ལུས་དཀྱིལ་རྒྱུན་ཁྱེར་དཔའ་བོ་གཅིག་སྒྲུབ།
ཕུར་པ་དམ་སྲི་ཚར་གཅོད་ལས༔ ལུས་དཀྱིལ་རྒྱུན་ཁྱེར་དཔའ་བོ་གཅིག་སྒྲུབ་བཞུགས༔ རང་བཞིན་དབྱིངས་ཀྱི་ལྷ་ལ་འདུད༔ སྒྲུབ་རྫས་ཡོ་བྱད་སྤྲོས་པ་མེད༔ རྒྱུན་གྱི་ཉམས་ལེན་འདི་ལྟར་རོ༔ ཧཱུྃ་ཧཱུྃ༔ དབྱིངས་རིག་ཟུང་འཇུག་ཕུར་པའི་ལྷར༔ རང་ངོ་ཤེས་པས་སྐྱབས་སུ་མཆི༔ ཁམས་གསུམ་སེམས་ཅན་དབྱིངས་སྒྲོལ་ཕྱིར༔ རང་བཞིན་མཉམ་པའི་བསྒོམ་བཟླས་བྱ༔ ཧཱུྃ་ཧཱུྃ༔ ཕྱི་སྣོད་ཆོས་དབྱིངས་དུར་ཁྲོད་དབུས༔ ཉི་མ་བདུད་བཞི་དམ་སྲིའི་སྟེང་༔ དབྱིངས་ནས་རིག་པ་ཆོས་ཀྱི་སྐུ༔ བདུད་འདུལ་རྡོ་རྗེ་གཞོན་ནུ་ཆེ༔ སྣང་སྲིད་ཟིལ་གནོན་ཁྲོ་ཆགས་བཞད༔ ཞལ་གསུམ་སྐུ་གསུམ་དཀར་མཐིང་དམར༔ ཕྱག་དྲུག་ཕར་ཕྱིན་དྲུག་གི་བརྡ༔ རྩེ་དགུ་རྩེ་ལྔ་རྩེ་གསུམ་མེ༔ རི་རབ་ཕུར་འདྲིལ་ཚད་མེད་ཞབས༔ དུར་ཁྲོད་ཆས་བརྒྱད་དཔལ་ཆས་རྫོགས༔ ཤེས་རབ་འཁོར་ལོ་རྒྱས་འདེབས་ཡུམ༔ ཨུཏྤལ་དྲིལ་བུ་དུང་དམར་སྟོབ༔ མཁའ་གསང་མཉམ་སྦྱོར་དཔའ་མོའི་ཆས༔ སྤྱི་བོར་ཁྱུང་ལྡིང་མེ་ཀློང་བཞུགས༔ ༈ གནས་བཅུར་རང་བྱུང་ཁྲོ་རྒྱལ་བཅུ། །གཡས་གཡོན་ཟ་གསོད་ཁྲ་ཐབས་ཚོགས། །ཡན་ལག་ཉིང་ལག་དབང་མོ་དང་། །སྒོ་སྐྱོང་ཕུར་སྲུང་གསལ་བ་ལ། །རྒྱ་ལྷས་སོ།། རྒྱལ་ཀུན་བྱིན་རླབས་གཅིག་ཏུ་རྫོགས༔ གནས་གསུམ་རྡོ་རྗེ་གསུམ་གྱིས་མཚན༔ མ་རིག་འཁྲུལ་སྣང་དགྲ་བགེགས་གཤེད༔ ཁྲོ་རྒྱལ་སྤྲོ་བསྡུ་སྐར་ལྟར་འཁྲིགས༔ ཧཱུྃ་ཧཱུྃ༔ འོག་མིན་ཆོས་དབྱིངས་ཕོ་བྲང་ནས༔ ཐུགས་དམ་དབང་གིས་འདིར་གཤེགས་ཤིག༔ ཕྱག་རྒྱ་བཞི་ཡི་རྟེན་ལ་བཞུགས༔ རང་བབས་ལྟ་བའི་ཀློང་ནས་འདུད༔ ཡུལ་དྲུག་སྤང་བླང་བྲལ་བས་མཆོད༔ ཨོཾ་བདེ་གཤེགས་སྐུ་ལ་འགྱུར་བ་མེད༔ ཨཱ༔བདེ་གཤེགས་གསུང་ལ་འགགས་པ་མེད༔ ཧཱུྃ་ཁྲོ་རྒྱལ་ཐུགས་ལ་འཁྲུལ་བ་མེད༔ གསང་གསུམ་ཡོན་ཏན་རྫོགས་ལ་བསྟོད༔ སྒོ་གསུམ་ལྷ་སྔགས་ཏིང་ངེ་འཛིན༔ སྒོམ་མེད་ཡེངས་མེད་དྲན་པའི་ཛཔ྄༔ རྒྱུན་ཆད་མེད་པའི་ངང་ནས་བསྙེན༔ བདེ་གཤེགས་ཡོངས་རྫོགས་རྩ་བའི་སྔགས༔ ཨོཾ་ཨཱ༔ཧཱུྃ༔ ཞེས་རྡོ་རྗེའི་བཟླས་པ་བྱ༔ བློ་ཆུང་ཤུབ་བུར་འབུམ་ལྔ་བཟླ༔ ཕུར་པ་ཀུན་འདུས་ཕྲིན་ལས་ཀྱི༔ སྒྲུབ་པའི་སྔགས་ལ་བརྩོན་འགྲུས་བསྐྱེད༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཨོཾ་ཕཊ༔སྒྲོམ་དུ་འབྲུ་དགུ་སྦ༔ འབུམ་ཕྲག་དགུ་ཡིས་རྟགས་འབྱུང་ངེས༔ གསང་བའི་ངང་ནས་སྒྲུབ་པ་ན༔ མཐའ་ཡི་འདྲེ་བཞི་འདི་ཡིས་ཐུལ༔ ཐུན་མོང་ལས་བཞི་འདི་ཡིས་འགྲུབ༔ མཆོག་གི་ས་ལ་འདི་ཡིས་རེག༔ དེ་ཕྱིར་པདྨའི་ཐུགས་ཐིག་གོ༔ རྗེས་ལ་ཧཱུྃ་ཞེས་དབྱིངས་སུ་བསྡུ༔ ཕཊཿཀྱིས་ལྷར་ལྡང་དགེ་བ་བསྔོ༔ སྤྱོད་ལམ་ཆོས་སྤྱོད་ཆགས་མེད་བྱ༔ དབྱིངས་ཀྱི་སྒྲོམ་ནས་དབྱིངས་ཀྱི་ཆོས༔ དབྱིངས་ཀྱི་ཌཱཀྐིའི་བརྡ་རིས་ནི༔ ཕལ་པའི་བློ་ཡི་སྤྱོད་ཡུལ་མིན༔ ལོག་སྲེད་ཅན་ལ་རྒྱ་གསུམ་སྨོས༔ བཀའ་ཡི་སྲུང་མས་མེལ་ཚེ་གྱིས༔ གུ་ཧྱ༔ ཞེས་རིག་འཛིན་ཆེན་པོ་ལུང་རིག་གླིང་པ་འགྲོ་འདུལ་རྩལ་གྱིས་དགོངས་པ་མི་འགྱུར་དབྱིངས་ཀྱི་ཆོས་སྡེ་ལས་བྱུང་བ་དུས་གསུམ་དུ་དགེ་ཞིང་། ཆོས་བརྒྱུད་འཛིན་པའི་གང་ཟག་རྣམས་ཀྱི་བར་ཆད་དམ་སྲིའི་དཔུང་ཚོགས་རྨིང་མེད་དུ་བརླགས་ཏེ་ཆོས་སྲིད་མངའ་ཐང་ཐམས་ཅད་གོང་ནས་གོང་དུ་སྤེལ་ཞིང་བཀྲ་ཤིས་པར་གྱུར་ཅིག ཛ་ཡནྟུ།