ཕུར་པ་བདུད་དཔུང་ཚར་གཅོད།

༄༅། ཤུདྡྷལོཀསྶརསྫཡཱམནསྱགུཧྱཀོཥེབྷྱཿ ཀཱིལཡམཱརཙམཱུསྠཱམཱཙྪེདཀནཱམབིཧརཏིསྨ།

༄༅། ཤུདྡྷལོཀསྶརསྫཡཱམནསྱགུཧྱཀོཥེབྷྱཿ ཀཱིལཡམཱརཙམཱུསྠཱམཱཙྪེདཀནཱམབིཧརཏིསྨ།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ ཕུར་པ་བདུད་དཔུང་ཚར་གཅོད་ཅེས་བྱ་བ་བཞུགས་སོ༔

དབྱིངས་ཀྱི་ངང་ལས་མ་གཡོས་ཀྱང་༔ དབྱིངས་ནས་རང་བྱུང་གྲུབ་པའི་ལྷ༔ དཔལ་ཆེན་རྡོ་རྗེ་གཞོན་ནུ་ཆེ༔ ཡི་དམ་ལྷག་པའི་ལྷ་ལ་འདུད༔ དེ་ཉིད་སྒྲུབ་པའི་ཐབས་ཟབ་མོ༔ བོད་ཡུལ་གཏེར་ཆེན་གཏེར་ཕྲན་དང་༔ ཡང་གཏེར་བསམ་ལས་འདས་པ་སྦས༔ དེ་ཡི་ནང་ནས་སྙིགས་དུས་འདིར༔ འགྲུབ་སླ་བརྒྱུད་ཐག་ཉེ་བའི་ཆོས༔ དགོངས་པའི་གཏེར་རྒྱ་ལེགས་བཀྲོལ་ཏེ༔ དུས་བབས་སྐལ་ལྡན་སྐྱེས་བུ་དང་༔ དབྱིངས་ཀྱི་རང་རྩལ་ཌཱཀྐི་མས༔ བསྐུལ་བྱང་བྱུང་བ་ལ་བརྟེན་ནས༔ གསང་ཆེན་གཅིག་བརྒྱུད་ཚུལ་དུ་སྤེལ༔ བཀའ་གཏེར་ཕུར་སྲུང་བཅུ་དྲུག་གིས༔ དམ་ཉམས་ལག་ཏུ་ཤོར་སྲིད་ན༔ སྲོག་ལ་རྦོད་གཏོང་ས་མ་ཡཱ༔ སྔོན་འགྲོ་དངོས་གཞི་རྗེས་ལས་ཁྲིད༔ ཤིན་ཏུ་དབེན་ཞིང་རྩུབ་པའི་སར༔ མཚམས་གཅོད་གཡེལ་ཞུད་འབྱམས་མི་རུང་༔ དུས་ཚེས་ཡར་ངོ་རྒྱལ་ཕུར་རམ༔ འཕྲོད་སྦྱོར་བཟང་པོར་བསྟུན་པ་གནད༔ དཀྱིལ་འཁོར་རས་བྲིས་རྡུལ་ཚོམ་བུ༔ སྤྲོས་པ་ཆེ་ཆུང་རང་མོས་བྱ༔ འཁོར་ལོ་རྩིབས་བཅུ་རྩིབས་བཞིའི་ནང་༔ ཐོད་ར་གྲུ་གསུམ་བསྣོལ་དབུས་སུ༔ ཕྱག་མཚན་ས་བོན་གང་རུང་དང་༔ ཕྱི་རོལ་སྒོ་རྫོགས་ཁྱམས་ཉིས་རིམ༔ ཐོད་ཕྲེང་རྡོ་ར་རླུང་མེ་དང་༔ དུར་ཁྲོད་ལ་སོགས་སྤྱི་དང་མཚུངས༔ ལྕགས་སམ་མཚན་ལྡན་ཐོད་པ་རུ༔ འབྲུ་སྨན་བཤོས་ལ་བང་རིམ་གསུམ༔ དྲག་པོའི་གཏོར་མ་ཕུར་བུའི་དབལ༔ གྱེན་བསླངས་དབྱིབས་འདྲ་མེ་ཐོད་རྒྱན༔ སྲས་བཞི་ཁྲོ་བཅུ་སྒོ་མ་བཞི༔ ལྷ་གྲངས་བཤོས་ལ་སྐུ་རྟེན་འཛུགས༔ སེང་ལྡིང་ཁྲོ་ལྕགས་ཕུར་པ་ནི༔ ཞལ་ཕྱག་རྫོགས་སམ་རྒྱ་མདུད་ཅན༔ སྔོ་ལྗང་དར་གྱི་ཅོད་པཎ་འཕུར༔ ཕུར་སྲུང་གཏོར་མ་རང་གཞུང་ལྟར༔ དྲག་པོའི་ཉེར་སྤྱོད་སྨན་རཀ་དང་༔ ཚོགས་ཀྱི་དམ་རྫས་ཤ་ཆང་ཟན༔ གཞན་ཡང་སྐུ་གསུང་ཐུགས་ཀྱི་རྟེན༔ སྤྱན་གཟིགས་དགོས་པའི་ཡོ་བྱད་རྣམས༔ མ་ཚང་མེད་པར་འདུ་བྱས་ལ༔ ཐོད་རྔ་རྐང་གླིང་རོལ་མོའི་ཚོགས༔ མཚམས་སུ་འབུད་དཀྲོལ་སྤོས་ཚིལ་ཆེན༔ གུ་གུལ་ལ་སོགས་དུད་པས་བདུག༔ བྱང་ཆུབ་བར་དུ་འགྲོ་བ་ལ༔ ལས་བཞིས་ཕན་པར་བྱ་བའི་བློས༔ མདུན་མཁར་མཆོག་གསུམ་ཀུན་འདུས་པ༔ བླ་མ་ལྷ་དང་དབྱེར་མེད་པར༔ དང་པོ་སྐྱབས་སུ་འགྲོ་བ་ནི༔ ཧཱུྃ༔ སྐུ་གསུམ་ཀུན་འདུས་དྲིན་ཆེན་བླ་མ་དང་༔ བདུད་དཔུང་ཚར་གཅོད་ཡི་དམ་ཕུར་པའི་ལྷ༔ མཁའ་འགྲོ་ཆོས་སྐྱོང་དམ་ཅན་རྒྱ་མཚོ་ལ༔ བྱང་ཆུབ་སྙིང་པོའི་བར་དུ་སྐྱབས་སུ་མཆི༔ ལན་གསུམ་གཉིས་པ་སེམས་བསྐྱེད་ནི༔ ཧོཿ ཁམས་གསུམ་རྒྱུད་ལྔར་འཁྱམས་པའི་ཕ་མ་ཀུན༔ རང་རིག་ལྷག་པའི་ལྷ་ཡི་གོ་འཕང་མཆོག༔ ཐོགས་མེད་མྱུར་དུ་འཐོབ་པར་བྱ་བའི་ཕྱིར༔ སྨོན་དང་འཇུག་པའི་བྱང་ཆུབ་སེམས་བསྐྱེད་དོ༔ ལན་གསུམ་གསུམ་པ་ཚོགས་བསག་ནི༔ གཞན་ནས་བྱུང་ལྟར་ཡང་ཡང་བྱ༔ ཞེས། ཧཱུྃ༔ བླ་མ་ཡི་དམ་འདིར་གཤེགས་གདན་ལ་བཞུགས༔ སྒོ་གསུམ་གུས་པས་ཕྱག་འཚལ་མཆོད་ཚོགས་འབུལ༔ ཉམས་ཆག་སྡིག་བཤགས་དགེ་ལ་རྗེས་ཡི་རང་༔ ཆོས་འཁོར་བསྐོར་བསྐུལ་མཁའ་བཞིན་བརྟན་བཞུགས་གསོལ༔ དགེ་དེས་འགྲོ་ཀུན་བྱང་ཆུབ་ཐོབ་ཕྱིར་བསྔོ༔ ལན་གསུམ་ཚོགས་ཞིང་བསྡུས་ནས་རང་ལ་བསྟིམས༔ བཞི་པ་བགེགས་ལ་གཏོར་མ་ནི༔ བསངས་སྦྱངས་འབྲུ་གསུམ་སྔགས་དང་རྒྱས༔ ཟག་མེད་བདུད་རྩིར་བྱིན་བརླབས་ཏེ༔ ཧཱུྃ་ཧཱུྃ༔ ང་ནི་རབ་འཇིགས་དཔལ་ཆེན་ཁྲོ་བོའི་རྒྱལ༔ ལྷག་པའི་ལྷ་མཆོག་རྡོ་རྗེ་གཞོན་ནུ་སྟེ༔ དངོས་གྲུབ་སྒྲུབ་ལ་བར་ཆད་ལོག་འདྲེན་བགེགས༔ འདོད་ཡོན་ལྔ་ལྡན་གླུད་གཏོར་འདི་བཞེས་ལ༔ སྒྲུབ་པའི་གནས་འདིར་མ་འདུག་གཞན་དུ་དེངས༔ བསྟན་འགྲོའི་བདེ་སྐྱིད་འཕྲོག་པའི་ཞིང་བཅུའི་དགྲ༔ ལྷག་མེད་མཛོད་ལ་བྱང་ཆུབ་སེམས་མཆོག་བསྐྱེད༔ གལ་ཏེ་བཀའ་ལས་འདའ་ཞིང་བར་གཅོད་ན༔ ཁྲོ་མཚོན་མེ་ཡིས་ལུས་སེམས་རྡུལ་དུ་བརླག༔ དེ་བས་མ་སྡོད་བསྒོ་བའི་ལས་སྒྲུབས་ཤིག༔ རྩ་སྔགས་ཁྲོ་བཅུ་ཧཱུྃ་བཞིས་སྔགས་དང་བཅས༔ ཡུངས་ཐུན་བྲབ་ཅིང་འདྲེ་འཇིགས་དུད་པས་བདུག༔ ལྔ་པ་སྲུང་འཁོར་བསྒོམ་པ་ནི༔ ཧཱུྃ་ཧཱུྃ༔ རང་བྱུང་ཆོས་དབྱིངས་རིག་པའི་རང་རྩལ་ལས༔ སྲ་བརྟན་རྡོ་རྗེ་རྒྱ་གྲམ་རླུང་མེ་དང་༔ གནམ་ལྕགས་ཕུར་པ་རྣོ་དབལ་ཚྭ་ཚྭ་འཕྲོས༔ མི་མིན་འཚེ་བའི་བགེགས་རིགས་སུ་ཡང་རུང་༔ བསྲུང་བའི་མཚམས་འདིར་འཇུག་པའི་གནས་མ་མཆིས༔ རྒྱལ་ཀུན་མཐུ་བྱིན་འོད་ཟེར་ཕྱོགས་བཅུར་འཕྲོས༔ སྲིད་པའི་རླུང་ཡང་ཐར་བའི་གོ་སྐབས་མེད༔ བཛྲ་རཀྵ་ཛྭ་ལ་བྷྲུཾ༔ ཁྲོ་བཅུའི་ཕུར་པ་དཀྱིལ་འཁོར་གྱི༔ ཕྱོགས་བཅུར་འཛུགས་ལ་འདི་སྐད་དོ༔ ཧཱུྃ་ཧཱུྃ༔ ཤར་ལྷོ་ནུབ་བྱང་མཚམས་བཞི་སྟེང་འོག་ཏུ༔ དྲི་ཟ་གཤིན་རྗེ་ཀླུ་དང་གནོད་སྦྱིན་དང་༔ མེ་ལྷ་སྲིན་པོ་རླུང་ལྷ་དབང་ལྡན་ཚོགས༔ ཉི་ཟླ་གཟའ་སྐར་ས་བདག་གདུག་པ་ཅན༔ ཕོ་མོ་ཁ་སྦུབ་གན་རྐྱལ་བསྣོལ་བའི་སྟེང་༔ མཐིང་ནག་ཧཱུྃ་ལས་ཡེ་ཤེས་ཁྲོ་བོ་བཅུ༔ ཞལ་གསུམ་ཕྱག་དྲུག་འཇིགས་པའི་མཚོན་ཆ་གདེངས༔ སྐུ་སྨད་ལྕགས་ཕུར་རྡོ་དབལ་ལོག་འདྲེན་འདུལ༔ ཕྱོགས་བཞིའི་གདོན་དང་འབྱུང་པོ་ཚར་ཆོད་ཅིག༔ ཁྲོ་བཅུའི་སྔགས་མཐར་ཕྱོགས་སྐྱོང་བཅུའི༔ མིང་ལ་ལོག་འདྲེན་གཞོམ་པའི་ཕྱིར༔ ལོག་འདྲེན་དྲི་ཟ་ཕོ་མོའི་གདོན༔ ཐམས་ཅད་ཧ་ན་ཧ་ན་ཧཱུྃ༔ ཕཊ་སོགས་རིག་པས་འཕྲུལ་ཤེས་བྱ༔ ཞེས་ ཨོཾ་བཛྲ་ཀྲོ་ཏ་ཧཱུྃ་ཀ་ར་ཧཱུྃ༔ ལོག་འདྲེན་ལྷ་གདོན་ཕོ་མོའི་གདོན་ཐམས་ཅད་གརྫ་གརྫ་ཧཱུྃ་ཕཊ༔ ཨོཾ་བཛྲ་ཀྲོ་ཏ་བྷི་ཛ་ཡ་ཧཱུྃ༔ ལོག་འདྲེན་དྲི་ཟ་ཕོ་མོའི་གདོན་ཐམས་ཅད་ཧ་ན་ཧ་ན་ཧཱུྃ་ཕཊ༔ ཨོཾ་བཛྲ་ཀྲོ་ཏ་ནི་ལ་ཏནྚ་ཧཱུྃ༔ ལོག་འདྲེན་མེ་ལྷ་ཕོ་མོའི་གདོན་ཐམས་ཅད་ད་ཧ་ད་ཧ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཡ་མནྟ་ཀཱ་ཧཱུྃ༔ ལོག་འདྲེན་གཤིན་རྗེ་ཕོ་མོའི་གདོན་ཐམས་ཅད་པ་ཙ་པ་ཙ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨཱརྱ་ཨ་ཙ་ལ་ཧཱུྃ༔ ལོག་འདྲེན་སྲིན་པོ་ཕོ་མོའི་གདོན་ཐམས་ཅད་བྷནྡྷ་བྷནྡྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཧྱ་གྷྲྀ་ཝ་ཧཱུྃ༔ ལོག་འདྲེན་ཀླུ་གདོན་ཕོ་མོའི་གདོན་ཐམས་ཅད་ཧུ་ལུ་ཧུ་ལུ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨ་པ་ར་ཙིཏྟ་ཧཱུྃ༔ ལོག་འདྲེན་རླུང་ལྷ་ཕོ་མོའི་གདོན་ཐམས་ཅད་ཏིཥྛ་ཏིཥྛ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨམྲྀ་ཏ་ཀུནྚ་ལི་ཧཱུྃ༔ ལོག་འདྲེན་གནོད་སྦྱིན་ཕོ་མོའི་གདོན་ཐམས་ཅད་ཚིནྡྷ་ཚིནྡྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཏྲཻ་ལོ་ཀྱ་བི་ཛ་ཡ་ཧཱུྃ༔ ལོག་འདྲེན་དབང་ལྡན་ཕོ་མོའི་གདོན་ཐམས་ཅད་བྷནྡྷ་བྷནྡྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་མ་ཧཱ་བཱ་ལ་ཧཱུྃ༔ ལོག་འདྲེན་ས་བདག་ཕོ་མོའི་གདོན་ཐམས་ཅད་སྥོ་ཊ་སྥོ་ཊ་ཧཱུྃ་ཕཊ༔ དྲུག་པ་དམ་བཅའ་བཟུང་བ་ནི༔ ཧཱུྃ༔ བདག་གི་ཚེ་རབས་སྔོན་གྱི་ཡི་དམ་ལྷ༔ དཔལ་ཆེན་ཀུན་འདུས་རྡོ་རྗེ་གཞོན་ནུ་ཆེ༔ དུས་འདི་ནས་བཟུང་བྱང་ཆུབ་མ་ཐོབ་བར༔ མི་འབྲལ་རྩེ་གཅིག་སྒྲུབ་པར་དམ་བཅའ་འོ༔ བཛྲ་ཙིཏྟ་ས་མ་ཡཱ་ཧཱུྃ༔ བདུན་པ་ཉམས་ཆག་བཤགས་པ་ནི༔ ཧཱུྃཿ རང་བྱུང་རིག་པའི་ལྷ་དང་མ་མཇལ་བས༔ ཐོག་མེད་དུས་ནས་ལས་ཉོན་བག་ཆགས་མཐུས༔ དངོས་གྲུབ་བར་གཅོད་ཉམས་ཆག་མི་དགེའི་ལས༔ མ་ལུས་སྙིང་ནས་བཤགས་སོ་ལྷག་པའི་ལྷ༔ དག་ཚངས་མཆོག་གི་དབུགས་དབྱུང་མཛད་དུ་གསོལ༔ བཛྲ་ས་མ་ཡཱ་ཤུདྡྷེ་སྭཱ་ཧཱ༔ བརྒྱད་པ་སྤྲོ་བས་འཇུག་པ་ནི༔ ཨེ་མ་ཧོ༔ གྲངས་མེད་ལུས་ཀུན་ཆུད་ཟོས་འཁོར་བར་འཁྱམས༔ ད་ལྟ་ཡི་དམ་ལྷ་དང་དབྱེར་མེད་པར༔ སྒྲུབ་པའི་ཉེ་ལམ་ལྷག་པའི་དཀྱིལ་འཁོར་འདིར༔ ཕྱི་བཤོལ་བདུད་དབང་གཡེལ་དང་མ་ཞུད་པར༔ དགའ་ཞིང་སྤྲོ་བས་མྱུར་དུ་འཇུག་པར་བྱ༔ ཚེ་འདིར་དོན་འབྲས་འབྱུང་བར་གསོལ་བ་འདེབས༔ ཐུགས་རྗེས་ཟུངས་ཤིག་དཔལ་ཆེན་དཀྱིལ་འཁོར་ལྷ༔ ཡེ་ཤེས་རང་ཞལ་མངོན་དུ་སྟོན་པ་དང་༔ དངོས་གྲུབ་རྣམ་གཉིས་འགྲུབ་པའི་བརྡ་སྒོ་ཕྱེ༔ དགུ་པ་བྱིན་ཆེན་དབབ་པའི་ཕྱིར༔ དྲི་བཟང་བདུག་ཅིང་རོལ་མོ་དཀྲོལ༔ སྙན་ཅིང་གདུང་བའི་དབྱངས་དང་བཅས༔ ཧཱུྃ་ཧཱུྃ༔ འོག་མིན་ཆོས་དབྱིངས་སྤྲོས་བྲལ་ཕོ་བྲང་ནས༔ བཞེངས་བཞུད་མཚན་མའི་སྐྱོན་བྲལ་ཡེ་ཤེས་ལྷ༔ མ་རིག་གཉིས་སྣང་ཀུན་རྫོབ་སྒྲིབ་བསལ་ཕྱིར༔ གནས་དང་ཡོ་བྱད་མཚན་མའི་དཀྱིལ་འཁོར་དང་༔ རྣལ་འབྱོར་བདག་གི་སྒོ་གསུམ་བྱིན་གྱིས་རློབས༔ ལུས་ལ་འགྱུར་མེད་སྐུ་ཡི་གཟི་བྱིན་ཕོབ༔ ངག་ལ་འགགས་མེད་གསུང་གི་ནུས་མཐུ་བསྐྱེད༔ སེམས་ལ་འཁྲུལ་མེད་རྟོགས་པའི་རྩལ་ཤུགས་ཕྱུངས༔ བྱིན་ཆེན་བྱིན་ཕོབ་རྡོ་རྗེ་ཕུར་པའི་ལྷ༔ དབང་ཆེན་དབང་བསྐུར་རྩ་བརྒྱུད་བླ་མ་རྣམས༔ གསང་སྔགས་ལས་འབྲས་མྱུར་དུ་མཆིས་པར་མཛོད༔ ཨ་ལ་ལ་ཧོ༔ ཨོཾ་བཛྲ་ཀཱི་ལི་ཀཱི་ལ་ཡ་ཛྙཱ་ན་བཛྲ་ཨ་བེ་ཤ་ཡ་ཕེཾ་ཕེཾ༔ ཞེས་བརྗོད་རོལ་མོ་དྲག་ཏུ་དཀྲོལ༔ ལུས་རྔུལ་སྤུ་ཟིང་ཉམས་རྩལ་འབར༔ བཅུ་པ་མཆོད་རྫས་བྱིན་བརླབ་ནི༔ ཨོཾ་ཨཱ༔ཧཱུྃ་དང་སོ་སོའི་སྔགས༔ བརྗོད་ལ་དམིགས་པས་ཀུན་བཟང་གི༔ རྣམ་རོལ་ས་གསུམ་གང་བར་བསམ༔ ཞེས་རཾ་ཡཾ་ཁཾ༔ དངོས་འཛིན་དྲི་མའི་བག་ཆགས་བསྲེགས་གཏོར་བཀྲུས༔ རང་བྱུང་བདུད་རྩི་ཟག་མེད་མྱོང་གྲོལ་སྨན༔ དུག་ལྔ་དབྱིངས་བསྒྲལ་རཀྟའི་རྦ་ཀློང་འཁྲུགས༔ བྷ་ལིང་དམ་རྫས་བདེ་སྟོང་མཉམ་པར་སྦྱོར༔ ཉེར་སྤྱོད་རྣམ་ལྔ་ཡུལ་དྲུག་རང་གྲོལ་རྫས༔ ཀུན་བཟང་མཆོད་པའི་རྣམ་འཕྲུལ་ཆེན་པོར་གྱུར༔ ཨོཾ་བཛྲ་ཨརྒྷཾ་སོགས་ནས་ཤཔྟ་པཱུ་ཛ་ཨཱ་ཧཱུྃ༔ ཨོཾ་ཨཱ༔ཧཱུྃ་མ་ཧཱ་སརྦ་པཉྩ་ཨ་མྲྀ་ཏ་ཧཱུྃ་ཧྲཱི་ཋཱ༔ ཨོཾ་ཨཱ༔ཧཱུྃ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧྲཱིཿཋཱ༔ ཨོཾ་ཨཱ༔ཧཱུྃ་མ་ཧཱ་བ་ལིང་ཏ་ཏེ་ཛྭ་བ་ལིང་ཏ་བྷ་ལ་བྷ་ཏེ་གུ་ཧྱ་ས་མ་ཡཱ་ཧཱུྃ་ཧྲཱི་ཋཱ༔ ཞེས་བརྗོད་དེ་ཡན་སྔོན་འགྲོའི་ཆོས༔ རིམ་པ་བཅུ་ཡིས་ཉམས་སུ་བསྟར༔ ས་མ་ཡཱ༔ དངོས་གཞི་དང་པོ་ལྷ་བསྐྱེད་ལ༔ བག་ཆགས་རྣམ་གསུམ་སྦྱང་བྱ་ལ༔ ཏིང་འཛིན་རྣམ་གསུམ་སྦྱོང་བྱེད་ལ༔ སྐུ་གསུམ་ཡེ་ཤེས་སྦྱངས་འབྲས་སོ༔ དང་པོ་དེ་བཞིན་ཉིད་ཀྱི་ཏིང་འཛིན་ནི༔ ཧཱུྃཿ འཁོར་འདས་གཉིས་བསྡུས་འཁྲུལ་གྲོལ་ཆོས༔ ཡེ་ནས་མ་སྐྱེས་སྤྲོས་དང་བྲལ༔ འདི་ཞེས་སྨྲ་བསམ་ཡུལ་ལས་འདས༔ གདོད་མའི་དེ་ཉིད་སེམས་ཀྱི་གཤིས༔ ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཾ༔ གཉིས་པ་ཀུན་ཏུ་སྣང་བའི་ཏིང་འཛིན་ནི༔ ཧཱུྃ༔ གདོད་མའི་སྟོང་པ་ཆེན་པོ་ལ༔ བདེན་འཛིན་གཉིས་སུ་བཟུང་བའི་མཐུས༔ རིགས་དྲུག་འཁོར་བར་འཁྱམས་པའི་འགྲོ༔ ཡང་དག་ས་ལ་འགོད་བྱའི་ཕྱིར༔ ཚད་མེད་སྙིང་རྗེ་ཆེན་པོའི་བློས༔ ལོག་རྟོག་བདུད་དཔུང་གཞོམ་པར་བྱ༔ མ་ཧཱ་ཀ་རུ་ཎི་ཀ་ཛྙཱ་ན་དྷརྨ་དྷརྟུ་ཨཱ༔ གསུམ་པ་རྒྱུ་ཡི་ཏིང་འཛིན་ནི༔ ཧཱུྃ༔ ཀ་དག་སྟོང་པ་ཆེན་པོའི་མཁའ་དབྱིངས་སུ༔ ལྷུན་གྲུབ་སྙིང་རྗེ་ཆེན་པོ་ཟུང་འཇུག་རྩལ༔ རྣམ་གྲོལ་རྒྱུ་ཡི་སེམས་ཉིད་ཡི་གེ་ཧཱུྃ༔ གནམ་ལྕགས་འབར་བའི་ཕུར་བུའི་ལྟོ་བ་རུ༔ མཐིང་ནག་འོད་ཟེར་བསྐལ་མེའི་གཟི་བྱིན་འཁྲིགས༔ ཧཱུྃ་ཧཱུྃ༔བཛྲ་ཀཱི་ལི་ཀཱི་ལ་ཡ་ཛཿཧཱུྃ་ཙིཏྟ་ས་མ་ཡཱ་ཧྲཱིང་ཧྲཱིང་༔ དེ་ནས་ཕྱི་སྣོད་འཁྲུལ་བའི་གཞི༔ སྦྱང་ཕྱིར་ཡི་གེའི་སྤྲོས་པ་ནི༔ ཧཱུྃ་ཧཱུྃ༔ རང་རིག་གནམ་ལྕགས་ཕུར་པ་ཧཱུྃ༔ཡིག་མཚན༔ སྟོང་པའི་དབྱིངས་སུ་མཁའ་ལས་འཇའ་ལྟར་ཤར༔ ཧཱུྃ་ལས་ཨེ་ཡཾ་ར་སུཾ་རཾ་ཡིག་འཕྲོས༔ ཨེ་ལས་ནམ་མཁའ་མཐིང་ནག་བསམ་འདས་དབྱིངས༔ ཡཾ་ལས་རླུང་དཀྱིལ་ལྗང་དམར་སྲ་ཞིང་བརྟན༔ ར་ལས་དམར་ནག་རཀྟའི་རྦ་ཀློང་གཡོ༔ སུཾ་ལས་བཻཌཱུར་ས་གཞི་བཀྲག་མདངས་འཚེར༔ རཾ་ལས་བསྐལ་མེ་སྲིད་གསུམ་ཁྱབ་ཅིང་འཚེག༔ ཀེཾ་ཡིག་འཕྲོས་པས་རུས་པའི་རི་རབ་ནི༔ བང་རིམ་བཞི་བ་ལྷུན་པོའི་དཔལ་ལས་རྔམས༔ རྩེ་མོ་གཟུགས་མེད་སྐེད་པར་ཉི་ཟླ་འཆར༔ རྩ་བ་རབ་བརྗིད་འདོད་ཆགས་ཁྲག་མཚོར་ནུབ༔ དུར་ཁྲོད་བརྒྱད་ལྡན་བྱ་གཅན་རོ་ལངས་དང་༔ ཀེཾ་རུས་འཇིགས་རུང་མི་སྡུག་རྒྱུག་ཅིང་རྒོད༔ ཧཱུྃ་ལས་བྷྲཱུཾ་འཕྲོས་རུས་པའི་རི་རབ་སྟེང་༔ ཡེ་ཤེས་ལྔ་ལྡན་རང་སྣང་གཞལ་ཡས་ཁང་༔ ཐོད་པ་སྐམ་རློན་རྙིད་པའི་རྩིག་པ་ལ༔ ཕྱི་ནི་རིན་ཆེན་སྣ་ལྔའི་འོད་ཟེར་འབར༔ ཁྲག་ཞག་འདམ་ཞལ་གྲུ་བཞི་སྒོ་བཞི་པ༔ རྒྱུ་འབྲས་རྟ་བབས་གསེར་དང་ཁྲག་ཁྱམས་བསྒྲིགས༔ ཕྱི་རོལ་འདོད་སྣམ་གཟུགས་སོགས་ཕྱག་རྒྱ་མོ༔ སྒེག་བཞད་གཡོ་བའི་རྣམ་འགྱུར་མཆོད་སྤྲིན་སྤྲོ༔ ཐོད་པའི་ཕ་གུ་རཱུ་ཏྲའི་རྐང་ལག་དང་༔ སྒལ་རུས་ཤར་བུ་སྦྲུལ་གྱི་དྲྭ་ཕྱེད་ལ༔ གློ་སྙིང་ཏོ་ར་རོ་ཡི་རྒྱལ་མཚན་རྔམས༔ ཙིཏྟའི་ཏོག་དང་གནམ་ལྕགས་མདུང་གི་རྩེར༔ ཞིང་ཆེན་ལྤགས་པའི་བ་དན་སྟག་གཟིག་འཕན༔ ལྷ་བརྒྱད་ཀ་བ་གཟའ་བརྒྱད་གདུང་མར་བྲེས༔ ཀླུ་བརྒྱད་ཀ་གདན་རྒྱུ་སྐར་དྲལ་ཕྱམ་དང་༔ བགེགས་སྲིན་བསྒྲལ་བའི་དོན་སྣོད་གཅལ་དུ་བཀྲམ༔ མ་རིག་གཉིས་སྣང་དབྱིངས་སུ་གྲོལ་བའི་གནས༔ མེ་རི་འབར་བའི་དུར་ཁྲོད་ཆེན་པོའི་དབུས༔ རྡོ་རྗེ་རྒྱ་གྲམ་གྲུ་གསུམ་བསྣོལ་བའི་དབུས༔ སྲིད་པའི་གཟུང་འཛིན་ལྷ་ཆེན་ཕོ་མོ་ཟུང་༔ ཁ་སྦུབ་གན་རྐྱལ་ཆགས་བྲལ་པད་ཉིའི་སྟེང་༔ རང་རིག་ཕྱག་མཚན་ཧཱུྃ་མཐིང་ཕྲ་ཐབས་བབས༔ འོད་ཟེར་ཡར་འཕྲོས་རྒྱལ་ཀུན་བྱིན་རླབས་བསྡུས༔ མར་འཕྲོས་ཁམས་གསུམ་སྣོད་བཅུད་གཉིས་འཛིན་སྦྱངས༔ བདུད་བཞི་ལ་སོགས་ལོག་འདྲེན་དམ་སྲིའི་དཔུང་༔ སྡེ་དང་བཅས་པ་མ་ལུས་ཚར་བཅད་ནས༔ འོད་ཀྱི་གོང་བུར་ཧྲིལ་གྱིས་ཞུ་བ་ལས༔ བདག་ཉིད་དཔལ་ཆེན་བཛྲ་ཀཱི་ལ་ཡ༔ མཐིང་ནག་དབུ་གསུམ་ཕྱག་དྲུག་ཞབས་བཞི་བགྲད༔ བདུད་བཞིའི་མགོ་ལ་སྒེག་པའི་ཉམས་ཀྱིས་རོལ༔ གཡས་དཀར་བཞད་པས་སྟེང་གདོན་ལྷ་རྣམས་འདུལ༔ གཡོན་དམར་གཤེ་བས་འོག་གདོན་ཀླུ་སྲིན་གཞོམ༔ དབུས་མཐིང་རྔམ་བརྗིད་སྡེ་བརྒྱད་དམ་སྲི་གནོན༔ ཕྱག་དྲུག་གཡས་གཉིས་གསེར་རྡོར་རྩེ་དགུ་དང་༔ གནམ་ལྕགས་གྲི་གུག་གཡོན་གཉིས་མེ་དཔུང་འབར༔ དུང་ཁྲག་གསོལ་ཞིང་མཐའ་གཉིས་རྣོ་དབལ་གྱི༔ རི་རབ་ཕུར་བུ་གདོན་བགེགས་སྙིང་ལ་གཟིར༔ ཤེས་རབ་ཡུམ་མཆོག་ཁམས་གསུམ་སྒྲོལ་མཛད་མ༔ འཁོར་ལོ་རྒྱས་འདེབས་ལྗང་སྐྱ་ཁྲོ་མོའི་ཆས༔ ཡབ་དང་ཞལ་སྦྱོར་ཕྱག་གཡས་ཨུཏྤལ་དང་༔ དྲིལ་བུ་སྙན་འཁྲོལ་གཙོ་བོའི་མགུལ་ནས་འཁྱུད༔ གཡོན་པས་དུང་ཁྲག་ཡབ་ཀྱི་ཞལ་དུ་སྟོབ༔ ཡབ་ཡུམ་སྐུ་ལ་དུར་ཁྲོད་ཆས་བརྒྱད་དང་༔ རྡོ་རྗེའི་གོ་ཁྲབ་གནམ་ལྕགས་ཐོག་ཟེར་འཕྲོ༔ དབུ་སྐྲ་དམར་སེར་ཐོད་སྐམ་ཅོད་པཎ་རྩེར༔ དར་མཐིང་ཟི་ལྡིར་རྡོ་རྗེ་རྩེ་ལྔའི་ཏོག༔ རིགས་བདག་དོན་ཡོད་གྲུབ་པའི་གཙུག་རྒྱན་ཅན༔ གཙོ་བོའི་ཕྱི་རོལ་འཁོར་ལོ་རྩིབས་བཞིའི་སྟེང་༔ པད་ཉིའི་གདན་ལ་རིགས་བཞིའི་གདོན་གྱི་ཁར༔ ཧཱུྃ༔ཡིག་དཀར་སེར་དམར་ལྗང་ཡོངས་གྱུར་ལས༔ སྲས་མཆོག་ཁྲོ་བོ་ཀཱི་ལ་རིགས་བཞི་ནི༔ སྐུ་སྟོད་སྲིན་པོ་ཕྱག་གཉིས་ལྕགས་ཕུར་འདྲིལ༔ གར་གྱི་ཉམས་དགུ་བལྟར་མི་བཟོད་པའི་ཚུལ༔ སྐུ་སྨད་ཕུར་དབལ་གདོན་བཞིའི་སྙིང་ལ་གཟིར༔ དེ་ཡི་ཕྱི་རོལ་འཁོར་ལོ་རྩིབས་བཅུ་ལ༔ མཐིང་ནག་ཧཱུྃ༔བཅུ་ཡབ་ཡུམ་སྦྱོར་མཚམས་ནས༔ མཁའ་གསང་བྱང་སེམས་འོད་ཀྱི་འཕྲོ་འདུ་ལས༔ པདྨ་ཟླ་ཉི་ཕྱོགས་སྐྱོང་གདོན་རྣམས་ཀྱི༔ གདན་ལ་བགེགས་འདུལ་ཁྲོ་བོ་ཆེན་པོ་བཅུ༔ དེ་ནས་རིམ་བཞིན་འཁོར་གྱི་ལྷ༔ བསྐྱེད་པའི་དམིགས་པ་འདི་ལྟར་རོ༔ ཤར་ཕྱོགས་དྲི་ཟ་ཕོ་མོ་བསྣོལ་བའི་སྟེང་༔ རྣམ་རྒྱལ་སྙེམས་མ་ཡབ་ཡུམ་མཐིང་གསལ་རྔམ༔ ཞལ་གསུམ་ཕྱག་དྲུག་ཞབས་བཞིས་འབྱུང་པོ་གནོན༔ གཡས་དཀར་གཡོན་དམར་རྩ་ཞལ་སྐུ་མདོག་མཚུངས༔ གཡས་གཉིས་རྩེ་ལྔ་ཞིང་དབྱུག་གཡོན་ཕྱག་གཉིས༔ ཁ་ཊཱཾ་མེ་དཔུང་མཐའ་གཉིས་ལྕགས་ཕུར་འདྲིལ༔ ཁྲོ་བོའི་ཆས་རྫོགས་གཡས་གཡོན་ཟ་གསོད་འགྱེད༔ སྟག་དང་བྱ་རྒོད་བམ་དང་རྒྱུ་ཞགས་གསོལ༔ ལྷོ་ཕྱོགས་གཤིན་རྗེ་ཕོ་མོ་བསྣོལ་བའི་སྟེང་༔ གཤིན་རྗེ་དུར་ཁྲོད་བདག་མོ་སེར་ནག་ཁྲོ༔ ཞལ་གསུམ་ཕྱག་དྲུག་ཞབས་བཞིས་འབྱུང་པོ་གནོན༔ གཡས་མཐིང་གཡོན་དམར་རྩ་ཞལ་སྐུ་མདོག་མཚུངས༔ གཡས་གཉིས་འཁོར་ལོ་གྲི་གུག་གཡོན་ཕྱག་གཉིས༔ རྒྱལ་མཚན་དུང་ཁྲག་མཐའ་གཉིས་ལྕགས་ཕུར་འདྲིལ༔ ཁྲོ་བོའི་ཆས་རྫོགས་གཡས་གཡོན་ཟ་གསོད་འགྱེད༔ ཤ་བ་འུག་གདོང་སྙིང་དང་རྒྱུ་ཞགས་འདྲེན༔ ནུབ་ཕྱོགས་ཀླུ་དབང་ཕོ་མོ་བསྣོལ་བའི་སྟེང་༔ རྟ་མགྲིན་གཏུམ་མོ་ཡབ་ཡུམ་དམར་ལ་སྒེག༔ ཞལ་གསུམ་ཕྱག་དྲུག་ཞབས་བཞིས་འབྱུང་པོ་གནོན༔ གཡས་དཀར་གཡོན་སྔོ་རྩ་ཞལ་སྐུ་མདོག་མཚུངས༔ གཡས་གཉིས་པདྨ་བེ་ཅོན་གཡོན་ཕྱག་གཉིས༔ རི་རབ་སྦྲུལ་ཞགས་མཐའ་གཉིས་ལྕགས་ཕུར་འདྲིལ༔ ཁྲོ་བོའི་ཆས་རྫོགས་གཡས་གཡོན་ཟ་གསོད་འགྱེད༔ བྱི་ལ་པུ་ཤུད་གློ་སྙིང་མཆིན་ཁྲག་གསོལ༔ བྱང་ཕྱོགས་གནོད་སྦྱིན་ཕོ་མོ་བསྣོལ་བའི་སྟེང་༔ བདུད་རྩི་རླུང་འབྱིན་ཡབ་ཡུམ་ལྗང་སྔོན་གཏུམ༔ ཞལ་གསུམ་ཕྱག་དྲུག་ཞབས་བཞིས་འབྱུང་པོ་གནོན༔ གཡས་དམར་གཡོན་སེར་རྩ་ཞལ་སྐུ་མདོག་མཚུངས༔ གཡས་གཉིས་རྒྱ་གྲམ་སྨན་ཐོད་གཡོན་ཕྱག་གཉིས༔ རྔ་ཡབ་གཏུན་ཤིང་མཐའ་གཉིས་ལྕགས་ཕུར་འདྲིལ༔ ཁྲོ་བོའི་ཆས་རྫོགས་གཡས་གཡོན་ཟ་གསོད་འགྱེད༔ གདོང་ལྔ་ཕ་ཝཾ་ཁྲག་ཞག་དཀྲུག་ཅིང་གསོལ༔ ཤར་ལྷོ་མེ་ལྷ་ཕོ་མོ་བསྣོལ་བའི་སྟེང་༔ དབྱུག་སྔོན་སྡེར་མོ་ཡབ་ཡུམ་སྔོ་མདངས་འཚེར༔ ཞལ་གསུམ་ཕྱག་དྲུག་ཞབས་བཞིས་འབྱུང་པོ་གནོན༔ གཡས་དཀར་གཡོན་ལྗང་རྩ་ཞལ་སྐུ་མདོག་མཚུངས༔ གཡས་གཉིས་རྡོར་དབྱུག་ཞིང་བམ་གཡོན་ཕྱག་གཉིས༔ རལ་གྲི་ཐོ་བ་མཐའ་གཉིས་ལྕགས་ཕུར་འདྲིལ༔ ཁྲོ་བོའི་ཆས་རྫོགས་གཡས་གཡོན་ཟ་གསོད་འགྱེད༔ གཡག་དང་བྱ་རོག་རྒྱུ་མ་དུང་དམར་གསོལ༔ ལྷོ་ནུབ་སྲིན་པོ་ཕོ་མོ་བསྣོལ་བའི་སྟེང་༔ མི་གཡོ་གཏུན་ཁུང་ཡབ་ཡུམ་དམར་ནག་བཞད༔ ཞལ་གསུམ་ཕྱག་དྲུག་ཞབས་བཞིས་འབྱུང་པོ་གནོན༔ གཡས་སེར་གཡོན་སྨུག་རྩ་ཞལ་སྐུ་མདོག་མཚུངས༔ གཡས་གཉིས་བེ་ཅོན་རྔེའུ་ཆུང་གཡོན་ཕྱག་གཉིས༔ གཤོལ་མདའ་དྲིལ་བུ་མཐའ་གཉིས་ལྕགས་ཕུར་འདྲིལ༔ ཁྲོ་བོའི་ཆས་རྫོགས་གཡས་གཡོན་ཟ་གསོད་འགྱེད༔ གཟིག་དང་ཁྭ་ཏ་ཙིཏྟ་རྒྱུ་ཞགས་འདྲེན༔ ནུབ་བྱང་རླུང་ལྷ་ཕོ་མོ་བསྣོལ་བའི་སྟེང་༔ འདོད་རྒྱལ་མདའ་སྙེམས་ཡབ་ཡུམ་སྨུག་ནག་འཇིགས༔ ཞལ་གསུམ་ཕྱག་དྲུག་ཞབས་བཞིས་འབྱུང་པོ་གནོན༔ གཡས་དཀར་གཡོན་དམར་རྩ་ཞལ་སྐུ་མདོག་མཚུངས༔ གཡས་གཉིས་རྡོ་རྗེ་མདའ་དང་གཡོན་ཕྱག་གཉིས༔ དུང་ཁྲག་གཞུ་འགེངས་མཐའ་གཉིས་ལྕགས་ཕུར་འདྲིལ༔ ཁྲོ་བོའི་ཆས་རྫོགས་གཡས་གཡོན་ཟ་གསོད་འགྱེད༔ སྤྱང་ཀི་ཁྲ་གདོང་ཤ་ཆེན་རྐང་ལག་གསོལ༔ བྱང་ཤར་དབང་ལྡན་ཕོ་མོ་བསྣོལ་བའི་སྟེང་༔ གསུམ་རྒྱལ་གསོད་བྱེད་ཡབ་ཡུམ་མཐིང་ནག་དཔའ༔ ཞལ་གསུམ་ཕྱག་དྲུག་ཞབས་བཞིས་འབྱུང་པོ་གནོན༔ གཡས་དམར་གཡོན་སེར་རྩ་ཞལ་སྐུ་མདོག་མཚུངས༔ གཡས་གཉིས་སྡིགས་འཛུབ་གདེངས་གནོན་གཡོན་ཕྱག་གཉིས༔ སྟོང་གི་འཇིག་རྟེན་མཐའ་གཉིས་ལྕགས་ཕུར་འདྲིལ༔ ཁྲོ་བོའི་ཆས་རྫོགས་གཡས་གཡོན་ཟ་གསོད་འགྱེད༔ དོམ་དང་སྲེ་མོང་མི་སྙིང་གློ་རྩ་གསོལ༔ ཤར་སྟོད་སྟེང་གདོན་ཕོ་མོ་བསྣོལ་བའི་སྟེང་༔ ཧཱུྃ་དཀར་སྒྲ་འབྱིན་ཡབ་ཡུམ་དཀར་གསལ་འཛུམ༔ ཞལ་གསུམ་ཕྱག་དྲུག་ཞབས་བཞིས་འབྱུང་པོ་གནོན༔ གཡས་སྔོ་གཡོན་དམར་རྩ་ཞལ་སྐུ་མདོག་མཚུངས༔ གཡས་གཉིས་ཉི་མ་ཟླ་ཚེས་གཡོན་ཕྱག་གཉིས༔ མགོ་ཕྲེང་རྩེ་གསུམ་མཐའ་གཉིས་ལྕགས་ཕུར་འདྲིལ༔ ཁྲོ་བོའི་ཆས་རྫོགས་གཡས་གཡོན་ཟ་བྱེད་འགྱེད༔ ཕག་དང་འབྲུག་གདོང་གར་གྱི་ཕྱག་རྒྱ་བསྒྱུར༔ ནུབ་སྨད་ས་བདག་ཕོ་མོ་བསྣོལ་བའི་སྟེང༔ སྟོབས་ཆེན་སྐུལ་བྱེད་ཡབ་ཡུམ་སྟང་ཟིལ་མདོག༔ ཞལ་གསུམ་ཕྱག་དྲུག་ཞབས་བཞིས་འབྱུང་པོ་གནོན༔ གཡས་དཀར་གཡོན་དམར་རྩ་ཞལ་སྐུ་མདོག་མཚུངས༔ གཡས་གཉིས་རླུང་དཀྱིལ་མེ་དཔུང་གཡོན་ཕྱག་གཉིས༔ མེ་ཡི་སྤུ་གྲི་མཐའ་གཉིས་ལྕགས་ཕུར་འདྲིལ༔ ཁྲོ་བོའི་ཆས་རྫོགས་གཡས་གཡོན་ཟ་གསོད་འགྱེད༔ དྲེད་དང་བྱི་བ་དགྲ་ལུས་སྦར་ཅིང་གནོན༔ ཡུམ་རྣམས་གྲི་ཐོད་སྐུ་མདོག་ཡབ་ཀྱི་མདངས༔ སྒོ་བཞིར་སྒོ་བ་ཆེན་པོ་རིགས་བཞི་ནི༔ ཞིང་རྐྱང་གདན་ལ་པུ་ཤུད་སྲིན་བྱ་ཁྲ༔ སྐྱ་ཀའི་གདོང་ཅན་ལྕགས་ཀྱུ་ཞགས་པ་སྒྲོག༔ དྲིལ་བུ་གཡོན་རྣམས་ཐོད་ཁྲག་ཞལ་དུ་གསོལ༔ དང་པོའི་ཁྱམས་ལ་ཞིང་གི་གདན་རེ་ལ༔ གཙོ་བོའི་ཐུགས་ལས་བྷྱོ་ཡིག་ཕྱོགས་མདོག་འཕྲོས༔ ཤར་སྟོད་ནས་བཟུང་སྲིན་མོ་གཡག་གདོང་སོགས༔ དབང་ཕྱུག་ཉེར་བརྒྱད་ཕྱི་མའི་ཕྱོགས་བཞི་རུ༔ མུ་ཁ་མཆེད་བཞི་རེ་ཏི་སྤུན་བཞི་དང་༔ བསེ་མོ་བཞི་དང་གིང་ཆེན་སྡེ་བཞི་སྟེ༔ ཕུར་སྲུང་བཅུ་དྲུག་ལ་སོགས་ཡང་གཡོག་བྲན༔ ཉི་ལས་ཟེར་བཞིན་མ་འདྲེས་ཡོངས་རྫོགས་བསྐྱེད༔ ༧ གཙོ་བོའི་ཐུགས་ནས་འཕྲོས་པའི་འོད་ཟེར་གྱིས༔ དབང་ལྷ་སྤྱན་དྲངས་རིགས་ལྔ་ཡུམ་རྣམས་ཀྱིས༔ བུམ་ཆུས་ཁྲུས་བྱས་སྐུ་གང་དྲི་མ་དག༔ འོད་ཟེར་ཆེན་པོའི་དབང་ཐོབ་འབྲས་དུས་ཀྱི༔ སྐུ་བཞི་ཐོབ་ཅིང་ཀརྨ་ཧེ་རུ་ཀ༔ གཙོ་བོར་གྱུར་པའི་ཁྲག་འཐུང་རིགས་ལྔ་ཡིས༔ གཙོ་བོ་ཡབ་ཡུམ་ཀཱི་ལ་རིགས་བཞི་ལ༔ དབང་རྟགས་ཅོད་པན་ཁྲོ་བཅུར་རང་རིགས་དང་༔ གཞན་ལ་གཙོ་བོ་ཕྱག་རྒྱ་གཅིག་པ་ཡི༔ དབང་རྟགས་རིགས་ཀྱི་བདག་པོར་མངའ་གསོལ་བས༔ ཀུན་ཏུ་བརྟག་པ་སྣོད་བཅུད་འཁྲུལ་བའི་ཆས༔ གཞན་དབང་ལྷ་ཡི་སྐུ་གསུང་ཐུགས་བྱིན་བརླབས༔ ཡོངས་གྲུབ་བདེ་སྟོང་སྤྲོས་བྲལ་ཆོས་ཀྱི་སྐུ༔ བརྗོད་བྲལ་གཉུག་མ་བབས་ཀྱི་ལྷ་རུ་གསལ༔ གཉིས་པ་སྤྱན་འདྲེན་སྤོས་རོལ་དང་༔ གདུང་བའི་དབྱངས་ཀྱིས་འདི་སྐད་བསྐུལ༔ ཧཱུྃ༔ འོག་མིན་མཐའ་བྲལ་དབྱིངས་ཀྱི་དུར་ཁྲོད་ནས༔ རྒྱལ་ཀུན་ཕྲིན་ལས་རྡོ་རྗེ་ཕུར་པའི་ལྷ༔ ཐབས་ཤེས་ཡབ་ཡུམ་དབྱིངས་རིག་བདེ་སྟོང་ངང་༔ སྐྱེ་མེད་ཆོས་ཀྱི་སྐུ་ལས་མ་གཡོས་ཀྱང་༔ འགགས་མེད་གཟུགས་སྐུ་སྒྱུ་མའི་རོལ་གར་གྱིས༔ ཐོགས་མེད་སྤྲུལ་བསྒྱུར་སྤྱན་འདྲེན་གཤེགས་སུ་གསོལ༔ སྲས་མཆོག་ཀཱི་ལ་རིགས་བཞི་གཤེགས་སུ་གསོལ༔ འཇིགས་བྱེད་ཁྲོ་བཅུ་ཡབ་ཡུམ་གཤེགས་སུ་གསོལ༔ ཟ་གསོད་ཕྲ་ཐབས་ཉི་ཤུ་གཤེགས་སུ་གསོལ༔ སྒོ་སྐྱོང་ཁྲོ་རྒྱལ་རྣམ་བཞི་གཤེགས་སུ་གསོལ༔ ཕོ་ཉ་དབང་མོ་ཉེར་བརྒྱད་གཤེགས་སུ་གསོལ༔ ཕུར་སྲུང་དམ་ཅན་བཅུ་དྲུག་གཤེགས་སུ་གསོལ༔ གཞན་ཡང་ཕྲིན་ལས་གྲུབ་པའི་རིག་པ་འཛིན༔ བདག་ཉིད་པདྨ་ཡབ་ཡུམ་པྲ་ཧསྟི༔ དྲི་མེད་བཤེས་གཉེན་བལ་པོ་མཉྫུ་དང་༔ ཤཱཀྱ་དྷེ་ཝ་ལ་སོགས་དགུ་ལྡན་གྱི༔ བརྒྱུད་པའི་བླ་མ་རྒྱུད་སྡེ་བཞི་ཡི་ལྷ༔ ཉེར་བཞིའི་མཁའ་འགྲོ་ཡབ་ཡུམ་བརྒྱུད་གསུམ་གྱི༔ བཀའ་གཏེར་སྲུང་མ་མ་ལུས་གཤེགས་སུ་གསོལ༔ ཨོཾ་ཤྲཱི་བཛྲ་ཀཱི་ལི་ཀཱི་ལ་ཡ་ཛཿཧཱུྃ་བཾ་ཧོ༔ ཀྲོ་ཏ་ཀྲོ་དྷི་ཤྭ་རི་ཀིང་ཀ་ར་ཨེ་ཨ་ར་ལི་བཛྲ་ས་མ་ཡཱ་ཛ་ཛ༔ སྔགས་བརྗོད་དབྱིངས་ནས་སྤྱན་དྲངས་ལྷ༔ བསྐྱེད་པའི་ལྷ་དང་དབྱེར་མེད་བསམ༔ གསུམ་པ་བཞུགས་སུ་གསོལ་བ་ནི༔ ཧཱུྃ་ཧཱུྃ༔ གདོད་ནས་སྣོད་བཅུད་ལྷ་རུ་གྲུབ་པ་ཡང་༔ མ་རིག་དབང་གིས་བདག་རྟོག་སོ་སོར་བཟུང་༔ དམ་ཚིག་བསྐྱེད་པ་ཀུན་རྫོབ་རྒྱུ་མའི་ལྷར༔ དོན་དམ་ཡེ་ཤེས་རང་བྱུང་དབྱིངས་ཀྱི་ལྷ༔ འདུ་འབྲལ་མེད་པར་ཆུ་ལ་ཆུ་བཞག་ལྟར༔ གཉིས་མེད་རོ་གཅིག་བརྟན་པར་བཞུགས་སུ་གསོལ༔ བཛྲ་ཛྙཱ་ན་མུ་དྲ་ཏིཥྛ་ལྷན༔ བཞི་པ་འཕྲུལ་དགའི་ཚུལ་བཞིན་དུ༔ གུས་པས་བརྡ་ཕྱག་འཚལ་བ་ནི༔ ཧོ༔ གདོད་ནས་དག་པ་ཡེ་ཤེས་དབྱིངས་ཀྱི་ལྷ༔ རང་ལུས་རང་བྱུང་སྲི་ཞུ་མི་འཚལ་ཡང་༔ མ་དག་ཐ་མལ་བརྙས་པ་སྤང་བའི་ཕྱིར༔ རང་རྩལ་སྤྲུལ་པའི་ལྷ་དང་ལྷ་མོ་ཡིས༔ རང་བྱུང་དཀྱིལ་འཁོར་ལྷ་ལ་བརྡ་ཕྱག་འཚལ༔ ཨ་ཏི་པཱུ་ཧོ༔ པྲ་ཏིཙྪ་ཧོ༔ ལྔ་པ་མཆོད་པའི་བྱེ་བྲག་ལ༔ དང་པོ་ཕྱི་མཆོད་ཉེར་སྤྱོད་ནི༔ ཧཱུྃ༔ རབ་འབྱམས་ཞིང་གི་འཇིག་རྟེན་ཁམས་རྣམས་ལས༔ རྣམ་པར་བྱུང་བའི་མཆོད་རྫས་དཔག་མེད་པ༔ བློ་ཡིས་བླངས་ཏེ་དཀྱིལ་འཁོར་ལྷག་པའི་ལྷ༔ བཅོམ་ལྡན་དཔལ་ཆེན་རྡོ་རྗེ་གཞོན་ནུ་ཆེ༔ གསང་བའི་རིག་མ་འཁོར་ལོ་རྒྱས་འདེབས་མ༔ གཉིས་མེད་སྤྲུལ་པའི་རིགས་བཞི་ཀཱི་ལ་ཡ༔ ཕྱོགས་བཅུའི་གདོན་འདུལ་ཁྲོ་བཅུ་ཡབ་ཡུམ་སྲས༔ སྒོ་སྐྱོང་དབང་མོ་ཕུར་སྲུང་དམ་ཅན་ལ༔ གུས་པས་འབུལ་ལོ་དགྱེས་པར་བཞེས་སུ་གསོལ༔ དྲི་བཟང་སྤོས་ཆབ་ཁྲག་ཞག་མཆོད་ཡོན་དང་༔ མདངས་ལྡན་འདབ་སྟོང་ཞིང་བཅུའི་དབང་པོ་ལྔ༔ ལྷན་སྐྱེས་སྦྱར་བྱུང་དྲི་བསུང་ཚིལ་ཆེན་སྤོས༔ ཉི་ཟླ་ནོར་བུ་གློག་ཕྲེང་ཚིལ་ཆེན་སྒྲོན༔ ཁྲག་མཁྲིས་ག་བུར་བཟང་དྲུག་སྦྱར་བའི་སྐྱེམས༔ ལྷ་ཡི་བདུད་རྩི་ཤ་རུས་རྐང་མར་བཅུད༔ སྲབ་འཇམ་ལྷ་གོས་སྟག་གཟིག་ཞིང་ལྤགས་གོས༔ འབུད་དཀྲོལ་སྙན་འཇེབས་བསྟོད་དབྱངས་གླུ་གར་དང་༔ ཐོད་པ་གསང་བའི་རྔེའུ་ཆུང་རྔམས་བརྗིད་སྒྲ༔ འདོད་ཡོན་ལྔ་དང་རྒྱལ་སྲིད་རིན་ཆེན་བདུན༔ བཀྲ་ཤིས་རྟགས་རྫས་དར་དང་ཞིང་གི་འཕན༔ ཡོལ་བ་བླ་བྲེ་ལྡིང་གུར་སྤྱན་གཟིགས་ཚོགས༔ མ་ལུས་འཕགས་པ་ཀུན་བཟང་རྣམ་འཕྲུལ་ལྟར༔ བརྩེ་ཆེན་སྙིང་རྗེས་ཁྲོས་པའི་ལྷ་ལ་འབུལ༔ བཞེས་ནས་མཆོག་ཐུན་དངོས་གྲུབ་རྣམ་པ་གཉིས༔ མ་ཐོགས་མྱུར་དུ་རྟེན་འདིར་བསྩལ་དུ་གསོལ༔ ཨོཾ་ཤྲཱི་བཛྲ་ཀུ་མ་ར་ཀཱི་ལི་ཀཱི་ལ་ཡ་ཨརྒྷཾ་སོགས་ནས།ཤཔྟ་པཉྩ་ཀ་མ་གུ་ཎ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡཱ་པཱུ་ཛ་ཨཱཿཧཱུྃ༔ གཉིས་པ་ནང་གི་མཆོད་པ་ལ༔ བདུད་རྩི་སྨན་དང་རཀྟ་ཁྲག༔ དམ་རྫས་གཏོར་མཆོད་རྣམ་གསུམ་ལས༔ དང་པོ་སྨན་གྱི་མཆོད་པ་ནི༔ ཧཱུྃ༔ རང་བྱུང་སྣོད་མཆོག་མཚན་ལྡན་ཐོད་པ་རུ༔ ཡབ་ཡུམ་རྒྱུ་རྐྱེན་སྦྱར་དང་ཙནྡན་གྱི༔ རྩ་བ་སྙིང་པོ་མེ་ཏོག་འབྲས་བུ་དང་༔ ལོ་འདབ་ལ་སོགས་རྩ་བརྒྱད་ཡན་ལག་སྟོང་༔ དུག་ལྔ་སེལ་དང་རིགས་ལྔ་སྒྲུབ་པའི་རྫས༔ སྐུ་ལྔ་མངོན་སྩོལ་འཆི་མེད་ཨ་མྲྀ་ཏ༔ དཔལ་ཆེན་ཡབ་ཡུམ་སྲས་དང་སྤྲུལ་འཁོར་བཅས༔ འབུལ་ལོ་མཐུ་དབང་སྲིད་ནོར་ཚེ་དང་ཆོས༔ དངོས་གྲུབ་གང་འདོད་མྱུར་བར་བསྩལ་དུ་གསོལ༔ ཨོཾ་ཨཱ༔ཧཱུྃ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ སྨན་ཐོད་བདུད་རྩི་མཐེབ་སྲིན་གྱིས༔ བླངས་ཏེ་བརྒྱུད་པའི་བླ་མ་ལ༔ མཚན་དོན་སྦྱར་ཏེ་འདི་བཞིན་འབུལ༔ ཨོཾ་ཨཱ༔ཧཱུྃ༔ རིགས་བདག་སྟོན་པ་ཀུན་བཟང་ཆེ་བའི་མཆོག༔ རིགས་བརྒྱའི་སྤྱི་མྱེས་རྡོར་འཆང་རྡོ་རྗེ་སེམས༔ མཁའ་འགྲོའི་གཙོ་མོ་ལས་ཀྱི་དབང་མོ་ཆེར༔ སྨན་མཆོད་འབུལ་ལོ་མཆོག་ཐུན་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ རིག་འཛིན་བརྒྱད་དང་པདྨ་ཐོད་ཕྲེང་རྩལ༔ བཀའ་བབས་མི་བརྒྱད་གཟུངས་མ་མཁར་ཆེན་བཟའ༔ བརྡ་འགྲོལ་བླ་མ་བྱང་ཆུབ་གླིང་པའི་ཞབས༔ སྨན་མཆོད་འབུལ་ལོ་མཆོག་ཐུན་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ༈ བརྒྱུད་པའི་སྨན་མཆོད་ནི། ཌཱཀྐི་མཚོ་རྒྱལ་རྣམ་རོལ་ལུང་རིག་གླིང་། ཨ་ཙར་ས་ལེ་དངོས་སྤྲུལ་ཕན་པའི་མཚན། །ཕུར་པའི་བཀའ་བབས་གཏེར་སྟོན་ཆོས་བདག་ལ། །སྨན་མཆོད་འབུལ་ལོ་མཆོག་ཐུན་དངོས་གྲུབ་སྩོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧཱི༔ སྤྲུལ་པའི་སྐུའི་ཞལ་གསུངས་དངོས་སོ། མཆན། ཆོས་བློན་དཔལ་བརྩེགས་ཟློས་གར་ཨ་ཡུརྟ། །རྒྱལ་བའི་བློ་གྲོས་རྣམ་རོལ་ཨོ་ཌི་ཡན། །རྩ་བརྒྱུད་དཔལ་ལྡན་བླ་མའི་ཚོགས་རྣམས་ལ། །སྨན་མཆོད་འབུལ་ལོ་མཆོག་ཐུན་དངོས་གྲུབ་སྩོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། །ཞེས་པའང་ཕན་མིང་པས་སོ། །དཔལ་ཆེན་རྒྱལ་ཀུན་ཕྲིན་ལས་གཅིག་བསྡུས་པ༔ རྡོ་རྗེ་གཞོན་ནུ་འཁོར་ལོ་རྒྱས་འདེབས་མ༔ སྲས་མཆོག་རིགས་བཞི་ཁྲོ་བཅུ་སྒོ་སྐྱོང་ལ༔ སྨན་མཆོད་འབུལ་ལོ་མཆོག་ཐུན་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ དབང་ཕྱུག་ཉེར་བརྒྱད་ཕུར་སྲུང་བཅུ་དྲུག་དང་༔ ཕུར་པ་གྲུབ་པའི་རིག་འཛིན་བརྒྱུད་པའི་ཚོགས༔ རྩ་གསུམ་སྲུང་མ་དམ་ཅན་གཏེར་བདག་ལ༔ སྨན་མཆོད་འབུལ་ལོ་མཆོག་ཐུན་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ དངོས་གྲུབ་ལེན་པ་ནི། ཟག་མེད་བདུད་རྩི་ཐབས་ཀྱི་ཨ་མྲྀ་ཏ༔ ཤེས་རབ་རྨ་མེད་པདྨའི་སྣོད་དུ་བསྐྱིལ༔ མཐེབ་སྲིན་ཧཱུྃ་མུཾ་དམ་ཚིག་ལྕེ་ཡིས་བླངས༔ སྣང་སྲིད་བདེ་སྟོང་གསང་གསུམ་དངོས་གྲུབ་སྩོལ༔ རང་གི་གནས་གསུམ་བདུད་རྩི་མྱང་༔ ཀཱ་ཡ་སིདྡྷི་ཨོཾ༔ ཝཀྐ་སིདྡྷི་ཨཱ༔ ཙིཏྟ་སིདྡྷི་ཧཱུྃ༔ གཉིས་པ་རཀྟ་ཚར་གསུམ་ལས༔ གདབ་ཕུར་ཕྱོག་བཅུར་འདྲིལ་ལ་གདེངས༔ ཕྱོགས་བཅུའི་དགྲ་བགེགས་མ་ལུས་ཀུན༔ ཕུར་རྩེར་ཁྲག་གི་གྲོད་པ་རུ༔ དྲིལ་ཏེ་གདབ་པར་སྟོང་ཁམས་ཀུན༔ རཀྟའི་རྦ་ཀློང་འཁྲུགས་པར་བསམ༔ ཧཱུྃ་ཧཱུྃ༔ བདག་ཉིད་དཔལ་ཆེན་སྤྲུལ་པ་ལས༔ ཧཱུྃ་དཀར་ལ་སོགས་ཁྲོ་བོ་བཅུས༔ ཕྱོགས་བཅུའི་གནོད་བྱེད་དགྲ་གདོན་བགེགས༔ བསྒྲལ་བའི་རཀྟ་ཁྲག་མཚོར་འཁྱིལ༔ འཁོར་བ་དོང་ནས་སྤྲུག་སྟོང་ཕྱིར༔ རཀྟའི་མཆོད་པ་བཞེས་སུ་གསོལ༔ ཨོཾ་བཛྲ་ཀྲོ་ཏ་ཀཱི་ལི་ཀཱི་ལ་ཡ་ཧཱུྃ་ཕཊ༔ མ་ཧཱ་རཀྟ་ལ་ཁ་རཾ་ཁཱ་ཧཱི༔ གཉིས་པ་བྱེ་བྲག་དགོས་དགྲ་ནི༔ བསྒྲལ་ཕྱིར་རཀྟའི་ཐིགས་པ་སྦྲེངས༔ ཧཱུྃ༔ ཁྲོ་ཆེན་འབར་བ་རྡོ་རྗེ་གཞོན་ནུ་ཆེ༔ ཞིང་བཅུ་མི་བསྲུན་བདག་ལ་སྡང་བའི་དགྲ༔ བྱད་མ་རྦོད་གཏོང་དམ་སྲི་གནོད་བྱེད་བགེགས༔ སོད་ཅིག་སྲས་མཆོག་ཀཱི་ལ་རིགས་བཞིའི་ཚོགས༔ ཁྱེད་ཀྱི་ཐུགས་དམ་གཉེན་པོའི་དུས་ལ་བབས༔ རཀྟའི་མཆོད་པ་གཙོ་འཁོར་ཡོངས་རྫོགས་ཀྱིས༔ བཞེས་ནས་རྣལ་འབྱོར་མཐུ་དཔུང་བསྐྱེད་དུ་གསོལ༔ མ་ཧཱ་རཀྟ་ལ་ཁ་རཾ་ཁཱ་ཧི༔ གསུམ་པ་བདེ་སྟོང་རཀྟ་ཡིས༔ འཁོར་འདས་རོ་མཉམ་མཆོད་པ་ནི༔ ཧཱུྃ༔ ཁམས་གསུམ་མ་ལུས་འདོད་ཆགས་རྣམ་གསུམ་གྱིས༔ ཆགས་པའི་རྒྱུ་ལས་ཁྲག་ཞག་མཁའ་རུ་འཁྱིལ༔ བདེ་བ་ཆེན་པོའི་རྟོག་བྲལ་མཉམ་པའི་ཕྱིར༔ ལྷག་པའི་ལྷ་མཆོག་རྡོ་རྗེ་གཞོན་ནུ་ཆེ༔ ཡབ་ཡུམ་གཙོ་འཁོར་སྤྲུལ་དང་ཡང་སྤྲུལ་བཅས༔ བདེ་སྟོང་རཀྟའི་མཆོད་པ་བཞེས་སུ་གསོལ༔ མ་ཧཱ་སུ་ཁ་རཀྟ་ཁ་རཾ་ཁཱ་ཧཱི༔ གསུམ་པ་གཏོར་མའི་མཆོད་པ་ནི༔ དཔལ་གཏོར་སྨན་དང་རཀྟས་བྲན༔ ཧཱུྃ་ཧཱུྃ༔ སྟོང་པ་དབྱིངས་ཀློང་སྣོད་ཀྱི་གཏོར་གཞོང་དུ༔ གསལ་བ་འགགས་མེད་བཅུད་ཀྱི་གཏོར་མ་བཤམས༔ གཉིས་མེད་མཉམ་པའི་དམ་རྫས་མཆོད་པ་ཆེ༔ རྡོ་རྗེ་གཞོན་ནུའི་ལྷ་ཚོགས་རྣམས་ལ་འབུལ༔ ཀུན་རྫོབ་རྟེན་འབྲེལ་བདེ་སྐྱོང་སྣོད་མཆོག་ཏུ༔ གཉིས་སྣང་དགྲ་བགེགས་བསྒྲལ་བའི་ཤ་ཁྲག་རུས༔ དོན་དམ་ཟག་མེད་བདུད་རྩིར་བྱིན་བརླབས་ཏེ༔ གཏོར་མའི་མཆོད་པ་དཔལ་ཆེན་ལྷ་ལ་འབུལ༔ བཞེས་ནས་མཆོག་ཐུན་དངོས་གྲུབ་བསྩལ་དུ་གསོལ༔ མ་ཧཱ་བྷ་ལིང་ཏ་ཁ་རཾ་ཁཱ་ཧཱི༔ གསུམ་པ་གསང་མཆོད་གླུ་གར་དང་༔ སྦྱོར་དང་སྒྲོལ་བ་རྣམ་བཞི་ལས༔ དང་པོ་གླུ་གར་མཆོད་པ་ནི༔ ཧཱུྃ༔ རྡོ་རྗེ་ལུས་ཀྱི་རྩ་གནས་སུ༔ ཀུན་རྫོབ་ཡི་གེའི་འཕྲོ་འདུ་ལས༔ ལྷ་རྣམས་མཆོད་དང་ལས་བཞི་ཡི༔ དངོས་གྲུབ་མཆོག་ལ་དབང་བའི་ཕྱིར༔ དོན་དམ་དབྱིངས་སུ་རྡོ་རྗེའི་གླུ༔ སྐྱེ་འགག་མེད་པར་བླང་བར་བྱ༔ མ་ཧཱ་ཛྙཱ་ན་སཾ་གིརྟི་པཱུ་ཛ་ཨཱ་ཧོ༔ ཧཱུྃ༔ རང་ལུས་སྟངས་སྟབས་ལྷ་ཡི་ཕྱག་རྒྱ་སྟེ༔ གསལ་བ་གསུམ་གྱི་ཏིང་འཛིན་ལ་གནས་པས༔ རྡོ་རྗེ་ཕུར་པ་གཙོ་འཁོར་ཡོངས་རྫོགས་ཀྱི༔ མི་སྡུག་གར་དགུའི་རྣམ་རོལ་མཆོད་པ་འབུལ༔ བཞེས་ནས་བདུད་དཔུང་གཞོམས་དང་འགྲོ་བ་ཀུན༔ ལས་བཞིའི་མཐུ་ཡིས་མཆོག་གི་གོ་འཕང་ལ༔ མྱུར་དུ་འགོད་པའི་དངོས་གྲུབ་བསྩལ་དུ་གསོལ༔ མ་ཧཱ་མུ་དྲ་ནིརྟི་ཛྙཱ་ན་པཱུ་ཛ་ཨཱཿཧཱུྃ༔ གཉིས་པ་སྦྱོར་སྒྲོལ་མཆོད་པ་ནི༔ ཧཱུྃ༔ ཡུམ་གྱི་མཁའ་གསང་ཨེ་ལས་ཉི་དཀྱིལ་དབུས༔ པདྨ་དམར་པོ་འདབ་བརྒྱད་མཱུཾཿགྱིས་མཚན༔ ཡབ་ཀྱི་རྡོ་རྗེ་ཧཱུྃ་ལས་རྩེ་ལྔ་བའི༔ ལྟེ་བར་ཟླ་བ་ཨོཾ་གྱིས་མཚན་པ་ཟུང་༔ ཐབས་ཤེས་སྙོམས་འཇུག་ཆགས་པ་ཆེན་པོའི་དབྱིངས༔ བརྗོད་བྲལ་རྟོག་མེད་མཉམ་པའི་སྦྱོར་མཆོད་འདིས༔ དཀྱིལ་འཁོར་ལྷ་ཚོགས་ཟག་མེད་བདེ་ཀློང་དུ༔ དགྱེས་ཤིང་མཆོག་ཏུ་མི་འགྱུར་ཁ་སྦྱོར་བདུན༔ རྣལ་འབྱོར་ཚེ་འདིར་འགྲུབ་པའི་དངོས་གྲུབ་སྩོལ༔ མ་ཧཱ་ར་ག་ཛྙཱ་ན་ཨེ་ཝཾ་བཛྲ་པདྨ་ཛཿཧཱུྃ་བཾ་ཧོ༔ པཱུ་ཛ་ཨཱཿཧཱུྃ༔ ཧཱུྃ་ཧཱུྃ༔ སྟོང་ཆེན་བློ་འདས་ལྟ་བའི་བྲུབ་ཁུང་དུ༔ ཡེངས་འཁྲུལ་གཉིས་མེད་སྒོམ་པའི་ཕྱག་རྒྱ་ཡིས༔ རྣམ་རྟོག་རང་གར་ཡན་པའི་དགྲ་དང་བགེགས༔ མ་ལུས་འགུགས་འཆིང་སྡོམ་མྱོས་དབྱིངས་སུ་བསྒྲལ༔ བསྟན་དང་འགྲོ་ལ་སྡང་ཞེན་ཚར་གཅོད་ཤོག༔ མ་ཧཱ་པཉྩ་ཏ་ན་ག་ན་པཱུ་ཛ་ཨཱཿཧཱུྃ༔ དྲུག་པ་བསྟོད་པ་བྱ་བ་ནི༔ ཧཱུྃ་ཧཱུྃ༔ རབ་འབྱམས་རྒྱལ་བ་ཀུན་གྱི་ཕྲིན་ལས་ཆེ༔ སྒྲུབ་སྡེ་ཆེན་པོ་བརྒྱད་ཀྱི་ཕོ་ཉ་བ༔ བར་ཆད་དམ་སྲི་བདུད་དཔུང་ཚར་གཅོད་པའི༔ རྡོ་རྗེ་གཞོན་ནུའི་ལྷ་ལ་ཕྱག་འཚལ་བསྟོད༔ སྐུ་ནི་མི་སྡུག་དྲག་ཤུལ་དཔའ་བའི་ཉམས༔ མཐིང་ནག་ཞལ་གསུམ་བཞད་གཤེ་རྔམས་ཤིང་འཁྲུགས༔ རྡོ་རྗེ་རྩེ་དགུས་ཁམས་གསུམ་ས་དགུ་སྒྲོལ༔ གནམ་ལྕགས་གྲི་གུག་སྐྱེ་ཤིའི་རྩ་བ་གཅོད༔ ཡེ་ཤེས་མེ་ཡིས་དུག་ལྔའི་བག་ཆགས་བསྲེགས༔ དུང་ཁྲག་ཞལ་གསོལ་རྟོག་ཚོགས་དབྱིངས་སུ་སྦྱོར༔ རི་རབ་ཕུར་བུས་སྲིད་གསུམ་དམ་སྲི་འདུལ༔ ཤེས་རབ་ཡུམ་འཁྲིལ་འཁོར་འདས་མཉམ་པར་རོལ༔ རྫུ་འཕྲུལ་ཞབས་བཞིས་བདུད་བཞིའི་མགོ་བོ་གནོན༔ བརྡ་རྟགས་ཡོན་ཏན་རྫོགས་ལ་ཕྱག་འཚལ་བསྟོད༔ ཧཱུྃ་ཕཊ་བྷྱོ་སྒྲའི་གསུང་གི་གད་རྒྱངས་སྒྲོག༔ གཉིས་སྣང་གདོན་ཚོགས་མ་ལུས་ཟིལ་གྱིས་གནོན༔ ཞིང་བཅུའི་ཀླད་འགེམས་རྔམས་པའི་ང་རོ་ཅན༔ བྱད་མ་རྦོད་གཏོང་རིག་སྔགས་ནུས་པ་གཞོམས༔ རྡོ་རྗེའི་བཞད་སྒྲས་ས་གསུམ་གཡོ་ལ་བསྟོད༔ སྐྱེ་མེད་ངང་ནས་འགག་མེད་སྙིང་རྗེའི་རྩལ༔ རྡོ་རྗེ་ཁྲོས་པས་མ་དག་ཞེ་སྡང་འཇོམས༔ བློ་འདས་དབྱིངས་ནས་སྤྲུལ་བསྒྱུར་ཅིར་ཡང་སྟོན༔ གདུལ་དཀའི་སྙིགས་མའི་རང་གཟུགས་འབྱུང་པོའི་ཚོགས༔ མ་ལུས་བརྗོད་མེད་དབྱིངས་སུ་འདུལ་ལ་བསྟོད༔ ཐུགས་ཀྱི་སྲས་མཆོག་རིགས་བཞི་ཀཱི་ལ་ཡ༔ དུག་ལྔའི་རྩལ་ལས་ཤར་བའི་ལོག་འདྲེན་རྣམས༔ ལྔ་ལྡན་ཡེ་ཤེས་ཀློང་དུ་སྒྲོལ་མཛད་པ༔ ལས་བཞིའི་ཕྲིན་ལས་མཛད་ལ་ཕྱག་འཚལ་བསྟོད༔ སྲོག་གཅོད་ལ་སོགས་མི་དགེའི་རྒྱུ་འབྲས་བཅུ༔ གནས་ནས་སྟོང་ཞིང་སྦྱིན་སོགས་ཕ་རོལ་ཕྱིན༔ ས་བཅུའི་དབྱིངས་སུ་འགྲོ་བ་མ་ལུས་པ༔ ཡང་དག་རྫོགས་སངས་རྒྱས་ཀྱི་སར་འགོད་པའི༔ ཡེ་ཤེས་ཁྲོ་བཅུ་སྟོང་ཆེན་ཡུམ་དང་སྦྱོར༔ ཉེ་ཉོན་ཉི་ཤུ་གནས་དག་ཕྲ་མེན་རྣམས༔ འཕྲུལ་དགའི་ལྷ་བཞིན་རང་ལ་རང་ཤར་བ༔ གཙོ་འཁོར་སྤྲུལ་པའི་རྣམ་པར་སྣང་ལ་བསྟོད༔ དཔལ་ཆེན་བཀའ་བཞིན་རྣལ་འབྱོར་སྒྲུབ་མཆོག་སྐྱོང་༔ ལོག་འདྲེན་དཔུང་བཅོམ་དཀྱིལ་འཁོར་མུ་རན་སྐྱོང་༔ དབང་ཕྱུག་ཉེར་བརྒྱད་ཕུར་སྲུང་བཅུ་དྲུག་སོགས༔ ལྷ་ཚོགས་འཁོར་དང་བཅས་ལ་ཕྱག་འཚལ་བསྟོད༔ བདུན་པ་བཤགས་པ་བྱ་བ་ནི༔ ཧཱུྃ༔ རབ་འབྱམས་དཀྱིལ་འཁོར་ཁྱབ་བདག་ཧེ་རུ་ཀ༔ རྡོ་རྗེ་གཞོན་ནུ་ཡབ་ཡུམ་སྲས་འཁོར་བཅས༔ མ་ལུས་འཁོར་བཅས་བདག་ལ་བརྩེར་དགོངས་ནས༔ སྡིག་ལྡན་བདག་གི་ཉམས་ཆག་བཤག་ཏུ་གསོལ༔ བདག་གི་ཚེ་རབས་སྔོན་ནས་ད་ལྟའི་བར༔ བཀའ་དྲིན་གསུམ་ལྡན་རྩ་བའི་བླ་མ་དང་༔ ཡི་དམ་ཞི་ཁྲོ་མཁའ་འགྲོ་དམ་ཅན་ཚོགས༔ ཁྱད་པར་དཔལ་ཆེན་ཕུར་པའི་ལྷ་ཚོགས་ཀྱི༔ སྐུ་གསུང་ཐུགས་དང་རྩ་བ་ཡན་ལག་གི༔ དམ་ཚིག་འགལ་ཉམས་འདས་རལ་ཅི་སོང་བ༔ སྙིང་ནས་བཤགས་སོ་དག་ཚངས་དངོས་གྲུབ་སྩོལ༔ ཧེ་རུ་ཀ་ཡི་ཡིག་བརྒྱས་བཤགས༔ བརྒྱད་པ་འཛབ་ཀྱི་རིམ་པ་ལ༔ བསྙེན་དང་སྒྲུབ་པ་ལས་སྦྱོར་རོ༔ དང་པོ་བསྙེན་པའི་རིམ་པ་ནི༔ བདག་ཉིད་ཁྲོ་མཆོག་བཛྲ་ཀུ་མ་རའི༔ ཐུགས་དབུས་དྭངས་མ་འོད་ལྔའི་གོང་བུ་རུ༔ པད་ཟླའི་གདན་ལ་རྡོར་སེམས་སྐུ་མདོག་མཐིང་༔ ལོངས་སྐུའི་རྒྱན་རྫོགས་ཕྱག་གཡས་རྡོ་རྗེ་ནི༔ རྩེ་ལྔ་ཐུགས་ཀར་གཏོད་ཚུལ་ཕྱག་གཡོན་གྱིས༔ དྲིལ་བུ་དཀུར་བསྟེན་སྙེམས་མ་ཡུམ་དང་འཁྲིལ༔ ཟུང་འཇུག་ཐུགས་ཀྱི་ཙིཏྟ་རིན་པོ་ཆེ༔ ཨིནྡྲ་ནི་ལའི་རྡོ་རྗེ་རྩེ་ལྔ་པའི༔ ལྟེ་བར་ཉི་སྟེང་ཧཱུྃ་མཐིང་མཐའ་མ་རུ༔ ཀཱི་ལ་འབྲུ་དགུ་འོད་ལྔའི་ཁ་དོག་ཅན༔ སྔགས་ཕྲེང་གཡས་བསྐོར་འོད་ཀྱིས་རྒྱལ་བ་མཆོད༔ བྱིན་རླབས་ནུས་པ་འབྲུ་གསུམ་རྣམ་པར་བསྡུས༔ སྐུ་དང་སྔགས་འཁོར་ཏིང་འཛིན་སེམས་དཔའ་ལ༔ ཐིམ་པས་འཁོར་འདས་སྤྱི་དཔལ་ཆེན་པོར་གྱུར༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ༔ ཞེས་པའི་ཡི་གེ་འབྲུ་དགུ་འདི༔ དུས་བསྙེན་ཟླ་བ་བཅུ་དྲུག་ལ༔ གྲངས་བསྙེན་འབུམ་ཕྲག་དགུ་ཡིན་ནོ༔ མཚན་མའི་བསྙེན་པ་རྟགས་དང་སྦྱར༔ རྟགས་ལ་གང་ཟག་དབང་པོ་ཡི༔ ཁྱད་པར་དབང་པོ་རབ་ལ་ནི༔ དངོས་སུ་ལྷ་ཞལ་མཐོང་བ་དང་༔ ལུང་བསྟན་ཆོས་གསུངས་རྗེས་སུ་འཛིན༔ འབྲིང་ལ་ཉམས་དང་རྟོགས་པའི་ངོར༔ སྐུ་དང་ཕྱག་མཚན་ཡི་གེ་སོགས༔ རང་བྱུང་མཐོང་ཐོས་བརྒྱུད་གསུམ་གྱི༔ རིག་འཛིན་བླ་མས་བྱིན་བརླབ་འགྱུར༔ ཐ་མར་རྨི་ལམ་དག་ཏུ་ཡང་༔ ཕུར་པ་རྙེད་དང་ཉི་ཟླ་ལ༔ ཞོན་དང་འོད་བྱུང་མེ་ཏོག་འཐོར༔ ཁྲི་ལ་འཛེགས་དང་སྐས་མཐོན་པོར༔ གྱེན་འགྲོ་གོས་གསར་གྱོན་པ་སོགས༔ དགེ་བའི་ལྟས་བཟང་འབྱུང་བར་ངེས༔ ས་མ་ཡཱ༔ གཉིས་པ་སྒྲུབ་པའི་རིམ་པ་ནི༔ གཙོ་འཁོར་ཀུན་གྱི་རྩ་བའི་སྔགས༔ རིམ་པ་འདི་བཞིན་ཉམས་སུ་ལེན༔ གཙོ་བོའི་ཐུགས་ཀར་རྡོར་སེམས་ཡེ་ཤེས་སེམས༔ དེ་ཡི་ཐུགས་ཀར་ཏིང་འཛིན་སེམས་དཔའ་ཧཱུྃ༔ ཡིག་འབྲུ་བཅོ་ལྔ་སྔགས་ཕྲེང་ལྗང་ཁུ་ནི༔ འོད་ཟེར་མེ་སྟག་ཚྭ་ཚྭ་དང་བཅས་པ༔ གཡས་སུ་འཁོར་ལས་འོད་ཟེར་ཕྱོགས་བཅུར་འཕྲོས༔ བར་ཆད་དམ་སྲི་བདུད་དཔུང་ཐལ་བར་བརླག༔ སྣང་སྲིད་ལྷ་དང་སྔགས་སྒྲ་འབྲུག་སྟོང་ལྡིར༔ ཡེངས་མེད་ལྟ་བའི་ཏིང་འཛིན་ངང་མདངས་བསྐྱངས༔ དེའི་ངང་སྔགས་འདི་བདུན་འབུམ་ལ་སོགས་བཟླ༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷཱཾན་བཾ་ཧཱུྃ་ཕཊ༔ ཅེས་དང་སྲས་མཆོག་རིགས་བཞིའི་སྔགས་དམིགས་ནི༔ བདག་ཉིད་དཔལ་ཆེན་རྡོ་རྗེ་གཞོན་ནུ་ཡི༔ ཐུགས་ཀའི་ཧཱུྃ་ལས་འོད་ཟེར་དཀར་པོ་འཕྲོས༔ ཞི་བའི་ལས་མཛད་བཛྲ་ཀཱི་ལ་ཡའི༔ ཐུགས་ཀར་ཟླ་སྟེང་ཧཱུྃ་ཡིག་དཀར་པོའི་མཐར༔ སྔགས་ཀྱིས་བསྐོར་བས་རྒྱུད་བསྐུལ་འོད་ཀྱི་ཟེར༔ དྲི་ཟ་ལ་སོགས་ཤར་ཕྱོགས་གདོན་ཀུན་ལ༔ ཕོག་པས་གནོད་སེམས་ཞི་བའི་ལས་མཛད་གྱུར༔ ཨོཾ་བཛྲ་ཀྲོ་ཏ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ བྱམས་པའི་སེམས་ཀྱིས་བརྒྱ་སྟོང་ཁྲི་འབུམ་བཟླ༔ སླར་ཡང་བདག་གི་ཐུགས་ཀའི་འོད་ཀྱི་ཟེར༔ རྒྱས་པའི་ལས་མཛད་རཏྣ་ཀཱི་ལ་ཡའི༔ ཐུགས་སྲོག་རིན་ཆེན་ཟུར་བརྒྱད་ཧཱུྃ་ཡིག་མཐར༔ སྔགས་ཀྱིས་བསྐོར་བས་རྒྱུད་བསྐུལ་དེ་ལས་ཟེར༔ གཤིན་རྗེ་ལ་སོགས་གནོད་བྱེད་ཀུན་ལ་ཕོག༔ དེ་དག་ཚར་བཅད་ཚེ་བསོད་རང་ལ་བསྡུས༔ དཔལ་འབྱོར་ལེགས་ཚོགས་འདོད་དགུ་རྒྱས་པར་གྱུར༔ ཨོཾ་བཛྲ་ཀྲོ་ཏ་རཏྣ་ཀཱི་ལི་ཀཱི་ལ་ཡ་ཧཱུྃ་ཕཊ༔ གཞན་ཕན་བྱང་ཆུབ་སེམས་ཀྱིས་ཅི་མང་བཟླ༔ བདག་ཉིད་ཐུགས་ལས་འོད་ཟེར་དམར་པོ་ནི༔ གློག་ཞགས་ལྟར་འཕྲོས་དབང་གི་ཧེ་རུ་ཀ༔ པདྨ་ཀཱི་ལ་ཡ་ཡི་ཐུགས་རྒྱུད་བསྐུལ༔ ཐུགས་སྲོག་པདྨ་དམར་པོ་འདབ་བརྒྱད་སྟེང་༔ ཧཱུྃ་མཐར་སྔགས་ཕྲེང་འཁོར་ལས་འོད་ཀྱི་ཟེར༔ ལེ་བརྒན་མདོག་འདྲ་ཀླུ་དབང་ལ་སོགས་པའི༔ གཟུགས་ཅན་གཟུགས་མེད་འགྲོ་བ་ཀུན་ལ་ཕོག༔ མོས་ཚོགས་རྣམ་བཞི་བདག་གི་བྲན་དུ་བཀོལ༔ སྣང་སྲིད་ཐམས་ཅད་དབང་དུ་འདུས་པར་བསམ༔ ཨོཾ་བཛྲ་ཀྲོ་ཏ་པདྨ་ཀཱི་ལི་ཀཱི་ལ་ཡ་ཧཱུྃ་ཕཊ༔ རྗེས་ཆགས་དགའ་བའི་སེམས་ཀྱིས་བརྒྱ་སྟོང་བཟླ༔ བདག་གི་ཐུགས་ལས་འོད་ཟེར་མེའི་ཚྭ་ཚྭ༔ དྲག་པོའི་ལས་མཛད་ཀརྨ་ཧེ་རུ་ཀའི༔ ཐུགས་སྲོག་ཉི་སྟེང་ཧཱུྃ་ལྗང་མཐའ་བསྐོར་དུ༔ སྔགས་ཀྱིས་བསྐོར་བས་རྒྱུད་བསྐུལ་དེ་ལས་ཟེར༔ གནོད་སྦྱིན་ལ་སོགས་གཟུགས་ཅན་གཟུགས་མེད་ཀྱི༔ སྡང་སེམས་ལྡན་པའི་ལོག་འདྲེན་ཀུན་ལ་ཕོག༔ ཀུན་ཀྱང་རྩྭ་སྦུར་མེ་ཡིས་བསྲེགས་པ་བཞིན༔ ཞིང་བཅུའི་ཚོགས་ཀུན་མིང་ཡང་མེད་པར་བསམ༔ ཨོཾ་བཛྲ་ཀྲོ་ཏ་ཀརྨ་ཀཱི་ལི་ཀཱི་ལ་ཡ་ཧཱུྃ་ཕཊ༔ བཏང་སྙོམས་མཉམ་པའི་སེམས་ཀྱིས་སྔགས་མང་བཟླ༔ དེ་བཞིན་བདག་གི་ཐུགས་ཀའི་འོད་ཟེར་གྱིས༔ ཧཱུྃ་དཀར་ལ་སོགས་ཁྲོ་བཅུའི་ཐུགས་རྒྱུད་བསྐུལ༔ སྟེང་འོག་ཕྱོགས་བཅུའི་གདོན་ཚོགས་ཚར་བཅད་ནས༔ བར་ཆད་བདུད་ཀྱི་གཡུལ་ངོ་ལས་རྒྱལ་ཏེ༔ སྣང་སྲིད་འཁོར་འདས་སྤྱི་དཔལ་ཆེན་པོར་གྱུར༔ ཁྲོ་བཅུའི་སྔགས་སོགས་རིམ་བཞིན་བཟླ་བར་བྱ༔ ཞེས། ཁྲོ་བཅུ་ཡབ་ཡུམ་ཟ་གསོད་ལས་སྔགས་ནི༔ ཨོཾ་བཛྲ་ཀྲོ་ཏ་ཧཱུྃ་ཀ་ར་ཧཱུྃ་ཕཊ༔ ཨོཾ་བཛྲ་ཀྲོ་ཏི་བ་ར་ཡ་ཏི་ཧཱུྃ༔ གརྫ་གརྫ་ཧཱུྃ་ཕཊ༔ ཨོཾ་བཛྲ་ཀྲོ་ཏ་བི་ཛ་ཡ་ཧཱུྃ༔ ཨོཾ་བཛྲ་ཀྲོ་ཏི་ལ་སི་ཀེ་ཧཱུྃ༔ ཧ་ན་ཧ་ན་ཧཱུྃ་ཕཊ༔ ཨོཾ་བཛྲ་ཀྲོ་ཏ་ནི་ལ་ཏནྚ་ཧཱུྃ༔ ཨོཾ་བཛྲ་ཀྲོ་ཏི་ཏ་ན་བ་ཏི་ཧཱུྃ༔ ད་ཧ་ད་ཧ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཡ་མན་ཏ་ཀ་ཧཱུྃ༔ ཨོཾ་བཛྲ་ཀྲོ་ཏི་ཙན་དྷ་ལི་ར་ཡ་ཏི་ཧཱུྃ༔ པ་ཙ་པ་ཙ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨརྱ་ཨ་ཙ་ལ་ཧཱུྃ༔ ཨོཾ་བཛྲ་ཀྲོ་ཏི་ཤྭ་ཡ་བ་ཏི་ཧཱུྃ༔ བན་དྷ་བན་དྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཧ་ཡ་གྷྲྀ་ཝ་ཧཱུྃ༔ ཨོཾ་བཛྲ་ཀྲོ་ཏི་ཙན་དྷ་ལི་ཧཱུྃ༔ ཧུ་ལུ་ཧུ་ལུ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨ་པ་ར་ཙིཏྟ་ཧཱུྃ༔ ཨོཾ་བཛྲ་ཀྲོ་ཏི་མུ་ཧ་ལ་ཧཱུྃ༔ ཏིཥྛ་ཏིཥྛ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཨ་མྲྀ་ཏ་ཀུནྚ་ལི་ཧཱུྃ༔ ཨོཾ་བཛྲ་ཀྲོ་ཏི་བ་ཡ་ཏི་ཧཱུྃ༔ ཚིནྡྷ་ཚིནྡྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་ཏྲཻ་ལོ་ཀྱ་བི་ཛ་ཡ་ཧཱུྃ༔ ཨོཾ་བཛྲ་ཀྲོ་ཏི་མ་ར་ན་ཧཱུྃ༔ བྷིནྡྷ་བྷིནྡྷ་ཧཱུྃ་ཕཊ༔ ཨོཾ་བཛྲ་ཀྲོ་ཏ་མ་ཧཱ་བྷ་ལ་ཧཱུྃ༔ ཨོཾ་བཛྲ་ཀྲོ་ཏི་ཙན་ཏ་ཡ་ཏི་ཧཱུྃ༔ སྥོ་ཊ་སྥོ་ཊ་ཧཱུྃ་ཕཊ༔ སྒོ་མ་བཞི་དང་ཕུར་སྲུང་ལ་སོགས་པའི༔ སྔགས་ནི་ལས་སྦྱོར་སྐབས་སུ་ཤེས་པར་བྱ༔ ཞེས་སྒོ་མ་བཞི་ནི༔ ཨོཾ་བཛྲ་པག་ཤུ་ཏ་མུ་ཁ་ཧཱུྃ༔ བཛྲ་ཨཾ་ཀུ་ཤ་ཛ༔ ཨོཾ་བཛྲ་བ་ཡ་བཻ་མུ་ཁ་ཧཱུྃ༔ བཛྲ་པ་ཤ་ཧཱུྃ༔ ཨོཾ་བཛྲ་བ་ཡ་ཏི་མུ་ཁ་ཧཱུྃ༔ བཛྲ་སྥོ་ཊ་བཾ༔ ཨོཾ་བཛྲ་མ་ར་ན་མུ་ཁ་ཧཱུྃ༔ བཛྲ་གཎྜེ་ཧོ༔ དེ་ནས་ལས་ལ་སྦྱོར་བའི་རིམ་པ་ནི༔ དམིགས་པའི་རིམ་པ་འདི་ལྟར་ཉམས་སུ་ལོངས༔ བདག་ཉིད་དཔལ་ཆེན་རྡོ་རྗེ་གཞོན་ནུ་ཡི༔ གཙོ་འཁོར་ཀུན་གྱི་ཐུགས་ཀར་ཉི་མའི་སྟེང་༔ ཧཱུྃ་ཡིག་རང་མདོག་བཀྲག་མདངས་ལྡན་པའི་མཐར༔ རང་རང་སྔགས་ཕྲེང་གཡོན་དུ་བསྐོར་བ་ལས༔ འོད་ཟེར་ཁྲོ་ཆུང་མེ་དུད་ཕྱོགས་བཅུར་འཕྲོས༔ སྤྱི་དང་བྱེ་བྲག་གནོད་བྱེད་འབྱུང་པོའི་ཚོགས༔ མ་ལུས་ཚར་བཅད་བསྟན་དང་འགྲོ་བ་ལ༔ གནོད་པར་ཤོམ་པའི་གཟུགས་ཅན་གཟུགས་མེད་ཀུན༔ ཐལ་བའི་རྡུལ་ཕྲན་བཞིན་དུ་བརླག་པར་བསམ༔ ལས་སྔགས་གཞན་དང་མཐུན་པར་བཟླ༔ སྒོ་སྐྱོང་ཕུར་སྲུང་རྣམས་ཀྱི་སྔགས༔ རྒྱུད་ལས་ཤེས་པར་བྱའོ༔ ས་མ་ཡཱ༔ གཞི་སྙིང་གཅིག་ཏུ་དྲིལ་བ་ནི༔ ཨོཾ་བཛྲ་ཀཱི་ལི་ཀཱི་ལ་ཡ་ཛཿ ཧཱུྃ་བཾ་ཧོ༔ ཀ་ཏཾ་ཀ་ཡེ༔ ཛ་ཡེ་བི་ཛ་ཡེ༔ ཨ་ཛི་ཏེ༔ ཨ་པ་ར་ཛི་ཏེ་མ་ར་ས་ན་པྲ་མརྟ་ན་ཡེ་སརྦ་བྷིགྷྣན་བཾ་ཧཱུྃ་ཕཊ༔ ཅེས་སོ༔ དྲག་སྔགས་ནི༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུྃ་ཕཊ༔ ཛཿཧཱུྃ་ཨ༔ མ་རཀྨོ་ཡཀྨོ་ཀ་ལ་རཱུ་པ་དགྲ་བགེགས་གནོད་བྱེད་ཀྱི་སྙིང་རྩ་ལ་ཡཾ་ཡཾ༔ སྲོག་རྩ་ལ་ཡཾ་ཡཾ༔ སྙིང་ལ་ཕྲིལ་ཕྲིལ༔ སྲོག་ལ་ཆུམ་ཆུམ༔ ཙིཏྟ་སྲོག་ལ་དུང་དུང་༔ སྙིང་ཁྲག་ཤད་ཛ༔ ཐུམ་རི་ལི་ལི༔ སྙིང་རྩེགས་རྩེགས༔ འུར་འུར༔ ཤིག་ཤིག༔ འགུལ་འགུལ༔ མྱག་མྱག༔ སོད་སོད༔ དྷ་དྷི་མ་མཱ་ཀརྨ་ཤྲྀ་གྷྲིཾ་ཀ་ར་ཡེ༔ མ་ར་ས་ན༔ པྲ་མརྟ་ན་ཡེ་ཧཱུྃ་ཕཊ༔ དགྲ་བགེགས་དམ་སྲི་མཱ་ར་ཡ་རྦད་སོད༔ ས་མ་ཡཱ༔ རྒྱ་རྒྱ་རྒྱ༔ གུ་ཧྱ༔ རྗེས་སུ་མཆོད་ཅིང་བསྟོད་བྱས་ཏེ༔ དངོས་གྲུབ་བསྐུལ་བའི་ཚིག་འདི་བརྗོད༔ ཧཱུྃ༔ རྩ་བའི་ལྷ་མཆོག་རྡོ་རྗེ་གཞོན་ནུ་ཆེ༔ ཡབ་ཡུམ་སྲས་འཁོར་མ་ལུས་དགོངས་སུ་གསོལ༔ བདག་གིས་བསྟན་འགྲོའི་དོན་དུ་སེམས་བསྐྱེད་དེ༔ དང་པོ་བསྙེན་ཅིང་བར་དུ་ལེགས་པར་བསྒྲུབས༔ རང་རིག་བྱང་ཆུབ་སེམས་ཀྱི་ལྷ་དང་མཇལ༔ རང་བྱུང་དངོས་གྲུབ་སྩོལ་བའི་དུས་ལ་བབས༔ མཆོག་གི་དངོས་གྲུབ་ཁ་སྦྱོར་ཡན་ལག་བདུན༔ ཐུན་མོང་དངོས་གྲུབ་གྲུབ་པའི་རིག་འཛིན་བརྒྱད༔ ད་ལྟ་ཉིད་དུ་བདག་ལ་བསྩལ་དུ་གསོལ༔ ཨོཾ་ཤྲི་བཛྲ་ཀཱུ་མ་ར་ཀཱི་ལི་ཀཱི་ལ་ཡ་ཀཱ་ཡ་སིདྡྷི་ཨོཾ༔ ཝཀྐ་སིདྡྷི་ཨཱ༔ ཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱིཿ དེ་ནི་དངོས་གཞི་ལས་ཀྱི་ཁྲིགས༔ ཕྲིན་ལས་རབ་འབྱམས་གང་སྒྲུབ་ཀྱང་༔ མེད་མི་རུང་བའི་རྩ་བ་སྟེ༔ སྐལ་བར་ལྡན་པས་བརྩོན་པར་བསྐྱེད༔ མོས་གུས་ལྡན་པའི་སྤྱོད་ཡུལ་ཡིན༔ ཐེ་ཚོམ་ཅན་ལ་རྒྱ༔ རྗེས་ལ་ཚོགས་ཀྱི་རིམ་པ་ནི༔ སྟག་གཟིག་གཅན་གཟན་པགས་པའི་སྟེང་༔ བཟའ་བཅའ་བཏུང་བའི་རིགས་རྣམས་དང་༔ ཁྱད་པར་ཤ་ཆང་དམ་རྫས་བཤམས༔ ཧཱུྃ་ཧྲཱིཿ བདག་ཉིད་ལྷ་ཡི་ཐུགས་ལས་འོད་ཟེར་འཕྲོས༔ ཚོགས་ཀྱི་དངོས་པོ་མ་དག་བསྲེགས་གཏོར་བཀྲུས༔ ཨོཾ་ལས་རིན་ཆེན་སྣ་ལྔའི་སྣོད་མཆོག་ཏུ༔ ཨཱ༔ལས་མཆོད་པའི་བྱེ་བྲག་འདོད་དགུའི་གཏེར༔ ཧཱུྃ་ལས་མཆོད་པའི་ལྷ་མོ་གྲངས་མེད་ཀྱིས༔ ཚོགས་ཞིང་དབང་པོ་དྲུག་གི་སྤྱོད་ཡུལ་དུ༔ ཟག་མེད་བདེ་སྟོང་ཡེ་ཤེས་བསྐྱེད་པར་གྱུར༔ ཨོཾ་ཨཱ༔ཧཱུྃ་སརྦ་པཉྩ་ཨ་མྲྀ་ཏ་ཧ་ཧོ་ཧྲཱིཿ ལན་གསུམ་བརྗོད་ཅིང་བྱིན་གྱིས་བརླབས༔ མདུན་གྱི་ནམ་མཁར་ཚོགས་ཞིང་ལྷ༔ སྤོས་རོལ་གདུང་བའི་དབྱངས་དང་བཅས༔ སྤྱན་འདྲེན་རིམ་པ་འདི་ལྟར་རོ༔ ཧཱུྃ་ཧཱུྃ༔ སྔོན་ཚེ་བསྐལ་པ་དཔག་མེད་གོང་རོལ་ནས༔ ལོག་རྟོག་རཱུ་ཏྲ་སྡེ་གསུམ་འདུལ་བའི་ཕྱིར༔ སྐྱེ་མེད་དབྱིངས་ནས་གཟུགས་ཀྱི་སྐུར་བསྟན་པ༔ ཁྲག་འཐུང་ཁྲོ་བོའི་རྒྱལ་པོ་ཧེ་རུ་ཀ༔ དཔལ་ཆེན་རྡོ་རྗེ་གཞོན་ནུ་སྲས་འཁོར་བཅས༔ འདོད་ཡོན་ལོངས་སྤྱོད་ཚོགས་མཆོད་བཞེས་པའི་ཕྱིར༔ འཇིགས་རུང་དཔའ་བའི་གར་གྱིས་གཤེགས་སུ་གསོལ༔ ཨོཾ་བཛྲ་ཀྲོ་ཏ་ཀཱི་ལི་ཀཱི་ལ་ཡ་ཨེ་ཧྱ་ཧི་ཛཿཧཱུྃ་བཾ་ཧོ༔ དེ་ནས་བཞུགས་སུ་གསོལ་བ་ནི༔ ཧཱུྃ་ཧཱུྃ༔ རང་སྣང་སྤྲོས་བྲལ་ཡངས་པའི་ནམ་མཁའ་ལ༔ རང་བྱུང་ལྷུན་གྲུབ་དཔལ་ཆེན་ཕུར་པའི་ལྷ༔ ཐབས་ཤེས་འདུ་འབྲལ་མེད་པའི་གཙོ་འཁོར་རྣམས༔ རང་མཐུན་དག་པའི་གདན་ལ་བཞུགས་སུ་གསོལ༔ བཛྲ་ས་མ་ཡཱ་ཏིཥྛ་ལྷན༔ འཕྲུལ་དགའི་ཚུལ་གྱིས་ཕྱག་འཚལ་ནི༔ བདག་ཉིད་རྩ་བའི་ལྷ་ཡི་ཐུགས་ཀ་ནས༔མདུན་བསྐྱེད་ཚོགས་ཞིང་དཀྱིལ་འཁོར་ལྷ་ཚོགས་ལ༔ སྲི་ཞུའི་ཚུལ་གྱིས་མཆོད་པའི་ལྷ་མོ་ནི༔ ལུས་དཔག་མེད་པར་སྤྲུལ་ཏེ་ཕྱག་འཚལ་ལོ༔ ཨ་ཏི་པཱུ་ཧོ༔ པྲ་ཏིཙྪ་ཧོ༔ དེ་ནས་ཚོགས་ཕུད་འབུལ་བ་ནི༔ ཧཱུྃ་ཧཱུྃ༔ རང་བྱུང་སྤྲུལ་པའི་དཀྱིལ་འཁོར་ལྷ་ཚོགས་ལ༔ འདོད་ཡོན་མ་སྤངས་ཕྱི་ཡི་ཚོགས་མཆོད་འབུལ༔ དུག་ལྔ་རང་གྲོལ་ནང་གི་ཚོགས་མཆོད་འབུལ༔ ཐབས་ཤེས་ཟུང་འཇུག་གསང་བའི་ཚོགས་མཆོད་འབུལ༔ རྩ་བརྒྱད་སྟོང་སྦྱར་བདུད་རྩིའི་སྨན་མཆོད་འབུལ༔ ཆགས་ཆེན་ཆགས་བྲལ་རཀྟའི་མཆོད་པ་འབུལ༔ ཁམས་གསུམ་ཡོངས་གྲོལ་དམ་རྫས་མཆོད་པ་འབུལ༔ དགྱེས་པར་བཞེས་ནས་མཆོག་ཐུན་དངོས་གྲུབ་སྩོལ༔ མ་ཧཱ་ག་ཎ་ཙཀྲ་སརྦ་པཱུ་ཛ་ཁཱ་ཧི༔ ཚོགས་ཀྱི་འཁོར་ལོ་ལ་བརྟེན་ནས༔ ཉམས་ཆག་བཤགས་པའི་རིམ་པ་ནི༔ ཧོ༔ ཚེ་རབས་ཐོག་མ་མེད་ནས་ད་ལྟའི་བར༔ བདག་གཞན་གསང་བ་སྔགས་ཀྱི་སྒོར་ཞུགས་ཀུན༔ མི་ཤེས་མ་གུས་བག་མེད་ཉོན་མོངས་མང་༔ བླ་མ་དཀྱིལ་འཁོར་ལྷ་དང་རྡོ་རྗེ་སྤུན༔ བརྙས་ཤིང་དམ་ལས་འགལ་ཉམས་འདས་རལ་སོགས༔ མནར་མེད་ངན་སོང་འཁོར་བའི་རྒྱུ་བསགས་པ༔ ག་ཎ་ཚོགས་ཀྱི་ལོངས་སྤྱོད་ལ་བརྟེན་ནས༔ མི་འཆབ་འགྱོད་པའི་སེམས་ཀྱིས་མཐོལ་ལོ་བཤགས༔ དག་ཚངས་མཆོག་གི་དངོས་གྲུབ་བསྩལ་དུ་གསོལ༔ སརྦ་ག་ཎ་ཙཀྲ་བི་ཤུདྡྷེ་ས་མ་ཡཱ་ཤུདྡྷེ་ཧཱུྃ༔ ཞེས་དང་ཡི་གེ་བརྒྱ་བ་ཅི་མང་བཟླ༔ ཚོགས་ཕུད་ཐ་མ་དགྲ་བགེགས་སུ༔ དམིགས་ནས་བསྒྲལ་ཞིང་བསྟབས་པ་ནི༔ ཧཱུྃ་ཧཱུྃ༔ རང་རིག་བྱང་ཆུབ་སེམས་ཀྱི་དཀྱིལ་འཁོར་དུ༔ གློ་བུར་ཀུན་བརྟགས་ཞིང་བཅུའི་དགྲ་དང་བགེགས༔ ཕྲིན་ལས་ལྷ་མཆོག་སྤྲུལ་པ་ཡང་སྤྲུལ་གྱིས༔ འགུགས་འཆིང་སྡོམ་མྱོས་བསྒྲལ་བའི་ལས་བྱས་ཏེ༔ བདེ་སྟོང་གཉིས་མེད་ཆོས་དབྱིངས་ཀློང་དུ་སྦྱོར༔ སྲས་མཆོག་ཕུར་པ་ལག་ཏུ་ཐོགས༔ གཟུགས་ལ་གདབ་ཅིང་སྔགས་འདིས་བསྒྲལ༔ དྲག་སྔགས་སོ་ལྔའི་ཤམ་བུ་རུ༔ སརྦ་དུཥྚཾ་མ་ར་ཡ་ཧཱུྃ་ཕཊ༔ ཤ་ཁྲག་བདུད་རྩིའི་རང་བཞིན་དུ༔ དམིགས་ནས་ལྷ་ལ་འདི་བཞིན་སྟོབ༔ ཧཱུྃ་ཧཱུྃ༔ དངོས་འཛིན་དབང་གིས་ལོག་རྟོག་དགྲ་བགེགས་ཀྱི༔ སྡུག་བསྔལ་ཕུང་པོ་ལྔ་ཡི་འདུ་བྱེད་ཀུན༔ བདག་མེད་རྟོག་བྲལ་དཔལ་ཆེན་ཧེ་རུ་ཀའི༔ ཆོས་དབྱིངས་མཉམ་པ་ཆེན་པོའི་ཞལ་དུ་སྟོབ༔ མ་རིག་ལུགས་འབྱུང་རྟེན་འབྲེལ་བཅུ་གཉིས་ཀྱི༔ ལས་ཉོན་སྐྱེ་རྒྱུད་གཅོད་པའི་ཕྲིན་ལས་མཛོད༔ མ་ཧཱ་ཧ་ལ་སརྦ་པཉྩ་མཾ་ས་རཀྟ་ཀེཾ་ནི་རི་ཏི་ཁ་ཁ་ཁཱ་ཧི་ཁཱ་ཧི༔ དེ་ནས་འདུས་པ་ལྕམ་དྲལ་གྱིས༔ ཚོགས་ཀྱི་དགའ་སྟོན་ལོངས་སྤྱོད་ཕྱིར༔ ཐོག་མར་རྡོ་རྗེ་རྒྱལ་པོ་ལ༔ བརྡ་དོན་འབྲེལ་བས་འདི་བཞིན་འབུལ༔ ཨེ་མ་ཧོ༔ ཡེ་དག་ཆོས་དབྱིངས་མཉམ་པ་ཆེན་པོ་ལ༔ ཡེ་ནས་སྤང་བླང་དགག་སྒྲུབ་མ་མཆིས་ཀྱང་༔ ཡེ་ཤེས་སྒྲུབ་རྫས་ཤ་ལྔ་བདུད་རྩི་ལྔ༔ ཡེ་གྲོལ་རྡོ་རྗེ་རྒྱལ་པོས་བཞེས་སུ་གསོལ༔ བླ་མས་རྩེ་ཕྱག་རྒྱས་བླངས༔ ཨེ་མ་ཆོས་དབྱིངས་མཉམ་པའི་གཤིས༔ ཡེ་ནས་གྲུབ་པ་མ་མཆིས་ཀྱང་༔ རྟེན་འབྲེལ་དབང་གིས་ཐ་དད་སྣང་༔ དམན་པའི་བློ་དང་བྲལ་ཏེ་རོལ༔ ཨ་ལ་ལ་ཧོ༔ རྡོ་རྗེ་སློབ་དཔོན་དབུ་མཛད་པའི༔ མཆེད་ལྕམ་འདུས་པ་ཐམས་ཅད་ཀྱིས༔ ཐ་མལ་རྟོག་པ་མ་ཡིན་པར༔ དབང་བཞི་དམ་ཚིག་ལས་བྱུང་བའི༔ བཟའ་བཏུང་ཚོགས་ཀྱི་འཁོར་ལོར་རོལ༔ ལྷག་མ་ཐམས་ཅད་གཅིག་ཏུ་བསྡུས༔ དཔལ་ཆེན་བདུད་རྩིས་ཁ་ཕྲུ་གདབ༔ བཤུག་པ་རྐང་གླིང་སྒྲ་དང་བཅས༔ ལྷག་མའི་མགྲོན་རྣམས་སྤྱན་དྲངས་ཏེ༔ བསྔོ་བའི་རིམ་པ་ཚིག་འདིས་བྱ༔ ཨོཾ་ཨཱ༔ཧཱུྃ་ཧ་ཧོ་ཧྲཱིཿ ཧཱུྃ་ཧཱུྃཿ དཀྱིལ་འཁོར་ཆེན་པོའི་ཕྱི་ཉུལ་ལྷག་མའི་མགྲོན༔ ཤར་གྱི་ཕྱོགས་ནས་བཛྲ་ཀིང་ཀ་ར༔ དཀར་མོ་ཟླ་འདབ་སྤྲུལ་པ་ཡང་སྤྲུལ་བཅས༔ འདིར་གཤེགས་དཔལ་ཆེན་ཕུར་པའི་ལྷག་གཏོར་བཞེས༔ ནད་གདོན་འཇིགས་བརྒྱད་ཞི་བའི་ཕྲིན་ལས་མཛོད༔ ལྷོ་ཡི་ཕྱོགས་ནས་རཏྣ་ཀིང་ཀ་ར༔ སེར་མོ་ས་འདབ་སྤྲུལ་པ་ཡང་སྤྲུལ་བཅས༔ འདིར་གཤེགས་དཔལ་ཆེན་ཕུར་པའི་ལྷག་གཏོར་བཞེས༔ ཚེ་བསོད་དཔལ་འབྱོར་རྒྱས་པའི་ཕྲིན་ལས་མཛོད༔ ནུབ་ཀྱི་ཕྱོགས་ནས་པདྨ་ཀིངྐ་ར༔ དམར་མོ་ཉི་འདབ་སྤྲུལ་པ་ཡང་སྤྲུལ་བཅས༔ འདིར་གཤེགས་དཔལ་ཆེན་ཕུར་པའི་ལྷག་གཏོར་བཞེས༔ སྣང་སྲིད་དབང་དུ་སྡུད་པའི་ཕྲིན་ལས་མཛོད༔ བྱང་གི་ཕྱོགས་ནས་ཀརྨ་ཀིངྐ་ར༔ ལྗང་མོ་རླུང་འདབ་སྤྲུལ་པ་ཡང་སྤྲུལ་བཅས༔ འདིར་གཤེགས་དཔལ་ཆེན་ཕུར་པའི་ལྷག་གཏོར་བཞེས༔ ལོག་འདྲེན་དགྲ་བགེགས་བརླག་པའི་ཕྲིན་ལས་མཛོད༔ གཞན་ཡང་དཀྱིལ་འཁོར་ཆེན་པོའི་ཕྱི་ཉུལ་བའི༔ དབང་ཕྱུག་འབར་མ་མ་སྲིང་མཁའ་འགྲོའི་ཚོགས༔ རྡོ་རྗེ་ཕུར་པ་སྒྲུབ་པའི་རྣལ་འབྱོར་ལ༔ བར་ཆད་སྲུངས་ཤིང་མཐུན་རྐྱེན་སྒྲུབ་བོ་ཞེས༔ དཔལ་ཆེན་སྤྱན་སྔར་ཇི་ལྟར་ཁས་བླངས་བཞིན༔ ལྷག་གཏོར་བཞེས་ལ་ཕྲིན་ལས་གྲུབ་པར་མཛོད༔ སརྦ་ཨུཥྩི་ཊ་བྷ་ལིང་ཏ་ཁཱ་ཧི༔ དེ་ནས་ཐུགས་དམ་བསྐུལ་བ་ནི༔ དམར་གྱི་གཏོར་མ་སྨན་རཀ་བྲན༔ དགྲ་བགེགས་འགུག་གཞུག་བསྒྲལ་ལས་བྱས༔ བདུད་རྩིར་བྱིན་བརླབས་སྔགས་ཀྱིས་འབུལ༔ ཧཱུྃ་ཧཱུྃ༔ གདོད་ནས་སྤྲོས་བྲལ་ཆོས་དབྱིངས་དག་པའི་ཀློང་༔ བཞེངས་བཞུད་གཉིས་འཛིན་མཚན་མ་མི་མངའ་ཡང་༔ ལོག་རྟོག་འཁྲུལ་བའི་དམ་སྲི་ཚར་གཅོད་ཕྱིར༔ ཕྲིན་ལས་ཕུར་པའི་ལྷ་ཚོགས་སྐུར་བཞེངས་ཤིག༔ དོན་དམ་བློ་འདས་ཀུན་གཞིའི་རང་བཞིན་ལ༔ རྟོག་མེད་ཡུལ་ལ་གསལ་བའི་རྣམ་ཤེས་ཀྱི༔ ཉོན་ཡིད་སྒོ་ལྔའི་བག་ཆགས་ཚར་གཅོད་ཕྱིར༔ གཙོ་འཁོར་སྤྲུལ་པར་བཅས་པ་སྐུར་བཞེངས་ཤིག༔ འགྲོ་ཀུན་ཕན་བདེའི་འབྱུང་གནས་རྒྱལ་བའི་བསྟན༔ བཤད་དང་སྒྲུབ་པའི་དགེ་འདུན་སྡེ་བཟུང་ཀྱང་༔ སྣ་ཚོགས་ཐབས་ཀྱིས་བཤིག་པའི་ལོག་འདྲེན་དཔུང་༔ ཐམས་ཅད་མིང་གི་ལྷག་མར་ཚར་ཆོད་ཅིག༔ ཁྱད་པར་རྒྱུ་འབྲས་རིང་ལམ་ལྟོས་མིན་པར༔ ཚེ་འདིར་མྱུར་གྲོལ་རྡོ་རྗེ་སྙིང་པོའི་ཆོས༔ གསང་ཆེན་ཐེག་པའི་ཉེ་ལམ་ཟབ་མོ་ལ༔ ཐེ་ཚོམ་བར་དབྱེན་བཅོས་པའི་དམ་སྲིའི་ཚོགས༔ བསད་དང་དབྱེ་དང་མནན་བསྲེགས་འཕང་བའི་ལས༔ དྲག་པོའི་ཤུགས་ཀྱིས་རྡུལ་དུ་བརླགས་ནས་ཀྱང་༔ རང་གཞན་བདེ་ལ་འགོད་པའི་ཕྲིན་ལས་མཛོད༔ ཅེས་བསྐུལ་གཏོར་མ་ཟོར་དུ་བརྡེག༔ དེ་ནས་ཆད་མདོ་བསྒྲག་པ་ནི༔ ཐ་ཚིག་གཏོར་མ་བྱིན་གྱིས་བརླབས༔ བདག་ཉིད་དཔལ་ཆེན་ཏིང་འཛིན་གྱིས༔ དྲེགས་ཚོགས་ཡོངས་ལ་ཐ་ཚིག་སྤྲིངས༔ ཧཱུྃ་བྷྱོ༔ སྔོན་ཚེ་དཔག་མེད་བསྐལ་པའི་གོང་རོལ་ན༔ དུས་གསུམ་ལས་འདས་བརྗོད་བྲལ་མཉམ་པའི་དུས༔ སྟོང་ཆེན་བློ་འདས་ཆོས་དབྱིངས་དཀྱིལ་འཁོར་དུ༔ རང་རིག་བྱང་ཆུབ་སེམས་ཀྱི་སྟོན་པ་ཡིས༔ རང་སྣང་རང་བཞིན་མེད་པའི་འཁོར་ཚོགས་ལ༔ སྨྲ་ཚིག་བརྗོད་བྲལ་རྒྱུད་དོན་བསྟན་པའི་ཚེ༔ སྟོན་འཁོར་དགོངས་པ་གཅིག་པའི་དབང་ཐོབ་སྟེ༔ འཁོར་འདས་མཉམ་པར་གྲོལ་བའི་ཆད་དོན་བཞིན༔ རང་ཤར་རང་སར་གྲོལ་བའི་གཏོར་མ་བཞེས༔ འབྲས་བུ་གཞི་ལ་རྫོགས་པའི་ཕྲིན་ལས་མཛོད༔ ཧཱུྃ་བྷྱོ༔ དེ་འོག་བར་གྱི་བསྐལ་པ་བར་མ་ལ༔ རང་བྱུང་ཡེ་ཤེས་གཞི་ལས་མ་གཡོས་ཀྱང་༔ རང་རྩལ་འོད་ལྔར་འཁྲུལ་བའི་སེམས་ཅན་གྱི༔ རང་སྣང་ཆགས་སྡང་རྨོངས་པའི་རཱུ་ཏྲའི་ཚོགས༔ བསྟན་དང་འགྲོ་བའི་གཤེད་དུ་བབས་པའི་ཚེ༔ ཕྱོགས་བཅུའི་རྒྱལ་བའི་ཐུགས་རྗེས་ཉེར་བསྐུལ་ནས༔ ཆོས་དབྱིངས་མཁའ་ལས་འགགས་མེད་ཀཱི་ལ་ཡའི༔ སྙིང་རྗེའི་རང་གཟུགས་ཕུར་པ་གཙོ་འཁོར་གྱིས༔ རཱུ་ཏྲ་སྡེ་གསུམ་འཁོར་བཅས་བཏུལ་བའི་ཚེ༔ ཡེ་ཤེས་མཁའ་འགྲོ་ལས་ཀྱི་དབང་མོ་ཆེ༔ རིག་འཛིན་གཙོ་བོ་རྡོ་རྗེ་འཛིན་པ་དང་༔ དབང་ཕྱུག་ཁྱོ་ཤུག་བྲན་དང་བཅས་པ་ཡིས༔ གསང་ཆེན་རྒྱུད་སྡེ་མི་ཉམས་བསྲུང་བ་དང་༔ དེ་འཛིན་རྣལ་འབྱོར་སྐྱོང་བར་ཞལ་བཞེས་བཞིན༔ རྒྱུད་དང་སྒྲུབ་སྡེ་ཀུན་གྱི་ཡང་སྙིང་ཆོས༔ ཕྲིན་ལས་ཕུར་པའི་སྒྲུབ་ལ་བརྩོན་པ་ཡིས༔ རྣལ་འབྱོར་མཆེད་ལྕམ་འདུས་པར་བཅས་པའི་ཚོགས༔ བར་ཆད་དམ་སྲི་བདུད་དཔུང་ཚར་བཅད་ནས༔ ལས་བཞིའི་ཕྲིན་ལས་འགྲུབ་པའི་སྡོང་གྲོགས་མཛོད༔ ཧཱུྃ་བྷྱོ༔ དེ་འོག་བསྟན་པ་མར་འགྲིབ་ལ་ཉེ་ཚེ༔ རིགས་ཅན་དྲ་མ་ལྔ་དང་རྒྱལ་པོ་ཛས༔ གསང་ཆེན་བསྟན་པ་དར་བར་བསྐུལ་བའི་ཚེ༔ རིགས་བརྒྱའི་གཙོ་བོ་ཕྱག་ན་རྡོ་རྗེ་ཡིས༔ གསང་ཆེན་རྒྱུད་སྡེ་ཐུགས་ཀྱི་ཀློང་ནས་བཏོན༔ བཻཌཱུར་ཞུན་མའི་ཡི་གེར་བཀོད་ནས་ཀྱང་༔ སྤྲུལ་པའི་འཁོར་ལ་དབང་བསྐུར་རྒྱུད་དོན་བཤད༔ དྲེགས་ཚོགས་བྲན་བཀོལ་བསྟན་པ་སྲུང་བར་བསྐོས༔ ཇི་ལྟར་ཁས་བླངས་ཞལ་བཞེས་ཡོད་པ་ལྟར༔ ཐ་ཚིག་དམ་རྫས་གཏོར་མ་འདི་བཞེས་ལ༔ ལས་བཞི་ལྷུན་གྱིས་འགྲུབ་པའི་ཕྲིན་ལས་མཛོད༔ ཧཱུྃ་བྷྱོ༔ དེ་འོག་བསྐལ་པ་ཐ་མ་རྩོད་ལྡན་དུས༔ བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ༔ རིག་འཛིན་ཆེན་པོ་པདྨ་འབྱུང་གནས་དང་༔ ཕྲིན་ལས་གཟུངས་མ་ཤཱཀྱ་དེ་ཝ་ཡིས༔ ཡང་དག་ཐུགས་ཀྱི་ལྷ་མཆོག་སྒྲུབ་པའི་ཚེ༔ ཀླུ་དང་གནོད་སྦྱིན་བདུད་དང་དམ་སྲིའི་རིགས༔ བར་ཆད་འཚེ་བའི་གཡུལ་ངོ་ཤོམ་པའི་ཚེ༔ ཆོས་ཀྱི་དབྱིངས་ནས་དཔལ་ཆེན་ཕུར་པའི་ལྷས༔ འདུ་འབྲལ་མེད་པའི་རང་ཞལ་བསྟན་ནས་ཀྱང་༔ བར་ཆད་སེལ་བའི་རྒྱུད་དང་སྒྲུབ་ཐབས་བསྟན༔ སྙན་བརྒྱུད་ཞུས་ཤིང་དགོངས་པས་ཉམས་སུ་བླངས༔ ཡི་དམ་ལྷ་དང་སྐལ་བ་མཉམ་པའི་ཚེ༔ ཕུར་སྲུང་བཅུ་དྲུག་དམ་ཅན་རྒྱ་མཚོ་ཡིས༔ བསྟན་དང་བསྟན་འཛིན་སྐྱོང་བར་ཞལ་བཞེས་བཞིན༔ ཐུགས་དམ་རྒྱུད་བསྐུལ་གཏོར་མ་འདི་བཞེས་ལ༔ བར་ཆད་བདུད་ལས་རྒྱལ་བའི་ཕྲིན་ལས་མཛོད༔ ཧཱུྃ་བྷྱོ༔ དེ་འོག་སྤྲུལ་པའི་ཞིང་ཁམས་ཉམས་དགའ་བར༔ ཡར་ལུང་བསམ་ཡས་མཆིམས་ཕུའི་ཀེའུ་ཚང་དུ༔ ཐུགས་ཀྱི་གཟུངས་མ་ཡེ་ཤེས་མཚོ་རྒྱལ་དང་༔ སྤྲུལ་པའི་རྗེ་འབངས་ཉི་ཤུ་རྩ་ལྔ་ལ༔ སྒྲུབ་ཆེན་བཀའ་བརྒྱད་དཀྱིལ་འཁོར་ཞལ་ཕྱེ་ནས༔ སློབ་དཔོན་ཆེན་པོ་པདྨ་ཐོད་ཕྲེང་གིས༔ དབང་བསྐུར་རྒྱུད་བཤད་བཀའ་བབས་བརྟགས་པའི་ཚེ༔ མཚོ་རྒྱལ་ལྕམ་དྲལ་ལང་གྲོ་ལོ་ཙཱ་དང་༔ གཉགས་ཀྱི་མཁས་པ་ཛྙཱ་ན་ཀུ་མཱ་ར༔ ཕྲིན་ལས་གྲུབ་པའི་རིག་འཛིན་མཆོག་རྣམས་ཀྱིས༔ ཕུར་པ་བསྒྲུབས་ཤིང་དྲོད་ཚད་མཐའ་རུ་ཕྱིན༔ ལྷག་པའི་ལྷ་དང་དགོངས་པ་མཉམ་པར་གྱུར༔ དྲེགས་ཚོགས་བྲན་བཀོལ་གྲུབ་པའི་མཚན་རྟགས་བསྟན༔ ཤྭ་ན་ས་བདག་བདག་ཉིད་གིང་ཆེན་བཞིས༔ སངས་རྒྱས་བསྟན་པ་བསྲུང་བར་མ་ཆད་དམ༔ རྣལ་འབྱོར་བར་ཆད་སེལ་བར་མ་ཆད་དམ༔ བསྟན་པའི་སྦྱིན་བདག་སྐྱོང་བར་མ་ཆད་དམ༔ ཆོས་སྲིད་དམ་སྲི་འདུལ་བར་མ་ཆད་དམ༔ ཇི་ལྟར་ཁས་བླངས་དམ་བཅས་དེ་བཞིན་དུ༔ མཆོད་གཏོར་བཞེས་ལ་རབ་འབྱམས་ལས་འགྲུབ་མཛོད༔ ཧཱུྃ་བྷྱོ༔ དེ་འོག་རྩོད་ལྡན་སྙིགས་མའི་ཡང་མཐའ་འདིར༔ སྤྲུལ་པའི་གང་ཟག་ལུང་རིག་གླིང་པ་ལ༔ ཚེ་རབས་བླ་མ་ཨོ་རྒྱན་ཆེན་པོ་དང་༔ ལྷ་སྲས་རྣམ་རོལ་བྱང་ཆུབ་རྡོ་རྗེ་ཡིས༔ ཉིང་འཁྲུལ་རྨི་ལམ་གསལ་བའི་བརྡའ་ཙམ་དུ༔ བདེ་ཆེན་དཔལ་རི་སྤྲུལ་པའི་གནས་མཆོག་དེར༔ དབང་ཆེན་རྒྱལ་པོའི་དབང་བསྐུར་རྒྱུད་དོན་བསྟན༔ ཟབ་ཆོས་དགོངས་པའི་བརྡ་འགྲོལ་བསྐུལ་བའི་ཚེ༔ སྔགས་བདག་སྲུང་མ་དམ་ཅན་རྒྱ་མཚོ་ཡིས༔ རིམ་གཉིས་བྱང་ཆུབ་སེམས་ཀྱི་ལམ་ཞུགས་ནས༔ བསྟན་དང་འགྲོ་ལ་ཕན་བདེ་སྤེལ་ནུས་ན༔ བར་ཆད་སེལ་ཞིང་མཐུན་རྐྱེན་བསྒྲུབ་བོ་ཞེས༔ བསླུ་མེད་རྡོ་རྗེའི་གསུང་གིས་དབུགས་དབྱུང་ལྟར༔ མཆོད་གཏོར་བཞེས་ལ་བསྟན་འགྲོའི་ཕན་བདེ་དང་༔ རྣལ་འབྱོར་ལེགས་ཚོགས་སྤེལ་བའི་ཕྲིན་ལས་མཛོད༔ ཅེས་བརྗོད་གཏོར་མ་གཙང་སར་གཤེགས༔ དེ་ནས་བསྟན་མའི་གཏོར་མ་ལ༔ བཤལ་ཆུ་བྲན་ལ་འབྲུ་གསུམ་གྱིས༔ བྱིན་གྱིས་བརླབས་ཤིང་འདི་སྐད་བརྗོད༔ ཧཱུྃ་བྷྱོ༔ འཇིག་རྟེན་འདས་ཀྱང་འཁོར་བའི་ཆ་ལུགས་འཛིན༔ སངས་རྒྱས་བསྟན་པ་བསྲུང་བར་ཞལ་བཞེས་ཤིང་༔ མུ་སྟེགས་རྟག་ཆད་རྒོལ་བ་ཟློག་མཛད་པའི༔ བདུད་མོ་བཞི་དང་གནོད་སྦྱིན་སྨན་མོ་བཞི༔ ཞི་རྒྱས་དབང་དང་དྲག་པོའི་རྣམ་འགྱུར་ཅན༔ བསྟན་མ་བཅུ་གཉིས་གཙོ་དང་འཁོར་དུ་བཅས༔ སྔོན་ཚེ་སློབ་དཔོན་པདྨ་ཐོད་ཕྲེང་གིས༔ རྡོ་རྗེ་ཕུར་པའི་དཀྱིལ་འཁོར་མཐའ་གྲལ་བཞག༔ བསྟན་པ་སྤྱི་དང་གསང་ཆེན་ཉེ་ལམ་སྲུང་༔ གངས་ཅན་བོད་དུ་ནད་མུག་མཚོན་འཁྲུག་སོགས༔ མི་མཐུན་རྒུད་སེལ་བརྒྱུད་འཛིན་སྒྲུབ་པ་པོ༔ བུ་བཞིན་སྐྱོང་ལ་མཐུན་རྐྱེན་སྒྲུབས་ཤིག་ཅེས༔ ཇི་ལྟར་བཀའ་བསྒོས་དམ་བཞག་མཛད་པ་ལྟར༔ དམ་ལས་མ་འདའ་དམ་བཞིན་ཕྲིན་ལས་མཛོད༔ གཏོར་མ་གཤེགས་ཤིང་བྲོ་བརྡུང་ནི༔ གཏོར་གཞོང་འོག་ཏུ་དམ་སྲི་འགུགས༔ ཛཿཧཱུྃ་བཾ་ཧོའི་རྒྱ་ཡིས་གདབ༔ བསྐལ་པའི་མཐར་ཡང་ཐར་མེད་བསམ༔ ཧཱུྃ་ཧཱུྃ༔ སྟོང་གསུམ་སྟོང་གི་གཏོར་གཞོང་རི་རབ་འོག༔ བསྟན་དང་འགྲོ་ལ་འཚེ་བའི་དམ་སྲི་རྣམས༔ ནམ་ཡང་ལྡང་བ་མེད་པའི་བྲོ་རྒྱས་གདབ༔ སྟེང་དུ་རྡོ་རྗེ་ཕུར་པའི་ལྷ་ཚོགས་རྣམས༔ སྒེག་དཔའ་འཇིགས་རུང་མི་སྡུག་གར་གྱི་འགྲོས༔ གཡས་སུ་བསྐོར་བས་དམ་སྲི་ཕོ་རྒྱུད་གནོན༔ གཡོན་དུ་འཁྲབ་པས་དམ་སྲི་མོ་རྒྱུད་གནོན༔ ཞབས་བཞིའི་གར་གྱིས་བདུད་བཞིའི་མགོ་བོ་གནོན༔ ཚད་མེད་རྣམ་བཞིའི་སེམས་མཆོག་མ་སྐྱེས་བར༔ བསྐལ་པའི་མཐར་ཡང་གཏང་བར་མི་བྱ་འོ༔ ཨོཾ་ལཾ་ཨཱ༔ལཾ་ཧཱུྃ་ལཾ་སྟྭཾ་བྷ་ཡ་ནན༔ སླར་ཡང་གཏོར་གཞོང་སྨན་འབྲུས་བཀང༔ ཚེ་འགུགས་རྗེས་ཀྱི་གཏང་རག་དང་༔ དངོས་གྲུབ་ལེན་པ་གཞུང་ལྟར་བྱ༔ ཞེས་གཏང་རག་གི་མཆོད་བསྟོད་ནི༔ ཨོཾ་ཤྲཱི་བཛྲ་ཀཱུ་མ་ར་ཀཱི་ལི་ཀཱི་ལ་ཡ་ས་པཱ་རི་ཝ་ར་ཨརྒྷཾ་སོགས་ཤཔྟ་པཱུ་ཛ་ཧོ༔ མ་ཧཱ་པཉྩ་ཨ་མྲྀ་ཏ་ཁཱ་ཧཱི༔ མ་ཧཱ་རཀྟ་་ཁཱ་ཧཱི༔ མ་ཧཱ་བཱ་ལིངྟ་ཁཱ་ཧཱི༔ ཞེས་དང་། ཆོས་ཉིད་ཞི་བའི་ངང་ལས་མ་གཡོས་ཀྱང༔ རང་མདངས་འགགས་མེད་འགྲོ་བ་སྐྱོབ་པའི་ལྷ༔ གང་འདུལ་ཞི་ཁྲོ་དགྱེས་ཆགས་བདུད་སྡེའི་གཤེད༔ ཕུར་པའི་ལྷ་ཚོགས་རྣམས་ལ་ཕྱག་འཚལ་བསྟོད༔ དེ་ནས་ཚེ་རབས་སྡིག་ལྟུང་དང་༔ ལྷན་ཅིག་ནོངས་པ་བཤགས་པ་ནི༔ ཧོ༔ གསང་སྔགས་སྒོར་ཞུགས་རྣལ་འབྱོར་ཐམས་ཅད་ཀྱི༔ སྐུ་གསུང་ཐུགས་ཀྱི་དངོས་གྲུབ་མ་ལུས་པ༔ ལུས་ངག་ཡིད་ཀྱི་དམ་ཚིག་ལ་བརྟེན་ཀྱང་༔ ལས་ཉོན་མཐུ་ཡིས་ཟིལ་གནོན་སྡིག་ལྡན་བདག༔ ཉམས་ཆག་ཉེས་པ་དུ་མའི་འབྱུང་ཁུངས་ཏེ༔ ཡེ་ཤེས་སྤྱན་ལྡན་མགོན་པོ་ཐུགས་རྗེ་ཅན༔ བླ་མ་ལྷག་པའི་ལྷ་ལ་མཐོལ་ལོ་བཤགས༔ མི་འཆབ་མི་སྦེད་སླན་ཆད་སྡོམ་པར་བགྱིད༔ དག་ནས་ཚངས་པ་མཆོག་གི་དངོས་གྲུབ་སྩོལ༔ ཨོཾ་ས་མ་ཡཱ༔ ཨཱཿས་མ་ཡཱ༔ ཧཱུྃ་ས་མ་ཡཱ༔ ཨོཾ་བཛྲ་ས་ཏྭ་ས་མ་ཡཱ་སོགས་བརྗོད། ཡི་གེ་བརྒྱ་བས་ནོངས་པ་བཤགས༔ དེ་ནས་མདུན་བསྐྱེད་ཡེ་ཤེས་པ༔ སྒྲུབ་རྫས་རྟེན་ལ་བརྟན་པར་བཞུགས༔ བདག་བསྐྱེད་བསྡུ་རིམ་བྱ་བ་ནི༔ ཧཱུྃ་ཧཱུྃ༔ བདག་ཉིད་དཔལ་ཆེན་ཐུགས་སྲོག་ཧཱུྃ་ཡིག་ལས༔ འོད་ཟེར་འཕྲོས་པས་སྣོད་བཅུད་གསལ་བར་བྱས༔ ཕྱོགས་བཅུའི་ཁྲོ་བོ་ཕུར་པ་སྲས་བཞིར་ཐིམ༔ སྲས་རྣམས་འོད་ཞུ་ཤེས་རབ་དབང་ཕྱུག་མར༔ ལྷན་སྐྱེས་ཕྱག་རྒྱ་བདག་ཉིད་གཙོ་ལ་ཐིམ༔ དེ་ཡང་ཐུགས་སྲོག་ཐིག་ལེ་ནཱ་དར་ཡལ༔ མི་དམིགས་སྤྲོས་བྲལ་དབྱིངས་སུ་ཨེ་མ་ཧོ༔ དེ་ཡིས་རྟག་པའི་མཐའ་བསལ་ཞིང་༔ ཆད་མཐའ་བསལ་ཕྱིར་སྐད་ཅིག་གིས༔ སླར་ཡང་རྗེས་ཐོབ་གཉུག་མའི་ཧེ་རུ་ཀ༔ ཕྱག་རྒྱ་གཅིག་པའི་ཐུགས་ཀར་ཕུར་པ་འདྲིལ༔ གནས་གསུམ་ཨོཾ་ཨཱ༔ཧཱུྃ་གིས་མཚན་པ་ལས༔ འོད་འཕྲོས་སྒོ་གསུམ་བར་ཆད་བསྲུང་བར་བསམ༔ ཨོཾ་ཨཱ༔ཧཱུྃ་བཛྲ་ཀ་ཝ་ཙི་རཀྵ་རཀྵ་ཧཱུྃ༔ དེ་ནས་དགེ་ཚོགས་བསྔོ་བ་ནི༔ ཧཱུྃ་ཧཱུྃ༔ ཚེ་རབས་ཐོག་མ་མེད་ནས་ད་ལྟའི་བར༔ བདག་གི་ལུས་ངག་ཡིད་གསུམ་བརྩོན་པ་ཡིས༔ དགེ་བཅུ་ཕར་ཕྱིན་དྲུག་དང་བསྡུ་དངོས་བཞི༔ བླ་མ་ཡི་དམ་སངས་རྒྱས་བྱང་སེམས་དང་༔ མཁའ་འགྲོ་དམ་ཅན་བསྙེན་སྒྲུབ་ལས་སྦྱོར་འབྲས༔ དུས་གསུམ་ཕ་མའི་ཐོག་དྲངས་འགྲོ་བ་ཀུན༔ རྣམ་མཁྱེན་སངས་རྒྱས་ཐོབ་པའི་རྒྱུ་རུ་བསྔོ༔ དེ་རྗེས་སྨོན་ལམ་གདབ་པ་ནི༔ དེ་མཐུས་རྒྱལ་བའི་བསྟན་པ་དར་ཞིང་རྒྱས༔ ལས་ཉོན་མཐུ་ཡིས་མནར་བའི་ཞིང་བཅུའི་དགྲ༔ མཚན་མ་རྫས་ཀྱི་ཕུར་བུས་ཚར་བཅད་ནས༔ ཚད་མེད་སྙིང་རྗེའི་ཕུར་བུས་རྗེས་སུ་བཟུང་༔ བྱང་ཆུབ་སེམས་ཀྱི་ཕུར་བུས་བདག་རྟོག་བསྒྲལ༔ ཆོས་དབྱིངས་བློ་འདས་ཕུར་བུའི་ཀློང་དུ་གྲོལ༔ རང་གཞན་དོན་གཉིས་མྱུར་དུ་འགྲུབ་པར་ཤོག༔ མེ་ཏོག་འཐོར་ཞིང་བཀྲ་ཤིས་བརྗོད༔ དུས་ཀུན་དགེ་ལེགས་སྣང་བ་ཡིས༔ ཁྱབ་པའི་རྟེན་འབྲེལ་འདི་བཞིན་བྱ༔ རོལ་མོ་དབྱངས་སྙན་གདངས་དང་བཅས༔ ཨེ་མ་ཧོ༔ ཆོས་དབྱིངས་འཕོ་འགྱུར་མེད་པའི་ཕོ་བྲང་ནས༔ ཁྱད་ཆོས་དྲུག་གིས་མངོན་པར་སངས་རྒྱས་པའི༔ རང་བྱུང་ཐོག་མའི་མགོན་པོ་འོད་མི་འགྱུར༔ ཆོས་སྐུ་ཀུན་ཏུ་བཟང་པོའི་བཀྲ་ཤིས་ཤོག༔ གཞི་སྣང་ལྷུན་གྱིས་གྲུབ་པའི་གཞལ་ཡས་ནས༔ རྟག་བརྟན་འཕོ་མེད་ངེས་པ་ལྔ་དང་ལྡན༔ སུས་ཀྱང་མ་བྱས་རང་བྱུང་གཉུག་མའི་བབ༔ ལོངས་སྐུ་རྡོ་རྗེ་སེམས་དཔའི་བཀྲ་ཤིས་ཤོག༔ གཞི་ལྟར་འགྲོ་བློ་དག་པའི་ཞིང་ཁམས་ནས༔ ཕྱོགས་བཅུའི་སངས་རྒྱས་འགྲོ་མགོན་པདྨ་འབྱུང་༔ རྗེ་འབངས་ཉེར་ལྔ་ཕྲིན་ལས་གྲུབ་པའི་ཚོགས༔ འགྲོ་འདུལ་སྤྲུལ་པའི་སྐུ་ཡི་བཀྲ་ཤིས་ཤོག༔ རབ་འབྱམས་རྒྱལ་བའི་ཕྲིན་ལས་གཅིག་བསྡུས་པ༔ བར་ཆད་བདུད་འདུལ་དཔལ་ཆེན་ཕུར་པའི་ལྷ༔ གཙོ་འཁོར་ཡོངས་རྫོགས་དམ་ཅན་སྲུང་མའི་ཚོགས༔ ཡི་དམ་དཀྱིལ་འཁོར་འཁོར་ལོའི་བཀྲ་ཤིས་ཤོག༔ ཅེས་བརྗོད་རྒྱུན་གྱི་སྤྱོད་ལམ་བྱ༔ ཨེ་མ་ཡང་ཟབ་ཐུགས་ཀྱི་བཅུད༔ ཕྲིན་ལས་ཕུར་པའི་ཟབ་ཆོས་འདི༔ ཆོས་སྐུའི་དགོངས་པས་བྱིན་བརླབས་ཤིང་༔ ལོངས་སྐུས་རིག་འཛིན་བརྡ་ལས་བརྒྱུད༔ སྤྲུལ་སྐུ་པདྨ་ཐོད་ཕྲེང་གིས༔ རིག་འཛིན་རྗེ་འབངས་ཉེར་ལྔ་ལ༔ གདམས་ངག་སྙན་བརྒྱུད་ཚུལ་དུ་བསྩལ༔ མ་འོངས་སྐལ་ལྡན་ལས་འཕྲོ་ཅན༔ ལུང་བསྟན་སྨོན་ལམ་གཏད་རྒྱས་བཏབ༔ ཚུལ་བཞིན་སྒྲུབ་པའི་གང་ཟག་ལ༔ དངོས་གྲུབ་འབྱུང་བར་ཐེ་ཚོམ་མེད༔ གནས་སྐབས་ཕྲིན་ལས་རྣམ་བཞི་འགྲུབ༔ ཕུར་སྲུང་དམ་ཅན་མེལ་ཚེ་བྱེད༔ རྟེན་འབྲེལ་དོན་དང་ལྡན་པར་འགྱུར༔ ས་མ་ཡཱ༔ གུ་ཧྱ༔ ཞེས་པ་འདི་ནི་མཚོ་སྐྱེས་བླ་མ་དགྱེས་པའི་འབངས་དུས་མཐའི་གཏེར་མིང་འཛིན་པ་ལུང་རིག་མྱུ་གུ་རྩལ་གྱིས་དབྱིངས་རིག་མཁའ་འགྲོའི་གསང་མཛོད་ནས་སྤེལ་བ་དུས་ཀུན་ཏུ་དགེ་བར་གྱུར་ཅིག་གུ། དགེའོ། །དགེའོ། །དགེའོ།།