པདྨ་དབང་ཆེན་རྟ་མཆོག་རོལ་པའི་སྒྲུབ་ཐབས་བདེ་གཤེགས་ཀུན་འགྲུབ།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ པདྨ་དབང་ཆེན་རྟ་མཆོག་རོལ་པའི་སྒྲུབས་ཐབས་བདེ་གཤེགས་ཀུན་འགྲུབ་བཞུགས་སོ༔

ཨེ་མ་ཧོ༔ སྲིད་པའི་མཐའ་ལས་མི་འདའ་སེམས་ཅན་འདུལ༔ ཞི་བ་ཆེན་པོར་མི་གནས་ཆོས་ཀུན་མཉམ༔ འཁོར་འདས་ཡོངས་ལ་དབང་བསྒྱུར་ཧེ་རུ་ཀ༔ བདེ་གཤེགས་ཀུན་འདུས་དབང་ཆེན་ལྷ་ལ་འདུད༔ དེ་ཡི་སྒྲུབ་ཐབས་རྟ་མཆོག་རོལ་པའི་རྒྱུད༔ གབ་པ་མངོན་ཕྱུང་སྒྲུབ་ཐབས་ཟབ་མོ་འདི༔ ལས་དང་སྐལ་བར་ལྡན་པའི་གང་ཟག་རྣམས༔ ཚེ་གཅིག་བྱང་ཆུབ་བསྒྲུབ་ཕྱིར་བསྟན་པར་བྱ༔ ས་མ་ཡཱ༔ དེ་ཡང་སྦྱོར་བ་དངོས་གཞི་རྗེས་དང་གསུམ༔ སྒྲུབ་པའི་གནས་ནི་གྲུབ་ཐོབ་ཞབས་བཅགས་སམ༔ ཡང་ན་དབེན་གནས་ཆུ་བོ་ནུབ་ནས་འབབས༔ ས་མདོག་དམར་ལ་ཤིན་ཏུ་དྭངས་པའི་སར༔ སྒྲུབ་རྫས་ཡོ་བྱད་མ་ཚང་མེད་པར་བཤམས༔ རྟེན་གྱི་གང་ཟག་འཁོར་བར་ཞེན་པ་ལོག༔ གཞན་དོན་བྱང་ཆུབ་སྒྲུབ་པའི་བློ་ལྡན་པ༔ པདྨ་རིགས་ཀྱི་དབང་ནོས་དམ་ཚིག་ལྡན༔ ལུས་སེམས་ལས་སུ་རུང་བའི་གྲོགས་དང་བཅས༔ མི་དགེའི་ལས་སྤངས་དགེ་བཅུའི་རྒྱབ་དཔུང་བསྐྱེད༔ དཀྱིལ་འཁོར་མདའ་གང་བཀོད་ལེགས་གྲུ་བཞི་པ༔ གཞོན་ནུ་གཉིས་འཛོམས་རྡུལ་དང་ལི་ཁྲི་སྦགས༔ རྐྱང་ནུལ་སྲབ་འཐུག་སྙོམས་པར་མཚན་ལྡན་གྱི༔ ལས་ཀྱི་ཕྱག་རྒྱར་རྡོ་རྗེ་སློབ་དཔོན་གྱིས༔ ཐིག་གཏད་རྩ་བའི་ཐིག་བརྒྱད་གྲུ་ཆད་དང་༔ ལྷ་རྣམས་ཕྱི་ནང་དུར་ཁྲོད་རྡོ་རྗེ་མེ༔ དབུས་སུ་ཆོས་འབྱུང་བསྣོལ་དབུས་ཟླ་གམ་དམར༔ རྩིབས་བཞི་རྩིབས་བརྒྱད་དེ་ཕྱིར་བཅུ་དྲུག་རྩིབས༔ སྒོ་བཞི་ཟླ་ཕྱེད་ཕྱོགས་བཞིར་འོད་ཀྱི་ཐིག༔ ལྷ་ཡི་ས་བོན་ཕྱག་མཚན་ཚོམ་བུ་བཀོད༔ སྤྲོས་བཅས་སྤྲོས་མེད་རྣལ་འབྱོར་རིགས་པས་དཔྱད༔ བདེ་བའི་སྟན་ལ་འགྲོ་དོན་རྗེས་ཆགས་བློས༔ ཐོག་མར་སྔོན་ཏུ་འགྲོ་བའི་ལས་རིམ་བདུན༔ དང་པོ་སྐྱབས་སུ་འགྲོ་བའི་རིམ་པ་ནི༔ མདུན་མཁར་ཚོགས་ཞིང་གསལ་གདབ་འདི་སྐད་དོ༔ ཧྲཱིཿ བདེ་གཤེགས་ཡོངས་རྫོགས་རང་རིག་བྱང་ཆུབ་སེམས༔ པདྨ་དབང་ཆེན་ལྷ་རུ་ཡོངས་ཤར་བར༔ ཇི་སྲིད་རྫོགས་པའི་སངས་རྒྱས་མངོན་གྱུར་ཕྱིར༔ བདག་གཞན་འགྲོ་རྣམས་གུས་པས་སྐྱབས་སུ་མཆི༔ ལན་གསུམ༔ གཉིས་པ་སྨོན་འཇུག་སེམས་བསྐྱེད་ནི༔ ཧཱུྃ་ཧྲཱིཿ ཐོག་མ་མེད་ནས་སྲིད་པའི་གྲོང་ཁྱེར་དུ༔ རང་བྱུང་ཡེ་ཤེས་རང་ངོ་མ་འཕྲོད་པར༔ སྡུག་བསྔལ་གསུམ་གྱིས་མནར་བའི་སྲིད་ཁམས་འགྲོ༔ བྱང་ཆུབ་སྙིང་པོར་འགོད་ཕྱིར་འདིར་བརྩོན་བྱ༔ ལན་གསུམ༔ གསུམ་པ་ཡན་ལག་བདུན་པ་ནི༔ ཧཱུྃ་ཧྲཱིཿ རྩ་གསུམ་ཀུན་འདུས་རྟ་མཆོག་དབང་གི་ལྷར༔ རང་བབས་ལྟ་བའི་ཀློང་ནས་གུས་ཕྱག་འཚལ༔ ལུས་དང་ལོངས་སྤྱོད་སྣང་སྲིད་མཆོད་སྤྲིན་འབུལ༔ སྒོ་གསུམ་ཉེས་ཚོགས་ཉམས་ཆག་སྡིག་སྒྲིབ་བཤགས༔ དུས་གསུམ་འགྲོ་བའི་དགེ་ལ་རྗེས་ཡི་རངས༔ ཟག་མེད་གསང་སྔགས་ཆོས་འཁོར་བསྐོར་བར་བསྐུལ༔ མཁའ་ཁྱབ་འགྲོ་ངོར་རྟག་བཞུགས་གསོལ་བ་འདེབས༔ དགེ་རྩ་འགྲོ་རྣམས་ཡི་དམ་ལྷ་མཆོག་དང་༔ དབྱེར་མེད་གཅིག་ཏུ་འགྲུབ་ཕྱིར་བསྔོ་བར་བྱ༔ བཞི་བ་བགེགས་ལ་གཏོར་མ་འབྲུ་གསུམ་གྱིས༔ བསྔོ་ཞིང་རང་ཉིད་ལས་ཀྱི་ལྷར་གསལ་བའི༔ བཀའ་ཡིས་དྲག་ཏུ་བསྒོ་བ་འདི་སྐད་དོ༔ ཧཱུྃ་ཧྲཱིཿ ཐོག་མར་གཞི་ནས་འཁྲུལ་བྱེད་བདག་ལྟའི་བགེགས༔ བར་དུ་ལོངས་སྤྱོད་ལོག་ཞུགས་སྒོ་ལྔའི་གདོན༔ ཐ་མ་བྱང་ཆུབ་ལམ་གཅོད་ཕྱི་ནང་འདྲེ༔ རང་བྱུང་སྟོང་ཆེན་གདོད་མའི་ཧེ་རུ་ཀས༔ གློ་བུར་སྒྲིབ་བསལ་གཏོར་མས་ཚིམ་གྱིས་ལ༔ འདི་རུ་མ་འདུག་སྟོང་གསུམ་ཕ་མཐར་དེངས༔ བཀའ་ལས་འདས་ན་བདག་འཛིན་ལུས་ངག་ཡིད༔ ཐལ་བའི་རྡུལ་བཞིན་བརླག་པར་གདོན་མི་ཟ༔ ཧཱུྃ་བཞིའི་དྲག་སྔགས་དང་བཅས་ཡུངས་ཐུན་བརྡེག༔ ལྔ་བ་སྲུང་འཁོར་བརྟན་པར་རྒྱས་འདེབས་ནི༔ ཧཱུྃ་ཧྲཱིཿ ཡེ་ནས་འཁོར་འདས་མི་དམིགས་ཆོས་སྐུའི་ཀློང་༔ རང་རྩལ་ལྷ་སྔགས་གཞོམ་བྲལ་སྲུང་བའི་གུར༔ འོད་ཟེར་ཁ་དོག་སྣ་ལྔའི་འཕྲོ་འདུ་ལས༔ རྡོ་རྗེ་རིན་ཆེན་པདྨ་རྒྱ་གྲམ་མེ༔ གླགས་ལྟའི་བགེགས་ཀྱིས་མི་ཤིགས་རྡོ་རྗེའི་རྫོང་༔ དབང་ཆེན་དབང་གི་ཕྲེང་བ་ཡོངས་སུ་བརྡལ༔ ཨོཾ་བཛྲ་རཏྣ་པདྨ་ཀརྨ་ཛྭ་ལ་རཾ་རཾ་རཀྵ་བྷྲུཾ༔ དྲུག་པ་ཡེ་ཤེས་དབྱིངས་ནས་བྱིན་འབེབས་ནི༔ ཧཱུྃ་ཧྲཱིཿ སྤྲོས་ཀུན་ཉེར་ཞི་དབུ་མའི་ཕོ་བྲང་ནས༔ མཚན་འཛིན་སྒྲིབ་བྲལ་ཆོས་སྐུ་གདོད་མའི་མགོན༔ རང་བྱུང་ཡེ་ཤེས་པདྨ་དབང་གི་ལྷས༔ རྣལ་འབྱོར་སྒོ་གསུམ་ལྷ་སྔགས་ཏིང་ངེ་འཛིན༔ སྒྲུབ་རྫས་ཡོ་བྱད་རང་སྣང་རོལ་པའི་རྒྱན༔ འཁོར་བའི་སྡུག་བསྔལ་ལས་སྣང་བདེ་བ་ཆེ༔ སྐུ་གསུམ་ཞིང་དང་བརྟེན་པར་བྱིན་ཆེན་ཕོབ༔ འགྱུར་མེད་སྐུ་ཡི་བྱིན་ཆེན་ལུས་ལ་སྩོལ༔ མཚན་དཔེ་ལོངས་སྐུའི་ངོ་མཚར་དངོས་ཞལ་སྟོན༔ འགགས་མེད་གསུང་གི་བྱིན་ཆེན་ངག་ལ་ཕོབ༔ ཐ་མལ་ངག་རླུང་གྲག་སྟོང་ཆོས་སྐུར་སྒྱུར༔ འཁྲུལ་མེད་ཐུགས་ཀྱི་བྱིན་ཆེན་ཡིད་ལ་ཕོབ༔ མཁྱེན་བརྩེ་དམིགས་མཐའ་བྲལ་བའི་དཔའ་གདེང་བསྐྱེད༔ རང་སྣང་ཡེ་ཤེས་རྒྱན་གྱི་བྱིན་ཆེན་ཕོབ༔ སྒྲུབ་རྫས་འདི་ལ་ཟག་མེད་བཅུད་ཅིག་སྩོལ༔ མཚན་མའི་དཀྱིལ་འཁོར་འདི་ལ་བཀྲག་མདངས་ཕྱུངས༔ སྣང་སྲིད་ཐབས་ཤེས་བདེ་ཆེན་ཡེ་ཤེས་ཀློང་༔ འཁྲུལ་སྣང་སྐུ་དང་ཞིང་ཁམས་བྱིན་གྱིས་རློབས༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཀྐཱི་ནི་ཧྱ་གྲཱྀ་ཝ་སརྦ་ས་མ་ཡཱ་ཛྙཱ་ན་ཨ་བེ་ཤ་ཡ་ཕེཾ་ཕེཾ༔ བདུན་པ་མཆོད་རྫས་ཡོ་བྱད་བྱིན་བརླབ་ནི༔ ཧཱུྃ་ཧྲཱིཿ སྒྲུབ་གཞི་དཀྱིལ་འཁོར་གདོད་མའི་སྟོང་ཆེན་ངང་༔ ལོག་རྟོག་དབྱིངས་སྒྲོལ་དུར་ཁྲོད་གཞལ་ཡས་ཁང་༔ མདའ་དར་མེ་ལོང་ཚད་མེད་ཡེ་ཤེས་གཞི༔ བདུད་བཞི་ཚར་གཅོད་ཤེས་རབ་རྣོ་དབལ་གྲི༔ སྐུ་བཞིའི་རང་གདངས་མཛེས་པའི་རྒྱལ་མཚན་འཕན༔ འཁོར་འདས་དབྱིངས་གཅིག་དར་གྱི་མཐའ་དཀྲིས་རྔམ༔ རིག་རྩལ་ས་ལམ་མུ་ཏིག་རྒྱན་ཕྲེང་འཕྲུལ༔ ཡི་དམ་གསང་གསུམ་སྐུ་གསུང་ཐུགས་རྟེན་བཀྲམ༔ འདོད་ཡོན་མ་སྤངས་ཕྱི་ནང་གསང་མཆོད་མཛེས༔ ཐབས་ཤེས་ཟུང་འབྲེལ་སྣང་སྟོང་བདེ་བའི་གྲོགས༔ རང་བྱུང་གཞི་གྲོལ་ཆོས་སྐུའི་གདུགས་ཆེན་པོ༔ གང་ཡང་མ་འགགས་མཆོད་པའི་དངོས་པོ་ཀུན༔ ཡེ་ཤེས་ཟག་མེད་ཀུན་བཟང་རྣམ་རོལ་ལྟར༔ མི་ཟད་ནམ་མཁའ་མཛོད་དུ་བྱིན་གྱིས་རློབས༔ མ་ཧཱ་སརྦ་པཱུ་ཙ་སྥ་ར་ཎ་ཕཊ༔ དེ་ལས་ནང་མཆོད་སྨན་གཏོར་རཀྟ་རྣམས༔ བྱིན་རླབས་ཐོག་མ་བདུད་རྩི་བསངས་སྦྱངས་ཏེ༔ ཧཱུྃ་ཧྲཱིཿ བྷནྡྷའི་སྣོད་དུ་རྩ་བརྒྱད་ཡན་ལག་སྟོང་༔ རིགས་ལྔ་ཡབ་ཡུམ་སྦྱོར་བའི་འཆི་མེད་སྨན༔ གཙང་སྨེའི་དངོས་འཛིན་བདུད་འཇོམས་ཡེ་ཤེས་རྩི༔ ལྷ་རྣམས་ཟག་མེད་དགྱེས་བསྐྱེད་རྫས་སུ་གྱུར༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱི་ཐ༔ ལན་གསུམ་བརྗོད་ཅིང་རཀྟ་བསངས་སྦྱངས་ཏེ༔ ཧཱུྃ་ཧྲཱིཿ བདུད་བགེགས་བསྒྲལ་བའི་སྙིང་ཁྲག་རཀྟ་དམར༔ ཐབས་ཤེས་བདེ་སྦྱོར་བཅུ་དྲུག་སིནྡྷུ་ར༔ དུག་ལྔ་དབྱིངས་སུ་རང་གྲོལ་རྩ་བའི་རྫས༔ དྲག་པོའི་ཕྲིན་ལས་ཀུན་འགྲུབ་རྫས་སུ་བསྒྱུར༔ ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྚལ་ཧཱུྃ་ཧྲཱིཿཋ༔ ལན་གསུམ་གཏོར་མ་སྨན་རཀ་ཟེགས་མས་བྲན༔ ཧཱུྃ་ཧྲཱིཿ རིན་ཆེན་བཀོད་ལེགས་ཡུལ་ལྔའི་གཞོང་པ་རུ༔ བདེ་ཆེན་སྟོང་གསལ་དབང་པོའི་བྷ་ལིང་ཏ༔ ཤ་ལྔ་བདུད་རྩི་མཚོན་པ་དམ་ཚིག་རྫས༔ ལས་བཞི་ཀུན་འགྲུབ་མཆོད་པའི་གཏོར་མར་གྱུར༔ ཨོཾ་ཨཱཿཧཱུྃ་མ་ཧཱ་བྷ་ལིངྟ་ཏེ་ཛྭ་བྷ་ལིངྟ་བྷ་ལ་བྷ་ཏེ་གུ་ཧྱ་ས་མ་ཡཱ་ཧཱུྃ་ཧྲཱིཿཋ༔ ལན་གསུམ་བརྗོད་ནས་དམིགས་པས་བྱིན་གྱིས་བརླབས༔ དེ་ཡིs་སྔོན་འགྲོའི་ཆོས་རྣམས་རྫོགས་པའོ༔ ས་མ་ཡཱ༔ རྒྱ་རྒྱ་རྒྱ༔ གཉིས་པ་དངོས་གཞིའི་ཆོས་ལ་བཅུ་གཉིས་ཏེ༔ དང་པོ་ཀུན་རྫོབ་སྣང་བ་ལྷར་ལྟ་བའི༔ བསྐྱེད་རིམ་ཏིང་འཛིན་གསུམ་གྱིས་ཁོག་ཕུབ་ནས༔ མངོན་བྱང་ལྔ་ཡིས་མངལ་སྐྱེས་བག་ཆགས་སྦྱངས༔ དེ་བཞིན་ཉིད་ཀྱི་ཏིང་འཛིན་བསྒོམ་པ་ནི༔ ཧཱུྃ་ཧྲཱིཿ འཁོར་འདས་ཆོས་ཀུན་ངོ་བོ་ཉིད་ཀྱིས་སྟོང་༔ རྒྱུ་རྐྱེན་ལས་འདས་སྤྲོས་པའི་མཐའ་བརྒྱད་བྲལ༔ སྒྲིབ་གཉིས་ཡེ་དག་ཀ་དག་བྱང་ཆུབ་སེམས༔ རང་རིག་ཡེ་ཤེས་ཆོས་སྐུའི་ངོ་བོ་འོ༔ ཨོཾ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཾ༔ ཀུན་ཏུ་སྣང་བའི་ཏིང་འཛིན་བསྒོམ་པ་ནི༔ ཧཱུྃ་ཧྲཱིཿ དེ་ལྟར་འཁོར་འདས་ཆོས་སྐུའི་རང་བཞིན་དུ༔ མ་རྟོགས་འཁོར་བའི་རྒྱུ་འབྲས་ལ་སྤྱོད་པའི༔ འགྲོ་རྣམས་སྡུག་བསྔལ་ཆུ་བོ་ལས་སྒྲོལ་ཕྱིར༔ དམིགས་མེད་སྙིང་རྗེ་ཆེན་པོའི་ཏིང་འཛིན་བསྒོམ༔ ཨོཾ་ཨཱཿམ་ཧཱ་ཀ་རུ་ཎི་ཀ་ཛྙཱ་ན་དྷརྨ་དྷརྟུ་ཨ༔ རྒྱུ་ཡི་ཏིང་འཛིན་གསལ་བར་བསྒོམ་པ་ནི༔ ཧཱུྃ་ཧྲཱིཿ སྟོང་ཉིད་སྙིང་རྗེ་ཟུང་འཇུག་རང་གི་སེམས༔ རྒྱལ་ཀུན་ཐུགས་སྲོག་པདྨ་ཧྲཱིཿདམར་པོ༔ འོད་ཟེར་སྟོང་གསུམ་འཇིག་རྟེན་གང་བར་འཕྲོས༔ གནོད་བྱེད་དགྲ་བགེགས་གདུག་ཅན་མ་ལུས་པ༔ ཚར་བཅད་དམིགས་མེད་སྟོང་ཉིད་དབྱིངས་སུ་བསྒྲལ༔ སྐུ་གསུམ་རྒྱལ་བ་ཀུན་མཆོད་བྱིན་རླབས་བསྡུས༔ དེ་ལས་ཡི་གེ་ཨེ་ཡཾ་རཾ་བཾ་ལཾ༔ སུཾ་ཡིག་རྣམས་ནི་རིམ་པར་སྤྲོས་ཏེ་བབས༔ ཨེ་ཡིག་ནམ་མཁའ་མཐིང་གསལ་ཀུན་བཟང་ཀློང་༔ ཡཾ་འཕྲོས་རླུང་དཀྱིལ་ལྗང་ནག་འབྱམས་ཀླས་དབྱིངས༔ རཾ་ཡིག་དམར་གསལ་མེ་འབར་གོས་དཀར་མཁའ༔ བཾ་ལས་ཆུ་དཀྱིལ་སྣ་ཚོགས་མ་མ་ཀཱི༔ ལཾ་ཡིག་སེར་པོ་གསེར་གྱི་ས་གཞིར་བརྡལ༔ སུཾ་འཕྲོས་ཤ་ཆེན་ཁྲག་ཞག་འཇམ་འཇིམ་ནི༔ སྟོང་གསུམ་ཁྱོན་མཉམ་ཀེང་ཡིག་དཀར་པོ་ལས༔ རུས་པའི་རི་རབ་བརྟན་བརྗིད་འཇིགས་རུང་དབུས༔ བྷྲུཾཿཡིག་ཁ་དོག་ལྔ་ལྡན་ཡོངས་གྱུར་པ༔ ཕྱི་ནི་རིན་ཆེན་སྣ་ལྔའི་རྩིག་པ་ལ༔ ནང་ནི་ཐོད་པ་ཚར་གསུམ་གཞལ་ཡས་ཁང་༔ དུར་ཁྲོད་ཆེན་པོའི་མཚན་ཉིད་ཡོངས་སུ་རྫོགས༔ དེ་དབུས་ཆོས་འབྱུང་ཟླ་གམ་དེ་ཡི་ཕྱིར༔ རྩིབས་བཞི་རྩིབས་བརྒྱད་བཅུ་དྲུག་སྒོ་བཞིར་བཅས༔ དབུས་སུ་ལྷ་ཀླུ་བཅུ་དྲུག་བསྣོལ་བའི་སྟེང་༔ སེང་སྟག་ཆུ་སྲིན་སྦྲུལ་གདུག་དོམ་ལ་སོགས༔ བྱོལ་སོང་གཙོ་བརྒྱད་པད་ཉི་དེ་ཡི་སྟེང་༔ མ་ཧཱ་དེ་ཝ་རུ་ཏྲ་ཏི་ར་བཾ༔ ཨུ་མ་དེ་ཝཱི་རུ་ཏྲཱི་ཏི་ར་བཾ༔ དེ་དག་ཡོངས་གྱུར་ལྷ་ཆེན་ཁྱོ་ཤུག་ཟུང་༔ ཁ་སྦུབས་གན་རྐྱལ་བསྣོལ་མའི་གདན་སྟེང་དུ༔ རང་རིག་ཧྲཱིཿདམར་པདྨའི་གྲི་གུག་ལས༔ ཆེ་མཆོག་པདྨ་དབང་ཆེན་སྐུ་མདོག་དམར༔ བསྐལ་པའི་མེ་ལྟར་བཟོད་དཀའི་ཉམས་ཀྱིས་སྒེག༔ དབུ་དགུ་གཡས་གསུམ་ཞི་ཞལ་དཀར་འཛུམ་བཞད༔ གཡོན་གསུམ་ལྗང་གུ་སྒེག་ཅིང་གཏུམ་རྔམ་ཁྲོ༔ རྩ་བའི་ཞལ་གསུམ་དམར་གསལ་རྗེས་ཆགས་ཉམས༔ བཅོ་བརྒྱད་ཕྱག་ལྡན་གཡས་དགུའི་རྩ་བའི་ཕྱག༔ པདྨ་དུང་ཁྲག་ཤེས་རབ་ཡུམ་ལ་འཁྱུད༔ དེ་འོག་གཡས་བརྒྱད་རྡོ་རྗེ་གྲི་གུག་གྲི༔ མེ་དཔུང་ཟླ་བ་ཐོད་དབྱུག་ཁ་ཊྭཱཾ་ཀ༔ ལྕགས་ཀྱུ་གཡོན་བརྒྱད་དྲིལ་བུ་ཐོད་པའི་རྔ༔ ཨུཏྤལ་ཕྲེང་མཛེས་ཉི་མ་བདུད་སྙིང་དམར༔ ཞགས་པ་ལྕགས་སྒྲོག་གནམ་ལྕགས་སྡིག་པ་འཛིན༔ ཞལ་གདངས་ལྗགས་འདྲིལ་མཆེ་བ་རབ་ཏུ་གཙིགས༔ རལ་པ་དམར་སེར་གྱེན་བརྫེས་ཐོད་པས་བརྒྱན༔ སྐུ་གསུམ་དོན་སྟོན་རྟ་དབུ་དཀར་དམར་ལྗང་༔ རྟ་སྐད་ཐེག་གསུམ་ཆོས་སྒྲས་སྲིད་གསུམ་འདུལ༔ དེ་ཡི་གསང་ཡུམ་རྡོ་རྗེ་རྣལ་འབྱོར་མ༔ རྒྱལ་ཀུན་བསྐྱེད་ཡུམ་པདྨ་གཟི་ལྡན་སྔོ༔ གཡས་པས་ཐོད་ཁྲག་གཡོན་པས་ཙིཏྟ་སྟོབ༔ ཡབ་ཀྱི་ཞབས་བརྒྱད་དྲེགས་པ་མ་ལུས་བརྫིས༔ ཤེས་རབ་ཞབས་གཉིས་བརྐྱང་བསྐུམ་བདེ་སྟོང་སྦྱོར༔ ཡབ་ཡུམ་སྐུ་ལ་བགོ་བའི་གོས་གསུམ་དང་༔ གདགས་པའི་རྒྱན་གཉིས་བྱུག་པའི་རྫས་གསུམ་སོགས༔ དུར་ཁྲོད་ཆས་བརྒྱད་བསེ་ཁྲབ་དབང་གི་ཆས༔ དཔལ་ཆས་ཡོངས་རྫོགས་མེ་དཔུང་ཀློང་ན་བཞུགས༔ ཡབ་ཡུམ་མཉམ་སྦྱོར་མཁའ་ལས་འོད་འཕྲོས་པས༔ རྒྱལ་བ་སྲས་བཅས་མཆོད་ནས་བྱིན་རླབས་བསྡུས༔ ཧྲཱིཿཡིག་དཀར་སེར་དམར་ལྗང་ཕྱོགས་བཞིའི་རྩིབས༔ དྲི་ཟ་གཤིན་རྗེ་ཀླུ་དབང་གནོད་སྦྱིན་ཁྲིར༔ རྡོ་རྗེ་རིན་ཆེན་པདྨ་ལས་རབ་རྩལ༔ དབང་ཆེན་རིགས་བཞི་ཞལ་གསུམ་ཕྱག་དྲུག་པ༔ ཞབས་བཞི་འདོར་སྟབས་གནོད་བྱེད་ཕོ་མོ་བརྫིས༔ ཤར་དུ་རྡོ་རྗེ་དབང་ཆེན་ཧེ་རུ་ཀ༔ སྐུ་མདོག་དཀར་པོ་གཡས་དམར་གཡོན་ལྗང་འཛུམ༔ གཡས་གསུམ་རྡོ་རྗེ་གྲི་གུག་ཐོད་པའི་རྔ༔ གཡོན་གསུམ་དྲིལ་བུ་དུང་ཁྲག་པདྨའི་ཕྲེང་༔ བཛྲ་ཀྲོ་ཏི་སྔོ་སྐྱ་གྲི་ཐོད་འཁྱུད༔ ལྷོ་རུ་རིན་ཆེན་དབང་ཆེན་ཧེ་རུ་ཀ༔ སེར་ནག་གཡས་དམར་གཡོན་དཀར་སྒེག་པའི་ཚུལ༔ གཡས་གསུམ་རིན་ཆེན་གྲི་ཁུག་གནམ་ལྕགས་གྲི༔ གཡོན་གསུམ་གཏེར་བུམ་དུང་དམར་པདྨའི་ཕྲེང་༔ རིན་ཆེན་ཀྲོ་ཏི་སྔོ་སྐྱ་གྲི་ཐོད་འཁྱུད༔ ནུབ་ཏུ་པདྨ་དབང་ཆེན་ཧེ་རུ་ཀ༔ གཡས་དཀར་གཡོན་སྔོ་ཆགས་ཤིང་བརྩེ་བའི་ཉམས༔ གཡས་གསུམ་པདྨའི་བེ་ཅོན་མེ་རྩེ་གསུམ༔ གཡོན་གསུམ་དབང་གི་ཞགས་པ་ཁྲག་མཚོ་དང་༔ པདྨའི་ཕྲེང་བ་པདྨ་ཀྲོ་ཏི་ཡུམ༔ སྔོ་སྐྱ་རང་རྟགས་གྲི་ཐོད་མགུལ་ནས་འཁྱུད༔ བྱང་དུ་ཀརྨ་དབང་ཆེན་ཧེ་རུ་ཀ༔ ལྗང་ནག་གཡས་དཀར་གཡོན་དམར་གཏུམ་ཞིང་ཁྲོ༔ གཡས་གསུམ་རལ་གྲི་རྒྱ་གྲམ་ཕུར་བུ་འདྲིལ༔ གཡོན་གསུམ་མི་སྙིང་ཞིང་དབྱུག་པདྨའི་ཕྲེང་༔ ཀརྨ་ཀྲོ་ཏི་སྔོ་སྐྱ་གྲི་ཐོད་འཁྱུད༔ ཡབ་རྣམས་ཞིང་གི་སྟོད་གཡོགས་གླང་ཆེན་ལྤགས༔ སྟག་ཤམ་མགོ་ཕྲེང་སྦྲུལ་རིགས་ལྔ་ཡིས་བརྒྱན༔ སྤྱི་གཙུག་རང་མདོག་རྟ་སྐད་མཁའ་ལ་འཚེར༔ ཡུམ་རྣམས་རུས་པའི་རྒྱན་དྲུག་གཟིག་ཤམ་དང་༔ དྲིལ་བུ་གཡེར་ཁ་ཨུཏྤལ་དམར་པོའི་ཕྲེང་༔ མཉམ་སྦྱོར་ཡེ་ཤེས་བཞི་ཡི་རང་བཞིན་ཅན༔ བདུད་བཞི་དབྱིངས་སྒྲོལ་གླིང་བཞིའི་འགྲོ་བ་འདུལ༔ ཉོན་མོངས་སྲེག་བྱེད་ཡེ་ཤེས་མེ་ཀློང་བཞུགས༔ གཙོ་བོའི་སྤྱི་བོར་ཡེ་ཤེས་བྱ་ཁྱུང་དམར༔ གནམ་ལྕགས་རྭ་སྡེར་སྤུ་གྲིའི་གཤོག་པ་གདེངས༔ ཀླུ་སྦྲུལ་ཞལ་གསོལ་གཏི་མུག་གདོན་ཚོགས་འཇོམས༔ ནོར་བུའི་གཙུག་སྟེང་པད་ཟླའི་གདན་གྱི་སྟེང་༔ སྣང་མཐའ་དམར་པོ་མཉམ་བཞག་སྤྲུལ་སྐུའི་ཆས༔ ཚེ་བུམ་ཕྱག་མཚན་འཆི་མེད་དངོས་གྲུབ་བདག༔ སླར་ཡང་གཙོ་བོ་ཡབ་ཡུམ་མཁའ་གསང་ལས༔ རང་བྱུང་ཡི་གེ་ཧཱུྃ་ཡིག་དམར་ནག་བརྒྱད༔ ཡོངས་གྱུར་པད་ཉི་རུ་ཏྲ་ཆུ་གླང་དང་༔ ཀླུ་དབང་ལྷ་ཆེན་མ་མོ་དར་ཟབ་གདན༔ དྲེགས་པ་དགྲ་བགེགས་བསྣོལ་ཞིང་བརྫིས་པའི་སྟེང་༔ ཤར་དུ་དཔལ་ཆེན་ཡང་དག་མཐིང་ནག་རྔམ༔ ཞལ་གཅིག་ཕྱག་གཉིས་རྡོ་རྗེ་དུང་ཁྲག་ཅན༔ ཞབས་གཉིས་བརྐྱང་བསྐུམ་བཛྲ་ཀྲོ་ཏི་ཡུམ༔ རྡོ་རྗེའི་རིགས་ཀུན་འདུས་པའི་ཧེ་རུ་ཀ༔ ལྷོ་རུ་འཇམ་དཔལ་སེར་ནག་ཁྲོ་གཏུམ་སྒེག༔ ཞལ་གཅིག་ཕྱག་གཉིས་བེ་ཅོན་འཁོར་ལོ་གདེངས༔ བརྐྱང་བསྐུམ་རོ་ལངས་ནག་མོ་དགྱེས་སྦྱོར་ཡུམ༔ རིན་ཆེན་རིགས་ཀུན་འདུས་པའི་བདག་ཉིད་ཅན༔ ནུབ་ཏུ་པདྨ་རྟ་མཆོག་དམར་གསལ་འཛུམ༔ ཞལ་གཅིག་ཕྱག་གཉིས་པདྨ་ཁ་ཊྭཱཾ་ཀ༔ ཞབས་གཉིས་འདོར་སྟབས་པདྨ་གཟི་ལྡན་ཡུམ༔ པདྨ་དབང་གི་རིགས་ཀུན་འདུས་པར་བསམ༔ བྱང་དུ་རྡོ་རྗེ་གཞོན་ནུ་ལྗང་ནག་གཏུམ༔ ཞལ་གཅིག་ཕྱག་གཉིས་རི་རབ་ཕུར་བུ་འདྲིལ༔ བརྐྱང་བསྐུམ་འཁོར་ལོ་རྒྱས་འདེབས་ཤེས་རབ་ཡུམ༔ ཕྲིན་ལས་རིགས་འདུས་སྒྲོལ་བྱེད་དཔའ་བོ་ཆེ༔ ཤར་ལྷོ་བླ་མེད་ཧེ་རུ་མཐིང་གསལ་མདོག༔ ཞལ་གཅིག་ཕྱག་གཉིས་བྱ་ཁྱུང་ཞིང་དབྱུག་བསྣམས༔ བརྐྱང་བསྐུམ་ཀུན་བཟང་ཉིད་ཞི་ཁྲོ་མོ་ཡུམ༔ མ་མོ་རྦོད་གཏོང་ལྷ་ཡི་གཙོ་བོར་བཞུགས༔ ལྷོ་ནུབ་རིག་འཛིན་རྒྱལ་པོ་རྡོ་རྗེ་ཆོས༔ དཀར་དམར་མདངས་ལྡན་རྡོ་རྗེ་དྲིལ་བུ་བསྣོལ༔ གཡས་གཡོན་བརྐྱང་བསྐུམ་མན་དྷ་ར་བ་ཡུམ༔ བླ་མེད་རིག་འཛིན་ཀུན་འདུས་ངོ་བོར་གསལ༔ ནུབ་བྱང་དྲེགས་པ་ཀུན་འདུལ་སྨུག་ནག་མདོག༔ ཞལ་གཅིག་ཕྱག་གཉིས་ལྷ་ཀླུའི་མགོ་ཕྲེང་བསྣམས༔ བརྐྱང་བསྐུམ་ཁམས་གསུམ་སྤྱི་འདུལ་ཡུམ་དང་སྦྱོར༔ འཇིག་རྟེན་དྲེགས་པ་ཡོངས་ཀྱི་སྤྱི་རྗེ་ཆེ༔ བྱང་ཤར་སྟོབས་ལྡན་ནག་པོ་མིག་སྨན་མདོག༔ ཞལ་གཅིག་ཕྱག་གཉིས་སྙིང་ཕྲེང་ཐོད་ཁྲག་གསོལ༔ འབྱུང་ལྔའི་བདག་མོ་མཉམ་སྦྱོར་སྲིད་ཁམས་གནོན༔ དགྲ་བགེགས་ལོག་འདྲེན་ཀུན་གྱི་གཤེད་མར་བསམ༔ ཀུན་ཀྱང་ཁྲོ་ཆས་ཡོངས་རྫོགས་མེ་ཀློང་འགྱིང་༔ཡུམ་རྣམས་རང་གི་ཡབ་ཀྱི་མདངས་དང་ལྡན༔ གྲི་གུག་ཐོད་ཁྲག་འཁྱུད་ཅིང་ཁྲོ་མོའི་ཆས༔ རུས་རྒྱན་དྲིལ་བུ་པད་ཕྲེང་གཟིག་ཤམ་བཀླུབས༔ ཕྱི་རོལ་རྩིབས་ལས་པད་ཉི་ཞིང་རྐྱང་སྟེང་༔ གནས་ཡུལ་ཕྲ་མེན་ཆེན་མོ་བཅུ་དྲུག་པོ༔ གཽ་རི་སྔོན་མོ་ཞིང་དབྱུག་དུང་ཁྲག་བསྣམས༔ རྐུན་མོ་སེར་མོ་ཐབས་ཤེས་མདའ་གཞུ་འགེང་༔ པྲ་མོ་དམར་མོ་ཆུ་སྲིན་རྒྱལ་མཚན་ཕྱར༔ བེ་ཏ་ནག་མོ་རྡོ་རྗེས་ཐོད་ཁྲག་དཀྲུགས༔ པུསྐ་དམར་སེར་རྒྱུ་མ་འདྲེན་ཅིང་གསོལ༔ ཀསྨ་ལྗང་ནག་རྡོ་རྗེ་དུང་དམར་གསོལ༔ ཙནྡྷ་སེར་ནག་ཞིང་གི་རྒྱུ་མ་འདྲེན༔ སྨེ་ཤ་མཐིང་ནག་རོ་ཟ་སྡང་མིག་ལྟ༔ སེང་ཧ་སྨུག་ནག་ཞིང་བཅུའི་རོ་ལ་ཟ༔ བྱ་ཀྲྀ་དམར་མོ་སྟག་གདོང་ལག་གཉིས་བསྣོལ༔ སྲི་ལ་ནག་མོ་ཝ་གདོང་སྤུ་གྲི་གདེངས༔ ཤྭ་ན་མཐིང་ནག་སྤྱང་གདོང་བམ་རོ་གསོལ༔ ཀྲི་ཏ་དཀར་སེར་བྱ་རྒོད་རྒྱུ་འདྲེན་འཇིགས༔ ཀངྐ་དམར་མོ་ཞིང་ཆུང་ཕྲག་ལ་གཟར༔ ཁ་ཁ་བྱ་རོག་གདོང་ནག་བྷན་གྲི་གདེངས༔ ཨུ་ལུ་འུག་གདོང་མཐིང་ནག་ལྕགས་ཀྱུ་ཕྱར༔ མཆེ་གཤོག་ཞིང་ལྤགས་རུས་རྒྱན་བརྐྱང་བསྐུམ་བསྒྲད༔ སྒོ་བཞིར་ཞིང་རྐྱང་གདན་ལ་སྒོ་མ་བཞི༔ དཀར་སེར་དམར་ལྗང་ཁྲོ་ཆས་འདོར་ཐབས་བསྒྲད༔ ཕྱག་མཚན་ལྕགས་ཀྱུ་ཞགས་པ་ལྕགས་སྒྲོག་དྲིལ༔ བདུད་འདུལ་རིགས་བཞི་ཁྱམས་ཀྱི་ཕྱི་རོལ་ཏུ༔ ཡེ་ཤེས་ལྷ་མིག་སྒྲིབ་བྲལ་ཁོང་ནས་གསལ༔ དམུས་ལོང་བཅུ་དྲུག་མེ་རླུང་ཆུ་འབྲུག་ཆིབས༔ གཞན་ཡང་སྒྲུབ་སྡེ་བརྒྱད་ཀྱི་ལྷ་ཚོགས་རྣམས༔ མ་འདྲེས་ཡོངས་རྫོགས་དབང་པོའི་ཚོན་རིས་ཀྱི༔ འཆི་མེད་ལམ་ལ་བཀླུབས་བཞིན་གསལ་བར་གྱུར༔ གནས་གསུམ་རྒྱལ་ཀུན་གསང་གསུམ་ཨོཾ་ཨཱཿཧཱུྃ༔ དཀར་དམར་མཐིང་ཀ་དྭངས་གསལ་འོད་ཟེར་འཕྲོས༔ དབང་ལྷ་སྤྱན་དྲངས་དབང་བསྐུར་བྱིན་བརླབས་མཐུས༔ སྣང་མཐའ་གཙོར་གྱུར་རིགས་ལྔས་དབུ་བརྒྱན་གྱུར༔ གཉིས་པ་སྙན་གསན་དབབ་ཅིང་གསོལ་བ་ནི༔ ཧཱུྃ་ཧྲཱིཿ དགོངས་ཤིག་མཁྱེན་བརྩེའི་བདག་ཉིད་བཅོམ་ལྡན་འདས༔ ལྷ་ཡི་ལྷ་མཆོག་རྒྱལ་བ་ཐུགས་རྗེ་ཅན༔ སྒྲིབ་མེད་མཁྱེན་པའི་སྤྱན་གྱིས་འདིར་གཟིགས་ལ༔ ཐོགས་བྲལ་ཆགས་པ་ཆེན་པོས་སྙན་གསོན་ཅིག༔ བདག་ཅག་ཐོག་མ་མེད་ནས་མ་རིག་མཐུས༔ རྒྱལ་བའི་སྐུ་གསུང་ཐུགས་ཡོན་ཕྲིན་ལས་དང་༔ ཐ་དད་མེད་ཀྱང་བདག་རྟོག་སོ་སོར་བཟུང་༔ དེ་ཕྱིར་ཀུན་རྫོབ་ལྷ་རུ་སྒྲུབ་ལགས་ན༔ རྟག་པ་རྒྱུན་གྱི་ཐུགས་བརྩེའི་ཤུགས་བསྐྱེད་ལ༔ གདུལ་བྱའི་བློ་དང་འཚམས་པར་སྐུར་བཞེངས་ནས༔ ཆགས་མེད་སྐྱོན་བྲལ་པདྨ་རིགས་ཀྱི་ལྷས༔ གསང་གསུམ་དབྱེར་མེད་གཅིག་ཏུ་འགྲུབ་པར་མཛོད༔ ཨོཾ་ཧྲཱིཿབཛྲ་ཀྲོ་ཏ་ཧྱ་གྲི་ཝ་པདྨ་ཏེ་ཛྭ་ཧུ་ལུ་ཧུ་ལུ་ཧཱུྃ་ཕཊ༔ སརྦ་ས་མ་ཡཱ་ཛ༔ གསུམ་པ་སྤྱན་འདྲེན་སྤོས་རོལ་དབྱངས་དང་བཅས༔ མ་བྱམས་བུ་ཡི་གདུང་གླུས་འདི་སྐད་དོ༔ ཧཱུྃ་ཧྲཱིཿ འོག་མིན་ཆོས་དབྱིངས་སྤྲོས་བྲལ་ཕོ་བྲང་ནས༔ དབྱིངས་ཀྱི་ཧེ་རུ་ཀ་དཔལ་ཀུན་ཏུ་བཟང་༔ བདག་འཛིན་རུ་ཏྲའི་གཤེད་དུ་སྐུར་བཞེངས་པ༔ དབང་ཆེན་རྟ་མཆོག་འཁོར་བཅས་གཤེགས་སུ་གསོལ༔ ཆགས་མེད་དབང་དྲག་རོལ་པའི་དུར་ཁྲོད་ནས༔ པདྨ་གར་གྱི་དབང་ཕྱུག་གཤེགས་སུ་གསོལ༔ ཤེས་རབ་སྟོང་ཉིད་དབྱིངས་ཀྱི་ཀློང་ཡངས་ནས༔ པདྨ་གཟི་ལྡན་རྒྱལ་མོ་གཤེགས་སུ་གསོལ༔ ཀླུ་བདུད་དྲེགས་པ་འདུལ་བའི་མཁའ་དབྱིངས་ནས༔ སྤྲུལ་པའི་བྱ་ཁྱུང་རྒྱལ་པོ་གཤེགས་སུ་གསོལ༔ ནུབ་ཕྱོགས་བདེ་ཆེན་པདྨོ་བཀོད་པ་ནས༔ རིགས་བདག་ཨ་མི་དྷེ་ཝ་གཤེགས་སུ་གསོལ༔ ཤར་ཕྱོགས་རྡོ་རྗེ་འབར་བའི་དུར་ཁྲོད་ནས༔ བཛྲ་དབང་ཆེན་ཡབ་ཡུམ་གཤེགས་སུ་གསོལ༔ ལྷོ་ཕྱོགས་རིན་ཆེན་འོད་འཕྲོའི་དུར་ཁྲོད་ནས༔ རཏྣ་དབང་ཆེན་ཡབ་ཡུམ་གཤེགས་སུ་གསོལ༔ ནུབ་ཕྱོགས་པདྨ་བརྩེགས་པའི་དུར་ཁྲོད་ནས༔ པདྨ་དབང་ཆེན་ཡབ་ཡུམ་གཤེགས་སུ་གསོལ༔ བྱང་ཕྱོགས་གཏུམ་དྲག་འབར་བའི་དུར་ཁྲོད་ནས༔ ཀརྨ་དབང་ཆེན་ཡབ་ཡུམ་གཤེགས་སུ་གསོལ༔ མེ་ལོང་ཡེ་ཤེས་ཀུན་གསལ་ཀློང་ཡངས་ནས༔ ཡང་དག་ཐུགས་ཀྱི་ལྷ་ཚོགས་གཤེགས་སུ་གསོལ༔ མཉམ་ཉིད་ཡེ་ཤེས་ཁྱབ་བརྡལ་ཕོ་བྲང་ནས༔ འཇམ་དཔལ་སྐུ་ཡི་ལྷ་ཚོགས་གཤེགས་སུ་གསོལ༔ སོར་རྟོག་ཡེ་ཤེས་མ་འདྲེས་ཕོ་བྲང་ནས༔ པདྨ་གསུང་གི་ལྷ་ཚོགས་གཤེགས་སུ་གསོལ༔ བྱ་གྲུབ་ཡེ་ཤེས་ཕྲིན་ལས་ཀུན་འགྲུབ་ནས༔ ཕུར་པ་ཕྲིན་ལས་ལྷ་ཚོགས་གཤེགས་སུ་གསོལ༔ བདེ་ཆེན་དགའ་བཞིའི་སྙོམས་པའི་ཕོ་བྲང་ནས༔ མ་མོ་རྦོད་གཏོང་ལྷ་ཚོགས་གཤེགས་སུ་གསོལ༔ བྱིན་རླབས་ཀུན་འབྱུང་དབང་བཞིའི་ཕོ་བྲང་ནས༔ རིག་འཛིན་སློབ་དཔོན་ལྷ་ཚོགས་གཤེགས་སུ་གསོལ༔ དྲེགས་པ་ལས་ལ་བཀོལ་བའི་ཕོ་བྲང་ནས༔ འཇིག་རྟེན་མཆོད་བསྟོད་ལྷ་ཚོགས་གཤེགས་སུ་གསོལ༔ བདུད་དང་དམ་སྲི་ཚར་གཅོད་ཕོ་བྲང་ནས༔ དམོད་པ་དྲག་སྔགས་ལྷ་ཚོགས་གཤེགས་སུ་གསོལ༔ གནས་ཡུལ་དབྱིངས་དག་སྤྲུལ་པའི་དུར་ཁྲོད་ནས༔ མ་མོ་ཕྲ་མེན་བཅུ་དྲུག་གཤེགས་སུ་གསོལ༔ ལས་བཞིའི་ཕྲིན་ལས་ཐོགས་མེད་སྒོ་བཞི་ནས༔ སྒོ་བ་ཆེན་པོ་རྣམ་བཞི་གཤེགས་སུ་གསོལ༔ ཡེ་ཤེས་སྒྲིབ་མེད་སྤྲུལ་པའི་གནས་རྣམས་ནས༔ བཀའ་སྲུང་དམ་ཅན་རྒྱ་མཚོ་གཤེགས་སུ་གསོལ༔ གཞན་ཡང་བདུན་བརྒྱ་ཉེར་ལྔའི་ལྷ་ཚོགས་རྣམས༔ སྙིགས་དུས་སྡུག་བསྔལ་བསལ་ཕྱིར་གཤེགས་སུ་གསོལ༔ རྣལ་འབྱོར་བར་ཆད་སེལ་ཕྱིར་གཤེགས་སུ་གསོལ༔ ཐུན་མོང་དངོས་གྲུབ་སྩོལ་ཕྱིར་གཤེགས་སུ་གསོལ༔ མཆོག་གི་དངོས་གྲུབ་འགྲུབ་ཕྱིར་གཤེགས་སུ་གསོལ༔ སྣང་བ་དབང་དུ་སྡུད་ཕྱིར་གཤེགས་སུ་གསོལ༔ དྲེགས་པ་ལས་ལ་འཁོལ་ཕྱིར་གཤེགས་སུ་གསོལ༔ ཨོཾ་བཛྲ་མ་ཧཱ་ཀྲོ་ཏ་ཧྱ་གྷྲི་ཝ་པདྨ་ཏེ་ཛྭ་ཨ་མི་དྷེ་ཝ་བཛྲ་རཏྣ་པདྨ་ཀརྨ་སརྦ་ཀྲོ་ཏ་ཛྙཱ་ན་ས་མ་ཡཱ་ཛ་ཛ༔ ཞེས་པས་སྤྱན་དྲངས་རོལ་མོ་དྲག་ཏུ་དཀྲོལ༔ བཞི་བ་དམ་ཡེ་དབྱེར་མེད་བཞུགས་གསོལ་ནི༔ ཧཱུྃ་ཧྲཱིཿ རང་བྱུང་ལྷུན་གྲུབ་དུར་ཁྲོད་གཞལ་ཡས་འདིར༔ རྣམ་ཤེས་ཚོགས་བརྒྱད་དབྱིངས་སུ་གནས་དག་ཕྱིར༔ དྲེགས་པ་ཆགས་བྲལ་པད་ཉི་ཟླ་གདན་ལ༔ དབང་ཆེན་ཁྲོ་རྒྱལ་རྟ་མཆོག་ཡབ་དང་ཡུམ༔ རིགས་ཀྱི་བདག་པོ་དབང་ཆེན་ཡབ་ཡུམ་བརྒྱད༔ གནས་ཡུལ་མ་མོ་སྒོ་སྐྱོང་སྤྲུལ་པར་བཅས༔ ཐབས་ཤེས་དབྱེར་མེད་རྟེན་ལ་བརྟན་པར་བཞུགས༔ བྱང་ཆུབ་བར་དུ་མི་འབྲལ་ཏིཥྛ་ལྷན༔ བཛྲ་ས་མ་ཡཱ་ཛྙཱ་ན་ཏིཥྛ་ལྷན༔ ལྔ་བ་བརྡའ་ཕྱག་འཚལ་ཞིང་འདུད་པ་ནི༔ ཧཱུྃ་ཧྲཱིཿ ཡེ་ནས་རང་དང་པདྨ་དབང་ཆེན་ལྷ༔ འདུ་འབྲལ་མེད་པའི་ཀློང་དུ་རོ་གཅིག་ཀྱང་༔ མ་རྟོགས་སྣང་ངོར་རྟེན་འབྱུང་བསླུ་མེད་འབྲས༔ ཡི་དམ་སྤྲུལ་པའི་ལྷ་ལ་གུས་ཕྱག་འཚལ༔ ཚོགས་གཉིས་རྫོགས་ནས་ཚེ་འདིར་རྟ་མཆོག་དཔལ༔ སྐུ་གསུམ་མཉམ་པའི་ཡོན་ཏན་མངོན་གྱུར་ཤོག༔ ན་མོ་པུ་རུ་ཤ་ཡ་ཨ་ཏི་པུ་ཧོ༔ པྲ་ཏིཙྪ་ཧོ༔ དྲུག་པ་ཕྱི་ཡི་མཆོད་པ་འབུལ་བ་ནི༔ ཧཱུྃ་ཧྲཱིཿ རྙོག་མེད་དྭངས་བསིལ་ཡན་ལག་བརྒྱད་ལྡན་ཆབ༔ མཚར་སྡུག་ཡིད་འོང་འདབ་སྟོང་པདྨའི་ཚལ༔ ལྷན་སྐྱེས་སྦྱར་བྱུང་ཟག་མེད་བསུང་ཞིམ་དྲི༔ གསལ་བའི་མར་མེ་ཀུན་སྣང་ནོར་བུའི་འོད༔ ག་བུར་ལ་སོགས་བཟང་དྲུག་སྦྱར་བའི་སྐྱེམས༔ རོ་བཅུད་ནུས་པ་བརྒྱ་ལྡན་ལྷ་ཡི་ཟས༔ སྙན་འཇེབས་ངོ་མཚར་སྣ་ཚོགས་རོལ་མོའི་སྒྲ༔ གཟུང་འཛིན་སྐྱོན་བྲལ་ལྷག་པའི་ལྷ་ལ་འབུལ༔ བཞེས་ནས་མཆོག་ཐུན་དངོས་གྲུབ་དུས་འདིར་སྩོལ༔ ཨོཾ་བཛྲ་ཨརྒྷཾ་ནས་ཤཔྟ་པྲ་ཏི་ཙ་པུ་ཙ་མེ་ག་ས་མུ་ཏྲ་སྥ་ར་ཎ་ས་མ་ཡཱ་ཨཱ༔ཧཱུྃ༔ བདུན་པ་ནང་གི་མཆོད་པ་འབུལ་བ་ནི༔ ཧཱུྃ་ཧྲཱིཿ རྒྱལ་ཀུན་གསུང་གི་དབང་ཕྱུག་ཧེ་རུ་ཀ༔ དབང་ཆེན་རྟ་མཆོག་རྒྱལ་པོའི་ལྷ་ཚོགས་ལ༔ ཞིང་བཅུ་བསྒྲལ་བའི་དབང་པོའི་མེ་ཏོག་དང་༔ མི་རོའི་ཤ་ཚིལ་བསྲེགས་པའི་དུད་པ་དང་༔ ཞུན་ཆེན་རོ་སྐྲ་ལ་སྦྱར་མེ་འབར་འོད༔ ཁྲག་མཁྲིས་ཟུང་དུ་སྦྱར་བའི་དྲི་ཡི་ཆབ༔ ཤ་ཁྲག་རུས་གསུམ་ལྷུན་པོར་སྤུངས་པའི་ཟས༔ ཐོད་རྔ་རྐང་གི་གླིང་བུའི་རྔམ་སྒྲ་སྒྲོག༔ དབང་པོ་དྲུག་ལ་ཟག་མེད་བདེ་སྟེར་བའི༔ ནང་གི་མཆོད་བཞེས་ཞིང་བཅུའི་དགྲ་དང་བགེགས༔ ཚར་གཅོད་དྲག་པོའི་དངོས་གྲུབ་མཆོག་སྩོལ་ཅིག༔ ཨོཾ་མ་ཧཱ་ཤ་མ་ཤ་ན་ས་པ་རི་ཝ་ར་རཱུ་པ་ཤཔྟ་གནྡྷེ་ར་ས་སྤཪྴེ་པྲ་ཏིཙྩ་ཧོ༔ བརྒྱད་པ་གསང་བ་དང་པོ་སྨན་མཆོད་ནི༔ ཧཱུྃ་ཧྲཱིཿ རང་བྱུང་ཀ་པཱ་ལ་ཡི་སྣོད་མཆོག་ཏུ༔ རྩ་བརྒྱད་ཡན་ལག་སྟོང་སྦྱར་བདུད་རྩི་སྨན༔ གཉིས་འཛིན་རྟོག་བྲལ་པདྨ་དབང་ཆེན་ལྷར༔ གུས་པས་འབུལ་ལོ་མཆོག་ཐུན་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ཆོས་དབྱིངས་སྤྲོས་བྲལ་ཀུན་བཟང་ཡབ་དང་ཡུམ༔ ལོངས་སྤྱོད་རྫོགས་སྐུ་པདྨ་ཧེ་རུ་ཀ༔ སྐྱོན་བྲལ་པདྨའི་རིགས་འཁྲུངས་ཐོད་ཕྲེང་རྩལ༔ སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ རྒྱལ་ཡུམ་མཁའ་འགྲོའི་གཙོ་མོ་མཁར་ཆེན་བཟའ༔ པདྨ་གསུང་གི་བཀའ་བབས་རྒྱལ་མཆོག་དབྱངས༔ གངས་ཅན་བོད་ཀྱི་མུན་སེལ་ཁྲི་སྲོང་རྗེར༔ སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ཕུར་པའི་བཀའ་བབས་དཔལ་གྱི་དབང་ཕྱུག་ཞབས༔ སེལ་མེད་བརྒྱུད་པ་རྩ་བརྒྱུད་བླ་མ་དང་༔ དབང་ཆེན་ཡབ་ཡུམ་རིགས་བདག་སྲས་མཆོག་བཞི༔ སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ སྐུ་གསུང་ཐུགས་ཡོན་ཕྲིན་ལས་རྦོད་གཏོང་དང་༔ རིག་འཛིན་སློབ་དཔོན་འཇིག་རྟེན་མཆོད་བསྟོད་ལྷ༔ དམོད་པ་དྲག་སྔགས་བཀའ་སྡོད་དམ་ཅན་ལ༔ སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ དེ་ནས་དངོས་གྲུབ་ལེགས་པར་ལེན་པ་ནི༔ བདུད་རྩིའི་དབུས་སུ་ཨོཾ་ཨཱཿཧཱུྃ་གསུམ་ལས༔ རྒྱལ་ཀུན་གསང་གསུམ་བདུད་རྩི་དཀར་དམར་མཐིང་༔ བདག་གི་སྤྱི་མགྲིན་སྙིང་གར་རེག་པའི་མོད༔ བདེ་གཤེགས་སྐུ་གསུམ་དངོས་གྲུབ་མཆོག་ཐོབ་ཤོག༔ ཀཱ་ཡ་སིདྡྷི་ཨོཾ༔ ཝཀྐ་སིདྡྷི་ཨཱ༔ ཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱིཿ བདུད་རྩིའི་ཐིགས་པ་ལྕེ་ལ་མྱང་༔ དགུ་བ་རཀྟའི་མཆོད་འབུལ་ནི༔ ཧཱུྃ་ཧྲཱིཿ ལྕང་ལོར་བཅས་པའི་བདེ་སྐྱོང་དུང་ཕོར་དུ༔ དམ་ཉམས་སྙིང་ཁྲག་མཚན་ལྡན་པདྨའི་བཅུད༔ བརྒྱ་རྩའི་དམར་ཆེན་སྦྱོར་བའི་མཆོད་པ་འདི༔ ཁམས་གསུམ་དབང་སྡུད་རྟ་མཆོག་ལྷ་ཚོགས་ལ༔ རྗེས་ཆགས་སེམས་ཀྱིས་འབུལ་ལོ་བདེར་བཞེས་ནས༔ ཚད་མེད་ཐུགས་རྗེས་ཁམས་གསུམ་འཁོར་བ་ལས༔ རྒྱུད་དྲུག་དབྱིངས་སུ་སྒྲོལ་བའི་དངོས་གྲུབ་སྩོལ༔ མ་ཧཱ་རཀྟ་ལ་ཁཱ་རཾ་ཁཱ་ཧི༔ བཅུ་བ་ལའང་གསུམ་སྟེ་དང་པོ་ནི༔ གཏོར་མ་སྨན་རཀ་བྲན་ཏེ་འདི་སྐད་དོ༔ ཧཱུྃ་ཧྲཱིཿ རིན་ཆེན་བྷནྡྷ་ཡངས་པའི་གཏོར་སྣོད་དུ༔ འབྱུང་བའི་རྩི་བཅུད་བསྡུས་པའི་དཔལ་བཤོས་ལ༔ ཞིང་བཅུའི་ཤ་ཁྲག་བརྒྱན་པའི་གཏོར་མ་འདི༔ སྣང་སྲིད་ཟིལ་གནོན་ལྷག་པའི་ལྷ་ལ་འབུལ༔ ཐུགས་རྗེས་མཆོག་ཐུན་ཡིད་བཞིན་མྱུར་འགྲུབ་ནས༔ སྲིད་ལས་འགྲོ་ཀུན་སྒྲོལ་བའི་དངོས་གྲུབ་སྩོལ༔ བཛྲ་མ་ཧཱ་ཀྲོ་ཏ་ཧྱཱ་གྲྀ་ཝ་སརྦ་བྷཱ་ལིང་ཏ་ཁ་ཁ་ཁཱ་ཧི་ཁཱ་ཧི༔ གཉིས་པ་ཐབས་ཤེས་སྦྱོར་སྒྲོལ་མཆོད་པ་ནི༔ ཧཱུྃ་ཧྲཱིཿ ཨེ་ཡིག་སྟོང་ཆེན་ཤེས་རབ་རིག་མའི་མཁར༔ ཝཾ་ལས་ཐབས་མཆོག་བདེ་བའི་རྡོ་རྗེ་ཡིས༔ མཉམ་སྦྱོར་དགའ་བཞིའི་དྲངས་པའི་ཐབས་ཤེས་རྫས༔ བདེ་ཆེན་བདེ་བའི་དཀྱིལ་འཁོར་ལྷ་ལ་འབུལ༔ སྡུག་བསྔལ་བདེ་བར་སྦྱོར་བའི་དངོས་གྲུབ་སྩོལ༔ ཆོས་ཉིད་སྟོང་པའི་བྲུབ་ཁུང་ཡངས་པ་རུ༔ ཆོས་ཅན་མཚན་འཛིན་ཀུན་རྟོག་དགྲ་བགེགས་བྲུབ༔ སྟོང་ཉིད་སྙིང་རྗེ་ཟུང་འཇུག་ཕུར་པས་བསྒྲལ༔ ལོག་རྟོག་ཚར་གཅོད་དྲག་པོའི་དངོས་གྲུབ་སྩོལ༔ མ་ཧཱ་བོ་དྷི་ཙིཏྟ་སྟ་ན་ག་ན་སརྦ་པཱུ་ཙ་ཧོ༔ གསུམ་པ་དོན་དམ་དེ་ཉིད་མཆོད་པ་ནི༔ ཧཱུྃ་ཧྲཱིཿ མཆོད་ཡུལ་ལྷ་ཚོགས་སྣང་སྟོང་སྒྱུ་མའི་གར༔ མཆོད་རྫས་ཡོ་བྱད་ཏིང་འཛིན་སྒྱུ་མའི་འཕྲུལ༔ མཆོད་བྱེད་རྣལ་འབྱོར་གློ་བུར་སྒྱུ་མའི་ངང་༔ མཆོད་བྱ་མཆོད་བྱེད་མཆོད་ཡུལ་ཆོས་སྐུའི་ཀློང་༔ སྨྲ་བསམ་བརྗོད་མེད་སྟོང་ཆེན་ཨེ་མ་ཧོ༔ མ་ཧཱ་དྷརྨ་དྷརྟུ་པཱུ་ཛ་ཨཱཿཧཱུྃ༔ བཅུ་གཅིག་བསྟོད་པ་ལའང་རྣམ་གྲངས་གཉིས་ལས༔ དང་པོ་སྐུ་གསུང་ཐུགས་ལ་བསྟོད་པ་ནི༔ ཧཱུྃ་ཧྲཱིཿ ངོ་བོ་སྟོང་ཉིད་སྤྲོས་བྲལ་ཆོས་ཀྱི་སྐུ༔ རང་བཞིན་ལྷུན་གྲུབ་མཚན་དཔེ་ལོངས་སྤྱོད་རྫོགས༔ ཐུགས་རྗེ་རྩོལ་བྲལ་ཞི་ཁྲོ་ཉམས་བརྒྱའི་འཕྲུལ༔ རྒྱལ་ཀུན་སྐུ་ཡི་ཡོན་ཏན་རྫོགས་ལ་བསྟོད༔ སྟོང་ཉིད་བརྗོད་བྲལ་ན་དཱའི་རང་གདངས་ལས༔ གདུལ་བྱའི་བློ་དང་འཚམས་པའི་ཐེག་གསུམ་ཆོས༔ དྲག་ཤུལ་རྔམས་པའི་གད་མོས་ས་གསུམ་འདུལ༔ བདེ་གཤེགས་གསུང་གི་ཡོན་ཏན་རྫོགས་ལ་བསྟོད༔ གདོད་ནས་སྟོང་ཆེན་ཆོས་དབྱིངས་ཡེ་ཤེས་རྩལ༔ དག་པ་སྐུ་ལྔའི་རང་གཟུགས་འགགས་མེད་འཆར༔ དམིགས་མེད་མཁྱེན་བརྩེ་ནུས་པའི་དཔལ་འབར་བ༔ རྣམ་ཀུན་ཐུགས་ཀྱི་ཡོན་ཏན་རྫོགས་ལ་བསྟོད༔ ཁམས་གསུམ་དབང་སྡུད་རྟ་མཆོག་ཧེ་རུ་ཀ༔ སྐུ་མདོག་དམར་ནག་བསྐལ་མེའི་གཟི་བརྗིད་འབར༔ དབུ་གསུམ་ཁམས་གསུམ་ས་དགུའི་གདུག་པ་འདུལ༔ བཅོ་བརྒྱད་སྟོང་ཉིད་ཕྱག་དང་ལྡན་ལ་བསྟོད༔ རྟ་དབུས་བདག་མེད་ཆོས་སྒྲས་ལོག་རྟོག་འདུལ༔ ཕྱག་མཚན་སྣ་ཚོགས་བྱང་ཆུབ་ཕྱོགས་ཆོས་མཚོན༔ ཞབས་བརྒྱད་ཚོགས་བརྒྱད་ལྷ་ཀླུའི་གདུག་པ་འདུལ༔ བརྡ་རྟགས་ཡོན་ཏན་མ་ལུས་རྫོགས་ལ་བསྟོད༔ ཤེས་རབ་ཆེན་པོས་མཚན་མའི་རྟོག་ཚོགས་འཇོམས༔ བདེ་ཆེན་དགའ་བཞིའི་ཡེ་ཤེས་ཡུམ་དང་སྦྱོར༔ པདྨ་གཟི་ལྡན་རྒྱལ་ཀུན་དབྱིངས་ནས་བསྐྱེད༔ དུར་ཁྲོད་ཆས་རྫོགས་འགྲོ་དྲུག་འདུལ་ལ་བསྟོད༔ གཉིས་པ་འཁོར་གྱི་ལྷ་ཚོགས་བསྟོད་པ་ནི༔ ཧཱུྃ་ཧྲཱིཿ རིགས་ཀྱི་བདག་པོ་ཀུན་བཟང་ཆོས་ཀྱི་སྐུ༔ མཚན་དཔེའི་ངོ་མཚར་པདྨ་རིགས་ཀྱི་གཙོ༔ འཆི་མེད་མཆོག་སྩོལ་སངས་རྒྱས་སྣང་མཐའ་ཡས༔ མཐོང་ཐོས་དྲན་རེག་སྒྲོལ་ལ་ཕྱག་འཚལ་བསྟོད༔ ཧཱུྃ་ཧྲཱིཿ ཤར་ནས་མེ་ལོང་ཡེ་ཤེས་རང་རྩལ་ལས༔ དྲི་ཟའི་གདོན་འདུལ་རྡོ་རྗེ་ཧེ་རུ་ཀ༔ དབང་ཆེན་སྲས་མཆོག་ཞི་བའི་ཕྲིན་ལས་བདག༔ ཉོན་མོངས་ཉེས་པའི་སྐྱོན་ཚོགས་འཇོམས་ལ་བསྟོད༔ ཧཱུྃ་ཧྲཱིཿ ལྷོ་ནས་མཉམ་ཉིད་ཡེ་ཤེས་རང་རྩལ་ལས༔ གཤིན་རྗེའི་གདོན་འདུལ་རཏྣ་ཧེ་རུ་ཀ༔ དབང་ཆེན་སྲས་མཆོག་རྒྱས་པའི་ཕྲིན་ལས་བདག༔ ཚེ་དཔལ་ལོངས་སྤྱོད་སྤེལ་ལ་ཕྱག་འཚལ་བསྟོད༔ ཧཱུྃ་ཧྲཱིཿ ནུབ་ནས་སོར་རྟོག་ཡེ་ཤེས་རང་རྩལ་ལས༔ ཀླུ་བདུད་གདོན་འདུལ་པདྨ་ཧེ་རུ་ཀ༔ དབང་ཆེན་སྲས་མཆོག་དབང་གི་ཕྲིན་ལས་བདག༔ ཁམས་གསུམ་སྣང་སྲིད་དབང་དུ་སྡུད་ལ་བསྟོད༔ ཧཱུྃ་ཧྲཱིཿ བྱང་ནས་བྱ་གྲུབ་ཡེ་ཤེས་རང་རྩལ་ལས༔ གནོད་སྦྱིན་གདོན་འདུལ་ཀརྨ་ཧེ་རུ་ཀ༔ དབང་ཆེན་སྲས་མཆོག་དྲག་པོའི་ཕྲིན་ལས་བདག༔ ལོག་འདྲེན་བརླག་པར་མཛད་ལ་ཕྱག་འཚལ་བསྟོད༔ ཧཱུྃ་ཧྲཱིཿ བདེ་གཤེགས་སྐུ་གསུང་ཐུགས་ཡོན་ཕྲིན་ལས་འཕྲུལ༔ ཡང་དག་འཇམ་དཔལ་པདྨ་ཀཱི་ལ་ཡ༔ བླ་མེད་ཧེ་རུ་རིག་འཛིན་དྲེགས་པ་འདུལ༔ སྟོབས་ལྡན་སྒྲུབ་སྡེ་བརྒྱད་ཀྱི་ལྷ་ལ་བསྟོད༔ ཞི་རྒྱས་དབང་དྲག་ལས་བཞིའི་ཕྲིན་ལས་ཀྱི༔ ཐུན་མོང་གྲུབ་པ་བརྒྱད་སོགས་དངོས་གྲུབ་སྟེར༔ ལོག་འདྲེན་ཀུན་འདུལ་རྣལ་འབྱོར་སྒྲུབ་པོའི་མགོན༔ བཀའ་སྡོད་དམ་ཅན་རྒྱ་མཚོའི་ཚོགས་ལ་བསྟོད༔ མདོར་ན་འགྲོ་བ་ཡོངས་ཀྱི་དཔལ་གྱུར་ཅིང་༔ གདུལ་བྱའི་བློ་བཞིན་ཕན་བདེའི་དངོས་གྲུབ་ཀུན༔ རང་བྱུང་རིག་པ་འདུ་འབྲལ་མེད་པའི་ལྷ༔ དཀྱིལ་འཁོར་ཡོངས་རྫོགས་བདག་གིས་བསྟོད་པར་བགྱི༔ བཅུ་གཉིས་ཛབ་དགོངས་ལའང་རྣམ་པ་བཞི༔ དང་པོ་བསྙེན་པ་བར་དུ་སྒྲུབ་པ་དང་༔ ཐ་མ་ལས་སྦྱོར་གཙོ་འཁོར་ཡོངས་རྫོགས་སོ༔ ས་མ་ཡཱ༔ རྒྱ་རྒྱ་རྒྱ༔ དང་པོ་བསྙེན་པའི་དམིགས་པ་འདི་ལྟ་སྟེ༔ ཧཱུྃ་ཧྲཱིཿ རང་ཉིད་དབང་ཆེན་རྒྱལ་པོའི་ཐུགས་ཀ་རུ༔ པདྨ་དམར་པོ་འདབ་སྟོང་རྒྱས་པའི་ཁར༔ ཉི་དཀྱིལ་སྟེང་དུ་རཱ་ག་ལས་གྲུབ་པའི༔ རྡོ་རྗེ་རྩེ་ལྔའི་ལྟེ་བར་ཉི་ཟླ་ཡི༔ ག་འུ་ཁ་སྦྱོར་དབུས་སུ་ཡི་གེ་ཧྲཱིཿ དམར་གསལ་བྱུ་རུའི་མདངས་འདྲ་འོད་སྟོང་འབར༔ རྒྱལ་བ་མཆོད་ཅིང་བྱིན་རླབས་དངོས་གྲུབ་བསྡུས༔ རྩ་བའི་སྔགས་ལ་སེམས་བཟུང་སྔགས་འདི་བཟླ༔ ཧྲཱིཿ ཞེས་པ་འབྱུང་འཇུག་རྡོ་རྗེའི་བཟླས་པར་བྱ༔ དེ་མཐར་ཡིག་འབྲུ་བཅུ་དྲུག་གཡས་བསྐོར་ལས༔ འོད་ཟེར་ཕྱོགས་བཅུར་འཕྲོས་པས་སངས་རྒྱས་དང་༔ བྱང་སེམས་ཉན་རང་སྒྲུབ་པའི་ལྷ་ཀླུ་ཡི༔ སྐུ་ཡི་བྱིན་རླབས་ཨོཾ་དཀར་རྣམ་པར་བསྡུས༔ གསུང་གི་བྱིན་རླབས་ཨཱཿདམར་རྣམ་པར་བསྡུས༔ ཐུགས་ཀྱི་བྱིན་རླབས་ཧཱུྃ་མཐིང་རྣམ་པར་བསྡུས༔ བདག་དང་སྔགས་ཕྲེང་རྣམས་ལ་ཐིམ་པ་ཡིས༔ བདེ་གཤེགས་རྒྱལ་བ་ཀུན་དང་དབྱེར་མེད་བསམ༔ ཧྲཱིཿབཛྲ་ཀྲོ་ཏ་ཧྱ་གྲི་ཝ་ཧུ་ལུ་ཧུ་ལུ་ཧཱུྃ་ཕཊ༔ རྩ་སྔགས་ཡིག་འབྲུ་བཅོ་ལྔ་འབྲུ་འབུམ་བཟླ༔ དེ་ནི་ལས་རུང་ཙམ་ཡིན་དུས་བསྙེན་ནི༔ སྙིགས་དུས་བཞི་འགྱུར་དུས་བསྙེན་ཟླ་བ་དྲུག༔ མཚན་མའི་བསྙེན་པ་གང་ཟག་དབང་རབ་ཀྱིས༔ ལྷ་ཡི་ཞལ་མཇལ་གསུང་ཐོས་དོན་དམ་པར༔ རང་དང་ལྷ་ཉིད་དབྱེར་མེད་རོ་གཅིག་ཏུ༔ རྟོགས་ན་ལྟ་བའི་ཐག་ཆོད་རྟགས་མཆོག་གོ༔ འབྲིང་ནི་ཉམས་སྣང་ལྷག་ལྷའི་ཞལ་མཇལ་དང་༔ ཡིག་འབྲུ་ཕྱག་མཚན་མཐོང་དང་མ་བསླབས་པའི༔ ཆོས་ཀྱི་ཚིག་དོན་ཤེས་ཤིང་སྡིག་ལས་ལྡོག༔ དགེ་ལ་སྤྲོ་ཞིང་ཐར་པའི་ལམ་མཆོག་ལས༔ ཕྱིར་མི་ལྡོག་པའི་ལྟས་བཟང་ཚེ་འདིར་འབྱུང༔ རྨི་ལམ་ཉི་མ་ཤར་དང་ཕྱག་མཚན་རྙེད༔ མཁའ་ལ་འཕུར་དང་བཙན་པོའི་རྫོང་བཟུང་དང་༔ ཤྭོ་དང་རྒྱན་ལ་བདག་ཉིད་རྒྱལ་བ་དང་༔ ཁྲོམ་བསྡུས་དབང་བསྐུར་གཞན་ལ་བདག་ཉིད་ཀྱི༔ ཆད་པ་གཅོད་སོགས་གདོན་ཐུལ་རྟགས་འབྱུང་བ༔ གང་ཟག་དབང་པོ་ཐ་མའི་ཚོགས་ཡིན་ནོ༔ སྤྱིར་ནི་བདེ་གཤེགས་ཀུན་གྱི་ཐུགས་བཅུད་བསྡུས༔ དབང་ཆེན་རྟ་མཆོག་རྒྱལ་པོའི་ཐུགས་སྲོག་སྔགས༔ བསྙེན་པ་འབྲུ་འབུམ་གཅིག་གི་གྲངས་ཐེམས་པས༔ སྡིག་སྒྲིབ་བྱང་ཞིང་ལེགས་པའི་དཔལ་ཀུན་འདུ༔ གཉིས་ཀྱི་གྲངས་ཐེམས་གློ་བུར་ཚེ་འཕྲང་སེལ༔ གསུམ་ཀྱི་གྲངས་ཐེམས་གཞན་སྣང་ཕལ་ཆེར་གནོན༔ བཞི་ཡིས་ལྷ་འདྲེ་མི་གསུམ་ཟིལ་གྱིས་གནོན༔ ལྔ་ཡིས་མི་བསྲུན་ལྷ་འདྲེ་འདུལ་བར་ནུས༔ དྲུག་གིས་གཞན་ལ་དབང་བསྐུར་རྐྱེན་ལས་གྲོལ༔ བདུན་གྱིས་སྒོ་གསུམ་འགྱུར་མེད་རྡོ་རྗེའི་རྫོང་༔ བརྒྱད་ཀྱིས་མཆོག་གི་ལྷ་ལ་ངེས་པར་ཉེ༔ དེ་བས་གྲངས་མང་ཐེམས་ནས་ལེགས་བསྙེན་ནི༔ འཁོར་འདས་དབང་བསྒྱུར་ལྷ་དང་གཉིས་མེད་གྱུར༔ གཉིས་པ་སྒྲུབ་པའི་རྫས་དང་ཡོ་བྱད་དང་༔ ཡེ་ཤེས་སེམས་དཔའི་ཡན་ལག་མཆོད་རྫས་ཏེ༔ དམར་བྱང་སྙིང་པོའི་བཅུད་བསྡུས་ལས་བྱུང་སྟེ༔ དང་པོ་སྒྲུབ་རྫས་སྐུ་གསུང་ཐུགས་རྟེན་ལ༔ སྐུ་རྟེན་ལུགས་སུ་བླུགས་སམ་རིས་སུ་བྲིས༔ མཚན་ཉིད་ལྡན་པའི་རྡོ་རྗེ་སློབ་དཔོན་གྱིས༔ བགེགས་བསྐྲད་ཡེ་ཤེས་དབབ་ཅིང་བརྟན་པར་བྱས༔ ཤིས་པ་བརྗོད་ཅིང་དགའ་སྟོན་ལེགས་པར་བྱས༔ གསུང་རྟེན་གླེགས་བམ་ཡང་ན་རྒྱུད་ཉིད་ནི༔ གསང་བའི་ཡི་གེ་ཆག་ཚད་སོར་བརྒྱད་དོ༔ ཐུགས་རྟེན་ཕྱག་མཚན་བྲིས་འབུར་གང་རུང་དང་༔ དར་དམར་ངོས་ལ་རང་སྔགས་ཕྱག་མཚན་བྲིས༔ རབ་ཏུ་གནས་ཤིང་ལུས་ལ་བཅིངས་པའམ༔ ཡང་ན་སྒྲུབ་པའི་དཀྱིལ་འཁོར་དབུས་སུ་བཀོད༔ ཟངས་སམ་བསེ་སྡེར་སྣོད་དུ་འབྲུ་གཙང་མར༔ སུམ་བརྩེགས་གདན་ཁར་ཆོས་འབྱུང་བསྣོལ་མའི་དབུས༔ ཟླ་གམ་དེ་སྟེང་ཉི་ཟླ་དེ་ཡི་སྟེང་༔ དབང་གི་གཏོར་མ་ཟླ་གམ་དབྱིབས་སུ་བྱ༔ བང་རིམ་དང་པོར་རིགས་བཞི་ཡབ་ཡུམ་བརྒྱད༔ བར་མ་བཅུ་དྲུག་དེ་མཐར་སུམ་ཅུ་གཉིས༔ རིགས་བདག་བྱ་ཁྱུང་ཡུམ་གཏོར་སྒོ་སྐྱོང་བཞི༔ ཉི་ཟླ་ནོར་བུ་པདྨས་བརྒྱན་པའི་དབུས༔ ཕྱག་མཚན་ཡིག་འབྲུ་སྐུ་གཟུགས་གང་རུང་བྱ༔ བཀའ་སྲུང་སྡེ་བརྒྱད་གཏེར་སྲུང་ཙི་ཏྲ་ཡི༔ གཏོར་མ་རང་གཞུང་ཉིད་ལས་ཤེས་བྱ་ཞིང་༔ གཡས་སུ་སྨན་དང་གཡོན་དུ་རཀྟ་དམར༔ ཞི་དྲག་མཆོད་པ་མདུང་དར་ཁྲབ་རྨོག་གོ༔ ཡོལ་བ་བླ་བྲེ་མདའ་དར་ཕུར་པ་གྲི༔ འཕན་གདུགས་རྒྱལ་མཚན་འཕུར་མ་མུ་ཏིག་ཕྲེང་༔ རྒབ་དཀྲིས་ཚོགས་ཀྱི་ཡོ་བྱད་རྒྱས་པར་བཤམས༔ རང་ཉིད་དབང་ཆེན་རྒྱལ་པོའི་ཐུགས་ཀ་རུ༔ ཡེ་ཤེས་སེམས་དཔའ་འཕགས་པ་སྤྱན་རས་གཟིགས༔ སྐུ་མདོག་དམར་པོ་ཕྱག་གཡས་པད་ཕྲེང་བསྣམས༔ གཡོན་པས་ཚེ་བུམ་གསང་བ་ཡེ་ཤེས་ཡུམ༔ དམར་མོ་ཚེ་བུམ་མདའ་དར་ཡབ་ལ་འཁྱུད༔ ཐུགས་ཀར་པད་སྟེང་ཧྲཱིཿཡིག་མཐའ་མ་རུ༔ སྒྲུབ་སྔགས་ཡི་གེ་གཡས་སུ་འཁོར་བར་བསམ༔ ཧྲཱིཿབཛྲ་ཀྲོ་ཏ་ཧྱ་གྷྲི་ཝ་མ་ཎི་པདྨེ་བྷུདྡྷ་ཛྙཱ་ན་པདྨ་ཌཀྐི་ཏེ་ཛྭ་སརྦ་སིདྡྷི་ཕ་ལ་ཧཱུྃ༔ ཞེས་པ་འབུམ་ཕྲག་བཟླས་པས་རྟགས་མཐོང་འགྱུར༔ ལས་སྦྱོར་སྐབས་སུ་དང་པོ་འཁོར་རྣམས་ཀྱི༔ བསྙེན་པ་སོ་སོར་བཟླ་བ་འདི་བཞིན་ནོ༔ གཙོ་བོའི་ཐུགས་ལས་འོད་འཕྲོས་དབང་ཆེན་བཞིའི༔ ཐུགས་ཀའི་ས་བོན་ཧཱུྃ་ཡིག་དཀར་སེར་དམར༔ ལྗང་ཁུ་རྣམས་ལ་ཕོག་པས་རང་མདོག་གི༔ འོད་ཀྱིས་འཇིགས་བརྒྱད་ཞི་ཞིང་ཚེ་བསོད་རྒྱས༔ སྣང་སྲིད་དབང་འདུས་དགྲ་བགེགས་ཚར་བཅད་ནས༔ ལས་བཞིའི་ཕྲིན་ལས་མ་ལུས་འགྲུབ་པར་བསམ༔ ཨོཾ་ཧྲཱིཿབཛྲ་ཀྲོ་དྷ་ཧྱ་གྷྲི་ཝ་ཧཱུྃ་ཕཊ༔ ཨོཾ་ཧྲཱིཿརཏྣ་ཀྲོ་ཏ་ཧྱ་གྷྲི་ཝ་ཧཱུྃ་ཕཊ༔ ཨོཾ་ཧྲཱིཿཔདྨ་ཀྲོ་ཏ་ཧྱ་གྷྲི་ཝ་ཧཱུྃ་ཕཊ༔ ཨོཾ་ཧྲཱིཿཀརྨ་ཀྲོ་ཏ་ཧྱ་གྷྲི་ཝ་ཧཱུྃ་ཕཊ༔ རིགས་བཞིའི་བསྙེན་གྲངས་ཁྲི་ཚོ་ལྔ་ཡིན་ནོ༔ དཔལ་ཆེན་ཡང་དག་ལ་སོགས་བརྒྱད་པོ་ཡི༔ ཐུགས་ཀར་ཉི་མའི་གདན་ལ་རང་མདོག་གི༔ ཧཱུྃ་མཐར་རང་སྔགས་གཡས་སུ་འཁོར་བ་ལས༔ འོད་འཕྲོས་ལོག་འདྲེན་མ་ལུས་ཚར་བཅད་ནས༔ འགྲོ་ཀུན་རྒྱུད་སྨིན་སྣང་སྲིད་མ་ལུས་པ༔ ཡེ་ཤེས་ལྷ་ཡི་དཀྱིལ་འཁོར་འཁོར་ལོར་གྱུར༔ བཀའ་བརྒྱད་གཙོ་བོའི་རང་སྔགས་རྣམས༔ སྨྲ་བ་བཅད་དེ་ཁྲི་གཅིག་བཟླ༔ གཞན་ཡང་གནས་ཡུལ་ཕྲ་མེན་སྒོ་སྲུང་གི༔ སྔགས་རྣམས་བཟླས་དམིགས་རིག་པས་འཕྲུལ་བར་བྱ༔ ཐུན་སྐབས་རྣམས་སུ་མཆོད་དང་བསྟོད་པ་དང་༔ གསང་བར་བྱ་ཞིང་སྨྲ་བཅད་བྱེད་པ་སོགས༔ གསང་བ་སྔགས་ཀྱི་དམ་ཚིག་ཡིན་པས་གཟབ༔ དེ་ནས་དམ་རྫས་རྟེན་གསུམ་གནས་གསུམ་ལ༔ ལེགས་པར་གཏུགས་ཏེ་དངོས་གྲུབ་བླང་བ་ནི༔ ཧཱུྃ་ཧྲཱིཿ དགོངས་ཤིག་བདེ་གཤེགས་རིག་འཛིན་གྲུབ་པའི་ཚོགས༔ ཁྱད་པར་དབང་གི་རྒྱལ་པོ་རྟ་མཆོག་དཔལ༔ ཡབ་ཡུམ་སྲས་དང་སྒྲུབ་སྡེ་བཀའ་བརྒྱད་ལྷ༔ རྩ་གསུམ་ཡོངས་རྫོགས་བསྙེན་སྒྲུབ་མཐའ་རུ་ཕྱིན༔ དེང་སང་སྐྱ་རེངས་དང་པོའི་ནམ་ལངས་ནས༔ རྡོ་རྗེ་སྲིན་པོའི་ལྷ་ཚོགས་འགྲུབ་ལ་ཉེ༔ མ་རིག་མུན་སེལ་ཡེ་ཤེས་ཉི་མ་ཤར༔ དབང་ཆེན་རྒྱལ་པོའི་སྐུ་གསུང་ཐུགས་ཡོན་གྱི༔ དངོས་གྲུབ་དམ་པ་དེང་འདིར་བསྩལ་དུ་གསོལ༔ ཕྲིན་ལས་རྣམ་བཞིས་མཐའ་ཡས་འགྲོ་བ་རྣམས༔ རྣམ་མཁྱེན་ལྷག་པའི་ལྷ་ཡི་གོ་འཕང་མཆོག༔ དཀའ་བ་མེད་པར་སྒྲུབ་པའི་ནུས་མཐུ་ལྡན༔ དོན་གཉིས་ཕུན་སུམ་ཚོགས་པའི་དངོས་གྲུབ་སྩོལ༔ རྩ་སྔགས་ཤམ་བུར་འདི་བཞིན་བརྗོད་པར་བྱ༔ ཀཱ་ཡ་སིདྡྷི་ཨོཾ༔ ཝཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱིཿ ས་མ་ཡཱ༔ ༈ རྗེས་ཀྱི་རིམ་པ་ལ་རིམ་པ་བཅུ་གསུམ་སྟེ༔ དང་པོ་ཤ་ཆང་བདུད་རྩི་ཐབས་ཤེས་རྫས༔ ཟན་བཤོས་ཁུར་བ་ཟླ་རྒྱས་ཟླ་ཕྲོམ་དང་༔ ཤ་མོང་ཤིང་ཏོག་སྔོ་ཡི་བྱེ་བྲག་རྣམས༔ གཅན་གཟན་པགས་པའི་སྟེང་དུ་ལེགས་པར་བཀྲམ༔ གཉིས་པ་བྱིན་གྱིས་བརླབས་པ་སྨན་རཀ་དང་༔ བསངས་ཆུས་བྲན་ཏེ་རང་ཉིད་ལྷར་གསལ་བའི༔ ཐུགས་ཀའི་ཧཱུྃ་ལས་རཾ་ཡཾ་ཁཾ་གསུམ་གྱིས༔ མ་དག་དངོས་འཛིན་བསྲེགས་གཏོར་བཀྲུས་བསམས་ཏེ༔ རོལ་མོ་རྐང་གླིང་སྤོས་ཀྱི་དུད་པ་གཏོང་༔ ལྷ་སྔགས་ཏིང་འཛིན་ངང་ནས་འདི་སྐད་བརྗོད༔ ཧཱུྃ་ཧྲཱིཿ བདག་ཉིད་ལྷར་གསལ་ཐུགས་ལས་རཾ་འཕྲོས་པས༔ མ་དག་དངོས་འཛིན་བསྲེགས་ཤིང་ཡཾ་འཕྲོས་པས༔ ལོག་རྟོག་བག་ཆགས་གཏོར་ནས་ཁཾ་ཡིག་གིས༔ ལེགས་པར་བཀྲུས་ནས་ཚོགས་ཀྱི་ཡོ་བྱད་རྣམས༔ ཨོཾ་ཡིག་དཀར་པོས་སྣོད་རྣམས་རིན་པོ་ཆེ༔ ཨཱཿཡིག་དམར་པོས་བཅུད་རྣམས་འདོད་ཡོན་ལྔ༔ ཧཱུྃ་ཡིག་སྔོན་པོས་ཟག་མེད་བདུད་རྩིར་བསྒྱུར༔ རཾ་ཡཾ་ཁཾ༔གསུམ༔ ཨོཾ་ཨཱཿཧཱུྃ༔ གསུམ༔ གསུམ་པ་ཚོགས་ཞིང་ལྷ་ཚོགས་སྤྱན་འདྲེན་ནི༔ ཧཱུྃ་ཧྲཱིཿ འོག་མིན་བདེ་ཆེན་པདྨོ་བཀོད་པ་ནས༔ རིགས་ཀྱི་བདག་པོ་བཅོམ་ལྡན་འོད་དཔག་མེད༔ གང་འདུལ་གདོན་གཤེད་བྱ་ཁྱུང་ག་རུ་ཊ༔ འཁོར་འདས་དབང་བསྒྱུར་རྟ་མཆོག་ཧེ་རུ་ཀ༔ ཤེས་རབ་ཡུམ་མཆོག་པདྨ་གཟི་ལྡན་མ༔ དབང་ཆེན་རིགས་བཞི་སྒྲུབ་སྡེ་ཆེན་པོ་བརྒྱད༔ གནས་ཡུལ་མ་མོ་ཕྲ་མེན་སྒོ་སྐྱོང་བཞི༔ བསྟན་སྲུང་དམ་ཅན་རྒྱ་མཚོའི་ཚོགས་རྣམས་ཀུན༔ འདོད་ཡོན་ཚོགས་ཀྱི་མཆོད་པ་བཞེས་སླད་དུ༔ ཐོགས་མེད་རྫུ་འཕྲུལ་ཤུགས་ཀྱིས་གཤེགས་སུ་གསོལ༔ གུ་རུ་དྷེ་ཝ་ཌཀྐི་ནི་དྷརྨ་པ་ལ་བཛྲ་ཀྲོ་དྷ་ཧྱ་གྷྲྀ་ཝ་སརྦ་ས་མ་ཡཱ་ཛ་ཛ༔ བཞི་བ་ཚོགས་ཕུད་རིམ་པ་གསུམ་བཅད་དེ༔ འབུལ་ཚིག་གསུམ་ལས་དང་པོ་ཚོགས་ཕུད་ནི༔ ཧཱུྃ་ཧྲཱིཿ ཚོགས་ཕུད་དང་པོ་འདོད་ཡོན་ལྷ་མོའི་ཚོགས༔ གཟུགས་སྒྲ་དྲི་རོ་རེག་བྱའི་མཆོད་སྤྲིན་གྱིས༔ དཀྱིལ་འཁོར་ལྷ་ཚོགས་དབང་པོའི་སྐྱོན་བྲལ་ཡང་༔ བདག་ཅག་ཚོགས་གཉིས་རྫོགས་ཕྱིར་འབུལ་བར་བགྱི༔ མ་ཧཱ་གྷ་ན་ཙཀྲ་པཱུ་ཙ་ཧོ༔ གཉིས་པ་ཚོགས་ཀྱི་རིམ་པ་དང་འབྲེལ་ཏེ༔ སྡིག་པ་བཤགས་ཚིག་དང་བཅས་འདི་སྐད་དོ༔ ཧཱུྃ་ཧྲཱིཿ བདག་གི་ཚེ་རབས་ཐོག་མ་མེད་པ་ནས༔ ཇི་སྲིད་རྫོགས་བྱང་མངོན་དུ་མ་གྱུར་བར༔ ལས་ཉོན་བག་ཆགས་མི་དགེ་ཅི་བསགས་པ༔ ཐམས་ཅད་བྱང་ཞིང་དག་པར་མཛད་པ་དང་༔ མཆོག་ཐུན་དངོས་གྲུབ་མ་ལུས་སྩོལ་བའི་ཕྱིར༔ གྷ་ན་རྫས་ཀྱི་ལོངས་སྤྱོད་ལ་བརྟེན་ནས༔ མི་འཆབ་འགྱོད་པས་བྱང་ཞིང་དག་གྱུར་ཅིག༔ ཡི་གེ་བརྒྱ་པ་ཅི་ནུས་བཟླས་པའི་མཐར༔ བཛྲ་ས་མ་ཡཱ་ཤུདྡྷེ་ཨཱ༔ གསུམ་པ་ཚོགས་ཀྱི་བཅད་ཁམ་ཐ་མ་ལ༔ ལོག་འདྲེན་དགྲ་བགེགས་འགུག་གཞུག་ལན་གསུམ་བྱ༔ ཧཱུྃ་ཧྲཱིཿ དགྲ་བགེགས་ལོག་འདྲེན་གདུག་ཅན་མ་ལུས་པ༔ དབང་ཆེན་རྟ་མཆོག་ཐུགས་རྗེའི་ལྕགས་ཀྱུས་བཀུག༔ བྱམས་པའི་ཞགས་པས་འཆིང་ཞིང་དགའ་བ་ཆེའི༔ ལྕགས་སྒྲོག་གིས་བསྡམས་བཏང་སྙོམས་དྲིལ་བུས་མྱོས༔ སྲས་མཆོག་རྡོ་རྗེ་གཞོན་ནུའི་དྲག་རྩལ་གྱིས༔ ཚེ་བསོད་རང་ལ་བསྡུས་ཤིང་རྣམ་ཤེས་སྤར༔ རྒྱལ་བའི་སྲས་གྱུར་བདག་ལྟ་སྙིགས་མའི་ལུས༔ བདག་མེད་རྟོགས་པའི་མཚོན་གྱིས་རྣམ་པར་གཏུབས༔ ཤ་ཁྲག་བདུད་རྩིའི་དཀྱིལ་འཁོར་ལྷ་ཚོགས་མཆོད༔ མ་ཧཱ་མཾ་ས་རཀྟ་ཀེཾ་ནི་རི་ཏི་ཁ་ཁ་ཁཱ་ཧཱི་ཁ་ཧཱི༔ ལྔ་བ་རྡོ་རྗེ་སློབ་དཔོན་ལ༔ ཕྱག་རྒྱས་ཐབས་ཤེས་རྫས་མཆོག་བསྣོལ་མར་དྲངས༔ ཨེ་མ་ཧོ༔ ཕྱི་རོལ་སྣང་བའི་རྫས་ཀུན་སྟོང་པ་ཉིད༔ ནང་གི་འཛིན་རྟོག་རང་བྱུང་རིག་པའི་གཤིས༔ འདོད་ཡོན་མ་སྤང་གཙང་སྨེ་ཀུན་བྲལ་བས༔ ཐབས་ཤེས་རྫས་ལ་རོལ་ཅིག་རྡོ་རྗེ་འཛིན༔ ཞེས་ཕུལ་བླ་མས་བླངས་ཏེ་འདི་སྐད་གསུང༔ ཨ་ལ་ལ་ཧོ༔ འཁོར་འདས་བཟང་ངན་ཆོས་སྐུའི་ཀློང་མཉམ་ཡང་༔ ཐེག་པ་དམན་རྣམས་སྤང་བླང་འཆིང་བར་བཅིང་༔ ཐེག་མཆོག་རྡོ་རྗེ་སྙིང་པོའི་ལམ་གྱི་མཆོག༔ འདོད་ཡོན་མ་སྤངས་རང་གྲོལ་རྒྱན་དུ་བཞེས༔ དྲུག་པ་ཚོགས་ཀྱི་ལྷག་མ་ཀུན་བསྡུས་ནས༔ རྡོ་རྗེ་སློབ་དཔོན་ལྷ་ཡི་ཏིང་འཛིན་གྱིས༔ ཞལ་ཆབ་བྲན་ལ་ཨོཾ་ཨཱཿཧཱུྃ༔བརྗོད་དེ༔ ཟག་མེད་བདེ་ཆེན་བདུད་རྩིར་བྱིན་གྱིས་བརླབས༔ ཧཱུྃ་ཧྲཱིཿ དབང་ཆེན་དཀྱིལ་འཁོར་ཚོགས་ཀྱི་ལྷག་སྡུད་མ༔ དབང་ཕྱུག་ཆེན་མོ་ཉི་ཤུ་རྩ་བརྒྱད་དང་༔ མཁའ་འགྲོ་སོ་གཉིས་གིང་ཆེན་བཅུ་དྲུག་སོགས༔ དཀྱིལ་འཁོར་དབུས་ལ་མི་དབང་མཐའ་གྲལ་སྐྱོང་༔ ཞལ་ཟས་ཕུད་ལ་མི་དབང་ལྷག་མའི་བདག༔ རྣལ་འབྱོར་བདག་དང་མི་འབྲལ་གཡར་དམ་ཅན༔ སྣ་ཚོགས་དར་གྱི་གཡབ་མོས་ལེགས་མཚོན་ནས༔ འདིར་གཤེགས་གྷ་ན་ཙཀྲའི་ལྷག་མ་ལོངས༔ བདུད་རྩི་སྨན་དང་རཀྟའི་ཟིལ་དངར་གྱིས༔ འདའ་དཀའི་དམ་ཚིག་དགོངས་བཞིན་ལྷག་གཏོར་ལོངས༔ རྐང་གླིང་བཤུག་གླུ་དབྱངས་རོལ་གྱིས་བོས་བཞིན༔ འདིར་བྱོན་ལས་བཞིའི་ཕྲིན་ལས་མྱུར་འགྲུབ་མཛོད༔ ཨུ་ཙིཥྚ་བྷ་ལིང་ཏ་ཁ་ཧཱི༔ བདུན་པ་ཐུགས་དམ་དབྱིངས་ནས་བསྐུལ་བ་ནི༔ ཧཱུྃ་ཧྲཱིཿ སྤྲོས་བྲལ་དབྱིངས་ན་བཞུགས་པའི་བདེ་གཤེགས་དང་༔ སར་གནས་བྱང་སེམས་རིག་འཛིན་གྲུབ་པའི་ཚོགས༔ ཁྱད་པར་པདྨ་དབང་ཆེན་སྒྲུབ་སྡེ་བརྒྱད༔ བསྐུལ་ལོ་དད་གུས་གདུང་བས་ཐུགས་དམ་བསྐུལ༔ དགོངས་ཤིག་གཟིགས་ཤིག་སྙིགས་མའི་འགྲོ་ལ་དགོངས༔ མཛོད་ཅིག་མངོན་སྤྱོད་དྲག་པོའི་ཕྲིན་ལས་མཛོད༔ འགྱུར་མེད་སྐུ་ཡི་གཟི་བརྗིད་དཔའ་ཉམས་ཀྱིས༔ ལོག་འདྲེན་ཞིང་བཅུའི་ཕུང་ཁམས་རྨིང་མེད་རློགས༔ འགགས་མེད་དྲག་ཤུལ་རྔམས་པའི་གད་རྒྱངས་ཀྱིས༔ ལོག་སྨྲ་འཁྲུལ་བའི་ལས་རླུང་རྩད་ནས་ཆོད༔ བདག་མེད་མཁྱེན་བརྩེ་ནུས་པའི་སྒྱུ་འཕྲུལ་གྱིས༔ རྟག་ཆད་ལྟ་བའི་རི་བོ་རྩེ་ནས་སྙིལ༔ ཉམས་པ་བདུན་ལྡན་དགྲ་བགེགས་མ་ལུས་པའི༔ ལོག་སྤྱོད་སྡིག་པའི་འཁྲུལ་འཁོར་དབྱིངས་སུ་ཆོམ༔ བསྟན་ལ་སྡང་བའི་བདུད་སྡེའི་དཔུང་ཚོགས་རློགས༔ འགྲོ་རྣམས་སྡུག་བསྔལ་ལ་སྦྱོར་དམ་སྲིའི་རིགས༔ ཐམས་ཅད་རྡུལ་དུ་བརླག་པའི་ཕྲིན་ལས་མཛོད༔ ཅེས་བརྗོད་གཏོར་མ་དགྲ་བགེགས་ཕྱོགས་སུ་འཕངས༔ བརྒྱད་པ་ཆད་མདོ་བསྒྲག་ཕྱིར་གཏོར་མ་ལ༔ སྨན་རཀ་སྦྲན་ནས་འབྲུ་གསུམ་གཏོར་མ་བདུད་རྩིར་བསམ༔ ཧཱུྃ་ཧྲཱིཿ ཡེ་གཞི་འཁོར་འདས་གཉིས་མེད་ཐོག་མའི་དུས༔ ཡེ་གྲོལ་སྟོན་པ་རང་བྱུང་ཀུན་བཟང་གིས༔ ཡེ་བབས་རིག་རྩལ་ཕྲ་མོའི་འཁོར་རྣམས་ལ༔ ཡེ་གནས་བརྗོད་མེད་རྩོལ་བྲལ་ཆོས་བསྟན་ཚེ༔ ཆོས་ཀུན་དབྱིངས་གཅིག་རང་དམ་བཅས་པ་བཞིན༔ ལྷུན་རྫོགས་དབྱིངས་ཀྱི་གཏོར་མ་འདི་ལོངས་ལ༔ འཁྲུལ་མེད་ཀ་དག་ཀློང་གྲོལ་ཕྲིན་ལས་མཛོད༔ ཧཱུྃ༔ དེ་འོག་བདག་རྟོག་མ་ཊཾ་རཱུ་ཏྲ་ཡིས༔ བདག་མེད་བདག་བཟུང་ལས་སྤྱོད་ལོག་ཞུགས་མཐུས༔ འགྲོ་རྣམས་སྡུག་བསྔལ་ཤུགས་ཀྱིས་དྲག་གཟིར་ནས༔ མ་རུངས་རྒྱུ་འབྲས་ངན་འགྲོར་འཁྱམས་པའི་ཚེ༔ ཕྱོགས་བཅུ་རབ་འབྱམས་རྒྱལ་བ་བཀའ་བགྲོས་ཤིང་༔ བྱམས་བརྩེའི་རང་གཟུགས་སྤྱན་རས་གཟིགས་དབང་དང་༔ འཇིགས་པ་བརྒྱད་སྐྱོབ་འཕགས་མ་སྒྲོལ་མ་ལ༔ གདུལ་དཀའི་ལས་ངན་ཐུལ་ཅེས་བཀའ་བགོས་ལྟར༔ ཁྲོ་རྒྱལ་ཁྲོས་པ་རྟ་མཆོག་རྒྱལ་པོ་དང༔ རྒྱལ་ཡུམ་ཁྲོས་མ་རྡོ་རྗེ་ཕག་མོ་ཡིས༔ རཱུ་ཏྲ་ཕོ་མོ་གནས་ནས་སྤར་བའི་ཚེ༔ གནས་ཡུལ་དུར་ཁྲོད་སྐྱོང་བའི་སྲུང་མ་ཡིས༔ སངས་རྒྱས་བསྟན་པ་སྲུང་ཞིང་སྤེལ་བ་དང་༔ ལོག་འདྲེན་བདུད་སྡེ་འདུལ་ཞིང་སྤ་བཀོང་ནས༔ འགྲོ་བའི་བདེ་སྐྱིད་སྤེལ་བར་དམ་བཅས་བཞིན༔ དམ་རྫས་ཤ་ཁྲག་གཏོར་མ་འདི་བཞེས་ལ༔ སངས་རྒྱས་བསྟན་པ་བསྲུང་ཞིང་སྤེལ་བ་དང་༔ ལོག་འདྲེན་དགྲ་བགེགས་མ་ལུས་སྒྲོལ་བ་དང་༔ སྙིགས་མའི་རྒུད་པ་མཐའ་དག་མཐར་བསྐྲད་ནས༔ བདེ་སྐྱིད་ཕུན་སུམ་ཚོགས་པའི་ཕྲིན་ལས་མཛོད༔ ཧཱུྃ་བྷྱོ༔ དེ་འོག་རྒྱལ་བའི་དབང་པོ་ཐུབ་དབང་གི༔ རྒྱལ་ཚབ་དམ་པ་པདྨ་ཐོད་ཕྲེང་དང་༔ གྲུབ་པའི་རིག་འཛིན་ཆེན་པོ་རྣམ་བརྒྱད་ལ༔ མཆོད་རྟེན་ཆེན་པོ་བདེ་བྱེད་བརྩེགས་པ་ནས༔ མཁའ་འགྲོའི་གཙོ་མོ་ལས་ཀྱི་དབང་མོ་ཆེས༔ བཀའ་བརྒྱད་རྒྱུད་གཏད་སློབ་དཔོན་རྣམ་བརྒྱད་ཀྱིས༔ རྒྱུད་དོན་མན་ངག་ཟབ་གནད་ལ་བསྡེབ་ཚེ༔ སྒྲུབ་སྡེ་བརྒྱད་ཀྱི་བཀའ་སྲུང་ཐམས་ཅད་ཀྱིས༔ གསང་སྔགས་རྒྱུད་སྡེ་སྲུངས་ཤིང་སྤེལ་བ་དང་༔ བརྒྱུད་འཛིན་རྣལ་འབྱོར་སྐུ་ཚེ་བསྲིང་བ་དང་༔ བསྟན་འགྲོའི་དགྲ་གདོན་རྡུལ་དུ་བརླག་གོ་ཞེས༔ ཇི་ལྟར་ཞལ་བཞེས་ཁས་བླངས་དམ་བཅས་བཞིན༔ དམ་རྫས་ཤ་ཁྲག་གཏོར་མ་འདི་བཞེས་ལ༔ གསང་ཆེན་བསྟན་པ་དར་ཞིང་རྒྱས་པ་དང་༔ བསྟན་འཛིན་རྣལ་འབྱོར་སྐུ་ཚེ་བསྲིང་བ་དང་༔ སྤྱི་དགོས་བསྟན་དགྲ་རྨིང་མེད་བརླག་པ་སོགས༔ ཅི་བཅོལ་ལས་ཀུན་ཐོགས་མེད་འགྲུབ་པར་མཛོད༔ ཧཱུྃ་ཧྲཱིཿ དེ་འོག་གངས་ཅན་བོད་ཀྱི་ཡུལ་ལྗོངས་འཛིན༔ འཇམ་དཔལ་དངོས་སྤྲུལ་ལྷ་སྲས་ཁྲི་སྲོང་གིས༔ སངས་རྒྱས་གཉིས་པ་པདྨ་ཐོད་ཕྲེང་རྩལ༔ སྤྱན་དྲངས་སྒྲུབ་ཆེན་བཀའ་བརྒྱད་དཀྱིལ་འཁོར་དུ༔ ཚངས་པའི་མེ་ཏོག་མཁར་ཆེན་མཚོ་རྒྱལ་དང་༔ རྒྱལ་བ་མཆོག་དབྱངས་ནམ་མཁའི་སྙིང་པོ་སོགས༔ བཀའ་བབས་མི་དགུ་སྨིན་གྲོལ་ལམ་བཀོད་ནས༔ རང་རང་ཡི་དམ་བསྙེན་ཅིང་སྒྲུབ་པའི་ཚེ༔ བཀའ་གཏེར་སྲུང་མ་དམ་ཅན་རྒྱ་མཚོ་ཡིས༔ ཇི་ལྟར་ཞལ་བཞེས་དམ་ལས་མ་འདའ་བར༔ མཆོད་གཏོར་འདི་བཞེས་གང་བཅོལ་ཕྲིན་ལས་ཀུན༔ ཐོགས་མེད་མྱུར་དུ་འགྲུབ་པར་མཛད་དུ་གསོལ༔ ཅེས་བརྗོད་ཐ་ཚིག་གཏོར་མ་གཙང་སར་གཤེགས༔ དགུ་བ་བསྟན་གཏོར་སྨན་དང་རཀྟས་བྲན༔ ཧཱུྃ་ཧྲཱིཿ གངས་ཅན་བོད་འདིར་རྟག་ཆད་ལྟ་བ་ཡིས༔ རྒྱལ་བསྟན་དམོད་པའི་མུ་སྟེགས་གདུག་པ་ཅན༔ ནམ་ཡང་མི་གཏོང་སྲུང་བར་དམ་བཅས་པའི༔ རྡོ་རྗེ་འཆང་གི་བཀའ་ཉན་བསྟན་མའི་ཚོགས༔ འདི་གཤེགས་གཙང་ལྡན་བཤོས་བུ་འདི་ལོངས་ལ༔ ཡང་དག་འཆད་ཉན་རྒྱུན་གཅོད་དམ་སྲི་དང་༔ རྟག་ཆད་མཐའ་ལ་སྐལ་དམན་བློ་བསྒྱུར་བའི༔ བསྟན་དགྲ་མ་ལུས་རྩད་ནས་གཅོད་པ་དང་༔ དམ་ཆོས་སྒྲུབ་པའི་རྣལ་འབྱོར་འཁོར་བཅས་ལ༔ ཟས་ནོར་ལོངས་སྤྱོད་མཐུན་གྲོགས་འདུ་བ་སོགས༔ ལེགས་པའི་དཔལ་ཀུན་འགྲུབ་པའི་ཕྲིན་ལས་མཛོད༔ ཅེས་བརྗོད་སྤོས་དང་འབྲུ་སྨན་ཆུ་གཙང་བཅས༔ གཙང་སར་གཤེགས་ཤིང་གང་བཅོལ་སྒྲུབ་པར་བསམ༔ བཅུ་པ་གཏོར་གཞོང་ཁ་སྦུབས་དམ་སྲི་འགུགས༔ ནམ་ཡང་ལྡང་བ་མེད་པར་རྒྱས་གདབ་བྱ༔ ཧཱུྃ་ཧྲཱིཿ ཡ་མ་བྱ་བའི་དམ་སྲི་འབྱུང་པོ་ཁྱོད༔ འགྲོ་བ་ཡོངས་ཀྱི་བདེ་སྐྱིད་མ་ལུས་ཕྲོག༔ བསྟན་འཛིན་སྐྱེས་བུའི་ཚེ་བསོད་དཔལ་ལ་སྡང་༔ རིགས་ལྡན་མི་ཡི་རྒྱུད་ཕྲོག་སྲི་ལ་རྐུ༔ དེ་ཕྱིར་གཏོར་གཞོང་རི་རབ་འོག་ཏུ་མནན༔ བྱང་ཆུབ་སེམས་མཆོག་དམ་པ་མ་སྐྱེས་བར༔ ནམ་ཡང་ལྡང་བ་མེད་པར་རྒྱས་གདབ་བོ༔ ཧཱུྃ་བཞིའི་སྔགས་མཐར༔ ཨོཾ་ལཾ༔ ཨཱཿལཾ༔ ཧཱུྃ་ལཾ༔ སྭཱ་ལཾ༔ ཧཱ་ལཾ་སྟྭཾ་བྷ་ཡ་ནན་ནན༔ བཅུ་གཅིག་པ་ལ་ནོངས་བཤགས་བསྡུ་རིམ་དང་༔ ལྷར་ལྡང་བ་དང་རྣམ་པ་གསུམ་ཡིན་ལ༔ དང་པོ་མཆོད་བསྟོད་ནོངས་པ་བཤགས་པ་ནི༔ ཧཱུྃ་ཧྲཱིཿ འཁྲུལ་བའི་དབང་གིས་ལྷར་སྣང་གཟུགས་སུ་གོལ༔ ལས་རླུང་གིས་གཡེང་གསང་སྔགས་འཆལ་བར་སོང་༔ བྱིང་རྒོད་རྟོག་པས་ཏིང་འཛིན་ཕྱལ་བར་བཏང་༔ ལྷག་པའི་ལྷ་དང་རྒྱང་རིང་འཁོར་བར་འཁྱམས༔ བདག་ལྟའི་དབང་གྱུར་མི་དགེ་ཅི་བསགས་པ༔ མཐོལ་ལོ་བཤགས་སོ་བྱང་ཞིང་དག་གྱུར་ཅིག༔ ཡི་གེ་བརྒྱ་བ་བརྗོད་ཅིང་འཁོར་འདས་ཆོས༔ རང་བཞིན་བྲལ་བ་སེམས་ཀྱི་གཤིས་སུ་བཞག༔ གཉིས་པ་ལྷར་སྣང་བསྡུ་རིམ་བྱ་བ་ནི༔ ཧཱུྃ་ཧྲཱིཿ ཀུན་རྫོབ་རྟོག་པས་བསྒོམས་པའི་བསྐྱེད་རིམ་ལྷ༔ དོན་དམ་སྟོང་ཉིད་སྤྲོས་བྲལ་ཀློང་ཡངས་སུ༔ འཁོར་རྣམས་གཙོ་བོ་སྟོབས་ལྡན་ཡབ་ཡུམ་ནས༔ རིམ་བཞིན་ཡང་དག་རིགས་བཞི་ཡབ་དང་ཡུམ༔ པདྨ་གཟི་ལྡན་དབང་ཆེན་ཡེ་ཤེས་སེམས༔ ཧཱུྃ་ཡིག་ཞབས་ཀྱུ་ཧ་ཁོག་ཐིག་ལེ་དང་༔ ཟླ་ཚེས་ན་དཱའི་བར་དུ་རིམ་གྱིས་ཡལ༔ དེ་ཡང་མི་དམིགས་སྟོང་ཆེན་དོན་དམ་ལྷ༔ གདོད་མའི་མགོན་པོའི་ཐུགས་ཀློང་ཨེ་མ་ཧོ༔ དར་ཅིག་མཉམ་བཞག་གསུམ་པ་ལྷར་ལྡང་ནི༔ ཧཱུྃ་ཧྲཱིཿ རྗེས་ཐོབ་སྒྱུ་མའི་དབང་ཆེན་ཧེ་རུ་ཀ༔ པདྨ་དུང་ཁྲག་འཛིན་པའི་གནས་གསུམ་དུ༔ ཡི་གེ་གསུམ་གྱིས་མཚན་པས་རྣམ་རྟོག་སྲུང་༔ རྡོ་རྗེའི་གོ་ཁྲབ་མི་ཤིགས་རཀྵ་ཧཾ༔ བཅུ་གཉིས་དགེ་རྩ་ཐར་ལམ་རྒྱུར་བསྔོ་ནི༔ ཧཱུྃ་ཧྲཱིཿ འདིས་བརྩོན་བསྐལ་པ་དཔག་ཏུ་མེད་པ་ནས༔ ད་ལྟའི་བར་དུ་བླ་མ་ཡི་དམ་ལྷ༔ མཁའ་འགྲོ་ཆོས་སྐྱོང་སྐུ་གསུང་ཐུགས་ཀྱི་རྟེན༔ བྲིས་བཀླགས་བསྙེན་བསྒྲུབ་བསྒོམས་པའི་དགེ་རྩ་ཀུན༔ རྣམ་མཁྱེན་རྫོགས་པའི་སངས་རྒྱས་བཅོམ་ལྡན་འདས༔ པདྨ་དབང་ཆེན་ཡི་དམ་ལྷག་པའི་ལྷའི༔ གོ་འཕང་བདག་གཞན་འགྲོ་བ་མ་ལུས་པས༔ ད་ལྟ་ཉིད་དུ་འཐོབ་པར་བྱ་ཕྱིར་བསྔོ༔ བཅུ་གསུམ་བཀྲ་ཤིས་བརྗོད་ཅིང་མེ་ཏོག་འཐོར༔ ཕྱོགས་བཅུ་ཀུན་ཏུ་དགེ་ལེགས་རྒྱས་པར་བྱ༔ ཧཱུྃ་ཧྲཱིཿ ཆོས་ཀྱི་དབྱིངས་ནས་ཚད་མེད་ཐུགས་རྗེའི་མཐུས༔ གདུལ་བྱའི་དབང་གིས་དྲག་པོའི་སྐུར་སྤྲུལ་ནས༔ ཁམས་གསུམ་དབང་སྡུད་སྣང་སྲིད་ཟིལ་གྱིས་གནོན༔ བདུད་འདུལ་རྟ་མཆོག་རྒྱལ་པོའི་བཀྲ་ཤིས་ཤོག༔ འགྲོ་ཀུན་དུས་མིན་འཆི་བའི་འཇིགས་ལས་སྒྲོལ༔ དྲན་པ་ཙམ་གྱིས་བདེ་ཆེན་ཞིང་དུ་འདྲེན༔ གསུང་མཆོག་པདྨ་རིགས་ཀྱི་བདག་པོ་སྟེ༔ བཅོམ་ལྡན་སྣང་བ་མཐའ་ཡས་བཀྲ་ཤིས་ཤོག༔ གཙོ་བོའི་སྐུ་གསུང་ཐུགས་ཀྱི་རྣམ་རོལ་ལས༔ དུག་ལྔའི་གདོན་གྱི་གཤེད་གྱུར་ཧེ་རུ་ཀ༔ ལས་བཞིའི་ཕྲིན་ལས་རབ་འབྱམས་མཛོད་འཆང་བ༔ དབང་ཆེན་དྲག་པོ་རིགས་བཞིའི་བཀྲ་ཤིས་ཤོག༔ རྒྱལ་ཀུན་ཡེ་ཤེས་འཁོར་ལོའི་སྒྱུ་འཕྲུལ་ལས༔ ཡང་དག་ཐུགས་དང་འཇམ་དཔལ་སྐུ་ཡི་ལྷ༔ པདྨ་གསུང་མཆོག་ཕྲིན་ལས་ཀུ་མཱ་ར༔ དཀྱིལ་འཁོར་རྒྱ་མཚོའི་ཁྱབ་བདག་བཀྲ་ཤིས་ཤོག༔ མ་མོ་རྦོད་གཏོང་རིག་འཛིན་གཙོ་དང་འཁོར༔ འཇིག་རྟེན་མཆོད་བསྟོད་དམོད་པ་དྲག་སྔགས་དང་༔ བཀའ་སྡོད་དམ་ཅན་དབང་གི་སྲུང་མའི་ཚོགས༔ སྒོ་སྐྱོང་སྤྲུལ་པར་བཅས་པའི་བཀྲ་ཤིས་ཤོག༔ འཁྲུལ་བའི་སེམས་ཅན་རྣམ་མཁྱེན་གཞི་ལ་གྲོལ༔ གང་སྣང་སྐུ་དང་ཞིང་ཁམས་སྒྱུ་འཕྲུལ་ལྷ༔ འབྲས་བུ་ལམ་བྱེད་རྡོ་རྗེ་ཐེག་པའི་མཆོག༔ མི་ནུབ་དར་ཞིང་རྒྱས་པའི་བཀྲ་ཤིས་ཤོག༔ ཅེས་བརྗོད་སྤྱོད་ལམ་དགེ་བས་དུས་འདའ་ཞིང་༔ གཞན་ཕན་ལྷག་བསམ་བློ་དང་མི་འབྲལ་བྱ༔ ས་མ་ཡཱ༔ རིགས་ཀུན་ཁྱབ་བདག་སྣང་བ་མཐའ་ཡས་ཀྱིས༔ རིགས་ཀྱི་སེམས་དཔའ་སེམས་མའི་ཚོགས་རྣམས་ལ༔ རིགས་ཀུན་འདུས་པའི་རྒྱུད་མཆོག་གསུངས་པ་ལས༔ རིགས་མཆོག་པདྨ་རྒྱལ་པོའི་ཕྲིན་སྒྲུབ་བླངས༔ མ་འོངས་སྐལ་ལྡན་སྤྱི་དང་ཁྱད་པར་དུ༔ ཐུགས་ཀྱི་གཟུངས་མ་མཚོ་རྒྱལ་ཌཀྐིའི་གཙོ༔ ངན་ལམ་རྒྱལ་མཆོག་དབྱངས་ལ་ལེགས་པར་གདམས༔ དྲན་ཤེས་བསླུ་མེད་དགོངས་པའི་སྒྲོམ་དུ་སྦོས༔ དུས་བབས་མཁའ་འགྲོས་བྱིན་བརླབས་སྐལ་ལྡན་གྱིས༔ ཟོལ་མེད་ཡི་གེའི་རིས་སུ་བབ་པའི་ཚེ༔ གཡར་དམ་ཅན་གྱི་སྲུང་མ་ཙི་ཏྲ་དམར༔ དབྱིངས་ཀྱི་སྔགས་སྲུང་མ་མོས་ཐུབ་པར་སྲུངས༔ གུ་ཧྱ༔