རྡོ་རྗེ་ཕུར་པའི་རྒྱུད་གནམ་ལྕགས་འབར་བའི་སྤུ་གྲི།
༄༅། ཤུདྡྷལོཀསྶརསྫཡཱམནསྱགུཧྱཀོཥེབྷྱཿ བཛྲཀཱིལཡཏནྟྲམཱརབམུདྷཏུབིམཐནཀཱརཎཱཤནཱིཛྭལཤཀྟིནཱམབིཧརཏིསྨ།།
ཤུདྡྷལོཀསྶརསྫཡཱམནསྱགུཧྱཀོཥེབྷྱཿ བཛྲཀཱིལཡཏནྟྲམཱརབམུདྷཏུབིམཐནཀཱརཎཱཤནཱིཛྭལཤཀྟིནཱམབིཧརཏིསྨ།།
དག་སྣང་མཚོ་རྒྱལ་དགོངས་པའི་གསང་མཛོད་ལས༔ རྡོ་རྗེ་ཕུར་པའི་རྒྱུད་བདུད་སྡེ་དབྱིངས་སུ་འཇོམས་བྱེད་གནམ་ལྕགས་འབར་བའི་སྤུ་གྲི་ཞེས་བྱ་བ་བཞུགས༔
རྒྱ་གར་སྐད་དུ༔ ཤྲཱི་བཛྲ་ཀྲོ་ཏ་མ་ཧཱ་ཀཱི་ལི་ཀཱི་ལ་ཡ་ཏནྟྲ་མཱ་ར་ཡ་ཏ་ན་ཤཀྟི་ན་མ༔ བོད་སྐད་དུ༔ དཔལ་རྡོ་རྗེ་ཁྲོ་བོ་ཆེན་པོ་ཕུར་པའི་རྒྱུད་བདུད་སྡེ་དབྱིངས་སུ་འཇོམས་བྱེད་གནམ་ལྕགས་འབར་བའི་སྤུ་གྲི་ཞེས་བྱ་བ༔ བཅོམ་ལྡན་འདས་འཁོར་འདས་ཐམས་ཅད་ཀྱི་སྤྱི་དཔལ་ཆེན་པོ་རྡོ་རྗེ་གཞོན་ནུ་ལ་ཕྱག་འཚལ་ལོ༔ འདི་སྐད་བདག་གིས་ཐོས་པའི་དུས་ཆེན་པོ་འཁོར་བ་དང་མྱ་ངན་ལས་འདས་པའི་རང་བཞིན་དུ་གྲུབ་པ་མེད་པ་ན༔ སྟོན་པ་ཀུན་ཏུ་བཟང་པོ་སྲིད་པ་དང་ཞི་བའི་དབྱིངས་ཀུན་ལ་མཉམ་པར་བརྡལ་བའི་རང་ཤེས་རིག་པའི་རྒྱལ་པོ་ཆེན་པོ་ཉིད་སྐུ་འགྱུར་བ་མེད་པ་དང༔ གསུང་འགགས་པ་མེད་པ༔ ཐུགས་འཁྲུལ་བ་མེད་པའི་ངང་ལས་གཡོས་པ་མེད་བཞིན་དུ་གདུལ་བྱ་མ་རུང་བ་བདུད་དང་རུ་ཏྲ་དམ་སྲི་མཐའ་དག་འཇོམས་པའི་ཕྱིར་དུ་སྐུ་འབར་བ་ཆེན་པོ་སྒེག་པ་དང༔ དཔའ་བ་དང་༔ འཇིགས་སུ་རུང་བའི་གར་སྟབས་དྲག་ཤུལ་དུ་སྟོན་ཅིང་གསུང་འགགས་པ་མེད་ཀྱང་མ་དག་ལོག་པར་རྟོག་པ་མཐའ་དག་སྒྲོལ་བའི་གད་རྒྱངས་ཧ་ཧ་དང་ཧཱུྃ་ཕཊ་བྷྱོ་རྦད་བཟློག་སོད་ཀྱི་རྔམ་པའི་ང་རོ་དྲག་པོ་རྒོད་པ༔ གཤེ་བ་དང༔ དྲག་ཤུལ་གྱི་སྒྲ་ཆེན་པོ་ཀུན་ཏུ་སྒྲོག་པར་མཛད་ཅིང་ཐུགས་དམིགས་པ་མེད་པའི་སྙིང་རྗེ་ཆེན་པོ་འགྲོ་བ་མཐའ་དག་གི་དབྱིངས་སུ་ཁྱབ་པ་ལ་རྩོལ་བ་མེད་པར་གཟུགས་ཀྱི་སྐུ་མཐའ་ཡས་པ་སྤྲོ་བ་དང་སྡུད་པའི་བྱེད་པོ་དེ་ཉིད་གནས་ཕུན་སུམ་ཚོགས་པ་ཆོས་ཀྱི་དབྱིངས་སུ༔ བསྒྲལ་བའི་ཤ་ཆེན་གྱི་ས་གཞི༔ ཁྲག་ཞག་གི་རྒྱ་མཚོ༔ ཀེང་རུས་ཀྱི་རི་རབཿ བྱ་གཅན་དུར་མེ་རླུང་མཚོ་གྲུབ་ཐོབ་གནས་བདག་མཆོད་རྟེན༔ མཆོད་པའི་ལྷ་མོ་ལྷ་ཀླུ་སྲིན་པོ་སོགས་དུར་ཁྲོད་ཆེན་པོ༔ ཉན་རང་སོགས་གང་ཟག་རང་རྒྱུད་པ་རྣམས་ཀྱི་སྤྱོད་ཡུལ་ལས་འདས་པའི་ཞིང་ཁམས་དེར༔ ང་རྒྱལ་གྱི་སེང་གེ་གདུག་པའི་སྟག་དང་གཟིག་དང་དོམ་དང་སྦྲུལ་སོགས་བྱོལ་སོང་མ་རུང་བ་རྣམས་ཀྱི་སྤར་བས་བཏེགས་པའི་ཁྲི་ལ་ལྷ་བརྒྱད་དང་ཀླུ་བརྒྱད་བདུད་བཞི་བསྣོལ་བའི་ཁྲི་རྒྱ་ཚད་དང་བཀོད་པ་བསམ་གྱིས་མི་ཁྱབ་པའི་གདན་ལ་དཔལ་ཆེན་པོ་རྡོ་རྗེ་གཞོན་ནུ༔ ཡུམ་སྲིད་པའི་འཁོར་ལོ་ཆོས་ཀྱི་དབྱིངས་སུ་རྒྱས་འདེབས་པར་མཛད་མ་དང་མཉམ་པར་སྦྱོར་ཞིང་ཆོས་དབྱིངས་ཁྱབ་བརྡལ་ཆེན་པོའི་ཀློང་དུ་མི་དམིགས་པའི་ཏིང་ངེ་འཛིན་ལ་སྙོམས་པར་ཞུགས་སོ༔ དེ་ཡི་རང་རྩལ་ལས་བྷུདྡྷ་རིགས་ཀྱི་ཁྲོ་བོ་དང་ཁྲོ་མོ་དང་རྡོ་རྗེ་དང་རིན་ཆེན་པདྨ་ལས་རབ་རྣམས་ཀྱི་ཁྲོ་བོ་དང་ཁྲོ་མོའི་ཚོགས་དང་དུས་གསུམ་གྱི་སྟོན་པ་ས་ཆེན་པོ་ལ་གནས་པའི་སེམས་དཔའ་སེམས་མའི་ཚོགས་བསམ་གྱིས་མི་ཁྱབ་པའི་ཚོགས་སྟོན་འཁོར་གྱི་རྣམ་པར་བཞུགས་སོ༔ ཨེ་ཝཾ་མ་ཡ༔ རྡོ་རྗེ་ཕུར་པའི་རྒྱུད་གནམ་ལྕགས་སྤུ་གྲི་ལས༔ གླེང་བསླང་བའི་ལེའུ་སྟེ་དང་པོའོ༔ དེ་ནས་ཡང་དག་བཤད་བྱ་བ༔ ཡུམ་ཆེན་འཁོར་ལོ་རྒྱས་འདེབས་མས༔ དཔལ་ཆེན་ཡབ་ཀྱི་སྐུ་ལ་འཁྲིལ༔ དབྱིངས་རིག་གཉིས་མེད་རྡོ་རྗེའི་གླུས༔ རྒྱུད་ཀྱི་དོན་ལ་འདི་ལྟར་བསྐུལ༔ རྡོ་རྗེའི་གླུ་ཡི་རང་སྒྲ་ལས༔ ཨེ་མ་ཧོ༔ ཨ་ལ་ལ་ཧོ༔ ཆོས་རྣམས་དབྱིངས་ལས་མ་གཡོས་པས༔ རིག་དང་མ་རིག་གཉིས་སུ་མེད༔ གཉིས་མེད་རྩལ་ལས་གཉིས་སུ་སྣང༔ འཁྲུལ་བ་མེད་ཀྱང་འཁྲུལ་བར་སྣངཿ དེ་དག་རང་སར་གྲོལ་བྱེད་པའི༔ ལམ་གྱི་རྒྱུད་ཆེན་གསུང་དུ་གསོལ༔ དེ་སྐད་ཆོས་ཉིད་རྡོ་རྗེའི་གླུས༔ ཏིང་ངེ་འཛིན་ལས་བཞེངས་པར་གསོལ༔ དེ་ནས་དཔལ་ཆེན་ཧེ་རུ་ཀས༔ རང་བྱུང་རྡོ་རྗེའི་སྒྲ་གདངས་ལས༔ རང་ཤར་ཆེན་པོའི་ལན་གསུངས་པ༔ ཨེ་མ་ཧོ༔ ཆོས་རྣམས་མི་དམིགས་སྤྲོས་དང་བྲལ༔ ནམ་མཁའ་ལྟ་བུའི་ངང་ཉིད་ལས༔ མཐའ་དང་དབུས་མེད་ངོ་བོ་སྟོང༔ སྨྲ་བསམ་བརྗོད་མེད་དེ་བཞིན་ཉིད༔ རྒྱུད་གསུམ་དབྱེར་མེད་དེ་བཞིན་ནོ༔ ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭཱ་བྷ་ཝ་ཨཏྨ་ཀོ྅ཧཾ༔ ཅེས་པས་ཆོས་དབྱིངས་ཕུར་བ་ནི༔ སྨྲ་རུ་མི་བསམ་བརྗོད་དུ་མེད༔ གང་དུའང་གནས་པ་མེད་པར་བསྟན༔ དེ་སྐད་གསུངས་ནས་ལན་གདབ་པའོ༔ སླར་ཡང་ཡུམ་ཆེན་དཔལ་འབར་མའི༔ ཐུགས་ལས་འོད་ཟེར་མཁའ་ཁྱབ་སྤྲོས༔ རྒྱལ་བ་མཆོད་ཅིང་དངོས་གྲུབ་དབྱིག༔ གསང་བའི་པདྨོར་བསྡུས་ནས་སླརཿ ཡབ་ཡུམ་སྦྱོར་བའི་མཁའ་གསང་ནས༔ བདེ་བ་ཆེན་པོའི་སྒྲ་དང་བཅས༔ སླར་ཡང་གུས་པས་གསོལ་བ་ནི༔ ཨེ་མ་ཧོ༔ རྒྱུད་གསུམ་རང་བཞིན་བརྗོད་མེད་པ༔ དེ་བཞིན་ཉིད་ཀྱི་ཏིང་ངེ་འཛིན༔ ཆོས་ཀྱི་དབྱིངས་ཀྱི་ཕུར་བའི་རྒྱུད༔ གཞི་རུ་བསྟན་པ་ངོ་མཚར་ཡང༔ མ་རིག་མ་རྟོག་ལོག་པར་རྟོག༔ ཕྱོགས་རྟོག་མཐའ་དག་འདུལ་བའི་ཕྱིར༔ ལམ་གྱི་རྒྱུད་ཆེན་གསུང་བར་ཞུ༔ དེ་སྐད་ཞུས་པ་གསན་ནས་ཀྱང༔ རྡོ་རྗེ་གཞོན་ནུས་བཀའ་སྩལ་པ༔ དེ་བཞིན་ཉིད་ནི་སྤྲོས་མེད་ཀྱང༔ རང་བཞིན་ཀུན་ཏུ་འོད་གསལ་གདངས༔ དམིགས་པ་མེད་པའི་སྙིང་རྗེའི་རྩལ༔ འགྲོ་བ་མ་རྟོག་ལོག་རྟོག་དང༔ ཕྱོགས་རྟོག་སེམས་ཅན་དབྱིངས་སྒྲོལ་བའི༔ རྡོ་རྗེ་ཁྲོས་པས་ཞེ་སྡང་གཅོད༔ མཚོན་ཆ་སྔོན་པོ་འབར་བ་ཡི༔ ནམ་མཁའི་དཀྱིལ་ནས་ཐིག་པ་ཤར༔ སྲོག་གི་གོ་རུ་ཤར་བ་དང༔ སྙིང་གི་དཀྱིལ་དུ་ས་མ་དྷི༔ དེ་སྐད་གསུངས་བས་ལན་གདབ་པ༔ ཚད་མེད་སྙིང་རྗེའི་ཕུར་བའོ༔ རྡོ་རྗེ་ཕུར་བའི་རྒྱུད་སྤུ་གྲི་འབར་བ་ལས༔ རྒྱུད་ཀྱི་སྤྱི་ཆིངས་ཆེན་པོ་གཉིས་ཞུས་ཤིང་གསུངས་པའི་ལེའུ་སྟེ་གཉིས་པའོ༔ དེ་ནས་དཔལ་ཆེན་ཧེ་རུ་ཀ༔ སྐུ་ཡི་གནས་བཅུའི་འོད་ཟེར་གྱིས༔ རྒྱལ་བའི་དཀྱིལ་འཁོར་རབ་འབྱམས་ཀུན༔ ཁྲོ་བོ་བཅུ་སོགས་དཀྱིལ་འཁོར་ལྷ༔ སྤྲོས་ཤིང་ཀུན་ཏུ་སྣང་བར་བྱས༔ ཐུགས་ལས་སྤྲུལ་པའི་གསང་བདག་གིས༔ རྣལ་འབྱོར་ལུགས་སུ་ཕྱག་བྱས་ཏེཿ རྒྱུད་ཀྱི་སྒྲུབ་པ་འདི་ལྟར་ཞུས༔ ཀྱཻ་བཅོམ་ལྡན་གསང་བའི་རྒྱལ་པོ་སོགས༔ རྡོ་རྗེ་ཁྲོས་པ་དགོངས་མཛོད་ཅིག༔ གང་ཟག་དབང་པོའི་རིམ་པ་ལྟར༔ ཕུར་བ་སྒྲུབ་པའི་རྣལ་འབྱོར་བས༔ དང་པོའི་འཇུག་སྒོ་ཇི་ལྟར་ལགས༔ བར་དུ་ཉམས་སུ་ཇི་ལྟ་བུ༔ ཐ་མ་གྲུབ་འབྲས་ཇི་ལྟ་བུ༔ མ་གྲུབ་སྐྱོན་དང་འགྲུབ་པ་ཡི༔ གནས་སྐབས་ཡོན་ཏན་ཇི་ལྟ་བུ༔ དཔའ་བོ་མཆོག་གིས་བཀའ་སྩོལ་ཅིག༔ རྡོ་རྗེ་གཞོན་ནུས་བཀའ་སྩལ་པ༔ ལེགས་སོ་དཔལ་ལྡན་རྡོ་རྗེ་འཛིན༔ རྒྱུད་ཀྱི་རྒྱལ་པོ་བསམ་ཡས་ཀྱི༔ སྤྱི་ཆིངས་རྣམ་པ་བཅུ་རུ་བསྟན༔ དང་པོ་འཇུག་སྒོ་དབང་གིས་ཕྱེ༔ བར་དུ་ཉམས་ལེན་བསྐྱེད་རྫོགས་ལ༔ ཐ་མ་གྲུབ་འབྲས་མངོན་འཚང་རྒྱ༔ མ་གྲུབ་སྐྱོན་གྱིས་འཁོར་བར་འཁྱམས༔ ལས་དང་ཉོན་མོངས་སྡུག་བསྔལ་སྤྱོད༔ གནས་སྐབས་གྲུབ་པའི་ཡོན་ཏན་བརྒྱད༔ རྡོ་རྗེ་ཕུར་བའི་རྒྱུད་སྤུ་གྲི་འབར་བ་ལས༔ སྒྲུབ་ཐབས་ཀྱི་སྤྱི་ཆིངས་ཞུས་པའི་ལེའུ་སྟེ་གསུམ་པའོ༔ དེ་ནས་སླར་ཡང་འདི་སྐད་གསུངས༔ འཇུག་སྒོའི་དབང་ལ་རྣམ་པ་བཞི༔ བུམ་པ་གསང་བ་ཤེས་རབ་ཚིག༔ སྒྲོལ་བའི་ལས་ཀྱི་མཐའ་རྟེན་བཅས༔ དང་པོ་རྫས་དང་ཡོ་བྱད་བསགས༔ གཉིས་པ་སློབ་མའི་འཇུག་སྒོ་བསྒྲིགས༔ གསུམ་པ་ལས་གཞུང་བསྙེན་སྒྲུབ་བསྐྱལ༔ བཞི་པ་དབང་བླང་སློབ་མར་བསྐུར༔ ལྔ་པ་ཡོན་འབུལ་དགའ་སྟོན་བྱ༔ དྲུག་པ་དམ་བཅའ་སྙིང་ལ་གདབ༔ ཅེས་གསུངས་སླར་ཡང་གསང་བདག་གིས༔ ཁྲོ་བོའི་རྒྱལ་ལ་ཡང་གསོལ་བཿ བར་དུ་བསྙེན་སྒྲུབ་བསྐྱེད་རྫོགས་གང༔ རིམ་པ་ཚུལ་བཞིན་གསུང་དུ་གསོལ༔ དེ་ནས་དཔལ་ཆེན་ཧེ་རུ་ཀས༔ འདི་སྒྲུབ་གང་ཟག་དབང་པོ་ལྟར༔ དང་པོ་དཀྱིལ་འཁོར་རྡུལ་ཚོན་རས༔ ཚོམ་བུ་ལ་བརྟེན་རྫས་ཕུར་ནི༔ ཤིང་ལྕགས་རིན་ཆེན་རིགས་རྣམས་ལ༔ སོར་མོ་བཅུ་དྲུག་ཡང་ན་བརྒྱད༔ ཞལ་ཕྱག་ལྡན་པའི་ལྷ་གྲངས་སམ༔ ཡང་ན་གཙོ་ཕུར་ཙམ་ལ་བརྟེན༔ སྐུ་དང་སྒྲུབ་སྔགས་ཤེལ་མེ་ལོང༔ དཔལ་གཏོར་ལྷ་གྲངས་སྨན་རཀ་དང༔ མཆོད་པ་ཕྱི་ནང་གསང་བ་དང༔ ཚོགས་ཀྱི་ཡོ་བྱད་རྒྱན་རྣམས་བཀྲམ༔ སྐྱབས་སུ་འགྲོ་ཞིང་སེམས་ཡང་བསྐྱེད༔ ཚོགས་བསགས་ལྷ་ཀླུ་གཞི་བགེགས་ལ༔ གཏོར་མ་བསྔོ་ཞིང་བགེགས་རྣམས་བསྐྲད༔ བསྲུང་འཁོར་བསྒོམ་ཞིང་ཁྲོ་བོ་བཅུས༔ ཕྱོགས་བཅུའི་གདོན་རྣམས་བསྲུང་བྱ་ཞིང༔ བྱིན་རླབས་དབབ་བཟུང་བརྡ་སྒོ་དབྱེ༔ སྟོང་ཉིད་དབྱིངས་ཀྱི་ཕུར་པ་ལས༔ ཚད་མེད་སྙིང་རྗེའི་ཕུར་པ་དང༔ ཟུང་འཇུག་རང་སེམས་གནམ་ལྕགས་ཀྱི༔ རྡོ་རྗེ་ཧཱུྃ་སྔོན་ལས་འཕྲོས་པས༔ འབྱུང་ལྔའི་དབྱིངས་ལས་རི་རབ་སྟེང༔ དུར་ཁྲོད་གཞལ་ཡས་རྩིབས་བཞི་བཅུ༔ སྒོ་བཞི་ཁྱམས་དང་མུ་རན་ལ༔ གཙོ་འཁོར་ཡོངས་རྫོགས་བསྐྱེད་པའམ༔ ཡང་ན་ལུས་དཀྱིལ་གནས་སུ་བསྒོམ༔ སྤྱན་འདྲེན་སྔགས་ཀྱི་ཚིག་འདི་བརྗོད༔ ཨོཾ་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོ༔ ཅེས་བརྗོད་བཞུགས་གསོལ་ཕྱི་ནང་གསང༔ མཆོད་པ་འབུལ་ཞིང་བསྟོད་འཛབ་བསྐུལ༔ བསྙེན་བསྒྲུབ་ལས་སྦྱོར་གཞུང་བསྲང་ནས༔ ལྷ་དང་རང་དང་གཞན་ཕྱི་སྣོད༔ ལྷ་སྔགས་ཏིང་འཛིན་ཕུར་བ་གདབ༔ རྡོ་རྗེ་ཕུར་བའི་རྒྱུད་སྤུ་གྲི་འབར་བ་ལས༔ ལྷ་བསྐྱེད་པའི་རིམ་པ་བསྟན་པ་སྟེ་ལེའུ་བཞི་པའོ༔ སླར་ཡང་གསང་བའི་བདག་པོ་ཡིས༔ ཁྲོ་རྒྱལ་མཆོག་ལ་ཡང་ཞུས་པ༔ སྔགས་ཀྱི་རིམ་པ་བསྟན་ཏུ་གསོལ༔ ཅེས་གསོལ་སླར་ཡང་རྡོ་རྗེའི་སྒྲས༔ སྲིད་ཞིའི་ཀློང་ནས་ཁྱབ་པའི་དབྱངས༔ སྔགས་ཀྱི་རིམ་པ་འདི་གསུངས་སོ༔ བདེ་གཤེགས་ཕྲིན་ལས་ཕུར་པ་ཡི༔ རྩ་སྔགས་ཡི་གེ་དགུ་པ་ནི༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཡིག་འབྲུ་བཅོ་ལྔ་འདི་ལྟར་རོ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཾ་བཾ་ཧཱུྃ་ཕཊ༔ རྩ་སྔགས་བསྙེན་སྒྲུབ་ཐུན་མོང་བཟུང༔ དེ་ནས་སྟེང་འོག་ཕྱོགས་མཚམས་ཀྱི༔ ཁྲོ་བོ་ཡབ་ཡུམ་སྲས་བཞི་དང༔ ཕྱག་བརྙན་རྣམས་ཀྱིས་ཕྱག་བྱས་ཏེ༔ གསང་བའི་བདག་པོ་ཆེན་པོ་ལ༔ མ་འོངས་སེམས་ཅན་དོན་སླད་དུ༔ ངེད་ཅག་རྣམས་ཀྱི་སྔགས་སྟོན་ཅེས༔ དཔལ་ཆེན་ཉིད་ལ་གསོལ་བར་བསྐུལ༔ གསང་བདག་གིས་ཞུས་ཁྲོ་རྒྱལ་གྱིས༔ སྔགས་རིམ་འདི་དག་བཀའ་རྩལ་ཏེ༔ ཧཱུྃ་ཀཱ་ར་བི་ཛ་ཡ་ནི་ལ་ཏནྟྲ་ཡ་མནྟ་ཀ་ཨཱརྱ་ཨ་ཙ་ལ་ཧྱ་གྷྲྀ་ཝ་ཨ་པ་ར་ཛི་ཏ་ཨ་མྲྀ་ཏ་ཀུཎྚ་ལི་ཏྲཻ་ལོ་ཀྱ་བི་ཛ་ཡ་མ་ཧཱ་བ་ལ༔ ཀུན་ལ་ཨོཾ་དང་ཧཱུྃ་བཞག་ཏེ༔ བཛྲ་ཀྲོ་ཏ་ཅེས་བརྗོད་ཅིང༔ ཕྲ་ཐབས་རྣམས་ལ་རང་རང་གི༔ ཁྲོ་རྒྱལ་ཡབ་ཡུམ་སྔགས་ཀྱི་མཐར༔ གརྫ་ཧ་ན་ད་ཧ་དང༔ པ་ཙ་བྷནྡྷ་ཧུ་ལུ་དང༔ ཏིཥྛ་ཚིནྡྷ་བྷིནྡྷ་ཧཱུྃ༔ སྥོ་ཊ་ཞེས་ཧཱུྃ་ཕཊ་གདགས༔ བཛྲ་རཏྣ་པདྨ་དང༔ ཀརྨ་ཀཱི་ལ་ཡ་བརྗོད་སྲས༔ སྒོ་མ་རང་གི་སྲོག་ཡིག་ནི༔ ཛཿཧཱུྃ་བཾ་ཧོ་དེ་བཞིན་དུ༔ གཞུང་སྙིང་གཅིག་དྲིལ་འདི་ཉིད་དོ༔ ཀ་ཏཾ་ཀ་ཡེ་ཛ་ཡེ་བི་ཛ་ཡེ༔ ཨ་ཙི་ཏེ་ཨ་པ་ར་ཙི་ཏེ་མ་ར་ས་ན་པྲ་མརྡྷ་ན་ཡ་ཧཱུྃ་ཕཊ༔ ཧཱུྃ་བྷྱོ༔རྦད་བཟློག་མཱ་ར་ཡ་ཕཊ༔ ཅེས་གསུངས་སོ༔ རྡོ་རྗེ་ཕུར་བའི་རྒྱུད་སྤུ་གྲི་འབར་བ་ལས༔ བསྙེན་སྒྲུབ་ལས་སྦྱོར་ཞུས་ཤིང་གསུངས་པའི་ལེའུ་སྟེ་ལྔ་པའོ༔ དེ་ནས་གསང་བའི་བདག་པོ་ཡིས༔ རྡོ་རྗེ་གཞོན་ནུར་ཡང་གསོལ་བ༔ བསྙེན་སྒྲུབ་རྩོམ་པའི་གང་ཟག་གིས༔ ལྟ་སྒོམ་སྤྱོད་ཚུལ་ཇི་ལྟར་བྱ༔ ཁྱད་པར་དཔལ་ཆེན་ཕྲིན་ལས་ཀྱི༔ གནས་དུས་ཡོ་བྱད་བསྙེན་པའི་གྲངས༔ ཇི་ལྟར་ཉམས་སུ་ལེན་པའི་ཚུལ༔ སྤྱི་དཔལ་ཆེན་པོས་བཀའ་སྩོལ་ཅིག༔ དེ་སྐད་གསོལ་བ་གསན་ནས་ཀྱང༔ དཔལ་ཆེན་གཞོན་ནུས་བཀའ་བསྩལ་པ༔ ལྟ་བ་མིག་ལ་བསྒོམ་པ་སྙིང༔ སྤྱོད་པ་ལུས་ཀྱི་ཚུལ་ལ་ལྟོས༔ འཁོར་འདས་མཉམ་ཉིད་བདེན་པ་གཉིས༔ དབྱེར་མེད་དབྱིངས་ནས་སངས་རྒྱས་པ༔ འདི་ནི་ལྟ་བ་རྫོགས་ཆེན་ཏེ༔ ཆོས་ཀྱི་དབྱིངས་ཀྱི་ཕུར་པ་འོ༔ དེ་ལྟར་མ་རྟོག་ལོག་རྟོག་དང༔ ཕྱོགས་རྟོག་སེམས་ཅན་ཚད་མེད་ཀྱི༔ སྙིང་རྗེས་ཀུན་བསླངས་ཡི་དམ་ལྷའི༔ གསང་གསུམ་དབྱེར་མེད་ཏིང་འཛིན་ངང༔ ཁྲོས་པའི་བརྟུལ་ཞུགས་ཀྱིས་སྒྲོལ་བ༔ ཡེངས་མེད་འཛིན་མེད་བསྒོམ་པའི་འཕྲང༔ ཚད་མེད་སྙིང་རྗེའི་ཕུར་བའོ༔ བུམ་གསང་ཤེས་རབ་ཚིག་དབང་གིས༔ དམ་ཚིག་ལྷར་བསྒོམ་བཟླས་བརྗོད་བརྩོན༔ དམིགས་བཅས་དམིགས་མེད་རྫོགས་རིམ་གྱི༔ རྩ་བ་སྔགས་ཀྱི་ཕུར་པའོ༔ ཕྲིན་ལས་དབང་བསྐུར་ཞུ་བའི་ཡུལ༔ བླ་མ་ལྟ་སྒོམ་སྤྱོད་པ་དག༔ དྲག་ཤུལ་སྒྲོལ་བའི་ལས་ལ་མཁས༔ སློབ་མ་དད་བརྩོན་ཤེས་རབ་ཆེ༔ བསྟན་འགྲོའི་དོན་ལ་སྲོག་གཏོང་ནུས༔ རང་འདོད་སྤངས་པའི་སྒྲོལ་ལས་བརྩོན༔ སྒྲུབ་དུས་གནས་ནི་རིག་འཛིན་དང༔ གྲུབ་ཐོབ་ཞབས་བཅག་དུར་ཁྲོད་དམ༔ ལུང་སྟོང་དབེན་གནས་དགྲ་འདྲེ་རྣམས༔ ཤིན་ཏུ་རྒོད་ཅིང་རྩུབས་པའི་སར༔ མཚན་མ་རྫས་ཀྱི་ཕུར་པ་ནི༔ བྱུག་བདུག་བྲབ་པས་བགེགས་བསྐྲད་དེ༔ ལྷ་བསྒོམ་སྨྲ་བཅད་བསྙེན་པའི་གྲངས༔ འབྲུ་འབུམ་ལྔ་བདུན་དགུ་སོགས་འབད༔ ཟླ་དྲུག་རྟགས་མཐོང་གནད་དུ་བསྣུན༔ ཏིང་འཛིན་མ་ཡེངས་གནད་དུ་ཆེ༔ གལ་ཏེ་ཡེངས་ན་བསྐལ་པ་རུ༔ བཟླས་ཀྱང་འབྲས་བུ་ཆེར་མི་འབྱིན༔ དེ་ཕྱིར་རབ་ཏུ་བསྒྲིམ་པར་བྱ༔ རྡོ་རྗེ་ཕུར་བའི་རྒྱུད་གནམ་ལྕགས་སྤུ་གྲི་ལས༔ ལྟ་སྤྱོད་བཟླས་པའི་ཞུས་ལན་ཏེ་ལེའུ་དྲུག་པའོ༔ དེ་ནས་ལག་ན་རྡོ་རྗེ་ཡིས༔ རྡོ་རྗེ་འཆང་ལ་ཡང་ཞུས་པ༔ ཨེ་མ་དཔལ་ཆེན་ཧེ་རུ་ཀ༔ དེ་ལྟར་བསྐྱེད་པའི་རིམ་པ་རྣམས༔ སྤྲོས་ཅན་སེམས་ཅན་ལ་གསུངས་ཀྱང༔ སྤྲོས་མེད་རྫོགས་རིམ་ཇི་ལྟར་བསྒོམ༔ དེ་ནས་འཁོར་ལོ་རྒྱས་འདེབས་མས༔ ཤེས་རབ་ལ་བརྟེན་རྫོགས་རིམ་དང༔ ཆགས་བྲལ་རྫོགས་རིམ་གསུང་དུ་གསོལ༔ ཞེས་ཞུས་ཡབ་ཡུམ་གཉིས་ཀ་དང༔ སྲིད་ཞི་དབྱིངས་སུ་མཉམ་སྦྱོར་ནས༔ ཆེན་པོ་དགྱེས་པའི་ཚུལ་བཞིན་དུ༔ རྡོ་རྗེ་གླུ་ཡིས་བཀའ་སྩལ་པ༔ ཨེ་མ་ཧོ༔ངོ་མཚར་ཨ་ལ་ལ༔ རྣལ་འབྱོར་ཆགས་པ་ལམ་སློང་བྱ༔ མཚན་ལྡན་རིག་མ་བརྟགས་འགུག་སྨིན༔ དབབ་བཟུང་བཟློག་དགྲམ་དགའ་བ་བཞིས༔ ཡེ་ཤེས་རང་སེམས་དབྱེར་མེད་བསྲེས༔ བླ་མའི་ཐུགས་དང་རང་སེམས་དང༔ གཟུངས་མའི་ཆགས་སེམས་སྟོང་པའི་ངང༔ ཉམས་སུ་ལེན་པ་གལ་ཆེའོ༔ ཆགས་བྲལ་གང་ཟག་བྱ་བ་བཏང༔ དབེན་པར་དྲང་སྲོང་ཆོས་བདུན་ལུས༔ འོག་རླུང་བསྡམས་ཤིང་རླུང་རོ་བསལ༔ སྟེང་རླུང་ཅུང་ཟད་མནན་བྱས་ནས༔ གང་ཤར་རྟོག་པ་གཞན་མི་བསླད༔ རང་བབ་ཐོག་ཏུ་ཁྲིག་གེར་བཞག༔ སེམས་དང་ཡིད་དང་ཀུན་གཞི་ལས༔ འདས་པའི་སྟོང་གསལ་རིག་པའི་གདངས༔ རང་རྩལ་དྲན་པ་བཅོས་མེད་པ༔ ཀ་དག་ལྟ་བས་ཐེ་ཚོམ་བསལ༔ ཡིད་དཔྱོད་བློ་འདས་གནད་དུ་ཆེ༔ ཁྱད་པར་ཚེ་འདིར་འོད་སྐུ་རུ༔ གྲོལ་བའི་གནད་ཟབ་ཐོད་རྒལ་ནི༔ བཞུགས་སྟངས་གསུམ་དང་གཟིགས་སྟངས་གསུམ༔ མི་འགུལ་གསུམ་གྱི་ནང་དབྱིངས་ལས༔ རྒྱངས་ཞགས་ཐག་པས་དབྱིངས་སྒྲོན་རྒྱན༔ ཉི་ཟླ་མར་མེ་འབེན་ལ་མདའ༔ ལུག་རྒྱུད་ཨར་གཏད་རིམ་བཞིན་དུ༔ ཐིག་ལེ་ཆུང་ཆེ་ཕྱེད་ཚང་འཁོར༔ ཞི་ཁྲོའི་ལྷ་ཤར་རྩིབས་ཤར་དང༔ གྱེན་འགྲེང་འཁར་གཞོང་རེ་ལྡེ་ཙམ༔ ཚོན་སྣ་ལྔ་ཡིས་ཡུལ་ཁམས་འགེང༔ ལུས་ངག་ཡིད་གསུམ་སྡོད་པ་གསུམ༔ ལྷུན་གྱིས་གྲུབ་པའི་རིག་འཛིན་ཞེས༔ བར་དོ་གསུམ་ལ་མངོན་འཚང་རྒྱ༔ དམིགས་པ་སྤྲོས་མེད་གཉིས་ཀ་ལ༔ ལས་རླུང་སྦྱོང་བའི་ཟབ་གནད་གཅེས༔ རྫོགས་རིམ་ཀུན་གྱི་བཅུད་ཐིག་གོ༔ རྡོ་རྗེ་ཕུར་བའི་རྒྱུད་གནམ་ལྕགས་སྤུ་གྲི་ལས༔ རིམ་པ་གཉིས་པའི་ལམ་ཞུས་ཤིང་ཡབ་ཡུམ་གཉིས་ཀྱིས་བསྟན་པ་སྟེ་ལེའུ་བདུན་པའོ༔ དེ་ནས་གསང་བའི་བདག་པོ་ཡིས༔ གྲུབ་པའི་འབྲས་བུ་ཇི་ལྟར་ལགས༔ ཕུར་བ་གྲུབ་པའི་གདབ་ཡུལ་གང༔ ཐེབས་པའི་རྟགས་དང་མ་ཐེབས་པའི༔ སྐྱོན་གང་གནས་སྐབས་ཡོན་ཏན་བརྒྱད༔ མདོར་བསྟན་རྒྱས་པར་དགྲོལ་དུ་གསོལ༔ ཞེས་ཞུས་དཔལ་ཆེན་དགྱེས་པ་ཡིས༔ ལེགས་སོ་ངས་བསྟན་དད་པས་ཉོན༔ གྲུབ་པའི་འབྲས་བུ་འཁོར་འདས་ཆོས༔ བདག་ཕུར་འབེན་གསུམ་གྲུབ་མཐའ་གཅིག༔ ཇི་བཞིན་མངོན་གྱུར་ལུས་ངག་ཡིད༔ རྡོ་རྗེ་གསུམ་དུ་ལྷུན་གྲུབ་ནས༔ དཔལ་ཆེན་ཚེ་འདིར་མངོན་གྲུབ་པོ༔ ཕུར་པའི་གདབ་ཡུལ་དགྲ་བགེགས་ཏེ༔ ལྟ་བ་ཆོས་དབྱིངས་ཕུར་པ་ནི༔ བདག་རྟོག་རུ་ཏྲའི་སྙིང་ལ་གདབ༔ ཐེབས་རྟགས་བདག་མེད་ཀློང་དུ་གྲོལ༔ འཁོར་བའི་གྲོང་ལ་སླར་མི་ལྡོག༔ མ་ཐེབས་རྟག་ཆད་གཡང་སར་ལྷུང༔ སྒོམ་པ་སྙིང་རྗེའི་ཕུར་པ་ནི༔ འགྲོ་དྲུག་སེམས་ཅན་ཡོངས་ལ་གདབ༔ ཐེབས་རྟགས་རིགས་དྲུག་གཡང་སར་འདོན༔ མ་ཐེབས་དུག་ལྔས་རང་གནས་འཁྱམས༔ སྤྱོད་པ་བྱང་ཆུབ་སེམས་ཕུར་བ༔ རང་འདོད་ངོས་འཛིན་ཞེན་པར་གདབ༔ ཐེབས་རྟགས་རང་བས་གཞན་གཅེས་པས༔ རྒྱལ་བའི་སྲས་ཀྱི་ཐུ་བོར་འགྱུར༔ མ་ཐེབས་ཐེག་དམན་གོལ་སར་ལྟུང༔ མཚན་མ་རྫས་ཀྱི་ཕུར་བ་ནི༔ ཐེབས་པས་གང་དམིགས་རྨིང་མེད་བརླག༔ མ་ཐེབས་དགྲ་འདྲེ་ཡན་པར་ཤོར༔ དེ་ཕྱིར་ཕུར་ཐེབས་གནད་དུ་ཆེ༔ གནས་སྐབས་དཔལ་ཆེན་ཕུར་བ་ནི༔ ལྷ་རྣམས་ཀུན་གྱི་ཕྲིན་ལས་པ༔ ཁྱད་པར་སྒྲུབ་སྡེ་ཆེན་པོ་བརྒྱད༔ ཀུན་གྱི་བར་ཆད་སེལ་བ་ནི༔ ཚོང་པ་དཔའ་བོའི་སྐྱེལ་མ་འདྲ༔ ཀུན་གྱི་བསྲུང་མར་གཅེས་པ་ཡིན༔ ཕུར་བའི་མཁན་པོས་ཚེ་བདུད་སྒྲོལ༔ ཚེ་རིང་ཡོན་ཏན་བསམ་ལས་འདས༔ དབུལ་འདྲེ་བསལ་བས་ལོངས་སྤྱོད་ཆེ༔ ཆུང་འདྲེ་འདུལ་བས་རིགས་རྒྱུད་འཕེལ༔ མཐོ་གནོན་དགྲ་གསོད་མཐུ་ཆེར་གྲགས༔ གཞན་སྣང་བསྒྱུར་བས་འཁོར་སློབ་འཕེལ༔ ཆོས་སྲིད་སྒྲོལ་ནུས་ཆོས་རྒྱུད་རིང༔ དཀར་ཕྱོགས་ལྷ་འདུ་སྙན་གྲགས་ཆེ༔ བར་ཆད་ཀུན་སེལ་བཀྲ་ཤིས་འབྱུང༔ ནང་རྟགས་ཕྱིར་ཤར་དཔའ་ཟིལ་ལྡན༔ དེ་ཕྱིར་ཚེ་འདིར་རྡོ་རྗེ་འཆང༔ གྲུབ་པར་འདོད་པས་འདིར་འབད་བྱ༔ རྡོ་རྗེ་ཕུར་བའི་རྒྱུད་གནམ་ལྕགས་སྤུ་གྲི་ལས༔ ཇི་ལྟར་སྒྲུབ་ཚུལ་གྲུབ་པའི་སྐྱོན་ཡོན་བསྟན་པའི་ལེའུ་སྟེ་བརྒྱད་པའོ༔ དེ་ལྟར་རྡོ་རྗེ་ཆོས་མཆོག་གིས༔ དེ་ལྟར་གྲུབ་པའི་གང་ཟག་གིས༔ སྒྲོལ་བའི་ལས་སྦྱོར་ཇི་ལྟར་བགྱི༔ དཔའ་བོ་ཆེན་པོས་བཀའ་སྩོལ་ཅིག༔ ཞེས་ཞུས་སླར་ཡང་བཀའ་སྩལ་པ༔ བསྙེན་སྒྲུབ་ཐེམས་པའི་རྣལ་འབྱོར་བས༔ དུར་ཁྲོད་གནས་སུ་ཡོ་བྱད་བསགས༔ དགྲ་འདྲེ་གང་དམིགས་རཱུ་པ་ནི༔ ཧོམ་གཞུག་ལྷ་སྲུང་སྐྱེམས་ཀྱིས་བརྔན༔ གཟུ་དཔང་བསྐྱེད་འགུགས་རྟག་ཐོན་མཐར༔ ཚེ་ཁྲུས་དགོངས་པས་རྫས་ཕུར་གདབ༔ མཚོན་ཆས་བསྒྲལ་ནས་ལྷ་ལ་འབུལ༔ ཐམས་ཅད་སྟོང་པའི་མཉམ་ཉིད་བལྟ༔ སླར་ཡང་གསང་བའི་བདག་པོ་ཡིས༔ ལྟས་ངན་བྱད་ཕུར་དགྲ་འདྲེ་ཡིས༔ འཚེ་ན་བཟློག་ཐབས་བསྟན་གསོལ་བས༔ གཙོ་བོའི་བཟློག་ཐབས་འདི་ལྟར་རོ༔ རུ་ཏྲའི་གཟུགས་ཀྱི་ལྟེ་བ་ལཿ ཁྲིའུར་དཔལ་གཏོར་ལྷ་གྲངས་བཤམས༔ ལྟས་ངན་བཟློག་པའི་ཁྱུང་གཟུགས་དང༔ ཤ་ཁྲག་རྒྱུ་མ་མཚེ་ཡུངས་མཚོན༔ རུ་མཚོན་ཚོན་སྐུད་དར་གུར་བརྒྱན༔ སྒྲུབ་ཅིང་ལྷར་བསྐྱེད་བསྙེན་སྒྲུབ་བསྐྱལ༔ ཚོགས་ཀྱི་འཁོར་ལོས་ལྷ་ཚོགས་མཆོད༔ ཉམས་ཆགས་བཤགས་ཤིང་སྒྲོལ་ལས་བརྩམས༔ བཟློག་པའི་སྨྲེང་གྱེར་སྔགས་འདི་འོ༔ ཨ་ཡ་མ་དུ་རུ་ཙ་ཤ་ན་བྷྱོ་བཟློག༔ ག་རུ་ཊ་ལྟས་ངན་བྷྱོ་བཟློག༔ དཔའ་བོ་དཔའ་མོའི་དགའ་སྟོན་བྱ༔ མུ་རན་འཁོར་ལ་ལྷག་མ་བསྔོ༔ ཆད་བསྐུལ་མ་མོ་བསྟན་གཏོར་གཏོང༔ རྒབ་འདྲེ་བྲོ་བརྡུང་ཚེ་ཆོག་བྱ༔ དཀྱིལ་འཁོར་ལྷ་ལ་གཏང་རག་འབུལ༔ དམིགས་མེད་དབྱིངས་ལ་དགེ་བ་བསྔོ༔ ཤིས་པ་བརྗོད་ཅིང་སྤྱོད་ལམ་བྱ༔ སྒྲོལ་ལས་ཟབ་པའི་མཐར་ཐུག་གོ༔ དེས་ནི་དགྲ་འདྲེ་གང་དམིགས་བཟློག༔ ཀུན་ལ་ལྟ་བའི་གདེངས་ལྡན་གཅེས༔ རྡོ་རྗེ་ཕུར་བའི་རྒྱུད་སྤུ་གྲི་འབར་བ་ལས༔ སྒྲོལ་ལས་བསྟན་པའི་ལེའུ་སྟེ་དགུ་པའོ༔ གཞན་ཡང་ནད་གདོན་ཞི་བ་དང༔ ཚེ་བསོད་རྒྱས་དང་དམིགས་བྱ་སྡུད༔ གནས་སྐབས་ཕན་གནོད་རིམ་པ་རྣམས༔ རིག་འཛིན་དགོངས་བརྡའི་ཚོགས་ཀྱིས་སྤེལ༔ རྩེ་གཅིག་སྒྲུབ་པས་གང་འགྲུབ་པ༔ རྡོ་རྗེ་ཕུར་བའི་རྒྱུད་གནམ་ལྕགས་སྤུ་གྲི་ལས༔ ལས་ཚོགས་བཀའ་ཡིས་གནང་བ་སྟེ་ལེའུ་བཅུ་པའོ༔ དེ་ནས་གསང་བདག་རྡོ་རྗེ་འཛིན༔ གུས་པས་སླར་ཡང་འདི་སྐད་གསོལ༔ རྒྱུད་འདི་གཏད་པའི་སྲུང་མ་གང༔ འདི་བཅངས་ཀློག་བྲིས་ཡོན་ཏན་གང༔ གདུལ་བྱའི་ཡུལ་ལ་ཇི་ལྟར་སྣང༔ རྡོ་རྗེ་གཞོན་ནུས་བཀའ་སྩལ་པ༔ མ་འོངས་དོན་དུ་ཞུས་པ་ལེགས༔ གང་ཟག་རང་རྒྱུད་མ་ཡིན་པའི༔ རིག་འཛིན་རྣམས་ལ་རྒྱུད་འདི་གཏད༔ དཀྱིལ་འཁོར་གྲལ་ཞུགས་མཐུ་རྩལ་ཅན༔ དྲེགས་པ་ཅན་ལ་རྒྱུད་འདི་གཏད༔ བསྟན་འགྲོའི་དོན་ལ་ཕན་སེམས་ཅན༔ ལས་ཅན་བུ་ལ་རྒྱུད་འདི་གཏད༔ སེམས་བསྐྱེད་ལྡན་པས་གསེར་དངུལ་གཡུ༔ རྡོ་དང་ས་ཡི་ཁུ་བ་ལ༔ སེལ་མེད་བདུད་རྩི་སྨན་འབྲས་ཏེ༔ དར་རས་ཤིང་ཤུན་ལེབ་ཤོག་ནི༔ བཅུ་དྲུག་སོར་ཚད་གླེགས་བམ་ནི༔ ལུས་ལ་བཅངས་བས་ནད་ཀུན་སེལ༔ ཁྱིམ་དུ་བཞུགས་མཆོད་འདྲེ་གདོན་གནོན༔ བཀླག་པས་གནས་སྐབས་དགྲ་འདྲེ་འདུལ༔ དོན་བསམ་དཔལ་ཆེན་སྐུ་རུ་འགྲུབ༔ ཅེས་གསུངས་པས་རིགས་ལྔ་སངས་རྒྱས་སྲས་དང་བཅས་པ་ཐམས་ཅད་དཔལ་ཕྱག་ན་རྡོ་རྗེ་གཙོ་འཁོར་ལ་མངོན་པར་བསྟོད་དོ༔ ཆོས་དབྱིངས་སྤྲོས་པ་མེད་པའི་དབྱིངས་སུ་མངོན་པར་བསྡུའོ༔ རྡོ་རྗེ་ཕུར་བའི་རྒྱུད་གནམ་ལྕགས་སྤུ་གྲི་ལས༔ རྒྱུད་གཏད་པའི་ཕན་ཡོན་མཇུག་སྟེ་ལེའུ་བཅུ་གཅིག་རྫོགས་སོ༔ ཨེ་མ་ཕྲིན་ལས་རྒྱུད་ཆེན་འདིཿ མ་ལ་ཡ་ཡི་གནས་མཆོག་ཏུ༔ གསང་བའི་བདག་པོ་དྲ་མ་ལྔས༔ པད་འབྱུང་རྗེ་ལ་བརྡ་རུ་བསྟན༔ སེང་གེ་རྫོང་གི་གནས་ཞོལ་དུ༔ མཁར་ཆེན་བུ་མོ་བདག་ལ་གནང༔ ཕུར་བའི་རྒྱུད་ཆེན་ས་གཏེར་སྦས༔ ཚིག་དོན་བློར་བཟུང་དབྱིངས་ཀྱི་རྒྱ༔ མ་འོངས་ང་ཡི་ཕྲིན་ལས་སྤྲུལ༔ གང་ཟག་ཕལ་བའི་གཟུགས་ཀྱིས་འགྲོལ༔ སྐལ་ལྡན་ཆོས་ཀྱི་སྐྱེས་བུས་སྤེལ༔ སྟོད་སྨད་མཁས་པའི་གྲལ་དུ་འགྲིམས༔ གང་འབྲེལ་དོན་ལྡན་བར་ཆད་སེལ༔ གུ་ཧྱ༔ ས་མ་ཡཱ༔ རྒྱ་རྒྱ་རྒྱ༔ བདག་སྤྲང་བན་ལུང་རིག་གླིང་པ་ལ་སྐྱབས་རྗེ་གྲུབ་དབང་བླ་མས་ཉམས་སྣང་དུ་ཤོག་སེར་བྱིན་ནས་སླར་ཨོ་རྒྱན་ཆེན་པོར་གནས་འགྱུར་ནས་རྟ་མགྲིན་བདུད་སྡེ་ཟིལ་གནོན་ཞེས་པའི་དབང་བསྐུར་བའི་དུས་སུ་གང་བབས་ཀྱི་ཡི་གེར་འདྲི་བ་མཁའ་སྤྱོད་ཀྱི་དབང་མོ་ཡེ་ཤེས་མཚོ་རྒྱལ་གྱིས་ཀྱང་བཀས་གནང་བ་ལྟར་ཆོས་ལ་དབང་བའི་སྐྱེས་མཆོག་དམ་པའི་བཀས་ཡང་ཡང་བསྐུལ་ངོར་དགོངས་གཏེར་དུ་བབས་པའི་ལོ་བཅུ་ཕྲག་འདས་པའི་ནོར་སྐྱོང་གི་ལོར་གཏེར་ཆེན་རཏྣ་གླིང་པའི་ཐུགས་སྒྲུབ་ཡང་སྙིང་འདུས་པའི་བཀླག་ལུང་གི་སྐབས་སུ་སྤེལ་བའི་དགེ་བས་འགྲོ་ཀུན་དཔལ་ཆེན་པོ་རྡོ་རྗེ་གཞོན་ནུའི་གོ་འཕང་ཚེ་འདིར་ཐོབ་ནས་བདུད་བཞིའི་གཡུལ་ལས་རྒྱལ་བའི་རྒྱུར་གྱུར་ཅིག སརྦ་ཛ་ཡནྟུ།