གསོལ་འདེབས་བྱིན་རླབས་གཏེར་མཛོད།

༄༅། །རྡོ་རྗེ་ཕུར་པའི་གསོལ་འདེབས་བྱིན་རླབས་གཏེར་མཛོད་ཅེས་བྱ་བ་བཞུགས། ཨེ་མ་ཧོ། རིགས་བདག་སྟོན་པ་ཀུན་བཟང་ཆེ་བའི་མཆོག །རིགས་བརྒྱའི་སྤྱི་མེས་རྡོར་འཆང་རྡོ་རྗེ་སེམས། །མཁའ་འགྲོའི་གཙོ་མོ་ལས་ཀྱི་དབང་མོ་ཆེར། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །རིག་འཛིན་བརྒྱད་དང་པདྨ་ཐོད་ཕྲེང་རྩལ། །བཀའ་བབས་མི་བརྒྱད་གཟུངས་མ་མཁར་ཆེན་བཟའ། །བརྡའ་གྲོལ་བླ་མ་བྱང་ཆུབ་གླིང་པ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །སྤྲུལ་པའི་སྐུ་མཆོག་གཏེར་ཆེན་ལུང་རིག་གླིང་། །རྩ་བ་ཡན་ལག་ཆོས་ཀྱི་བདག་པོ་སོགས། །བརྒྱུད་གསུམ་དཔལ་ལྡན་བླ་མའི་ཚོགས་རྣམས་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །དཔལ་ཆེན་རྒྱལ་ཀུན་ཕྲིན་ལས་གཅིག་བསྡུས་པ། །རྡོ་རྗེ་གཞོན་ནུ་འཁོར་ལོ་རྒྱས་འདེབས་མ། །སྲས་མཆོག་རིགས་བཞི་ཁྲོ་བཅུ་སྒོ་སྐྱོང་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །དབང་ཕྱུག་ཉེར་བརྒྱད་ཕུར་སྲུང་བཅུ་དྲུག་དང་། །ཕུར་པ་གྲུབ་པའི་རིག་འཛིན་བརྒྱུད་པའི་ཚོགས། །རྩ་གསུམ་སྲུང་མ་དམ་ཅན་གཏེར་བདག་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །དེ་ལྟར་གསོལ་བ་བཏབ་པའི་མཐུ་ནུས་ཀྱིས། །མ་དག་ཕུང་པོ་ཁམས་དང་སྐྱེ་མཆེད་རྣམས། །ལྕགས་ཁམས་གསེར་འགྱུར་རྩི་ཡིས་ཐེབས་པ་བཞིན། །དབང་བཞིའི་ཆུ་བོས་སྒོ་གསུམ་སྒྲིབ་སྦྱངས་ནས། །སྣང་བཞི་ཟད་ནས་དབྱིངས་རིག་དབྱེར་མེད་ཀློང་། །དཔལ་ཆེན་ཁྲག་འཐུང་རྡོ་རྗེ་གཞོན་ནུ་ཡི། །གོ་འཕང་ཚེ་འདི་ཉིད་ལ་མྱུར་ཐོབ་ནས། །འཁོར་བ་དོང་སྤྲུགས་འགྲོ་དོན་མཐར་ཕྱིན་ཤོག །