མ་འོངས་ལུང་བསྟན་གསལ་བའི་སྒྲོན་མ།
༄༅། ཀཱིལཡསཱདྷྱནཡཱམསྠཙྪཻདཀབྷྱཿ ཨཱགཱམིབྱཀརཎཾཔྲསཾནདཱིཔཾབིཧརམ།
༄༅། ཀཱིལཡསཱདྷྱནཡཱམསྠཙྪཻདཀབྷྱཿ ཨཱགཱམིབྱཀརཎཾཔྲསཾནདཱིཔཾབིཧརམ།
ཕུར་སྒྲུབ་དམ་སྲི་ཚར་གཅོད་ལས༔ མ་འོངས་ལུང་བསྟན་གསལ་བའི་སྒྲོན་མེ་བཞུགས་སོ༔
རིག་པ་རྡོ་རྗེ་གཞོན་ནུ་ནི༔ སྐྱེ་འཆི་བགྲེས་རྒུད་མི་མངའ་ཡང༔ དུས་གསུམ་རྒྱལ་བ་ཀུན་གྱི་ཡབ༔ བདུད་སྡེ་དཔུང་འཇོམས་ལྷ་ལ་འདུད༔ ཕུར་སྒྲུབ་བདུད་དཔུང་ཟིལ་གནོན་ནམ༔ ཡང་ཟབ་དམ་སྲི་ཚར་གཅོད་ཞེས༔ སྒྲུབ་ཐབས་མཚོ་རྒྱལ་དགོངས་མཛོད་ཀྱི༔ རྩ་བའི་ཆོས་སྡེ་འདི་ཡིན་ནོ༔ དེ་ཡི་ཡིད་ཆེས་གཏན་ཚིགས་སུ༔ ལུང་བསྟན་གསལ་བའི་སྒྲོན་མེ་འདི༔ ཨོ་རྒྱན་རྗེ་ལ་བསམ་ཡས་ཀྱི༔ མཆིམས་ཕུའི་གནས་སུ་བླ་གཡུ་དང༔ གསེར་དངུལ་མཎྚལ་སྒོ་གསུམ་བཅས༔ ལྟོས་པ་མེད་པར་མཆོད་པར་ཕུལ༔ ལུང་བསྟན་གསལ་བའི་ཡི་གེ་ཞིག༔ ཞལ་ནས་སྙན་དུ་ལེགས་པར་བརྒྱུད༔ རིག་སྟོང་དབྱིངས་ཀྱི་སྒྲོམ་དུ་སྦོས༔ དུས་ལ་བབ་ཚེ་རང་ཉིད་ཀྱིས༔ ཐེ་ཚོམ་མེད་པར་སྤེལ་བར་བྱ༔ ས་མ་ཡཱ༔ དེ་ཡང་རྩོད་ལྡན་དུས་ངན་དེར༔ ཤར་ནས་རྒྱལ་ཁྲིམས་དར་མདུད་འཇིག༔ ལྷོ་ནས་བདུད་སྤྲུལ་རེས་མོས་འཚེ༔ ནུབ་ནས་ཆོས་ཁྲིམས་གཟུགས་བརྙན་ཙམ༔ བྱང་ནས་དཀོན་མཆོག་དབུ་འཕང་སྨོད༔ ཁྱད་པར་ང་སྤྲུལ་སྐྱེས་བུ་འགས༔ ཟབ་ཆོས་དངོས་དང་དག་སྣང་སྤེལ༔ འཆད་རྩོད་རྩོམ་ཀྱང་བདུད་བློན་འགས༔ ལོག་ལྟས་སྤེལ་བས་གྲུབ་ཐོབ་དཀོན༔ མངའ་བདག་སྤྲུལ་བའི་རྡོ་རྗེ་འཛིན༔ མཐོང་ཐོས་དྲན་རེག་དོན་ལྡན་ཡང༔ དམར་རྒྱན་བཙུན་པའི་གཟུགས་ཅན་དང༔ འདོད་ལྷས་བློ་བསྒྱུར་སྔགས་པ་འགས༔ ཁྲིམས་སྡོམ་གདམས་ཟབ་ཐོན་པ་དཀོན༔ ལྷ་སྲས་སྤྲུལ་པས་བསྟན་པ་གསོ༔ ཀླུ་གོང་མི་ཆེན་ཚུལ་གྱིས་འོང༔ མཚོ་རྒྱལ་སྤྲུལ་དངོས་དབུས་སུ་འོང༔ བར་ཆད་ཚེ་ཡི་འཕྲངས་སུ་ཤར༔ མཁར་དཔལ་སྤྲུལ་པས་གཏེར་འབྱིན་ཡང༔ བདུད་ཀྱི་དབང་བྱེད་འགྲོ་བས་དམོད༔ ཐུབ་པའི་རྒྱལ་མཚན་སྔགས་པར་སྤྲུལ༔ བཀའ་གཏེར་བཅུད་དྲིལ་ཆོས་མཛོད་སྤེལ༔ ཀརྨའི་བསྟན་ཞབས་བཤད་གྲྭས་འཛིན༔ ས་ཡི་མེ་ཏོག་དངོས་ཡལ་ནས༔ འདྲ་མིན་ཞིག་གིས་སེལ་ཞིག་འཛིན༔ འབྲས་ཀྱི་ཕུང་པོ་སད་ཀྱིས་ཡལ༔ སེར་འབྲུག་དམག་གི་འུར་སྒྲས་འགེངས༔ གདམས་ཀྱི་དམ་ཀ་མོ་ཡིས་འཁྱེར༔ རོང་ཆེན་དང་པོའི་སྔར་སྲོལ་ཉམས༔ གཉིས་པ་ཁྲིའུ་རྐང་པ་ཆག༔ གསུམ་པ་སྡིག་རྫུན་བདུད་ཀྱིས་སྤེལ༔ བཞི་པའི་ཐ་མ་རྒྱ་ཡིས་སྲུང༔ སྡེ་འོག་ཕུང་བློན་ཁྲ་ཡིས་འཁྲུགས༔ ཆབ་ཀྱི་ཉི་མ་ལྷོ་ནས་ཤར༔ མཚོ་ཆེན་བཞི་ལ་ལྟས་ངན་གཟུགས༔ བཙུན་པ་སྔགས་སྐྱ་བུད་མེད་བཞིར༔ སྔར་མེད་གཏམ་དང་ཆས་གོས་འབྱུང༔ ཁྲག་གིས་བྱུག་པའི་དབྱིངས་མདོག་འགྱུར༔ དེ་ནས་ཉི་ཤུའི་ཁ་རལ་གྱི༔ དུས་རྟགས་ཕྲ་མོ་ཙམ་ཞིག་བསྟན༔ སླར་ཡང་མཚོ་རྒྱལ་བདག་ཉིད་ཀྱིས༔ གུ་རུ་རྗེ་ལ་ཡང་ཞུས་པ༔ དུས་རྟགས་སྤྱི་ཙམ་བསྟན་པ་ལགས༔ དུས་གསུམ་མཁྱེན་པ་ཁྱེད་ཉིད་ཀྱིས༔ ང་སྤྲུལ་སྐྱེས་བུའི་མིང་བྱུང་ན༔ དེ་ཚེ་དེ་དག་གང་དུ་འབྱུངཿ འགྲོ་ལ་ཕན་པ་ཆེའམ་ཆུང༔ བདུད་སྤྲུལ་རགས་ཕྲ་ཅི་ཙམ་ཞིག༔ གནས་ནི་གང་དང་གང་ལ་འབྱུང༔ ཟབ་གཏེར་འདོན་པའི་གང་ཟག་ལ༔ ཆོས་བདག་བརྒྱུད་འཛིན་ལ་སོགས་པ༔ དུས་འདིར་གསལ་ཕྱིར་བདག་བློར་སྦ༔ དེ་ཕྱིར་ཞིབ་ཏུ་བཀའ་སྩལ་ཞུ༔ གུ་རུས་བདག་ཅག་རྗེ་འབངས་ལ༔ བརྩེ་བའི་ཐུགས་ཀྱིས་བཀའ་སྩལ་པ༔ ཉོན་ཅིག་ཤེས་རབ་བདེ་སྐྱིད་མ༔ དུས་ངན་ཉི་ཤུའི་ཁ་རལ་དེར༔ བདག་སྤྲུལ་ཉི་ཟེར་རྡུལ་བཞིན་འཚུབས༔ ཁྱོད་སྤྲུལ་ནམ་མཁའི་སྐར་ལྟར་བཀྲ༔ དེ་དག་རེ་རེའི་མདུན་དྲུང་དུ༔ རྒྱ་གར་རིག་འཛིན་སྤྲུལ་པ་དང༔ བོད་ཀྱི་རྗེ་འབངས་ཆོས་བློན་གྱི༔ སྐྱེ་རྒྱུད་མཆོག་དམན་མང་ཞིག་འོང༔ རགས་པ་ཉུང་ཞིག་འདིར་སྟོན་ཀྱཻ༔ ཐམས་ཅད་བརྗོད་པའི་ཡུལ་ལས་འདས༔ དེ་ཕྱིར་ཉོན་ལ་སྙིང་སྒྲོམ་དུ༔ མ་བརྗེད་དྲན་པས་རྒྱས་ཐོབ་ཅིག༔ དང་པོ་དབུས་ཀྱི་གཙང་ཕྱོགས་སུ༔ མཚོ་རྒྱལ་བླ་དཔོན་ཚུལ་དུ་འོང༔ བོད་དུ་བདེ་སྐྱིད་ཆོས་ལ་དགོད༔ ང་ཉིད་སྡོམ་བརྩོན་འདུལ་འཛིན་ཚུལ༔ རྙིང་བསྟན་སྤེལ་ཀྱང་བར་ཆད་མང༔ མངའ་བདག་ཟབ་གཏེར་བདག་པོར་སྤྲུལ༔ ཟབ་གནད་སྤེལ་བས་མང་ཞིག་གྲོལ༔ མཁས་པ་བཻ་རོའི་གོས་ཀྱིས་ཀླུབས༔ སྔགས་པའི་ཚུལ་ལ་སྤྱོད་པ་ནི༔ གང་འབྲེལ་རྫོགས་ཆེན་གདམས་པར་སྨིན༔ དེ་འོག་ཆབ་ཀྱི་རི་བོའི་ཞོལ༔ བཱི་མ་ཁམས་སྨད་མགྲོན་དུ་སླེབ༔ བདུན་ལྔ་དྲུག་ལས་དབྱིངས་སུ་སྡུད༔ བསུན་མ་བཟློག་ན་བསྟན་སྲོག་འཛིན༔ མཚོ་རྒྱལ་ཁམས་སུ་བདུན་གྲངས་སྤྲུལ༔ ཤིན་ཏུ་དམན་ཚུལ་སྔགས་བཙུན་དང༔ བླ་མ་མི་ཆེན་སྔགས་པར་སྤྲུལ༔ སྔ་མ་དག་སྣང་ལས་འཕྲོར་དབང༔ ཆོས་བདག་རྩ་བ་བཅུ་ཕྲག་དང༔ ཡན་ལག་ཉེར་ལྔ་ཕྲ་མོ་བརྒྱ༔ བཅུ་ཡིས་བསྟན་པ་གོས་དྲུབ་གསོ༔ ཉེར་ལྔ་འཆི་སྲིད་ཆོས་དང་བསྟུན༔ བརྒྱ་ཕྲག་སྐྱེ་བ་བཅུ་དྲུག་ནས༔ འཕགས་མས་རྗེས་འཛིན་ཐར་ལམ་སྙོག༔ བཻ་རོའི་ཕྲིན་ལས་གསུམ་དུ་སྟོན༔ ནམ་སྙིང་སྤྲུལ་པ་མེ་ལྟར་འབར༔ རྒྱལ་བློ་ལན་གཉིས་བླ་མར་སྟོན༔ ཨ་ཙར་བློན་པོ་ཆ་གསུམ་འགྱུར༔ རྩ་བའི་བདུད་བཞི་སྔགས་བཙུན་སྐྱ༔ བུད་མེད་ཡུལ་དེར་ཕྱོགས་བཞིར་འབྱུང༔ གཤེད་བཞིའི་སྤྲུལ་པ་ནུབ་ཤར་ལྷོ༔ གཞན་ཡང་བྱང་ཆུབ་ལྗོན་པའི་ཤིང༔ སྲེག་བྱེད་འཁོར་སློབ་བཙུན་པར་རྫུ༔ ཀླུ་གོང་ཐང་བློན་དམར་རྒྱན་བཟའ༔ དམ་སྲི་མེ་སྟག་དམར་པོ་ཡང༔ ཡུལ་འདྲེའི་སྔགས་པ་དམ་མེད་ཞིག༔ འདུལ་ཐབས་ཁེ་རྒྱལ་གཞན་ལ་བྱིན༔ ཟབ་ཆོས་འཕགས་ཐོན་བཟོད་གོ་གྱོན༔ གསར་རྙིང་ཕུར་སྒྲུབ་རང་ཚོད་ཟུང༔ ཆོས་ལ་དབང་བའི་གང་ཟག་ཀྱང༔ མོས་པ་མི་ལྡན་ཕུགས་སུ་སྦོས༔ ལྷ་དང་བདུད་སྤྲུལ་མི་རུས་གཅིག༔ རྒྱུད་ཚོད་མ་བརྟགས་ཚིག་མ་སྨྲ༔ ཚེ་འཕྲང་ལྔ་བཞི་བཅུ་ལ་ལྡང༔ རྗེ་འབངས་སྤྲུལ་པར་དབང་ལུང་ཞུས༔ ཁྱད་པར་ཚེ་སྒྲུབ་བསྙེན་སྒྲུབ་འབོད༔ ཚེ་ཐར་སྲོག་བསླུ་བཀའ་བརྒྱད་དང༔ ཕུར་བའི་སྐུ་བཞེངས་ལམ་འཕྲང་བསལ༔ དམ་གྲིབ་ཉམས་པའི་གྲོགས་ལ་གཟོབ༔ ད་ལྟ་དུས་རྟགས་ངན་པ་རྣམས༔ སེལ་བའི་རིམ་གྲོ་ཅུང་ཞིག་སྟོན༔ འགྲོ་བའི་བདེ་སྐྱིད་རྒྱལ་བསྟན་དང༔ དགེ་འདུན་སྡེ་ལ་ངེས་པར་རག༔ ཁྲིམས་ལྡན་བཙུན་པས་གསོ་སྦྱོང་དང༔ དམ་ལྡན་སྔགས་པས་སྒྲུབ་ཆེན་བརྩོན༔ ཚེས་བཅུ་ཉེར་ལྔའི་དུས་དག་ཏུ༔ རྒྱལ་པོས་རི་རྒྱ་རྔོན་རྒྱ་སྡོམ༔ ཉ་གྲོག་སྦྱིན་ཐོངས་ཉེའུ་ཐོན༔ བུད་མེད་མ་ཎིའི་རྒྱང་གླུ་ལོངས༔ སྐྱེ་བོས་སིདྡྷི་སྒྲོལ་མ་སོགས༔ རང་མོས་ཆོས་ལ་ངང་བསྲིང་ན༔ རེ་ཞིག་སྤྲིན་བར་ཉི་བཞིན་བདེ༔ ས་མ་ཡཱ༔ ཡང་ཟབ་ཕུར་བའི་ཟབ་ཆོས་འདིས༔ གང་ཟག་སྒོས་ལུང་འདི་ལྟར་རོ༔ ཨ་ཙར་སྤྲུལ་དང་དཔལ་དབྱངས་སྤྲུལ༔ རྒྱལ་བའི་བློ་གྲོས་རྣམ་པ་གསུམ༔ ཤར་དང་བྱང་ནུབ་ཕྱོགས་ནས་འོང༔ དར་རས་ཞབས་ཏོག་མཎྚལ་འབུལ༔ རྣལ་འབྱོར་ཉམས་གསལ་བརྡ་རིས་འབབ༔ དེ་ནས་བཻ་རོ་ཆོས་རྒྱལ་དང༔ བཱི་མའི་རྣམ་འཕྲུལ་གསུམ་དང་འཕྲོད༔ ངེས་པར་དབུགས་དབྱུང་ཐེ་ཚོམ་སེལ༔ དེ་ནས་རྒྱལ་བློན་བཙུན་མོ་བཞིས༔ སྤྲུལ་པའི་རྐྱེན་སེལ་ངེས་ཤེས་སྐྱེས༔ དེ་ནས་རིམ་བཞིན་ནུབ་ནས་སྤེལ༔ ཁྱད་པར་རྒྱལ་བློའི་རྣམ་རོལ་དེས༔ ལང་གྲོའི་མནོག་ཆོས་སྟོན་པར་འགྱུར༔ དེ་སྐབས་པདྨ་ང་ཉིད་ཀྱང༔ ལས་ཀྱི་སྒྲིབ་པས་མཐོང་མིན་ཀྱང༔ དྲུང་ན་བཞུགས་ཤིང་བྱིན་གྱིས་རློབ༔ སྐལ་ལྡན་མང་པོའི་བློ་སྣ་འགྱུར༔ འདི་ཡི་བརྡ་འགྲོལ་ཡིག་རིས་སྤེལ༔ གང་གིས་ཟབ་ཆོས་འདི་ཉིད་ཀྱང༔ གུས་པས་བསྒྲུབ་ན་ཚེ་ཆོས་དང༔ རིགས་ཀྱི་བར་ཆད་ངེས་པར་སེལ༔ ཐུན་མོང་དངོས་གྲུབ་ངེས་པར་འབྱུང༔ བརྩོན་པ་རབ་ཀྱིས་མཆོག་འགྲུབ་བོ༔ འབྲེལ་བ་སྣ་རེས་གནས་སྐབས་ཀྱི༔ ཕྲ་མོའི་རྐྱེན་སེལ་དངོས་གྲུབ་ཀྱང༔ དེ་དང་མཚུངས་པ་ཐོན་པར་ངེས༔ ས་མ་ཡཱ༔ རྒྱ་རྒྱ་རྒྱ༔ མ་ཅིག་བཀའ་དྲིན་ཅན་གྱིས་དབུགས་དབྱུང་བ་ལྟར་སྤྲང་བན་ལུང་རིག་མིང་གིས་སོ།།