གཉན་ཆེན་ཐང་ལྷའི་གསོལ་མཆོད་ཡིད་བཞིན་འདོད་སྩོལ།
༄༅།། གཉན་ཆེན་ཐང་ལྷའི་གསོལ་མཆོད་ཡིད་བཞིན་འདོད་སྩོལ་ཞེས་བྱ་བ་བཞུགས་སོ། །
༄༅།། གུ་རུ་རིན་པོ་ཆེ་ལ་ཕྱག་འཚལ་ལོ༔ འདིར་ལྷ་ཆེན་ཟུར་ཕུད་ལྔ་པ་ལ་གསོལ་མཆོད་བྱ་བར་འདོད་པས༔ བཤོས་བུ་ཟླུམ་པོ་གཙང་མ་མར་དཀར་གྱིས་སྦགས་པ་དང་། གཙང་ལུག་འོ་ཕུད་ཆང་ཕུད་གཡུ་སྐྱེམས་ཕྱེ་མར་སོགས་གང་འཛོམས་བཤམས་ལ། རང་ཉིད་གུ་རུ་སྣང་སྲིད་ཟིལ་གནོན་གྱིས་བསྐྱེད་རིམ་དང་ལྡན་པས། སྔགས་དྲུག་ཕྱག་རྒྱས་བྱིན་གྱིས་རླབས་ལ་རྔ་རོལ་དང་བཅས་པས་འདི་སྐད་དོ། །ཨེ་མ་རྨད་བྱུང་གངས་ཅན་བོད་ཡུལ་དུ། །འཕགས་མཆོག་ཕྱག་ན་པདྨའི་ཐུགས་ཀྱི་སྤྲུལ། །རང་བྱུང་པདྨ་རྒྱལ་པོ་མཁའ་ལམ་ནས། །རྫུ་འཕྲུལ་འཕུར་འགྲོའི་བརྟུལ་ཞུགས་ལ་ཞུགས་ཚེ། །སྔོན་ནས་གསང་བདག་རྡོ་རྗེ་འཛིན་པ་དང་། །ཐ་དད་མེད་ཀྱང་རྒྱལ་བསྟན་སྤེལ་སླད་དུ། །བསྟན་སྲུང་ཡུལ་ལྷའི་གཙོ་བོར་ཞལ་བཞེས་ཕྱིར། །ལྟོ་འགྲོའི་གཟུགས་ཀྱིས་ལམ་འཕྲང་བཅད་ནས་ཀྱང་། །ལྕེ་ཡི་ཟས་སུ་དཔོན་སློབ་བླངས་བརྩམས་པས། །དུག་གསུམ་རྩད་གཅོད་མཚོན་གྱི་ཡུ་བས་བསྣུན། །གངས་རྩེར་བྲོས་ཀྱང་གཟི་བརྗིད་མེ་དཔུང་གིས། །གངས་རི་བཞུས་ཤིང་ལུས་པོ་ཚིག་ཉེ་ཚེ། །ཞལ་ཟས་ཚོགས་མཆོད་དྲངས་ཏེ་ཐུབ་པའི་བསྟན། །མི་ཉམས་འཕེལ་ཞིང་དགེ་འདུན་འདུས་པའི་སྡེ། །དབུས་གཙང་རུ་བཞིར་ཁེངས་པས་སྲོག་སྐྱོབ་ཅེས། །ཞལ་གྱིས་བཞེས་པའི་ཐ་ཚིག་རྗེས་དགོངས་ལ། །སྨྱོ་འདྲེ་རྒྱལ་བསེན་འདུལ་བའི་ཧེ་རུ་ཀ །པདྨའི་བསྟན་པ་སྲུང་བའི་མཐུ་བོ་ཆེ། །བསམ་ཡས་ལྷ་ཁང་གཉེར་འཛིན་དཀོར་གྱི་བདག །ཕྱི་ལྟར་གཉན་ཆེན་ཐང་ལྷ་ཡུལ་སྐྱོང་གཙོ། །ནང་ལྟར་རྒྱུད་སྡེའི་མངའ་བདག་རྡོ་རྗེ་འཛིན། །གསང་བ་ལྷ་མཆོག་སྟོབས་ལྡན་ནག་པོ་ཆེ། །རྣལ་འབྱོར་དད་དང་གུས་པས་སྤྱན་འདྲེན་ན། །མ་ཐོགས་མྱུར་དུ་གནས་འདིར་གཤེགས་ནས་ཀྱང་། །རང་མཐུན་དགྱེས་པའི་སྟན་ལ་བག་ཕེབ་བཞུགས། །ཕྱི་མཆོད་དྭངས་བསིལ་ཡོན་ཆབ་དྲི་ཞིམ་སྤོས། །མཛེས་པའི་མེ་ཏོག་འོད་འབར་ཉི་ཟླའི་སྒྲོན། །བཟང་དྲུག་ངད་ལྡན་དྲི་ཆབ་རོ་ལྡན་བཤོས། །ནང་མཆོད་སྨན་རཀ་གཏོར་གསུམ་དམ་ཚིག་རྫས། །གསང་མཆོད་བདེ་སྟོང་སྦྱོར་དང་དགྲ་བགེགས་བསྒྲལ། །མཐུན་རྫས་གཡུ་སྐྱེམས་གཙང་ལུག་བཤོས་བུ་དང་། །ཕྱེ་མར་བསང་མཆོད་ལ་སོགས་མཆོད་པའི་སྤྲིན། །དངོས་འབྱོར་ཡིད་ལས་སྤྲུལ་བས་ཐུགས་དམ་བསྐང་། །དྲེགས་ཚོགས་གཙུག་གི་རྒྱན་ཏུ་མངའ་གསོལ་ལོ། །ཉམས་ཆག་ཉེས་ལྟུང་བག་ཆགས་དབྱིངས་སུ་བཤགས། །སྐུ་གསུང་ཐུགས་ཡོན་ཕྲིན་ལས་རྫོགས་པའི་ལྷ། །གདུག་ཅན་ཞིང་བཅུའི་གཤེད་གྱུར་རྡོ་རྗེ་འབར། །མདོག་དཀར་སྦ་ལྕགས་ཤེལ་ཕྲེང་ཕྱག་ན་བསྣམས། །ལྷ་རྟ་ངང་དཀར་ཆིབས་ཤིང་སྟོང་གསུམ་ཉུལ། །དར་དཀར་གོ་ཟུ་རིན་ཆེན་རྒྱན་ཕྲེང་ངོམས། །བདུད་སྲིན་དམ་སྲི་འདུལ་བའི་དཔའ་བོ་མཆོག །གཉན་ཆེན་ཐང་ལྷ་སྲིད་པའི་ལྷ་རབས་ཆེ། །རྣལ་འབྱོར་བསྟན་སྲུང་དམ་པ་ཁྱེད་ལ་བསྟོད། །ཁྱོད་ལ་ཕྲིན་ལས་གཉེར་དུ་གཏད་པའི་མདོར། །ཕན་བདེའི་འབྱུང་གནས་ཐུབ་བསྟན་དར་ཞིང་རྒྱས། །བསྟན་འཛིན་སྐྱེས་བུའི་སྐུ་ཚེ་མཛད་ཕྲིན་འཕེལ། །སྣོད་བཅུད་གེགས་ཞི་བདེ་སྐྱིད་ལྡན་པར་མཛོད། །ཁྱད་པར་མི་ཕྱུགས་གློ་བུར་སྲོག་འཕྲོག་པའི། །རྒྱལ་བསེན་དམ་སྲི་འབྱུང་པོའི་དཔའ་ཟིལ་ཆོམས། །བདག་གི་ཚེ་སྲོག་བཀྲག་མདངས་ཡར་ཟླ་བཞིན། །མི་ཉམས་གོང་དུ་འཕེལ་བའི་ཕྲིན་ལས་མཛོད། །མཐར་ཐུག་སྲིད་པའི་རྒྱ་མཚོ་ལས་བསྒྲལ་ནས། །གཟུགས་སྐུ་གཉིས་ཀྱིས་སེམས་ཅན་རེ་འབྲས་ཀུན། །ཐོགས་མེད་ཡིད་བཞིན་སྟེར་བའི་དབང་གི་རྒྱལ། །ཆེ་དགུའི་གཙུག་གི་རྒྱན་དུ་མཐོ་བར་མཛོད། །ཅེས་པའང་བླ་མ་དམ་པ་ལ་མི་ཕྱེད་པའི་དད་པ་ལྡན་པའི་བཙུན་ཆུང་བསོད་ནམས་མཐུ་སྟོབས་ནས་བསྐུལ་ངོར། རྒྱ་སྤྲུལ་བླུན་རྒན་ནས་བྲིས་པ་དུས་ཀུན་ཏུ་དགེ་བར་གྱུར་ཅིག སརྦ་མངྒ་ལཾ།