བཟློག་བསྡུས་འཕྲལ་རྐྱེན་ལྟས་ངན་རྒྱུན་གཅོད་རྒྱ་སྤྲུལ་གསུམ་པས་མཛད་པ།
ཕུར་པ་དམ་སྲི་ཚར་གཅོད་ཀྱི་བཟློག་བསྡུས་འཕྲལ་རྐྱེན་ལྟས་ངན་རྒྱུན་གཅོད་བཞུགས། ཧཱུྃ་ཧཱུྃ་ཧཱུྃ། དབྱིངས་རིག་སྟོང་གསལ་ཕུར་པ་ཀཱི་ལ་ཡ། །སྙིང་རྗེས་ཁྲོས་པའི་གཏུམ་རྔམ་དབལ་ཟུར་ལས། །མཐུ་སྟོབས་ནུས་པའི་མེ་སྟག་ཚྭ་ཚྭ་འཕྲོ། །མ་རུངས་སྒྲོལ་བའི་ལས་བྱེད་ཕོ་ཉའི་ཚོགས། །གཉིས་མེད་ངང་ནས་དྲག་པོའི་སྐུར་བཞེངས་ལ། །མ་རིག་གཉིས་འཛིན་ལྟས་ངན་ཆོ་འཕྲུལ་རྣམས། །ཟློག་བསྒྱུར་དྲག་པོའི་ཕྲིན་ལས་དུས་ལ་བབས། །ཧཱུྃ༔ ཤར་ཕྱོགས་རྡོ་རྗེ་བཛྲ་ཀཱི་ལ་ཡས། །ཤར་ཕྱོགས་ཞེ་སྡང་ལྟས་ངན་དབྱིངས་སུ་ཟློག །ལྷོ་ཕྱོགས་རིན་ཆེན་བཛྲ་ཀཱི་ལ་ཡས། །ལྷོ་ཕྱོགས་ང་རྒྱལ་ལྟས་ངན་དབྱིངས་སུ་ཟློག །ནུབ་ཕྱོགས་པདྨ་བཛྲ་ཀཱི་ལ་ཡས། །ནུབ་ཕྱོགས་འདོད་ཆགས་ལྟས་ངན་དབྱིངས་སུ་ཟློག །བྱང་ཕྱོགས་ཀརྨ་བཛྲ་ཀཱི་ལ་ཡས། །བྱང་ཕྱོགས་ཕྲག་དོག་ལྟས་ངན་དབྱིངས་སུ་ཟློག །དབུས་ཕྱོགས་རྣམ་སྣང་བཛྲ་ཀཱི་ལ་ཡས། །དབུས་ཕྱོགས་གཏི་མུག་ལྟས་ངན་དབྱིངས་སུ་ཟློག །དཀྱིལ་འཁོར་ཕྱོགས་སྐྱོང་བཛྲ་ཀཱི་ལ་ཡས། །ལས་ཉོན་བག་ཆགས་ལྟ་ངན་བཟློག་ཏུ་གསོལ། །བཟློག་གོ་བསྒྱུར་རོ་ལྟས་ངན་ཟློག །སྔོན་ལས་འཕྲལ་རྐྱེན་ལྟས་ངན་དབྱིངས་སུ་ཟློག །ཅེས་པ་འདི་ནི་རྒྱ་སྤྲུལ་གསུམ་པའི་མིང་འཛིན་ལུང་རྟོགས་ཀྱིས་བྲིས་པའོ།།