རྟ་མགྲིན་དབང་གི་མཚམས་སྦྱོར་ལས་ཅན་སྙིང་ གི་དགའ་སྟོན་ལྕམ་སྤྲུལ་གྱིས་མཛད་པ།

༄༅། རྟ་མགྲིན་སྣང་སྲིད་ཟིལ་གནོན་གྱི་དབང་གི་མཚམས་སྦྱོར་ལས་ཅན་སྙིང་ གི་དགའ་སྟོན་ཞེས་བྱ་བ་བཞུགས་སོ།།

༄༅། བླ་མ་དང་དབྱེར་མེད་པའི་བཅོམ་ལྡན་འདས་པདྨ་དབང་གི་རྒྱལ་པོ་ལ་ཕྱག་འཚལ་ལོ། །སྒོ་གསུམ་རྡོ་རྗེ་གསུམ་དུ་འགྲུབ་པར་མཛད་དུ་གསོལ། དེ་ལ་འདིར་འགྲོ་འདུལ་ལུང་རིག་གླིང་པའི་དགོངས་གཏེར་དབང་ཆེན་སྣང་སྲིད་ཟིལ་གནོན་གྱི་དབང་གི་མཚམས་སྦྱོར་ནི། ཐོག་མར་ལས་བྱང་གཞུང་བཞིན་བཟླས་པ་ཡན་ཆད་གྲུབ་རྗེས། གཙོ་བུམ་བསྒྲུབ་པ་ནི། ཧྲཱིཿ བྷྲུཾ་ཡིག་ལས་བྱུང་རིན་ཆེན་སྣ་ཚོགས་ཀྱི། །ཕྱི་ནི་བུམ་པ་ནང་ནི་གཞལ་ཡས་ཁང་། །མཚན་ཉིད་ཡོངས་རྫོགས་དབུས་དང་ཕྱོགས་མཚམས་སུ། །དཔལ་ཆེན་ཁྲག་འཐུང་ཧྱ་གྷྲི་ཝ་ཡི། །གཙོ་འཁོར་ཡོངས་རྫོགས་མེ་ལོང་གཟུགས་བརྙན་བཞིན། །སྣང་ལ་རང་བཞིན་མེད་པའི་རྣམ་པར་གསལ། །བདག་བསྐྱེད་ཐུགས་ཀའི་སྔགས་ལས་འོད་ཟེར་འཕྲོས། །གཟུངས་ཐག་ལ་འཁྲིལ་བུམ་པའི་ནང་དུ་ཞུགས། །ཐུགས་རྒྱུད་བསྐུལ་ནས་འོད་འཕྲོས་དོན་གཉིས་བྱས། །ཚུར་འདུས་ལྷ་ཚོགས་སྙོམས་འཇུག་དགའ་བཞི་ཡི། །བདུད་རྩིའི་རྒྱུན་བབས་བུམ་པ་གང་བར་གྱུར། །བསྙེན་པ་སྟོང་རྩ་ལས་མི་ཉུང་བར་བཏང་རྗེས། མཆོད་བསྟོད་ཀྱི་མཐར། ཨོཾ་ཨཱཿཧཱུྃ། ལྷ་ཚོགས་འོད་དུ་ཞུ་ནས་བུམ་ཆུ་དང་གཉིས་མེད་དུ་འདྲེས་པར་གྱུར། ཡི་གེ་བརྒྱ་བས་བརྟན་པར་བྱས་ནས། ལས་བུམ་ལ་དམིགས་ནས། ཨོཾ་སྭ་བྷ་ཝ་སོགས། ཧཾ། སྟོང་པའི་རང་རྩལ་བྷྲུཾ་ལས་སྐད་ཅིག་གིས། །ལས་བུམ་ཚད་དང་མཚན་ཉིད་ཡོངས་རྫོགས་པ། །དཔག་བསམ་ཁ་རྒྱན་ཡན་ལག་བརྒྱད་ལྡན་ཆུས། །སུམ་གཉིས་གང་བའི་དབུས་སུ་པད་སྡོང་སྟེང་། །ཉི་ཟླའི་གདན་ཁར་ཧྲཱིཿཡིག་འཕྲོ་འདུ་ལས། །ཁྲོ་རྒྱལ་ལས་རབ་དབང་ཆེན་སྐུ་མདོག་ལྗང་། །ཞལ་གཅིག་ཕྱག་གཉིས་རལ་གྲི་རྩེ་གསུམ་འཛིན། །དུར་ཁྲོད་ཆས་ལྡན་མེ་དཔུང་ཀློང་ན་བཞུགས། །ཐུགས་ཀར་ཉི་སྟེང་ཧྲཱིཿལས་སྔགས་ཕྲེང་འཁོར། །འོད་འཕྲོས་དོན་གཉིས་བྱས་ནས་ཚུར་འདུས་པས། །བུམ་ལྷའི་སྐུ་ལས་དག་བྱེད་བདུད་རྩིའི་རྒྱུན། །བབས་ནས་ལས་ཀུན་འགྲུབ་པའི་ནུས་ལྡན་གྱུར། །ཨོཾ་ཀརྨ་ཀྲོ་ཏ་མ་ཧཱ་ཤྲི་ཧེ་རུ་ཀ་ཧཱུྃ་ཕཊ༔ ཅི་ནུས་བཟླས་མཐར་ལས་ཀྱི་བྱ་བ་མ་རྫོགས་ཀྱི་བར་དུ་བརྟན་པར་བཞུགས་པར་བསམ། དེ་ནས་སླར་བདག་འཇུག་ནི། བདག་གི་ཐུགས་ཀ་ནས་འོད་ཟེར་མཆོད་པའི་ཚུལ་དུ་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། སྐུ་ཡི་ཆ་ཐམས་ཅད་ནས་འོད་ཟེར་ཁ་དོག་སྣ་ཚོགས་དངོས་གྲུབ་ཀྱི་ཚུལ་དུ་བདག་གི་གནས་བཞིར་ཐིམ་པས་དབང་བཞི་ཡོངས་སུ་རྫོགས་པ་ཐོབ་པར་གྱུར།ཧྲཱིཿ ཁྲོ་རྒྱལ་རྔམ་པ་རྟ་མཆོག་དཔལ། །དཔལ་གྱི་སྐུ་གསུང་ཐུགས་མཆོག་ལས། །མཆོག་གི་དངོས་གྲུབ་ཡེ་ཤེས་དབྱིག །དུས་འདིར་རྣལ་འབྱོར་བདག་ལ་སྩོལ། ། ཨོཾ་པདྨ་ཀྲོ་ཏ་ཀཱ་ཡ་ཝཀྐ་ཙིཏྟ་ཨ་ལ་ལ་ཧོ། ཞེས་དབང་རྫས་གནས་བཞིར་གཏུག། །དེ་ནས་བཀའ་གཏེར་སྲུང་མའི་གསོལ་མཆོད་དང་། །ཚོགས་བསྐང་བཅས་རྫོགས་འཕྲལ། དྲངས་བའི་མགོ་དེར་དབང་དངོས་ལ་འཇུག་པ་ནི། །གཏེར་གཞུང་ལས། །རང་དང་མདུན་རྟེན་བུམ་པར་བཅས༔ ལྷར་གསལ་བསྙེན་ཅིང་དབང་བཞི་བླངས༔ སྐལ་ལྡན་ཁྲུས་ཕྱུང་བགེགས་སྡིག་སྦྱོང༔ བློ་སྦྱངས་དབང་མདོག་མཎྜལ་འབུལ༔ ཞེས་གསུངས་པ་ལྟར་འོག་ཏུ་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱས་ལ། སློབ་བུ་རྣམས་མདུན་དུ་འཁོད་དེ། ཁྲུས་བྱ་བ་ནི། ཧཱུྃ༔ བདེ་གཤེགས་རྒྱལ་བ་སོགས་ཡི་གེ་བརྒྱ་པ་བཟླས་རྗེས། བགེགས་གཏོར་ལ་དམིགས་ཏེ། ཨོཾ་ཀརྨ་ཀྲོ་ཏ་མ་ཧཱ་ཤྲཱི་ཧེ་རུ་ཀ་ཧཱུྃ་ཕཊ༔ ཨོཾ་སྭ་བྷཱ་ཝ་སོགས། སྟོང་པའི་ངང་ལས་བྷྲུཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བའི་ནང་དུ་བགེགས་རིགས་ལན་ཆགས་ཀྱི་མགྲོན་རྣམས་དགྱེས་པར་བྱེད་པའི་གཏོར་མ་འདོད་པའི་ཡོན་ཏན་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ༔ཧོ༔ ལན་གསུམ་ ཨོཾ་སརྦ་བྷུ་ཏ་སོགས་ལན་གསུམ་དང་། ན་མཿསརྦ་ཏ་ཐཱ་ག་ཏ་སོགས་ལན་གསུམ་གྱིས་བསྔོས་མཐར། བགེགས་ལ་བཀའ་བསྒོ་བ་ནི། ཧྲཱིཿ ང་ནི་པདྨ་ཧེ་རུ་ཀ། །ཁྲག་འཐུང་སྐུ་ཡི་དཀྱིལ་འཁོར་ནས། །སྤྲུལ་པའི་ཁྲོ་ཆུང་སྣང་སྲིད་གང་། །གདུག་པའི་མཚོན་ཆ་སྣ་ཚོགས་འཛིན། །རབ་ཁྲོས་བསྐལ་པའི་མེ་དཔུང་འབར། །བགེགས་དང་ལོག་འདྲེན་བར་ཆད་རྣམས། །རྡུལ་དུ་བརླག་པར་གདོན་མི་ཟ། །ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། ཁྱད་པར་དུ་བཅོམ་ལྡན་འདས་པདྨ་གར་གྱི་དབང་ཕྱུག་ཁྲག་འཐུང་ཧྱ་གྷྲི་ཝའི་དཀྱིལ་འཁོར་གྱི་ལྷ་ཚོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པའི་བཀའ་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས། དེང་འདིར་རྡོ་རྗེ་སློབ་མ་འདི་རྣམས་གསང་སྔགས་ཐེག་པའི་སྒོར་བཅུག་ནས་དབང་བསྐུར་ཟབ་མོ་བསྐུར་བ་ལ་བར་དུ་གཅོད་པའི་བགེགས་ཚོགས་ཐམས་ཅད་རང་རང་གི་སྤྱོད་ཡུལ་དུ་མཐུན་པའི་བརྔན་སྦྱིན་ཆེན་པོ་འདི་ཡིས་ཚིམ་པར་གྱིས་ལ་རང་གནས་སུ་དེངས་ཤིག འདྲེ་འཇིགས་ཀྱི་དུད་པས་བདུག་ཅིང་། རྩ་སྔགས་དང་ཧཱུྃ་བཞིའི་སྔགས་ཀྱིས་ཐུན་བྲབ། རོལ་མོའི་སྒྲ་འཁྲོལ་བ་དང་བཅས་བསྐྲད་མཐར། རང་གཞུང་གི་སྲུང་འཁོར་བསྒོམ། དེ་ནས་མེ་ཏོག་བཀྱེ་བསྡུ་བྱས་ཤིང་། འོ། ད་ལམ་ཁྱེད་རྣམས་ཀྱིས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་རྒྱུད་ཀྱི་དྲི་མ་མཐའ་དག་བསལ་ནས་རྫོགས་པའི་སངས་རྒྱས་ཀྱི་གོ་འཕང་ལ་མྱུར་དུ་འགོད་པར་བགྱིའོ་སྙམ་པའི་ཐུགས་འདུན་སེམས་བསྐྱེད་དང་ལྡན་པའི་སྒོ་ནས་ཀུན་སློང་དང་ཀུན་སྤྱོད་མདོ་རྒྱུད་རྣམས་ནས་ཇི་སྐད་གསུངས་པ་བཞིན་གསལ་གདབ་སྟེ་ལེགས་པར་གསན་འཚལ། གང་གསན་པར་བྱ་བའི་ཆོས་ནི་བདག་ཅག་གི་སྟོན་པ་རྒྱལ་བ་ཡང་དག་པར་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་རྣམས་ཀྱིས་གདུལ་བྱའི་དབང་པོ་དང་ཁམས་དང་བསམ་པ་དང་མཐུན་པའི་ཆོས་ཀྱི་རྣམ་གྲངས་བསམ་གྱིས་མི་ཁྱབ་ཅིང་བརྗོད་པའི་མཐའ་དང་བྲལ་ཡང་། མདོར་བསྡུས་ན། རྒྱུ་ཕར་ཕྱིན་གྱི་ཐེག་པ་དང་། འབྲས་བུ་སྔགས་ཀྱི་ཐེག་པ་གཉིས་སུ་འདུས་ཏེ། ད་ལམ་འདིར་ནི་འབྲས་བུ་གསང་སྔགས་རྡོ་རྗེ་ཐེག་པ་དེ་ལའང་གསར་རྙིང་གཉིས་ལས། འདིར་གཞན་ལས་ཁྱད་པར་དུ་འཕགས་པ་གསང་སྔགས་རྙིང་མ་ཞེས་བཀའ་གཏེར་དག་སྣང་གསུམ་གྱི་ནང་ཚན། གདུལ་བྱ་དུས་བབས་ཀྱི་ཆོས་འདི་ཁོ་ནའི་ལོ་རྒྱུས་ཀྱི་དབང་དུ་བྱས་ན། རིག་འཛིན་ཉི་མ་གྲགས་པའི་གཏེར་བྱོན་ཟབ་ཆོས་པདྨ་དྲག་ཁྲོས་ཀྱི་ལུང་བསྟན་ལས། བྱ་འམ་ཁྱི་ཡི་ལོ་བ་གསང་སྨེ་ཅན༔ འདི་ནི་རྩ་བའི་ཆོས་བདག་སྐྱེས་བུ་ཡིན༔ རྡོ་རྗེ་མཁའ་འགྲོས་བྱིན་གྱིས་བརླབས་པའི་བུ༔ མཚོ་རྒྱལ་སྤྲུལ་པ་རྒྱལ་གྱི་མིང་ཅན་འབྱུང་༔ ཞེས་གསུངས་པ་ལྟར་གསུམ་ལྡན་ངུར་སྨྲིག་གར་གྱི་རྣམ་རོལ་འཆང་ཞིང་རྒྱུད་དོན་མཐའ་ཡས་པ་རྒྱ་མཚོ་ལྟ་བུ་ལ་དབང་འབྱོར་ནས་རྣམ་དག་དབང་གི་ཆུ་བོ་ཆེན་པོ་བཞི་ཡི་བདུད་རྩིས་སྙིགས་དུས་ཀྱི་སྐལ་བཟང་རྣམས་ཀྱི་རེ་བ་སྐོང་བར་མཛད་པ། མཉམ་མེད་ལུང་རིག་གླིང་པ་དེ་ཉིད་མ་དག་འཁྲུལ་ངོར་གློ་བུར་དུ་ཤར་བའི་རྟོག་ཚོགས་ཐམས་ཅད་དག་པ་རང་རིག་ཡེ་ཤེས་ཆོས་ཉིད་ཀྱི་ངང་དུ་འབྱམས་ཀླས་པའི་སྐབས་སུ་རྗེས་ཐོབ་སྒྱུ་མ་ལྟ་བུའི་ངང་ཉིད་ལས། ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཡབ་ཡུམ་དང་། རིག་འཛིན་འཇིགས་མེད་ཕྲིན་ལས་འོད་ཟེར་སོགས་རྒྱ་བོད་ཀྱི་པཎ་གྲུབ་དུ་མའི་ཡེ་ཤེས་སྒྱུ་མའི་སྐུས་རྗེས་སུ་བཟུང་ནས། རབ་འབྱམས་ལྷག་པའི་ལྷ་མ་ལུས་པའི་དཀྱིལ་འཁོར་དུ་བཅུག་ནས་དབང་བསྐུར་ཞིང་ཐུགས་ཉམས་སུ་བཞེས་པའི་ནང་ཚན། ད་ལམ་འདིར་ནི་རང་གཞུང་ལས། རྔམ་པ་དབང་གི་ཏནྟྲ་ཡི༔ བཅུད་ཕྱུང་འགྲོ་ལ་ཕན་པའི་ཕྱིར༔ ཞེས་གསུངས་པ་ལྟར། དབང་ཆེན་ཐུགས་ཀྱི་སྒྲུབ་པ་སྣང་སྲིད་ཟིལ་གནོན་གྱི་དབང་མཆོག་ཟབ་མོ་བར་ཆད་ཀུན་སེལ་ཞེས་བྱ་བ་དེ་བསྐུར་བའི་སྐབས་སུ་བབ་པ་ལ། རྡོ་རྗེ་སློབ་དཔོན་གྱི་བགྱི་འོས་རྣམས་གྲུབ་ཟིན་ནས། ད་ཁྱེད་རང་རྣམས་ཀྱིས་སྨིན་བྱེད་ཀྱི་དབང་བསྐུར་ཟབ་མོ་ཞུ་བའི་ཡོན་དུ་ཞིང་ཁམས་འབུལ་བར་ཞུ། ༈ དེ་ལྟར་མཎྜལ་འབུལ་བའི་རིམ་པ་སྔོན་དུ་སོང་ནས་ད་ཁྱེད་རང་རྣམས་ཀྱིས་སྔགས་ཀྱི་ཡོན་ཏན་རྗེས་སུ་དྲན་པའི་ངང་ནས་དབང་བཞི་ཡོངས་སུ་རྫོགས་པ་ཞུས་ནས་ལམ་བསྐྱེད་རྫོགས་ཟབ་མོ་ཐུན་བཞི་ལ་སོགས་པ་ཐུགས་ཉམས་སུ་བཞེས་ཤིང་། ཚེ་འདི་ལ་སྒོ་གསུམ་རྡོ་རྗེ་གསུམ་དུ་བསྒྲུབས་ནས་སེམས་ཅན་ཐམས་ཅད་ཡང་དག་པའི་ལམ་ལ་དཀྲི་བར་བྱའོ་སྙམ་པའི་དགའ་སྤྲོ་དང་བཅས་པས་གསོལ་བ་གདབ་པ་འདི་ཡི་རྗེས་ཟློས་མཛོད། ཀྱེ་ཧོ༔ བླ་མ་དབང་གི་རྒྱལ་༔ སོགས་ཅིག༔ དེ་ནས་བླ་མས་དྲི་བ་དང་སློབ་མ་དྲིས་ལན་དབུགས་དབྱུང་བཅས་རྫོགས་མཐར། རང་གཞུང་ལས། དེ་ནས་མདུན་མཁར་ཚོགས་ཞིང་བསྒོམ༔ ཁྱེད་ཤེས་བློ་ཡིས་སྐྱབས་འགྲོ་དང་༔ སེམས་བསྐྱེད་ལན་གསུམ་རྗེས་ཟློས་བྱ༔ དེ་ནས་རྒྱུད་སྦྱངས་ཚོགས་བསགས་ཕྱིར༔ ཡན་ལག་བདུན་གྱི་རྗེས་ཟློས་ནི༔ ཞེས་གསུངས་པ་ལྟར། ཁྱེད་རང་རྣམས་ཀྱིས་དམིགས་པ་འདི་བཞིན་ཏུ་མཛད་འཚལ། མདུན་གྱི་ནམ་མཁར་འཇའ་འོད་མེ་དཔུང་ཐིག་ལེ་རབ་ཏུ་འཁྲིགས་པའི་ཀློང་དུ་བླ་མ་དང་གཉིས་སུ་མེད་པ་དཔལ་ཁྲག་འཐུང་རྟ་མཆོག་རོལ་པ་ལ་འཁོར་ཡི་དམ་རྒྱུད་སྡེ་བཞི་དྲུག་སོགས་སྐྱབས་གྱུར་མ་ལུས་པ་ཏིལ་གྱི་གོང་བུ་ཁ་ཕྱེ་བ་བཞིན་མངོན་གསུམ་དུ་བཞུགས་པའི་སྤྱན་སྔར་རང་གཞན་སེམས་ཅན་ཐམས་ཅད་ཀྱིས་དུས་འདི་ནས་བཟུང་སྟེ་ཇི་སྲིད་བྱང་ཆུབ་མ་ཐོབ་ཀྱི་བར་དུ་སྐྱབས་སུ་འགྲོ་སྙམ་པས་འདིའི་རྗེས་ཟློས་མཛོད། ཧྲཱིཿ གདོད་ནས་སྤྲོས་བྲལ་སྲིད་ཞི་མཉམ་ཉིད་ཀློང་༔ ལྷུན་གྲུབ་རང་རྩལ་མཆོག་གསུམ་དབང་ཆེན་ལྷ༔ འགྲོ་ཀུན་རྣམ་མཁྱེན་གོ་སར་དབུགས་དབྱུང་ཕྱིར༔ བྱང་ཆུབ་སྙིང་པོའི་བར་དུ་སྐྱབས་སུ་མཆི༔ ལན་གསུམ། དེ་ལྟར་སྐྱབས་སུ་སོང་ནས་བསླབ་བྱའི་རིམ་པ་རྣམས་མདོ་རྒྱུད་ནས་ཇི་སྐད་གསུངས་པ་ལྟར་རང་རྒྱུད་ལ་ལེགས་པར་སྦྱར་ནས་སྲོག་གི་ཕྱིར་དུ་ཡང་དཀོན་མཆོག་གསུམ་མི་སྤང་བ་དང་། དུས་རྟག་ཏུ་དད་གུས་ཀྱིས་རྗེས་སུ་དྲན་པ་དང་མི་འབྲལ་བ་གལ་ཆེའོ། །དེ་ལྟར་སྐྱབས་སུ་སོང་བའི་ཕན་ཡོན་ཡང་། མདོ་ལས། སྐྱབས་གསོལ་བསོད་ནམས་འདི་ལ་གཟུགས་ཡོད་ན། །ནམ་མཁའ་བར་སྣང་འདི་ཡང་སྣོད་དུ་ཆུང་། །ཞེས་གསུངས་པས་དེ་ལྟར་སྐྱབས་སྡོམ་དེ་ཉིད་སྡོམ་པ་ཐམས་ཅད་ཀྱི་རྟེན་རྩིག་པའི་རྨིང་རྡོ་ལྟ་བུ་གཞི་བཞག་ནས། སླར་ཡང་ཚོགས་ཞིང་ཁྱད་པར་ཅན་དེ་དག་གི་མདུན་དུ་བྱང་ཆུབ་མཆོག་ཏུ་སེམས་བསྐྱེད་པ་ནི། འདི་ལྟར་ཁམས་གསུམ་རིགས་དྲུག་གིས་བསྡུས་པའི་སེམས་ཅན་ཐམས་ཅད་ཀྱིས་བདག་གི་ཕ་མར་མ་བྱས་པ་གཅིག་ཀྱང་མེད། དེ་དག་ཐམས་ཅད་སེམས་འཁྲུལ་བའི་དབང་དང་། ལས་དང་ཉོན་མོངས་པས་དཔག་ཏུ་མེད་པ་བསགས་པའི་དབང་གིས་འཁོར་བ་མྱ་ངན་གྱི་འབྲོག་ཆེན་པོ་ན་འཁྱམས་ཏེ་ཐབས་དང་ཤེས་རབ་ཀྱི་མིག་ནི་ལོང་། དགེ་བའི་བཤེས་གཉེན་ལོང་ཁྲིད་ལྟ་བུ་དང་བྲལ། སྦྱིན་པའི་རྒྱགས་ཕྱེ་ནི་མེད། ཚུལ་ཁྲིམས་ཀྱི་གཡང་ལུགས་ནི་བཤུས། མྱང་འདས་ཀྱི་གྲོང་ཁྱེར་དང་ནི་བྲལ། ངན་སོང་གི་འཇིགས་པ་དང་ནི་བཅས། ཉོན་མོངས་པ་དྲག་པོས་ནི་གཟིར། ལས་ཀྱི་རླུང་གིས་ནི་བདས་ཏེ་མ་རྣམས་ལ་ལ་སྡུག་བསྔལ་གྱི་རྒྱུ་ལ་སྤྱོད། ལ་ལ་སྡུག་བསྔལ་གྱི་འབྲས་བུ་ལ་སྤྱོད། ལ་ལ་ངན་སོང་ན་སྡུག་བསྔལ། ལ་ལ་མཐོ་རིས་ན་སྡུག་བསྔལ། ལ་ལ་བར་དོ་ན་སྡུག་བསྔལ་བའི་སེམས་ཅན་དེ་དག་ལ་བུ་གཅིག་པོ་དོང་ནང་དུ་ལྷུང་ན་མ་ཡིས་རང་གི་ལུས་སྲོག་ལ་མི་བལྟ་བར་དོང་ནང་དུ་ཞུགས་ནས་བུ་འདྲེན་པ་ལྟར། སེམས་ཅན་དེ་རྣམས་འཁོར་བའི་རྒྱ་མཚོ་ལས་བསྒྲལ་ཏེ་གཏན་གྱི་བདེ་བ་ལ་འགོད་པར་བགྱིའོ་སྙམ་པས་སེམས་བསྐྱེད་པ་འདི་ཡི་རྗེས་ཟློས་མཛོད། ཧྲཱིཿ ཡེ་དག་ཆོས་དབྱིངས་རང་ཞལ་མ་མཇལ་བས༔ གློ་བུར་རྐྱེན་སྣང་གཟུང་འཛིན་དགྲ་གདོན་བགེགས༔ བདེ་ཆེན་དག་པའི་དབྱིངས་སུ་སྒྲོལ་བའི་ཕྱིར༔ དཀྱིལ་འཁོར་ལྷ་ཚོགས་སྒྲུབ་པར་སེམས་བསྐྱེད་དོ༔ ལན་གསུམ། དེ་ལྟར་བྱང་ཆུབ་མཆོག་ཏུ་སེམས་བསྐྱེད་ནས་སྨོན་འཇུག་གི་བསླབ་བྱ་ལ་བསླབས་ཏེ་མ་ཉམས་པར་བསྲུང་ན་ཕན་ཡོན་ནི། མགོན་པོ་བྱམས་པས། བྱང་ཆུབ་ཀྱི་སེམས་ནི་སངས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ།།དཀར་པོའི་ཆོས་ཐམས་ཅད་འཕེལ་བའི་ཞིང་ས་ལྟ་བུའོ། །ཞེས་དང་། ད་ལྟ་ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་ཡོད་དོ་ཅོག་ཐམས་ཅད་བྱང་ཆུབ་ཀྱི་སེམས་ལ་བརྟེན་ནས་སངས་རྒྱས་པ་ཡིན་པས། དེ་ལྟ་བུའི་སེམས་བསྐྱེད་པའི་རྗེས་སུ་སླར་ཡང་རྒྱུད་དག་པར་བྱ་བའི་ཕྱིར་དུ་ཚོགས་བསགས་ཡན་ལག་བདུན་པ་འདི་ཡི་རྗེས་ཟློས་མཛོད༔ ཧོ༔ བླ་མ་དབང་ཆེན་ཡི་དམ་དཀྱིལ་འཁོར་ལྷ༔ སོགས། སྩོལ་ཕྱིར་བསྔོ༔ དེ་ལྟར་སྐྱབས་སུ་འགྲོ་བ་དང་སེམས་བསྐྱེད་པ་དང་ཡན་ལག་བདུན་གྱི་ཚོགས་བསགས་པ་རྣམས་ཀྱིས་ཁྱེད་རྣམས་དབང་བཞི་བསྐུར་བའི་སྣོད་དུ་རུང་བར་བྱས་པ་ཡིན་ནོ། །རང་གཞུང་ལས། བྱིན་རླབས་ཉེ་རྒྱུ་རིགས་བརྟག་ཕྱིར༔ མེ་ཏོག་གཏད་ཅིང་མིག་རས་གཡོགས༔ སློབ་མའི་སྒོ་གསུམ་སྟོང་པར་སྦྱངས༔ དམིགས་མེད་ངང་ནས་རིག་པ་ཧྲཱིཿ དམར་པོ་ཚེག་དྲག་ལྡན་པར་བསྒོམ༔ འོད་ཟེར་འཕྲོ་འདུ་དོན་གཉིས་བྱས༔ ལྷ་རུ་བསྐྱེད་ཅིང་ཡེ་ཤེས་དབབས༔ ཏིཥྛའི་སྔགས་ཀྱིས་བརྟན་པར་བྱ༔ རིགས་བརྟག་མེ་ཏོག་ལྷ་ལ་འབུལ༔ གདོང་གཡོགས་བཀྲོལ་ཞིང་གསང་མཚན་བཏགས༔ དཀྱིལ་འཁོར་རྣམ་དག་བཤད་པར་བྱ༔ ས་མ་ཡཱ༔ ཞེས་གསུངས་པ་ལྟར། སྔོན་ཆད་ཁྱེད་རྣམས་གཉིས་འཛིན་གྱི་དབང་གིས་དཀྱིལ་འཁོར་མཐོང་བ་རེ་ཞིག་བསྒྲིབས་པ་དང་མ་རིག་པས་ལྡོངས་པ་ཉིད་མཚོན་ཕྱིར་གདོང་གཡོགས་དམར་པོས་བཅིང་བའི་མོས་པ་མཛོད། ཧཱུྃ༔ ཞེས་པའི་སྔགས་ཀྱི་མིག་རས་གཏད༔ སླར་ཡང་སྣང་མཐའ་གཙོ་བོར་བྱས་པའི་རིགས་ལྔའི་སྔགས་ཀྱི་ས་བོན་ལས་སྐྱེས་པའི་མེ་ཏོག་ཕྲེང་བ་རང་རང་སྐྱེད་བྱེད་ཀྱི་ཡིག་འབྲུས་མཚན་པ་རེ་ལག་ཏུ་ཐོགས་པའི་འདུན་པ་མཛོད༔ ཨ་ཁཾ་བཱི་ར་ཧཱུྃ༔ རིན་པོ་ཆེ་སོགས་ཀྱི་མེ་ཏོག་ལག་ཏུ་གཏད་ལ། ཡེ་ཤེས་དབབ་པ་ནི། ལས་བུམ་གྱི་ཆུས་སློབ་མ་རྣམས་ལ་བྲན་ལ། ཨོཾ་ཀརྨ་ཀྲོ་ཏ་མ་ཧཱ་ཤྲི་ཧེ་རུ་ཀ་ཧཱུྃ་ཕཊ༔ ཨོཾ་སྭ་བྷ་ཝ་སོགས། སྟོང་པའི་ངང་ལས་པད་ཟླ་ཉི་མ་རུ་ཏྲའི་གདན་གྱི་ཁར་སློབ་མ་ཁྱེད་རང་རྣམས་ཀྱི་རྣམ་པར་ཤེས་པའི་ངོ་བོ་ཧྲཱིཿཡིག་དམར་པོ་ཚེག་དྲག་བཅས་པ་ལས་འོད་ཟེར་འཕྲོས། དོན་གཉིས་བྱས་ཚུར་འདུས། ས་བོན་ཡོངས་སུ་གྱུར་པ་ལས། སྐད་ཅིག་དྲན་རྫོགས་སུ་ཁྲོ་རྒྱལ་པདྨ་ཧེ་རུ་ཀ་སྐུ་མདོག་དམར་པོ་པདྨ་རཱ་གའི་ལྷུན་པོ་ལ་ཉིན་བྱེད་འབུམ་གྱི་འོད་ཟེར་འཁྱུད་པ་ལྟ་བུ། ཐུགས་རྔམ་ཞི་སྙིང་རྗེ་ཆེན་པོའི་ངང་ལས་མ་གཡོས་ཀྱང་། དག་པ་གཞན་དབང་གི་སྐུ་མཆོག་སྒེག་པ་དཔའ་བ་འཇིགས་སུ་རུང་བའི་རྣམ་འགྱུར་ཅན་གཡས་དཀར་གཡོན་སྔོ་དབུས་དམར་ནག་ཏུ་འབར་བའི་ཞལ་ནས་དགོད་གཤེ་དྲག་ཤུལ་གསུང་གི་ང་རོས་སྲིད་པ་གསུམ་པོ་སྐྱི་བུང་བྱེད་པ། ལོག་རྟོག་ཟིལ་གྱིས་གནོན་པའི་ཕྱིར་རལ་པ་ཁམ་ནག་གྱེན་དུ་འཁྲིགས་པའི་ཀློང་ན༔ ཡེ་ཤེས་བཞི་ལྡན་གྱི་རྟ་ཞལ་ལྗང་གུ་གསུམ་རྔོག་མ་དམར་པོ། ཕུམ་ཕུམ་སེར་པོ། ཞུར་དཀར་པོ་བཞད་པ་བརྒྱད་ལྡན་གྱི་འཚེར་སྒྲས་སྣང་སྲིད་མ་ལུས་དབང་དུ་སྡུད་པ། ཕ་རོལ་ཏུ་ཕྱིན་པ་དྲུག་གིས་འགྲོ་དྲུག་གནས་ནས་འདྲེན་པའི་བརྡར་ཕྱག་དྲུག་གི་དང་པོ་གཉིས་ཀྱིས་གྲི་གུག་དང་ཐོད་ཁྲག བར་མ་གཉིས་སྙིང་དང་སྦྲུལ་ཞགས། ཐ་ཕྱག་ཟུང་གིས་དབང་གི་ཕྱག་རྒྱ་མཛད་པ། སྲིད་ཞི་གཉིས་ཀྱི་མཐའ་ལ་མི་གནས་པའི་ཕྱིར་ཞབས་གཉིས་བརྐྱང་བསྐུམ་འདོར་ཐབས་སུ་བསྒྲད་པ། ཆོས་ཉིད་བསམ་གྱིས་མི་ཁྱབ་པའི་རོལ་རྩལ་ལས་དཔལ་གྱི་ཆས་བཅུ་དང་དུར་ཁྲོད་ཀྱི་ཆས་བརྒྱད་ཡོངས་སུ་རྫོགས་པའི་པང་དུ་ཡུམ་ཆེན་རལ་གཅིག་མ་སྐུ་མདོག་སྔོ་སྐྱ་ཞལ་གཅིག་ཕྱག་གཉིས་ཀྱི་གཡས་པས་ཐོད་ཁྲག་དང་། གཡོན་པས་ཙིཏྟ་བཟུང་ནས་མགུལ་དུ་འཁྱུད་ཅིང་། ཞབས་གཉིས་གར་སྟབས་ཀྱིས་དགའ་བཞི་བདེ་བ་ཆེན་པོ་སྟོང་པར་རྒྱས་གདབ་པའི་རྣམ་འགྱུར་གྱི་སྦྱོར་བ་ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་ན་བཞུགས་པའི་ཐུགས་ཀར་པདྨ་འདབ་མ་བརྒྱད་པའི་ལྟེ་བར་ཉི་ཟླའི་དཀྱིལ་འཁོར་གྱི་དབུས་སུ་ཧྲཱིཿཡིག་དམར་པོ་ལས་འོད་ཟེར་སྤྲིན་གྱི་ལྕུག་མ་ལྟ་བུ་ཕྱོགས་བཅུ་འཇིག་རྟེན་གྱི་ཁམས་ཐམས་ཅད་ཁྱབ་པར་འཕྲོས་ནས་དུས་གསུམ་རྒྱལ་བ་སྲས་དང་བཅས་པ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ་ནས་ཁྲག་འཐུང་ཧྱ་གྷྲཱི་ཝའི་གཟུགས་ཀྱི་སྐུ་རུ་བཞེངས་ཏེ། སྟེང་ནས་བྱོན་པ་ཐམས་ཅད་སྐྱིན་ཐང་དྲག་པོ་འཐོར་རླུང་གིས་བསྐྱོད་པ་ལྟ་བུ། བར་ནས་བྱོན་པ་ཐམས་ཅད་དུས་མཐའི་མེ་ལྕེ་བར་སྣང་ལ་འཕྲོ་བ་ལྟ་བུ། འོག་ནས་བྱོན་པ་ཐམས་ཅད་དབྱར་གྱི་སྨུག་པ་ཆར་རླུང་གིས་གཡེང་བ་བཞིན་བྱོན་ནས་ཁྱེད་རང་གི་སྒོ་གསུམ་དུ་རྡོ་ཚན་ལ་ཁ་བ་བབས་པ་བཞིན་སིབ་སིབ་ཐིམ་པའི་མོས་པ་མཛོད། ལུས་འཚོང་གི་འདོམས་དཀྲིས་དང་ཤ་ལྔ་བདུད་རྩི་ལྔ་བྱི་ལ་ནག་མོའི་བྲུན་གུ་གུལ་རྣམས་བསྲེས་ལ་ཐོད་ཆེན་གྱི་ནང་དུ་སོལ་ཆེན་གྱི་མེ་ལ་བསྲེགས་པའི་དུད་པ་དང་རོལ་མོའི་སྒྲ་དང་བཅས༔ རང་གཞུང་གི་སྤྱན་འདྲེན་མཐར། རྩ་སྔགས་ཀྱི་རྗེས་སུ། ཨོཾ་ཏིཥྛ་མ་ཧཱ་ཀྲོ་ཏ་ཨ་བེ་ཤ་ཡ་ཨ་ཧ་ཛྷེཾ༔ ཞེས་པའི་སྔགས་ཀྱིས་དབབས་མཐར། སྤྱན་དྲངས་པའི་ཡེ་ཤེས་པ་དེ་བྱང་ཆུབ་ཀྱི་བར་དུ་བརྟན་པར་གྱུར་ཅིག༔ ཨོཾ་སུ་པྲ་སོགས་སྭཱ་ཧཱ༔ དེ་ནས་ལྷག་པའི་ལྷ་དང་སྐལ་བ་མཐུན་པ་དེ་དངོས་གྲུབ་མྱུར་བའི་ཕྱིར་དེ་དང་ལས་འབྲེལ་བརྟག་ཅིང་སྐལ་བ་མཉམ་པར་བྱེད་པའི་དོན་དུ་ཁྱེད་རང་རྣམས་ཀྱི་ཕྱག་ཏུ་བཟུང་བའི་མེ་ཏོག་དེ་དཀྱིལ་འཁོར་དུ་དོར་བ་དང་མཉམ་དུ་སྔགས་འདིའི་རྗེས་ཟློས་མཛད་པར་ཞུ༔ པྲ་ཏིཙྪ་བཛྲ་ཧོ༔ ཞེས་མེ་ཏོག་དོར་ལ་རིགས་དང་མཐུན་པའི་མིང་གདག་གོ། །དེ་ནས་སློབ་དཔོན་གྱིས་གསེར་ཐུར་ཐོགས་ཏེ། ཁྱེད་རང་རྣམས་ཀྱི་མ་རིག་པ་མཚོན་པའི་གདོང་གཡོགས་དེ་ཉིད་རྡོ་རྗེ་གསེར་གྱི་ཐུར་མས་བསལ་ནས་གཟུགས་ཅན་ཐམས་ཅད་ལ་ཐོགས་པ་མེད་པ་རྡོ་རྗེའི་མིག་དང་། ཡེ་ཤེས་ཀྱི་དཀྱིལ་འཁོར་མཐོང་བས་སངས་རྒྱས་ཀྱི་སྤྱན་བླ་ན་མེད་པ་ཐོབ་པར་གྱུར་ཅིག བཛྲ་ཙཀྵུ་པྲ་བེ་ཤ་ཕཊ༔ ཞེས་པས་སྤྱན་དབྱེ་མཐར། དཀྱིལ་འཁོར་བསྟན་པ་ནི། ཧེ་བཛྲ་པཱ་ཤྱ༔ སྐལ་བཟང་ལས་དང་ལྡན་པ་ཁྱེད་རྣམས་ཀྱིས་གསང་སྔགས་དཀྱིལ་འཁོར་གཉན་པོ་མཐོང་བ་ཤིན་ཏུ་ལེགས་ཏེ། འདི་ལྟར་རྟེན་གཞལ་ཡས་ཁང་དངོས་ནི་ཡེ་ཤེས་ལྔ་མཚོན་པའི་ཕྱིར་ཕྱི་ནང་མེད་པར་མེ་དཔུང་འབར་བའི་ཀློང་། ཕོ་བྲང་གི་འོག་གཞི་ལྟེ་བ་མུ་ཁྱུད་དང་བཅས་པའི་འཁོར་ལོ་རྩིབས་བཞི་བ་ནི་རིགས་ལྔའི་རང་བཞིན་གྱི་བརྡ་རྟགས་དང་། ཚད་མེད་བཞི་ཡི་མཚོན་བྱེད་གྲུ་ཆད་བཞི་ཡིས་རྣམ་པར་བརྒྱན་པའོ། །དེ་ཡི་སྟེང་དུ་ཡེ་ཤེས་ཀྱི་གཞལ་ཡས་ཁང་ཡོན་ཏན་ཡོངས་སུ་རྒྱས་པའི་བརྡར་གྲུ་བཞི་བ་རྣམ་ཐར་བཞི་མཚོན་བྱེད་སྒོ་ཁྱུད་དང་ལྡན་པ། དབུས་སུ་རྣམ་པར་ཐར་པ་བརྒྱད་མཚོན་ཕྱིར་འཁོར་ལོ་རྩིབས་བརྒྱད་པ། བདེན་པ་བཞི་ཡི་མཚོན་བྱེད་རྟ་བབས་བང་རིམ་བཞི་བ། ཐོད་པ་སྐམ་རློན་རྙིད་གསུམ་གྱི་རྩིག་པ་ལ་གནམ་ལྕགས་ཀྱིས་གཟེར་གདབ་པ། སྦྲུལ་གྱི་ཟར་ཚག ཉི་ཟླའི་མཐོངས་ཁུང་། ཚངས་པའི་གདུང་། མཆོག་ཆེན་གྱི་ཀ་བ། རུས་སྦལ་གྱི་ཀ་གདན། ཞིང་གི་ལྕམ་དང་མཆོག་ཕྲན་གྱི་དྲལ་བ་གཡང་གཞིའི་ཐོག་གཡམ་དང་རྒྱུ་མའི་དྲྭ་བ་དོན་སྙིང་གི་དྲྭ་ཕྱེད་རྣམས་ཀྱིས་མཛེས་པ། སྒོ་བཞི་རུས་སྦལ་གྱི་མ་ཐེམ། ཆུ་སྲིན་གྱི་ཡ་ཐེམ་སྦྲུལ་ནག་གི་སྐྱེས་བུ། ཞིང་ཆེན་གྱི་སྒོ་གླེགས། གཟའ་སྐར་གྱི་ཁ་པད་སོགས་མདོར་ན་རྔམ་བརྗིད་མཛེས་པའི་རྒྱན་གྱིས་མ་ཚང་བ་མེད་པས་རབ་ཏུ་སྤུད་ཅིང་དབུས་ཕྱུར་བུར་མཐོ་བའི་རྩེ་ལ་བདག་ལྟ་དབྱིངས་སུ་སྒྲོལ་བའི་མཚོན་བྱེད་ཙིཏྟའི་ཏོག་གིས་བརྒྱན་པ། དེ་ཡི་ཕྱི་རོལ་ཏུ་འཁོར་བའི་སྐྱོན་གྱི་མ་གོས་པའི་བརྡར་པདྨའི་རྭ་བ་དང་། ཡུལ་བརྒྱད་གནས་སུ་དག་པའི་དུར་ཁྲོད་ཆེན་པོ་བརྒྱད། སྲ་བརྟན་རྡོ་རྗེའི་ཕྲེང་བ་དང་། ཡེ་ཤེས་ཀྱི་མེ་དཔུང་རབ་ཏུ་འབར་བས་བསྐོར་བའོ། །དེ་ལྟར་རྟེན་གཞལ་ཡས་ཁང་གི་ནང་དུ་བརྟེན་པའི་ལྷ་ནི། ཆོས་འབྱུང་གི་དབུས་སུ་དུག་གསུམ་གནས་སུ་དག་པའི་བརྡར་པད་ཟླ་ཉི་མའི་གདན་ཁར་གཟུང་འཛིན་རུ་ཏྲ་ཕོ་མོ་དང་བདུད་བཞི་བསྣོལ་བའི་ཁྲི་སྟེང་དུ་དུས་གསུམ་རྒྱལ་བ་ཐམས་ཅད་ཀྱི་གསུང་གི་དབང་ཕྱུག་དཔལ་ཆེན་པདྨ་ཧེ་རུ་ཀ་གདོད་ནས་སོར་རྟོག་ཡེ་ཤེས་ཀྱི་རང་མདངས་སྐུ་མདོག་དུས་མཐའི་མེ་ལྟར་དམར་བ། རྣམ་པར་ཐར་པ་གསུམ་དང་། ཕ་རོལ་ཏུ་ཕྱིན་པ་དྲུག་གི་བརྡ་རྟགས། དབུ་གསུམ་ཕྱག་དྲུག་པ། སྣང་སྲིད་དབང་དུ་སྡུད་པའི་བརྡ་རྟགས་སུ་རྟ་ཞལ་གསུམ་དང་ལྡན་པ། རྒྱུད་ལྔ་གནས་ནས་འཆིང་བར་མཛད་པའི་བརྡར་མཚོན་ཆ་སྣ་ཚོགས་བསྣམས་པ། མི་དགེ་བཅུ་ཚར་གཅོད་པའི་བརྡར་དཔལ་གྱི་ཆས་བཅུ་དང་། ཚོགས་བརྒྱད་གནས་སུ་དག་པའི་བརྡར་དུར་ཁྲོད་ཀྱི་ཆས་བརྒྱད། ས་ལམ་དུས་གཅིག་ཏུ་གཅོད་པའི་བརྡར་འབར་བའི་གར་དགུ་དང་ལྡན་པ། ཤེས་པས་སྲིད་པ་ལ་མི་གནས་ཤིང་སྙིང་རྗེས་ཞི་བ་ལ་མི་གནས་པའི་བརྡར་ཞབས་གཉིས་བརྐྱང་བསྐུམ་གྱི་འདོར་སྟབས་སུ་བསྒྲད་པ། ཁམས་གསུམ་ལས་རྣམ་པར་རྒྱལ་བའི་རྡོ་རྗེའི་གཤོག་ཟུང་མཁའ་ལ་གདེངས་པ། ཐབས་དང་ཤེས་རབ་གཉིས་སུ་མེད་པའི་བརྡར་ཡུམ་དང་གཉིས་མེད་དུ་འཁྲིལ་བ་ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་ན་བཞུགས་པའོ། །ཆོས་འབྱུང་གི་ཕྱོགས་བཞིར་དབང་ཆེན་རིགས་བཞི། འཁོར་ལོ་རྩིབས་བརྒྱད་ལ་བདེ་གཤེགས་སྒྲུབ་པ་བཀའ་བརྒྱད། ཁྱམས་ལ་མཁའ་འགྲོ་སུམ་ཅུ་རྩ་གཉིས། སྒོ་བཞིར་སྒོ་བ་ཡབ་ཡུམ་བརྒྱད་དང་བཅས་པ་མདོར་ན་པདྨ་གསུང་གི་དཀྱིལ་འཁོར་གྱི་ལྷ་ཚོགས་ཐམས་ཅད་མ་ཚང་མེད་པ་སྣང་ལ་རང་བཞིན་མེད་པ་བཀྲ་ལམ་གྱིས་མཐོང་བ་དེ་མཚོན་བྱེད་དཔེ་ཡི་དཀྱིལ་འཁོར་བསྟན་པ་ཡིན་ནོ། །ད་མཚོན་བྱ་དོན་དམ་པའི་དཀྱིལ་འཁོར་ནི། རང་གི་ཕུང་ཁམས་སྐྱེ་མཆེད་རྟོག་ཚོགས་ཐམས་ཅད་ཡེ་གདོད་མ་ནས་ལྷ་ཡི་དཀྱིལ་འཁོར་དུ་རང་ཆས་སུ་ཡོད་པ་དེ་ཉིད་རྟོགས་པའི་རྣལ་འབྱོར་པས་སྣང་སྲིད་འཁོར་འདས་ཀྱི་ཆོས་ཀུན་སྤང་བླང་དང་་དགག་སྒྲུབ་མེད་པར་རང་བྱུང་ཡེ་ཤེས་ཀྱི་དཀྱིལ་འཁོར་དུ་ཡེ་ནས་ལྷུན་གྱིས་གྲུབ་པ་མངོན་སུམ་དུ་མཐོང་བ་ཡིན་པས་དད་གུས་དང་སྤྲོ་བ་སྐྱེད་ཅིག དེ་ཡན་ཆད་ནི་འཇུག་པའི་ཆོ་ག་སྟེ་ནང་གསེས་ཀྱིས་ཕྱེ་ན། མེ་ཏོག་དོར་བ་ཡན་ཆད་དཀྱིལ་འཁོར་དུ་འཇུག་པ་སྟེ་ཕྱི་འཇུག་དང་། ཡེ་ཤེས་དབབ་པ། མིག་དབྱེ་བ། དཀྱིལ་འཁོར་བསྟན་པ་རྣམས་ནི་ནང་འཇུག་སྟེ་འཇུག་པའི་ཆོ་ག་རྣམས་གྲུབ་ཟིན་ནས། དངོས་གཞིའི་དབང་གི་དོན་དུ་མཎྜལ་ཕུལ༔ ༈ དེ་ལྟར་མཎྜལ་ཕུལ་ནས་དབང་བཞི་ཡོངས་རྫོགས་ཞུ་བའི་ཆེད་དུ་གསོལ་བ་གདབ་པ་འདི་ཡི་རྗེས་ཟློས་མཛོད། ཧོ༔ བླ་མ་སློབ་དཔོན་མགོན་པོ་ཡི༔ སོགས་ དུ་གསོལ༔ དེ་ནས་དབང་བཞི་གཏོར་མ་དང་བཅས་པ་བསྐུར་འཕྲལ་དུ་གཏེར་གཞུང་ལས། དེ་ནས་ལྷན་སྐྱེས་འདྲེ་ཡི་འཕྲུལ༔ བར་ཆད་དགྲ་འདྲེ་གཟུགས་ལ་བཀུག༔ ཕྱག་རྒྱ་བཞི་ཡི་རྒྱ་ཡིས་གདབ༔ རང་དང་སློབ་མ་ལྷ་རུ་གསལ༔ ལིངྒ་རང་གནོད་དགྲ་འདྲེར་གསལ༔ ཕུར་བུ་སྲས་མཆོག་དགྲ་བགེགས་གཤེད༔ རྡོ་རྗེ་གཞོན་ནུའི་སྐུ་རུ་གསལ༔ བསྒྲལ་ཞིང་ཤ་རུས་བདུད་རྩིར་དམིགས༔ རང་དང་སློབ་མས་རོལ་བྱས་ནས༔ མི་དམིགས་སྟོང་པའི་ངང་མདངས་བསྐྱངས༔ ཞེས་གསུངས་པ་ལྟར། བསྒྲལ་དབང་དངོས་ལ་འཇུག་པ་ནི། སློབ་དཔོན་གྱི་མདུན་དེར་དར་ནག ཕུར་པ། སྒྲོལ་གྲི། ལྕགས་སྣོད་དུ་ཉ་བོ་སྐྱེ་མཆེད་དོད་པ་རྣམས་འདུ་བྱས་ལ། གསལ་བ་གསུམ་ལྡན་གྱི་ལྟ་དགོངས་དང་ལྡན་པའི་ངང་ནས། ཨེ་རཾ༔ ཕཊ་རཾ༔ ཛྭ་ལ་རཾ༔ ནྲི་ཛ་ཏྲི་ཛ༔ མདུན་དུ་དུག་གསུམ་ལས་གྲུབ་པའི་བྲུབ་ཁུང་དམར་ནག་ཁ་དོག་ཅིང་མཐིལ་ཡངས་པ། གཤིན་རྗེའི་བཤའ་ཁང་ནག་པོ་རྔམ་འཐུག་ལ་དཔང་མཐོ་ཞིང་ལོགས་གཟར་བ། དེ་ཡི་ནང་དུ་ནྲྀ་དང་ཏྲི་ལས་བསྒྲལ་བའི་ཡུལ་དུ་གྱུར་པ་དེ་ཉིད་ཉམ་ཐག་པའི་རྣམ་པ་ཅན་དུ་གནས་པར་གྱུར། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། ཡི་དམ་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། ཁྱད་པར་དུ་བཅོམ་ལྡན་འདས་པདྨ་དབང་ཆེན་ཁྲག་འཐུང་ལྷ་དགུ་བདེ་གཤེགས་སྒྲུབ་པ་བཀའ་བརྒྱད་བདུན་ཉེར་ལྔའི་ལྷ་ཚོགས་རྣམས་ཀྱི་བཀའ་བདེན་པ་དང་། ཆོས་ཀྱི་དབྱིངས་རང་བཞིན་གྱིས་རྣམ་པར་དག་ཅིང་རྒྱུ་འབྲས་བསླུ་བ་མེད་པའི་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས། སངས་རྒྱས་བསྟན་པའི་སྤྱི་དགྲ། དཔལ་ལྡན་བླ་མའི་སྐུ་དགྲ། སེམས་ཅན་ཡོངས་ལ་འཚེ་བར་བྱེད་པའི་དགྲ་བགེགས་ཀྱི་རིགས་སུ་གྱུར་པ་སྤྱི་དང་། ཁྱད་པར་དུ་སློབ་བུ་དམ་ལོག ཤག་རོགས་མནའ་ཟན། ཉེ་བ་ཕྱིར་གྱུ། མགོ་རྨོངས་སེམས་ཅན་ལམ་ལོག་ཏུ་ཁྲིད་པའི་མིག་འཕྲུལ་མཁན་སོགས་སངས་རྒྱས་བསྟན་པའི་དགྲ་བོ་ཐམས་ཅད་ཀྱི་རྣམ་པར་ཤེས་པ་རི་རབ་ཀྱི་ཁོང་གསེང་། ནམ་མཁའི་མཐོངས། ནུས་ལྡན་གྱི་གུར་ཁང་། གླིང་བཞི་གླིང་ཕྲན་གང་ན་འདུག་ཀྱང་རུང་སྟེ་སྐྱོབ་པར་བྱེད་པའི་ལྷ་དང་ཁྲོལ་ལ་མཚན་མ་རྫས་ཀྱི་རྟེན་འདི་ལ་ཁུག་ཅིག ཅེས་དར་ནག་འགུགས་རོལ་བཅས་ལན་གསུམ་གྱི་རྗེས་སུ། ཛཿཧཱུྃ་བཾ་ཧོ༔ པྲ་བེ་ཤ་ཡ་ཕཊ༔ ཨ་བེ་ཤ་ཡ་ཨ༔ དེ་ནས་ཕུར་པ་སྐྱེད་ཅིང་གདབ་པ་ནི། ཨོཾ་མ་ཧཱ་ཤཱུ་ནྱ་སོགས་ཧཾ༔ པཾ་པདྨ་མཎྜ་ལ༔ མ་སུརྱ་མཎྜལ༔ སྥ་ར་ཎ་ཕཊ༔ སཾ་ཧ་ར་ཎ་ཧཱུྃ༔ ཨོཾ་པདྨ་ཀཱི་ལི་ཀཱི་ལ་ཡ་ཧཱུྃ་ཕཊ༔ སྟོང་པའི་ངང་ལས་ཕུར་པ་སྐད་ཅིག་གིས། །དབང་ཆེན་ཁྲག་འཐུང་པདྨ་ཀཱི་ལ་ཡ། །དམར་དཀར་ལྗང་བའི་ཞལ་གསུམ་ཕྱག་དྲུག་གི། །དང་པོ་གཉིས་ཀྱིས་གྲི་གུག་ཐོད་ཁྲག་འཛིན། །བར་མ་གཉིས་ཀྱིས་ཙིཏྟ་སྦྲུལ་ཞགས་འཛིན། །ཐ་མ་གཉིས་ཀྱིས་རི་རབ་ཕུར་པ་བསྒྲིལ། །དུར་ཁྲོད་ཆས་བརྒྱད་སྐུ་སྟོད་ཁྲོ་བོའི་གཟུགས། །སྐུ་སྨད་ཟུར་གསུམ་རྣོ་བའི་དབལ་དང་ལྡན། །སྐུ་ལ་བསྐལ་པའི་མེ་དཔུང་རབ་ཏུ་འབར། །ཨོཾ་ཨཱཿཧཱུྃ་གི་ཡི་གེས་གནས་གསུམ་མཚན། །ཡེ་ཤེས་ཛ་ཧཱུྃ༔བཾ་ཧོས་གཉིས་མེད་བསྟིམ། །ཨོཾ་ཏིབ་ཏ་ཙཀྲ་ཧ་ན་ཧ་ན་ཨོཾ་ཧྲཱིཿ ཨོཾ་བཛྲ་ས་ཏྭ་ཧཱུྃ༔ ཨོཾ་སརྦ་ཏ་ཐཱ་ག་ཏཱ་ཀཱ་ཡ་ཝཀྐཱ་ཙིཏྟ་ཏིཥྛ་བཛྲ༔ བདག་དང་ཕུར་པའི་གནས་གསུམ་ཡི་གེ་ལས། །འོད་འཕྲོས་བདེ་གཤེགས་ཀུན་གྱི་བྱིན་རླབས་བསྡུས། །སྐུ་གསུང་ཐུགས་ཀྱི་ཁམས་གསུམ་མ་ལུས་པ། །དུས་གཅིག་སྒྲོལ་བའི་ནུས་པ་ཐོབ་པར་གྱུར། །ཨོཾ་པདྨ་ཀཱི་ལ་ཡ་བེ་ཏ་ལི་མཎྜ་ལ་རཀྴ་ཧཱུྃ་ཕཊ༔ བཛྲ་ཀཱི་ལི་ཀཱི་ལ་ཡ་ཛ་ཧཱུྃ་བཾ་ཧོ༔ སརྦ་བིག་ནན་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ བདག་དང་དཀྱིལ་འཁོར་ཕུར་པའི་གནས་གསུམ་ལས། །ཨ་ཡིག་ཕྲ་མོ་གྲངས་མེད་འཕྲོས་པ་ཡིས། །དུས་གསུམ་སངས་རྒྱས་ཐམས་ཅད་སྤྱན་དྲངས་ནས། །ཨ་ཡིག་རྣམ་པར་འོད་ཞུ་ཚུར་འདུས་ཐིམ། །སྒྲིབ་སྦྱངས་སྐུ་གསུང་ཐུགས་ཀྱི་དངོས་གྲུབ་ཐོབ། །ཡར་འཕྲོས་འཕགས་མཆོད་སེམས་ཅན་སྡིག་སྒྲིབ་སྦྱངས། །སྲིད་གསུམ་ཐམས་ཅད་ཨ་ཡིག་རྣམ་པར་ཞུ། །དངུལ་ཆུ་ལྟར་གྱུར་གཟས་པོ་ལ་ཐིམ་པས། །རྣམ་ཤེས་ཨ་ཡིག་དཀར་པོའི་རྣམ་པར་གྱུར། །ཚེ་ལྷག་ཚུར་བསྡུས་རྣམ་ཤེས་ཞལ་དུ་ཞུགས། །ཧཱུྃ་གྱུར་འོག་མིན་གནས་སུ་རིགས་ལྔ་ཡི། །མཉམ་སྦྱོར་མཁར་བསྐྲུན་རིགས་ཀྱི་སྲས་སུ་གྱུར། །ཅེས་ཕུར་པ་སྙིང་གར་གདབ་ལ། །དེ་ནས་རལ་གྲི་གཤིན་རྗེ་གཤེད་དུ་བསྐྱེད་པ་ནི། ཨོཾ་ཤུ་ནྱ་ཏ་ཛྙཱ་སོགས། པཾཾ་པདྨ་མཎྜ་ལ༔ མ་སུརྱ་མཎྜ་ལ་ཧཱུྃ་སྥ་ར་ཎ་ཕཊ༔ སཾ་ཧ་ར་ཎ་ཧཱུྃ༔ སྐད་ཅིག་སྟོང་པའི་ངང་ལས་རལ་གྲི་ནི། །གཤིན་རྗེ་གཤེད་ནག་ཞལ་གཅིག་ཕྱག་གཉིས་པ། །གྲི་ཐོད་འཛིན་ཅིང་དུར་ཁྲོད་ཆས་ཀྱིས་བརྒྱན། །མེ་དཔུང་དབུས་བཞུགས་གནས་གསུམ་ཡི་གེས་མཚན། །ཡེ་ཤེས་ཛཿཧཱུྃ་བཾ་ཧོས་གཉིས་མེད་བསྟིམ། །དབང་བསྐུར་རིགས་ཀྱི་བདག་པོས་དབུ་བརྒྱན་གྱུར། །གཤིན་རྗེ་གཤེད་པོ་འོད་དུ་ཞུ་བ་ལས། །གནམ་ལྕགས་རལ་གྲི་རྣོ་ངར་ལྡན་པར་གྱུར། ཨོཾ་ཧྲིཥྚི་ཝི་ཀྲི་ཏ་ན་ན་ཧཱུྃ་ཕཊ༔ དགྲ་བགེགས་ཐམས་ཅད་མཱ་ར་ཡ༔ ན་ཤ་ཡ་སྟམ་བྷ་ཡ་ཧཱུྃ་ཕཊ༔ དབང་ཆེན་རྔམ་པ་ཐུགས་རྗེའི་དཀྱིལ་འཁོར་ནས། །ཡེ་ཤེས་མཚོན་ཆ་ལྔ་ཡི་ཆར་བབས་པས། །དུག་ལྔ་བདུད་རྩི་ལྔ་རུ་དག་བྱས་ཏེ། །ཡེ་ཤེས་ལྔ་ཡི་ལྷ་ཚོགས་མཉེས་པར་བྱ། །ཨོཾ་བྷྲཱུཾ་ཏྲཾ་བྷྲུཾ་ཧྲཱི་བྷྲུཾ༔ཨཱཿབྷྲུཾ༔ ཞེས་པས་ཉ་བོ་གཏུབས་ཏེ་རོལ་བར་བྱས་རྗེས་སྟོང་ཉིད་ངང་ལ་མཉམ་པར་བཞག གཏེར་གཞུང་ལས། རྗེས་སུ་དམ་ཚིག་ཁས་བླངས་དང་༔ མཎྜལ་གཏང་རག་དགའ་སྟོན་བྱ༔ དགེ་བ་བསྔོ་ཞིང་བཀྲ་ཤིས་བརྗོད༔ ཅེས་གསུངས་པ་ལྟར། དེ་ལྟར་དབང་བཞི་ཡོངས་སུ་རྫོགས་པ་ལེགས་པར་ཐོབ་ཟིན་ནས་དེ་དག་སོ་སོའི་དབང་གི་དམ་ཚིག་མི་ཉམས་པར་ཚུལ་བཞིན་དུ་བསྲུངས་ནས་སྒོ་གསུམ་དཀྱིལ་འཁོར་གསུམ་གྱི་རང་བཞིན་དུ་བསྒྲུབ་པར་བགྱིའོ་སྙམ་པས་འདི་ཡི་རྗེས་ཟློས་མཛོད། གཙོ་བོས་ཇི་ལྟར་སོགས་ལན་གསུམ། དེ་ལྟར་དབང་ཆོག་ཟབ་མོ་ལེགས་པར་ཐོབ་པ་རྡོ་རྗེ་སློབ་དཔོན་གྱི་བཀའ་དྲིན་ཡིན་པ་རྗེས་སུ་དྲན་པའི་ངང་ནས་གཏང་རག་གི་མཎྜལ་ཕུལ། ས་གཞི་སྤོས་སོགས། སླར་ཡང་བདག་པོས་ཡོངས་སུ་བཟུང་བའི་མཁོ་དགུའི་ལོངས་སྤྱོད་བུ་དང་བུ་མོ་བྱམས་པའི་ཕ་མ་མཐུན་པའི་གཉེན་གྲོགས་གཅེས་པར་བསྐྱངས་པའི་སྒྱུ་ལུས་དང་བཅས་པ་འདི་རྣམས། ཀུན་ཏུ་བཟང་པོའི་མཆོད་སྤྲིན་དུ་དམིགས་ནས་བླ་མ་དང་ལྷག་པའི་ལྷ་དབྱེར་མེད་པའི་སྤྱན་སྔར་འབུལ་བར་བགྱིའོ་སྙམ་པས་འདི་ཡི་རྗེས་ཟློས་མཛོད། དེང་ནས་བརྩམས་ཏེ་སོགས་ལན་གསུམ། དེ་ལྟ་བུའི་དགེ་ཚོགས་ཐམས་ཅད་སེམས་ཅན་ཡོངས་ལ་བསྔོ་བའི་ཐུགས་འདུན་གནང་བར་ཞུ། བསོད་ནམས་འདི་ཡིས་སོགས། ཞེས་བསྔོས་མཐར་བཀྲ་ཤིས་ཀྱིས་མཐའ་བརྒྱན་པར་བྱས་ནས་དགའ་སྟོན་གྱི་ཚོགས་ལ་རོལ་ནས་རྗེས་ཀྱི་བྱ་བ་རྣམས་དཀྱུས་བཞིན་དུ་བྱའོ། །དེ་ལྟར་རྟ་མགྲིན་སྣང་སྲིད་ཟིལ་གནོན་གྱི་དབང་གི་མཚམས་སྦྱོར་གཏེར་གཞུང་གི་དགོངས་པའི་ཚིག་མན་ངག་གཞན་གྱི་ཁ་བསྐང་དང་བཅས་པ་བྷུ་སུ་ཀུ་པ་ལྕམ་སྤྲུལ་པས་བསྒྲིགས་པ་དགེའོ། མངྒ་ལཾཾ།