བཤགས་པ་ཟག་མེད་བདུད་རྩིའི་ཁྲུས་བུམ།

༄༅།། སྡོམ་གསུམ་ཉམས་ཆག་བཤགས་པ་ཟག་མེད་བདུད་རྩིའི་ཁྲུས་བུམ་བཞུགས།

ཧོ། དགོངས་ཤིག་དཀོན་མཆོག་རིན་ཆེན་གསུམ། །གསོན་ཅིག་རྩ་གསུམ་སྲུང་མར་བཅས། །ཉེ་བར་དགོངས་ཤིག་རྡོ་རྗེ་སེམས། །སྡིག་ལྡན་བདག་ལ་བརྩེ་བས་གཟིགས། །ཐོག་མ་མེད་པའི་ཀུན་གཞི་ནི། །སྤྲོས་བརྒྱད་སྐྱོན་ལས་ཉེར་གྲོལ་ཡང་། །གློ་བུར་ཀུན་བརྟགས་གཞན་དབང་གིས། །རང་ངོ་མ་ཤེས་འཁོར་བར་འཁྱམས། །དེ་ཚེ་ལས་དང་ཉོན་མོངས་མཐུས། །མི་དགེ་བཅུ་དང་མཚམ་མེད་ལྔ། །ལྕི་བ་བཞི་དང་ལོག་པ་བརྒྱད། །ཉེས་ལྟུང་སྒྲིབ་ཀུན་སྙིང་ནས་བཤགས། །ཁྱད་པར་བག་ཆགས་ངན་པ་ཡི། །མཚམས་སྦྱར་ལུས་རྟེན་འདི་བཟུང་ཚེ། །དམ་ཆོས་འདུལ་བའི་སྒོར་ཞུགས་ཏེ། །མཁན་སློབ་དགེ་འདུན་གྲངས་ཚང་བར། །འདུལ་ཁྲིམས་སྡོམ་པ་བླངས་པ་ལས། །ཕམ་ལྷག་སྤང་ལྟུང་ལྟུང་བྱེད་དང་། །ཉེས་བྱས་ཕྱོགས་མཐུན་གང་བྱུང་བ། །རྩ་གསུམ་བླ་མ་རྡོ་རྗེ་སེམས། །སྐྱབས་འོས་རྣམས་ཀྱི་སྤྱན་སྔ་རུ། །མི་འཆབ་འགྱོད་པ་དྲག་པོས་བཤགས། །ཕྱིན་ཆད་སྲོག་དང་བསྡོས་ཏེ་བསྡོམས། །དེ་བཞིན་ཐེག་ཆེན་བཤེས་གཉེན་དང་། །རྒྱལ་བ་སྲས་བཅས་སྤྱན་སྔ་རུ། །སྲོལ་གཉིས་སྡོམ་པ་བླངས་པ་ལས། །ཉམས་ཤིང་འགལ་འཁྲུལ་ཐམས་ཅད་བཤགས། །ཉེ་ལམ་གསང་སྔགས་ཕྱི་ནང་གི། །དབང་དང་གྲོལ་བྱེད་གདམས་པ་ལ། །བསྲུང་བྱའི་དམ་ཚིག་གང་གསུངས་པ། །རྩ་བ་ཡན་ལག་སྦོམ་པོ་སོགས། །ཉེས་ལྟུང་གང་དང་གང་བྱུང་བ། །མི་འཆབ་སྙིང་ནས་བཤགས་པར་བགྱི། །ཐུགས་རྗེའི་མངའ་བདག་ཁྱེད་རྣམས་ཀྱིས། །དག་ཚངས་མཆོག་གི་དངོས་གྲུབ་སྩོལ། །ཡི་གེ་བརྒྱ་བ་ཅི་མང་བརྗོད་ཅིང་བཤགས་པས་ཉེས་ལྟུང་མ་ལུས་པ་བྱང་བར་འགྱུར་རོ། །ཞེས་པའང་ལྷ་གྲོགས་བརྩེ་ལྡན་དམ་པ་སྭ་རའི་མིང་གིས་བསྐུལ་ངོར་རྒན་པོ་རྒྱ་སྤྲུལ་བས་བྲིས་པའོ།།