ཡེ་ཤེས་ཁྱུང་གི་གབ་ཐིག།
དག་སྣང་མཚོ་རྒྱལ་དགོངས་མཛོད་ལས༔ ཡེ་ཤེས་ཁྱུང་གི་གབ་ཐིག་ནི༔ བདག་ཉིད་གཞུང་ལྟར་གཏུམ་པོར་བསྐྱེད༔ ༼ཁ༽ཧཱུྃ་ཧཱུྃ༔ སྤྱི་བོར་ཟླ་སྟེང་ཨོཾ་དཀར་ལས༔ བྷུདྡྷ་རིགས་ཀྱི་བྱ་ཁྱུང་དཀར༔ ཕྱག་གཡས་འཁོར་ལོ་རྩིབས་བརྒྱད་བསྐོར༔ གཡོན་པས་རྒྱལ་རིགས་སྦྲུལ་དཀར་གསོལ༔ སྤུ་གྲིའི་སྒྲོ་གཤོག་མེ་སྟག་འཕྲོ༔ ལྕགས་རྭ་གསེར་མིག་མཆུ་སྡེར་ནི༔ ཤིན་ཏུ་རྣོ་ཞིང་དྲག་ཏུ་བགྲད༔ མགྲིན་པར་པདྨའི་ལྟེ་བར་ཨཱ༔ འོད་འཕྲོས་པདྨ་རིགས་ཀྱི་ཁྱུང་༔ དམར་པོ་ཕྱག་གཡས་པདྨ་བསྣམས༔ གཡོན་པས་བྲམ་ཟེ་སྦྲུལ་དམར་གསོལ༔ སྤུ་གྲིའི་སྒྲོ་གཤོག་མེ་སྟག་འཕྲོ༔ ལྕགས་རྭ་གསེར་མིག་མཆུ་སྡེར་ནི༔ ཤིན་ཏུ་རྣོ་ཞིང་དྲག་ཏུ་བགྲད༔ ཐུགས་ཀར་རྡོ་རྗེའི་ལྟེ་བར་ཧཱུྃ༔ འོད་ཞུ་རྡོ་རྗེ་རིགས་ཀྱི་ཁྱུང་༔ མཐིང་ནག་ཕྱག་གཡས་རྩེ་ལྔ་ཕྱར༔ གཡོན་པས་དམངས་རིགས་སྦྲུལ་སྔོན་གསོལ༔ སྤུ་གྲིའི་སྒྲོ་གཤོག་མེ་སྟག་འཕྲོ༔ ལྕགས་རྭ་གསེར་མིག་མཆུ་སྡེར་ནི༔ ཤིན་ཏུ་རྣོ་ཞིང་དྲག་ཏུ་བགྲད༔ ལྟེ་བར་རིན་ཆེན་ལྟེ་བར་སྭཱ༔ ཡོངས་གྱུར་རིན་ཆེན་རིགས་ཀྱི་ཁྱུང་༔ སེར་པོ་ཕྱག་གཡས་ནོར་བུ་བསྣམས༔ གཡོན་པས་རྗེ་རིགས་སྦྲུལ་སེར་གསོལ༔ སྤུ་གྲིའི་སྒྲོ་གཤོག་མེ་སྟག་འཕྲོ༔ ལྕགས་རྭ་གསེར་མིག་མཆུ་སྡེར་ནི༔ ཤིན་ཏུ་རྣོ་ཞིང་དྲག་ཏུ་བགྲད༔ གསང་བར་རྒྱ་གྲམ་ལྟེ་བར་ཧཱ༔ འོད་ཞུ་ཀརྨ་རིགས་ཀྱི་ཁྱུང་༔ ལྗང་ཁུ་རལ་གྲི་མེ་འབར་གདངས༔ གཡོན་པས་གདོལ་རིགས་སྦྲུལ་ནག་གསོལ༔ སྤུ་གྲིའི་སྒྲོ་གཤོག་མེ་སྟག་འཕྲོ༔ ལྕགས་རྭ་གསེར་མིག་མཆུ་སྡེར་ནི༔ ཤིན་ཏུ་རྣོ་ཞིང་དྲག་ཏུ་བགྲད༔ ཕྱི་རོལ་ལས་མཁན་ཁྲོ་བཅུ་སོགས༔ གཞུང་ལྟར་བསྐྱེད་པ་མན་ངག་གོ༔ ཤིན་ཏུ་བསྡུས་པར་དགའ་བ་ལ༔ གཙོ་བོ་གཅིག་པུའི་མངོན་རྟོགས་བསྒོམ༔ གཞལ་ཡས་ཟླ་གམ་སྒོ་གཅིག་པ༔ རྣལ་འབྱོར་རིག་པས་འཕྲུལ་བར་བྱ༔ འདི་ནི་ཀླུ་འདུལ་ཟབ་གནད་ཡིན༔ སྔགས་ཀྱི་གབ་ཐིག་གཙོ་སྔགས་ཤམ༔ ག་རུ་ཊ་ཙ་ལེ་ཙ་ལེ་ཧཱུྃ༔ ཡང་ན་ཁྱུང་ཆེན་རིགས་ལྔའི་སྔགས༔ གཞན་ལས་བྱུང་བཞིན་བཟླ་བར་བྱ༔ དམིགས་པའི་གབ་ཐིག་ཁྱུང་ལྔ་ལ༔ འོད་ཟེར་མེ་དང་དུད་སྤྲིན་འཁྲིགས༔ སྡེ་བརྒྱད་སྤྱི་དང་ཁྱད་པར་དུ༔ གང་གནོད་ཀླུ་འམ་ལུས་གདོན་རྣམས༔ རྩྭ་སྦུར་མེ་དང་འཕྲད་པ་བཞིན༔ རྣམ་སྨིན་ལུས་རྟེན་བུན་བུན་བསྲེགས༔ མཐར་ནི་སྙིང་རྗེ་ཐུན་གཅིག་བསྒོམ༔ མི་དམིགས་ལྟ་བའི་དཔའ་གདེངས་བསྐྱེད༔ འདི་ནི་ཤིན་ཏུ་ཟབ་པའི་ཕྱིར༔ བརྡ་རིས་སྙིང་མཛོད་སྒྲོམ་དུ་སྦོས༔ དུས་བབས་ལས་ལྡན་ལག་ཏུ་སྤྲོད༔ བཀའ་སྲུང་གཟའ་བདུད་ཆེན་པོ་ཡིས༔ རྟག་ཏུ་སྲུངས་ཤིག་ས་མ་ཡཱ༔ གུ་ཧྱ༔ བརྡ་ཐིམ༔ བདག་འདྲ་མཚོ་སྐྱེས་རྡོ་རྗེའི་བྱིན་རླབས་སྙིང་གི་བུམ་པར་བསྐྱིལ་བའི་སྐལ་ལྡན་ལུང་རིག་གླིང་པས་བྲིས་པ་ཛ་ཡནྟུ༔