བསྐང་བསྡུས་དོན་གཉིས་ལྷུན་གྲུབ།
༄༅༔ ཚེ་སྒྲུབ་འཆི་མེད་མཆོག་སྟེར་ལས༔ བསྐང་བསྡུས་དོན་གཉིས་ལྷུན་གྲུབ་བཞུགས༔
བསྐང་རྫས་བྱིན་བརླབས་སྤྱི་ལྟར་བྱས༔ ཧྲཱིཿ རང་བཞིན་སྐུ་གསུམ་དག་པའི་ཞིང་ཁམས་ནས༔ བླ་མ་ཡི་དམ་དཔའ་བོ་མཁའ་འགྲོ་དང་༔ ཚེ་བདག་རྒྱལ་བ་རིགས་ལྔའི་ལྷ་ཡི་ཚོགས༔ ཐུགས་དམ་དབང་གིས་བསྐང་བའི་གནས་འདིར་གཤེགས༔ ཆགས་བྲལ་པདྨ་ཉི་ཟླའི་གདན་ལ་བཞུགས༔ ལུས་ངག་ཡིད་གསུམ་གུས་པས་ཕྱག་འཚལ་ལོ༔ དངོས་འབྱོར་ཡིད་སྤྲུལ་ཀུན་བཟང་མཆོད་སྤྲིན་འབུལ༔ སྐུ་གསུང་ཐུགས་ཡོན་ཕྲིན་ལས་རྫོགས་ལ་བསྟོད༔ ཁྱད་པར་ཐུགས་དམ་བསྐང་བའི་དམ་རྫས་ནི༔ མེ་ཏོག་བདུག་སྤོས་མར་མེ་དྲི་ཆབ་དང་༔ ཞལ་ཟས་རོལ་མོ་འདོད་པའི་ཡོན་ཏན་ལྔ༔ རྩ་བརྒྱད་ཡན་ལག་སྟོང་སྦྱར་ཨ་མྲྀ་ཏ༔ ཉོན་མོངས་རྒྱུ་དྲུག་དབྱིངས་སུ་བསྒྲལ་བའི་ཁྲག༔ འབྲུ་སྨན་རྩི་བཅུད་སྦྱར་བའི་བྷ་ལིང་ཏ༔ ཕྱག་རྒྱ་གར་དང་གླུ་དབྱངས་སྙན་འཇེབས་སྒྲས༔ རྩ་གསུམ་དཀྱིལ་འཁོར་ལྷ་ཚོགས་ཐུགས་དམ་བསྐང་༔ གཏི་མུག་གནས་དག་ཆོས་དབྱིངས་ཡེ་ཤེས་ངང་༔ བྷུདྡྷ་རིགས་ཀྱི་ཚེ་ལྷ་གཙོ་དང་འཁོར༔ ཚེ་ཡི་ལྷ་མོ་སྒོ་སྐྱོང་མགྱོགས་མར་བཅས༔ རབ་འབྱམས་དཀྱིལ་འཁོར་ལྷ་ཚོགས་ཐུགས་དམ་བསྐང་༔ ཞེ་སྡང་དབྱིངས་གྲོལ་མེ་ལོང་ཡེ་ཤེས་ངང་༔ རྡོ་རྗེ་རིགས་ཀྱི་ཚེ་ལྷའི་ཐུགས་དམ་བསྐང་༔ ང་རྒྱལ་གནས་དག་མཉམ་ཉིད་ཡེ་ཤེས་ངང་༔ རིན་ཆེན་རིགས་ཀྱི་ཚེ་ལྷའི་ཐུགས་དམ་བསྐང་༔ འདོད་ཆགས་གནས་དག་སོར་རྟོག་ཡེ་ཤེས་ངང་༔ པདྨ་རིགས་ཀྱི་ཚེ་ལྷའི་ཐུགས་དམ་བསྐང་༔ ཕྲག་དོག་དབྱིངས་གྲོལ་བྱ་གྲུབ་ཡེ་ཤེས་ངང་༔ ཀརྨ་རིགས་ཀྱི་ཚེ་ལྷའི་ཐུགས་དམ་བསྐང་༔ རྟོག་ཚོགས་གནས་དག་སྐུ་གསུམ་ཡེ་ཤེས་ངང་༔ ལྷ་དང་དྲང་སྲོང་རིག་འཛིན་ཐུགས་དམ་བསྐང་༔ ཚེ་ཡི་བར་ཆད་དབྱིངས་སུ་སྒྲོལ་མཛད་པ༔ བཀའ་གཏེར་དམ་ཅན་སྲུང་མའི་ཐུགས་དམ་བསྐང་༔ དེ་ལྟར་ཐུགས་དམ་བསྐང་བའི་བྱིན་རླབས་ཀྱིས༔ ཚེ་རབས་སྔོན་ནས་ད་ལྟའི་བར་དག་ཏུ༔ སྲོག་གཅོད་ལ་སོགས་དུས་མིན་འཆི་བའི་རྒྱུ༔ མི་དགེའི་ལས་རྣམས་ཅི་བགྱིས་བྱང་གྱུར་ཅིག༔ དུག་ལྔའི་རང་གཟུགས་བགེགས་དང་ལོག་འདྲེན་གྱིས༔ ཚེ་སྲོག་བརྐུས་དང་ཕྲོག་པ་སོར་ཆུད་ནས༔ འཆི་མེད་ཚེ་དང་རྒས་མེད་ལང་ཚོར་ལྡན༔ ཚེ་ཡི་རིག་འཛིན་རྡོ་རྗེའི་སྐུ་འགྲུབ་ཤོག༔ ཕ་རོལ་རིག་སྔགས་མཁན་གྱི་བྱད་ཕུར་གྱིས༔ བླ་ཚེ་སྲོག་དབུགས་གཏད་དུ་བཅུག་པ་སོགས༔ ཉ་གང་ཟླ་བ་གཟའ་ལས་ཐར་བ་ལྟར༔ ཉེས་པའི་སྐྱོན་བྲལ་ལེགས་ཚོགས་གོང་འཕེལ་ཤོག༔ མཚན་དཔེས་བརྒྱན་པ་རྡོ་རྗེའི་སྐུ་འགྲུབ་ཅིང་༔ ཡན་ལག་དྲུག་ཅུ་ཚངས་པའི་དབྱངས་དང་ལྡན༔ འཕོ་མེད་བདེ་སྟོང་རྒྱལ་བའི་ཐུགས་ཀློང་དང་༔ གསང་གསུམ་འཆི་མེད་མགོན་པོ་མཆོག་འགྲུབ་ཤོག༔ ཅེས་པའང་བསྐང་བཤགས་ཉུང་བསྡུས་སྨོན་ལམ་དང་འབྲེལ་བ་འདི་ཉིད་བཙུན་ཆུང་ལུང་རྟོགས་བསྟན་འཛིན་གྱིས་ངོར༔ ཆོས་ཀྱི་བདག་པོ་རང་ཉིད་ཀྱིས་ཤར་མར་སྤེལ་བ་ཀུན་ནས་ཀུན་ཏུ་དགེ་ཞིང་བཀྲ་ཤིས་པར་གྱུར་ཅིག༔ དགེའོ༔ དགེའོ༔ དགེའོ༔ བཀྲ་ཤིས་སོ༔