བསྐང་བ་འདོད་དགུའི་ཆར་འབེབས་རྒྱ་ལྷས་མཛད་པ།
༄༅། དབང་ཆེན་སྣང་སྲིད་ཟིལ་གནོན་གྱི། །བསྐང་བ་འདོད་དགུའི་ཆར་འབེབས་བཞུགས། །དབང་ཆེན་སྣང་སྲིད་ཟིལ་གནོན་གྱི། །ཐུགས་དམ་བསྐང་བའི་རིམ་པ་ནི། །བསྐང་རྫས་ཡོ་བྱད་འདུ་བྱས་ལ། །པདྨ་དབང་གི་ཏིང་འཛིན་གྱིས། །ཧྲཱིཿབཛྲ་ཀྲོ་དྷས་བསངས། སྭ་བྷ་ཝས་སྦྱངས། བྷྲུཾ་ལས་གནས་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་ཆུ་གཉིས་ཉེར་སྤྱོད་འདོད་ཡོན་སྲོག་ཆགས་གོ་མཚོན་སོགས་ཕྱི་ནང་གསང་བའི་སྤྱན་གཟིགས་བསམ་གྱིས་མི་ཁྱབ་པ་རྩ་བ་གསུམ་གྱི་ལྷ་ཚོགས་སྤྱི་དང་། ཁྱད་པར་པདྨ་དབང་ཆེན་ཁམས་གསུམ་ཟིལ་གནོན་དཀྱིལ་འཁོར་གྱི་ལྷ་ཚོགས་སྲུང་མ་དམ་ཅན་རྒྱ་མཚོའི་ཚོགས་རྣམས་ཀྱི་ཐུགས་དམ་མ་ལུས་པ་སྐོང་བར་ནུས་པའི་བྱེད་ལས་ཁྱད་པར་ཅན་དང་ལྡན་པར་གྱུར། །ཨོཾ་སརྦ་བིད་པུ་ར་པུ་ར་སུ་ར་སུ་ར་ཨ་ཝརྟ་ཡ་ཨ་ཝརྟ་ཡ་ཧོ། བཛྲ་སྥ་ར་ཎ་ཁཾ་སྭཱ་ཧཱ། ཞེས་དང་ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབས། ཧྲཱིཿ སྐྱེ་མེད་ཆོས་སྐུའི་ཀློང་ལས་ལྷུན་གྲུབ་གདངས། །ལོངས་སྐུ་ཁམས་གསུམ་ཟིལ་གནོན་དབང་ཆེན་ལྷ། །སྤྲུལ་སྐུ་སྒྱུ་འཕྲུལ་རོལ་པ་བསམ་ཡས་འགྱེད། །གང་ལ་གང་འདུལ་རྩ་གསུམ་ལྷ་ཚོགས་ཀྱི། །སྐུ་གསུང་ཐུགས་ཀྱི་དགྱེས་པ་བསྐྱེད་ནུས་པའི། །ངོ་མཚར་རྨད་བྱུང་ཀུན་བཟང་མཆོད་པའི་སྤྲིན། །དངོས་སུ་བཤམས་དང་བླ་མེད་ཡིད་ཀྱིས་སྤྲུལ། །ས་གསུམ་གནས་ཀུན་ཡོངས་སུ་བཀང་བྱས་ཏེ། །དབང་ཆེན་ཁམས་གསུམ་ཟིལ་གནོན་ལྷ་ལ་འབུལ། །དུག་གསུམ་རྣམ་དག་སྨན་རཀ་གཏོར་མ་དང་། །བཟའ་བཅའ་བཏུང་བ་ལྡག་གཞིབ་ཚོགས་ཀྱི་རྫས། །ཛ་གད་གསེར་སྐྱེམས་མྱོང་གྲོལ་སྨན་ཕུད་སྦྱར། །བདེ་ཆེན་ཡེ་ཤེས་བསྐྱེད་པའི་རྫས་མཆོག་འདི། །པདྨ་དབང་ཆེན་ཐུགས་དམ་བསྐང་ཕྱིར་བཤམས། །ཁྲག་གི་ཡོན་ཆབ་དབང་ལྔའི་པུཥྤེ་ཀ །ཤ་ཆེན་དུད་སྤྲིན་ཚིལ་ཆེན་ཨ་ལོ་ཀེ། །ཁྲག་ཞག་དྲི་ཆབ་ཤ་རུས་ཞལ་ཟས་དང་། །མཆོག་ཆེན་རྐང་གླིང་ཐོད་རྔ་སིལ་སྙན་དུང་། །དབང་ཆེན་ལྷ་ཚོགས་དགྱེས་པའི་རྫས་སུ་བསྟར། །རླུང་གི་ཤུགས་ལྡན་ཅང་ཤེས་མྱུར་མགྱོགས་རྟ། །རིན་ཆེན་རྭ་རྨིག་ལྡན་པའི་གཡག་རྒོད་དང་། །རེག་འཇམ་བལ་ལྡན་ཡིད་འོང་ལུག་གི་ཁྱུ། །འདོད་འཇོའི་བ་དང་ར་སྐྱེས་སྤུ་སྡུག་མཛེས། །བྱ་རོག་རྒོད་དང་ཁྲ་གླག་མང་པོ་འཕྱོ། །སེང་སྟག་དོམ་དྲེད་ལྕེ་སྤྱང་ཁྱི་ནག་ཚོགས། །རྟ་མགྲིན་ལྷ་ཚོགས་མཉེས་པའི་རྫས་སུ་བཀོད། །རྟག་གཏོར་རྒྱུན་གཏོར་དུས་ཀྱི་གཏོར་མ་དང་། །གླིང་བཞི་གླིང་ཕྲན་རི་རབ་ཉི་ཟླར་བཅས། །མཚོན་བྱེད་བསྐང་མདོས་རྟེན་མདོས་ངོ་མཚར་ལྡན། །སྣ་ཚོགས་དར་དང་རལ་གུ་སག་ལྷྭམ་དང་། ཁྲབ་རྨོག་གོ་བེར་ལྕགས་ཞུ་ལུག་རྒྱུད་གོས། །མདའ་གཞུ་མདུང་གྲི་དགྲ་སྟྭ་ཁྲམ་ཤིང་ཞགས། །ཕུར་པ་རྡོ་རྗེ་ཆུ་སྲིན་རྒྱལ་མཚན་བཅས། །དཀྱིལ་འཁོར་ལྷ་ཚོགས་མཉེས་པའི་རྫས་སུ་འབུལ། །དཔལ་གྱི་ཆས་བཅུ་དུར་ཁྲོད་ཆས་བརྒྱད་དང་། །རིན་ཆེན་རྒྱན་དང་བླ་བྲེ་འཕན་གདུགས་དར། །བླ་རྡོ་སྲོག་འཁོར་སྦ་སྨྱུག་རྩེ་རྒྱལ་སོགས། །ཕྱི་ནང་གསང་རྟེན་མ་ཚང་མེད་པ་རྣམས། །དཀྱིལ་འཁོར་ལྷ་ཚོགས་དགྱེས་པ་བསྐྱེད་ཕྱིར་འབུལ། །དེ་ལྟར་ལེགས་བཤམས་མཆོད་རྫས་བསྐང་རྫས་དང་། །བསྒྲུབ་རྫས་རྟེན་རྫས་དཔག་མེད་ཕུལ་བྱུང་འདིས། །དགུ་ལྡན་བརྒྱུད་པའི་བླ་མའི་ཐུགས་དམ་བསྐང་། །བདེ་གཤེགས་ཞི་བའི་ལྷ་ཚོགས་ཐུགས་དམ་བསྐང་། །འབར་བ་ཁྲག་འཐུང་ལྔ་བཅུའི་ཐུགས་དམ་བསྐང་། །དབང་ཆེན་ཁམས་གསུམ་ཟིལ་གནོན་ཐུགས་དམ་བསྐང་། །ཡུམ་ཆེན་པདྨ་གར་དབང་ཐུགས་དམ་བསྐང་། །རིགས་བདག་ཨ་མི་དྷེ་ཝའི་ཐུགས་དམ་བསྐང་། །ཡེ་ཤེས་བྱ་ཁྱུང་རྒྱལ་པོའི་ཐུགས་དམ་བསྐང་། །དབང་ཆེན་རིགས་བཞིའི་ལྷ་ཚོགས་ཐུགས་དམ་བསྐང་། །འཇམ་དཔལ་སྐུ་ཡི་ལྷ་ཚོགས་ཐུགས་དམ་བསྐང་། །པདྨ་གསུང་གི་ལྷ་ཚོགས་ཐུགས་དམ་བསྐང་། །ཡང་དག་ཐུགས་ཀྱི་ལྷ་ཚོགས་ཐུགས་དམ་བསྐང་། །ཆེ་མཆོག་ཡོན་ཏན་ལྷ་ཚོགས་ཐུགས་དམ་བསྐང་། །ཕུར་པ་ཕྲིན་ལས་ལྷ་ཚོགས་ཐུགས་དམ་བསྐང་། །མ་མོ་རྦོད་གཏོང་ལྷ་ཚོགས་ཐུགས་དམ་བསྐང་། །རིག་འཛིན་སློབ་དཔོན་ལྷ་ཚོགས་ཐུགས་དམ་བསྐང་། །དམོད་པ་དྲག་སྔགས་ལྷ་ཚོགས་ཐུགས་དམ་བསྐང་། །འཇིག་རྟེན་མཆོད་བསྟོད་ལྷ་ཚོགས་ཐུགས་དམ་བསྐང་། །དཔལ་གྱི་བཀའ་སྲུང་ལྷ་ཚོགས་ཐུགས་དམ་བསྐང་། །སྒོ་སྲུང་ཁྲོ་བོ་བཞི་ཡི་ཐུགས་དམ་བསྐང་། །སྔགས་སྲུང་ཨེ་ཀ་ཙ་ཊིའི་ཐུགས་དམ་བསྐང་། །མ་ཅིག་དུད་སོལ་ལྷ་མོའི་ཐུགས་དམ་བསྐང་། །ལྷ་ཆེན་དབང་ཕྱུག་ཆེན་པོའི་ཐུགས་དམ་བསྐང་། །གནོད་སྦྱིན་ཙི་དྲ་དམར་པོའི་ཐུགས་དམ་བསྐང་། །དཔལ་མགོན་བདུན་ཅུ་རྩ་ལྔའི་ཐུགས་དམ་བསྐང་། །དམ་ཅན་དྲེགས་པ་ལྷ་ལྔའི་ཐུགས་དམ་བསྐང་། །དྲང་སྲོང་གཟའ་གདོང་ལྕམ་དྲལ་ཐུགས་དམ་བསྐང་། །བཀའ་སྡོད་བེག་ཙེ་ལྕམ་དྲལ་ ཐུགས་དམ་བསྐང་། །ལས་མཁན་སྲོག་བདག་དམར་པོའི་ཐུགས་དམ་བསྐང་། །གྲི་ཐོགས་བཤན་པའི་ཚོགས་ཀྱི་ཐུགས་དམ་བསྐང་། །སྣང་སྲིད་ལྷ་སྲིན་སྡེ་བརྒྱད་ཐུགས་དམ་བསྐང་། །འཁོར་ཚོགས་དམ་ཅན་རྒྱ་མཚོའི་ཐུགས་དམ་བསྐང་། །ཐུགས་དམ་གཉན་པོ་དབྱིངས་སུ་སྐོང་གྱུར་ནས། །སྐུ་གསུང་ཐུགས་དང་འགལ་བའི་ཉེས་ཚོགས་བཤགས། །ཞི་རྒྱས་དབང་དྲག་ཕྲིན་ལས་རྣམ་བཞི་སོགས། །རབ་འབྱམས་ཕྲིན་ལས་གང་བརྩམས་མྱུར་འགྲུབ་ཅིང་། །འཕྲལ་ཕུག་བདེ་སྐྱིད་དཔལ་ཡོན་ཡོངས་ཚང་བཞིན། །སྲིད་འདིའི་བླ་ན་མངོན་པར་མཐོ་བ་དང་། །ངེས་པར་ལེགས་པའི་དཔལ་ལ་ལོངས་སྤྱོད་མཛོད། །ཅེས་བསྐང་བའི་ཆོ་གས་བསྐྱེད་རྫོགས་ཀྱི་ཆག་ཉམས་དག་པར་བྱས་ནས་ཚོགས་ལ་རོལ་བར་བྱའོ། །དེ་ལྟར་བསྐང་བའི་ལས་རིམ་འདི། །གྲུབ་དབང་བྱང་ཆུབ་རྡོ་རྗེའི་གསུངས། །ཕ་ཆོས་བུ་ཡི་ཁ་བསྐང་དུ། །རྨོངས་པ་རྒྱ་ལྷས་བཞག་པའོ། །ཉེས་ཚོགས་མ་ལུས་དག་གྱུར་ཅིག །སརྦ་དཱ་ཀ་ལྱཱ་ཎཾ་བྷ་ཝ་ཏུ། །