དབང་ཆོག་རྡོ་རྗེའི་ཕྲེང་བ།
ཧཱུྃཿ གུཧྱཔཱཏིཙནྚཙཱིཏྟསདྷབྷྱཿ ཨབྷིཥིཉྩདྷིཧིབཛྲཱེམལྱནཱམཱསྟིཿ
ཧཱུྃཿ གུཧྱཔཱཏིཙནྚཙཱིཏྟསདྷབྷྱཿ ཨབྷིཥིཉྩདྷིཧིབཛྲཱེམལྱནཱམཱསྟི།
གསང་བདག་གཏུམ་པོའི་ཐུགས་སྒྲུབ་ལས༔ དབང་ཆོག་རྡོ་རྗེའི་ཕྲེང་བ་ཞེས་བྱ་བ་བཞུགས༔
ཐུགས་ཀྱི་ལྷ་མཆོག་ཧེ་རུ་ཀ༔ རྡོ་རྗེ་གཏུམ་པོའི་ཞབས་ལ་འདུད༔ སྐྱེ་རྒུ་ཡོངས་ལ་ཕན་གདགས་པའི༔ རིག་འཛིན་རྒྱལ་པོ་ཨོ་རྒྱན་ངས༔ མངའ་བདག་ནད་ལས་གྲོལ་ཕྱིར་དང་༔ མཚོ་རྒྱལ་བར་ཆད་སེལ་བའི་ཕྱིར༔ ཕྱག་རྡོར་སྒྲུབ་ཐབས་བརྒྱ་རྩ་བརྒྱད༔ མ་ངེས་སྣ་ཚོགས་དཔག་མེད་བརྩམས༔ ཡང་སྙིང་བུམ་ཐང་བྲག་ལ་སྦས༔ ཟབ་གནད་རྒྱ་བོད་མཚམས་ཀྱི་བྲག༔ རུས་སྦལ་འདྲ་བའི་ཕ་ཝོང་ལ༔ དེ་བཞིན་ལ་ལ་ས་གཏེར་དང་༔ གང་ཟག་དབང་རབ་ཆོས་སྐལ་དུ༔ དགོངས་གཏེར་སྙིང་སྒྲོམ་སྦུབས་སུ་སྦས༔ སྔ་མ་ཕལ་ཆེར་དམ་སེལ་གྱིས༔ བསླད་པ་བྱིན་རླབས་སེལ་དང་བཅས༔ ལ་ལ་བྱིན་རླབས་ཚན་ཆེ་ཡང་༔ བརྒྱུད་པ་རིང་བས་སྒྲུབ་པ་བུལ༔ ད་ལྟའི་ལང་གྲོའི་ཕྲིན་ལས་སྤྲུལ༔ ལྷོ་གཏེར་དབང་བའི་གང་ཟག་དེར༔ བདག་དང་མཚོ་རྒྱལ་བྱིན་བརླབས་ཤིང་༔ ལྷ་སྲས་སྤྲུལ་པས་ལུང་བྱང་སྦྱིན༔ དེ་ཚེ་དེ་ཡི་དག་སྣང་དུ༔ གཏུམ་པོའི་སྒྲུབ་ཐབས་བྱུང་ན་ཡང་༔ སྐལ་ལྡན་སྐྱེས་བུ་མ་གཏོགས་པ༔ ཀུན་ལ་མ་སྟོན་གུ་ཧྱ་རྒྱ༔ ས་མ་ཡཱ༔ རྩ་བ་དབང་ཆོག་ཟབ་མོ་ལ༔ དཀྱིལ་འཁོར་བློ་མཐུན་ལྔ་ཚོམ་དབུས༔ བུམ་པ་ལྷ་ཙཀ་སྐུ་ཡི་རྟེན༔ བདུད་རྩི་བགྲང་ཕྲེང་གསུང་གི་རྟེན༔ མན་ཤེལ་མེ་ལོང་ཐུགས་ཀྱི་རྟེན༔ སྒྲུབ་གཏོར་དཔལ་བཤོས་ཡོན་ཏན་རྟེན༔ སྒྲུབ་ཕུར་ཅོད་པན་ཕྲིན་ལས་རྟེན༔ བཀོད་ལེགས་བཤམས་ནས་གཞུང་བསྲངས་ཏེ༔ བསྙེན་པ་བརྒྱ་སྟོང་བུམ་པ་བསྒྲུབ༔ མཆོད་བསྟོད་འོད་ཞུ་དབང་བཞི་ལེན༔ དེ་ནས་སྐལ་ལྡན་གསུམ་ལྔ་བདུན༔ དམ་ཚིག་ལྡན་པ་མདུན་དུ་འཁོད༔ ལས་བུམ་ཁྲོ་བོ་བདུད་རྩི་འཁྱིལ༔ ལྗང་སེར་ཕྱག་གཡས་རྒྱ་གྲམ་ཕྱར༔ གཡོན་པས་སྡིགས་མཛུབ་ཐུགས་ཀར་གདེངས༔ ཞབས་གཉིས་པད་ཉིའི་གདན་ལ་འགྱིང་༔ ཁྲོ་ཆས་ཡོངས་རྫོགས་ཐུགས་ཀ་རུ༔ ཉི་སྟེང་ཧཱུྃ་མཐིང་སྔགས་གཡོན་འཁོར༔ ཨོཾ་བཛྲ་ཨ་མྲྀ་ཏ་ཀུནྚ་ལི་ཧཱུྃ་ཕཊ༔ བརྒྱ་དང་རྩ་བརྒྱད་བཟླས་པའི་མཐར༔ མཆོད་བསྟོད་འོད་ཞུ་བུམ་ཆུར་དམིགས༔ དེ་ནས་སློབ་མ་མདུན་དུ་འཁོད༔ ཁྲུས་བྱས་བགེགས་བསྐྲད་བསྲུང་མཚམས་བྱ༔ ལོ་རྒྱུས་སྤྱི་ཡིས་ཁོག་དབུབ་ནས༔ ཁྱད་པར་ཆོས་འདིའི་བྱུང་ཚུལ་ནི༔ སྔོན་རྒྱལ་བ་ཀུན་གྱི་བྱིན་རླབས་གཅིག་ཏུ་བསྡུས་པ་མགོན་པོ་ཚེ་དཔག་མེད་པ་ནམ་མཁའ་ནས་བྱ་བབས་པ་ལྟར་སྤྲུལ་བ་དང་སྤྲུལ་གཞི་ཐ་མི་དད་པར་ཡི་གེ་ཧྲཱིཿཡིག་དམར་པོའི་རྣམ་པར་འཛམ་བུའི་གླིང་བྱེ་བ་ཕྲག་བརྒྱར་སིནྡྷུ་རྒྱ་མཚོ་རོལ་པའི་ཀློང་དུ་མེ་ཏོག་པདྨ་དམར་པོའི་སྦུབས་སུ་ཞུགས་ནས་སྤྲེལ་ལོ་སྤྲེལ་ཟླའི་ཚེས་བཅུའི་ཉི་མ་ཤར་བ་དང་མཉམ་དུ་སྤྲུལ་པའི་སྐུ་མཚོ་སྐྱེས་རྡོ་རྗེ་ཞེས་བྱ་བར་འཁྲུངས་ནས་རྒྱལ་པོ་ཨིནྡྲ་བྷུ་ཏིའི་སྲས་མེད་པ་ལ་དགོངས་ནས་རྒྱལ་སྲིད་བཟུང་༔ བཙུན་མོ་ཁབ་ཏུ་བཞེས་ཤིང་རོལ་རྩེད་མཛད་པ་ན༔ རེ་ཞིག་དུར་ཁྲོད་རུས་པའི་རྒྱན་དང་བཅས་ཏེ་དྲག་པོའི་བརྟུལ་ཞུགས་མཛད་ནས་བདུད་ཀྱི་བློན་པོ་ཕུང་བྱེད་ནག་པོའི་དབང་རབ་ཐོབ་པ་ཞེས་པའི་སྲས་མོ་དང་ཆུང་མ་ལ་ཁ་ཊཱཾ་འཕངས་པའི་རྐྱེན་གྱིས་གཉིས་ཀ་བསད་པས་རྒྱལ་ཁྲིམས་ལ་གནོད་པ་བསྐྱལ་ལོ་ཞེས་གྲོང་ཁྱེར་ཀུན་ཏུ་དྲིལ་བསྒྲགས་ནས་གསོད་པ་དང་སྤྱུགས་པ་འདམ་ཀ་ཅན་དུ་བྱས་པ་ལ༔ རྒྱལ་སྲས་རང་ཉིད་ཀྱང་འགྲོ་དོན་དུས་ལ་བབས་པ་དང་འཁོར་བ་ལ་སྐྱོ་བའི་ཚུལ་མཛད་ཅིང་ཕྱོགས་ངེས་མེད་དུ་སྤྱུགས་པ་ལེགས་སོ་ཞེས་གསུངས་པའི་ཚེ༔ དུར་ཁྲོད་ཆེན་པོ་བསིལ་བའི་ཚལ་ཞེས་མི་མ་ཡིན་གྱིས་གསོན་པོར་ཟ་བའི་གནས་དེར་སྤྱུགས༔ བམ་རོ་ལ་བརྟེན་ནས་གཙང་རྨེ་གཉིས་འཛིན་དང་བྲལ་བས་ཞི་བ་རྡོ་རྗེ་དབྱིངས་ཀྱི་ཁྲོ་བོ་བདེ་གཤེགས་འདུས་པའི་བམ་གྱི་སྒྲུབ་པ་མཛད༔ ཞིང་སྐྱོང་གི་མཁའ་འགྲོ་ཐམས་ཅད་བྲན་དུ་ཁོལ་ནས་དབང་དུ་བསྡུས༔ གཞན་ཡང་སོ་ས་གླིང་དང་ཧེ་ཆེན་བརྡལ་བ་ལ་སོགས་པའི་དུར་ཁྲོད་བརྒྱད་དུ་ཞི་ཁྲོའི་ལྷ་ཚོགས་དཔག་ཏུ་མེད་པ་སྒྲུབ་པའི་ཚུལ་བསྟན༔ བྲག་ཕུག་མཱ་ར་ཏི་ཀར་མགོན་པོ་ཚེ་དཔག་མེད་པར་ཚེ་ཡི་དངོས་གྲུབ་ཞུ་བའི་རྟེན་དུ་ཟ་ཧོར་གྱི་སྲས་མོ་མནྡྷ་ར་བ་གསང་བ་ཡེ་ཤེས་ཀྱི་སྒྲུབ་རྟེན་མཛད་པ་ན་གཞི་དང་སྤྲུལ་བ་ཐ་མི་དད་པར་གྱུར་ཏེ་ཞིང་ཁམས་རྡུལ་སྙེད་ཀྱི་གྲངས་མཉམ་པར་ཚེ་ཡི་རིག་པ་འཛིན་པ་རེ་རེའི་སྐུར་བཞེངས་ནས༔ རྒྱ་གར་དང་བོད་ཡུལ་གྱི་ལྷ་སྲིན་གདུག་པ་ཅན་མང་པོ་དམ་ལ་བཏགས་ནས༔ བོད་དུ་མངའ་བདག་ཁྲི་སྲོང་ལྡེའུ་བཙན་གྱི་མཆོད་གནས་སུ་བྱོན་ནས་བསམ་ཡས་སོགས་མཐའ་དབུས་ཀྱི་གཙུག་ལག་ཁང་དུ་མ་བཞེངས་ཤིང་༔ ཐུགས་ཀྱི་གཟུངས་མ་ཇོ་མོ་མཚོ་རྒྱལ་དང་༔ རླངས་ལྷ་རིགས་དཔལ་གྱི་སེང་གེ༔ གནུབས་ཀྱི་མཁས་པ་ནམ་མཁའི་སྙིང་པོ༔ ལང་གྲོ་ལོ་ཙཱ་བ་སོགས་སྐལ་བ་དང་ལྡན་པའི་གང་ཟག་མང་པོ་ལ་གདམས་པ་ཟབ་མོ་དཔག་ཏུ་མེད་པ་གནང་བའི་སྐབས་ཤིག༔ མངའ་བདག་གིས་ཀླུ་ལ་གྲོགས་པོ་བཅོལ་བའི་རྐྱེན་གྱིས་མཛེ་ནད་ཀྱིས་བསྙུན་ཚུལ་བསྟན་པའི་སྐབས་སུ༔ མངའ་བདག་ཉིད་བཙུན་མོ་མཁར་ཆེན་བཟའ་སྐུ་སྲུང་གི་ཚུལ་རྒྱུན་དུ་བཞུགས་པས༔ དཔལ་གྱི་སེང་གེ་སོགས་རྗེ་བཙུན་བློན་འབངས་མང་པོས་མགྲིན་གཅིག་ཏུ་སློབ་དཔོན་ལ་རཏྣའི་མཎྜལ་དང་བཅས་ཏེ་ཞུས་པ༔ ཀྱེ་མ་ཡབ་གཅིག་གུ་རུ་རིན་པོ་ཆེ༔ དུས་གསུམ་རྒྱལ་བ་ཀུན་ལས་སྐུ་དྲིན་ཅན༔ དེང་དུས་བདག་ཅག་ལས་སྐལ་ལྡན་པ་ཡིས༔ སངས་རྒྱས་ཀུན་དངོས་ཁྱེད་འདྲས་རྗེས་བཟུང་ཀྱང་༔ སྔོན་ལས་དྲག་པོས་འགའ་ཞིག་གཟའ་ཀླུ་ཡིས༔ སྲོག་ལ་ཉེན་པའི་ནད་ཀྱིས་གདུང་གྱུར་ན༔ འདི་ལས་སྐྱོབས་པའི་གདམས་པ་ཡོད་དམ་མེད༔ གལ་ཏེ་འདུག་ན་མྱུར་དུ་བསྩལ་དུ་གསོལ༔ ཞེས་ཞུས་པ་དང་༔ ཨོ་རྒྱན་ཆེན་པོ་ཉིད་སྐྱེས་བུའི་ལག་པ་བརྐྱང་བསྐུམ་གྱི་ཡུན་མ་འགྱང་བར་ཕོ་བྲང་ལྕང་ལོ་ཅན་དུ་གཤེགས་ནས་དེའི་བར་དུ་ཏིང་ངེ་འཛིན་ལ་བཞུགས་པའི་ཚུལ་མཛད་ནས་དཔལ་གསང་བའི་བདག་པོ་ལ་མི་དང་མི་གཏམ་ལབ་པའི་ཚུལ་གྱིས་རྒྱུད་དང་སྨིན་གྲོལ་དུག་སྦྱོང་སྲུང་ཟློག་གི་ཐབས་མཐའ་ཡས་པ་གསན་ནས་སླར་བཀའ་བསྩལ་པ༔ ཀྱེ་ཧོ༔ གསོན་དང་མངའ་བདག་མཚོ་རྒྱལ་དཔལ་སེང་སོགས༔ གཟའ་ཀླུ་རྒྱལ་པོ་ལ་སོགས་སྡེ་བརྒྱད་ཀྱི༔ སྲོག་སྙིང་དམར་འབྱིན་སྲུང་བ་རྡོ་རྗེའི་མཁར༔ ཟློག་བྱེད་སྟོབས་ལྡན་གནམ་ལྕགས་འཕྲུལ་འཁོར་བཞིན༔ ཁྱད་པར་འཕགས་པའི་གསང་བདག་སྒྲུབ་ཐབས་ནི༔ མཐུ་ཆེན་ཕྱག་ན་རྡོ་རྗེའི་ཐུགས་བཅུད་ཕྱུང་༔ གསང་བདག་གོས་སྔོན་ཀླུ་འདུལ་རྒྱུད་དོན་བསྡུས༔ ཁྱོད་ཅག་རྣམས་ལ་སྒྲུབ་ཐབས་བརྒྱ་རྩ་བརྒྱད༔ ཁྱད་པར་འཕགས་པའི་ཐུགས་སྒྲུབ་ལྔ་དང་བཅས༔ རང་རང་སོ་སོར་སྨིན་གྲོལ་གཏད་རྒྱ་འདེབས༔ སྤྲུལ་པའི་གང་ཟག་རེ་རེ་དང་འཕྲད་ནས༔ དུས་བབས་འགྲོ་དོན་ཕ་མཐའ་ཡས་པར་ཤོག༔ ཁྱད་པར་མཚོ་རྒྱལ་ཁྱོད་ཀྱི་སྤྲུལ་བ་ནི༔ མ་ངེས་སྣ་ཚོགས་ཉི་ཟེར་རྡུལ་བཞིན་དུ༔ སྣ་ཚོགས་གཟུགས་ཀྱིས་འགྲོ་མང་དོན་བྱེད་འགྱུར༔ མ་འོངས་སུམ་ཅུ་ཁ་རལ་དུས་དེ་རུ༔ དམངས་རིགས་ཐ་ཤལ་བྱིས་པའི་ཚུལ་འཆང་བ༔ ཤིན་ཏུ་བློ་མྱུར་འཇམ་རྩུབ་མཐར་མ་ངེས༔ ལས་ཀྱི་རིགས་འཆང་དཔལ་ལམ་ཀརྨའི་མིང་༔ དག་སྣང་ཆོས་ཀྱི་གཏེར་ཁ་བརྡོལ་བའི་དུས༔ ད་ལྟའི་ཐུགས་སྒྲུབ་དཔའ་བོ་གཅིག་པ་འམ༔ ཡང་ན་ཚོམ་བུ་ཁྱུང་གི་སྒྲུབ་ཐབས་བཅས༔ ང་སྤྲུལ་སྐྱེས་བུ་ཞིག་གིས་བསྐུལ་བའི་ཚེ༔ ཐེ་ཚོམ་མི་དགོས་དབྱིངས་རིག་སྒྲོམ་ནས་ཐོན༔ ཞུམ་པ་སྤོངས་ལ་འགྲོ་མང་དོན་དུ་སྤེལ༔ དེ་ཉིད་ཉམས་སུ་ལེན་པའི་སྐལ་ལྡན་ལ༔ པདྨ་ང་ཡིས་བྱིན་རླབས་ཆར་རྒྱུན་འབེབས༔ གསང་བདག་དཔའ་བོས་རྗེས་འཛིན་ལུང་སྟོན་ཅིང་༔ གནོད་བྱེད་གཟའ་ཀླུ་དྲེགས་པའི་ཁ་གནོན་ཅིང་༔ དངོས་གྲུབ་རྣམ་གཉིས་ཚེ་འདིར་ཐོབ་ངེས་སོ༔ ཞེས་གསུངས་པ་དེ་ལྟ་བུའི་གདམས་པ་ཟབ་མོ་འདི་ཉིད་སོགས༔ མཎྜལ་ཕུལ་རྗེས་གསོལ་འདེབས་ནི༔ ཀྱེ་བླ་མ་དཔལ་ལྡན་གསང་བའི་བདག༔ རྒྱལ་ཀུན་ཐུགས་སྒྲུབ་གཏུམ་པོའི་ལྷ༔ ཐུགས་རྗེས་ཉེ་བར་འགོ་བའི་ཕྱིར༔ དབང་གི་རིམ་པ་བསྩལ་དུ་གསོལ༔ ཅེས་པའི་གསོལ་འདེབས་ལན་གསུམ་མཐར༔ མདུན་མཁར་མཐུ་ཆེན་ཕྱག་རྡོར་ལྷ༔ འཁོར་བཅས་སྐྱབས་ཀྱི་ཡུལ་དུ་དམིགས༔ སྐྱབས་འགྲོ་སེམས་བསྐྱེད་ཡན་ལག་བཅུ༔ སྔོན་དུ་བཏང་རྗེས་སློབ་མ་ཡི༔ གདོང་གཡོགས་རིགས་བརྟགས་མེ་ཏོག་གཏད༔ དངོས་གཞིར་དམ་ཆུ་བླུད་པ་ནི༔ ནང་མཆོད་བསྲེས་པ་ངག་ཏུ་བླུད༔ ཧཱུྃ་ཧཱུྃ༔ རྩ་གསུམ་སྤྱན་སྔར་དམ་བཅས་པ༔ ཉམས་ན་མནར་མེད་མེ་ཡིས་ཚིག༔ རྟག་ཏུ་བསྲུང་ན་བདུད་རྩིའི་ཆུ༔ ཡེ་ཤེས་སེམས་དཔའི་སྐུར་གྱུར་ནས༔ འདི་ཕྱིའི་ལེགས་ཚོགས་འགྲུབ་འགྱུར་བས༔ དེ་བས་དམ་ཆུ་འདི་འཐུངས་ཤིག༔ བཛྲ་ས་མ་ཡཱ་ན་ར་ཀན༔ དེ་ནས་སློབ་མས་བླ་མར་དྲི་བ་ཞུ༔ ཀྱེ་བླ་མ་གསང་བདག་འགྲོ་བའི་མགོན༔ རྩ་བ་གསུམ་གྱི་དམ་ཚིག་ལ༔ བསྲུང་ཚུལ་མ་ལུས་ཇི་ལྟར་བསྲུང་༔ ཉམས་ན་གསོ་བའི་ཐབས་ཡོད་དམ༔ དེ་ནས་རྡོ་རྗེ་བླ་མས་ལན་འདི་གདབ༔ ཀྱེ་དམ་ཚིག་བསྲུང་ཡུལ་བླ་མ་དེ༔ རང་གི་མིག་བཞིན་འཚོ་ཤེས་བྱ༔ ཡི་དམ་ཁོག་པའི་སྙིང་ལྟར་སྒོམས༔ བཟླས་བརྗོད་འབྲལ་མེད་རྒྱུན་ཏུ་ཟློས༔ མཁའ་འགྲོ་ཆོས་སྐྱོང་ལུས་གྲིབ་བཞིན༔ རྟག་ཏུ་མི་འབྲལ་དམ་བཅའ་མཛོད༔ དངོས་གཞི་བྱིན་དབབས་དམིགས་པ་འབོག༔ སྤྱན་འདྲེན་སྔགས་རོལ་སྤོས་དུད་གཏོང་༔ ཏིཥྛའི་སྔགས་ཀྱིས་བརྟན་པར་བྱ༔ རིགས་བརྟགས་མེ་ཏོག་འཐོར་བྱས་ཏེ༔ འབུལ་བའི་ཚིག་འདིས་རྗེས་ཟློས་བྱ༔ ཀྱེ་བླ་མ་རིག་འཛིན་འགྲོ་བའི་མགོན༔ ཚེ་རབས་སྔོན་ནས་འབྲེལ་བའི་ལྷ༔ ཡི་དམ་ལྷག་པའི་ལྷ་མཆོག་ལ༔ བདག་གི་རིག་པའི་མེ་ཏོག་འབུལ༔ དགྱེས་པ་ཆེན་པོས་བཞེས་སུ་གསོལ༔ པུཥྤེ་པྲ་ཏིཙྪ་པཱུ་ཛ་ཧོ༔ རིགས་དང་མཐུན་པའི་གསང་མཚན་ནི༔ རྡོ་རྗེ་འདུས་པ་རྩལ་དུ་བཏགས༔ དེ་བཞིན་ཕྱོགས་བཞིར་བཞད་པ་རྩལ༔ ལྷག་པའི་ལྷ་ཡིས་མེ་ཏོག་དེ༔ དབང་རྟགས་ཚུལ་དུ་སྦྱིན་པར་བསམ༔ དེ་ནས་གདོང་གཡོགས་བསལ་བ་ནི༔ ཧོ༔ ཁྱོད་ཀྱི་མ་རིག་ལྡོངས་པའི་མིག༔ རིག་པའི་གསེར་ཐུར་གྱིས་བསལ་བས༔ དཀྱིལ་འཁོར་ལྷ་ཞལ་མཐོང་ནས་ཀྱང་༔ ཡེ་ཤེས་རང་གནས་ཐོབ་པར་ཤོག༔ ཛྙཱ་ན་ཙཀྵུ་པྲ་བེ་ཤ་ཡ་ཕཊ༔ དེ་ནས་དཀྱིལ་འཁོར་གྱི་དག་པ་བཤད་ཕྱིར་བླ་མས་ཕྱག་ཤིང་རྡོ་རྗེའི་ཡུ་བ་དང་ཐོད་པའི་ཏོག་གིས་མཚན་པ་བསྣམས་ཏེ༔ ཀྱེ༔ ལས་དང་སྐལ་བར་ལྡན་པའི་སྐྱེས་བུ་རྣམས་གསོན་ཅིག༔ དཀྱིལ་འཁོར་རྣམ་པ་གསུམ་ཡོད་དེ༔ ཕྱི་རྡུལ་ཚོན་དང་རིས་སུ་བྲིས་པ་དང་ཚོམ་བུའི་དཀྱིལ་འཁོར༔ ནང་རྡོ་རྗེ་ལུས་ཀྱི་དཀྱིལ་འཁོར༔ གསང་བ་རིག་པ་འདུ་འབྲལ་མེད་པའི་རང་གདངས་ཀུན་གཞི་རྣམ་ཤེས་ཚོགས་བརྒྱད་དུག་ལྔ་ཕྲ་བའི་རྟོག་པ་དང་བཅས་པ་ཡིན་ཏེ༔ དེ་ཡང་ཕྱི་ལྟར་དང་ནང་ལྟར༔ གསང་བ་ལྟར་དུ་བཤད་པ་མང་ཡང་༔ མདོར་ན་རང་གི་ལུས་གྲུ་བཞི་འདོམ་གང་དུ་ཡོད་པ་ནི་གཞལ་ཡས་ཁང་པ་ཡིན་ལ༔ དེར་བརྟེན་པའི་རིག་པ་ཡེ་ཤེས་ནི་གསང་བདག་རྡོ་རྗེ་གཏུམ་པོ༔ རིག་རྩལ་ཡེ་ཤེས་ལྔའི་རོལ་བ་དུག་ལྔར་སྣང་བ་ནི་བྱ་ཁྱུང་རིགས་ལྔ༔ དགེ་མི་དགེའི་ལས་བཅུར་སྣང་བ་ནི་ཁྲོ་བོ་བཅུ༔ གཞན་ཡང་འཁོར་འདས་ཀྱི་ཆོས་ཐམས་ཅད་དཀྱིལ་འཁོར་གྱི་རྟེན་དང་བརྟེན་པར་བཅས་པ་ཡིན་པས་ཅིར་སྣང་ལྷག་པའི་ལྷའི་དཀྱིལ་འཁོར་གསུམ་དང་འབྲལ་མེད་དུ་མཛོད་ཅིག༔ དེ་ནས་མཎྜལ་ཕུལ་བའི་རྗེས༔ བུམ་དབང་གསོལ་བ་འདི་བཞིན་གདབ༔ ཀྱཻ་སྤྲུལ་པའི་སྐུ་ཡི་ངོ་བོ་ཉིད༔ བླ་མ་སྐྱབས་གསུམ་ཀུན་འདུས་པས༔ སྐུ་ཡི་དབང་མཆོག་བསྩལ་ནས་ཀྱང་༔ ལུས་སྒྲིབ་དག་པར་མཛད་དུ་གསོལ༔ དེ་ནས་བུམ་པ་སྤྱི་བོར་བཞག༔ ཧཱུྃ་ཧཱུྃ༔ སྣང་བ་ཀུན་བརྟགས་བུམ་པ་རུ༔ སྟོང་གསལ་གཞན་དབང་ལྷ་ཡི་བཅུད༔ ཡོངས་གྲུབ་ཆོས་དབྱིངས་བདུད་རྩི་ཡི༔ སྐལ་ལྡན་ཁྱེད་ལ་དབང་བསྐུར་བས༔ ལུས་ཀྱི་སྒྲིབ་པ་ཀུན་དག་ནས༔ བསྐྱེད་རིམ་མཐར་ཕྱིན་གསང་བདག་གི༔ གསང་བ་གསུམ་དང་དབྱེར་མེད་ཤོག༔ རྩ་སྔགས་ཤམ་བུར༔ ཀཱ་ཡ་ཨ་བྷི་ཥིཉྩ་ཧཱུྃ༔ དེ་ནས་ལྷ་དབང་བསྐུར་བ་ལ༔ ཐོག་མར་གཙོ་བོའི་སྐུ་ཐོགས་ཏེ༔ ཧཱུྃ་ཧཱུྃ༔ རྒྱལ་ཀུན་ཐུགས་གསང་རྡོ་རྗེའི་དབྱིངས༔ གསང་བདག་རྡོ་རྗེ་གཏུམ་པོ་ཡི༔ སྐལ་ལྡན་བུ་ལ་དབང་བསྐུར་བས༔ མ་རིག་གཟུང་འཛིན་དབྱིངས་གྲོལ་ཤོག༔ རྩ་སྔགས་ཤམ་བུར༔ ཀཱ་ཡ་ཨ་བྷི་ཥིཉྩ་ཧཱུྃ༔ གཏུམ་པོ་བཞིའི་ཐོག་མར་ཤར་གྱི་རྡོ་རྗེ་གཏུམ་པོའི་སྐུ་ཐོགས་ཏེ༔ ཧཱུྃ༔ ཞེ་སྡང་རྟོག་པ་གནས་དག་ནས༔ མེ་ལོང་ཡེ་ཤེས་མངོན་གྱུར་མཐུས༔ ནད་གདོན་སྡིག་སྒྲིབ་ཞི་མཛད་པ༔ རྡོ་རྗེ་གཏུམ་པོའི་དབང་བསྐུར་རོ༔ ཨོཾ་བཛྲ་ཀྲོ་ཏ་ཀཱ་ཡ་ཨ་བྷི་ཥིཉྩ་ཧཱུྃ༔ ལྷོ་ཡི་རཏྣ་གཏུམ་པོའི་སྐུ་ཐོགས་ཏེ༔ ཧཱུྃ༔ ང་རྒྱལ་རྟོག་པ་གནས་དག་ནས༔ མཉམ་ཉིད་ཡེ་ཤེས་མངོན་གྱུར་མཐུས༔ ཚེ་དཔལ་ཡོན་ཏན་རྒྱས་མཛད་པ༔ རཏྣ་གཏུམ་པོའི་དབང་བསྐུར་རོ༔ ཨོཾ་རཏྣ་ཀྲོ་ཏ་ཀཱ་ཡ་ཨ་བྷི་ཥིཉྩ་ཧཱུྃ༔ ནུབ་ཀྱི་པདྨ་གཏུམ་པོའི་སྐུ་ཐོགས་ཏེ༔ ཧཱུྃ༔ འདོད་ཆགས་རྟོག་པ་གནས་དག་ནས༔ སོར་རྟོག་ཡེ་ཤེས་མངོན་གྱུར་མཐུས༔ སྣང་སྲིད་དབང་དུ་སྡུད་མཛད་པ༔ པདྨ་གཏུམ་པོའི་དབང་བསྐུར་རོ༔ ཨོཾ་པདྨ་ཀྲོ་ཏ་ཀཱ་ཡ་ཨ་བྷི་ཥིཉྩ་ཧཱུྃ༔ བྱང་གི་ཀརྨ་གཏུམ་པོའི་སྐུ་ཐོགས་ཏེ༔ ཧཱུྃ༔ ཕྲག་དོག་རྟོག་པ་གནས་དག་ནས༔ བྱ་གྲུབ་ཡེ་ཤེས་མངོན་གྱུར་མཐུས༔ དགྲ་བགེགས་དྲག་པོས་ཚར་གཅོད་པ༔ ཀརྨ་གཏུམ་པོའི་དབང་བསྐུར་རོ༔ ཨོཾ་ཀརྨ་ཀྲོ་ཏ་ཀཱ་ཡ་ཨ་བྷི་ཥིཉྩ་ཧཱུྃ༔ ཁྱུང་དང་སྦྲེལ་ན་ཁྱུང་ལྔའི་སྐུ་གནས་སོ་སོར་གཏུགས་ཏེ༔ ཨོཾ་ཁྲོཾ༔ རྒྱལ་རིགས་ཀླུ་གཉན་འདུལ་མཛད་པ༔ བྷུདྡྷ་རིགས་ཀྱི་བྱ་ཁྱུང་དཀར༔ གཏི་མུག་འཇོམས་མཛད་ཁྲོ་བོའི་རྒྱལ༔ སྐལ་ལྡན་དཔྲལ་བར་དབང་བསྐུར་རོ༔ ཨོཾ་བྷུདྡྷ་ཁྲོཾ་ག་རུ་ཊ་ཙ་ལེ་ཙ་ལེ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ ཨཱཿཁྲོཾ༔ བྲམ་ཟེ་ཀླུ་གཉན་འདུལ་མཛད་པ༔ པདྨ་རིགས་ཀྱི་བྱ་ཁྱུང་དམར༔ འདོད་ཆགས་འཇོམས་མཛད་ཁྲོ་བོ་རྒྱལ༔ སྐལ་ལྡན་མགྲིན་པར་དབང་བསྐུར་རོ༔ ཨཱཿཔདྨ་ཁྲོཾ་ག་རུ་ཊ་ཙ་ལེ་ཙ་ལེ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ ཧཱུྃ་ཁྲོཾ༔ དམངས་རིགས་ཀླུ་གཉན་འདུལ་མཛད་པ༔ རྡོ་རྗེ་རིགས་ཀྱི་བྱ་ཁྱུང་མཐིང་༔ ཞེ་སྡང་འཇོམས་མཛད་ཁྲོ་བོའི་རྒྱལ༔ སྐལ་ལྡན་སྙིང་གར་དབང་བསྐུར་རོ༔ ཧཱུྃ་བཛྲ་ཁྲོཾ་ག་རུ་ཊ་ཙ་ལེ་ཙ་ལེ་ཧཱུྃ་ཕཊ༔ ཏྲཾ་ཁྲོཾ༔ རྗེ་རིགས་ཀླུ་གཉན་འདུལ་མཛད་པ༔ རིན་ཆེན་རིགས་ཀྱི་བྱ་ཁྱུང་སེར༔ ང་རྒྱལ་འཇོམས་མཛད་ཁྲོ་བོའི་རྒྱལ༔ སྐལ་ལྡན་ལྟེ་བར་དབང་བསྐུར་རོ༔ ཏྲཾ་རཏྣ་ཁྲོཾ་ག་རུ་ཊ་ཙ་ལེ་ཙ་ལེ་ཧཱུྃ་ཕཊ༔ ཧཱ༔ཁྲོཾ༔ གདོལ་རིགས་ཀླུ་གཉན་འདུལ་མཛད་པ༔ ཀརྨ་རིགས་ཀྱི་བྱ་ཁྱུང་ལྗང་༔ ཕྲག་དོག་འཇོམས་མཛད་ཁྲོ་བོའི་རྒྱལ༔ སྐལ་ལྡན་གསང་བར་དབང་བསྐུར་རོ༔ ཧ་ཀརྨ་ཁྲོཾ་ག་རུ་ཊ་ཙ་ལེ་ཙ་ལེ་ཧཱུྃ་ཕཊ༔ དེ་ནས་ཁྲོ་བོ་བཅུའི་སྐུ་གནས་སོ་སོར་གཏུགས་ཏེ༔ ཧཱུྃ༔ སྟེང་གདོན་གཟའ་བརྒྱད་འདུལ་མཛད་པ༔ ཁྲོ་བོའི་རྒྱལ་པོ་ཧཱུྃ་ཀ་ར༔ ཁྱོད་ཀྱི་དཔྲལ་བར་དབང་བསྐུར་བས༔ གཟའ་སྐར་གདུག་པ་ཚར་གཅོད་ཤོག༔ ཨོཾ་བཛྲ་ཀྲོ་ཏ་ཧཱུྃ་ཀཱ་ར་ཧཱུྃ༔ གརྫ་གརྫ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ཧཱུྃ༔ དྲི་ཟའི་ཚོགས་རྣམས་འདུལ་མཛད་པ༔ ཁྲོ་བོའི་རྒྱལ་པོ་རྣམ་པར་རྒྱལ༔ དཔུང་པ་གཡས་པར་དབང་བསྐུར་བས༔ ཤར་ཕྱོགས་གདོན་རྣམས་ཚར་གཅོད་ཤོག༔ ཨོཾ་བཛྲ་ཀྲོ་ཏ་བི་ཛ་ཡ་ཧཱུྃ༔ ཧ་ན་ཧ་ན་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ཧཱུྃ༔ མེ་ལྷའི་ཚོགས་རྣམས་འདུལ་མཛད་པ༔ ཁྲོ་བོའི་རྒྱལ་པོ་དབྱུག་སྔོན་ཅན༔ དཔུང་པ་གཡོན་པར་དབང་བསྐུར་བས༔ ཤར་ལྷོའི་གདོན་རྣམས་ཚར་གཅོད་ཤོག༔ ཨོཾ་བཛྲ་ཀྲོ་ཏ་ནཱི་ལ་ཏནྡྲ་ཧཱུྃ༔ ད་ཧ་ད་ཧ་ཧཱུྃ་ཕཊ༔ ཧཱུྃ༔ ཆུ་ལྷའི་གདོན་རྣམས་འདུལ་མཛད་པ༔ ཁྲོ་བོའི་རྒྱལ་པོ་རྟ་མཆོག་དཔལ༔ ཁྱེད་ཀྱི་མགྲིན་པར་དབང་བསྐུར་བས༔ ནུབ་ཕྱོགས་གདོན་རྣམས་ཚར་གཅོད་ཤོག༔ ཨོཾ་བཛྲ་ཀྲོ་ཏ་ཧྱ་གྷྲྀ་ཝ་ཧཱུྃ༔ ཧུ་ལུ་ཧུ་ལུ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ཧཱུྃ༔ འཆི་བདག་གདོན་རྣམས་འདུལ་མཛད་པ༔ ཁྲོ་བོའི་རྒྱལ་པོ་གཤིན་རྗེ་གཤེད༔ ཁྱེད་ཀྱི་སྙིང་གར་དབང་བསྐུར་བས༔ ལྷོ་ཕྱོགས་གདོན་རྣམས་ཚར་གཅོད་ཤོག༔ ཨོཾ་བཛྲ་ཀྲོ་ཏ་ཡ་མནྟ་ཀ་ཧཱུྃ༔ པ་ཙ་པ་ཙ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ཧཱུྃ༔ གནོད་སྦྱིན་གདོན་རྣམས་འདུལ་མཛད་པ༔ ཁྲོ་བོའི་རྒྱལ་པོ་བདུད་རྩི་འཁྱིལ༔ ཁྱོད་ཀྱི་ལྟག་པར་དབང་བསྐུར་བས༔ བྱང་ཕྱོགས་གདོན་རྣམས་ཚར་གཅོད་ཤོག༔ ཨོཾ་བཛྲ་ཀྲོ་ཏ་ཨ་མྲྀ་ཏ་ཀུཎྜ་ལཱི་ཧཱུྃ༔ ཚིནྡྷ་ཚིནྡྷ་ཧཱུྃ་ཕཊ༔ ཧཱུྃ༔ སྲིན་པོའི་གདོན་རྣམས་འདུལ་མཛད་པ༔ ཁྲོ་བོའི་རྒྱལ་པོ་མི་གཡོ་མགོན༔ ཁྱོད་ཀྱི་ལྟེ་བར་དབང་བསྐུར་བས༔ ལྷོ་ནུབ་གདོན་རྣམས་ཚར་གཅོད་ཤོག༔ ཨོཾ་བཛྲ་ཀྲོ་ཏ་ཨརྱ་ཨ་ཙ་ལ་ཧཱུྃ༔ བྷནྡྷ་བྷནྡྷ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ཧཱུྃ༔ རླུང་ལྷའི་གདོན་རྣམས་འདུལ་མཛད་པ༔ ཁྲོ་བོའི་རྒྱལ་པོ་འདོད་པའི་རྒྱལ༔ ཁྱོད་ཀྱི་བརླ་གཡས་དབང་བསྐུར་བས༔ ནུབ་བྱང་གདོན་རྣམས་ཚར་གཅོད་ཤོག༔ ཨོཾ་བཛྲ་ཀྲོ་ཏ་ཨ་པ་ར་ཙིཏྟ་ཧཱུྃ༔ ཏིཥྛ་ཏིཥྛ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ཧཱུྃ༔ དབང་ལྡན་གདོན་རྣམས་འདུལ་མཛད་པ༔ ཁྲོ་བོ་ཁམས་གསུམ་རྣམ་རྒྱལ་གྱི༔ ཁྱོད་ཀྱི་བརླ་གཡོན་དབང་བསྐུར་བས༔ བྱང་ཤར་གདོན་རྣམས་ཚར་གཅོད་ཤོག༔ ཨོཾ་བཛྲ་ཀྲོ་ཏ་ཏྲཻ་ལོ་ཀྱ་བི་ཛ་ཧཱུྃ༔ བྷིནྡྷ་བྷིནྡྷ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ཧཱུྃ༔ ས་བདག་གདོན་རྣམས་འདུལ་མཛད་པ༔ ཁྲོ་བོའི་རྒྱལ་པོ་སྟོབས་པོ་ཆེའི༔ ཁྱོད་ཀྱི་གསང་བར་དབང་བསྐུར་བས༔ འོག་གདོན་གདུག་པ་ཚར་གཅོད་ཤོག༔ ཨོཾ་བཛྲ་ཀྲོ་ཏ་མ་ཧཱ་བྷ་ལ་ཧཱུྃ༔ སྥོ་ཊ་སྥོ་ཊ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ དེ་ནས་སྒོ་བ་བཞི་ཡན་ལག་བཞི་ལ་བསྐུར་ཏེ༔ ཧཱུྃ༔ སེམས་ཅན་འཁྲུལ་རྟོག་ལས་བྱུང་བའི༔ གདོན་བཞི་ཚར་གཅོད་ཁྲོ་བོ་བཞིའི༔ ཡན་ལག་བཞི་ལ་དབང་བསྐུར་བས༔ ཚད་མེད་བཞི་ལ་དབང་འབྱོར་ཤོག༔ ཛཿཧཱུྃ་བཾ་ཧོ༔ ཨ་བྷི་ཥིཉྩ་ཧཱུྃ༔ དེ་ནས་གསུང་གི་དབང་བསྐུར་ལ༔ བཟླས་ལུང་བྱ་ཞིང་ཐོད་ཆང་བླུད་༔ དང་པོ་སྔགས་ཕྲེང་རུ་རཀྵ༔ ཁྱད་པར་ལུང་ཐང་མཆོག་ཡིན་ནོ༔ ཧཱུྃ༔ རང་ཉིད་དཔལ་ཆེན་རྡོ་རྗེ་འཛིན༔ བསྒྲུབ་བྱ་དེ་བཞིན་ལྷ་རུ་གསལ༔ གཉིས་ཀའི་ཐུགས་ཀར་ཉི་སྟེང་ཧཱུྃ༔ བཟླས་བྱའི་རྩ་སྔགས་མཐིང་ནག་འཁོར༔ འོད་ཟེར་ལུ་གུ་རྒྱུད་དུ་སྦྲེལ༔ དགྲ་བགེགས་ཚར་བཅད་ལུས་གདོན་བསྲེགས༔ དམིགས་པ་འབོགས་ཤིང་རྗེས་ཟློས་ནི༔ བདུན་ལྔ་གསུམ་སོགས་ཤམ་བཅས་བཟླ༔ བཅོམ་ལྡན་འདི་ལ་བསྩལ་ལགས་ཀྱི༔ འདི་ལ་འགོ་བར་མཛད་དུ་གསོལ༔ མེ་ཏོག་འཐོར་ཞིང་དབྱངས་གསལ་བརྗོད༔ སྔགས་དོན་ངོ་སྤྲོད་ཚིག་འདི་བརྗོད༔ ཧཱུྃ༔ སྔགས་ནི་རྒྱལ་བས་བསྔགས་ཕྱིར་སྔགས༔ ལྷ་ལ་བོས་ཤིང་ཉེ་བའི་སྔགས༔ གཞན་ལ་གསང་ཞིང་སྦས་པའི་སྔགས༔ མཆོག་ཐུན་དངོས་གྲུབ་ཐོབ་ཕྱིར་སྔགས༔ སྔགས་དོན་བསམ་མི་ཁྱབ་པའི་སྔགས༔ རྒྱལ་ཀུན་འདུས་པའི་རིག་སྔགས་འདིས༔ དྲེགས་ཚོགས་ཚར་གཅོད་མཐུ་ནུས་འབར༔ དེ་ཕྱིར་སྔགས་དོན་ཐོགས་མེད་སྒྲུབ༔ དེ་ནས་ཐོད་ཆང་མགྲིན་པར་བྱིན༔ ཧཱུྃ༔ སྟོང་གསལ་བྷནྡྷ་ཡངས་པའི་ནང་༔ ཟག་མེད་ཡེ་ཤེས་བདུད་རྩིས་བཀང་༔ རྩ་ཁམས་བདེ་བས་ཡོངས་གང་ཞིང་༔ རླུང་ལྔ་དབྱིངས་སུ་གྲོལ་བར་ཤོག༔ རྩ་སྔགས་མཐར༔ ཝཀྐཱ་ཨ་བྷི་ཥིཉྩ་ཧཱུྃ༔ དེས་ནི་གསུང་གི་དབང་བསྐུར་རྫོགས༔ ས་མ་ཡཱ༔ གསུམ་པ་ཐུགས་ཀྱི་དབང་བསྐུར་ནི༔ མེ་ལོང་ཤེལ་རྡོས་མཚོན་བྱས་ཏེ༔ ཧཱུྃ་ཧཱུྃ༔ རང་སེམས་ངོ་བོ་ཀ་དག་མེ་ལོང་ངོས༔ ལྷུན་གྲུབ་འོད་གསལ་མན་ཤེལ་གསལ་ལ་དྭངས༔ རིག་རྩལ་འགགས་མེད་འཇའ་ཚོན་ཟེར་དུ་འཚེར༔ སྐལ་ལྡན་སྐྱེས་བུ་ཁྱེད་ལ་དབང་བསྐུར་བས༔ རང་སེམས་སྐུ་གསུམ་འབྲལ་མེད་དོན་རྟོགས་ཤོག༔ རྩ་སྔགས་ཤམ་བུར༔ ཙིཏྟ་ཨ་བྷི་ཥིཉྩ་ཧཱུྃ༔ ཡོན་ཏན་གཏོར་མ་གནས་གསུམ་གཏུགས༔ ཧཱུྃ་ཧཱུྃ༔ གཏོར་སྣོད་བྷནྡྷ་དུམ་གསུམ་པར༔ དཔལ་བཤོས་ཤ་ཁྲག་དམར་གྱིས་བརྒྱན༔ ལྷ་རུ་གསལ་ཞིང་གནས་གསུམ་གཏུགས༔ སྒོ་གསུམ་སྒྲིབ་དག་དབང་ཐོབ་ཤོག༔ རྩ་སྔགས་ཤམ་བུར༔ བྷ་ལིང་ཏ་ཀཱ་ཡ་ཝཀྐཱ་ཙིཏྟ་ཨ་བྷི་ཥིཉྩ་ཧཱུྃ༔ ཕྲིན་ལས་སྒྲུབ་ཕུར་ལག་ཏུ་གཏད༔ ཧཱུྃ༔ ཆོས་ཀུན་བདག་རྟོག་དགྲ་དང་བགེགས༔ བདག་མེད་དབྱིངས་སུ་སྒྲོལ་བྱེད་པའི༔ མཚན་མ་རྫས་ཀྱི་ཕུར་པ་འདིས༔ སྐལ་ལྡན་ཁྱོད་ལ་དབང་བསྐུར་བས༔ དོན་དམ་བྱང་ཆུབ་སེམས་མཆོག་གི༔ ཕུར་པས་འཁྲུལ་རྟོག་དབྱིངས་སྒྲོལ་ཤོག༔ རྩ་སྔགས་ཤམ་བུར༔ ཀཱི་ལི་ཀཱི་ལ་ཡ་ཨ་བྷི་ཥིཉྩ་ཧཱུྃ༔ བསྒྲལ་ཡུལ་ལིང་གར་དགྲ་བགེགས་འགུགས༔ ཕྱག་རྒྱས་རྒྱས་བཏབ་ཕུར་བུ་ནི༔ སྲས་མཆོག་རྡོ་རྗེ་གཞོན་ནུར་བསྐྱེད༔ སྙིང་གར་བཏབ་ནས་རྣམ་ཤེས་སྤར༔ དོན་དམ་ལྟ་བའི་ངང་མདངས་བསྐྱེད༔ རྗེས་འབྲེལ་གདན་དང་ཕྱག་མཚན་སོགས༔ བརྡ་རྟགས་ངོ་སྤྲོད་འདི་བཞིན་བྱ༔ ཧཱུྃ་ཧཱུྃ༔ གསང་བདག་རྡོ་རྗེ་གཏུམ་པོ་ཡིས༔ ཞབས་འོག་ལྷ་བརྒྱད་ཀླུ་བརྒྱད་པོ༔ རྣམ་ཤེས་ཚོགས་བརྒྱད་ཡུལ་བརྒྱད་རྣམས༔ གནས་དག་བརྡའ་སྟོན་དབང་འབྱོར་ཤོག༔ རྩ་སྔགས་ཤམ་བུར༔ དྷེ་ཝ་ནཱ་ག་ཙཀྲ་ཝརྟི་ཨ་བྷི་ཥིཉྩ་ཧཱུྃ༔ ཁྲོ་བོའི་ཆས་རྣམས་འདི་བཞིན་གཏད༔ ཧཱུྃ་ཧཱུྃ༔ གླང་ཆེན་ཀོ་རློན་གཏི་མུག་འཇོམས༔ མི་ལྤགས་འདོད་ཆགས་དབྱིངས་སུ་གྲོལ༔ སྟག་ལྤགས་ང་རྒྱལ་རང་སར་དག༔ བགོ་བའི་གོས་གསུམ་དབང་བསྐུར་རོ༔ རྩ་སྔགས་ཤམ་བུར༔ ཧསྟི་ན་ར་བྱ་གྷྲི་ཨ་བྷི་ཥིཉྩ་ཧཱུྃ༔ ཧཱུྃ༔ སྦྲུལ་ཆུན་ཞེ་སྡང་ཟིལ་གྱིས་གནོན༔ འདུ་བྱེད་གནས་དག་ཐོད་རློན་འཕྱང་༔ ཐོད་སྐམ་ཕུང་ལྔའི་བདུད་འཇོམས་པའི༔ དབང་འདིས་བདུད་སྲིན་མཐར་བྱེད་དོ༔ རྩ་སྔགས་ཤམ་བུར༔ ཨ་ལངྒ་ར་ཨ་བྷི་ཥིཉྩ་ཧཱུྃ༔ གཞན་ཡང་དཔལ་ཆས་མ་ལུས་བྱིན༔ ས་མ་ཡཱ༔ དབང་ཆོག་ཟབ་པའི་ཡང་བཅུད་འདིའི༔ རྗེས་ནི་གཞན་དང་མཐུན་པར་བྱ༔ དགའ་སྟོན་ཚོགས་ཀྱི་འཁོར་ལོ་བསྐོར༔ ལོག་སྨོན་བར་ཆད་རྐྱེན་གྲོལ་ངེས༔ ཤིན་ཏུ་ཟབ་པའི་མཐར་ཐུག་སྟེ༔ མཚོ་རྒྱལ་སྙིང་གི་སྒྲོམ་དུ་སྦོས༔ དུས་བབས་ཁྱེད་ཀྱི་སྤྲུལ་བ་ཞིག༔ ཤར་ཕྱོགས་ཙི་ནའི་ཡུལ་ཉེ་བའི༔ རྩུབ་འགྱུར་གདུག་པའི་ཡུལ་གྱི་མཚམས༔ མེ་ཁམས་སྐྱེ་མཆེད་དྭངས་པ་འབྱུང་༔ ཐོག་བབས་སྔོན་གྱི་ལས་འཕྲོ་སད༔ ཉམས་སྣང་པདྨ་ང་ཉིད་དང་༔ རྒྱལ་ཡུམ་དཔའ་མོར་ཡང་ཡང་མཇལ༔ བར་ཆད་འཚེ་བ་གསུམ་འབྱུང་བའི༔ ངན་གྲིབ་ནད་རྐྱེན་སངས་པ་ན༔ འཕགས་པའི་སྤྲུལ་བས་བསྐུལ་མ་མཛད༔ དེ་ཚེ་ཐོགས་མེད་ཚིག་རིས་རྣམས༔ སྤར་ལ་ཐེབས་བཞིན་བློ་ངོ་རུ༔ ཤར་བ་རྟོག་གེའི་སྤྱོད་ཡུལ་མིན༔ ལེགས་ཚོགས་རྟེན་འབྲེལ་མ་ཉམས་ན༔ འགྲོ་དོན་ཕ་མཐའ་ཡས་པར་འགྱུར༔ ས་མ་ཡཱ༔ རྒྱ་རྒྱ་རྒྱ༔ གུ་ཧྱ༔ ཞེས་པའང་ཆོས་ཀྱི་བདག་པོ་འཕགས་པ་སྤྱན་རས་གཟིགས་དང་ཡང་དག་གྲུབ་པ་ཐུགས་མཆོག་ནམ་མཁའི་སྙིང་པོའི་སྤྲུལ་པའི་འོད་ཟེར་ལས་བྱུང་བའི་སྐྱབས་རྗེ་འཁོར་ལོའི་མགོན་པོ་རིག་འཛིན་བཟང་པོའི་བཀའ་ཕེབས་གསེར་གྱི་ཅོད་པཎ་སྤྱི་བོས་མཆོད་དེ་སྐྱབས་འོག་ཏུ་འཁོད་པ་ཤཱཀྱའི་དགེ་སྦྱོང་རིག་པ་འཛིན་པ་ལུང་རིག་གླིང་པས་མཁས་པ་དང་གྲུབ་པའི་སྐྱེས་བུས་ཡོངས་སུ་གང་བའི་ཆོས་གྲྭ་ཆེན་པོ་འོག་མིན་བཤད་སྒྲུབ་རྟག་བརྟན་གླིང་དུ་སྤེལ་བ་ཛ་ཡནྟུ།