བསྐུལ་བ་མཚོན་ཆའི་འཁོར་ལོ།
ཕུར་པའི་ཐུགས་སྒྲུབ་དམ་སྲི་ཚར་གཅོད་ལས༔ བསྐུལ་བ་མཚོན་ཆའི་འཁོར་ལོ་བཞུགས༔ རབ་འབྱམས་རྒྱལ་བ་ཀུན་གྱི་ཕྲིན་ལས་པ༔ རྡོ་རྗེ་ཕུར་པའི་ལྷ་ལ་ཕྱག་འཚལ་ནས༔ ཕུར་པའི་ཐུགས་སྒྲུབ་ཟབ་མོའི་སྒྲོལ་ལས་མཚམས༔ བསྐུལ་བ་མཚོན་ཆའི་འཁོར་ལོ་འདིར་བསྟན་བྱ༔ དམར་གཏོར་རཀྟས་བྲན་ལ་དར་ནག་གཡབ༔ ཚིལ་ཆེན་བདུག་སྤོས་བཤུག་གླུ་དང་བཅས་ཏེ༔ རྔ་བརྡུང་རྔམ་པའི་དབྱངས་ཀྱིས་འདི་སྐད་དོ༔ ཧཱུྃ་བྷྱོ༔ དཔལ་ཆེན་ཁྲོ་རྒྱལ་ཡོངས་ཀྱི་འཁོར་ལོས་སྒྱུར༔ བཅོམ་ལྡན་རྡོ་རྗེ་གཞོན་ནུ་དབྱིངས་ནས་བསྐུལ༔ ཁྲག་འཐུང་ཁྲོ་མོ་ཡོངས་ཀྱི་སྤྱི་རྗེ་མོ༔ ཤེས་རབ་འཁོར་ལོ་རྒྱས་འདེབས་དབྱིངས་ནས་བསྐུལ༔ གཟུང་འཛིན་གཉིས་སྣང་དགྲ་འདྲེ་ཆམ་ལ་ཕོབས༔ འགྲོ་དྲུག་འཁྲུལ་བ་ཆོས་ཀྱི་དབྱིངས་སུ་སྒྲོལ༔ ཞེ་སྡང་དགྲ་བོ་ཚར་གཅོད་ཧེ་རུ་ཀ༔ སྲས་མཆོག་བཛྲ་ཀཱི་ལ་དབྱིངས་ནས་བསྐུལ༔ ང་རྒྱལ་གཤིན་རྗེ་ཟིལ་གནོན་ཁྲོ་བོའི་རྒྱལ༔ སྲས་མཆོག་རཏྣ་ཀཱི་ལ་དབྱིངས་ནས་བསྐུལ༔ འདོད་ཆགས་སྲིད་རྩ་གཅོད་མཛད་དཔའ་བོ་ཆེ༔ སྲས་མཆོག་པདྨ་ཀཱི་ལ་དབྱིངས་ནས་བསྐུལ༔ ཕྲག་དོག་དམ་སྲི་གནོན་མཛད་སྟོབས་པོ་ཆེ༔ སྲས་མཆོག་ཀརྨ་ཀཱི་ལ་དབྱིངས་ནས་བསྐུལ༔ དུག་ལྔའི་རང་གཟུགས་བདུད་བཞི་ཆམ་ལ་ཕོབས༔ རྒྱུད་ལྔའི་བག་ཆགས་སྐུ་བཞིའི་ཀློང་དུ་སྒྲོལ༔ ཧཱུྃ་བྷྱོ༔ སྲོག་གཅོད་མི་དགེ་གནས་དག་རྣམ་པར་རྒྱལ༔ བཟོད་པའི་ཕར་ཕྱིན་སྙེམས་མ་ཡུམ་དང་འཁྲིལ༔ རྐུ་འཕྲོག་མི་དགེའི་སྐྱོན་བྲལ་གཤིན་རྗེ་གཤེད༔ སྦྱིན་པའི་ཕར་ཕྱིན་དུར་ཁྲོད་བདག་མོ་འཁྲིལ༔ འདོད་ལོག་མི་དགེ་འཛིན་གྲོལ་རྟ་མགྲིན་རྒྱལ༔ ཚུལ་ཁྲིམས་ཕར་ཕྱིན་གོ་ཆ་ཡུམ་དང་འཁྲིལ༔ རྫུན་ཚིག་མི་དགེ་དབྱིངས་བསྒྲལ་བདུད་རྩི་འཁྱིལ༔ བརྩོན་འགྲུས་ཕར་ཕྱིན་རླུང་འབྱིན་ཡུམ་དང་འཁྲིལ༔ ཕྲ་མ་མི་དགེ་འཛིན་བྲལ་དབྱུག་སྔོན་ཅན༔ ཐབས་ཀྱི་ཕར་ཕྱིན་རྡོ་རྗེ་སྡེར་མོ་འཁྲིལ༔ རྩུབ་མོའི་ཚིག་སྤངས་ཁྲོ་རྒྱལ་མི་གཡོ་མགོན༔ སྟོབས་ཀྱི་ཕར་ཕྱིན་གཏུན་ཁུང་ཡུམ་དང་འཁྲིལ༔ ངག་འཁྱལ་སྐྱོན་བྲལ་ཁྲོ་ཆེན་འདོད་པའི་རྒྱལ༔ ཤེས་རབ་ཕར་ཕྱིན་མདའ་སྙེམས་ཡུམ་དང་འཁྲིལ༔ བརྣབ་སེམས་མི་དགེ་རང་གྲོལ་ཁམས་གསུམ་རྒྱལ༔ སྨོན་ལམ་ཕར་ཕྱིན་གསོད་བྱེད་ཡུམ་དང་འཁྲིལ༔ གནོད་སེམས་སྐྱོན་སྤངས་ཁྲོ་རྒྱལ་སྟོབས་པོ་ཆེ༔ བསམ་གཏན་ཕར་ཕྱིན་སྐུལ་བྱེད་ཡུམ་དང་འཁྲིལ༔ ལོག་པར་ལྟ་སྤངས་ཁྲོ་རྒྱལ་ཧཱུྃ་ཀ་ར༔ ཡེ་ཤེས་ཕར་ཕྱིན་སྒྲ་འབྱིན་ཡུམ་དང་འཁྲིལ༔ ཟ་གསོད་ཕྲ་ཐབས་ཉི་ཤུ་སྤྲུལ་པར་བཅས༔ ཁྲོ་རྒྱལ་ཡབ་ཡུམ་བཅུ་པོ་དབྱིངས་ནས་བསྐུལ༔ དམ་ཉམས་དགྲ་བགེགས་མི་དགེའི་རྟོག་ཚོགས་ཆོམས༔ བཟང་ངན་རྟོག་ཚོགས་འཛིན་པ་དབྱིངས་སུ་སྒྲོལ༔ ཧཱུྃ་བྷྱོ༔ ཤར་གྱི་སྒོ་བ་སྙིང་རྗེའི་ལྕགས་ཀྱུ་ཅན༔ འཁོར་བའི་གནས་ནས་འདྲེན་ཕྱིར་ཐུགས་དམ་བསྐུལ༔ ལྷོ་ཡི་སྒོ་བ་བྱམས་པའི་ཞགས་པ་ཅན༔ ཐར་པའི་ལམ་དུ་འཆིང་ཕྱིར་ཐུགས་དམ་བསྐུལ༔ ནུབ་ཀྱི་སྒོ་བ་དགའ་བའི་ལྕགས་སྒྲོག་ཅན༔ དམིགས་མེད་དབྱིངས་སུ་སྡོམ་ཕྱིར་ཐུགས་དམ་བསྐུལ༔ བྱང་གི་སྒོ་བ་བཏང་སྙོམས་དྲིལ་བུ་ཅན༔ ཟག་མེད་ཀློང་དུ་མྱོས་ཕྱིར་ཐུགས་དམ་བསྐུལ༔ མུ་བཞིར་ལྟུང་བའི་དགྲ་འདྲེ་ཆམ་ལ་ཕོབས༔ རྟག་ཆད་ལྟ་བ་བདག་མེད་ཀློང་དུ་སྒྲོལ༔ ཧཱུྃ་བྷྱོ༔ ཕུར་པ་རོལ་པའི་དུར་ཁྲོད་ཆེན་པོ་འདིར༔ ཞིང་བཅུའི་དགྲ་བགེགས་སྒྲོལ་བའི་དྲག་རྩལ་ཅན༔ ཕུར་སྲུང་བཅུ་དྲུག་ཐུགས་དམ་དབྱིངས་ནས་བསྐུལ༔ མ་གཡེལ་དགྲ་བགེགས་སྒྲོལ་བའི་ཕྲིན་ལས་མཛོད༔ ཧཱུྃ་བྷྱོ༔ ཤར་ཕྱོགས་དཀྱིལ་འཁོར་ཆེན་པོའི་བར་ཁྱམས་ལ༔ ལྕགས་ཀྱི་སྤྱང་མོ་འཇིགས་པའི་མགོ་དགུ་མ༔ ལྕགས་ཀྱི་མི་མོ་འཇིགས་པའི་གཟུགས་ཅན་ཞོན༔ ལྕགས་ཕུར་འདྲིལ་ཞིང་བསྟན་དགྲའི་སྙིང་ལ་འདེབས༔ ཤ་ན་མུ་ཁ་ཆེན་མོའི་ཐུགས་དམ་བསྐུལ༔ ལྷོ་ཕྱོགས་དཀྱིལ་འཁོར་ཆེན་པོའི་བར་ཁྱམས་ལ༔ གསེར་གྱི་འཕར་བ་མྱུར་བའི་ལྕེ་བརྒྱད་མ༔ གསེར་གྱི་མི་མོ་མྱུར་བའི་ཤུགས་ཅན་ཞོན༔ གསེར་ཕུར་འདྲིལ་ཞིང་བསྟན་དགྲའི་སྙིང་ལ་བརྡེག༔ ཤྭ་ན་མུ་ཁ་ཆེན་མོའི་ཐུགས་དམ་བསྐུལ༔ ནུབ་ཕྱོགས་དཀྱིལ་འཁོར་ཆེན་པོའི་བར་ཁྱམས་ལ༔ ཟངས་ཀྱི་ཝ་མོ་མགྱོགས་པའི་རྐང་གསུམ་མ༔ ཟངས་ཀྱི་མི་མོ་རྔམ་པའི་བརྗིད་ལྡན་ཞོན༔ ཟངས་ཕུར་འདྲིལ་ཞིང་ཉམས་པའི་སྲོག་ལ་འདེབས༔ སྲི་ལ་མུ་ཁ་ཆེན་པོའི་ཐུགས་དམ་བསྐུལ༔ བྱང་ཕྱོགས་དཀྱིལ་འཁོར་ཆེན་པོའི་བར་ཁྱམས་ལ༔ གཡུ་ཡི་ཁྱི་མོ་གཡུ་རལ་སྤྲིན་ལྟར་འཐིབས༔ གཡུ་ཡི་མི་མོ་མཛེས་པའི་ཚུལ་གྱིས་ཆིབས༔ གཡུ་ཕུར་འདྲིལ་ཞིང་དམ་སྲིའི་སྙིང་ལ་འདེབས༔ སྲི་ཀ་མུ་ཁ་ཆེན་མོའི་ཐུགས་དམ་བསྐུལ༔ ཧཱུྃ་བྷྱོ༔ བལ་ཡུལ་ཡ་བྱིན་ཡུལ་ལ་གནས་བཅས་པའི༔ བདུད་ཀྱི་བུ་མོ་བདུད་རྟ་ནག་པོ་ཆིབས༔ ལྕགས་རལ་ཕུར་པ་འདྲིལ་ཞིང་དགྲ་ལ་བརྡེག༔ ཐུགས་དམ་བསྐུལ་ལོ་བསྟན་དགྲ་རྡུལ་དུ་རློགས༔ རོང་གི་དེ་བྱིན་ཡུལ་ལ་བརྟེན་བཅས་པའི༔ གཟའ་ཡི་བུ་མོ་གཟའ་རྟ་མེ་འབར་ཆིབས༔ གསེར་ཕུར་འདྲིལ་ཞིང་གསེར་རལ་སྤྲིན་ལྟར་གཏིབས༔ བརྣག་པའི་དགྲ་ལ་གཟའ་ནད་སེར་ལྟར་ཕོབས༔ མང་ཡུལ་ལི་བྱིན་དམར་པོའི་ཡུལ་ལ་བརྟེན༔ བཙན་གྱི་བུ་མོ་བཙན་རྟ་དམར་པོ་ཞོན༔ བསེ་དམར་རལ་བསིགས་བསེ་ཕུར་དགྲ་ལ་འདེབས༔ སྡང་དགྲ་མ་གཏོང་བཙན་ནད་གཟེར་ཐབས་ཐོང༔ སྙེ་ནམ་ཕག་བྱིན་ཡུལ་གྱི་མཚོ་ལ་བརྟེན༔ ཀླུ་ཡི་བུ་མོ་གཡུ་རྟ་རླུང་གཤོག་ཆིབས༔ དུག་ཕུར་དགྲ་ལ་འདེབས་ཤིང་གཡུ་རལ་བསིགས༔ མཐོ་གནོན་བྱེད་པའི་དགྲ་ལ་མཛེ་ནད་ཕོབས༔ ཧཱུྃ་བྷྱོ༔ ཤར་ཕྱོགས་སྲིན་པོའི་སྐྱེས་བུས་ཤེལ་ཕུར་འདྲིལ༔ རྩལ་ལྡན་སེང་གེ་དཀར་མོའི་སྟེང་ན་འགྱིངས༔ རྒྱལ་པོ་འབུམ་གྱི་ཆོ་འཕྲུལ་དགྲ་ལ་འགྱེད༔ བསྟན་པའི་དགྲ་ལ་བརྒྱལ་ནད་སྨྱོ་འབོག་ཐོང༔ ལྷོ་ཕྱོགས་གཤིན་རྗེའི་སྐྱེས་བུས་ལྕགས་ཕུར་འདྲིལ༔ གཡུ་འབྲུག་ཆིབས་ཤིང་ཐོག་དང་སེར་བ་འབེབས༔ མི་ཟན་གཤིན་རྗེའི་དམག་དཔུང་དགྲ་ལ་འགྱེད༔ ཞིང་བཅུའི་དགྲ་བོ་མ་གཏོང་ཁྲམ་ལ་ཐོབ༔ ནུབ་ཕྱོགས་བཙན་གྱི་སྐྱེས་བུས་ཟངས་ཕུར་འདྲིལ༔ བཙན་གྱི་ར་སྐྱེས་གནམ་ལ་འཕུར་ཤེས་ཆིབས༔ བཙན་རྒོད་འབུམ་གྱི་ཕོ་ཉ་མྱུར་མགྱོགས་འགྱེད༔ བཙན་ཞགས་དམར་པོས་དགྲ་ལུས་གྲུ་གུར་བཅིངས༔ བྱང་ཕྱོགས་ཡ་བདུད་སྐྱེས་བུས་ལྕགས་ཕུར་འདྲིལ༔ བདུད་ཕོ་ནག་པོའི་ལས་མཁན་འབུམ་ཁྲག་འགྱེད༔ བདུད་རྟ་དྲག་ཤུལ་རྔམ་འཁྲུག་ཞོན་ནས་རྒྱུག༔ བདུད་ནད་འཐིབས་པོས་དགྲ་བོ་མྱོས་སུ་ཆུག༔ ཧཱུྃ་བྷྱོ༔ བདུད་ཀྱི་བུ་མོ་ལྷ་མོ་རེ་མ་ཏི༔ རི་རབ་སྟེང་ནས་གླིང་བཞིའི་དགྲ་ལ་རྔམ༔ རྒྱ་མཚོའི་གཏིང་ནས་རྒྱལ་བསྟན་སྐྱོང་ལ་བརྩོན༔ དེ་རིང་དམིགས་པའི་དགྲ་འདྲེ་ཁྲམ་ལ་ཐོབ༔ སྲིད་གསུམ་བདག་མོ་དཔལ་ལྡན་རེ་མ་ཛི༔ གླིང་བཞིར་ཉུལ་ཞིང་བསྟན་པའི་བྱ་ར་བྱེད༔ ཕུར་པའི་རྣལ་འབྱོར་ཡོངས་ཀྱི་ཚེ་བསོད་སྤེལ༔ བར་ཆད་རྩོམ་པའི་དམ་སྲི་རྡུལ་དུ་རློགས༔ སྲིད་པའི་བདག་མོ་སྨན་མོ་རེ་མ་ཛུ༔ དུས་བཞིར་བར་སྣང་ལ་རྒྱུ་སད་སེར་གཏོང་༔ ཕུར་པའི་རྣལ་འབྱོར་སྐྱོང་བའི་མཛའ་ན་མོ༔ དེ་རིང་རྣལ་འབྱོར་དགྲ་ལ་ཕྲིན་ལས་མཛོད༔ སྟོང་ཁམས་བདག་མོ་བདུད་མོ་རེ་མ་ཛ༔ བདུད་ཀྱི་ཁྲམ་ལ་བདུད་རིགས་སྡིག་སྤྱོད་འདེབས༔ རྣལ་འབྱོར་ཡོངས་ཀྱི་སྒྲུབ་པའི་ལས་མཁན་མ༔ སྣ་ཚོགས་སྤྲུལ་རྒྱུར་སྟོན་པའི་མིང་བརྒྱ་མ༔ བདག་ལ་སྡང་དགྲ་མ་གཏོང་ཤྭ་ར་རེ༔ ཧཱུྃ་བྷྱོ༔ ཕུར་པའི་དཀྱིལ་འཁོར་མུ་རན་ལ་གནས་པའི༔ སྲིན་མོ་ཉི་ཤུ་རྩ་བདུན་ཐུགས་དམ་བསྐུལ༔ ཤ་ཁྲག་དམར་གྱི་གཏོར་མ་འདི་བཞེས་ལ༔ བསྟན་པའི་དགྲ་ལ་མ་གཡེལ་ཕྲིན་ལས་མཛོད༔ ཤར་གྱི་དབང་ཕྱུག་དཀར་སྨུག་ཕྱེད་གཟུགས་བདུན༔ ལྷོ་ཡི་དབང་ཕྱུག་སེར་ནག་ཕྱེད་གཟུགས་བདུན༔ ནུབ་ཀྱི་དབང་ཕྱུག་དམར་ནག་ཕྱེད་གཟུགས་བདུན༔ བྱང་གི་དབང་ཕྱུག་ལྗང་ནག་ཕྱེད་གཟུགས་བདུན༔ སྣ་ཚོགས་གཟུགས་དང་ཕྱག་མཚན་སྤྲུལ་བསྒྱུར་ངོམས༔ ཕུར་པའི་དཀྱིལ་འཁོར་མཚན་ཙམ་འཛིན་པ་ཡང་༔ བསྲུང་ཞིང་སྐྱོབ་པར་ཞལ་གྱིས་བཞེས་པ་ལྟར༔ དེ་རིང་རྣལ་འབྱོར་དྲག་པོའི་ཕྲིན་ལས་ཀྱིས༔ བསྟན་པའི་དགྲ་བོ་སྒྲོལ་བའི་ཕྲིན་ལས་མཛོད༔ ཅེས་བསྐུལ་དམར་གཏོར་མདུན་བསྐྱེད་ཀྱི་གཏོར་ཆེན་ལ་འབུལ༔ རཀྟ་སྦྲེང་༔ གཞི་སྙིང་གི་སྔགས་ཤམ་དུ༔ གནོད་བྱེད་དགྲ་བགེགས་མཱ་ར་ཡ་རྦད་རྦད༔ འདི་ནི་ཤིན་ཏུ་གཉན་པའི་ཕྱིར༔ ཐོ་ཅོར་ཁྱབ་བརྡལ་བྱ་བ་མིན༔ བསྟན་འགྲོ་སྤྱི་དང་དགོས་དགྲ་ལ༔ རྦད་པའི་མཚོན་ཆའི་འཁོར་ལོ་འདྲ༔ སྔགས་ཀྱི་སྲུང་མས་གཏེར་འདི་སྲུངས༔ ཕུར་སྲུང་བཅུ་དྲུག་བཀའ་འདི་འཚོས༔ ཕྲིན་ལས་སྒྲུབ་པའི་གདམས་ཆེན་ནམ༔ ཡང་ཟབ་འཆད་ཉན་སྤེལ་བའི་ཚེ༔ བརྟགས་ཏེ་དགོངས་པའི་བརྡ་རིས་ཁྲོལ༔ མངའ་བདག་རྗེ་དང་མཚོ་རྒྱལ་དང་༔ བདག་ཉིད་པདྨའི་བཀའ་དྲིན་ལ༔ རྟག་ཏུ་སོམས་ལ་བསྙེན་སྒྲུབ་ཀྱི༔ ཆོས་འདི་དོན་དང་ལྡན་པར་ཤོག༔ སྡིག་སྤྱོད་མཚོན་ཆར་འདི་བྱིན་ན༔ རག་གདོང་ཁྲོས་མས་སྙིང་ཁྲག་རོལ༔ གུ་ཧྱ༔ ས་མ་ཡཱ༔ རྒྱ་རྒྱ་རྒྱ༔ ཞེས་པའང་སྐལ་ལྡན་ལུང་རིག་གླིང་པར་འབོད་པའི་སྤྲང་བན་བདག་གིས་དག་སྣང་ཟོལ་མེད་ཀྱི་ངང་དུ་བབས་པ་བཅོས་མེད་དུ་སུག་བྲིས་བགྱིས་པ་ཛ་ཡན་ཏུ༔ སརྦ་མངྒ་ལཾ།