རྒྱལ་དབྱངས་དཔའ་བོའི་གད་རྒྱང་།
༄༅།། རྒྱལ་དབྱངས་དཔའ་བོའི་གད་རྒྱང་བཞུགས། ཨེ་མ་ཧོ། སྲིད་གསུམ་འཁྲུལ་བའི་བདེ་ལ་ཡིད་དབྱུང་ནས། །མཆོག་གསུམ་སྐྱབས་སུ་བརྟེན་པའི་རྣལ་འབྱོར་བདག །ཚེ་རབས་གཏན་གྱི་དགྲ་བགེགས་གཡུལ་ངོ་ལས། །ད་ནི་རྒྱལ་ལོ་རྣལ་འབྱོར་གཡས་སུ་རྒྱལ། །ཀུན་འབྱུང་རྒྱུ་འབྲས་མ་ལུས་གཡོན་དུ་ཕམ། །སྨོན་འཇུག་བྱང་ཆུབ་སེམས་ལ་བློ་སྦྱངས་ནས། །གཞན་ཕན་ལམ་དུ་འཁྱེར་བའི་རྣལ་འབྱོར་བདག །ཉོན་མོངས་ཤེས་བྱའི་སྒྲིབ་ཚོགས་གཡུལ་ངོ་ལས། །ད་ནི་རྒྱལ་ལོ་རྣལ་འབྱོར་གཡས་སུ་རྒྱལ། །ཁམས་གསུམ་འཁོར་བའི་སྡུག་བསྔལ་གཡོན་དུ་ཕམ། །དབང་བཞིའི་ཡེ་ཤེས་བཞི་ཡིས་རྒྱུད་སྨིན་ནས། །བསྐྱེད་རྫོགས་ལམ་དུ་སློབ་པའི་རྣལ་འབྱོར་བདག །ཐ་མལ་སྣང་ཞེན་བདུད་བཞིའི་གཡུལ་ངོ་ལས། །ད་ནི་རྒྱལ་ལོ་རྣལ་འབྱོར་གཡས་སུ་རྒྱལ། །སྒོ་གསུམ་འཁྲུལ་བའི་བག་ཆགས་གཡོན་དུ་ཕམ། །ཡང་དག་བསླབ་པ་གསུམ་གྱིས་རྒྱུད་བསྡམས་ནས། །སྒོ་གསུམ་དགེ་ལ་བརྩོན་པའི་རྣལ་འབྱོར་བདག །མེད་བཞིན་སྣང་བ་འཁྲུལ་བའི་དགྲ་འདྲེ་ལས། །ད་ནི་རྒྱལ་ལོ་རྣལ་འབྱོར་གཡས་སུ་རྒྱལ། །སྡང་དགྲ་གདོན་བགེགས་ནད་རིགས་གཡོན་དུ་ཕམ། །བདག་ཅག་སྐྱབས་སུ་བརྟེན་པའི་བསྲུང་བྱ་རྣམས། །མཆོག་གསུམ་ལྷ་དང་སྲུང་མའི་མཐུ་བྱིན་གྱིས། །སྔོན་ལས་འཕྲལ་རྐྱེན་བར་ཆད་གཡུལ་ངོ་ལས། །འགོ་བའི་ལྷ་ལྔ་དང་བཅས་གཡས་སུ་རྒྱལ། །བར་ཆད་བདུད་དང་ལོག་འདྲེན་གཡོན་དུ་ཕམ། །ད་ནི་རྒྱལ་ལོ་རྟག་ཏུ་བདག་ཅག་རྒྱལ། རྒྱལ་ལོ་རྒྱལ་ལོ་ལྷ་རྒྱལ་ལོ།། ཞེས་པའང་དམ་པའི་བཀའ་བཞིན་རྒྱ་སྤྲུལ་མིང་གིས་བྲིས་པ་དགེ་ལེགས་འཕེལ།