བསྐང་བཤགས་ཡིད་བཞིན་ཆར་འབེབས།

ཡང་ཟབ་ཕུར་པའི་ཐུགས་སྒྲུབ་བདུད་དཔུང་ཚར་གཅོད་ལས༔ བསྐང་བཤགས་ཡིད་བཞིན་ཆར་འབེབས་བཞུགས་སོ༔

ཕྲིན་ལས་ཕུར་པའི་ལྷ་ལ་འདུད༔ བསྙེན་ཅིང་སྒྲུབ་པའི་རྣལ་འབྱོར་ལ༔ རྩ་བ་ཡན་ལག་དམ་ཚིག་ཉམས༔ ལུས་ངག་ཡིད་ལ་མི་དགེ་བའི༔ རྟགས་བྱུང་ནད་གདོན་བགེགས་ཀྱིས་ཉེན༔ མ་ལུས་བྱང་ཞིང་སེལ་བའི་ཐབས༔ བསྐང་བཤགས་འདི་ལ་བརྩོན་པར་བྱ༔ ས་མ་ཡཱ༔ ཡར་མར་ཚེས་བཅུའི་དུས་ཆེན་ལ༔ དཀྱིལ་འཁོར་གཞུང་བཞིན་སྟ་གོན་བྱ༔ བསྙེན་ཅིང་སྒྲུབ་པ་ལས་སྦྱོར་བརྩམས༔ སྨན་དང་རཀྟ་བྷ་ལིང་ཏ༔ སྤྱན་གཟིགས་གསལ་བའི་མར་མེ་དང་༔ ཐོད་རྔ་རྐང་གླིང་རོལ་མོའི་སྒྲ༔ སྙན་པའི་དབྱངས་དང་གདུང་བའི་བློས༔ ལྷ་ཚོགས་ཐུགས་དམ་འདི་བཞིན་བསྐང་༔ ཧཱུྃ་ཧཱུྃ༔ སྐྱེ་མེད་རྣམ་དག་ཆོས་དབྱིངས་ཕོ་བྲང་ནས༔ ཆོས་སྐུ་ཀུན་ཏུ་བཟང་པོ་ལ་སོགས་པའི༔ རྒྱལ་བ་དགོངས་བརྒྱུད་བླ་མ་གཙོ་དང་འཁོར༔ སྲས་དང་སྤྲུལ་པར་བཅས་པའི་ཐུགས་དམ་བསྐང་༔ འགགས་མེད་ལྷུན་གྲུབ་འོད་ལྔའི་གཞལ་ཡས་ནས༔ ལོངས་སྐུ་རྡོ་རྗེ་སེམས་དཔའ་ལ་སོགས་པའི༔ རིག་འཛིན་བརྡ་བརྒྱུད་བླ་མ་གཙོ་དང་འཁོར༔ སྲས་དང་སྤྲུལ་པར་བཅས་པའི་ཐུགས་དམ་བསྐང༔ ངེས་མེད་འགྲོ་བ་འདུལ་བའི་ཕོ་བྲང་ནས༔ སྤྲུལ་སྐུ་པདྨ་ཐོད་ཕྲེང་ལ་སོགས་པའི༔ གང་ཟག་སྙན་བརྒྱུད་བླ་མ་གཙོ་དང་འཁོར༔ སྲས་དང་སྤྲུལ་པར་བཅས་པའི་ཐུགས་དམ་བསྐང་༔ ཕྲིན་ལས་བཀའ་བབས་ལྷ་དང་གཉིས་མེད་གྲུབ༔ མཁར་ཆེན་ཡེ་ཤེས་མཚོ་རྒྱལ་ལ་སོགས་པའི༔ རྡོ་རྗེ་ཕུར་པའི་རིག་པ་འཛིན་པའི་ཚོགས༔ མ་ལུས་འཁོར་དང་བཅས་པའི་ཐུགས་དམ་བསྐང་༔ ཧཱུྃ་ཧཱུྃ༔ ཆོས་དབྱིངས་དུར་ཁྲོད་འབར་བའི་གཞལ་ཡས་ན༔ རྒྱལ་བའི་ཕྲིན་ལས་གཅིག་བསྡུས་ཧེ་རུ་ཀ༔ ཐུགས་ཀྱི་སྲས་མཆོག་བཛྲ་ཀཱི་ལ་ཡ༔ ཁྲོ་རྒྱལ་ཡོངས་ཀྱི་སྤྱི་དཔལ་ཐུགས་དམ་བསྐང་༔ སྟོང་ཉིད་ཤེས་རབ་ཨེ་ཡི་གཞལ་ཡས་ནས༔ འཁོར་བའི་འཁོར་ལོ་མི་གནས་མྱང་འདས་ཆེར༔ བདག་ཉིད་ལྟ་བའི་རྒྱས་འདེབས་དབྱིངས་ཕྱུག་མ༔ ཁྲོ་མོ་འདུས་པའི་སྤྱི་དཔལ་ཐུགས་དམ་བསྐང་༔ ལས་བཞིའི་ཕྲིན་ལས་སྒྲུབ་པའི་ཕོ་ཉ་བ༔ བདུད་བཞི་དབྱིངས་སུ་སྒྲོལ་བའི་ཧེ་རུ་ཀ༔ ཚད་མེད་རྣམ་བཞིའི་བདག་ཉིད་ལྷག་པའི་ལྷ༔ སྲས་མཆོག་ཀཱི་ལ་རིགས་བཞིའི་ཐུགས་དམ་བསྐང་༔ གཟའ་སྐར་ལ་སོགས་ཕྱོགས་སྐྱོང་བསྣོལ་བའི་སྟེང་༔ ལོག་རྟོག་མི་དགེ་བཅུ་ཡི་སྐྱོན་སྤངས་ཤིང་༔ རྣམ་གྲོལ་དབང་བཅུའི་དོན་ལ་མངའ་བརྙེས་པའི༔ ཡེ་ཤེས་ཁྲོ་བོ་བཅུ་ཡི་ཐུགས་དམ་བསྐང་༔ སྦྱིན་སོགས་ཕ་རོལ་ཕྱིན་པ་བཅུ་ཡི་ཚུལ༔ ཤེས་རབ་གཟུགས་ཀྱི་སྐུར་སྣང་སྟོང་དབྱིངས་སུ༔ ཀུན་བརྟགས་སྣང་བ་རྒྱས་འདེབས་དཔལ་འབར་མ༔ ཡེ་ཤེས་ཁྲོ་བོ་བཅུ་ཡི་ཐུགས་དམ་བསྐང་༔ ཉེ་ཉོན་ཉི་ཤུ་གནས་སུ་དག་པ་ལས༔ ཐབས་ཀྱི་ཆ་ལས་ཟ་བྱེད་ཡབ་ཀྱི་ཚུལ༔ ཤེས་རབ་ཆ་ལས་གསོད་བྱེད་ཡུམ་གྱི་ཚུལ༔ ཟ་གསོད་ཕྲ་མེན་ཉི་ཤུའི་ཐུགས་དམ་བསྐང་༔ ཞིང་བཅུའི་དགྲ་བགེགས་འགུགས་འཆིང་སྡོམ་མྱོས་ཕྱིར༔ ཚད་མེད་རྣམ་བཞིའི་རང་གཟུགས་ཕྱིར་ཤར་བའི༔ ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་འཛིན༔ སྒོ་སྐྱོང་ཁྲོ་མོ་རྣམ་བཞིའི་ཐུགས་དམ་བསྐང་༔ ཞེ་སྡང་ང་རྒྱལ་འདོད་ཆགས་ཕྲག་དོག་རྣམས༔ མ་སྤངས་གནས་སུ་དག་པའི་རང་གཟུགས་ལས༔ ཤྭ་ན་སྲི་ལ་སྲི་ཀ་ཀུ་རཱ་ཛ༔ མུ་ཁ་ཆེན་པོ་མཆེད་བཞིའི་ཐུགས་དམ་བསྐང་༔ ཤིན་ཏུ་རྩུབ་ཅིང་མ་རུངས་དྲེགས་པའི་ལྕམ༔ བདུད་གཟའ་བཙན་དང་ཀླུ་ཡི་བུ་མོ་བཞི༔ ཡ་བྱིན་དེ་བྱིན་བསེ་བྱིན་ཕག་བྱིན་མ༔ ས་བདག་ཆེན་མོ་མཆེད་བཞིའི་ཐུགས་དམ་བསྐང་༔ འབྱུང་བ་ཆེན་པོ་བཞི་ཡིས་ཁམས་སུ་ཁྱབ༔ དབྱར་དགུན་སྟོན་དཔྱིད་དུས་བཞིར་དབང་བསྒྱུར་མ༔ རེ་ཏི་རེ་ཛ་རེ་ཛི་རེ་མ་ཛུ༔ བདག་ཉིད་ཆེན་མོ་བཞི་ཡི་ཐུགས་དམ་བསྐང་༔ དྲི་ཟ་གཤིན་རྗེ་ཀླུ་དབང་གནོད་སྦྱིན་རིགས༔ ཟ་གསོད་འཆིང་དང་འདེབས་པའི་ལས་ལ་བརྩོན༔ དུང་གསེར་བསེ་ལྕགས་ལས་བཞིའི་གིང་ཆེན་བཞི༔ སྐྱེས་བུ་ཆེན་པོ་བཞི་ཡི་ཐུགས་དམ་བསྐང་༔ ཧཱུྃ་ཧཱུྃ༔ དེ་ལྟར་དཀྱིལ་འཁོར་ལྷག་པའི་ལྷ་རྣམས་ལ༔ ཐུགས་དམ་གཉན་པོ་བསྐང་བའི་དམ་རྫས་ནི༔ མི་སྤང་བ་ཡི་དམ་ཚིག་གསོ་བའི་ཕྱིར༔ འཆི་མེད་བདུད་རྩི་སྨན་གྱིས་ཐུགས་དམ་བསྐང་༔ དང་དུ་བླངས་པའི་དམ་ཚིག་གསོ་བའི་ཕྱིར༔ ཆགས་མེད་རཀྟ་དམར་གྱིས་ཐུགས་དམ་བསྐང་༔ ཤེས་པར་བྱ་བའི་དམ་ཚིག་གསོ་བའི་ཕྱིར༔ ཞུན་ཆེན་སྣང་གསལ་མར་མེས་ཐུགས་དམ་བསྐང་༔ སྤྱད་པར་བྱ་བའི་དམ་ཚིག་གསོ་བའི་ཕྱིར༔ ཤ་ཆང་བཟའ་བཏུང་ཚོགས་ཀྱིས་ཐུགས་དམ་བསྐང་༔ བུམ་དབང་དམ་ཚིག་ཉམས་པ་གསོ་བའི་ཕྱིར༔ བསྐྱེད་རིམ་སྣང་སྟོང་ལྷ་སྐུས་ཐུགས་དམ་བསྐང་༔ གསང་དབང་དམ་ཚིག་ཉམས་པ་གསོ་བའི་ཕྱིར༔ འགགས་མེད་བཟླས་པ་སྔགས་ཀྱིས་ཐུགས་དམ་བསྐང་༔ ཤེར་དབང་དམ་ཚིག་ཉམས་པ་གསོ་བའི་ཕྱིར༔ གསལ་སྟོང་འདུ་འབྲལ་མེད་པས་ཐུགས་དམ་བསྐང་༔ ཚིག་དབང་དམ་ཚིག་ཉམས་པ་གསོ་བའི་ཕྱིར༔ འཁོར་འདས་རོ་མཉམ་ལྟ་བས་ཐུགས་དམ་བསྐང་༔ རྩ་བའི་དམ་ཚིག་ཉམས་པ་གསོ་བའི་ཕྱིར༔ རྡོ་རྗེ་སློབ་དཔོན་གཉེན་གྱི་ཐུགས་དམ་བསྐང་༔ ཡན་ལག་དམ་ཚིག་ཉམས་པ་གསོ་བའི་ཕྱིར༔ མཆེད་ལྕམ་འདུས་པ་ཡོངས་ཀྱི་ཐུགས་དམ་བསྐང་༔ སྡོམ་གསུམ་དམ་ཚིག་ཉམས་ཆག་བསྐང་བའི་ཕྱིར༔ སྒོ་གསུམ་ལྷ་སྔགས་ཏིང་འཛིན་ཐུགས་དམ་བསྐང་༔ དེ་ལྟར་ཐུགས་དམ་བསྐངས་པའི་བྱིན་རླབས་ཀྱིས༔ ཚེ་རབས་སྔོན་གྱི་ལས་ངན་ཅི་མཆིས་པ༔ ཆོས་དབྱིངས་མཉམ་པའི་ངང་དུ་དག་གྱུར་ཅིག༔ འཕྲལ་རྐྱེན་གནོད་པའི་གདོན་བགེགས་ཅི་མཆིས་པ༔ ཕན་བྱེད་མ་དང་བུ་ཡི་འདུ་ཤེས་ཀྱིས༔ བྱང་ཆུབ་སེམས་ཀྱི་ངང་དུ་མཐུན་གྱུར་ཅིག༔ ཆགས་ཆེ་ཉམ་ང་རྨི་ལྟས་མཚན་མ་ངན༔ རྨི་ལམ་སྒྱུ་མའི་འཁྲུལ་འཁོར་ཞིག་པ་བཞིན༔ བདག་མེད་སྟོང་ཉིད་ཀློང་དུ་གྲོལ་གྱུར་ཅིག༔ སྔ་དགྲ་བརྡར་དང་ཕྱི་དགྲ་ཤོམ་པའི་རིགས༔ གསང་ཆེན་སྲུང་མ་རྒྱ་མཚོའི་མཐུ་ནུས་ཀྱིས༔ སྣང་བ་དབང་བསྡུས་སྤ་བཀོང་རྡུལ་དུ་རློགས༔ མི་མཐུན་ཕྱོགས་ལས་རྣམ་རྒྱལ་ཕྲིན་ལས་མཛོད༔ དེ་ལྟར་བསྐང་བཤགས་རིམ་པ་འདིས༔ སྔོན་གྱི་ལས་ཀྱང་ཟད་བྱེད་ན༔ འཕྲལ་རྐྱེན་སེལ་བར་སྨོས་ཅི་དགོས༔ སྔགས་ཀྱི་དམ་ཚིག་ཉམས་པ་གསོ༔ མི་ནོར་ཟས་གསུམ་དབང་དུ་འདུ༔ ཉམས་རྟོགས་ཡར་ངོའི་ཟླ་ལྟར་འཕེལ༔ དེ་ཕྱིར་འདི་ལ་བརྩོན་པར་རིགས༔ ས་མ་ཡཱ༔ རྒྱ་རྒྱ་རྒྱ༔ ཞེས་པ་འདི་ཡང་རིག་འཛིན་ལུང་རིག་གླིང་པས་དབྱིངས་ཀྱི་མཁའ་འགྲོའི་བརྡ་ལས་བྱུང་བ་བཞིན་མཆོང་མཛོད་སྨུག་པོའི་སྒྲོམ་ནས་བཏོན་པ་སྐལ་ལྡན་པདྨའི་ལུང་ཟིན་གཞན་ཕན་བཟང་པོས་ལེགས་པར་ཕབ་པ་དུས་ཀུན་ཏུ་དགེ་བར་གྱུར་ཅིག།སརྦ་ཛ་གད་ཏི།