པདྨ་དབང་ཆེན་སྒྲུབ་པའི་ཟབ་ཏིག་རྟ་མཆོག་དགོངས་རྒྱན།
དག་སྣང་མཚོ་རྒྱལ་དགོངས་པའི་གསང་མཛོད་ལས༔ པདྨ་དབང་ཆེན་སྒྲུབ་པའི་ཟབ་ཏིག་རྟ་མཆོག་དགོངས་རྒྱན་བཞུགས༔
ཧྱ་གྷྲཱི་ཝ་རྒྱལ་ཀུན་གསུང་༔ འཁོར་འདས་དབང་བསྒྱུར་ཧེ་རུ་ཀ༔ བླ་མ་ཡི་དམ་དབྱེར་མེད་པའི༔ ཟབ་ཏིག་དབང་ཆེན་དགོངས་རྒྱན་བསྟན༔ ས་མ་ཡཱ༔ རྒྱ་རྒྱ་རྒྱ༔ སྤྲོས་མེད་སྒྲུབ་པ་རྒྱུན་ཁྱེར་ལ༔ སྦྱོར་བ་སྐྱབས་སེམས་ཡན་ལག་བདུན༔ ན་མོ༔ བླ་མ་བདེ་གཤེགས་ཡོངས་རྫོགས་དཔལ༔ རྟ་མཆོག་རྒྱལ་པོ་ཐུགས་རྗེའི་གཏེར༔ བདག་གཞན་བྱང་ཆུབ་མ་ཐོབ་བར༔ སྒོ་གསུམ་གུས་པས་སྐྱབས་སུ་མཆི༔ མཁའ་ཁྱབ་འགྲོ་ཀུན་འཁོར་བ་ལས༔ རབ་བསྒྲལ་བྱང་ཆུབ་མཆོག་ཐོབ་ཕྱིར༔ ལྷག་པའི་ལྷ་མཆོག་དབང་ཆེན་རྒྱལ༔ རྩེ་གཅིག་བསྒྲུབ་པར་དམ་བཅའ་འོ༔ རྩ་གསུམ་ཡོངས་རྫོགས་དབང་ཆེན་ལྷར༔ ཐ་མི་དད་པའི་ལྟ་བས་འདུད༔ ཚོགས་དྲུག་འདོད་ཡོན་རྒྱན་དུ་རོལ༔ གཉིས་འཛིན་རྟོག་པས་བསླུས་པ་བཤགས༔ རང་བབས་དགེ་ལ་རྗེས་ཡི་རངས༔ ཟག་མེད་རྒྱུན་ཏུ་ཆོས་འཁོར་བསྐོར༔ འགྲོ་དོན་རྟག་པར་བཞུགས་གསོལ་འདེབས༔ དགེ་ཚོགས་དམིགས་མེད་ཆོས་དབྱིངས་བསྔོ༔ དངོས་གཞི་དྲན་རྫོགས་ས་མ་དྷི༔ ཨ༔ འཁོར་འདས་སྟོང་ཆེན་མ་རྟོགས་པའི༔ ཁམས་གསུམ་འགྲོ་ལ་སྙིང་རྗེའི་གདངས༔ རང་རིག་ཧྲཱིཿདམར་འོད་འཕྲོས་པས༔ མ་དག་ཞིང་ཀུན་དབང་དྲག་ལྷའི༔ རྟེན་དང་བརྟེན་པར་གནས་འགྱུར་དབུས༔ དྲན་རྫོགས་པདྨ་ཧེ་རུ་ཀ༔ རྟ་མགྲིན་དབང་ཆེན་ཞལ་གསུམ་པ༔ ཕྱག་དྲུག་ཞབས་བཞི་པད་ཉི་དང་༔ རུ་ཏྲ་ཕོ་མོའི་གདན་ལ་འགྱིངས༔ དམར་ནག་བསྐལ་མེའི་གཟི་བརྗིད་འབར༔ གཡས་དཀར་གཡོན་ལྗང་ཕྱག་དྲུག་གིས༔ པདྨ་གྲི་ཁུག་བེ་ཅོན་གཡས༔ ཐོད་ཁྲག་སྙིང་ཞགས་མེ་དཔུང་གཡོན༔ ཡུམ་ཆེན་པདྨ་གཟི་ལྡན་སྔོ༔ གཡས་པས་ཙིཏྟ་ཡབ་མགུལ་འཁྱུད༔ གཡོན་པས་དུང་དམར་སྟོབ་པའི་ཚུལ༔ ཞབས་གཉིས་བདེ་སྦྱོར་དགའ་བཞིའི་ངང་༔ ཡབ་ཡུམ་སྐུ་ལ་དུར་ཁྲོད་ཆས༔ མ་ཚང་མེད་པས་འཇིགས་པར་སྤྲས༔ སྤྲུལ་དང་ཡང་སྤྲུལ་སྒྲུབ་སྡེ་བརྒྱད༔ ཡེ་ཤེས་མེ་ཡི་ཀློང་ན་བཞུགས༔ རང་རིག་རྩལ་ལས་ཤར་བའི་ལྷ༔ རང་བཞིན་དབྱིངས་ནས་སྤྱན་འདྲེན་གཤེགས༔ པད་ཉི་རུ་ཏྲའི་གདན་ལ་བཞུགས༔ འདུ་འབྲལ་མེད་ཕྱིར་བརྡ་ཕྱག་འཚལ༔ ཕྱི་ནང་གསང་བའི་མཆོད་པའི་ཚོགས༔ སྲིད་པའི་འདོད་ཡོན་མཆོད་པར་འབུལ༔ ཨོཾ་བདེ་གཤེགས་སྐུ་དང་ཐ་མི་དད༔ ཨཱཿརྒྱལ་ཀུན་གསུང་སྒྲས་ལོག་འདྲེན་འདུལ༔ ཧཱུྃ༔མཁྱེན་བརྩེ་ནུས་མཐུའི་གཟི་འོད་འབར༔ དབང་ཆེན་ལྷ་ལ་ཕྱག་འཚལ་བསྟོད༔ ཧཱུྃ་ཧྲཱིཿ རང་གི་ཐུགས་ཀར་པད་ཉིའི་སྟེང་༔ ཡེ་ཤེས་སེམས་དཔའ་ཧྲཱིཿདམར་མཐར༔ རྩ་བའི་སྔགས་ཀྱིས་གཡས་སུ་བསྐོར༔ འོད་འཕྲོས་འགྲོ་བའི་ལས་ཉོན་སྦྱངས༔ དགྲ་བགེགས་ཚར་གཅོད་རང་ཉིད་ཀྱིས༔ འཁོར་འདས་དབང་བསྡུས་ཟིལ་གནོན་བསམ༔ ཧྲཱིཿབཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ༔ འབྲུ་འབུམ་ལ་སོགས་རྟགས་མཐོང་བཟླ༔ རྗེས་ལ་མཆོད་བསྟོད་རྩ་སྔགས་མཐར༔ སྐུ་གསུང་ཐུགས་ཀྱི་དངོས་གྲུབ་ཀྱིས༔ བདག་རྒྱུད་སྨིན་ཅིང་གྲོལ་བར་གྱུར༔ ཀཱ་ཡ་ཝཀྐ་ཙིཏྟ་སིདྡྷི་ཧཱུྃ༔ དགེ་བའི་རྩ་བ་འགྲོ་ལ་བསྔོ༔ ཧཱུྃ་གིས་བསྡུ་ཞིང་ཕཊ་ཀྱིས་ལྡང་༔ ཤིས་བརྗོད་རིམ་པ་འདི་ལྟར་བྱ༔ སྲིད་ཁམས་བདེ་ཆེན་ཞིང་ལྟར་གྱུར༔ འགྲོ་རྣམས་རྒྱལ་བའི་གོ་འཕང་བརྙེས༔ གསང་སྔགས་ལམ་གྱི་གྲུབ་པའི་འབྲས༔ རང་གཞན་དོན་གྲུབ་བཀྲ་ཤིས་ཤོག༔ ས་མ་ཡཱ༔ ཞེས་པའང་གཞན་ཕན་དོན་གྲུབ་རྒྱལ་མཚན་གྱིས་བསྐུལ་བ་ལྟར་བདག་སྤྲུལ་མིངཔ་ལུང་རིག་གླིང་པར་འབོད་པས་ཡང་གསང་མཁའ་འགྲོའི་བརྡ་རིས་ལས་ཕབ་ཏེ་ཕུལ་བ་དགེ་ལེགས་འཕེལ