སྨིན་བྱེད་དབང་ཆོག་བསམ་འཕེལ་ནོར་བུ།
དབང་ཆེན་རྟ་མཆོག་ཐུགས་སྒྲུབ་ཡང་ཟབ་ལས༔ སྨིན་བྱེད་དབང་ཆོག་བསམ་འཕེལ་ནོར་བུ་བཞུགས༔
ཡེ་ཤེས་ལྔ་ཡི་རང་མདངས་ལས༔ སོ་སོར་རྟོགས་པའི་གཟི་འབར་བས༔ འཁོར་འདས་དབང་བསྒྱུར་ཧེ་རུ་ཀ༔ རྟ་མཆོག་རྒྱལ་པོའི་སྐུ་ལ་འདུད༔ དེ་ཡི་བསྙེན་སྒྲུབ་ཟབ་མོ་ལ༔ འཇུག་འདོད་སྐལ་ལྡན་སྨིན་བྱེད་ཐབས༔ དབང་ཆོག་བསམ་འཕེལ་ནོར་བུ་འདི༔ མ་འོངས་ལས་ཅན་དོན་དུ་གདམས༔ ས་མ་ཡཱ༔ དེ་ལ་སྦྱོར་བ་དངོས་གཞི་རྗེས་དང་གསུམ༔ དང་པོ་དུར་ཁྲོད་ལ་སོགས་དབེན་གནས་སུ༔ དབང་གི་ས་ལ་བདུད་རྩིས་ཆག་ཆག་གདབ༔ ཐིག་བརྒྱད་གདབ་ཅིང་རྡུལ་ཚོན་རས་བྲིས་དང༔ ཚོམ་བུ་ལ་སོགས་སྐབས་དང་སྦྱར་ལ་བྱ༔ བུམ་པ་བདུད་རྩི་སོ་ལྔའི་བཅུད་ཀྱིས་གཏམས༔ ཁ་རྒྱན་སྐུ་རྟེན་གཟུངས་ཐག་རྡོ་རྗེས་བརྒྱན༔ པདྨས་སྤྲས་པའི་གོས་ཀྱིས་བཀླུབ་པར་བྱ༔ ཐོད་པ་དུམ་གཅིག་བདུད་རྩི་བྱང་སེམས་བླུགས༔ དམར་པོའི་དར་གྱིས་ཁ་དགབ་དེ་ཡི་སྟེང་༔ ཐུགས་རྟེན་མེ་ལོང་དྭངས་མའི་ཤེལ་ཟུར་དྲུག༔ ལྷ་ཚོགས་སྐུ་གཟུགས་ཡོན་ཏན་སྒྲུབ་གཏོར་དང་༔ དབང་གི་ཕུར་པ་རྟ་ཞལ་དར་དམར་བརྒྱན༔ བཀའ་གཏེར་སྲུང་མའི་གཏོར་མ་སྨན་རཀྟ༔ གཞན་ཡང་དབུ་རྒྱན་རྡོར་དྲིལ་མཚན་ལྡན་དང་༔ གདུགས་འཕན་རྒྱལ་མཚན་རྔ་གླིང་དུང་སིལ་སོགས༔ མ་ཚང་མེད་པར་འདུ་བྱས་ཉེར་སྤྱོད་བཀྲམ༔ རྣལ་འབྱོར་བདེ་བའི་སྟན་ལ་བག་ཕབས་ནས༔ ཐུན་མོང་སྔོན་འགྲོས་རྒྱུད་སྦྱངས་གཞི་བདག་ལ༔ གཏོར་མ་གསེར་སྐྱེམས་ཕུལ་ནས་བཀའ་བསྒོ་ཞིང་༔ ལས་ཀྱི་གཞུང་བསྲང་བསྙེན་སྒྲུབ་སྔོན་སོང་ནས༔ སྐབས་སུ་བུམ་པ་མི་དམིགས་སྟོང་པའི་ངང་༔ ཁྲོ་བོའི་གཞལ་ཡས་མཚན་ཉིད་ཡོངས་རྫོགས་དབུས༔ དབང་ཆེན་རྒྱལ་པོ་ཡབ་ཡུམ་སྲས་འཁོར་བཅས༔ བདག་བསྐྱེད་ལྷ་ཡི་ཐུགས་ལས་འོད་འཕྲོས་པས༔ སྐུ་ཡི་གནས་རྣམས་ཀུན་ནས་བདུད་རྩིའི་རྒྱུན༔ ཆར་ལྟར་བབས་པས་བུམ་པ་གང་བར་བསམ༔ རྩ་བའི་སྔགས་ལ་གྲངས་བཟུང་ཅི་ནུས་མཐར༔ དབྱངས་གསལ་ཡི་གེ་བརྒྱ་བ་འབྲུ་འབུམ་བཅས༔ ཡེ་དྷར་བཟླ་ཞིང་མཆོད་བསྟོད་དངོས་གྲུབ་བླངས༔ ལས་བུམ་ནང་དུ་རང་མོས་ལྷ་བསྐྱེད་ནས༔ སྔགས་བཟླས་འོད་ཞུ་སློབ་མ་མདུན་དུ་འགོད༔ ཁྲུས་བྱས་བགེགས་བསྐྲད་ཆོས་བཤད་གོ་མཚོན་སོགས༔ མཎྜལ་ཕུལ་ནས་གསོལ་བ་འདི་ལྟར་གདབ༔ ཀྱཻ་ཧོ༔ བདེ་གཤེགས་རྒྱལ་བ་ཀུན་གྱི་ངོ་བོ་ཉིད༔ དབང་ཆེན་ལྷ་དང་དབྱེར་མེད་བླ་མ་རྗེ༔ གསང་སྔགས་ཟབ་ཁྱད་སྨིན་བྱེད་གདམས་པ་ཡིས༔ བདག་རྒྱུད་སྐུ་བཞིའི་ཡེ་ཤེས་རྒྱས་པར་མཛོད༔ ཅེས་པས་ལན་གསུམ་གསོལ་བ་བཏབ་པའི་རྗེས༔ བླ་མ་དགྱེས་ཤིང་བརྩེ་བས་འདི་སྐད་དོ༔ ཧཱུྃ་ཧྲཱིཿ རྒྱལ་ཀུན་གསུང་ལ་དབང་བསྒྱུར་ཧེ་རུ་ཀ༔ པདྨ་དབང་གི་དཀྱིལ་འཁོར་ཆེན་པོ་འདིར༔ དད་གུས་གདུང་བས་ངེས་པར་འཇུག་འདོད་ན༔ སྨིན་བྱེད་དབང་གི་བརྡ་སྒོ་དབྱེ་བར་བྱ༔ ཞེས་བརྗོད་དང་པོ་སྐྱབས་འགྲོ་སེམས་བསྐྱེད་དང་༔ ཡན་ལག་བདུན་པའི་རྗེས་ཟློས་སྔོན་བཏང་ནས༔ སྟ་གོན་དང་པོ་དམ་ཆུ་བླུད་བྱས་ཏེ༔ ཀྱཻ་ཧོ༔ ལས་དང་སྐལ་བར་ལྡན་པའི་གང་ཟག་རྣམས༔ གསང་སྔགས་དམ་ཚིག་བསྲུང་ན་དངོས་གྲུབ་ཐོབ༔ ཉམས་ན་མནར་མེད་མེ་ཡིས་འཚིག་པར་ངེས༔ དེ་ཕྱིར་བདུད་རྩི་འདི་འཐུང་བག་ཟོན་བྱོས༔ འདི་ཡི་རྗེས་ཟློས་གདུང་ཤུགས་དང་བཅས་པས༔ བཛྲ་ས་མ་ཡཱ་ན་ར་ཀན༔ རཀྵནྟུ༔ མིག་དར་དམར་པོ་དགབ་ཅིང་མེ་ཏོག་གཏད༔ སོ་ཤིང་སྤྱི་མཐུན་སོ་འཁྲུ་དཀྱིལ་འཁོར་དོར༔ ཧཱུྃ་ཧྲཱིཿ ངག་སྒྲིབ་བཟླས་པའི་སྐྱོན་རྣམས་སྦྱང་བའི་ཕྱིར༔ སོ་ཤིང་དཀྱིལ་འཁོར་དབུས་སུ་འདོར་བར་བྱ༔ ལས་སྒྲིབ་བག་ཆགས་མ་ལུས་སྦྱངས་པ་དང་༔ རིགས་ཀྱི་དངོས་གྲུབ་གང་ཐོབ་དེར་དབབ་ཤོག༔ ཨོཾ་བཛྲ་ཧ་ས་ཧ༔ དཔུང་སྐུད་ཁ་དོག་ལྔའམ་དཀར་དམར་མཐིང་༔ རྩ་བའི་སྔགས་ཀྱིས་བདུན་ལྔ་གསུམ་མདུད་གདབ༔ ཕོ་ཡི་དཔུང་གཡོན་མོ་ཡི་གཡས་སུ་གདགས༔ ཧཱུྃ་ཧྲཱིཿ རང་བྱུང་ཡེ་ཤེས་ལྔ་ལྡན་དཔུང་སྐུད་འདི༔ ལུས་གནས་རྩ་ཡི་བག་ཆགས་སྦྱངས་པ་དང་༔ སྒྲུབ་རྟགས་རྨི་ལམ་བར་ཆད་བསྲུང་བའི་ཕྱིར༔ ཁྱོད་ཀྱི་དཔུང་པར་འཆིང་ཞིང་གནས་པར་གྱིས༔ ཨོཾ་ཧཱུྃ་ཏྲཱྃ་ཧྲཱིཿཨཱཿཨོཾ་ཨཱཿཧཱུྃ༔ ལས་ཆུ་དང་རྡོ་རྗེ་རྒྱ་གྲམ་གདབ༔ ཀུ་ཤ་གཙང་མ་དྷཱི༔དང་འབྲུ་གསུམ་གྱིས༔ རྨི་ལམ་གསལ་བའི་རྗེས་སུ་བྱིན་བརླབས་ཏེ༔ ཧཱུྃ་ཧྲཱིཿ སྔོན་ཚེ་ཐུབ་དབང་མངོན་པར་བྱང་ཆུབ་ཚེ༔ ཀུ་ཤ་གཙང་མའི་གདན་ལ་དམ་བཅས་ལྟར༔ རྟགས་ཚད་རྨི་ལམ་བཟང་ངན་གསལ་བའི་ཕྱིར༔ དོ་ནུབ་སྔས་དང་གདན་དུ་འདིང་བར་གྱིས༔ དྷི་མམ༔ ཁྱོར་ཆུ་ལག་ཏུ་བླུགས་ཏེ་ཉེ་རེག་བྱ༔ ཧཱུྃ་ཧྲཱིཿ རབ་འབྱམས་སྐྱེ་བའི་ཕྲེང་བར་སྒྲིབ་གསུམ་གྱི༔ བག་ཆགས་སྦྱངས་ནས་སྒོ་གསུམ་ལྷར་འགྱུར་ཕྱིར༔ དག་བྱེད་ཆུ་ཡིས་མི་གཙང་སྦྱང་པ་དང་༔ རྣམ་དག་གཙང་མའི་ཡོན་ཏན་མངོན་གྱུར་ཤོག༔ བཛྲ་ས་མ་ཡཱ་ཤུདྡྷེ་ཨ༔ དེ་ཡིས་སྟ་གོན་ཆོས་རྣམས་ལེགས་པར་གྲུབ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་བྱིན་དབབ་བྱ་བའི་རིམ་པ་ནི༔ རང་ཉིད་དབང་ཆེན་ཡབ་ཡུམ་གཞུང་བཞིན་བསྒོམས༔ གནས་གསུམ་འབྲུ་གསུམ་ཁྱད་པར་སྙིང་ག་རུ༔ ཕག་མོ་གཅེར་བུ་ཕྲ་ལ་ནས་འབྲས་ཙམ༔ དམར་ལ་འོད་འབར་དེ་ཡི་སྙིང་ག་རུ༔ གཡུང་དྲུང་གཡོན་འཁོར་རླུང་གིས་དྲག་ཏུ་བསྐྱོད་༔ གར་སྟབས་མཛད་པས་སྣང་སྲིད་གཡོ་བར་གྱུར༔ ཁྱད་པར་གནས་གསུམ་འོད་ཟེར་དཀར་དམར་མཐིང་༔ སྤོས་དུད་ལྟར་འཕྲོས་སངས་རྒྱས་བྱང་སེམས་དང་༔ ཁྱད་པར་དབང་ཆེན་རྟ་མགྲིན་ལྷ་ཚོགས་ཀྱི༔ སྐུ་ནི་ཆེ་ཕྲ་དཔག་མེད་ཆར་ལྟར་བབས༔ རྩ་སྔགས་དབྱངས་གསལ་ཡིག་འབྲུ་ཁ་དོག་ལྔ༔ ཞི་དྲག་ཕྱག་མཚན་རིགས་ལྔའི་སྐུ་གསུང་ཐུགས༔ ས་དང་བར་སྣང་དབྱིངས་ནས་བུ་ཡུག་འཚུབས༔ རང་ལ་ཐིམ་བསམ་བྱིན་འབེབས་ཚིག་འདི་བརྗོད༔ སྤོས་དུད་གཏོང་ཞིང་ཐོད་པའི་རྔ་དང་བཅས༔ ཧཱུྃ་ཧྲཱིཿ འོག་མིན་སྤྲོས་བྲལ་ཆོས་སྐུའི་ཕོ་བྲང་ནས༔ པདྨ་རིགས་ཀྱི་གཙོ་བོ་སྣང་མཐའ་ཡས༔ ལོག་འདྲེན་བདུད་བཞི་འདུལ་མཛད་ཧེ་རུ་ཀ༔ རྟ་མཆོག་དབང་གི་རྒྱལ་པོ་ཡབ་དང་ཡུམ༔ སྒྲུབ་པ་བཀའ་བརྒྱད་རྩ་གསུམ་ཡོངས་རྫོགས་ལྷ༔ སྐུ་ཡི་བྱིན་ཆེན་ཉི་མ་འབུམ་ལྟར་འབར༔ རྣལ་འབྱོར་ལུས་ལ་གཟི་མདངས་བསྐྱེད་དུ་གསོལ༔ གསུང་གི་བྱིན་ཆེན་འབྲུག་སྟོང་སྒྲ་བཞིན་ལྡིར༔ རྣལ་འབྱོར་ངག་ལ་ནུས་མཐུ་བསྐྱེད་དུ་གསོལ༔ ཐུགས་ཀྱི་བྱིན་ཆེན་མཁའ་ལྟར་ཡོངས་ལ་ཁྱབ༔ རྣལ་འབྱོར་སེམས་ལ་ཉམས་རྟོགས་བསྐྱེད་དུ་གསོལ༔ ཉིད་དང་དབྱེར་མེད་དུས་འདིར་མཛད་དུ་གསོལ༔ རྩ་བའི་སྔགས་མཐར༔ ཨ་བེ་ཤ་ཡ་ཛྙཱ་ན་ཨ་ཨི་ཨུ་ཨེ་ཨོ་ཨཾ་ཨེ་ཝཾ་ཕེཾ་ཕེཾ༔ རོལ་མོ་དྲག་ཏུ་འཁྲོལ་ཞིང་བྱིན་ཕེབས་རྟགས༔ ལུས་ལ་བྱིན་འབབས་འདར་འཁྲབ་གཟི་འོད་འབར༔ ངག་ལ་བྱིན་ཕེབས་བརྡ་སྐད་ངེས་མེད་སྨྲ༔ ཡིད་ལ་བྱིན་ཕེབས་ཉམས་རྟོགས་སྐྱོ་ཤས་འཕེལ༔ དེ་ནས་རྒྱ་གྲམ་སློབ་བུའི་སྤྱིར་བོར་བཞག༔ ཏིཥྛ་བཛྲ༔ཞེས་བརྗོད་མཉམ་པར་བཞག༔ དེ་ནས་སློབ་བུས་སྒོ་དབྱེ་གསོལ་གདབ་ནི༔ ཀྱཻ༔ དཀྱིལ་འཁོར་ཀུན་གྱི་གཙོ་བོ་རིགས་བདག་རྗེ༔ ཚད་མེད་སྒོ་བཞི་རྟག་ཆད་མུ་བཞིས་བསྒྲིབས༔ ཡེ་ཤེས་བཞི་ཡི་རང་གདངས་སྒོ་བཞི་ཡིས༔ མཁྱེན་བརྩེའི་ཐུགས་ཀྱིས་སྒོ་བཞི་དབྱེ་རུ་གསོལ༔ བཛྲ་པྲ་བེ་ཤ་ཡ་ཨཱ༔ དེ་ནས་སྒོ་བཞི་དབྱེ་ཞིང་གནང་བ་ནི༔ ཀྱཻ་ཧོ༔ སྐལ་ལྡན་ཁྱོད་ཀྱི་དད་དང་གུས་པའི་བློས༔ དཀྱིལ་འཁོར་ཤར་སྒོ་ནས་ཞུགས་ནང་དུ་ཤོག༔ སྒོ་བཞིར་བརྡ་དང་བརྡ་ཡིས་ཕྱག་འཚལ་ལོ༔ ལྷ་མཆོག་བརྟག་ཕྱིར་རིག་མེ་དོར་བར་གྱིས༔ ལས་ཀྱི་རྡོ་རྗེའི་ཕྱག་མཚན་ལ་འཇུས་ཏེ༔ འཛིན་མའི་ཕྱག་རྒྱས་མེ་ཏོག་བཟུང་སྟེ་དོར༔ ཧཱུྃ་ཧྲཱིཿ བདག་གི་ཚེ་རབས་སྔོན་ནས་འབྲེལ་བ་ཡི༔ ལས་ཀྱི་ལྷག་པའི་ལྷ་མཆོག་གང་ཡིན་ལ༔ བདག་གིས་རིག་པའི་མེ་ཏོག་འདི་ཕུལ་བས༔ དགྱེས་པར་བཞེས་ནས་མཆོག་གི་དངོས་གྲུབ་སྩོལ༔ བཛྲ་པུཥྤེ་པྲ་ཏིཥྩ་པུ་ཛ་ཧོ༔ བླ་མས་གསེར་ཐུར་ཐོགས་ནས་སྤྱན་དབྱེ་ནི༔ ཧཱུྃ་ཧྲཱིཿ མ་རིག་ལིང་ཐོག་གིས་སྒྲིབ་ཡེ་ཤེས་མིག༔ གསང་སྔགས་རིག་པའི་གསེར་གྱི་ཐུར་མས་བསལ༔ བདེ་གཤེགས་སྙིང་པོ་སྟོབས་སོགས་ཡོན་ཏན་ཀུན༔ རང་ལ་ཡེ་ནས་གནས་པ་བསྟན་པར་གྱིས༔ དེ་ནས་དཀྱིལ་འཁོར་མཐོང་བ་བསྟན་པ་ནི༔ ཕྱག་ཤིང་ཐོགས་ཏེ་དཀྱིལ་འཁོར་ལེགས་བསྟན་ནས༔ ཀྱཻ་ཧོ༔ ལེགས་པར་གསོན་དང་སྐལ་ལྡན་རིགས་ཀྱི་བུ༔ ཕྱི་ལྟར་རྡུལ་ཚོན་དཀྱིལ་འཁོར་གཟུགས་བརྙན་ཏེ༔ གཞི་དམར་ཐུགས་རྗེས་འགྲོ་ལ་ཆགས་པའི་བརྡ༔ ཟླ་གམ་ཆོས་འབྱུང་སོར་རྟོག་ཡེ་ཤེས་མདངས༔ འཁོར་ལོ་རྩིབས་བཞི་ཡེ་ཤེས་བཞི་ཡི་མདངས༔ རྩིབས་བརྒྱད་ཚོགས་བརྒྱད་རྟོག་པ་གནས་སུ་དག༔ བཅུ་དྲུག་གནས་ཡུལ་འཛིན་པ་རང་སར་གྲོལ༔ སྒོ་བཞི་ཚད་མེད་བཞི་ཡིས་འགྲོ་བ་འདུལ༔ ཉི་ཟླའི་གདན་བརྩེགས་ཐབས་ཤེས་ཟུང་དུ་འབྲེལ༔ ཕྱི་ནང་ཉོན་མོངས་བརྒྱད་ཁྲི་གནས་འཇོམས་བརྡའ༔ དུར་ཁྲོད་བརྒྱད་སོགས་འཇིགས་རུང་རྔམ་པའི་ཞིང་༔ བརྟེན་པའི་གཙོ་བོ་དབང་ཆེན་ཧེ་རུ་ཀ༔ སྤྱན་རས་གཟིགས་དབང་རྒྱུད་དྲུག་འགྲོ་བའི་མགོན༔ རྟ་མགྲིན་རྒྱལ་པོའི་རྣམ་རོལ་གདུག་པ་འདུལ༔ དབུ་དགུས་ཁམས་གསུམ་ས་དགུའི་རྟོག་པ་འཇོམས༔ ཕྱག་མཚན་བཅོ་བརྒྱད་སྟོང་ཉིད་བདེན་དོན་སྟོན༔ ཤེས་རབ་ཡུམ་ཆེན་སྟོང་ཉིད་དབྱིངས་དང་སྦྱོར༔ ཐུགས་རྗེ་འགགས་མེད་ཡེ་ཤེས་སྤྲུལ་པའི་འཁོར༔ གདུལ་བྱའི་ཁམས་བཞིན་སྐུ་མདོག་མ་ངེས་ཤིང་༔ འཁོར་བ་མྱང་འདས་དབྱིངས་སུ་སྒྲོལ་བའི་བརྡར༔ འགགས་མེད་ཅིར་ཡང་འཆར་བའི་ཚུལ་ལ་ལྟོས༔ ནང་ལྟར་རྡོ་རྗེ་ལུས་ཀྱི་གྲོང་ཁྱེར་དུ༔ འབྱུང་ལྔ་རྣམ་དག་ཡུམ་ཆེན་ལྔ་ཡི་ཀློང་༔ ཕུང་ལྔ་གནས་དག་བཅོམ་ལྡན་རིགས་ལྔ་ཡབ༔ ཀུན་གཞི་ཡིད་ཆོས་གནས་དག་རྟ་མཆོག་དཔལ༔ ཡེ་ཤེས་བཞི་ཡི་རང་མདངས་དབང་ཆེན་ལྷ༔ འཕགས་ལམ་ཡན་ལག་བརྒྱད་ལྡན་སྒྲུབ་སྡེ་བརྒྱད༔ སྟོབས་བཅུ་མི་འཇིགས་མ་འདྲེས་བྱང་ཆུབ་ཆོས༔ མ་ལུས་ཡོངས་རྫོགས་དཀྱིལ་འཁོར་ཆེན་པོར་ལྟོས༔ གསང་བ་རང་སེམས་མ་སྐྱེས་སྤྲོས་དང་བྲལ༔ ཆོས་སྐུ་དབང་ཆེན་འཁོར་འདས་ཀུན་ལ་ཁྱབ༔ འགགས་མེད་གསལ་མདངས་ལོངས་སྐུ་དབང་ཆེན་ལྷ༔ རྩལ་སྣང་སྣ་ཚོགས་ཅིར་ཡང་འཆར་བ་ནི༔ སྤྲུལ་པའི་སྐུ་རུ་ཤེས་པར་གྱིས་ཤིག་བུ༔ གཉིས་པ་དངོས་གཞི་སྐལ་ལྡན་སློབ་བུ་ལ༔ ཕྱི་རྒྱུད་གསུམ་ལ་ཐུན་མོང་རིག་པའི་དབང་༔ ནང་རྒྱུད་གསུམ་གྱི་ཐོག་མར་སློབ་དཔོན་དབང་༔ སྤྲོས་བཅས་བསྐྱེད་རིམ་བསྒོམ་པ་བུམ་པ་དང་༔ རླུང་སྔགས་བཟླས་པར་བརྩོན་ལ་གསང་བའི་རྫས༔ ཆགས་ཅན་ལམ་དུ་སློང་ཕྱིར་ཤེས་རབ་མ༔ རྫོགས་རིམ་ཤིན་ཏུ་སྤྲོས་མེད་ཤེལ་གྱི་བརྡ༔ ཀུན་ལ་ཐུན་མོང་སྒྲོལ་ལས་དྲག་པོའི་དབང་༔ རྣམ་གྲངས་བདུན་གྱི་སྒོ་ནས་ལག་ཏུ་ལོངས༔ ས་མ་ཡཱ༔ དང་པོ་ཐུན་མོང་རིག་ལྔ་ཞུ་བའི་ཕྱིར༔ གསོལ་བ་གདབ་པའི་རིམ་པ་འདི་བཞིན་ནོ༔ ཀྱཻ་ཧོ༔ གསང་ཆེན་ཟབ་མོའི་དཀྱིལ་འཁོར་འཁོར་ལོའི་བདག༔ ལས་སྒྲིབ་ཉོན་མོངས་དབྱིངས་སུ་གཏོར་བ་དང་༔ སྐུ་གསུམ་བྱིན་རླབས་རྒྱུད་ལ་བླུགས་པའི་ཕྱིར༔ ཐུན་མོང་དབང་གི་བརྡ་སྒོ་དབྱེ་རུ་གསོལ༔ ལན་གསུམ་ཐོག་མར་ལས་བུམ་ཆུས་བཀྲུས་ཏེ༔ ཧཱུྃ༔ ཐ་མལ་གཟུགས་ཀྱི་ཕུང་པོ་གནས་བསྒྱུར་ནས༔ རང་གནས་མེ་ལོང་ཡེ་ཤེས་མངོན་གྱུར་ཕྱིར༔ མི་བསྐྱོད་ཐུགས་ཀྱི་རང་བཞིན་བདུད་རྩིའི་ཆུས༔ བུ་ཁྱོད་ལས་ཉོན་སྒྲིབ་ཚོགས་དག་གྱུར་ཅིག༔ ཨོཾ་སརྦ་ཏ་ཐཱ་ག་ཏ་མ་ཧཱ་ཨཱ་དར་ཤ་ཛྙཱ་ན་ཨ་བྷི་ཥིཉྩ་ཧཱུྃ༔ ཞེས་བརྗོད་བུམ་ཆུ་སྤྱི་བོར་བླུགས་པར་བྱ༔ རིན་པོ་ཆེ་ཡི་དབུ་རྒྱན་སྤྱི་བོར་བཞག༔ ཧཱུྃ་ཧྲཱིཿ སྡུག་བསྔལ་ཚོར་བའི་ལོག་རྟོག་རྒྱུན་བཅད་ནས༔ རང་བྱུང་མཉམ་ཉིད་ཡེ་ཤེས་མངོན་གསལ་ཕྱིར༔ རིན་ཆེན་ཡོན་ཏན་དོན་མཚོན་དབུ་རྒྱན་འདིས༔ རྒྱལ་བའི་རྒྱལ་ཚབ་དམ་པ་ཐོབ་གྱུར་ཅིག༔ ཨོཾ་སརྦ་ཏ་ཐཱ་ག་ཏ་མ་ཧཱ་ས་མ་ཏ་ཛྙཱ་ན་ཨ་བྷི་ཥིཉྩ་ཧཱུྃ༔ ཞེས་བརྗོད་དབུ་རྒྱན་སྤྱི་བོར་འཇོག་པར་བྱ༔ དེ་ནས་ཐབས་ཀྱི་རྡོ་རྗེ་ལག་གཡས་གཏད༔ ཧཱུྃ་ཧྲཱིཿ སྣ་ཚོགས་འཁྲུལ་བའི་འདུ་ཤེས་རང་གྲོལ་ནས༔ རང་རྩལ་སོར་རྟོག་ཡེ་ཤེས་མངོན་འཆར་ཕྱིར༔ མཐའ་ཡས་གསུང་གི་དོན་མཚོན་རྡོ་རྗེ་ཡིས༔ ལོག་རྟོག་རི་བོ་རྩེ་ནས་བསྙིལ་བར་ཤོག༔ ཨོཾ་སརྦ་ཏ་ཐཱ་ག་ཏ་མ་ཧཱ་པྲ་ཏི་བྷེ་ཀྵ་ན་ཛྙཱ་ན་ཨ་བྷི་ཥིཉྩ་ཧཱུྃ༔ ཞེས་བརྗོད་རྡོ་རྗེ་ལག་པ་གཡས་སུ་བྱིན༔ ཤེས་རབ་རང་བཞིན་དྲིལ་བུ་ལག་གཡོན་གཏད༔ ཧཱུྃ་ཧྲཱིཿ དགེ་སྡིག་དཀར་ནག་འདུ་བྱེད་དབྱིངས་བསྒྲལ་ནས༔ རང་གདངས་བྱ་གྲུབ་ཡེ་ཤེས་ལྷུན་གྲུབ་ཕྱིར༔ དོན་ཡོད་རྒྱལ་པོའི་ཕྲིན་ལས་དྲིལ་བུའི་དབང་༔ སྐལ་ལྡན་ཁྱོད་ཀྱིས་མྱུར་ཐོབ་ལས་འགྲུབ་ཤོག༔ ཨོཾ་སརྦ་ཏཱ་ཐཱ་ག་ཏ་མ་ཧཱ་ཀྲི་ཏྱ་ནུཥྛ་ན་ཛྙཱ་ན་ཨ་བྷི་ཥིཉྩ་ཧཱུྃ༔ དྲིལ་བུ་ལག་གཡོན་གཏད་ནས་ལན་གསུམ་དཀྲོལ༔ དེ་ནས་མ་རིག་མུན་སེལ་མིང་དབང་ནི༔ རྡོར་དྲིལ་བསྣོལ་མ་སྤྱི་བོར་བཞག་བྱས་ཏེ༔ ཧཱུྃ་ཧྲཱིཿ སྲིད་པའི་བདག་འཛིན་རྣམ་ཤེས་དབྱིངས་གྲོལ་ནས༔ རང་དབང་ཆོས་དབྱིངས་ཡེ་ཤེས་མངོན་གྱུར་ཕྱིར༔ རྣམ་པར་སྣང་མཛད་མུན་སེལ་མིང་གི་དབང་༔ སྐལ་ལྡན་སྐྱེས་བུ་ཁྱོད་ཀྱིས་ཐོབ་པར་ཤོག༔ ཨོཾ་སརྦ་ཏ་ཐཱ་ག་ཏ་མ་ཧཱ་ཤཱུ་ནྱ་ཛྙཱ་ན་བཛྲ་ཨ་བྷི་ཥིཉྩ་ཧཱུྃ༔ སྔོན་གྱི་མེ་ཏོག་དོར་བའི་སྐབས་དེ་རུ༔ དཀྱིལ་འཁོར་དབུས་སུ་བབས་པའི་གསང་བའི་མིང་༔ ཆེ་མཆོག་པདྨ་དབང་ཆེན་བཞད་པ་རྩལ༔ ཤར་དུ་རྡོ་རྗེ་དབང་ཆེན་དགྱེས་པ་རྩལ༔ ལྷོ་རུ་རཏྣ་དབང་ཆེན་རྔམས་བཞད་རྩལ༔ ནུབ་ཏུ་པདྨ་དབང་ཆེན་དབྱངས་སྙན་རྩལ༔ བྱང་དུ་ཀརྨ་དབང་ཆེན་ལས་རབ་རྩལ༔ དེ་བཞིན་ཤར་དུ་ཐུགས་མཆོག་རྡོ་རྗེ་དང་༔ ལྷོ་རུ་ཡོན་ཏན་རིན་ཆེན་ཀུན་འབྱུང་དཔལ༔ ནུབ་ཏུ་པདྨ་ཁམས་གསུམ་དབང་སྡུད་རྩལ༔ བྱང་དུ་ཕྲིན་ལས་བདུད་འདུལ་དྲག་པོ་རྩལ༔ ཤར་ལྷོར་བདེ་ཆེན་དགའ་བཞི་དགྱེས་རབ་དང་༔ ལྷོ་ནུབ་རིག་འཛིན་རྡོ་རྗེ་འཆང་དབང་དང་༔ ནུབ་བྱང་བསྟན་སྲུང་དགྲ་བགེགས་ཀུན་འདུལ་རྩལ༔ བྱང་ཤར་སྟོབས་ལྡན་དམོད་པ་ཀུན་འགྲུབ་སོགས་སྐབས་སུ་གང་བབས་མིང་བཏགས་སྔགས་ཤམ་དུ༔ བྷུདྡྷ་ཀྲོ་ཏ་ན་མ་ཨ་བྷི་ཥིཉྩ་མཾ༔ དེ་ནས་སློབ་མའི་ལག་གཡས་རྡོ་རྗེ་དང་༔ གཡོན་དུ་དྲིལ་བུ་ཐབས་ཤེས་བརྡ་དོན་སྤྲད༔ ཟུང་འཇུག་དོན་ཕྱིར་བསྣོལ་ཞིང་འཁྱུད་ཚུལ་བྱ༔ ཧཱུྃ་ཧྲཱིཿ སྣང་བ་ཐབས་ཀྱི་རང་བཞིན་རྡོ་རྗེ་དང་༔ སྟོང་པ་ཤེས་རབ་རང་བཞིན་དྲིལ་བུ་དང་༔ ཟུང་འཇུག་བདེ་སྟོང་ཡེ་ཤེས་མངོན་གྱུར་ནས༔ རྡོ་རྗེ་སློབ་དཔོན་དབང་མཆོག་མངོན་གྱུར་ཤོག༔ ཨོཾ་བཛྲ་དྷ་ར་ནཱ་མ་ཨ་བྷི་ཥིཉྩ་ཧཱུྃ༔ དེ་ལྟར་ཐུན་མོང་རིག་པའི་དབང་ལྔ་དང་༔ རྡོ་རྗེ་སློབ་དཔོན་དབང་རྣམས་རྫོགས་པའི་མཐར༔ བུམ་དབང་ཆེད་དུ་མཎྜལ་ཕུལ་བྱས་ཏེ༔ གསོལ་བ་གདབ་པའི་རིམ་པ་འདི་བཞིན་ནོ༔ ཀྱཻ་ཧོ༔ དགོངས་ཤིག་ཐུགས་རྗེའི་བདག་ཉིད་རྡོ་རྗེ་འཛིན༔ མ་དག་ལུས་ཀྱི་བག་ཆགས་གནས་དག་ནས༔ བསྐྱེད་རིམ་བསྒོམས་ཤིང་སྤྲུལ་པའི་སྐུ་འགྲུབ་ཕྱིར༔ སྤྲོས་བཅས་བུམ་པའི་དབང་མཆོག་བདག་ལ་སྩོལ༔ ལན་གསུམ་བརྗོད་ཅིང་བུམ་པའི་གཞལ་ཡས་སུ༔ དབང་ཆེན་ལྷ་ཚོགས་གསལ་བའི་སྐུའི་ཆ་ལས༔ བདུད་རྩིའི་རྒྱུན་དང་ལྷ་ཡི་སྐུ་འཕྲོས་པས༔ ཕུང་ཁམས་ལ་ཕོག་དབང་ཆེན་སྐུར་གྱུར་བསམ༔ ཧཱུྃ་ཧྲཱིཿ བུམ་པ་རང་བྱུང་ལྷ་ཡི་གཞལ་ཡས་ཁང་༔ བཅུད་མཆོག་ཟག་མེད་དབང་ཆེན་ལྷ་ཡི་སྐུ༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ སྐུ་ཡི་དབང་མཆོག་ལུས་ལ་བསྩལ་དུ་གསོལ༔ རྩ་སྔགས་ཤམ་དུ༔ ཀཱ་ཡ་ཨ་བྷི་ཥིཉྩ་ཨོཾ༔ དེས་ནི་ལུས་ཀྱི་སྒྲིབ་པ་མ་ལུས་དག༔ གནས་སྐབས་ལྷ་ཡི་བསྐྱེད་རིམ་བསྒོམ་ལ་དབང་༔ འབྲས་བུ་སྤྲུལ་སྐུ་ཐོབ་པའི་སྐལ་ལྡན་བྱ༔ དེ་ནས་རྗེས་འབྲེལ་ལྷ་དབང་བསྐུར་བ་ནི༔ ཐོག་མར་གཙོ་བོའི་སྐུ་ཙཀ་མེ་ལོང་ལ༔ ལེགས་པར་བསྟན་ཏེ་དབང་བསྐུར་ཚིག་དོན་བརྗོད༔ རྡོ་རྗེ་སློབ་མའི་སྤྱི་བོར་བཞག་བྱས་ཏེ༔ ཧཱུྃ་ཧྲཱིཿ རང་སེམས་སྟོང་པ་ཆོས་སྐུའི་མེ་ལོང་ངོགས༔ འགགས་མེད་གསལ་མདངས་ལྷ་ཡི་བསྐྱེད་རིམ་ཤར༔ དབྱེར་མེད་སྣང་སྟོང་གཟུགས་སྐུའི་དབང་བསྐུར་བས༔ རང་རིག་དོན་དམ་ལྷ་ཞལ་མཇལ་བར་ཤོག༔ རྩ་སྔགས་ཤམ་བུར༔ ཧྱཱ་གྷྲྀ་ཝཱ་ཀཱ་ཡ་ཨ་བྷི་ཥིཉྩ་ཧཱུྃ༔ དེ་ནས་རིགས་བཞིའི་ལྷ་དབང་བསྐུར་བ་ལ༔ རྡོ་རྗེ་དབང་ཆེན་སྐུ་རྟེན་སྤྱི་བོར་བཞག༔ ཧཱུྃ་ཧྲཱིཿ ཤར་ཕྱོགས་དྲི་ཟའི་གདོན་ཚོགས་འདུལ་བ་དང་༔ ནད་གདོན་བར་ཆད་མ་ལུས་ཞི་མཛད་པ༔ རྡོ་རྗེ་དབང་ཆེན་ཡབ་ཡུམ་དབང་བསྐུར་བས༔ རྟ་མཆོག་རྒྱལ་པོའི་ཐུགས་ཀྱི་དབང་ཐོབ་ཤོག༔ ཨོཾ་བཛྲ་ཀྲོ་ཏ་ཧྱ་གྷྲི་ཝ་ཀཱ་ཡ་ཨ་བྷི་ཥིཉྩ་ཧཱུྃ༔ རིན་ཆེན་དབང་ཆེན་སྐུ་རྟེན་སྤྱི་བོར་བཞག༔ ཧཱུྃ་ཧྲཱིཿ ལྷོ་ཕྱོགས་གཤིན་རྗེའི་གདོན་ཚོགས་འདུལ་བ་དང་༔ ཚེ་བསོད་དཔལ་འབྱོར་ཡོན་ཏན་རྒྱས་མཛད་པ༔ རཏྣ་དབང་ཆེན་ཡབ་ཡུམ་དབང་བསྐུར་བས༔ རྟ་མཆོག་རྒྱལ་པོའི་ཡོན་ཏན་དབང་ཐོབ་ཤོག༔ ཨོཾ་རཏྣ་ཀྲོ་ཏ་ཧྱ་གྷྲི་ཝ་གུ་ཎ་ཨ་བྷི་ཥིཉྩ་ཧཱུྃ༔ པདྨ་དབང་ཆེན་སྐུ་རྟེན་སྤྱི་བོར་བཞག༔ ཧཱུྃ་ཧྲཱིཿ ནུབ་ཕྱོགས་ཆུ་བདག་གདོན་ཚོགས་འདུལ་བ་དང་༔ སྐྱེ་རྒུའི་བླ་ཡིད་དབང་དུ་སྡུད་མཛད་པ༔ པདྨ་དབང་ཆེན་ཡབ་ཡུམ་དབང་བསྐུར་བས༔ རྟ་མཆོག་རྒྱལ་པོའི་གསུང་གི་དབང་ཐོབ་ཤོག༔ ཨོཾ་པདྨ་ཀྲོ་ཏ་ཧྱ་གྷྲི་ཝ་ཝཀྐཱ་ཨ་བྷི་ཥིཉྩ་ཧཱུྃ༔ ཀརྨ་དབང་ཆེན་སྐུ་རྟེན་སྤྱི་བོར་བཞག༔ ཧཱུྃ་ཧྲཱིཿ བྱང་ཕྱོགས་གནོད་སྦྱིན་ཚོགས་རྣམས་འདུལ་བ་དང་༔ དྲག་པོའི་ལས་ཀྱིས་དགྲ་བགེགས་ཚར་གཅོད་པ༔ ལས་རབ་དབང་ཆེན་ཡབ་ཡུམ་དབང་བསྐུར་བས༔ རྟ་མཆོག་རྒྱལ་པོའི་ཕྲིན་ལས་དབང་ཐོབ་ཤོག༔ ཨོཾ་ཀརྨ་ཀྲོ་ཏ་ཧྱ་གྷྲི་ཝ་ཀཱ་ཡ་ཨ་བྷི་ཥིཉྩ་ཧཱུྃ༔ དེ་ནས་སྒྲུབ་ཆེན་བཀའ་བརྒྱད་ལྷ་ཚོགས་ཀྱི༔ དབང་བསྐུར་དང་པོ་ཡང་དག་སྐུ་ཐོགས་ཏེ༔ སློབ་མའི་སྤྱི་བོར་བཞག་ནས་འདི་སྐད་དོ༔ ཧཱུྃ་ཧྲཱིཿ གྲངས་མེད་རྒྱལ་བ་ཀུན་གྱི་ཐུགས་ཀྱི་དབྱིངས༔ འགྲོ་བའི་ཞེ་སྡང་རྟོག་པ་འཇོམས་མཛད་པ༔ ཡང་དག་ཐུགས་ཀྱི་ལྷ་ཚོགས་དབང་བསྐུར་བས༔ མེ་ལོང་ལྟ་བུའི་ཡེ་ཤེས་མངོན་གྱུར་ཤོག༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ཨ་བྷི་ཥིཉྩ་ཧཱུྃ༔ འཇམ་དཔལ་གཤིན་རྗེའི་སྐུ་གཟུགས་སྤྱི་བོར་བཞག༔ ཧཱུྃ་ཧྲཱིཿ མཚན་དཔེའི་འོད་འབར་བདེ་གཤེགས་ཡོངས་རྫོགས་ཀྱི༔ རང་གཟུགས་ང་རྒྱལ་རྟོག་ཚོགས་ཟིལ་གནོན་པ༔ འཇམ་དཔལ་གཤིན་རྗེ་གཤེད་པོའི་དབང་བསྐུར་བས༔ མཉམ་པ་ཉིད་ཀྱི་ཡེ་ཤེས་མངོན་གྱུར་ཤོག༔ ཨོཾ་ཨ་ཀྲོ་ཏེ་ཀ་ཡ་མནྟ་ཀ་ཨ་བྷི་ཥིཉྩ་ཧཱུྃ༔ པདྨ་དབང་གི་སྐུ་གཟུགས་སྤྱི་བོར་བཞག༔ ཧཱུྃ་ཧྲཱིཿ གསུང་དབྱངས་ཡན་ལག་དྲུག་ཅུའི་རང་གཟུགས་གར༔ ཉོན་མོངས་འདོད་ཆགས་མ་ལུས་འཇོམས་མཛད་པ༔ བཅོམ་ལྡན་རྟ་མཆོག་རྒྱལ་པོའི་དབང་བསྐུར་བས༔ སོ་སོར་རྟོག་པའི་ཡེ་ཤེས་མངོན་གྱུར་ཤོག༔ ཨོཾ་པདྨ་ཏ་ཀྲི་ཏ་ཧྱ་གྷྲྀ་ཝ་ཧཱུྃ་ཨ་བྷི་ཥིཉྩ་ཧཱུྃ༔ ཕུར་པ་ཕྲིན་ལས་སྐུ་རྟེན་སྤྱི་བོར་བཞག༔ ཧཱུྃ་ཧྲཱིཿ རབ་འབྱམས་རྒྱལ་བའི་ཕྲིན་ལས་དབང་འབྱོར་བ༔ ཕྲག་དོག་དམ་སྲི་རྡུལ་དུ་བརླག་མཛད་པ༔ ཁྲོ་རྒྱལ་རྡོ་རྗེ་གཞོན་ནུའི་དབང་བསྐུར་བས༔ བྱ་བ་གྲུབ་པའི་ཡེ་ཤེས་མངོན་གྱུར་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཨ་བྷི་ཥིཉྩ་ཧཱུྃ༔ བླ་མེད་ཧེ་རུ་ཀའི་སྐུ་རྟེན་སྤྱི་བོར་བཞག༔ ཧཱུྃ་ཧྲཱིཿ སྣང་སྲིད་བདེ་བ་ཆེན་པོའི་ཡུམ་གྱི་མཁར༔ བཅུ་དྲུག་དགའ་བཞིའི་སྒེག་པའི་གཞོན་ནུ་ཆེ༔ ལེགས་ཉེས་སྟངས་འཛིན་རྣལ་འབྱོར་གྲོགས་མཛད་པ༔ བླ་མེད་ཧེ་རུ་ཀ་ཡི་དབང་བསྐུར་རོ༔ ཨོཾ་གུ་ཧྱ་ཛྙཱ་ན་ཤྲཱི་ཧེ་རུ་ཀ་ཨ་བྷི་ཥིཉྩ་ཧཱུྃ༔ རིག་འཛིན་སློབ་དཔོན་སྐུ་རྟེན་སྤྱི་བོར་བཞག༔ ཧཱུྃ་ཧྲཱིཿ བདེ་གཤེགས་ཡོངས་རྫོགས་བླ་མ་རིག་འཛིན་གཙོ༔ དམ་ཚིག་གཉན་པོའི་དཔང་བཞུགས་ཧེ་རུ་ཀ༔ སློབ་དཔོན་རྡོ་རྗེ་འཛིན་པའི་དབང་བསྐུར་བས༔ སྣང་བཞིའི་ཡེ་ཤེས་ཟད་སར་འཁྱོལ་བར་ཤོག༔ ཨོཾ་མ་ཧཱ་གུ་རུ་སརྦ་སིདྡྷི་ཨ་བྷི་ཥིཉྩ་ཧཱུྃ༔ དྲེགས་པ་ཀུན་འདུལ་སྐུ་གཟུགས་སྤྱི་བོར་བཞག༔ ཧཱུྃ་ཧྲཱིཿ རྒྱལ་ཀུན་ཡོན་ཏན་རྣམ་རོལ་སྣ་ཚོགས་གཟུགས༔ རྣལ་འབྱོར་མི་མཐུན་ཀུན་སེལ་ལེགས་ཚོགས་སྤེལ༔ འཇིག་རྟེན་མཆོད་བསྟོད་ལྷ་ཡི་དབང་བསྐུར་བས༔ འགོ་བའི་ལྷ་ལྔས་རྟག་ཏུ་སྲུང་བར་ཤོག༔ ཨོཾ་བཛྲ་ཙཎྜ་སརྦ་དུཥྚན་ཨ་བྷི་ཥིཉྩ་ཧཱུྃ༔ སྟོབས་ལྡན་ནག་པོའི་སྐུ་རྟེན་སྤྱི་བོར་བཞག༔ ཧཱུྃ་ཧྲཱིཿ རྦད་པ་ཙམ་གྱིས་དགྲ་བགེགས་ལོག་འདྲེན་རྣམས༔ མ་ལུས་རྡུལ་དུ་བརླག་ནུས་དྲག་རྩལ་ཅན༔ ཆེ་བཙན་སྟོབས་ལྡན་ནག་པོའི་དབང་བསྐུར་བས༔ བསྟན་དགྲ་ཚར་གཅོད་དྲག་པོའི་དབང་ཐོབ་ཤོག༔ ཨོཾ་བཛྲ་སརྦ་དུཥྚན་ཨ་བྷི་ཥིཉྩ་ཧཱུྃ༔ དེ་ནས་བཀའ་སྲུང་ནག་པོ་ཡི༔ སྐུ་གཟུགས་གནས་ལྔར་བཞག་སྟེ་འདི་སྐད་དོ༔ ཧཱུྃ་བྷྱོ༔ བཀའ་ཡི་བསྟན་སྲུང་ཕོ་རྒྱུད་མོ་རྒྱུད་དང་༔ ཕྱི་ནང་དྲེགས་པ་ཡོངས་ཀྱི་གཙོ་བོ་མཆོག༔ དཔལ་མགོན་མ་ནིང་ནག་པོའི་དབང་བསྐུར་བས༔ དམ་ཅན་རྒྱ་མཚོའི་སྲོག་ལ་དབང་འབྱོར་ཤོག༔ དྷརྨ་པཱ་ལ་ཝ་དྷུ་ཏི་སརྦ་ཨ་བྷི་ཥིཉྩ་ཧཱུྃ༔ དེ་ནས་གསང་བའི་དབང་བསྐུར་ནི༔ མཚན་ལྡན་བདེ་སྐྱོང་གཞལ་ཡས་སུ༔ ལྷ་ཚོགས་རིགས་ལྔ་ཡབ་ཡུམ་གྱུར༔ མཉམ་སྦྱོར་བྱང་སེམས་བདུད་རྩིའི་རྒྱུན༔ སློབ་མའི་ལྕེ་ལ་བཞག་པར་བྱ༔ ཧཱུྃ་ཧྲཱིཿ གསང་བ་བདེ་སྟོང་དགའ་བཞིའི་ཡེ་ཤེས་ཀྱི༔ དཀར་དམར་བདུད་རྩི་འདྲེས་པ་གསང་བའི་རྫས༔ དམ་ལྡན་སྐྱེས་བུའི་ལྕེ་ལ་དབང་བསྐུར་བས༔ ངག་སྒྲིབ་དག་ནས་བཟླས་པ་མཐར་ཕྱིན་ཤོག༔ རྩ་སྔགས་ཤམ་བུར༔ བྷོ་དྷི་ཙིཏྟ་ཝཀྐ་ཨ་བྷི་ཥིཉྩ་ཧཱུྃ༔ དེས་ནི་ངག་གི་སྒྲིབ་པ་མ་ལུས་དག་ནས་ཀྱང་༔ གསང་སྔགས་ཕྱི་ནང་བཟླས་པ་བྱེད་ལ་དབང་༔ འབྲས་བུ་ལོངས་སྐུ་ཐོབ་པའི་སྐལ་ལྡན་བྱས༔ ཆགས་ཅན་རྣམས་ལ་ཤེར་དབང་བསྐུར་བ་ནི༔ དངོས་སམ་རི་མོའི་ཕྱག་རྒྱ་ལག་གཡོན་གཏད༔ མཉམ་སྦྱོར་དགའ་བཞིའི་ཡེ་ཤེས་ངོས་བཟུང་སྟེ༔ ཧཱུྃ་ཧྲཱིཿ ལུས་ངག་ཡིད་གསུམ་སྐྱོན་བྲལ་པདྨ་ཅན༔ བདེ་བའི་བདེ་བ་ཀུན་སྟེར་ཕྱག་རྒྱ་མོ༔ འདུ་ཤེས་གསུམ་ལྡན་ཐ་མལ་འཛིན་རྟོག་སྤོངས༔ རང་བྱུང་བདེ་བ་ཆེན་པོའི་དབང་ཐོབ་ཤོག༔ ཨོཾ་ཨཱ་མ་ཧཱ་མུ་ཏྲ་ཙིཏྟ་ཨ་བྷི་ཥིཉྩ་ཧཱུྃ༔ དེས་ནི་ཡིད་ཀྱི་ཐ་མལ་འཛིན་སྒྲིབ་དག༔ བདེ་བ་ཆེན་པོའི་ཡེ་ཤེས་བསྒོམ་ལ་དབང་༔ རྣམ་ཀུན་མཆོག་ལྡན་སངས་རྒྱས་ཆོས་ཀྱི་སྐུ༔ ཚེ་འདིར་བསྒྲུབ་པའི་སྐལ་བ་ཅན་དུ་བྱས༔ ཚིག་གི་དབང་ལ་སྒྲིབ་བྲལ་མེ་ལོང་ངོས༔ དྭངས་ཤེལ་ཟུར་དྲུག་བསྟན་ཅིང་སྙིང་གར་བཞག༔ ཧཱུྃ་ཧྲཱིཿ ཀ་དག་སྟོང་པ་དྭངས་མའི་ཤེལ་གོང་ལ༔ ལྷུན་གྲུབ་ཡེ་ཤེས་ལྔ་ཡི་འཇའ་ཚོན་ཤར༔ རང་བཞིན་མ་འགགས་སྟོང་གསལ་ཆོས་ཀྱི་སྐུའི༔ གོ་འཕང་ཚེ་འདིར་འགྲུབ་པའི་དབང་ཐོབ་ཤོག༔ ཨོཾ་དྷརྨ་དྷརྟུ་ཨ་བྷི་ཥིཉྩ་ཧཱུྃ༔ དེས་ནི་ཀུན་གཞིའི་བག་ཆགས་སྒྲིབ་པ་དག༔ བརྗོད་བྲལ་མཚན་མེད་རྫོགས་རིམ་བསྒོམ་ལ་དབང་༔ འབྲས་བུ་ངོ་བོ་ཉིད་སྐུ་ཐོབ་པར་བསམ༔ བསྒྲལ་བའི་དབང་ནི་རྣལ་འབྱོར་རབ་འབྲིང་ཐ༔ ཀུན་གྱི་སྤྱོད་ཡུལ་དབང་ཆོག་གཞན་ལས་ཤེས༔ དེ་ནས་པོ་ཏི་མགོར་བཞག་ལག་ཏུ་གཏད༔ ཧཱུྃ་ཧྲཱིཿ རྒྱལ་བ་སྲས་བཅས་ཐུགས་ཀྱི་ཏི་ཀ་མཆོག༔ ཟབ་གསང་རྒྱུད་སྡེའི་བཅུད་བསྡུས་གདམས་པའི་ཕུལ༔ དབང་ཆེན་རྟ་མཆོག་འཁོར་འདས་ཡོངས་ཀྱི་རྗེ༔ ཉེ་བརྒྱུད་དགོངས་པའི་གཏེར་ལས་ལེགས་བབས་ཆོས༔ མན་ངག་ཟབ་གསང་བསམ་འཕེལ་ནོར་བུ་འདིས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ རང་དང་གཞན་ལ་ཕན་འདོད་ལྷག་བསམ་གྱིས༔ རྟག་ཏུ་བསྙེན་ཅིང་སྒྲུབ་འབྲས་མཐར་ཕྱིན་ནས༔ ཚེ་འདིར་རྫོགས་པའི་བྱང་ཆུབ་མཐར་ཕྱིན་མཛོད༔ དབྱངས་གསལ་ཡེ་དྷར་བརྗོད་ཅིང་སྨོན་ལམ་གདབ༔ སྤྲོ་ན་རྫས་རྟགས་བཀྲ་ཤིས་དབང་རྣམས་སྦྱིན༔ དེ་ནས་དགའ་སྟོན་ཚོགས་ཀྱི་འཁོར་ལོར་རོལ༔ ས་མ་ཡཱ༔ ཨེ་མ་ཟབ་ལས་ཆེས་ཟབ་མན་ངག་དབང་གི་རྒྱལ༔ རིག་འཛིན་བརྒྱུད་པའི་ཞལ་ལུང་བླ་ན་མེད༔ མཚོ་རྒྱལ་ཌཱཀྐིའི་དགོངས་པའི་གསང་མཛོད་ལས༔ དུས་བབས་སྐལ་ལྡན་ཆོས་ཀྱི་བདག་པོར་སྤྲོད༔ བཀའ་ཡི་སྲུང་མ་དཔལ་མགོན་མ་ནིང་དང་༔ གཏེར་གྱི་རྫི་བོ་ཙི་ཏྲ་དམར་པོས་སྲུངས༔ འཛིན་སྤེལ་རྒྱུད་འཛིན་ཚེ་ཡི་བར་ཆད་སོལ༔ མཐུན་རྐྱེན་སྲིད་ཆོས་ཚེ་ཡི་ལེགས་ཚོགས་སྤེལ༔ ཤིན་ཏུ་ཟབ་བོ་སྣོད་མིན་གསང་བའི་རྒྱ༔ འགྱུར་མེད་ཡི་གེ་སྤྲུལ་པའི་སྐུ་ཡི་རྒྱ༔ འགགས་མེད་རང་བབས་ཚིག་དོན་གསུང་གི་རྒྱ༔ འཁྲུལ་མེད་སྟོང་གསལ་དགོངས་ཀློང་ཐུགས་ཀྱི་རྒྱ༔ གུ་ཧྱ༔ སྤྲང་བན་ལུང་རིག་གླིང་པས་དག་པར་ཕབ་པའོ༔ དགེའོ