དབང་ཆོག་བར་ཆད་ཀུན་སེལ།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ དབང་ཆོག་བར་ཆད་ཀུན་སེལ་བཞུགས༔

ཧྱ་གྷྲི་ཝ་ཏནྟྲ་ན་མ༔ སྐལ་བ་ལྡན་པའི་གང་ཟག་ལ༔ དབང་ཆེན་སྒྲུབ་པ་ཟབ་མོ་ཡི༔ སྨིན་བྱེད་གདམས་པས་དབུགས་དབྱུང་ཕྱིར༔ ཐོག་མར་ཡོ་བྱད་གྲོགས་དུས་བསྟུན༔ དེ་ཡང་གསང་ཆེན་ལྷག་པའི་ལྷ༔ ཚུལ་བཞིན་སྒྲུབ་པའི་གང་ཟག་ལ༔ དབང་གིས་སྨིན་པར་མ་བྱས་པར༔ བསྙེན་སྒྲུབ་ཕྲིན་ལས་སྟོན་མི་རུང་༔ དཔེར་ན་རྫ་སོ་མ་བཏང་བར༔ བབ་ཅོལ་ཆུ་བླུགས་བཞིན་ཏུ་འཇིག༔ དེ་བས་འདི་ཉིད་ཤིན་ཏུ་གཅེས༔ ས་མ་ཡཱ༔ ཤིན་ཏུ་དབེན་པའི་གནས་དག་ཏུ༔ དཀྱིལ་འཁོར་བློ་དང་འཚམས་པའི་དབུས༔ འབྲུ་ཚོམ་ལྔ་བཀོད་དེ་ཡི་སྟེང་༔ བུམ་པ་བཅུད་ལྡན་སྐུ་དང་བཅས༔ དབུས་ཡིན་ཤར་དུ་བདུད་རྩི་ཐོད༔ ལྷོ་རུ་རིག་རྟེན་མུ་དྲའི་གཟུགས༔ ནུབ་ཏུ་དྭངས་ཤེལ་བྱང་ཕུར་བུ༔ དེ་མདུན་དབང་གི་གཏོར་མ་དང་༔ སྨན་རཀ་ཉེར་སྤྱོད་སྲུང་མ་ཡི༔ མཆོད་གཏོར་ལ་སོགས་འདུ་བྱས་ལ༔ བུམ་པ་ལྷ་ཡི་དལ་དུ་བསྒོམས༔ ལྷ་ཚོགས་སྐུ་ལས་བདུད་རྩི་བབས༔ འོད་དམར་འཕྲོ་འདུས་བརྟན་གཡོ་ཡི༔ དྭངས་བཅུད་བསྡུས་ནས་འོད་དུ་ཞུ༔ རང་དང་མདུན་རྟེན་བུམ་པར་བཅས༔ ལྷར་གསལ་བསྙེན་ཞིང་དབང་བཞི་བླངས༔ སྐལ་ལྡན་ཁྲུས་ཕྱུང་བགེགས་སྡིག་སྦྱངས༔ བློ་སྦྱངས་དབང་མདོག་མཎྜལ་འབུལ༔ གསོལ་བ་འདེབས་པ་འདི་བཞིན་བྱ༔ ཀྱེ་ཧོ་བླ་མ་དབང་གི་རྒྱལ༔ རང་གཞན་དོན་གཉིས་ལྷུན་གྲུབ་ཕྱིར༔ དབང་ཆེན་དཀྱིལ་འཁོར་འདིར་འཇུག་ན༔ སྨིན་བྱེད་དབང་མཆོག་དེང་སྩོལ་ཅིག༔ དེ་ནས་བླ་མས་ལན་འདི་བྱིན༔ ཀྱེ་ཧོ༔ སྐལ་ལྡན་རྣམ་མཁྱེན་གོ་འཕང་འདོད་པའི་ཕྱིར༔ ལྷག་པའི་ལྷ་འདིར་བསྙེན་སྒྲུབ་རྩོམ་པ་ལེགས༔ བླ་མ་ལ་གུས་སྣང་སྲིད་ལྷ་རུ་ཤེས༔ སྒོ་གསུམ་རྡོ་རྗེ་གསུམ་དུ་སྒྲུབ་ནུས་སམ༔ ཞེས་པའི་ལན་དུ་འདི་བཞིན་ཞུ༔ ཀྱེ་བླ་མ་འགྲོ་མགོན་ཡི་དམ་ལྷ༔ བདག་གིས་རྩེ་གཅིག་སྒྲུབ་པ་ལ༔ གསང་ཆེན་ཉེ་ལམ་ཇི་བཞིན་དུ༔ རིམ་གཉིས་ཟབ་མོར་འབད་པར་བྱ༔ དེ་ནས་བླ་མས་དབུགས་དབྱུང་ནི༔ ཀྱེ་ཧོ་ཚེ་རབས་མང་པོའི་སྔོན་རོལ་ནས༔ ལྷག་པའི་ལྷ་དང་ལས་འཕྲོ་མཐུན་པ་ཡི༔ སྐལ་བ་ལྡན་པའི་གང་ཟག་དམ་པ་ཁྱེད༔ དབང་ཆོག་སྨིན་བྱེད་གདམས་པས་རྒྱུད་གྲོལ་ནས༔ ཡང་དག་ལམ་ལ་ཤིན་ཏུ་སྤྲོ་བར་གྱིས༔ ཅི་ཡི་ཕྱིར་ན་འཁོར་མཚོ་གཏིང་ཟབ་ལས༔ སྒྲོལ་བའི་གྲུ་བོ་རྩ་གསུམ་ལྷག་པའི་ལྷ༔ ད་རེས་སེལ་མེད་བརྒྱུད་པ་འགྲུབ་ཐག་ཉེ༔ འདི་འཕྲད་དོན་གཉིས་ལྷུན་གྱིས་འགྲུབ་པར་འགྱུར༔ དེ་ནས་མདུན་མཁར་ཚོགས་ཞིང་བསྒོམ༔ ཁྱེད་ཤེས་བློ་ཡིས་སྐྱབས་འགྲོ་དང་༔ སེམས་བསྐྱེད་ལན་གསུམ་རྗེས་ཟློས་བྱ༔ དེ་ནས་རྒྱུད་སྦྱངས་ཚོགས་བསགས་ཕྱིར༔ ཡན་ལག་བདུན་གྱི་རྗེས་ཟློས་ནི༔ ཧོ༔ བླ་མ་དབང་ཆེན་ཡི་དམ་དཀྱིལ་འཁོར་ལྷ༔ མཁའ་འགྲོ་དམ་ཅན་སྐྱབས་ཡུལ་ཐམས་ཅད་ལ༔ དེང་ནས་རང་ཞལ་མཇལ་བས་ཕྱག་འཚལ་ལོ༔ སྒོ་གསུམ་བསྙེན་སྒྲུབ་ཟབ་མོའི་མཆོད་པ་འབུལ༔ སྡོམ་གསུམ་ཁས་བླངས་ཉམས་ཆག་དམིགས་མེད་བཤགས༔ ཟབ་གསང་གདམས་པའི་ཆོས་འཁོར་བསྐོར་བར་བསྐུལ༔ གསང་སྔགས་རིམ་གཉིས་མཐར་ཕྱིན་རྗེས་ཡི་རང་༔ བླ་མ་ལྷ་མཆོག་དབྱེར་མེད་བརྟན་བཞུགས་གསོལ༔ དགེ་ཚོགས་སེམས་ཅན་མ་ལུས་སྒྲོལ་ཕྱིར་བསྔོ༔ བྱིན་རླབས་ཉེ་རྒྱུ་རིགས་བརྟགས་ཕྱིར༔ མེ་ཏོག་གཏད་ཅིང་མིག་རས་གཡོགས༔ སློབ་མའི་སྒོ་གསུམ་སྟོང་པར་སྦྱངས༔ དམིགས་མེད་ངང་ལས་རིག་པ་ཧྲཱིཿ དམར་པོ་ཚེག་དྲག་ལྡན་པར་བསྒོམས༔ འོད་ཟེར་འཕྲོ་འདུ་དོན་གཉིས་བྱས༔ ལྷ་རུ་བསྐྱེད་ཅིང་ཡེ་ཤེས་དབབ༔ ཏིཥྛའི་སྔགས་ཀྱིས་བརྟན་པར་བྱ༔ རིགས་བརྟགས་མེ་ཏོག་ལྷ་ལ་འབུལ༔ གདོང་གཡོགས་བཀྲོལ་ཞིང་གསང་མཚན་བཏགས༔ དཀྱིལ་འཁོར་རྣམ་དག་བཤད་པར་བྱ༔ ས་མ་ཡཱ༔ དེ་ནས་དབང་བཞི་ཞུ་བའི་སླད༔ གསོལ་བ་འདེབས་པ་འདི་བཞིན་བྱ༔ ཧོ༔ བླ་མ་སློབ་དཔོན་མགོན་པོ་ཁྱེད་ཉིད་ཀྱིས༔ ཉོན་མོངས་སྒྲིབ་པ་རྣམ་བཞིའི་ཚོགས་སྦྱངས་ནས༔ སྐུ་བཞིའི་གོ་འཕང་ཚེ་འདིར་མྱུར་ཐོབ་ཕྱིར༔ དབང་བཞིའི་བདག་རྒྱུད་སྨིན་པར་མཛད་དུ་གསོལ༔ བུམ་པ་སྤྱི་བོར་བཞག་བྱས་ཏེ༔ ཧྲཱིཿ མཚན་ཉིད་ཡོངས་རྫོགས་བུམ་པའི་གཞལ་ཡས་སུ༔ པདྨ་དབང་ཆེན་དཀྱིལ་འཁོར་ལྷ་ཚོགས་བཞུགས༔ སྐལ་ལྡན་སྐྱེས་བུ་ཁྱེད་ལ་དབང་བསྐུར་བས༔ ལུས་ཀྱི་སྒྲིབ་དག་སྤྲུལ་པའི་སྐུ་ཐོབ་ཤོག༔ རྩ་སྔགས་ཤམ་བུར༔ ཀཱ་ཡ་ཨ་བྷི་ཥིཉྩ་ཧཱུྃ༔ ཞེས་པས་བདུད་རྩི་བུམ་ཆུ་ལྕེ་ལ་བཞག༔ ཐོད་པའི་བདུད་རྩི་མགྲིན་པར་བླུགས༔ ཧྲཱིཿ རང་བྱུང་བདེ་བ་ཆེན་པོའི་ཀ་པཱ་ལར༔ ཡབ་ཡུམ་མཉམ་སྦྱོར་བྱང་སེམས་བདུད་རྩིའི་བཅུད༔ སྐལ་ལྡན་ཁྱེད་ཀྱི་མགྲིན་པར་བླུད་པ་ཡིས༔ ངག་གི་སྒྲིབ་དག་ལོངས་སྐུའི་དཔལ་ཐོབ་ཤོག༔ རྩ་སྔགས་ཤམ་བུར༔ ཝཀྐཱ་ཨ་བྷི་ཥིཉྩ་ཧཱུྃ༔ མུ་དྲའི་གཟུགས་བརྙན་སྙིང་གར་གཏུགས༔ཧྲཱིཿ སྐལ་ལྡན་དཔའ་བོ་པདྨ་དབང་ཆེན་བསྒོམས༔ དངོས་གཟུགས་ཕྱག་རྒྱ་གར་གྱི་དབང་མོའི་མཁར༔ མཉམ་སྦྱོར་དགའ་བཞིའི་ཡེ་ཤེས་དབང་བསྐུར་བས༔ ས་བཅུའི་དཔལ་ཡོན་ཚེ་འདིར་ཐོབ་པར་ཤོག༔ རྩ་སྔགས་ཤམ་བུར༔ ཙིཏྟ་ཨ་བྷི་ཥིཉྩ་ཧཱུྃ༔ དྭངས་ཤེལ་སྲིད་རྩ་ལྟེ་བར་བཞག་བྱས་ཏེ༔ ཧྲཱིཿ ཡེ་ནས་རང་སེམས་ཀ་དག་དྭངས་ཤེལ་ལ༔ སྐུ་གསུམ་ཡེ་ཤེས་འཇའ་ཚོན་དཔེ་ཡིས་མཚོན༔ ཟུང་འཇུག་སྣང་སྟོང་ཡེ་ཤེས་དབང་བསྐུར་བས༔ ཡིད་ཀྱི་སྒྲིབ་དག་ཆོས་སྐུའི་ཀློང་གྲོལ་ཤོག༔ རྩ་སྔགས་ཤམ་བུར༔ གུ་ཎ་ཨ་བྷི་ཥིཉྩ་ཧཱུྃ༔ གཏོར་མ་གནས་བཞིར་གཏུགས་བྱས་ཏེ༔ ཧྲཱིཿ སྒོ་གསུམ་དངོས་འཛིན་དྲི་མའི་བག་ཆགས་གཏོར༔ དངོས་གྲུབ་ཀུན་འགྲུབ་མཚན་མ་རྫས་ཀྱི་རྟེན༔ སྐལ་ལྡན་དམ་པ་ཁྱེད་ལ་དབང་བསྐུར་བས༔ ཤེས་པ་དྲུག་ལྡན་ལས་ཀུན་མྱུར་འགྲུབ་ཤོག༔ རྩ་སྔགས་ཤམ་བུར༔ ཀརྨ་ཨ་བྷི་ཥིཉྩ་ཧཱུྃ༔ དེ་ནས་ལྷན་སྐྱེས་འདྲེ་ཡི་འཕྲུལ༔ བར་ཆད་དགྲ་འདྲེ་གཟུགས་ལ་བཀུག༔ ཕྱག་རྒྱ་བཞི་ཡི་རྒྱ་ཡིས་གདབ༔ རང་དང་སློབ་མ་ལྷ་རུ་གསལ༔ ལིངྒ་རང་གནོད་དགྲ་འདྲེར་གསལ༔ ཕུར་བུ་སྲས་མཆོག་དགྲ་བགེགས་གཤེད༔ རྡོ་རྗེ་གཞོན་ནུའི་སྐུ་རུ་གསལ༔ བསྒྲལ་ཞིང་ཤ་རུས་བདུད་རྩིར་དམིགས༔ རང་དང་སློབ་མས་རོལ་བྱས་ནས༔ མི་དམིགས་སྟོང་པའི་ངང་མདངས་བསྐྱངས༔ རྗེས་སུ་དམ་ཚིག་ཁས་བླངས་དང་༔ མཎྜལ་གཏང་རག་དགའ་སྟོན་བྱ༔ དགེ་བ་བསྔོ་ཞིང་བཀྲ་ཤིས་བརྗོད༔ ལྷ་དང་བླ་མར་མོས་གུས་དང་༔ བསྙེན་སྒྲུབ་ལྷར་འབུལ་སྤྱོད་ལམ་གྱི༔ ལམ་ཁྱེར་དུས་ཀུན་དོན་ཡོད་བྱོས༔ ས་མ་ཡཱ༔ ཤིན་ཏུ་ཟབ་པའི་དབང་ཆོག་འདི༔ མ་འོངས་སྐལ་ལྡན་བུ་ལ་གཏད༔ ཚེ་འཕྲེང་བར་ཆད་བདུད་ལས་རྒྱལ༔ དབང་ཆེན་རྒྱལ་པོའི་སྐུ་གསུང་ཐུགས༔ མྱུར་འགྲུབ་ལས་བཞི་མཐར་ཕྱིན་འགྱུར༔ ཞེས་པའང་དག་སྣང་ཟབ་མོའི་ཆོས་སྡེ་ལས་བྱུང་བའི་དབང་ཆོག་འདི་སྤྲང་བན་ལུང་རིག་གླིང་པ་བདག་གིས་ལུང་ཟིན་ལྟར་དབང་ཆེན་གྲུབ་པ་རྒྱལ་བ་མཆོག་དབྱངས་ཀྱི་རྣམ་རོལ་སྤྲུལ་པའི་སྐུ་གྲུབ་པའི་ས་མཐོན་པོར་གཤེགས་པ་གཞན་ཕན་དོན་གྲུབ་རྒྱལ་མཚན་རིན་པོ་ཆེས་བཀའ་ཕེབས་པ་བཞིན་རྩ་གསུམ་སྒྲུབ་ཁང་དུ་སྦྱར་བ་དུས་ཀུན་ཏུ་དགེ་བར་གྱུར་ཅིག༔ ཛ་ཡནྟུ༔