རླུང་གིས་བདས་པ་ནའང༔ ཕ་མའི་འདུ་འཕྲོད་བླ་མ་ཡབ་ཡུམ་བསྒོམ༔ རང་ཉིད་འཕགས་པའི་ཐུགས་སྲོག་ཡི་གེ་ཧྲཱིཿ མངོན་བྱང་ལྔ་དང་ལྡན་པའི་ཏིང་འཛིན་གྱིས༔ བསྟན་འགྲོའི་དོན་ལ་སེམས་བསྐྱེད་ཞུམ་མེད་ངང༔ དོན་གཉིས་འགྲུབ་པའི་སྤྲུལ་པའི་སྐུ་མཆོག་ཏུ༔ ངེས་པར་བྱ་སྙམ་ཡིད་ཀྱི་འདུན་པས་ཟུངས༔ ཅེས་པས་རྒྱུ་འབྲས་ཆོས་ཚུལ་མདོར་བསྡུས་བཤད༔ འོན་ཀྱང་གཤེད་མའི་དབང་དུ་གྱུར་པ་ལ༔ ཆོས་ལ་ཉན་དང་དད་འདུན་དགེ་བའི་ལས༔ བརྗེད་དང་ལོག་ལྟས་བསླད་པའི་བར་ཆད་འབྱུང༔ དེ་ཕྱིར་བགེགས་ལ་གཏོར་མ་འདི་བཞིན་བསྔོ༔ བདེ་གཤེགས་རྒྱལ་བ་རྣམས་ཀྱི༴སོགས། རཾ་ཡཾ་ཁཾ་གིས་གླུད་གཏོར་བསྲེགས་ཤིང་བཀྲུས༔ འབྲུ་གསུམ་སྔགས་དང་ནམ་མཁའ་མཛོད་ཀྱི་རྒྱ༔ སྔགས་དང་བཅས་པས་འདོད་ལྔའི་ལོངས་སྤྱོད་ཀྱིས༔ ལན་ཆགས་མགྲོན་ཀུན་དགྱེས་ཤིང་ཚིམ་པར་བསམ༔ དེ་ནས་བཀའ་བསྒོ་བགེགས་བསྐྲད་འདི་བཞིན་ནོ༔ ཧཱུྃ་ཧྲཱིཿ ང་ནི་བྱམས་མགོན་ཐུགས་རྗེའི་བདག་ཉིད་ཅན༔ ཚེ་ལས་འདས་པའི་ཐར་བའི་ལམ་སྟོན་ལ༔ བར་ཆད་བྱེད་པའི་གཤེད་མ་བགེགས་ཀྱི་རིགས༔ ཐམས་ཅད་གནས་འདིར་འདུས་ལ་གཏོར་མ་ལོངས༔ ཚེ་འདས་འདི་ཡི་ལུས་ངག་ཡིད་གསུམ་དང༔ ཡང་དག་ལམ་ལ་གནོད་འཚེའི་བསམ་སྦྱོར་སྤོངས༔ འདི་རུ་མ་འདུག་རྒྱ་མཚོའི་ཕ་མཐར་དེངས༔ གལ་ཏེ་བཀའ་ལས་འདས་ཤིང་འདིར་འཁོད་ན༔ བདག་ཉིད་ཐུགས་ལས་དབང་ཆེན་ཁྲོ་བོའི་རྒྱལ༔ ཁྲོ་མཚོན་མེ་དཔུང་དྲག་སྔགས་སྒྲ་དང་བཅས༔ ཁྱེད་རྣམས་རྡུལ་དུ་བརླག་པར་གདོན་མི་ཟ༔ གནོད་མཛེས་སྔགས་དང་དྲག་སྔགས་ཡུངས་ཐུན་བརྡེག༔ ལྟ་བ་སྟོང་ཉིད་རྟོགས་པའི་གདེངས་དང་བཅས༔ བསྲུང་བའི་འཁོར་ལོས་གོ་བསྒོ་འདི་སྐད་དོ༔ ཧཱུྃ་ཧྲཱིཿ ལོག་རྟོག་བགེགས་རིགས་རྒྱ་མཚོའི་ཕ་མཐར་བསྐྲད༔ ཚེ་འདས་སྒོ་གསུམ་ལྷ་སྔགས་ཏིང་འཛིན་གྱི༔ བསྲུང་བའི་གོ་ཆ་གཞོམ་བྲལ་རྡོ་རྗེའི་ཆོས༔ འགྱུར་མེད་ནམ་མཁའི་རང་བཞིན་ཉིད་དུ་གྱུར༔ ཨོཾ་བྷྲུཾ་བཛྲ་རཀྵ་རཀྵ་ཧཱུྃ༔ དེ་ནས་མདུན་དུ་སྡིག་པ་སྦྱངས་བའི་ཆས༔ ཏིལ་དང་མེ་ཆུ་བཤམས་ལ་འདི་སྐད་དོ༔ ཧཱུྃ་ཧྲཱིཿ ཚེ་ལས་འདས་པའི་འཁོར་བ་ཐོག་མེད་ནས༔ ལུས་ངག་ཡིད་ཀྱིས་བསགས་པའི་སྡིག་པ་རྣམས༔ སྙིང་ཀར་ཡི་གེ་ཀཾ་ཡིག་ནག་པོར་གྱུར༔ བདག་ཉིད་འཕགས་པའི་ཐུགས་ལས་འོད་ཟེར་ནི༔ གློག་ཞགས་ལྟ་བུར་མྱུར་བའི་ཤུགས་འཕྲོས་ཏེ༔ སྦུར་མ་རླུང་གིས་དེད་པ་ཇི་བཞིན་དུ༔ སྣ་བུག་གཡོན་ནས་མདུན་གྱི་ཏིལ་ལ་ཐིམ༔ མདུན་གྱི་མེ་ཉིད་རྡོ་རྗེ་མཁའ་འགྲོ་མ༔ སྔོན་མོ་ཤིན་ཏུ་ཁྲོས་པའི་ཞལ་གདང་བའི༔ ལྗགས་ལས་མེ་ཡི་ཚྭ་ཚྭ་རབ་ཏུ་འཁྲུགས༔ ཏིལ་རྣམས་སྲོག་ཆགས་སྡིག་པའི་གཟུགས་གྱུར་ནས༔ ཞལ་དུ་གསོལ་བས་བསྲེགས་ཤིང་སྟོང་པར་སྦྱངས༔ མེ་ཡི་མཁའ་འགྲོ་འོད་དུ་ཞུ་བ་ལས༔ དག་བྱེད་ཆུ་ཡི་ལྷ་མོའི་དབྱིངས་སུ་ཐིམ༔ དེ་ཡང་དམིགས་མེད་སྟོང་པ་ཆེན་པོར་གྱུར༔ ཨོཾ་མ་ཎི་པདྨེ་ཧཱུྃ༔ སརྦ་པ་པཾ་ཛྭ་ལ་རཾ་ཤུདྡྷེ་ཤུདྡྷེ་ཨ་ཨ་སྭཱ་ཧཱ༔ ཅེས་པ་ཡིག་དྲུག་དང་བཅས་བཟླས༔ དེ་ནས་ཁྲུས་ཀྱིས་སྦྱངས་པ་ལ༔ ཐོག་མར་རྟེན་གྱི་གཟུགས་བརྙན་ནི༔ མེ་ལོང་ངོས་ལ་འཆར་བཅུག་ཏེ༔ ཁྲུས་ཁང་བསྐྱེད་པ་སྔོན་སོང་ནས༔ ལྷ་ལ་ཁྲུས་གསོལ་འདི་བཞིན་བརྗོད༔ ཧྲཱིཿ མཉམ་མེད་སྟོན་པ་རྫོགས་པའི་སངས་རྒྱས་ལ༔ ཚངས་དང་དབང་པོས་ཡན་ལག་བརྒྱད་ལྡན་ཆུས༔ འགྲོ་བའི་སྒྲིབ་གཉིས་སྦྱང་ཕྱིར་ཁྲུས་གསོལ་ལྟར༔ གཙང་དྭངས་སྔགས་ཀྱིས་བྱིན་རླབས་ཁྲུས་ཆབ་འདིས༔ འཕགས་པ་ཐུགས་རྗེ་ཆེན་པོའི་ལྷ་ཚོགས་དང༔ མཆོད་འོས་དཀོན་མཆོག་དངོས་དང་གཟུགས་བརྙན་ལ༔ དད་དང་གུས་པས་ཁྲུས་གསོལ་བགྱིས་པ་ཡིས༔ ཚེ་འདས་སྒོ་གསུམ་སྒྲིབ་པ་དག་གྱུར་ཅིག༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥི་ག་ཏེ་ས་མ་ཡཱ་ཤྲཱི་ཡེ་ཧཱུྃ༔ དེ་ནས་ན་བཟའ་འབུལ་བ་སོགས༔ གཞན་ལས་བྱུང་བ་བཞིན་དུ་བྱ༔ ལྷ་རྣམས་ཕ་རོལ་ཕྱིན་དྲུག་གིས༔ དྲི་ཡིས་བགོས་པའི་ཁྲུས་ཆབ་དེས༔ ཚེ་འདས་མིང་བྱང་གཟུགས་བརྙན་ལ༔ བཀྲུ་བཞིན་བདེན་པའི་ཚིག་འདི་བརྗོད༔ ཧྲཱིཿ རྫོགས་སངས་རྒྱས་དང་ཞི་གྱུར་དམ་པའི་ཆོས༔ བསླུ་མེད་འཕགས་པའི་དགེ་འདུན་རྣམ་པ་གསུམ༔ སེར་སྣའི་སྐྱོན་བྲལ་སྦྱིན་པའི་ཕ་རོལ་ཕྱིན༔ འཆལ་བའི་སྒྲིབ་བྲལ་ཚུལ་ཁྲིམས་ཕ་རོལ་ཕྱིན༔ མི་འཁྲུགས་དགེ་བ་བཟོད་པའི་ནུས་མཐུ་ལྡན༔ ལེ་ལོའི་སྐྱོན་སྤང་བརྩོན་འགྲུས་ཤུགས་ཀྱིས་སྤྱོད༔ ཏིང་འཛིན་རྩེ་གཅིག་སེམས་ལ་རང་དབང་ཐོབ༔ མཐའ་གཉིས་སྤངས་པའི་ཤེས་རབ་མཐར་སོན་པས༔ ཇི་ལྟར་ས་ལམ་བསྒྲོད་པ་དེ་བཞིན་དུ༔ ཚེ་འདས་ཁྱོད་ཀྱང་ཐར་བའི་ལམ་མཆོག་དེར༔ ཉོན་མོངས་དྲུག་སྤངས་ཕ་རོལ་ཕྱིན་དྲུག་རྫོགས༔ རྟག་ཏུ་དགེ་བཅུའི་དཔལ་ལ་ལོངས་སྤྱོད་ཕྱིར༔ ཟག་མེད་གཙང་མའི་ཁྲུས་ཆབ་འདི་གསོལ་བས༔ སྒྲིབ་དག་དབང་བཞིའི་སྣོད་དུ་འགྱུར་བར་ཤོག༔ དེ་རྗེས་ཡི་གེ་བརྒྱ་པ་དང༔ རང་སྔགས་ཡིག་དྲུག་གཟུངས་རིང་སོགས༔ དག་པར་བརྗོད་བཞིན་ཁྲུས་ཀྱིས་བཀྲུ༔ དེ་ནས་ས་ཆུ་མེ་རླུང་གིས༔ བྲབ་བཞིན་སྦྱངས་བའི་ཚིག་འདི་བརྗོད༔ ཧྲཱིཿ ངན་སོང་རྒྱུ་རྐྱེན་ཉོན་མོངས་ཞེ་སྡང་ལས༔ རྣམ་པར་བསྐྱེད་པའི་ཚེ་འདས་སྒྲིབ་སྦྱངས་ཕྱིར༔ ཁོང་ཁྲོའི་རྟོག་ཚོགས་འབྱུང་བ་ས་ལ་ཐིམ༔ སངས་རྒྱས་སྤྱན་མའི་ནུས་མཐུས་དུག་མེད་ཤོག༔ ལཾ་ཤུདྡྷེ་ཤུདྡྷེ་ཡེ་སྭཱཧཱ༔ ཡི་གེ་དྲུག་མའི་གཤམ་དུ་གདག༔ ཧྲཱིཿ ཡི་དྭགས་བཀྲེས་སྐོམ་རྒྱུ་རྐྱེན་སེར་སྣའི་མཐུས༔ ཚེ་འདས་སྒོ་གསུམ་བསྡམས་པའི་ཉེས་སྐྱོན་ཀུན༔ དག་བྱེད་འབྱུང་བ་ཆུ་ཡི་ཀློང་དུ་ཐིམ༔ མ་མ་ཀི་ཡི་བདེན་པས་དུག་མེད་ཤོག༔ བཾ་ཤུདྡྷེ་ཤུདྡྷེ་ཡེ་སྭཱཧཱ༔ ཡི་གེ་དྲུག་མའི་གཤམ་དུ་གདག༔ ཧྲཱིཿ གཏི་མུག་རྨོངས་པས་དུད་འགྲོར་འཁྱམས་པའི་རྒྱུ༔ ལས་དང་བག་ཆགས་ཚེ་འདས་སྒོ་གསུམ་སྒྲིབ༔ མི་བཟད་བྱིན་ཟ་མེ་ཡི་ཀློང་དུ་ཐིམ༔ གོས་དཀར་ལྷ་མོའི་ནུས་མཐུས་དུག་མེད་ཤོག༔ རཾ་ཤུདྡྷེ་ཤུདྡྷེ་ཡེ་སྭཱཧཱ༔ ཡི་གེ་དྲུག་མའི་གཤམ་དུ་གདག༔ ཧྲཱིཿ འདོད་པའི་ལྷ་དང་ལྷ་མིན་མི་ལ་སོགས༔ འཁོར་བའི་རྒྱུ་རྐྱེན་ང་རྒྱལ་ཕྲག་ཏོག་གིས༔ ཚེ་འདས་བསླུས་པའི་ལས་སྒྲིབ་རླུང་ལ་ཐིམ༔ དམ་ཚིག་སྒྲོལ་མའི་བདེན་མཐུས་དུག་མེད་ཤོག༔ ཡཾ་ཤུདྡྷེ་ཤུདྡྷེ་ཡེ་སྭཱཧཱ༔ ཡི་གེ་དྲུག་མའི་གཤམ་དུ་གདག༔ ཧྲཱིཿ ལྷན་སྐྱེས་མ་རིག་གསུམ་གྱི་བག་ཆགས་མཐུས༔ ལས་དང་ཉོན་མོངས་འཁོར་བའི་རྒྱུ་རྐྱེན་ཀུན༔ རང་བཞིན་དམིགས་མེད་ནམ་མཁའི་ཀློང་དུ་ཐིམ༔ དབྱིངས་ཕྱུག་ཀུན་ཏུ་བཟང་མོའི་ནུས་མཐུ་ཡིས༔ ཚེ་འདས་སྒོ་གསུམ་དུག་ལྔའི་སྒྲིབ་བྲལ་ཤོག༔ ཨེ་ཧོ་ཤུདྡྷེ་ཤུདྡྷེ་ཡེ་སྭཱཧཱ༔ ཡི་གེ་དྲུག་མའི་གཤམ་དུ་གདག༔ དེ་ནས་ཚེ་ལས་འདས་པ་དེས༔ བླ་མ་དཀྱིལ་འཁོར་ལྷ་ཚོགས་ལ༔ གསོལ་བ་འདི་བཞིན་གདབ་པར་བསམ༔ ༧ དེ་ནས་ཁྱེད་རང་གི་མདུན་གྱི་ནམ་མཁར་འཇའ་འོད་འཁྱིལ་བའི་དབུས་ན་འཕགས་པ་སྤྱན་རས་གཟིགས་ནམ་མཁའི་རྒྱལ་པོ་ལ་སངས་རྒྱས་བྱང་སེམས་རྩ་གསུམ་རྒྱལ་བ་རབ་འབྱམས་ཀྱིས་བསྐོར་ནས་ཡོད་པའི་སྤྱན་སྔར་བདག་དང་འགྲོ་བ་རྣམས་འཁོར་བ་དང་ངན་སོང་གི་གནས་ནས་འདྲེན་པའི་ཆེད་དུ་གསོལ་བ་འདེབས་པ་འདིའི་རྗེས་ཟློས་མཛོད༔ ཀྱཻ་མ་དགོངས་ཤིག་འཕགས་པ་སྤྱན་རས་གཟིགས༔ སྐྱབས་མེད་བདག་འདྲ་ལས་དང་ཉོན་མོངས་མཐུས༔ བཟོད་དཀའ་རིགས་དྲུག་གནས་སུ་འཁྱམས་ལགས་ན༔ བརྩེ་ཆེན་ཐུགས་རྗེས་ཉེ་བར་དྲང་དུ་གསོལ༔ ལན་གསུམ་གསོལ་བ་བཏབ་རྗེས་སློབ་དཔོན་གྱིས༔ ཐུགས་བསྐྱེད་ཡེངས་མེད་ངང་ནས་འདི་བཞིན་བརྗོད༔ ཀྱཻ་ཧོ་དགོངས་ཤིག་ཚེ་འདས་རིགས་ཀྱི་བུ༔ རྩེ་གཅིག་ཐར་པའི་ལམ་ལ་བགྲོད་འདོད་ན༔ ཡེངས་མེད་གདམས་པ་འདི་ལྟར་ཉམས་སུ་ལོངས༔ ཡ་ཀི་སྲིད་པའི་རྩེ་མོ་མན་ཆད་ནས༔ མ་ཀི་མནར་མེད་དམྱལ་བ་ཡན་ཆད་ཀྱི༔ ཁམས་གསུམ་འཁོར་བའི་གནས་རིས་གར་སྐྱེས་ཀྱང༔ སྡུག་བསྔལ་གསུམ་གྱིས་མནར་བའི་མེ་འོབ་འདྲ༔ དེ་ལས་ཐར་འདོད་ངེས་འབྱུང་དྲག་པོའི་བློས༔ འཁོར་བའི་བདེ་སྐྱིད་དུག་ལྡན་ཟས་བཞིན་དུ༔ འཇོགས་ཤིང་སྐྲག་པས་བློ་སྣ་ལྡོག་པར་གྱིས༔ དེ་བཞིན་རང་ཉིད་གཅིག་པུ་མ་ཡིན་པར༔ ཐོག་མེད་དུས་ནས་དྲིན་གྱིས་བསྐྱེད་པའི་མ༔ ཚེ་རབས་བརྗེ་བས་ངོ་མ་ཤེས་པའི་འགྲོ༔ རྣམ་མཁྱེན་སངས་རྒྱས་གོ་འཕང་ལ་འགོད་ཕྱིར༔ བྱམས་དང་སྙིང་རྗེའི་སེམས་དང་འབྲལ་མེད་ཀྱིས༔ འདིར་སྣང་འཁོར་བ་མྱང་འདས་ཆོས་རྣམས་ཀུན༔ རང་བཞིན་སྟོང་ཉིད་ཆོས་སྐུའི་ཀློང་དུ་གཅིག༔ རྩལ་སྣང་འགགས་མེད་ལྷ་སྔགས་ཏིང་འཛིན་གྱིས༔ མ་དག་འཁྲུལ་བའི་སྣང་གྲགས་རྟོག་པ་སྦྱོངས༔ དེ་ལྟར་བརྩོན་པས་རིགས་དྲུག་གནས་ངན་ལས༔ ཐར་པའི་ལམ་དུ་ཕྱིན་པར་གདོན་མི་ཟ༔ དེ་ལྟར་བརྗོད་ཅིང་རིགས་དྲུག་གི༔ ཐོག་མར་དམྱལ་བའི་ལན་ཆགས་སྦྱང༔ གཏོར་མ་སྦྱིན་ཅིང་ཚིག་འདི་བརྗོད༔ ཧྲཱིཿ འདོད་པའི་ཡོན་ཏན་ལྔ་ལྡན་བྷ་ལིང་ཏ༔ ཚེ་འདས་འདི་ཡི་ཚེ་རབས་ཐོག་མེད་ནས༔ བསད་བཅད་བཤས་གཏུབ་ལན་ཆགས་སྦྱངས་ཕྱིར་བསྔོ༔ ཞེ་སྡང་གནོད་འཚེའི་བག་ཆགས་དག་གྱུར་ཅིག༔ ཁ་འབར་མ་ཡི་སྔགས་ཀྱང་བརྗོད༔ དམྱལ་བའི་ཐུབ་པའི་དབང་བསྐུར་དེ༔ ཧྲཱིཿ ཞེ་སྡང་དབང་གིས་གཞན་གྱི་སྲོག་བཅད་པས༔ ཚ་གྲང་སྡུག་བསྔལ་སྦྱངས་མཛད་འགྲོ་བའི་མགོན༔ དམྱལ་བའི་ཐུབ་པ་མེ་ཆུའི་ཕྱག་མཚན་ཅན༔ ཚེ་འདས་རིགས་ཀྱི་བུ་ལ་དབང་བསྐུར་བས༔ བཟོད་དཀའ་དམྱལ་བའི་གནས་ངན་ལས་ཐར་ཏེ༔ མངོན་དགའི་ཞིང་དུ་དབུགས་དབྱུང་ཐོབ་པར་ཤོག༔ རྩ་སྔགས་ཡི་གེ་དྲུག་པའི་མཐར༔ དུ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུན་ཧཱུྃ་ཕཊ༔ སླར་ཡང་ཆོས་བཤད་འདི་བཞིན་བརྗོད༔ ཀྱཻ་ཧོ་གསོན་ཅིག་ཚེ་འདས་རིགས་ཀྱི་བུ༔ ཉོན་མོངས་འཁྲུལ་བའི་ཡིད་ཀྱིས་བསླུས་པ་ལས༔ བདག་གཞན་གཉིས་བཟུང་ཞེ་སྡང་དགྲ་རུ་ལངས༔ གནོད་སེམས་ཚིག་རྩུབ་གཤེ་བའི་ངག་གིས་བསྒྲགས༔ མཚོན་ཆས་བརྡེགས་ཤིང་སྲོག་བཅད་རྣམ་སྨིན་གྱིས༔ ཚ་གྲང་དམྱལ་བའི་གནས་སུ་སྡུག་བསྔལ་ཀྱང༔ ཚད་མེད་བྱམས་པ་ཆེན་པོའི་ཁྲུས་ཀྱིས་སྦྱངས༔ ཡེ་ཤེས་ལྔ་རུ་རྟོགས་པའི་མཚོན་བྱེད་རྫས༔ ཁ་ཏོག་སྣ་ལྔ་བཀྲ་བའི་སྒྲོ་ཡིས་བྱབ༔ ཞེ་སྡང་རྒྱུ་རྐྱེན་བག་ཆགས་ཡོངས་དག་ནས༔ འཕགས་མཆོག་གསང་བ་གསུམ་དང་དབྱེར་མེད་ཤོག༔ ༈ ཁྱོད་རང་གི་རྐང་མཐིལ་དུ་དམྱལ་བའི་ས་བོན་དུ་ཡིག་གི་རྣམ་པ་དེ་ཉིད་ཡེ་ཤེས་ལྔ་ལྡན་གྱི་སྒྲོས་བྱབ། ནུས་ལྡན་གྱི་བྱེ་མས་བྲབ་ཅིང་བསྲེག་གཏོར་སྦྱངས་ནས་མི་དམིགས་སྟོང་པ་ཉིད་ཀྱི་ངང་དུ་ཡལ་བར་བསམ། དམྱལ་བའི་ས་བོན་རྐང་མཐིལ་དུ༔ དུ་ཡིག་ཡེ་ཤེས་མེ་ཡིས་བསྲེགས༔ སྔགས་ལྡན་བྱེ་མས་མིང་བྱང་བྲབ༔ རྩ་སྔགས་མི་འཁྲུགས་གཟུངས་ཀྱང་བརྗོད༔ གཉིས་པ་ཡི་དྭགས་གནས་དྲངས་ཕྱིར༔ བགེགས་གཏོར་བསྔོ་བ་འདི་སྐད་དོ༔ ཧྲཱིཿ ཚེ་ལས་འདས་པའི་ཚེ་རབས་ཐོག་མེད་ནས༔ སེར་སྣའི་དབང་གིས་གཞན་ནོར་བརྐུས་ཤིང་འཕྲོག༔ མཆོད་སྦྱིན་སྒོ་བཀག་བག་མེད་དཀོར་ལ་སྤྱོད༔ ཡི་དྭགས་རྒྱུ་རྐྱེན་ལན་ཆགས་གཏོར་མས་སྦྱངས༔ སེར་སྣའི་ལས་དང་བག་ཆགས་སྒྲིབ་དག་ཤོག༔ ཁ་འབར་མ་ཡི་སྔགས་ཀྱང་བརྗོད༔ ཡི་དྭགས་ཐུབ་པའི་དབང་བསྐུར་དེ༔ ཧྲཱིཿ སེར་སྣའི་དབང་གིས་མཆོད་སྦྱིན་བསྡམ་པའི་འབྲས༔ བཀྲེས་སྐོམ་བཟོད་དཀའ་གཤིན་རྗེའི་འཇིག་རྟེན་ལས༔ སྒྲོལ་མཛད་ཡི་དྭགས་ཐུབ་པ་སྐུ་མདོག་དམར༔ ནམ་མཁའ་མཛོད་མངའ་སྒྲོམ་བུའི་ཕྱག་མཚན་ཅན༔ ཚེ་འདས་རིགས་ཀྱི་བུ་ལ་དབང་བསྐུར་བས༔ ཉམ་ང་ཡི་དྭགས་གནས་ངན་ལས་ཐར་ཏེ༔ བདེ་ཆེན་དག་པའི་ཞིང་དུ་དབུགས་དབྱུང་ཤོག༔ རྩ་སྔགས་ཡི་གེ་དྲུག་པའི་མཐར༔ པྲེ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཏུན་ཧཱུྃ་ཕཊ༔ སླར་ཡང་ཆོས་བཤད་འདི་བཞིན་བརྗོད༔ ཀྱཻ་ཧོ་གསོན་ཅིག་ཚེ་འདས་རིགས་ཀྱི་བུ༔ ཀུན་བརྟགས་མ་རིག་གདོན་གྱིས་བརླབས་པ་ལས༔ སྒྱུ་མའི་ནོར་རྫས་གཅེས་པར་བདག་ཏུ་བཟུང༔ མཆོད་སྦྱིན་གཏན་གྱི་རྒྱགས་ཕྱེ་མ་བསགས་ཤིང༔ རྐུས་འཕྲོག་ཚོང་དང་གཡོ་ཁྲམ་རང་ཉིད་བསླུས༔ རྣམ་སྨིན་ཡི་དྭགས་བཀྲེས་སྐོམ་བཟོད་དཀའ་ཡང་༔ གཏོང་སེམས་སྦྱིན་པའི་ཆུ་ཡིས་ལེགས་བཀྲུས་ཤིང༔ དུག་ལྔ་ཡེ་ཤེས་ལྔ་རུ་ལམ་འཁྱེར་རྫས༔ མདངས་ལྡན་རྨ་བྱའི་སྒྲོ་ཡིས་བག་རྡུལ་བྱབ༔ གློ་བུར་སེར་སྣའི་སྒྲིབ་ཚོགས་ཡོངས་དག་ནས༔ འཕགས་མཆོག་གསང་བ་གསུམ་དང་དབྱེར་མེད་ཤོག༔ ༈ ཁྱོད་རང་གི་གསང་གནས་སུ་ཡི་དྭགས་ཀྱི་ས་བོན་པྲེ་ཡིག་གི་རྣམ་པ་དེ་ཉིད་ཡེ་ཤེས་ལྔ་ལྡན་གྱི་སྒྲོས་བྱབ། ནུས་ལྡན་གྱི་བྱེ་མས་བྲབ་ཅིང་བསྲེག་གཏོར་སྦྱངས་ནས་མི་དམིགས་སྟོང་པ་ཉིད་ཀྱི་ངང་དུ་ཡལ་བར་བསམ། རྩ་སྔགས་སྣང་མཐའི་གཟུངས་རིང་བརྗོད༔ ཁྲུས་ཀྱིས་བཀྲུ་ཞིང་སྒྲོ་ཡིས་བྱབ༔ གསང་གནས་ཡི་དྭགས་ས་བོན་པྲེ༔ བསྲེགས་སྦྱང་མིང་བྱང་བྱེ་མས་བྲབ༔ གསུམ་པ་དུད་འགྲོའི་གནས་སྦྱོངས་ཕྱིར༔ གླུད་གཏོར་བསྔོ་བའི་ཚིག་འདི་བརྗོད༔ ཧཱུྃ༔ ཡང་དག་ལམ་དུ་ལྟ་བའི་ཐོས་བསམ་མིག༔ རྣམ་པར་ལྡོང་བས་རྒྱུ་འབྲས་འཆོལ་བར་སྤྱོད༔ གཏི་མུག་རྨོངས་པའི་ལན་ཆགས་ཤ་འཁོན་རིགས༔ འདོད་ཡོན་ལྔ་ལྡན་གཏོར་མས་ཚིམ་པར་སྦྱངས༔ རྨོངས་འཐིབ་བརྒྱལ་དང་བརྗེད་ངས་དྲན་མི་གསལ༔ ཉོན་མོངས་འཐིབ་པོའི་སྒྲིབ་ཚོགས་དག་གྱུར་ཅིག༔ ཁ་འབར་མ་ཡི་སྔགས་ཀྱང་བརྗོད༔ དུད་འགྲོའི་ཐུབ་པའི་དབང་བསྐུར་དེ༔ ཧྲཱིཿ ཐོག་མ་མེད་ནས་ལྷན་སྐྱེས་མ་རིག་པས༔ ཟིལ་གྱིས་མནན་ནས་བདག་མེད་དོན་མ་རྟོགས༔ བདག་ལྟའི་རི་བོ་ཉི་ཤུས་ཆེས་ཆེར་ནོན༔ མ་རིག་གཏི་མུག་སྦྱོངས་མཛད་འགྲོ་བའི་མགོན༔ བྱོལ་སོང་ཐུབ་པ་པོ་ཏིའི་ཕྱག་མཚན་ཅན༔ ཚེ་འདས་རིགས་ཀྱི་བུ་ལ་དབང་བསྐུར་བས༔ བདག་ཏུ་ལྟ་བའི་བཀོལ་སྤྱོད་སྡུག་བསྔལ་ལས༔ རྣམ་པར་གྲོལ་ནས་འཐུག་པོ་བཀོད་པ་རུ༔ རྣམ་སྣང་རྒྱལ་པོས་ལུང་བསྟན་དབུགས་དབྱུང་ཤོག༔ རྩ་སྔགས་ཡི་གེ་དྲུག་པའི་མཐར༔ ཏྲི་མ་ཐ་མ་ཐ་སརྦ་ཏིརྱ་ཀ་ག་ཏེ་ཧེ་ཏུན་ཧཱུྃ་ཕཊ༔ སླར་ཡང་ཆོས་བཤད་འདི་བཞིན་བརྗོད༔ ཀྱཻ་ཧོ་གསོན་ཅིག་ཚེ་འདས་རིགས་ཀྱི་བུ༔ མ་རིག་གསུམ་གྱི་གདོན་དང་འགྲོགས་པ་ལས༔ ཚོགས་བརྒྱད་དྷ་དྷུ་ར་ཡིས་ཆེར་མྱོས་པས༔ དབང་མེད་དུད་འགྲོའི་ཚོགས་རྣམས་བདག་ཏུ་བཟུང༔ ཤ་ཁྲག་ལས་ལ་སྤྱོད་ཅིང་པགས་པ་བཤུས༔ སྤུ་དང་གཤོག་པ་རུས་པའི་ཉེར་སྤྱོད་ལ༔ བདག་གིར་བྱེད་པའི་རྣམ་སྨིན་བྱོལ་སོང་དུ༔ ཟ་གསོད་བཀོལ་སྤྱོད་སྡུག་བསྔལ་ཕ་མཐའ་ཡས༔ དེ་ཡང་བདེན་མེད་རྨི་ལམ་སྒྱུ་མ་བཞིན༔ རང་བཞིན་ཤེས་པས་ངན་སོང་སྡུག་བསྔལ་ལས༔ རྣམ་གྲོལ་འཕགས་པའི་གསང་གསུམ་མངོན་གྱུར་ཕྱིར༔ བདག་མེད་རྟོགས་པའི་ཤེས་རབ་ཁྲུས་ཀྱིས་སྦྱངས༔ སྐུ་ལྔའི་དོན་སྟོན་རྨ་བྱའི་སྒྲོ་ཡིས་བྱབ༔ དབང་མེད་དུད་འགྲོའི་གནས་ངན་ལས་ཐར་ནས༔ ཆོས་དབྱིངས་ཡེ་ཤེས་རང་རིག་དོན་རྟོགས་ཤོག༔ ༈ ཁྱོད་རང་གི་ལྟེ་བར་དུད་འགྲོའི་ས་བོན་ཏྲི་ཡིག་གི་རྣམ་པ་དེ་ཉིད་ཡེ་ཤེས་ལྔ་ལྡན་གྱི་སྒྲོ་ཡིས་བྱབ། ནུས་ལྡན་གྱི་བྱེ་མས་བྲབ་ཅིང་བསྲེག་གཏོར་སྦྱངས་ནས་མི་དམིགས་སྟོང་པ་ཉིད་ཀྱི་ངང་དུ་ཡལ་བར་བསམ། ཁྲུས་ཀྱིས་བཀྲུ་ཞིང་སྒྲོ་ཡིས་བྱབ༔ བྱེ་མས་བྲབ་ཅིང་ཚེ་འདས་ཀྱི༔ ལྟེ་བར་དུད་འགྲོའི་ས་བོན་ཏྲི༔ ཡེ་ཤེས་མེ་ཡིས་བསྲེག་པར་བསམ༔ རྩ་སྔགས་ཡི་གེ་དྲུག་པའི་གཤམ༔ རྣམ་སྣང་རྒྱལ་པོའི་གཟུངས་རིང་བརྗོད༔ བཞི་པ་ལྷ་མིན་གནས་སྦྱོངས་ཕྱིར༔ ལན་ཆགས་གླུད་གཏོར་བསྔོ་བ་ནི༔ ཧྲཱིཿ ལོངས་སྤྱོད་ལྔ་ལྡན་གླུད་གཏོར་བཟང་པོ་འདི༔ ཚེ་འདས་འདི་ཡི་ཕྲག་ཏོག་རྒྱུ་རྐྱེན་ལས༔ རང་ཉིད་གྲགས་འདོད་གཞན་ལ་སྨོད་ཅིང་རྩོད༔ ཕན་ཚུན་མཚོན་གྱིས་བརྡེག་སོགས་ལས་ངན་པའི༔ བུ་ལོན་ལན་ཆགས་དོན་དུ་གཉེར་ལ་བསྔོ༔ ཕྲག་ཏོག་འཐབ་རྩོད་ལས་ཉོན་དག་གྱུར་ཅིག༔ ཁ་འབར་མ་ཡི་སྔགས་ཀྱང་བརྗོད༔ ལྷ་མིན་ཐུབ་པའི་དབང་བསྐུར་དེ༔ ཧྲཱིཿ རྟོག་མེད་ཀུན་གཞིའི་རྣམ་ཤེས་དྭངས་པ་ལ༔ བདག་ཏུ་རྟོག་པའི་ཉོན་ཡིད་དྲི་ཡིས་བསླད༔ བདག་བསྟོད་གཞན་སྨོད་ཕྲག་ཏོག་སྦྱངས་བའི་ལྷ༔ ལྷ་མིན་ཐུབ་པ་རལ་གྲི་གོ་མཚོན་ཅན༔ ཚེ་འདས་རིགས་ཀྱི་བུ་ལ་དབང་བསྐུར་བས༔ འཐབ་རྩོད་ལྷ་མིན་གནས་ངན་ལས་ཐར་ཏེ༔ ཕྲིན་ལས་ཡོངས་རྫོགས་ཞིང་དུ་དབུགས་དབྱུང་ཤོག༔ རྩ་སྔགས་ཡི་གེ་དྲུག་པའི་མཐར༔ སུ་པཱ་ར་མི་ཏ་ཁད་ཁ་ཚིནྡྷ་ཚིནྡྷ་ཧཱུྃ་ཕཊ༔ སླར་ཡང་ཆོས་བཤད་འདི་བཞིན་བརྗོད༔ ཀྱཻ་ཧོ་གསོན་ཅིག་ཚེ་འདས་རིགས་ཀྱི་བུ༔ ཡེ་ནས་རང་རིག་སྤྲོས་པའི་མཐའ་བྲལ་ཡང༔ ཡེ་ཤེས་འོད་ལྔ་བདག་ཏུ་བཟུང་སྐྱོན་གྱིས༔ ཀུན་ཏུ་བརྟག་པའི་གློ་བུར་གྲོགས་ཀྱིས་བསླུས༔ རང་གཞན་གཉིས་བཟུང་འགྲན་སེམས་འཐབ་ཅིང་རྩོད༔ ལས་ཀྱི་རྣམ་སྨིན་ལྷ་མིན་ཡུལ་དུ་སྐྱེས༔ གཡུལ་དང་འཐབ་རྩོད་སྡུག་བསྔལ་དོས་དྲག་ཀྱང༔ རང་གཞན་བདེན་མེད་སྟོང་པའི་རང་གཟུགས་ལ༔ དངོས་པོར་འཛིན་པའི་རྣམ་རྟོག་གཏན་ནས་སྤོངས༔ རྣམ་གྲོལ་ས་ལ་དབུགས་ཆེན་འབྱིན་པའི་ཕྱིར༔ ཟག་མེད་ཚུལ་ཁྲིམས་དྲི་ཡིས་ལེགས་བགོས་ཆུས༔ འཆལ་བའི་ཉེས་སྐྱོན་དྲི་མ་ཡོངས་སུ་སྦྱངས༔ ཕུང་ལྔའི་བདག་རྟོག་སྐུ་ལྔའི་ཀློང་གྲོལ་བའི༔ མཚོན་བྱེད་རྟགས་ཀྱིས་ཆེ་བའི་སྒྲོ་ཡིས་བྱབ༔ རིགས་སྔགས་ནུས་པས་དཔུང་བསྐྱེད་བྱེ་མས་བྲབ༔ ཕྲག་ཏོག་རྒྱུ་རྐྱེན་ལས་ངན་ཡོངས་དག་ནས༔ འཕགས་པའི་གསང་བ་གསུམ་དང་དབྱེར་མེད་ཤོག༔ ༈ ཁྱོད་རང་གི་ལྟག་པར་ལྷ་མིན་གྱི་ས་བོན་སུ་ཡིག་གི་རྣམ་པ་དེ་ཉིད་ཡེ་ཤེས་ལྔ་ལྡན་གྱི་སྒྲོ་ཡིས་བྱབ། ནུས་ལྡན་གྱི་བྱེ་མས་བྲབ་ཅིང་བསྲེག་གཏོར་སྦྱངས་ནས་མི་དམིགས་སྟོང་པ་ཉིད་ཀྱི་ངང་དུ་ཡལ་བར་བསམ། རྩ་སྔགས་ཡི་གེ་དྲུག་པའི་གཤམ༔ དོན་གྲུབ་ཡི་གེ་བརྒྱ་པས་སྦྱངས༔ ཚེ་འདས་ལྟག་པར་ལྷ་མིན་གྱི༔ ཡི་གེ་སུ་ཡིག་སེར་སྐྱ་ནི༔ ཡེ་ཤེས་མེ་ཡིས་བསྲེག་པར་བསམ༔ ལྔ་པ་ལྷ་ཡི་གནས་ནས་དྲངས་པའི་ཕྱིར༔ ཐོག་མར་ལན་ཆགས་གླུད་གཏོར་བསྔོ་བ་ནི༔ ཧྲཱིཿ ཏིང་འཛིན་སྔགས་དང་ཕྱག་རྒྱས་བྱིན་བརླབས་པའི༔ འདོད་ཡོན་ལོངས་སྤྱོད་ལྔ་ལྡན་བྷ་ལིང་ཏ༔ ཚེ་འདས་བག་མེད་ལེ་ལོའི་དབང་གྱུར་ཏེ༔ ང་རྒྱལ་དྲག་པོས་མཆོག་དམན་ཁྱད་གསོད་མཐུས༔ བུ་ལོན་ལན་ཆགས་ཤ་འཁོན་གཉེར་ལ་བསྔོ༔ ང་རྒྱལ་སྒྲིབ་དག་བདེ་བའི་དཔལ་ཐོབ་ཤོག༔ ཁ་འབར་མ་ཡི་སྔགས་ཀྱིས་བསྔོ༔ ལྷ་ཡི་ཐུབ་པའི་དབང་བསྐུར་དེ༔ ཧྲཱིཿ ང་རྒྱལ་བག་མེད་ལེ་ལོ་གཡེང་བའི་མཐུས༔ འཆི་འཕོ་ལྟུང་བྱེད་འདོད་གཟུགས་ལྷ་ཡུལ་དུ༔ འགྱུར་བའི་སྡུག་བསྔལ་དྲག་པོས་མནར་བ་ཡི༔ གནས་ངན་འཁོར་བའི་འཇིགས་སྐྱོབས་འགྲོ་བའི་མགོན༔ ལྷ་ཡི་ཐུབ་པ་བརྒྱ་བྱིན་དཀར་གསལ་འཛུམ༔ ཟག་མེད་ཆོས་སྟོན་པི་ཝཾ་ཕྱག་མཚན་ཅན༔ ཚེ་འདས་རིགས་ཀྱི་བུ་ལ་དབང་བསྐུར་བས༔ ཟག་བཅས་ལྟུང་བའི་སྡུག་བསྔལ་ལས་གྲོལ་ནས༔ དཔལ་ལྡན་ཞིང་དུ་ས་བཅུ་མཐར་ཕྱིན་ཤོག༔ རྩ་སྔགས་ཡི་གེ་དྲུག་པའི་མཐར༔ ཨ་པཱ་ར་མི་ཏ་ཁད་ཁ་ཚིནྡྷ་ཚིནྡྷ་ཧཱུྃ་ཕཊ༔ སླར་ཡང་ཆོས་བཤད་འདི་བཞིན་བརྗོད༔ ཀྱཻ་ཧོ་གསོན་ཅིག་ཚེ་འདས་རིགས་ཀྱི་བུ༔ ལུང་མ་བསྟན་ལས་ཡིད་གཡོས་གཟུང་འཛིན་གྱི༔ བག་ཆགས་འཐུག་པོའི་རང་གཟུགས་ངོམས་པ་ལས༔ སྨིག་སྒྱུ་ཆུ་རུ་འཁྲུལ་བཞིན་འདོད་ཁམས་ལྷའི༔ བདེ་སྐྱིད་ལོངས་སྤྱོད་དུག་ལྡན་ཟས་ཟོས་ལྟར༔ གནས་སྐབས་བདེ་ཡང་འགྱུར་བའི་རང་བཞིན་ལ༔ སྟོང་པར་ཤེས་ནས་རང་ངོ་འཕྲོད་པར་གྱིས༔ འཇིག་རྟེན་བསམ་གཏན་ཟག་བཅས་ཉོན་མོངས་དྲི༔ རྣམ་གྲོལ་ཏིང་འཛིན་ཡེ་ཤེས་ཆུ་ཡིས་བཀྲུ༔ དུག་ལྔ་མ་སྤངས་ཡེ་ཤེས་ལྔར་གྲོལ་བའི༔ གསང་སྔགས་ཐབས་ཀྱི་རྫས་མཆོག་སྒྲོ་ཡིས་བྱབ༔ སྣ་ཚོགས་རྟོག་པའི་བག་ཆགས་དབྱིངས་གྲོལ་ནས༔ སྙིང་རྗེའི་གཏེར་མཆོག་འཕགས་པའི་གསང་གསུམ་དང༔ དབྱེར་མེད་དོན་གཉིས་འགྲུབ་པའི་དཔལ་ཐོབ་ཤོག༔ ༈ ཁྱོད་རང་གི་དཔྲལ་བར་ལྷ་ཡི་ས་བོན་ཨ་ཡིག་གི་རྣམ་པ་དེ་ཉིད་ཡེ་ཤེས་ལྔ་ལྡན་གྱི་སྒྲོ་ཡིས་བྱབ། ནུས་ལྡན་གྱི་བྱེ་མས་བྲབ་ཅིང་བསྲེག་གཏོར་སྦྱངས་ནས་མི་དམིགས་སྟོང་པ་ཉིད་ཀྱི་ངང་དུ་ཡལ་བར་བསམ། ཚེ་ལས་འདས་པའི་དཔྲལ་བ་རུ༔ ལྷ་ཡི་ས་བོན་ཨཿདཀར་པོ༔ ཡེ་ཤེས་མེ་ཡིས་བསྲེག་པར་བསམ༔ ཁྲུས་ཀྱིས་བཀྲུ་ཞིང་སྒྲོ་ཡིས་བྱབ༔ བྱེ་མས་བྲབ་ནས་རྩ་སྔགས་མཐར༔ རིན་ཆེན་འབྱུང་ལྡན་ཡིག་བརྒྱ་བརྗོད༔ དྲུག་པ་མི་ཡི་གནས་ནས་དྲངས་པའི་ཕྱིར༔ ཐོག་མར་མཚན་བྱང་རྟེན་ལ་རྣམ་ཤེས་ནི༔ རྒྱུན་དུ་སྡོད་དཀའ་སླར་ཡང་འདི་བཞིན་དགུག༔ ཀྱེ་མ་རྟེན་མེད་བར་དོར་འཁྱམས་པ་ཡི༔ ཚེ་ལས་འདས་པ་མིང་བཞིའི་ཕུང་པོ་ཅན༔ མཆོག་གསུམ་ཀུན་འདུས་སྤྱན་རས་གཟིགས་དབང་གི༔ ཟག་མེད་ཐུགས་རྗེ་ཆེན་པོའི་ནུས་མཐུ་དང༔ ལྷག་བསམ་རྣམ་དག་དུས་གསུམ་དགེ་བའི་མཐུས༔ གཤེད་དབང་གྱུར་རམ་ལས་རླུང་བག་ཆགས་ཀྱིས༔ གང་དུ་བདས་ཀྱང་མིང་བྱང་རྟེན་འདི་ལ༔ རྩེ་གཅིག་ཚུལ་གྱིས་བཀུགས་ནས་གནས་གྱུར་ཅིག༔ རྩ་སྔགས་ཤམ་བུར་འདི་བཞིན་བརྗོད༔ ནྲྀ་ཛཿཧཱུྃ་བཾ་ཧོ༔ ཏིཥྛ་ལྷན༔ དེ་ནས་གླུད་གཏོར་བསྔོ་བ་ནི༔ ཧྲཱིཿ ཚེ་ལས་འདས་པའི་འཁོར་བ་ཐོག་མེད་ནས༔ དུག་ལྔའི་མཚུངས་ལྡན་ལས་ལ་སྤྱད་པ་དང༔ ཁྱད་པར་མི་ཡི་སྐྱེས་སྲིད་འདིར་བཟུང་ཚེ༔ ལྷན་སྐྱེས་འདྲེ་སོགས་ཤ་འཁོན་གཉེར་བའི་རིགས༔ འདོད་ཡོན་བླ་གླུད་ཆང་བུ་འདི་ཁྱེར་ལ༔ བར་དོའི་སྐབས་འདིར་དགེ་བའི་ཆོས་བཤད་དང༔ ཐར་བའི་ལམ་ལ་བར་ཆད་མ་བྱེད་པར༔ བརྔན་སྦྱིན་ལོངས་ལ་གླིང་བཞིའི་ཕ་མཐར་དེངས༔ སརྦ་བྷུ་ཏ་བྷ་ལིང་ཏ་ཁ་ཧཱི༔ དེ་ནས་ཚེ་ལས་འདས་པ་དེས༔ འདྲེན་མཆོག་མི་ཡི་ཐུབ་པ་ལ༔ རྩེ་གཅིག་གསོལ་བ་འདེབས་པར་བསམ༔ ཉེ་དྲུང་བརྩེ་བས་རྗེས་ཟློས་བྱ༔ ཀྱཻ་མ་རྣམ་འདྲེན་སྟོན་པ་རྒྱལ་བ་ཤཱཀྱ་ཐུབ༔ ཁྱེད་ལ་རྩེ་གཅིག་གུས་པས་གསོལ་བ་འདེབས༔ ལས་ངན་བདག་འདྲ་ཁམས་གསུམ་འཁོར་བ་འདིར༔ སྐྱེ་རྒ་ན་འཆིའི་སྡུག་བསྔལ་བཟོད་བརླག་མེད༔ འཆི་མེད་བདུད་རྩི་རྣམ་མཁྱེན་གོ་འཕང་གིས༔ ད་ལྟ་ཉིད་དུ་དབུགས་དབྱུང་མཛད་དུ་གསོལ༔ ཅེས་པས་ལན་གསུམ་གསོལ་བ་འདེབས༔ རྣམ་མཁྱེན་སྟོན་པ་ཤཱཀ་ཐུབ་ཀྱིས༔ བརྩེ་བ་ཆེན་པོས་རབ་དགོངས་ནས༔ ལན་ལ་འདི་བཞིན་གསུང་བར་བསྒོམ༔ ཀྱཻ་མ་རྙེད་དཀའ་མི་ཡི་ལུས་ཐོབ་ཚེ༔ ཐར་བ་སྒྲུབ་པ་རང་ལ་རག་ལས་ཀྱང་༔ འབྲེལ་བའི་གཉེན་འདུན་བུ་དང་ཆུང་མར་ཆགས༔ མི་གཙང་སྒྱུ་མའི་ལུས་ལ་གཙང་བར་སེམས༔ མི་རྟག་སྒྱུ་མའི་ནོར་ལ་གསོག་འཇོག་བྱས༔ དེད་དཔོན་དམ་པ་དགེ་བའི་གྲོགས་པོ་དོར༔ ངན་སོང་གཏིང་རྡོ་སྡིག་པའི་གྲོགས་དང་འགྲོགས༔ རང་གིས་རང་ཕུང་བསམ་བརླག་སྙིང་རེ་རྗེ༔ གློ་བུར་འཆི་བས་བཅོམ་པ་ཡ་རེ་ཆ༔ ལས་ངན་བར་དོའི་སྣང་ཚུལ་ཞེ་རེ་འཇིགས༔ ཆ་མེད་གཤིན་རྗེའི་ཕོ་ཉ་ངོ་རེ་གནག༔ ངན་སོང་གསུམ་གྱི་སྡུག་བསྔལ་དོས་རེ་དྲག༔ མཐའ་མེད་འཁོར་བའི་རྒྱ་མཚོ་གཏིང་རེ་ཟབ༔ འདི་ལ་ཐར་ཐབས་དམ་པའི་ཆོས་མ་གཏོགས༔ བརྩེ་བའི་གཉེན་དང་བསགས་པའི་ནོར་རྫས་དང༔ མཛེས་པའི་གཟུགས་དང་འཕྱོར་པོའི་གོས་དང་རྒྱན༔ མཛངས་མའི་གཡོ་སྒྱུ་དཔའ་བའི་དཔུང་ལ་སོགས༔ ཚེ་འདིའི་བྱ་བས་རྡུལ་ཙམ་མི་ཕན་ན༔ བར་དོའི་སྐབས་འདིར་འཁྲུལ་སྣང་ཅི་ཤར་ཀྱང༔ ཐམས་ཅད་བདེན་མེད་སྒྱུ་མའི་དཔེ་བརྒྱད་སོམས༔ གཏན་གྱི་སྐྱབས་གནས་དཀོན་མཆོག་རྣམ་གསུམ་ལ༔ ཡིད་གཉིས་མེད་པར་གསོལ་བ་སྙིང་ནས་ཐོབ༔ སྔར་བྱས་སྡིག་རྣམས་འགྱོད་པས་བཤགས་སྦྱངས་དང༔ ཚེ་རབས་གཞན་དུ་མི་དགེའི་སྡིག་པའི་ལས༔ སྲོག་ལ་བབས་ཀྱང་མི་བགྱིད་དམ་བཅའ་ཟུངས༔ ཁྱད་པར་གསང་སྔགས་སྨིན་གྲོལ་ལམ་འདི་ལ༔ ཐེ་ཚོམ་མེད་པར་དབང་དང་གདམས་ཁྲིད་ཞུས༔ དེ་ནས་ངེས་པར་གྲོལ་འགྱུར་གདོན་མི་ཟ༔ ཅེས་གསུངས་དེ་ཡིས་དམིགས་ཡུལ་རྒྱུད༔ ངེས་འབྱུང་བློ་དང་ལྡན་པར་བསམ༔ མི་ཡི་ཐུབ་པའི་དབང་བསྐུར་དེ༔ ཧྲཱིཿ ངན་འགྲོ་མཐའ་མེད་འཁོར་བའི་གྲོང་ཁྱེར་ལས༔ སྒྲོལ་མཛད་ཉན་ཐོས་རང་རྒྱལ་བྱང་ཆུབ་སེམས༔ ཀུན་གྱི་གཙོ་བོ་ལྷ་མིའི་སྟོན་པ་མཆོག༔ ཤཱཀྱ་ཐུབ་པ་གསེར་མདོག་ཚངས་སྤྱོད་ཚུལ༔ ཟག་མེད་ཁྲིམས་ལྡན་ལྷུང་བཟེད་མཁར་སིལ་བསྣམས༔ ཚེ་འདས་རིགས་ཀྱི་བུ་ལ་དབང་བསྐུར་བས༔ གནས་ངན་མི་ཡི་སྐྱེ་སྒོ་ལས་ཐར་ནས༔ རྣམ་གྲོལ་གླིང་དུ་དོན་གཉིས་དཔལ་ཐོབ་ཤོག༔ རྩ་སྔགས་ཡི་གེ་དྲུག་པའི་མཐར༔ ནྲྀ་པ་ར་མི་ཏ་ཁད་ཁ་ཚིནྡྷ་ཚིནྡྷ་ཧཱུྃ་ཕཊ༔ དེ་ནས་ཁྲུས་ཀྱིས་སྦྱངས་བ་ནི༔ ཧྲཱིཿ ཡེ་ནས་རྣམ་དག་ཀུན་གཞིའི་མེ་ལོང་ངོགས༔ གློ་བུར་ལས་ཉོན་དྲི་མས་གོས་པ་རྣམས༔ དག་བྱེད་གཙང་ཆབ་ཕ་རོལ་ཕྱིན་དྲུག་ཆུས༔ དུག་ལྔ་སེར་སྣའི་བག་ཆགས་ཀུན་དག་ནས༔ སྤངས་རྟོགས་ཡོན་ཏན་གཟི་བརྗིད་ཕུན་ཚོགས་ཤོག༔ རྩ་སྔགས་ཤམ་དུ་ཡིག་བརྒྱ་དང༔ ཕྱག་སྟོང་འཕགས་པའི་གཟུངས་རིང་བརྗོད༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥི་ག་ཏེ་ས་མ་ཡཱ་ཤྲཱི་ཡེ་ཧཱུྃ༔ རྨ་བྱའི་སྒྲོ་ཡིས་བྱབ་བཞིན་དུ༔ ཨེ་མ་ཧོ༔ སྡུག་བསྔལ་ཀུན་གྱི་རྩ་བ་ལས་ཉོན་དང༔ ཁྱད་པར་འདོད་ཆགས་བདག་ཏུ་ལྟ་ལས་བྱུང༔ བདག་གཞན་གཉིས་བཟུང་ཞེ་སྡང་ཞེ་སྡང་དྲག་པོས་མནར༔ གཏི་མུག་མ་རིག་མུན་པའི་སྨག་ཏུ་ཚུད༔ ང་མེད་ངར་བཟུང་ང་རྒྱལ་རི་བོས་ནོན༔ ཀུན་ཏུ་འཆིང་བྱེད་སེར་སྣའི་སྒྲོག་གིས་བསྡམས༔ བདག་བསྟོད་གཞན་སྨོད་ཕྲག་ཏོག་ཟུག་རྔུས་གདུངས༔ དུག་གི་གོང་བུ་བྱིས་པ་སོ་སྐྱེས་རྣམས༔ དུག་ལྔས་མནར་བས་ངན་འགྲོའི་གཡང་སར་ལྷུང༔ ངོ་མཚར་རྨད་བྱུང་རྫོགས་པའི་སངས་རྒྱས་རྣམས༔ དུག་ལྔའི་ཉེས་པ་ཀུན་བྲལ་ཡོན་ཏན་ཚངས༔ ཞི་གྱུར་ཆོས་དང་དེ་བཞིན་འཕགས་པའི་སྡེ༔ ཉེས་པ་ཀུན་བྲལ་ཡོན་ཏན་ཀུན་དང་ལྡན༔ བདེན་སྟོབས་མངའ་བས་འཇིག་རྟེན་གསུམ་ལས་རྒྱལ༔ དེ་དག་རྣམས་ཀྱི་ཐུགས་རྗེ་ནུས་མཐུ་ཡིས༔ ཚེ་འདས་ཁྱོད་ལ་ནམ་ཡང་དུག་མེད་ཤོག༔ རྒྱལ་བའི་རྣམ་རོལ་རིགས་ལྔའི་སངས་རྒྱས་དང༔ རིགས་རྣམས་ཀུན་འདུས་འཕགས་མཆོག་ཐུགས་རྗེའི་ལྷ༔ མ་ལུས་འཁོར་དང་བཅས་པའི་ནུས་མཐུ་ཡིས༔ ཚེ་འདས་ཁྱོད་ཀྱི་སྒོ་གསུམ་དུག་བཅོམ་མོ༔ དེ་བཞིན་ཕྱི་རོལ་འབྱུང་བ་ཆེན་པོ་ལྔ༔ ནང་དུ་དུག་ལྔ་གཞན་དུ་ཕུང་པོ་ལྔ༔ ཕྱི་ནང་གཞན་གསུམ་དུག་གི་ནུས་པ་ཀུན༔ སྐུ་ལྔ་ཡེ་ཤེས་ལྔ་ཡིས་འཇོམས་གྱུར་ཅིག༔ ཅེས་བརྗོད་རྨ་བྱའི་སྒྲོ་ཡིས་བྱབ༔ དེ་ནས་བྱེ་མ་གཙང་མ་ནི༔ སྔགས་ཀྱིས་ངར་བཏབ་མིང་བྱང་བྲབ༔ ཧྲཱིཿ དུག་ལྔའི་དབང་གིས་ཚ་གྲང་བཀྲེས་སྐོམ་དང༔ རྨོངས་འཐིབས་བཀོལ་སྤྱོད་འཐབ་རྩོད་ལེ་ལོས་གཡེངས༔ རྐྱེ་རྒ་ན་འཆི་བྲེལ་ཕོང་སྡུག་བསྔལ་ཀུན༔ ལྷ་སྔགས་ཏིང་འཛིན་ནུས་པས་དབྱིངས་སུ་སྦྱངས༔ ཕྱིན་ཆད་འཁོར་བའི་གནས་ངན་ལས་ཐར་ནས༔ བདེ་ཆེན་ཞིང་དུ་མགོན་པོ་འོད་དཔག་མེད༔ སྤྱན་རས་གཟིགས་དབང་མཐུ་ཆེན་ཐོབ་ལ་སོགས༔ སངས་རྒྱས་བྱང་སེམས་དཔག་ཏུ་མེད་པ་ཡིས༔ བརྩེ་བའི་ཐུགས་རྗེས་ཚེ་འདས་རྗེས་བཟུང་ནས༔ ཕྱིར་མི་ལྡོག་པའི་ས་མཆོག་ཐོབ་པར་ཤོག༔ ༈ ཁྱོད་རང་གི་སྙིང་གར་མི་ཡི་ས་བོན་ནྲྀ་ཡིག་གི་རྣམ་པ་དེ་ཉིད་ཡེ་ཤེས་ལྔ་ལྡན་གྱི་སྒྲོ་ཡིས་བྱབ། ནུས་ལྡན་གྱི་བྱེ་མས་བྲབ་ཅིང་བསྲེག་གཏོར་སྦྱངས་ནས་མི་དམིགས་སྟོང་པ་ཉིད་ཀྱི་ངང་དུ་ཡལ་བར་བསམ། ཚེ་ལས་འདས་པའི་སྙིང་ཀ་རུ༔ ནྲྀ་ཡིག་དུག་གསུམ་འདུས་པའི་རྟེན༔ ཡེ་ཤེས་མེ་ཡིས་བསྲེགས་ཤིང་སྦྱང༔ དོན་གྱི་ཀུན་གཞི་ཆོས་སྐུའི་ཀློང༔ རྣམ་པར་གྲོལ་བའི་མཐུ་ལྡན་བསམ༔ ས་མ་ཡཱ༔ དེ་ཡན་རིགས་དྲུག་གནས་འདྲེན་དབང༔ དངོས་གཞིའི་སྣོད་རུང་བསྒྲུབ་པའོ༔ དངོས་གཞི་སྐུ་གསུང་ཐུགས་ཀྱི་དབང༔ ཤིན་ཏུ་བསྡུས་པའི་ལུགས་སུ་བསྐུར༔ ཐོག་མར་ཚེ་འདས་དེ་ཉིད་ཀྱི༔ མདུན་མཁར་འཕགས་པ་གཙོ་འཁོར་སོགས༔ སྐྱབས་ཡུལ་མ་ལུས་གསལ་གདབ་ལ༔ རྒྱུན་གྱི་ཚོགས་བསགས་འདི་བཞིན་བྱ༔ ཚེ་འདས་རྗེས་ཟློས་བྱེད་པར་དམིགས༔ ཨེ་མ་ཧོ༔ དཀོན་མཆོག་ཀུན་འདུས་འཕགས་པ་སྤྱན་རས་གཟིགས༔ བདག་ནི་ཇི་སྲིད་བྱང་ཆུབ་སྙིང་པོའི་བར༔ ཁྱེད་ལ་སྙིང་ནས་གུས་པས་སྐྱབས་སུ་མཆི༔ འགྲོ་ཀུན་དོན་དུ་བྱང་ཆུབ་སེམས་མཆོག་བསྐྱེད༔ ལུས་དང་ལོངས་སྤྱོད་མ་ལུས་མཆོད་པར་འབུལ༔ གུས་པས་ཕྱག་འཚལ་སྡིག་ཀུན་བཤགས་ཤིང་སྡོམ༔ འཁོར་འདས་དགེ་ལ་ཡི་རང་འགྲོ་དོན་དུ༔ ཟབ་རྒྱས་ཆོས་ཀྱི་འཁོར་ལོ་བསྐོར་བ་དང༔ མཐའ་ཡས་འགྲོ་ཀུན་བྱང་ཆུབ་མ་ཐོབ་བར༔ རྒྱལ་རྣམས་མྱ་ངན་མི་འདའ་བཞུགས་གསོལ་འདེབས༔ དགེ་དེས་འཕགས་མཆོག་གོ་འཕང་ཐོབ་ཕྱིར་བསྔོ༔ ཅེས་པས་ཚོགས་བསགས་སྔོན་སོང་ནས༔ ཁྱད་པར་དབང་གི་སྣོད་མཆོག་ཏུ༔ འགྱུར་ཕྱིར་སྡོམ་བཟུང་འདི་བཞིན་བྱ༔ ཚེ་འདས་གསོལ་བ་བཏབ་པར་བསམ༔ ཉེ་དྲུང་བརྩེ་བས་རྗེས་ཟློས་བྱ༔ ཧོ༔ བླ་མ་འཕགས་པ་འཁོར་བཅས་སྤྱན་སྔ་རུ༔ གཞན་གནོད་སྤོངས་ལ་གཞན་ཕན་མཐའ་དག་སྒྲུབ༔ འཁོར་འདས་བདེ་གཤེགས་སྙིང་པོ་རོ་གཅིག་པས༔ ཐམས་ཅད་དག་མཉམ་ཡེ་ཤེས་ངང་དུ་སྦྱངས༔ ཕྱི་ནང་གསང་བའི་དམ་ཚིག་སྡོམ་པ་ཀུན༔ མི་འདའ་རྡོ་རྗེའི་སེམས་སུ་བསྒྲུབ་པར་བགྱི༔ མིང་བྱང་མིག་དར་དམར་པོས་དགབ༔ ལྷ་དང་མཇལ་རྟེན་མེ་ཏོག་གཏད༔ སྒོ་གསུམ་ལྕགས་ཁམས་ལྷ་སྔགས་སུ༔ གསེར་འགྱུར་རྩི་ཡིས་ཐེབས་པ་བཞིན༔ ཡེ་ཤེས་བྱིན་འབེབས་འདི་བཞིན་བྱ༔ མིང་བྱང་སྭ་བྷ་ཝ་ཡིས་སྦྱངས༔ སྟོང་པའི་ངང་ལས་སྐད་ཅིག་དྲན་རྫོགས་སུ༔ པད་ཟླའི་གདན་ལ་ཚེ་ལས་འདས་པ་ཉིད༔ ཐུགས་རྗེ་ཆེན་པོ་དཀར་གསལ་གངས་རིའི་མདོག༔ ཞལ་གཅིག་ཕྱག་བཞི་ལོངས་སྤྱོད་རྫོགས་སྐུའི་ཆས༔ ཐལ་སྦྱར་པད་ཕྲེང་འཛིན་ཅིང་སྐྱིལ་ཀྲུང་བཞུགས༔ གནས་གསུམ་ཨོཾ་དཀར་ཨཱ༔དམར་ཧཱུྃ་མཐིང་མཚན༔ ཧ་ཁོག་ནང་དུ་ཐུགས་སྲོག་ཧྲཱིཿདཀར་པོ༔ ཟླ་འོད་ལྟར་འཚེར་འོད་ཟེར་ཕྱོགས་བཅུར་འཕྲོས༔ སྐུ་གསུམ་ཞིང་གི་རྒྱལ་བ་རྒྱ་མཚོའི་ཚོགས༔ ཐུགས་རྗེ་ཆེན་པོའི་སྐུ་ཡིག་ཕྱག་མཚན་དང༔ འོད་ལྔའི་རྣམ་པས་དམ་ཚིག་པ་ལ་བསྟིམ༔ སྤོས་རོལ་དབྱངས་བཅས་འདི་སྐད་དོ༔ ཧྲཱིཿ བདེ་ལྡན་ཞིང་གི་མགོན་པོ་འོད་དཔག་མེད༔ གྲུ་འཛིན་སྤོ་ནས་འཕགས་མཆོག་པད་དཀར་འཆང༔ དཔལ་རིའི་རྒྱན་གཅིག་རིག་འཛིན་པདྨ་འབྱུང༔ རྡུལ་སྙེད་ཞིང་གི་རྒྱལ་བ་སྲས་དང་བཅས༔ བརྩེ་ཆེན་ཐུགས་རྗེ་ཆེན་པོས་ཉེར་དགོངས་ནས༔ སྐུ་གསུང་ཐུགས་ཀྱི་བྱིན་རླབས་ནུས་པའི་མཐུས༔ ཚེ་འདས་སྒོ་གསུམ་རྟེན་ལ་དབབ་ཏུ་གསོལ༔ གང་དུ་སྡོད་གནས་འཕགས་པའི་ཞིང་ཁམས་དང༔ སྣང་ཚད་ཐུགས་རྗེ་ཆེན་པོའི་སྐུ་རུ་གྱུར༔ སྒྲ་གྲགས་ཡི་གེ་དྲུག་པའི་རང་སྒྲ་དང༔ དྲན་རྟོག་ཅི་ཤར་སྟོང་ཉིད་སྙིང་རྗེའི་ངང༔ སྒོ་གསུམ་སྐུ་གསུང་ཐུགས་སུ་བྱིན་གྱིས་རློབས༔ རྩ་སྔགས་ཡི་གེ་བཅུ་པའི་མཐར༔ ཛྙཱ་ན་བཛྲ་ཨཱ་ཝེ་ཤ་ཡ་ཕེཾ་ཕེཾ༔ ཇི་སྲིད་བྱང་ཆུབ་སྙིང་པོའི་བར༔ ཡེ་ཤེས་ལྷ་དེ་བརྟན་པར་བསམ༔ ཏིཥྛ་བཛྲ༔ ཞེས་ཀྱང་བརྗོད༔ དེ་ནས་དཀྱིལ་འཁོར་ལྷ་ཚོགས་ལ༔ མེ་ཏོག་དོར་བ་འདི་བཞིན་བྱ༔ ཧོ༔ ཁ་ཏོག་ལྔ་ལྡན་ཡིད་འོང་མེ་ཏོག་འདི༔ དཀྱིལ་འཁོར་ལྷག་པའི་ལྷ་ལ་འབུལ་ལགས་ན༔ སྐུ་གསུང་ཐུགས་ཀྱི་རིགས་མཆོག་གང་ཡིན་པ༔ བདག་གི་ཡི་དམ་ལྷ་ལ་འབབ་པར་ཤོག༔ བཛྲ་པུཥྤེ་པྲ་ཏི་ཛ་ཧོ༔ རིགས་ཀྱི་མིང་བཏགས་ཅོད་པཎ་བསྩལ༔ གསེར་གྱི་ཐུར་མས་མིག་དར་བསལ༔ ཧོ༔ རང་བྱུང་རིག་པ་བདེ་གཤེགས་སྙིང་པོའི་ཞལ༔ འཕགས་མཆོག་ཐུགས་རྗེའི་ལྷ་དང་དབྱེར་མེད་ཀྱང༔ གློ་བུར་འཁྲུལ་བའི་ལིང་ཏོག་གིས་ལྡོང་པས༔ ཇི་བཞིན་མ་མཇལ་རབ་རིབ་གཉིས་འཛིན་སྐྱོན༔ གདམས་ངག་གསེར་གྱི་ཐུར་མས་བསལ་བར་བྱ༔ རང་གནས་ཡེ་ཤེས་ཆོས་སྐུའི་ཞལ་མཐོང་ཤོག༔ ཛྙཱ་ན་ཙཀྵུ་པྲ་བེ་ཤ་ཡ་ཕཊ༔ དཀྱིལ་འཁོར་མཐོང་བ་བསྟན་པ་ནི༔ བླ་མས་ངོ་སྤྲོད་འདི་བཞིན་བྱ༔ ཨེ་མ་ཧོ༔ ལེགས་པར་གསོན་ཅིག་ཚེ་འདས་རིགས་ཀྱི་བུ༔ ཕྱི་ལྟར་གཟུགས་བརྙན་རྣམ་དག་ལྷ་ཡི་དལ༔ ནང་ལྟར་ཕུང་པོ་ཁམས་དང་སྐྱེ་མཆེད་ཀུན༔ ཡི་དམ་དཀྱིལ་འཁོར་ལྷ་དང་གཉིས་སུ་མེད༔ གསང་བ་རང་གི་སེམས་ཉིད་སྟོང་པའི་གཤིས༔ སྐྱེ་བ་མེད་པ་སངས་རྒྱས་ཆོས་ཀྱི་སྐུ༔ རང་བཞིན་རྩལ་སྣང་འགགས་མེད་ལོངས་སྤྱོད་རྫོགས༔ སྣ་ཚོགས་ཅིར་ཡང་འཆར་བ་སྤྲུལ་བའི་གར༔ ཡིད་བཞིན་ནོར་དང་དཔག་བསམ་ལྗོན་ཤིང་ལྟར༔ འཁོར་འདས་ཀུན་གྱི་དགོས་འདོད་འདི་ལས་འབྱུང༔ ལྟོས་ཤིག་རང་གི་སེམས་ཉིད་ཡི་དམ་ལྷ༔ རང་ཞལ་མཇལ་བའི་ངང་དུ་མཉམ་པར་ཞོག༔ ཨ་ཨ་ཨ༔ དེ་ནས་སྐུ་ཡི་དབང་བསྐུར་ནི༔ བུམ་པ་སློབ་མའི་སྤྱི་བོར་བཞག༔ ཧྲཱིཿ བུམ་པའི་རང་བཞིན་ཡེ་ནས་གཞལ་ཡས་ཁང༔ ནང་བཅུད་འཕགས་པའི་སྐུ་དང་གཉིས་སུ་མེད༔ ཚེ་འདས་རིགས་ཀྱི་བུ་ལ་དབང་བསྐུར་བས༔ ལུས་སྒྲིབ་དག་ནས་སྐུ་ཡི་དབང་ཐོབ་ཤོག༔ རྩ་སྔགས་ཡི་གེ་དྲུག་པའི་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ བུམ་ཆུ་བསྩལ་ཞིང་ཤིས་པ་བརྗོད༔ ཡིག་དྲུག་སྔགས་བྱང་མགྲིན་པར་བཞག༔ ཧྲཱིཿ ཕྱོགས་བཅུའི་ཞིང་གི་སྲས་བཅས་རྒྱལ་ཀུན་གྱི༔ གསུང་གི་དབྱིག་ཀུན་ཡི་གེ་དྲུག་པར་འདུས༔ ཚེ་འདས་རིགས་ཀྱི་བུ་ལ་དབང་བསྐུར་བས༔ ངག་སྒྲིབ་དག་ནས་གསུང་གི་དབང་ཐོབ་ཤོག༔ རྩ་སྔགས་མཐར་ཝཀྐ་ཨ་བྷི་ཥིཉྩ་ཨཱ༔ ཐུགས་རྟེན་མན་ཤེལ་སྙིང་ཁར་བཞག༔ ཧྲཱིཿ སེམས་ཀྱི་རང་བཞིན་ངོ་བོ་ཀ་ནས་དག༔ རྩལ་སྣང་འགགས་མེད་ཡེ་ཤེས་ལྔ་རུ་འཆར༔ མཚོན་བྱེད་རྟེན་འབྲེལ་རྫས་མཆོག་མན་ཤེལ་འདིས༔ ཚེ་འདས་རིགས་ཀྱི་བུ་ལ་དབང་བསྐུར་བས༔ རྟག་ཆད་གཉིས་འཛིན་ཡིད་ཀྱི་སྒྲིབ་པ་དག༔ སྟོང་གསལ་འཕགས་པའི་ཐུགས་ཀྱི་དབང་ཐོབ་ཤོག༔ རྩ་སྔགས་ཡི་གེ་དྲུག་པའི་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ སྤྲོ་ན་ལྷ་དབང་ཡོངས་རྫོགས་བསྐུར༔ ཤིས་བརྗོད་དམ་ཚིག་ཁས་བླངས་དང༔ དགེ་བསྔོ་གསང་སྔགས་སྤྱི་དང་མཐུན༔ ས་མ་ཡཱ༔