ཚེ་དབང་འཆི་བདག་གཡུལ་འཇོམས།

ཡང་ཟབ་འཕགས་པའི་ཐུགས་སྒྲུབ་ལས༔ ཚེ་དབང་འཆི་བདག་གཡུལ་འཇོམས་ཞེས་བྱ་བ་བཞུགས་སོ༔ ཨི་ཐི༔

རང་བྱུང་འཆི་མེད་རྡོ་རྗེའི་སྐུ༔ ཚེ་མཐའ་ཡས་པའི་ཞབས་ལ་འདུད༔ བརྒྱུད་འཛིན་སྐལ་ལྡན་ཆོས་བདག་ལ༔ ཚེ་འཕྲང་བར་ཆད་སེལ་བའི་ཐབས༔ བདག་ཉིད་ཨོ་རྒྱན་མཁས་པ་ཡིས༔ དབྱངས་ཅན་སྤྲུལ་པ་མཚོ་རྒྱལ་དང༔ ལྷ་སྲས་མུ་རུབ་བཙད་པོ་སོགས༔ ལས་ལྡན་རྗེ་འབངས་གྲོགས་བདུན་ལ༔ འཕགས་པའི་བཀའ་བཞིན་གཏད་རྒྱ་བྱ༔ མ་འོངས་དུས་ལ་བབ་པའི་ཚེ༔ ལས་སྐལ་ལྡན་པའི་གསོས་སུ་ཤོག༔ ས་མ་ཡཱ༔ དབེན་པའི་གནས་སུ་དཀྱིལ་འཁོར་དབུས༔ སྒྲུབ་རྫས་རང་གཞུང་བཞིན་དུ་བྱ༔ ལས་ཀྱི་གཞུང་བསྲང་བསྙེན་པ་གཏོང༔ བུམ་པར་ལྷ་བསྐྱེད་མཆོད་བསྟོད་བྱ༔ ཚེ་འགུགས་དངོས་གྲུབ་འདི་བཞིན་བླངས༔ ཧཱུྃ་ཧྲཱིཿ མ་བཅོས་རང་བྱུང་ཚེ་ཡི་ལྷ༔ དོན་དམ་བརྗོད་བྲལ་རང་རྩལ་ལས༔ ཀུན་རྫོབ་མཚན་མའི་རྫས་ལ་བརྟེན༔ དམིགས་པས་གསལ་ཞིང་སྔགས་ཀྱིས་བསྐུལ༔ ད་ལྟ་བསྙེན་སྒྲུབ་མཐའ་རུ་ཕྱིན༔ དངོས་གྲུབ་སྩོལ་བའི་དུས་ལ་བབས༔ འགྱུར་མེད་སྐུ་ཡི་དཀྱིལ་འཁོར་ནས༔ གཞོམ་བྲལ་ཚེ་ཡི་དངོས་གྲུབ་སྩོལ༔ མ་འགགས་གསུང་གི་དཀྱིལ་འཁོར་ནས༔ མི་ཤིགས་རྡོ་རྗེའི་ཚེ་དབང་སྐུར༔ སྟོང་གསལ་ཐུགས་ཀྱི་དཀྱིལ་འཁོར་ནས༔ སྤྲོས་བྲལ་མཁྱེན་བརྩེའི་དཔལ་ཡོན་སྩོལ༔ ལུས་ལ་སྐུ་ཡི་དངོས་གྲུབ་སྩོལ༔ ངག་ལ་གསུང་གི་དངོས་གྲུབ་སྩོལ༔ ཡིད་ལ་ཐུགས་ཀྱི་དངོས་གྲུབ་སྩོལ༔ གུ་རུ་དྷེ་ཝ་ཌཱཀྐི་ནི་ཨ་ཡུར་ཛྙཱ་ན་ཀཱ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧཱུྃ་ཨཱ༔ ལྷ་ཉིད་འོད་ཞུ་བདུད་རྩིར་གྱུར༔ ཡི་གེ་བརྒྱ་པས་བརྟན་པར་བྱ༔ དེ་ནས་སློབ་མ་མདུན་དུ་འཁོད༔ བདུད་རྩི་འཁྱིལ་བའི་ལྷ་སྔགས་ཀྱིས༔ ཁྲུས་བྱ་བགེགས་བསྐྲད་བསྲུང་འཁོར་བསྒོམ༔ སྤྱི་དང་བྱེ་བྲག་ལོ་རྒྱུས་བརྗོད༔ མཎྚལ་འབུལ་ཞིང་དབང་དོན་དུ༔ གསོལ་འདེབས་འདི་བཞིན་རྗེས་ཟློས་བྱ༔ ཀྱཻ༔ འཆི་མེད་འཕགས་མཆོག་ཚེ་ཡི་ལྷ༔ བརྩེ་བའི་ཐུགས་ཀྱིས་དགོངས་སུ་གསོལ༔ ཚེ་སྲོག་ཆད་ཉམས་གསོ་བའི་ཕྱིར༔ ཚེ་ཡི་དབང་མཆོག་བསྐུར་དུ་གསོལ༔ དེ་ནས་བླ་མས་ལན་འདི་བརྗོད༔ ཀྱཻ་ཧོ༔ ལེགས་པར་གསོན་དང་སྐལ་ལྡན་རྣམས༔ རྣམ་མཁྱེན་སངས་རྒྱས་སྒྲུབ་པ་ལ༔ ལུས་རྟེན་རྙེད་དཀའ་འཆི་རྐྱེན་མང༔ དེ་ཕྱིར་ཚེ་ལ་དབང་བསྒྱུར་ཕྱིར༔ འཕགས་མཆོག་སྤྱན་རས་གཟིགས་དབང་གི༔ ཚེ་ཡི་དབང་བསྐུར་ཟབ་མོ་ཡིས༔ ཁྱེད་རྣམས་རྗེས་སུ་འཛིན་པར་བྱ༔ དབང་བསྐུར་དམ་སྡོམ་ཀུན་གྱི་གཞི༔ སྐྱབས་སུ་འགྲོ་ཞིང་སེམས་བསྐྱེད་ནས༔ ཡན་ལག་བདུན་གྱི་ཚོགས་བསགས་བྱ༔ དངོས་གཞི་བྱིན་འབེབས་བྱ་བ་ནི༔ སྭ་བྷ་ཝ་ཡི་སྔགས་བརྗོད་པས༔ ཆོས་ཀུན་མི་དམིགས་སྟོང་པའི་ངང༔ པདྨ་ཟླ་བའི་དཀྱིལ་འཁོར་དབུས༔ མདུན་བསྐྱེད་གཙོ་བོ་ཡབ་ཡུམ་གྱི༔ སྦྱོར་མཚམས་སློབ་མའི་རྣམ་ཤེས་ནི༔ ཡི་གེ་ཧྲཱིཿཡིག་དམར་པོ་ཉིད༔ ཞུ་བདེ་སྔགས་ཀྱི་སྒྲ་དང་བཅས༔ ཐོག་བབས་ཚུལ་གྱིས་བྱུང་བ་ལས༔ འཕགས་མཆོག་ཚེ་ལྷ་ཡབ་ཡུམ་བསྐྱེད༔ སྤྱི་མགྲིན་སྙིང་ལྟེ་གསང་གནས་ལྔར༔ ཚེ་ལྷ་རིགས་ལྔ་ཡབ་ཡུམ་གསལ༔ ཐུགས་སྲོག་ས་བོན་འབྲུ་ལྔ་ལས༔ འོད་འཕྲོས་ཡེ་ཤེས་སེམས་དཔའ་ནི༔ སྐུ་གསུམ་ཞིང་ནས་སྐུ་ཡིག་ཐུགས༔ ཕྱག་མཚན་རྣམ་པར་ཆར་ལྟར་ཕབ༔ ས་གསུམ་མེར་མེར་ཁྲིག་ཁྲིག་བསྒོམ༔ སྤྱན་འདྲེན་སྔགས་རོལ་དམིགས་པ་གཏད༔ ཕེབ་རྟགས་ལུས་རྔུལ་འདར་འཁྲབ་པ༔ སཾ་སྐྲྀ་ཏ་དང་བརྡ་སྐད་སྒྲོག༔ བདེ་གསལ་མི་རྟོག་ངེས་འབྱུང་ཉམས༔ བྱུང་ཚེ་སྔགས་འདིས་བརྟན་པར་བྱ༔ ཏིཥྛ་བཛྲ་སྭཱ་ཧཱ་བརྗོད༔ སློབ་མ་ཚེ་བདག་ཡབ་ཡུམ་གྱི༔ གནས་ལྔར་བྱུང་བའི་འོད་ཟེར་གྱིས༔ འབྱུང་ལྔའི་བཅུད་བསྡུས་ལོག་འདྲེན་ལྔའི༔ ལག་ནས་ཚེ་སྲོག་བརྐུས་པ་ཕྲོག༔ སློབ་མར་བསྟིམས་ཤིང་རྒྱས་གདབ་བྱ༔ དེ་ནས་དབུས་ཀྱི་བུམ་པ་ཡི༔ དབང་བསྐུར་མཆོག་ཐོབ་གྱུར་བསམ་ཏེ༔ ཧཱུྃ་ཧྲཱིཿ བུམ་པའི་ངོ་བོ་སྟོང་དབྱིངས་སུ༔ བཅུད་མཆོག་ཚེ་ཡི་ལྷ་ཚོགས་ཀྱི༔ སྐུ་གསུང་ཐུགས་ཀྱི་བྱིན་རླབས་དབང༔ སྐལ་ལྡན་བུ་ལ་སྩལ་བ་ཡིས༔ ཚེ་ཡི་བར་ཆད་ཀུན་ཞི་ནས༔ འཆི་མེད་རྡོ་རྗེའི་སྲོག་འགྲུབ་ཤོག༔ རྩ་སྔགས་ཤམ་དུ་ཀ་ལ་ཤ་ཨ་བྷི་ཥིཉྩ་ཧཱུྃ༔ བུམ་པ་གནས་བཞིར་གཏུགས་བྱས་ཏེ༔ ཨོཾ་འཕགས་མཆོག་ཚེ་ཡི་ལྷ་ཚོགས་ཀྱི༔ ལྷ་དབང་ལུས་ལ་ཐོབ་པར་ཤོག༔ ལུས་ནི་སྲ་བརྟན་ཆོས་བདུན་ལྡན༔ འཕགས་མཆོག་སྐུ་དང་དབྱེར་མེད་ཤོག༔ རྩ་སྔགས་ཤམ་དུ་ཀཱ་ཡ་ཨ་བྷི་ཥིཉྩ་ཧཱུྃ༔ བུམ་ཆུ་སྤྱི་བོའི་གཙུག་ཏུ་བླུགས༔ ཨཱ༔ འཕགས་མཆོག་ཚེ་ཡི་ལྷ་ཚོགས་ཀྱི༔ སྔགས་དབང་ངག་ལ་ཐོབ་པར་ཤོག༔ ངག་ནི་གཞོམ་བྲལ་ན་དཱའི་དབྱངས༔ འཕགས་མཆོག་གསུང་དང་དབྱེར་མེད་ཤོག༔ རྩ་སྔགས་ཤམ་དུ་ཝཀྐ་ཨ་བྷི་ཥིཉྩ་ཧཱུྃ༔ བུམ་ཆུ་མགྲིན་པར་འཐོར་ཞིང་བླུད༔ ཧཱུྃ་འཕགས་མཆོག་ཚེ་ཡི་ལྷ་ཚོགས་ཀྱི༔ ཆོས་དབང་སེམས་ལ་ཐོབ་པར་ཤོག༔ སེམས་ནི་སྟོང་ཉིད་སྙིང་རྗེའི་ངང༔ འཕགས་མཆོག་ཐུགས་དང་དབྱེར་མེད་ཤོག༔ རྩ་སྔགས་ཤམ་དུ་ཙིཏྟ་ཨ་བྷི་ཥིཉྩ་ཧཱུྃ༔ སྙིང་ཀར་གཏུགས་ནས་ངོ་སྤྲོད་གདབ༔ ཧྲཱིཿ འཕགས་མཆོག་ཚེ་ཡི་ལྷ་ཚོགས་ཀྱི༔ ཡོན་ཏན་ཕྲིན་ལས་དབང་ཐོབ་ཤོག༔ ཀུན་གཞིའི་བག་ཆགས་ཆོས་སྐུར་དག༔ འཕགས་མཆོག་ཡོན་ཏན་དབྱེར་མེད་ཤོག༔ རྩ་སྔགས་ཤམ་དུ་གུ་ཎ་ཀརྨ་ཨ་བྷི་ཥིཉྩ་ཧཱུྃ༔ སྲིད་རྩ་ལྟེ་བའི་ཐད་ཀར་བཞག༔ སྤྲོ་ན་ཚིག་ཕྲད་སྦྱར་བྱས་ཏེ༔ ལྷ་དབང་མ་ལུས་བསྐུར་ཀྱང་རུང༔ ལག་གཡས་ཚེ་ཡི་རིལ་བུ་བྱིན༔ ཧྲཱིཿ འགྱུར་མེད་ཚེ་ཡི་རིལ་བུ་ཡིས༔ སྐལ་ལྡན་བུ་ལ་དབང་བསྐུར་བས༔ སྣང་སྲིད་ཚེ་ཡི་བཅུད་ཐོབ་ནས༔ དུས་མིན་འཆི་བ་ལས་གྲོལ་ཤོག༔ རྩ་སྔགས་ཤམ་དུ་ཨ་ཡུ་དྷ་ར་ཨ་བྷི་ཥིཉྩ་བྷྲུཾ༔ ལག་གཡོན་བདུད་རྩིའི་བཏུང་བ་བྱིན༔ ཧྲཱིཿ ཚེ་བདག་ཡབ་ཡུམ་དངས་མའི་བཅུད༔ སྐལ་ལྡན་བུ་ལ་དབང་བསྐུར་བས༔ རྩ་ཁམས་ཐིག་ལེ་ཉམས་པ་སོས༔ འབྱུང་འཁྲུགས་ནད་ལས་རྒྱལ་བར་ཤོག༔ རྩ་སྔགས་ཤམ་དུ་ཨ་ཡུ་དྷ་རི་ཨ་བྷི་ཥིཉྩ་བྷྲུཾ༔ དེ་ནས་ཚེ་གཏོར་སྤྱི་བོར་བཞག༔ བརྒྱུད་པའི་མཚན་བརྗོད་བྱིན་རླབས་ཞུ༔ ཞེས་པས། ཨོཾ་ཨཱ༔ཧཱུྃ༔ ཆོས་སྐུ་འཆི་མེད་ཚེ་མཐའ་ཡས་པ་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ ལོངས་སྐུ་འཆི་མེད་ཕྱག་ན་པདྨོ་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ སྤྲུལ་སྐུ་འཆི་མེད་པདྨ་འབྱུང་གནས་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ མཁའ་འགྲོའི་གཙོ་མོ་ཡེ་ཤེས་མཚོ་རྒྱལ་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ མངའ་བདག་ཚངས་པ་ལྷ་ཡི་མེ་ཏོག་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ ལྷ་སྲས་མཆོག་གྱུར་མུ་རུབ་བཙད་པོ་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ ཐུགས་སྲས་མཁར་ཆེན་དཔལ་གྱི་དབང་ཕྱུག་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ སྤྲུལ་པའི་གང་ཟག་ལུང་རིག་གླིང་པ་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ ཆོས་བདག་བསྟན་འཛིན་སྐྱེས་མཆོག་དམ་པ་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ དཀྱིལ་འཁོར་གཙོ་མཆོག་གངས་ཅན་ལྷ་གཅིག་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ ཤེས་རབ་སྟོང་དབྱིངས་ལྷ་མོ་ཙནྟྲ་ལི༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ ཕུང་ལྔའི་བདུད་འཇོམས་ཚེ་བདག་རིགས་ལྔ་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ འབྱུང་ལྔའི་བཅུད་འདུས་རིགས་ཀྱི་ཡུམ་ལྔ་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ བར་ཆད་བགེགས་འདུལ་དབང་ཆེན་རྒྱལ་པོ་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ ལྷ་དང་དྲང་སྲོང་དམ་ཅན་སྲུང་མ་ལ༔ གསོལ་བ་འདེབས་སོ་ཚེ་ཡི་དངོས་གྲུབ་སྩོལ༔ སྐལ་ལྡན་བུ་ཡི་སྒོ་གསུམ་བྱིན་གྱིས་རློབས༔ རྩ་སྔགས་བརྗོད་ཅིང་ཚེ་རྫས་བྱིན༔ མཐའ་རྟེན་ཚེ་འགུགས་རྒྱས་གདབ་བྱ༔ བཀྲ་ཤིས་བརྗོད་ཅིང་མེ་ཏོག་འཐོར༔ དམ་ཚིག་ཁས་བླངས་གཏང་རག་གཏོང༔ དགེ་བ་བསྔོ་ཞིང་དགའ་སྟོན་བྱ༔ དེས་ནི་དུས་ཟད་མི་ཡིན་ཀྱང༔ ལོ་གསུམ་ཚེ་ཡི་གེགས་ལས་གྲོལ༔ བསླུ་མེད་རྒྱལ་བའི་བཀའ་དང་བསྟུན༔ རྣོ་ནུས་ཐོན་པ་གཏེར་གྱི་རྟགས༔ དགོངས་གསང་ཟབ་མོའི་ཆོས་འདི་ཡི༔ བརྒྱུད་འཛིན་སྲོག་མཐུད་ཤི་སོས་སྨན༔ སྙིང་གི་བུ་ལ་གཏད་དོ་རྒྱ༔ གུ་ཧྱ༔ ལུང་རིག་གླིང་པའི་དགོངས་གཏེར་རོ༎