དོན་དབང་ནོར་བུའི་ཅོད་པཎ།

ཕུར་བ་དམ་སྲི་ཚར་གཅོད་ལས༔ དོན་དབང་ནོར་བུའི་ཅོད་པཎ་བཞུགས་སོ༔ ཨི་ཐི༔

དཔལ་ཆེན་པོ་རྡོ་རྗེ་གཞོན་ནུ་ལ་ཕྱག་འཚལ་ལོ༔ ཕུར་བའི་དོན་དབང་འདི་ལ་དོན་གསུམ་གྱིས་བསྟན་ཏེ༔ སྦྱོར་བ་ཡོ་བྱད་བཤམས་ཤིང་སྟ་གོན་གྱིས་སློབ་མ་གཞུགས་པ་དང༔ དངོས་གཞི་དབང་རིམ་པ་བཞིན་བསྐུར་བ་དང༔ རྗེས་ལ་དགའ་སྟོན་བྱ་ཞིང་དམ་ཚིག་བསྒྲགས་ཤིང་སྤྱོད་ལམ་ལ་འཇུག་པའོ༔ དང་པོ་སྟ་གོན་གྱི་དཀྱིལ་འཁོར་རྫས་བཞི་སོགས་བཤམས༔ དཀྱིལ་འཁོར་སྤྲོས་པ་དང་བསྟུན་པའི་ཆེ་ཆུང་འཚམས་པར་རས་བྲིས་སམ་ཚོམ་བུ་ལྷ་གྲངས་མ་ནོར་བར་བཀོད་ལ༔ དཀྱིལ་འཁོར་གྱི་དབུས་སུ་རིན་པོ་ཆེའམ་རྫ་ཤིང་གི་བུམ་པ་བགེགས་བསྐྲད་དག་པར་བཀྲུས་པའི་ནང་དུ་ཕུར་བ་གྲུབ་པའི་རིག་འཛིན་རྣམས་ཀྱི་ཕྱག་ནས་བྱུང་བའི་དམ་རྫས་སེལ་མེད་དང༔ རྫས་སོ་ལྔ་བླ་མེད་ལྟར་བླུགས་ལ་མགུལ་ཆིངས་རྡོ་རྗེ་གཟུངས་ཐག་ཁ་རྒྱན་འབྲས་བུ་ཅན་ནམ༔ ཤིང་བདུད་རྩི་འབྱུང་བས་བརྒྱན་པའི་སྟེང་དུ་གཙོ་བོའི་སྒྲུབ་ཕུར་བྲབ་བདུག་བྱུག་གསུམ་ལྡན་པ་བསྙེན་སྒྲུབ་ཀྱི་ངར་དང་མ་བྲལ་བ་དེའི་མདུན་དུ་སྐུ་ཙཀ་རྣམས་དང༔ སྔགས་སུ་སྔགས་བྱང་གསུམ་གསེར་དངུལ་མཚལ་གྱིས་དྲིལ༔ རྒྱབ་ཏུ་དཔལ་གཏོར་ལྷ་གྲངས་རྒྱན་ལྡན༔ གཡོན་དུ་བདུད་རྩིའི་ཐོད་པ་གུ་རུ་ཡབ་ཡུམ་གྱི་བྱང་སེམས་ཀྱིས་བཀང་བ༔ ཤར་ལྷོར་ལས་ཕུར་སོགས་སྲས་བཞི་ཁྲོ་བཅུ་སྒོ་མའི་ཕུར་བ་བྲིས་པ་དང༔ ལྷོ་ནུབ་ཏུ་བྲུབ་ཁུང་ལིང་ཀ༔ སྒྲོལ་ཐོད་དུ་ཐུན་རྫས་རྣམས་གང་འབྱོར༔ ནུབ་བྱང་དུ་ཕྱག་མཚན་ཐམས་ཅད༔ བྱང་ཤར་རིག་མ་དངོས་སམ་བྲིས་པ༔ སྨན་རཀ་ཉེར་སྤྱོད་སྤོས་གུ་གུལ་སོགས་བདུག་པའི་ཚོགས་དང་མར་མེ་རྣམས་གང་འབྱོར་བཤམས་ནས༔ རྡོ་རྗེ་སློབ་དཔོན་སྔོན་ནས་ཕུར་བ་བཀའ་གཏེར་གྱི་དབང་ཐོབ་ཅིང་དམ་ཚིག་ལ་གནས་པ་སེལ་མ་ཞུགས་ཤིང་བསྙེན་སྒྲུབ་ཀྱི་རྟགས་མཐོང་བས༔ དེ་སྐབས་བསྙེན་ཁ་གསོ་ལ་ཕུར་སྲུང་ལ་གཏོར་མ་ཕུལ༔ ཚོགས་ཀྱི་ཐ་མའམ་རྒྱས་པར་སྒྲོལ་ལས་གྲུབ་ན་ཚུལ་བཞིན་དུ་བྱའོ༔ དེ་ལ་དང་པོ་ལྷ་ལ་གཏོར་མ་བསྔོས་ནས་ཡོ་བྱད་བཤམས་པ་སོགས་དང༔ བསྙེན་སྒྲུབ་རྒྱས་བསྡུས་སྐབས་དང་བསྟུན་པ་ནིཿ ཡོ་བྱད་ལྷ་སྟ་གོན་ནོ༔ དཀྱིལ་འཁོར་གྱི་སྒོ་དྲུང་དུ་རྒྱལ་ཐེབས་ཀྱིས་ཁྲུས་བྱས་ལ༔ ཧཱུྃ༔ དག་བྱེད་བདུད་རྩིའི་ཆུ་གཙང་གིས༔ ལས་དང་ཉོན་མོངས་བག་ཆགས་བཀྲུསཿ སྒོ་གསུམ་ཉམ་ཆགས་ཀུན་དག་ནསཿ གསང་སྔགས་སྣོད་དུ་རུང་བར་ཤོགཿ ཡི་གེ་བརྒྱ་པའི་ཤམ་དུ༔ ཨེ་ཧོ་ཤུདྡྷེ་ཤུདྡྷེ༔ ཡཾ་ཧོ་ཤུདྡྷེ་ཤུདྡྷེ༔ བཾ་ཧོ་ཤུདྡྷེ་ཤུདྡྷེ༔ ལཾ་ཧོ་ཤུདྡྷེ་ཤུདྡྷེ༔ རཾ་ ཧོ་ཤུདྡྷེ་ཤུདྡྷེ༔ ཨེ་ཡཾ་བཾ་ལཾ་རཾ་ ཧོ་ཤུདྡྷེ་ཤུདྡྷེ་ཨ་ཨཱ༔ དེ་ནས་གསོལ་བ་གདབ་པ་ནི༔ ཀྱེ་ཁྲོ་རྒྱལ་མི་བཟད་འཇིགས་པའི་ཆ་ལུགས་ཅན༔ མཚོན་ཆ་སྣ་ཚོགས་བསྣམས་ནས་བར་ཆད་སྲུང༔ བདག་ཅག་གསང་བའི་དཀྱིལ་འཁོར་འདིར་འཇུག་ན༔ བར་ཆད་སོལ་ལ་སྒོ་ཕྱེ་ནང་དུ་ཐོང༔ ཅེས་གསོལ་བ་བཏབ་ནས་བརྐྱང་ཕྱག་འཚལ༔ དེ་ནས་རྒྱལ་ཐེབས་ལན་བྱིན་འདི་སྐད་དོ༔ ཨེ་མ་དམ་ཚིག་སྡོམ་པའི་གནས་ཀུན་ལ༔ སྲོག་གི་ཕྱིར་ཡང་མི་གཏོང་ཁྱེད་བསྲུང་ན༔ དད་གུས་མོས་པས་གསོལ་བ་ཐོབ་མཛོད་དང༔ སྒོ་སྲུང་ཁྲོ་བོས་བགེགས་བསྐྲད་ནང་དུ་གཏོང༔ དེ་ནས་བགེགས་ཀྱི་གཏོར་མ་ནི༔ ནམ་མཁའ་མཛོད་ཀྱི་སྔགས་ཀྱིས་བསྔོ༔ གིང་པ་རྒྱུག་ཅིང་མེ་ཆུ་དང༔ རྡོ་ཐུན་བྲབ་ནས་དྲག་སྔགས་བརྗོད༔ དེ་ནས་སྒོ་ཕྱེ་ནང་དུ་འོང༔ རྡོ་རྗེ་བསྲུང་གུར་བརྟན་པར་སྲུང༔ ལས་ཀྱི་སྔགས་ལ་རཀྵ་བཏགས༔ སླར་ཡང་གསོལ་གདབ་འདི་སྐད་ཞུ༔ དཀྱིལ་འཁོར་ཀུན་གཙོ་རྡོ་རྗེ་སློབ་དཔོན་དགོངས༔ བདག་གིས་བསྟན་འགྲོའི་དགྲ་བགེགས་སྒྲོལ་བ་དང༔ ཚེ་འདིར་བྱང་ཆུབ་དོན་གཉེར་ཕྲིན་ལས་ལྷ༔ སྒྲུབ་འདོད་འཇུག་སྒོ་དབང་གིས་དབྱེ་བར་གསོལ༔ ཅེས་ལན་གསུམ་ཞུས༔ དེ་ནས་བླ་མས་ཐུན་མོང་དང་ཐུན་མོང་མ་ཡིན་པའི་ཆོས་བཤད་རྗེས༔ སློབ་མས་ཕྱག་རྟེན་མཎྚལ་ཕུལ་ལ༔ ཐོག་མར་སྟ་གོན་གྱི་རྫས་བར་ཆད་ཡོད་མེད་བརྟགས་པའི་ཕྱིར་སོ་ཤིང་ལ་འབྲུ་གསུམ་གྱིས་བྱིན་གྱིས་བརླབ་ནས་སོ་བར་ནས་འདོར་དུ་བཅུག་ལ་འདི་སྐད་དོ༔ ཀྱཻ་དཀྱིལ་འཁོར་ཆེན་པོར་བདག་འཇུག་སྤྲོ་ལགས་ན༔ བར་ཆད་ཡོད་མེད་རྟེན་འབྲེལ་བརྟགས་འདོད་པས༔ རྡོ་རྗེ་དཔལ་ཆེན་ཁྲོ་རྒྱལ་ཚོགས་རྣམས་ཀྱིས༔ དེང་འདིར་བདེན་པ་ཆེན་པོས་པྲ་ཕོབ་ཅིག༔ ཅེས་པས་སོ་ཤིང་དོར་བར་བྱ༔ དབུས་སུ་བབ་ན་མཆོག་གི་དངོས་གྲུབ་ཐོབ་ཅིང་མཚམས་བཞི་ལས་བཞི་དང་ཐུན་མོང་གི་དངོས་གྲུབ་ཕྲ་མོ་རེ་འགྲུབ་ཅིང་ཕྱིར་ལྷུང་ན་བར་ཆད་ཀྱི་ལྟས་ཡིན་པས་བསྐྱར་དགོས་ཏེ་རྩ་བ་རང་ལ་བསྟན་ན་བཤགས་པ་སྣ་ཚོགས་བྱའོ༔ བསྲུང་སྐུད་ཁ་ཏོག་ལྔའམ་གསུམ་པ་འདོམ་གང་བ་སུམ་སྦྲེལ་ལ་རྩ་སྔགས་ལ་རཀྵ་བཏགས་པས་མདུད་པ་ཉེར་གཅིག་གམ་བདུན་བྱའོ༔ ཕོ་ཡི་དཔུང་པ་གཡོན་མོ་ཡི་དཔུང་པ་གཡས་སུ་བཏགས༔ ཧཱུྃ༔ བསྲུང་སྐུད་རྡོ་རྗེའི་མདུད་པས་གཏམས༔ རྨི་ལམ་བར་ཆད་བསྲུང་བ་དང༔ རྩ་རླུང་རང་སོར་གནས་པའི་ཕྱིར༔ སློབ་བུའི་དཔུང་བར་གདག་པར་བྱ༔ ཨོཾ་ཨཱ༔ཧཱུྃ་བཛྲ་རཀྵ་རཀྵ་བྷྲུཾ༔ ཅེས་གསུངས་སློབ་བུའི་དཔུང་པར་བཏགས་སོ༔ ཀུ་ཤ་འབྲུ་གསུམ་བདུན་བརྗོད་པས་བྱིན་གྱིས་རླབས་ནས༔ རིང་ཐུང་བསྣོལ་ཏེ་སློབ་མའི་ལག་ཏུ་གཏད༔ ཧཱུྃ༔ སྔོན་ཚེ་རྫོགས་པའི་སངས་རྒྱས་ཀྱང༔ བཀྲ་ཤིས་རྩྭ་ལ་སྟན་བྱས་ནས༔ བདུད་རྒྱལ་བདུད་རྩི་བརྙེས་པ་ལྟར༔ སྔས་སྟན་གྱིས་ཉོལ་རྨི་ལམ་སྨྲོས༔ དྷི༔ ཞེས་སློབ་མས་ཀུ་ཤ་བླངས༔ ཉི་ཤར་ཁྲུས་བྱེད་གྱེན་འགྲོ་བཟང༔ ཐུར་འགྲོ་མུན་འཐིབ་པ་སོགས་ངན༔ ངན་ན་བསྐང་བཤགས་ཚེ་ཆོག་བྱ༔ དེ་ནས་ཁྱོར་ཆུ་བླུད་པ་ནི༔ ཧོ༔ སྐལ་ལྡན་དཀྱིལ་འཁོར་འདིར་འཇུག་ན༔ དམ་བསྲུང་བདུད་རྩིའི་ཆུ་འདི་འཐུང༔ སྒོ་གསུམ་བག་ཆགས་ཀུན་བཀྲུས་ཤིང༔ མི་དགེ་རྒྱབ་བོར་སྒྲིབ་དག་ཤོག༔ སློབ་མས་གསུམ་བཏུང་རྒྱབ་ཏུ་འདོར༔ དེ་ནས་བདེན་པའི་ཆོས་བཤད་པ་ནི༔ ཀྱེ་ཧོ་སྐལ་ལྡན་ད་རེས་དལ་འབྱོར་ལུས༔ ཐོབ་འདི་བརྒྱ་ལམ་རེ་འགའ་རྨི་ལམ་ཙམ༔ འགྲོ་དྲུག་ལུས་མང་བླངས་བས་འོ་རེ་བརྒྱལ༔ དཀོན་མཆོག་གསུམ་གྱི་སྒྲ་ཐོས་སྲིད་མཐའ་ཙམ༔ ཁྱད་པར་གསང་སྔགས་རྡུལ་ཁྲོད་ནོར་བུ་ལྟར༔ ཐོབ་པར་དཀའ་བ་ཐོབ་ཚེ་བརྩོན་པས་སྒྲུབ༔ སྲིད་པའི་བདེ་འབྱོར་རྨི་ལམ་དགའ་སྟོན་ལྟར༔ ཡུན་དུ་མི་གནས་ཚེ་འདིའི་བློ་སྣ་བསྟུང༔ ཅེས་གདམས་ཤིང་སློབ་བུས་ཀྱང་ངེས་ཤེས་རྒྱུད་ལ་འབྱོང་བར་བྱའོ༔ སྟ་གོན་ལྷ་ལ་མཆོད་བསྟོད་འབུལ༔ རང་སྣང་མཁའ་ལ་སྔགས་འདིས་བཏེགས༔ བཻ་ཀྲ་མ་མ་ཏི་ཨེ་ཡ་ན༔ དེ་ནས་སློབ་མ་རང་གནས་སོང༔ རྨི་ལམ་བརྟགས་སོགས་གཞན་དང་མཚུངས༔ ཐོ་རངས་ལང་ནས་རྨི་ལམ་རྣམས༔ དྲན་པར་བཟུང་ནས་གུས་ཤིང་བརྟགས༔ ས་མ་ཡཱ༔ སློབ་མ་ལྔ་བདུན་ལས་མི་མང་བ་ཡོལ་བའི་ཕྱིར་གདོང་གཡོག་གསོལ༔ བླ་མས་མེ་ཏོག་ཆུན་པོ་ཚིག་འདིས་བྱིན༔ ཀྱེ་ཧོ་བྱང་ཆུབ་ཐེག་མཆོག་རིགས་སད་རྣམས༔ ཁྱེད་རྣམས་རྡོ་རྗེ་ཕུར་བའི་དཀྱིལ་འཁོར་དུ༔ འཇུག་ཚེ་ཡི་དམ་ལྷ་ནི་གང་ཡིན་པ༔ བརྟག་ཕྱིར་རིག་པའི་མེ་ཏོག་འདི་ལོངས་ཤིག༔ འབྲུ་ལྔའི་སྔགས་ཀྱིས་སྦྱིན་པར་བྱ༔ དེ་ནས་སློབ་མས་བླ་མར་གསོལ་འདེབས་ནི༔ ཨེ་མ་ཧོ༔ སྐྱེ་མེད་ཀློང་ནས་གཟུགས་ཀྱི་སྐུར་སྣང་བ༔ རིགས་ཀྱི་བདག་པོ་དཔལ་ལྡན་བླ་མ་དགོངས༔ ལས་ཉོན་བག་ཆགས་ཀྱིས་ནོན་བདག་ཅག་ལ༔ རྡོ་རྗེ་ཕུར་བའི་དབང་མཆོག་བདག་ལ་སྩོལ༔ དེ་ནས་བླ་མས་ལན་འདི་བྱིན༔ ཀྱཻ་ཧོ་རིགས་ལྡན་སློབ་བུ་ཁྱོད་ཉོན་ཅིག༔ ཐེ་ཚོམ་མེད་ན་སྔགས་ཀྱི་དངོས་གྲུབ་མྱུར༔ དམ་ཚིག་བསྲུང་ན་འདི་ཕྱི་ཀུན་ཏུ་བདེ༔ ཐེ་ཚོམ་སྤོང་ལ་དམ་ཚིག་བསྲུང་ནུས་སམ༔ ཅེས་དྲིས་ལན་དུ་སློབ་མས་འདི་བཞིན་གསོལ༔ རྡོ་རྗེ་བླ་མས་ཇི་ལྟར་བསྒོ་བ་བཞིན༔ ཐེ་ཚོམ་སྤང་ནས་དམ་ཚིག་ངེས་པར་སྲུང༔ གསང་སྔགས་ཀུན་གྱི་ཕྲིན་ལས་ཕུར་པ་ཡི༔ ཕྱི་ནང་དབང་རྣམས་དེ་རིང་བདག་ལ་སྩོལ༔ དེ་ནས་བླ་མས་འདི་སྐད་གསུང༔ དེ་ལྟར་ཡིན་ན་སྲོག་དང་བསྡོས་ནས་སྲུང༔ སྡོམ་པ་ཀུན་གྱི་གཞི་རྟེན་སྐྱབས་འགྲོ་དང༔ ཐེག་ཆེན་རྩ་བ་སྨོན་འཇུག་བྱང་ཆུབ་སེམས༔ གསང་སྔགས་དམ་སྡོམ་མ་ལུས་བཟུང་བར་བགྱི༔ ཅེས་སྐྱབས་སེམས་རྗེས་ཟློས་དང་སྡོམ་པ་བཟུང་བ་འདི་བཞིན་ཞུ༔ སྔགས་ཀྱི་སྡོམ་པ་ཀུན་གྱི་རྩ་བ་ཡན་ལག་གཉིས༔ དེ་ཡང་བླ་མེད་མི་སྤངས་བླ་མ་བཀུར༔ སྔགས་དང་ཕྱག་རྒྱ་མི་གཅོད་སྤུན་ལ་བརྩེ༔ ཁྱད་པར་རྟོག་པས་བདག་འཛིན་རུ་ཏྲ་བསྒྲལ༔ ཚད་མེད་སྙིང་རྗེས་ལོག་རྟོག་དགྲ་བགེགས་སྒྲོལ༔ རྡོ་རྗེ་ཕུར་བ་སྙིང་གི་དྭངས་མར་འཛིན༔ སྤྱི་དང་ཁྱད་པར་ལྷག་པའི་དམ་ཚིག་བསྲུང༔ ཅེས་ལན་གསུམ་གྱིས་སྡོམ་པ་བཟུངཿ དེ་ནས་སློབ་དཔོན་གྱིས་སློབ་མ་ལ་དམ་ཚིག་བསྲུང་བའི་ཕན་ཡོན་བསྟན་པའི་ཕྱིར་རྡོ་རྗེ་སྤྱི་བོར་བཞག་སྟེ༔ ཨེ་མ་ལས་དང་སྐལ་ལྡན་ཁྱེད་ཉིད་ལ༔ དབང་བསྐུར་ཐོབ་འདི་སྔོན་གྱི་བསོད་ནམས་བསགས༔ དམ་ཚིག་མ་ཉམས་ཚེ་འདིར་ངེས་པར་གྲོལ༔ འབྲིང་གི་ཐ་མ་བར་དོར་ལྷ་དང་མཇལ༔ དེ་ཕྱིར་ཕན་ཡོན་དྲན་པས་སྤྲོ་བཞིན་བསྲུང༔ ཉེས་དམིགས་ཀྱི་སྒོ་ནས་བཀའ་ནན་བྱ་བ་ནི༔ ལས་བུམ་གྱི་ཆུ་ནང་མཆོད་བསྲེས་ལ་བྱིན་ཏེ༔ འདི་ནི་རྡོ་རྗེ་དམྱལ་བའི་ཆུ་ཚན་ཏེ༔ དམ་ཚིག་བསྲུང་ན་ཡེ་ཤེས་སེམས་དཔར་འགྱུར༔ རྟག་ཏུ་བསྲུང་ཤིང་མཆོག་གི་དངོས་གྲུབ་སྩོལ༔ ཉམས་ན་ལྕགས་ཀྱི་སྡིག་པས་སྙིང་ཁྲག་འཇིབ༔ འདི་ཕྱིར་སྡུག་བསྔལ་ཁེ་ཉེན་ཆེ་ཡང་འཐུང༔ སློབ་མས་བཏུང་ཞིང་རྗེས་ཟློས་བྱ༔ བཛྲ་ས་མ་ཡཱ་ན་ར་ཀནཿ དམ་ཚིག་དེ་ཉིད་བརྟན་པའི་ཕྱིར༔ འབྲུ་གསུམ་སྔགས་དང་དྲི་བཟང་ཆུས༔ སློབ་མའི་གནས་གསུམ་ཐིག་ལེ་བྱ༔ དམིགས་པའི་རིམ་པ་འདི་ཉིད་འབོགས༔ ཁྱེད་རང་རྡོ་རྗེ་གཞོན་ནུར་གསལ་བ་ཡི༔ གནས་གསུམ་བདེ་གཤེགས་ཀུན་གྱི་གསང་བ་གསུམ༔ ཡི་གེ་འབྲུ་གསུམ་དཀར་དམར་མཐིང་གསུམ་གསལ༔ བར་ཆད་བགེགས་ཀྱིས་དམ་ལ་གླགས་མི་རྙེད༔ ཨོཾ་ཨཱ༔ཧཱུྃ༔ ལན་གསུམ་དྲི་ཡི་ཐིག་ལེ་གདབ༔ དེ་ནས་རིགས་བརྟགས་མེ་ཏོག་ནི༔ ལྟོས་མེད་དོར་ལ་འདི་བཞིན་བརྗོད༔ ཧཱུྃ༔ བདག་ཉིད་རིག་པའི་མེ་ཏོག་ལྷ་ལ་འབུལ༔ ཚེ་རབས་སྔོན་ནས་ལས་ཀྱིས་འབྲེལ་བའི་ལྷ༔ གང་ཡིན་དེ་ལ་མྱུར་དུ་ཕོག་པ་དང༔ མཆོག་ཐུན་དངོས་གྲུབ་གང་ཡིན་དེ་འགྲུབ་ཤོག༔ པུཥྤེ་པྲ་ཏིཥྩ་ཧོ༔ ཅེས་མེ་ཏོག་དོར་བས་དབུས་སུ་མཆོག་གི་དངོས་གྲུབ་ཐོབ༔ ཕྱོགས་བཞིར་ནད་གདོན་ཞི་བ་ཚེ་བསོད་རྒྱས༔ གང་མོས་དབང་དུ་འདུ་བ་དྲག་པོའི་ལས་ཀྱིས་དགྲ་འདྲེ་སྒྲོལ་བ༔ མཚམས་བཞིར་གནས་སྐབས་ཀྱི་སྙན་གྲགས་ཕྲན་བུ་ནོར་མཐུ་ཆེ་བ་སོགས་དངོས་གྲུབ་ཕྲ་མོ་སོགས་དང༔ བུམ་པ་བཟང་པོ་སོགས་གྲུབ་པ་བརྒྱད་ཐོབ་པའོ༔ གལ་ཏེ་ཕྱིར་ལྷུང་ན་བསྐྱར་ཏེ་ཚེ་ཆོག་དམ་སྐོང་སོགས་རིམ་གྲོ་ཆེན་པོ་བྱའོ༔ དེ་ནས་གསང་མིང་བཏགས་པ་ནི༔ དབུས་སུ་ཆེ་མཆོག་དཔལ་ཆེན་རྩལ༔ ཤར་དུ་རྡོ་རྗེ་ཟིལ་གནོན་རྩལ༔ ལྷོ་རུ་རིན་ཆེན་བཞད་པ་རྩལ༔ ནུབ་ཏུ་པདྨ་དབང་ཆེན་རྩལ༔ བྱང་དུ་དཔའ་བོ་ལས་རབ་རྩལ༔ མཚམས་སུ་ཕྲིན་ལས་ཡོངས་གྲུབ་རྩལ༔ མོ་ལ་ཆེ་མཆོག་དབང་མོ་རྩལ༔ རྡོ་རྗེ་སོགས་བསྒྱུར་ནས་ལྷག་ལྷས་མེ་ཏོག་སྤྱི་བོར་བཅིང་བར་མོས་ལ༔ ཧཱུྃ༔ རིག་པའི་རྒྱལ་པོས་དབང་རྟགས་སྤྱི་བོར་བསྩལ༔ རང་མིང་དངོས་གྲུབ་གང་འཐོབ་དྲན་པས་བཟུང༔ མ་བརྗེད་སྙིང་ནས་ལྷག་པའི་ལྷ་དེ་སྒྲུབ༔ མི་བསླུ་ངེས་པར་ཡིད་ལ་འཇོག་པར་གྱིས༔ དེ་ནས་མིག་དབྱེ་གསོལ་འདེབས་ནི༔ ཀྱཻ་ཧོ༔ དཀྱིལ་འཁོར་གཙོ་བོ་ཚེ་རུ་ཀ༔ སྔོན་ཆད་མ་རིག་ལིང་ཏོག་གིས༔ ཡེ་ཤེས་མིག་ནི་གསལ་སྣང་འགྲིབ༔ ད་ནི་ལོག་རྟོག་བག་ཆགས་སོལ༔ བླ་མས་སློབ་བུའི་གདོང་གཡོག་དང༔ ལས་ཀྱི་རྡོ་རྗེས་ཡོལ་བ་བསལ༔ ཧཱུྃ༔ སྔོན་ནས་རང་ཉིད་བདེ་གཤེགས་སངས་རྒྱས་ཀྱང༔ རང་ངོ་མ་མཐོང་མ་རིག་ལིང་ཏོག་སྒྲིབ༔ དེ་རིང་རང་བྱུང་རྡོ་རྗེ་ཧེ་རུ་ཀ༔ མཇལ་ཕྱིར་ཡེ་ཤེས་གསེར་གྱི་ཐུར་མས་དབྱེ༔ ཛྙཱ་ན་ཙཀྵུ་པྲ་བེ་ཤ་ཡ་ཕཊ༔ དེ་ནས་དཀྱིལ་འཁོར་ལྷ་ངོ་བསྟན་པ་ནི༔ ཀྱཻ༔ རིགས་ལྡན་སྐྱེས་བུ་ལེགས་པར་ཉོན༔ དཀྱིལ་འཁོར་གྲུ་བཞིར་བྱུང་བ་འཇུག་སྒོ་བཞི༔ སྒོ་བཞིར་བྱུང་བ་བྱམས་སོགས་ཚད་མེད་བཞི༔ ཁ་ཏོག་ལྔར་བྱུང་ཡེ་ཤེས་རྣམ་པ་ལྔ༔ མགོ་གསུམ་བརྩེགས་པ་དུག་གསུམ་ལམ་དུ་ཁྱེར༔ ལྷ་བརྒྱད་ཀ་བ་འཕགས་ལམ་ཡན་ལག་བརྒྱད༔ ཀླུ་བརྒྱད་ཀ་གདན་ཚོགས་བརྒྱད་ཟིལ་གྱིས་གནོན༔ གཟའ་བརྒྱད་གདུང་མ་ཡུལ་བརྒྱད་གནས་སུ་སྒྲོལ༔ ཐོད་པའི་ཁ་བད་ཆོས་རྣམས་མཉམ་པར་སྟོན༔ ཞིང་གི་ཐོག་ཕུབ་གཞི་གཅིག་འབྲས་བུ་སྟོན༔ རང་བྱུང་ཡེ་ཤེས་ཏོག་དང་རྒྱལ་མཚན་བསྒྲེངས༔ རྩིབས་དང་མུ་ཁྱུད་ཉོན་མོངས་རྟོག་པ་འཇོམས༔ ཀུན་གཞི་གསལ་སྟོང་དཔལ་ཆེན་ཡབ་དང་ཡུམ༔ དུག་ལྔ་མ་སྤངས་རིགས་བཞི་ཀཱི་ལ་ཡ༔ མི་དགེ་བཅུ་སྤངས་ཁྲོ་རྒྱལ་ཆེན་པོ་བཅུ༔ ཕ་རོལ་ཕྱིན་བཅུ་ཤེས་རབ་ཁྲོ་མོ་ཡུམ༔ བསྡུ་དངོས་སྒོ་སྲུང་ཁྲོ་བོའི་རྣམ་པར་སྟོན༔ ཕྱི་ལྟར་གཟུགས་བརྙན་དཀྱིལ་འཁོར་དེར་སྣང་ལྟར༔ ནང་དུ་ཕུང་ཁམས་སྐྱེ་མཆེད་ཀུན་གཞིར་བཅས༔ གནས་སུ་དག་པ་རྡོ་རྗེ་གཞོན་ནུའི་ལྷ༔ གསང་བ་བརྗོད་བྲལ་རང་བཞིན་རྫོགས་པ་ཆེ༔ སྲིད་ཞི་ཆོས་སྐུའི་ཀློང་དུ་ལ་བཟླའོ༔ ཅེས་པས་ངོ་སྤྲོད་དངོས་གཞིའི་དབང་ཐོབ་ཕྱིར༔ ཡེ་ཤེས་དབབ་པའི་དམིགས་པ་ནི༔ ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭཱ་བྷ་ཝ་ཨཏྨ་ཀོ྅་ཧཾ༔ ཆོས་ཀུན་སྟོང་པའི་ངང་ལས་སློབ་མ་ཉིད༔ པད་ཉི་བདུད་བཞི་བསྣོལ་སྟེང་ཧཱུྃ་མཐིང་ལས༔ རྡོ་རྗེ་གཞོན་ནུ་མཐིང་དཀར་དམར་བའི་ཞལ༔ ཕྱག་དྲུག་རྩེ་དགུ་རྩེ་ལྔ་ཁ་ཊཱཾ་མེ༔ ཕུར་པ་འདྲིལ་ཞིང་འཁོར་ལོ་རྒྱས་འདེབས་མ༔ ལྗང་གུ་ཨུཏྤལ་དྲིལ་བུ་ཐོད་ཁྲག་འཁྱུད༔ ཡབ་ཡུམ་ཞལ་སྦྱོར་ཁྲོ་རྒྱལ་མེ་ཀློང་བཞུགས༔ གནས་གསུམ་འབྲུ་གསུམ་ཐུགས་སྲོག་འོད་ཟེར་གྱིས༔ སྤྱན་དྲངས་རང་དང་གཉིས་སུ་མེད་པར་གྱུར༔ སྤོས་དུད་རོལ་མོའི་སྒྲ་དང་བཅས༔ གདུང་བའི་དབྱངས་ཀྱིས་འདི་སྐད་དོ༔ ཧཱུྃ་ཧཱུྃ༔ འོག་མིན་ཆོས་དབྱིངས་དུར་ཁྲོད་ཆེན་པོ་ནས༔ རབ་འབྱམས་རྒྱལ་ཀུན་ཕྲིན་ལས་གཅིག་བསྡུས་པ༔ དཔལ་ཆེན་རྡོ་རྗེ་གཞོན་ནུ་ཡབ་དང་ཡུམ༔ སྲས་དང་ཁྲོ་བཅུ་སྒོ་མ་ཕུར་སྲུང་ཚོགས༔ བརྩེ་ཆེན་ཐུགས་རྗེས་འདིར་གཤེགས་སྐལ་ལྡན་ལ༔ ལུས་ལ་འགྱུར་མེད་སྐུ་ཡི་བྱིན་ཆེན་ཕོབ༔ ངག་ལ་ཚངས་དབྱངས་གསུང་གི་བྱིན་ཆེན་ཕོབ༔ ཡིད་ལ་འཁྲུལ་མེད་ཐུགས་ཀྱི་བྱིན་ཆེན་ཕོབ༔ མཆོག་གི་དངོས་གྲུབ་ལུས་ངག་ཡིད་ལ་སྩོལ༔ རྩ་སྔགས་མཐར། ཛྙཱ་ན་ཨ་བེ་ཤ་ཡ་ཕཻཾ་ཕཻཾ༔ ཅེས་བྱིན་ཕབ་ལུས་ངག་ཡིད་ལ་ཕོབ༔ ལུས་ལ་བྱིན་ཕེབས་གར་འཁྲབ་གཟི་མདངས་འབར༔ ངག་གི་བརྡ་སྐད་ཆོས་གླུ་སེམས་བདེ་གསལ༔ མི་རྟོག་ཡེ་ཤེས་མངོན་གྱུར་ཨེ་མ་ཧོ༔ རྒྱ་གྲམ་སྤྱི་བོར་བཞག་ཏེ་བརྟན་པར་བྱ༔ དེ་ནས་བུམ་དབང་ཞུ་བའི་ཆེད༔ མཎྚལ་འབུལ་ཞིང་གསོལ་བ་ནི༔ དཀྱིལ་འཁོར་གཙོ་བོ་བཅོམ་ལྡན་རྡོ་རྗེ་འཛིན༔ དཔལ་ཆེན་ཁྲོ་རྒྱལ་རྡོ་རྗེ་གཞོན་ནུ་ཆེ༔ བུམ་པའི་དབང་གིས་སྨིན་ཅིང་གྲོལ་བ་དང༔ བྱིན་རླབས་སྐུ་ཡི་དབང་བསྐུར་སྩལ་དུ་གསོལ༔ ཅེས་ལན་གསུམ། དེ་ནས་རྣམ་རྒྱལ་བུམ་པ་སྤྱི་བོར་བཞག་ཏེ༔ ཧཱུྃ༔ བུམ་པ་རང་བྱུང་ཆོས་དབྱིངས་གཞལ་ཡས་སུ༔ འགགས་མེད་དཔལ་ཆེན་རྡོ་རྗེ་གཞོན་ནུའི་སྐུ༔ སྣང་སྟོང་དབྱེར་མེད་བསྐྱེད་རིམ་སྐུ་ཡི་དབང༔ སྐལ་ལྡན་ཁྱོད་ཀྱི་ལུས་ལ་ཐོབ་པར་ཤོག༔ རྩ་སྔགས་མཐར། ཀཱ་ཡ་ཨ་བྷི་ཥིཉྩ་ཨོཾ༔ བུམ་ཆུ་སྤྱི་བོར་བླུགས་ཅིང་ལྕེ་ལ་བཞག༔ ཧཱུྃ༔ ཐོད་སྐམ་རིགས་ལྔ་རྒྱན་དང་ལྡན༔ དོན་ཡོད་གྲུབ་པ་རིགས་ཀྱི་ལྷ༔ ཁྱོད་ཀྱི་སྤྱི་བོར་བཞག་པ་ཡིས༔ བྱ་གྲུབ་ཕྲིན་ལས་མཐར་ཕྱིན་ཤོག༔ ཨོཾ་ཧཱུྃ་ཏྲཱཾ་ཧྲཱིཿཨཱ༔ ཅེས་སྤྱི་བོའི་གནས་ལྔར་བུམ་པ་བཞག་ཅིང་ཐོད་སྐམ་གྱི་ཅོད་པཎ་ཡང་བསྐོན༔ ཆུས་ལུས་ཐམས་ཅད་གང་བས་དུག་ལྔའི་སྒྲིབ་པ་དག་ནས་དོན་ཡོད་གྲུབ་པ་གཙོ་བོར་གྱུར་ནས་དབུ་བརྒྱན་པར་བསམ༔ དེ་ནས་གཙོ་བོའི་སྐུ་སྒྲུབ་ཕུར་དང་བཅས་སྤྱི་བོར་བཞག་ཏེ༔ ཧཱུྃ༔ རྡོ་རྗེ་ཆོས་དབྱིངས་མི་ཤིག་སྤྲོས་དང་བྲལ༔ ཕུར་བ་སྙིང་པོའི་རྩལ་སྣང་གཟུགས་ཀྱི་སྐུ༔ སྐལ་ལྡན་བུ་ལ་དེང་འདིར་དབང་བསྐུར་བས༔ ཁམས་གསུམ་དབྱིངས་སུ་སྒྲོལ་བའི་དབང་ཐོབ་ཤོག༔ རྩ་སྔགས་མཐར། ཀཱ་ཡ་ཨ་བྷི་ཥིཉྩ་ཨོཾ༔ ཅེས་བསྐུར་ནས་སྲས་ཕུར་རིགས་བཞིའི་དང་པོ་བཛྲ་ཀཱི་ལ་ཡའི་སྐུ་སྙིང་ཀར་བཞག་ཏེ༔ ཧཱུྃ༔ སེམས་ཅན་ཞེ་སྡང་གནས་དག་པ༔ སྲས་མཆོག་བཛྲ་ཀཱི་ལ་ཡ༔ མེ་ལོང་ཡེ་ཤེས་གསལ་སྟོང་སྐུ༔ སྐལ་ལྡན་ཁྱོད་ལ་དབང་བསྐུར་རོ༔ བཛྲ་ཀཱི་ལ་ཡ་ཨ་བྷི་ཥིཉྩ་ཧཱུྃ༔ རཏྣ་ཀཱི་ལ་ཡའི་སྐུ་ལྟེ་བར་བཞག་ཏེ༔ ཧཱུྃ༔ ང་རྒྱལ་ཟིལ་གནོན་ཁྲོ་བོའི་རྒྱལ༔ སྲས་མཆོག་རཏྣ་ཀཱི་ལ་ཡ༔ མཉམ་ཉིད་ཡེ་ཤེས་ངོ་བོ་ཉིད༔ སྐལ་ལྡན་ཁྱོད་ལ་དབང་བསྐུར་རོ༔ རཏྣ་ཀཱི་ལ་ཡ་ཨ་བྷི་ཥིཉྩ་ཏྲཱཾ༔ པདྨ་ཀཱི་ལ་ཡའི་སྐུ་མགྲིན་པར་བཞག་ཏེ༔ ཧཱུྃ༔ འདོད་ཆགས་དུག་འཇོམས་སྨན་གྱི་རྒྱལ༔ སྲས་མཆོག་པདྨ་ཀཱི་ལ་ཡ༔ སོར་རྟོག་ཡེ་ཤེས་རང་བཞིན་ཅན༔ སྐལ་ལྡན་ཁྱོད་ལ་དབང་བསྐུར་རོ༔ པདྨ་ཀཱི་ལ་ཡ་ཨ་བྷི་ཥིཉྩ་ཧྲཱིཿ ཀརྨ་ཀཱི་ལ་ཡའི་སྐུ་གསང་བར་བཞག་ཏེ༔ ཧཱུྃ༔ ཕྲག་ཏོག་ཚར་གཅོད་ཧེ་རུ་ཀ༔ སྲས་མཆོག་ཀརྨ་ཀཱི་ལ་ཡ༔ བྱ་གྲུབ་ཡེ་ཤེས་བདུད་དགྲ་གཞོམ༔ སྐལ་ལྡན་ཁྱོད་ལ་དབང་བསྐུར་རོ༔ ཀརྨ་ཀཱི་ལ་ཡ་ཨ་བྷི་ཥིཉྩ་ཧཱུྃ༔ ཅེས་དང་། དེ་ནས་སྲས་ཕུར་བཞི་དངོས་སམ་བྲིས་པ་གཏད་དེ༔ ཧཱུྃ༔ སྲས་མཆོག་བཞི་ཡི་ཕུར་པ་ནི༔ ལྷ་ཡི་བུ་དང་ཉོན་མོངས་བདུད༔ ཕུང་པོའི་བདུད་དང་འཆི་བདག་བདུད༔ བདུད་བཞིའི་ཚོགས་ལ་གདབ་པར་བྱོས༔ ཧཱུྃ་ཧཱུྃ་ཧཱུྃ་ཧཱུྃ་མཱ་ར་ཡ་ཕཊ༔ ཁྲོ་བཅུའི་སྐུའམ་ཧཱུྃ་ཡིག་གནས་སུ་གཏད༔ ཧཱུྃ༔ དགེ་བཅུའི་འཛིན་གྲོལ་ཁྲོ་རྒྱལ་བཅུ༔ མི་དགེ་དབྱིངས་དག་ཁྲོ་མོ་བཅུ༔ ཉེ་ཉོན་ཉི་ཤུ་ཁྲ་ཐབས་བཅས༔ སྐལ་ལྡན་ཁྱོད་ལ་སྦྱིན་པར་བྱ༔ སྤྲོ་ན་ཁྲོ་བཅུའི་སྔགས་དང་བསྡུ་ན་ཧཱུྃ་བཅུའི་མཐར༔ ཨ་བྷི་ཥིཉྩ་ཧཱུྃ༔ དཔྲལ་བ་སོགས་གནས་བཅུར་བཞག༔ དེ་ནས་ཁྲོ་བཅུ་དངོས་སམ་གཟུགས་བྲིས་པའི་ཕུར་པ་ལག་ཏུ་གཏད་ལ༔ སྲོག་གཅོད་ལ་སོགས་མི་དགེ་བཅུ༔ མཚན་མར་སྤྱད་པས་འཁོར་བར་འཁྱམས༔ དེ་ཕྱིར་ཆོས་མཛད་ཡོངས་ཀྱི་དགྲ༔ སྒྲོལ་ཕུར་སྐལ་ལྡན་ཁྱོད་ཀྱིས་ལོངས༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་དུཥྜཾ་མཱ་ར་ཡ་རྦད༔ ཅེས་བསྐུར། དེ་ནས་སྒོ་བ་བཞིའི་གཟུགས་དང་ཕུར་བ་ལག་ཏུ་གཏད་དེ༔ ཧཱུྃ༔ བྱམས་དང་སྙིང་རྗེ་དགའ་བ་དང༔ བཏང་སྙོམས་ཚད་མེད་སྒོ་མའི་གཟུགས༔ མཐར་ལྟ་བདག་ལྟ་རྟག་ཆད་ལྟ༔ མུ་བཞིའི་མཐའ་ལ་སྒྲོལ་བའི་དབང༔ སྐལ་ལྡན་ཁྱོད་ཀྱིས་ཐོབ་པར་ཤོག༔ ཕྲིན་ལས་དྲག་པོ་ཐོག་འབེབ་པས༔ བསྟན་དགྲ་རྨིང་མེད་བརླག་གྱུར་ཅིག༔ ཛཿཧཱུྃ་བཾ་ཧོ༔ ཨ་བྷི་ཥིཉྩ་ཧཱུྃ༔ དེ་ནས་མངའ་གསོལ་ཕྱིར་དུ་སློབ་མ་རྡོ་རྗེ་གཞོན་ནུ་ཡབ་ཡུམ་དུ་བསྒོམ་པ་ལ༔ ཐོད་སྐམ་གྱི་དབུ་རྒྱན་གསོལ་བ་ནི༔ ཧཱུྃ༔ རིགས་ལྔ་རྒྱལ་བ་བཞུགས་པའི་གནས༔ ཐོད་སྐམ་ལྔ་ཡི་དབུ་རྒྱན་འདི༔ ཁྲོ་རྒྱལ་དབུ་ལ་མངའ་གསོལ་བས༔ ཀུན་གྱི་ཆེ་བཙན་མཆོག་ཐོབ་ཤོག༔ ཨོཾ་ཧཱུྃ་ཏྲཱྃ་ཧྲཱིཿཨཱ༔ པ་ཊ་ལཾ་ཨ་བྷི་ཥིཉྩ་མུཾ༔ དེ་ནས་སྐུ་སྟོད་ལ་གླང་ཀོ༔ སྐུ་སྨད་ལ་སྟག་ཤམ༔ སྐུ་སྐེད་ལ་ཞིང་ལྤགས་དཀྲིས་ཏེ༔ ཧཱུྃ༔ གཏི་མུག་གླང་ཆེན་ཀོ་བ་དང༔ འདོད་ཆགས་མ་སྤངས་ཞིང་གི་ལྤགས༔ ང་རྒྱལ་ཟིལ་གནོན་སྟག་ཤམ་གསུམ༔ ཁྲོ་རྒྱལ་ཁྱོད་ལ་དབང་བསྐུར་རོ༔ ཨོཾ་ཧ་ལ་དྲི་ཝསྟྲ་ཨ་བྷི་ཥིཉྩ་ཧཱུྃ༔ ཨོལ་ཀོ་ལ་ཞག་གི་ཟོ་རིས༔ མཁུར་ཚོས་ལ་རཀྟའི་ཐིག་ལེ༔ དཔྲལ་བར་ཐལ་ཆེན་གྱི་ཚོམ་བུ་བཀོད་དེ༔ ཧཱུྃ༔ བདག་ལྟ་རྟག་ཆད་མཐའ་ལྟུང་བས༔ ཁམས་གསུམ་བག་ཆགས་ཀུན་སྣང་བ༔ ཚར་གཅོད་བྱུག་པའི་རྫས་གསུམ་གྱིས༔ སྐལ་ལྡན་ཁྱོད་ལ་མངའ་གསོལ་ལོ༔ ཀ་ལ་པ་ཨ་བྷི་ཥིཉྩ་ཧཱུྃ༔ དེ་ནས་ཐོད་པ་ཚར་གསུམ་གྱི་ཕྲེང་བ་བསྐོན་ཏེ༔ ཧཱུྃ༔ འདུ་བྱེད་ལྔ་བཅུ་གནས་དག་ཕྱིར༔ དུག་གསུམ་དགྲ་བགེགས་མགོ་ཕྲེང་འདི༔ སྡང་སེམས་རང་གྲོལ་སྦྲུལ་ཆུན་བཅས༔ སྐལ་ལྡན་ཁྱོད་ལ་མངའ་གསོལ་ལོ༔ ཨོཾ་མ་ཧཱ་ཀ་པ་ལ་ཨ་ལཾ་ཀ་ཨ་བྷི་ཥིཉྩ་ཧཱུྃ༔ གཞན་ཡང་དཔལ་གྱི་ཆས་བཅུ་སོགས༔ མངའ་གསོལ་རིམ་པ་ཅི་འགྲུབ་བྱ༔ ཨ་མྲྀ་ཏ་ཡིས་ཞལ་ཡང་བསྲོ༔ དེ་ལྟར་སྐལ་ལྡན་རིག་པ་འཛིན་པ་ཁྱོད་ལ་བུམ་པའི་དབང་ཡོངས་རྫོགས་ཀྱི་དབང་བསྐུར་བས་ལུས་ཀྱི་སྒྲིབ་པ་དག༔ བསྐྱེད་རིམ་བསྒོམ་པ་ལ་དབང༔ འབྲས་བུ་སྤྲུལ་སྐུའི་གསོས་ཐེབས་ཏེ་ཚེ་འདིར་དཔལ་ཆེན་པོའི་སྐུ་འགྲུབ་པར་འགྱུར་རོ༔ ས་མ་ཡཱ༔ གསང་བའི་དབང་གི་ཐོག་མ་རུ༔ རིག་མ་རྒྱན་ལྡན་བླ་མར་དབུལ༔ དར་ཡོལ་གྱིས་སྦས་བླ་མ་ཉིད༔ དཔལ་ཆེན་ཡབ་ཡུམ་སྦྱོར་མཚམས་ནས༔ བྱང་ཆུབ་སེམས་རྒྱུན་ཐོད་པར་བཞག༔ ཧཱུྃ༔ ཡབ་ཡུམ་སྦྱོར་བའི་བྱང་ཆུབ་སེམས༔ བདེ་སྐྱོང་སྣོད་དུ་རབ་བསྐྱིལ་ནས༔ སྐལ་ལྡན་མགྲིན་པར་བྱིན་པ་ཡིས༔ རྩ་སྒྲིབ་བག་ཆགས་གནས་དག་ནས༔ ལོངས་སྤྱོད་རྫོགས་སྐུའི་དཔལ་ཐོབ་ཤོག༔ ཨོཾ་བཛྲ་ཀཱི་ལ་ཡ་ཝཀྐ་ཨ་བྷི་ཥིཉྩ་ཧཱུྃ༔ ཅེས་ཐོད་པའི་བདུད་རྩི་ལྕེ་ལ་བྱིན་ཏེ༔ དམིགས་པ་དཔལ་ཆེན་པོ་ཡབ་ཡུམ་གྱི་མཁའ་གསང་ནས༔ སློབ་མའི་ལྕེས་དྭངས་མ་མྱང་བར་བསམ༔ དེ་ནས་རྗེས་འབྲེལ་དུ་བཟླས་ལུང་ནི༔ རུ་རཀྴའི་ཕྲེང་བ་སོགས་ལག་ཏུ་གཏད་དེ༔ དམིགས་པ་ནི༔ དཔོན་སློབ་གཉིས་ཀ་དཔལ་ཆེན་པོ་ཡབ་ཡུམ་ཏུ་གསལ་བའི་ཐུགས་ཀར་ཉི་མའི་དཀྱིལ་འཁོར་ལ་ཡེ་ཤེས་སེམས་དཔའ་བཛྲ་ཀཱི་ལ་ཡ་རྒྱན་མེད་པའི་ཐུགས་ཀར་དཔལ་ཀུན་ཏུ་བཟང་མོའི་ཐུགས་ཀར་ཧཱུྃ་མཐིང་ནག་གི་མཐར་རྩ་སྔགས་ཀྱིས་བསྐོར་བ་ལས་འོད་ཟེར་ལུ་གུ་རྒྱུད་དུ་འབྲེལ་བའི་སྒྲ་གདངས་ཀྱིས་འཕགས་པ་མཆོད་ཅིང་བྱིན་རླབས་བསྡུས་ཏེ་རང་ལ་ཐིམ་པར་བསམ་ལ༔ མོས་སློབ་ཙམ་ལ་དེ་རྗེས་སུ་གཞི་སྙིང་ཁྲོ་བཅུ་སྒོ་མ་སོགས་ལན་གསུམ་རྗེས་ཟློས་བྱ༔ དེས་ལུས་གནས་རྩ་དང་རླུང་གི་སྒྲིབ་པ་དག༔ བཟླས་བརྗོད་དང་རླུང་བསྒོམ་པ་ལ་དབང༔ འབྲས་བུ་ལོངས་སྐུའི་ས་བོན་གསོས་ཐེབས་ཏེ་ཚེ་འདིར་དཔལ་ཆེན་པོའི་གསུང་ཐོབ་པར་འགྱུར་རོ༔ ས་མ་ཡཱ༔ རྒྱ་རྒྱ་རྒྱ༔ དེ་རྗེས་ཤེར་དབང་ཞུ་བར་བྱ་བའི་ཕྱིར༔ དེ་ཡང་ཐོག་མར་གསེར་སོགས་ཀྱི་མཎྜལ་འབུལ་ཏེ༔ གསོལ་བ་གདབ་པ་ནི༔ ཀྱཻ་ཧོ་བདེ་བའི་བདག་ཉིད་བདེ་བའི་དཔལ༔ དཀྱིལ་འཁོར་ཁྱབ་བདག་བླ་མ་རྡོ་རྗེ་འཆང༔ སྲིད་པའི་འདོད་ཡོན་མ་སྤང་རང་གྲོལ་བའི༔ གསང་བ་ཤེས་རབ་ཡེ་ཤེས་དབང་མཆོག་སྩོལ༔ ལན་གསུམ་གསོལ་བ་བཏབ་རྗེས༔ བླ་མས་རིག་མ་རྒྱན་དང་ལྡན་པ་སློབ་མའི་ལག་ཏུ་གཏད་པའམ༔ བྲིས་པ་ཙམ་གྱིས་ཀྱང་རུང་ལ་ཚིག་གིས་བརྡ་སྤྲད་ལ༔ ཧཱུྃ༔ ད་ལྟར་སྐད་ཅིག་བདེ་སྟོང་ཡེ་ཤེས་ལ༔ རང་ངོ་སྤྲད་པས་ཚེ་འདིར་སངས་རྒྱས་ཀྱི༔ དགོངས་པ་མངོན་དུ་འགྱུར་བའི་ཐབས་ཟབ་མོ༔ རིགས་ལྡན་མི་སྤོང་སྤྲོ་བས་སྤྱོད་ནུས་སམ༔ སློབ་མས་འདི་སྐད་ཞུ༔ ངོ་མཚར་རྫོགས་པའི་སངས་རྒྱས་ཀྱི༔ ཐབས་ལ་བརྟེན་པའི་ཟབ་མོའི་གནད༔ ཐེ་ཚོམ་མེད་པར་སྤྱོད་ནུས་པས༔ མགོན་པོས་བདག་ལ་སྩལ་དུ་གསོལ༔ ཞེས་ཞུས་པས་ཕྱག་རྒྱའི་ལག་གཡོན་སློབ་མའི་ལག་ཏུ་གཏད་དེ་རིག་མས་ཀྱང་༔ ཀྱཻ་ལས་དང་སྐལ་བར་ལྡན་པ་ཁྱོད༔ ང་ཡི་ལུས་ཀྱི་ཆུ་སྐྱེས་ལ༔ ཐེ་ཚོམ་མེད་པར་ལོངས་སྤྱོད་ལ༔ བདེ་བའི་སྙིང་པོ་དང་དུ་ལོངས༔ ཅེས་གསུང་བར་མོས་ལ་སློབ་མ་རང་ཉིད་དཔལ་ཆེན་པོ་རྡོ་རྗེ་གཞོན་ནུ་དང༔ ཡུམ་འཁོར་ལོ་རྒྱས་འདེབས་མར་གསལ་བའི་འདུ་ཤེས༔ གསང་གནས་ཀྱི་ཆགས་པའི་ལམ་རྡོ་རྗེ་དང་པདྨར་གསལ་བའི་ལྟེ་བར་ལྟེ་བར་ཟླ་ཉིའི་སྟེང་དུ་ཧཱུྃ་མུཾ༔ བུ་ག་གཉིས་ཕཊ་ཀྱིས་བཀག་པ་སྔགས་ཀྱི་འདུ་ཤེས༔ ཆགས་པ་ཆེན་པོ་དེ་ཉིད་གང་དུ་མི་གནས་པའི་ཡེ་ཤེས་ཆེན་པོའི་རང་བཞིན་བླ་མས་ངོ་སྤྲོད་པ་ནི༔ བུ་ཁྱོད་རིག་མར་ལྷ་སྔགས་མཐུས་སྤྲད་པས༔ སྤྱི་མགྲིན་སྙིང་ལྟེར་རིམ་བཞིན་བབས་པ་ལས༔ ཕྱེད་ཤོར་ཕྱེད་མཉམ་སླར་ཡང་ཡར་དྲངས་བས༔ ཡར་མར་དགའ་བཞིའི་ཡེ་ཤེས་ངོས་ཟུངས་ཤིག༔ ཅེས་དང་། སླར་ཡང་། དེ་ཡི་རང་བཞིན་སྟོང་པ་ཆོས་ཀྱི་སྐུ༔ རང་གདངས་གསལ་ལ་དྭངས་པ་ལོངས་སྤྱོད་རྫོགས༔ ཆགས་པའི་རྟོག་པ་བདེ་གསལ་སྤྲུལ་པའི་སྐུ༔ ལོག་པར་མ་ཞེན་རང་གནས་ཡེ་ཤེས་སོ༔ མ་ཧཱ་སུ་ཁ་ཨ་ལ་ལ་ཧོ༔ མཐར་ཀུན་རྫོབ་ཀྱི་ཐིག་ལེ་སྤྱི་བོར་བརྟན་པ་ལ་མཉམ་པར་བཞག་ཅིང་༔ སྤྱོད་ལམ་ཀུན་ཏུ་རང་གནས་ཀྱི་ཡེ་ཤེས་དང་མ་བྲལ་བར་ཉམས་སུ་བླང་ངོ༔ དེས་ཀུན་རྫོབ་དུ་ནི་ཐིག་ལེ་དང་སེམས་ཀྱི་སྒྲིབ་པ་དག༔ བདེ་སྟོང་གཉིས་སུ་མེད་པའི་ཡེ་ཤེས་བསྒོམ་པ་ལ་དབང༔ འབྲས་བུ་ཆོས་ཀྱི་སྐུའི་ས་བོན་གསོས་ཐེབས་ཏེ་དཔལ་ཆེན་པོ་ཡབ་ཡུམ་གྱི་ཐུགས་སུ་འགྲུབ་པར་ཐེ་ཚོམ་མེད་དོ༔ དེ་ནས་ཚིག་དབང་ཞུ་བའི་ཆེད་སློབ་མས་མཎྜལ་ཕུལ་ཏེ་གསོལ་བ་འདེབས་སོ༔ ཧོ༔ ཐབས་གཞན་གང་ཡང་མི་དགོས་པར༔ རང་སེམས་རང་ངོ་ཤེས་པ་ཡིས༔ བྱུར་ངན་ཆགས་པས་མ་བསླུ་བར༔ ཚིག་གི་དབང་མཆོག་དབང་རྒྱལ་སྩོལ༔ ལན་གསུམ་ཞུ་རྗེས་བླ་མ་ཡིས༔ དྭངས་ཤེལ་མེ་ལོང་བསྟན་བྱས་ཏེ༔ ཨོཾ་ཨཱ༔ཧཱུྃ༔ ཀ་དག་འཁོར་དང་འདས་པ་མཉམ༔ ལྷུན་གྲུབ་རང་རྩལ་བཟང་ངན་སྣང༔ དེ་ཀུན་རང་སེམས་རིག་པའི་རྩལ༔ ཡེ་ཤེས་རང་བབས་གནས་སུ་ཞོག༔ ཧོ་རིགས་ཀྱི་བུ་རང་སེམས་གདོད་མ་ནས་སྒྲིབ་པ་དང་བྲལ་བའི་དྭངས་ཤེལ་དྲི་མ་མེད་པ་ལྟ་བུའོ༔ རང་རྩལ་ཡེ་ཤེས་ལྔའི་རང་བཞིན་མ་འགགས་པར་ཡོད་པ་ནི་འོད་ལྔ་ནང་ནས་བཀྲ་བ་ལྟ་བུའོ༔ ལམ་བསྒོམ་པས་རང་གནས་ཀྱི་ཡེ་ཤེས་སྐུ་གསུམ་མཛད་པ་དང་བཅས་པ་མངོན་དུ་ཤར་བ་ནི་ཤེལ་དང་ཉི་མའི་ཟེར་འཕྲད་དེ་འཇའ་ཚོན་ཕྱིར་འཆར་བ་ལྟ་བུའོ༔ མེ་ལོང་དྭངས་པའི་ངོས་སུ་གཟུགས་སྣ་ཚོགས་འཆར་བ་ལྟ་བུ་ནི་སེམས་རང་བབས་སུ་གནས་ཀྱང་རྒྱུ་དང་རྐྱེན་ལས་འཁོར་བ་དང་མྱང་འདས་ཀྱི་རོལ་རྩེད་ཡང་འཆར༔ གཟུགས་བརྙན་ཇི་ལྟར་ཤར་ཀྱང་ཕྱི་ནང་གང་དུའང་མ་གྲུབ་པ་ལྟར་འཁོར་འདས་གཉིས་གང་ཏུའང་མ་གྲུབ་པའོ༔ བཟང་ངན་གྱི་གཟུགས་ཤར་ཡང་མེ་ལོང་རང་གི་ངོ་བོ་ལ་གཡོས་པ་མེད་པ་ལྟར་དགེ་སྡིག་གི་རོལ་བ་བདེ་སྡུག་གི་ཚུལ་ཅི་སྣང་ཡང་རིག་པ་ཡུལ་དང་མ་འདྲེས་ཤིང་རང་ངོ་ལ་འགྱུར་བ་མེད་པའོ༔ ཅེས་ངོ་སྤྲད་དེ་དཔོན་སློབ་གཉིས་ཀ་རྣམ་སྣང་ཆོས་བདུན་དང་ལྡན་པས་ལྷོད་ལ་མཉམ་པར་བཞག་གོ༔ འདི་ནི་དབང་གི་རྒྱལ་པོ་སྟེ༔ ལན་ཅིག་ཐོབ་པའི་ཕན་ཡོན་ནི༔ སངས་རྒྱས་དངོས་ཞལ་མཇལ་དང་མཚུངས༔ ཞེས་ཀུན་གཞི་ལུང་དུ་མ་བསྟན་པའི་སྒྲིབ་པ་དག༔ རྫོགས་པ་ཆེན་པོ་བསྒོམ་པ་ལ་དབང༔ འབྲས་བུ་ངོ་བོ་ཉིད་ཀྱི་སྐུ་གསོས་ཐེབས༔ ཆོས་སྐུ་རང་བྱུང་དཔལ་ཆེན་པོའི་སྐུ་འགྲུབ་ནས་གཞན་དོན་འབད་མེད་ལྷུན་གྲུབ་ཏུ་འབྱུང་ངོ༔ མོས་སློབ་ཙམ་ལ་དེ་རྗེས་སུ༔ ཕུར་སྲུང་གཏོར་མ་བཀའ་གཏད་དང༔ བསྒྲལ་བའི་དབང་རྣམས་རིམ་པར་བྱིན༔ དེ་ནས་ཕུར་སྲུང་བཅུ་དྲུག་གི་གཏོར་མ་ཕུར་སྲུང་སྤྱན་འདྲེན་དང་བཅས་དཔལ་འབར་གཟུགས༔ སྨན་རཀ་སྦྲེང་དར་ནག་གཡབ་སྤོས་དུད་དང་བཅས་ཏེ་བསྐུལ་བ་འདི་སྐད་དོ༔ ཧཱུྃ་བྷྱོ༔ སྔོན་ཚེ་རང་བྱུང་ཆོས་དབྱིངས་ཕོ་བྲང་ནས༔ དཔལ་ཆེན་རྡོ་རྗེ་གཞོན་ནུའི་བཀའ་ཡིས་བསྔགས༔ དུར་ཁྲོད་མེ་རི་འབར་བའི་རྩེ་མོ་རུ༔ དཔལ་ཆེན་ལག་ན་རྡོ་རྗེའི་ལུང་གིས་བསྙེན༔ བལ་ཡུལ་ཡང་ལེ་ཤོད་ཀྱི་དབེན་གནས་སུ༔ རིག་འཛིན་ཐོད་ཕྲེང་རྩལ་དང་བལ་པོ་ཡི༔ སློབ་དཔོན་བ་སུ་དྷ་རས་དམ་ལ་བཞག༔ དཔལ་ཆེན་རྡོ་རྗེ་ཕུར་པའི་བསྲུང་མར་བསྐོས༔ མོན་ཁ་སེང་གེ་རྫོང་གསུམ་སྒྲུབ་གནས་སུ༔ བདག་ཉིད་ཨོ་རྒྱན་མཁས་པ་པད་འབྱུང་དང༔ ཐུགས་ཀྱི་གཟུངས་མ་མཁར་ཆེན་མཚོ་རྒྱལ་གྱིས༔ དཀྱིལ་འཁོར་མཐའ་རུ་ཞིང་ཆེན་སྟན་ལ་བཞག༔ དམ་ཚིག་རྡོ་རྗེ་ལག་ཏུ་གཏད་ནས་ཀྱང༔ ལྕེ་ལ་ཨརྒྷཾ་བཞག་ནས་བྲོ་བོར་བའི༔ ཤྭ་ན་མུ་ཁ་ཆེན་མོ་མཆེད་དེ་བཞི༔ བདག་ཉིད་ཆེན་མོ་རེ་ཏི་མཆེད་བཞི་དང༔ རྡོ་རྗེ་ཡ་བྱིན་ལ་སོགས་བསེ་མོ་བཞི༔ བསེ་ལྕགས་དུང་གསེར་སྐྱེས་བུ་ཆེན་པོ་བཞི༔ ཕུར་སྲུང་དམ་ཅན་བཅུ་དྲུག་ད་ཚུར་བྱོན༔ སྨན་རཀ་གཏོར་མ་སྐྱེམས་ཕུད་མཆོད་པ་བཞེས༔ བསྐུལ་ལོ་ཕུར་སྲུང་བཅུ་དྲུག་ཐུགས་དམ་བསྐུལ༔ དེ་རིང་སློབ་མའི་དོན་དུ་སྙན་གསན་དབབ༔ ཕུར་བ་སྒྲུབ་པའི་རྡོ་རྗེ་སློབ་དཔོན་འདི༔ བརྙས་ཤིང་སྲོག་ལ་རྒོལ་ཞིང་ལོངས་སྤྱོད་ཕྲོག༔ མ་ཉེས་ཁ་ཡོག་ངན་སྨྲ་རླུང་གིས་གཡེངས༔ དུས་གསུམ་ཀུན་ཏུ་མཐོ་གནོན་ཁྱད་དུ་གསོད༔ མཐུ་དང་ངན་སྦྱོར་དུག་གཡོས་སུས་བྱེད་ཀྱང༔ ཕུར་བའི་དམ་ཅན་ཁྱེད་རྣམས་དཔུང་ལ་གཤེགས༔ དམ་ཉམས་བརླིང་སྙིང་ཅན་གྱི་སྲོག་རྩ་ཆོད༔ ངན་སྨྲ་བྱེད་པའི་ལྕེ་ལ་ཕུར་པ་ཐོབ༔ ལོངས་སྤྱོད་ཡོ་བྱད་རྐུ་བའི་ཡན་ལག་ཆོད༔ མཆོག་ཐུན་དངོས་གྲུབ་འགྲུབ་པའི་མཐུན་རྐྱེན་ཚོགས༔ རྡོ་རྗེ་སློབ་མ་འདི་ལ་ཆར་བཞིན་ཕོབ༔ ཆོས་དང་རིགས་རྒྱུད་འཛིན་པའི་བུ་སློབ་སྤེལ༔ རྒྱལ་བློན་འབངས་འཁོར་བཅས་པའི་ཡིད་སེམས་གཡོས༔ ནོར་དང་ལོངས་སྤྱོད་འབད་མེད་ལག་རྩེར་སྩོལ༔ རྒབ་འདྲེ་བསེ་རག་དམ་སྲིའི་རྒྱུ་ལམ་ཆོད༔ གནས་སྐབས་གང་འདོད་རྐྱེན་རྣམས་ལྷུན་གྱིས་གྲུབ༔ མི་འདོད་རྐྱེན་ངན་བར་ཆད་དྲུང་ནས་ཕྱུངས༔ མཐར་ཐུག་བདེན་གཉིས་ཟུང་འཇུག་ཧེ་རུ་ཀ༔ དོན་གཉིས་ལྷུན་གྱིས་གྲུབ་པའི་གྲོགས་མཛོད་ཅིག༔ གཞི་སྙིང་གཅིག་དྲིལ་སྔགས་ཤམ་དུ༔ བིདྱཱ་དྷ་ར་པུ་ཏྲ་བཛྲ་རཀྵ་རཀྵ་ཧཱུྃ༔ ཅེས་སློབ་མའི་ལག་ཏུ་གཏད་ཅིང་སློབ་མས་ཀྱང་དཔལ་ཆེན་པོ་སྙམ་པས་དམ་འོག་ཏུ་བཞག་པར་དམིགས་ལ༔ བླ་མས་བདུད་རྩི་གཏོར་ཟན་དང་བཅས་སློབ་བུ་ལ་བྱིན་པས་དངོས་གྲུབ་ཏུ་རོལ༔ དེ་ནས་བླ་མས་ཕུར་སྲུང་དང༔ སློབ་མ་ཉིད་ལ་གདམས་པ་ནི༔ བཛྲ་ཀུ་མ་རའི་གསལ་སྣང་གིས་འདི་སྐད་དོ༔ ཀྱཻ་དམ་ལ་གནས་པའི་ཕུར་སྲུང་ཚོགས༔ སྙིགས་དུས་གསང་ཆེན་བསྟན་པ་གཉེར༔ ཆོས་མཛད་ཉམས་དམའ་སྡིག་སྤྱོད་མཐོ༔ བརྒྱུད་འཛིན་སློབ་མ་བུ་ལྟར་སྐྱོང༔ སྙིགས་མའི་ཆོས་མཛད་སྤྱོད་པ་རྩིང༔ གོང་གནོན་ལྷ་དང་མི་ལྡན་པར༔ དྲེགས་པ་རང་རྒྱུད་ལས་ལ་བསྐུལ༔ ཇི་ལྟར་སྟག་གི་སྒོ་ཁྱི་ལྟར༔ ཐབས་དང་མི་ལྡན་རང་སྲོག་སྐྱེལ༔ དེ་ཕྱིར་སློབ་མ་ཁྱོད་རྣམས་ཀྱང༔ རང་བཞིན་ལྟ་བའི་རྫོང་ཆེན་ཟུངས༔ སྒོ་གསུམ་ལྷ་སྔགས་ཆོས་སྐུར་སྦྱོང༔ བསྙེན་སྒྲུབ་གནད་དུ་ཐེམ་པར་སྐྱོལ༔ བསྟན་འགྲོའི་དོན་དང་རང་སྲོག་ལ༔ ཉེན་ཚེ་མ་གཏོགས་བསྐུལ་མི་རུང༔ རྟོགས་པས་བདག་རྒྱུད་མ་གྲོལ་བར༔ ཐུགས་རྗེས་གཞན་རྒྱུད་མི་གྲོལ་བས༔ རང་གར་གསང་ཆེན་སྤེལ་མི་རུང༔ རླུང་རྟ་དར་དང་རྒུད་པ་ལ༔ བརྟེན་ནས་དྲེགས་པ་རང་རྒྱུད་པས༔ ཕན་དང་གནོད་པ་སེལ་ནུས་ན༔ རྟག་ཏུ་གསོལ་མཆོད་ནན་ཏན་བྱ༔ ཞེ་སྡང་དྲག་པོས་ཚར་གཅོད་ལས༔ བྱེད་ན་རང་སྲོག་ལ་རྒོལ་བས༔ དམ་ཚིག་མིག་ལྟར་འཚོ་ཤེས་ཀྱིས༔ ཞེས་གདམས་ཤིང་དབྱངས་གསལ་དང་བཅས་པས༔ མེ་ཏོག་འཐོར་ཞིང་ཤིས་པ་བརྗོད༔ དེ་ནས་གསང་སྒྲུབ་ལག་ཏུ་གཏད༔ བླ་མ་བརྒྱུད་པའི་མཚན་བརྗོད་དེ་བཀའ་བསྒོ་བར་བྱའོ༔ མཐའ་རྟེན་བསྒྲལ་བའི་དབང་ནི༔ ཡུལ་ལྷ་སོགས་ལ་གསེར་སྐྱེམས་འབུལ༔ བྲུབ་ཁུང་གི་ལིང་ག་ལ་འགུགས་གཞུག༔ གཟུ་དཔང་དང་བསྒྲལ་ལས་བསྡུས་པ་དང་བཅས་ཏེ་དཔོན་སློབ་གཉིས་ཀ་གསལ་བ་གསུམ་ལྡན་གྱི་ཕུར་སྐོར་དང་བཅས་ཏེ་ལིང་ཀ་བསྒྲལ༔ ཤ་ཁྲག་དཀྱིལ་འཁོར་གྱི་ལྷ་ཚོགས་ལ་འབུལ༔ ཅུང་ཟད་ཙམ་ཨ་མྲྀ་ཏ་དང་བཅས་ཏེ་སློབ་མ་དཔལ་ཆེན་དུ་གསལ་བ་ལ་བྱིན་ཏེ་བཟར་བཅུག་གོ༔ རྗེས་ལ་དམ་ཚིག་བསྒྲགས་པ་ནི༔ ཀྱཻ་ཧོ༔ སྐལ་ལྡན་སྙིང་གི་བུ༔ ཕུར་བའི་དབང་གི་དམ་ཚིག་ཏུ༔ དབང་གི་བླ་མ་མིག་ལྟར་བསྲུང༔ རྒྱུད་ཀྱི་བླ་མ་མགོ་ལྟར་ཁུར༔ ལུང་གི་བླ་མ་སྙིང་ལྟར་ལྟོས༔ དམ་སྐོང་བླ་མ་རྗེ་ལྟར་བཀུར༔ རྟག་ཏུ་ལྷ་སྔགས་ཏིང་འཛིན་སྒོམ༔ ཕུར་སྲུང་མཆོད་བརྟེན་རྒྱུན་མ་གཅོད༔ སངས་རྒྱས་བསྟན་དགྲའི་གཤེད་མ་གྱིས༔ སེམས་ཅན་སྤྱི་དགྲ་ཐབས་ཀྱིས་སྒྲོལ༔ དགེ་བཅུའི་ལས་ལ་བརྩོན་འགྲུས་སྐྱེད༔ ཆོས་སྤྱོད་བཅུ་ལ་དུས་དྲུག་བརྩོན༔ གཞན་ཕན་བསམ་སྤྱོད་གཙོ་བོར་ཟུངས༔ དེས་ནི་རང་གཞན་དོན་གཉིས་འགྲུབ༔ ཅེས་པ་དོན་ཀུན་རྩ་བ་དང༔ ཡན་ལག་དམ་ཚིག་གཉིས་སུ་འདུ༔ རྣམ་གྲངས་ཤེས་པས་ཁས་ལེན་བྱ༔ དགའ་སྟོན་ཡོན་གྱིས་མཉེས་པར་བྱེད༔ སྤྱོད་ལམ་ཀུན་ཏུ་ལྷ་སྔགས་དང༔ མི་འབྲལ་དུས་ཀུན་དོན་ཡོད་བྱ༔ དགེ་བས་འགྲོ་བ་མ་ལུས་པ༔ དཔལ་ཆེན་གོ་འཕང་ཐོབ་ཕྱིར་བསྔོ༔ ཨེ་མ༔ ཕུར་པའི་རྒྱུད་དང་འབྲེལ་བ་ཡི༔ དབང་བཞི་ཡོངས་རྫོགས་ཕྲིན་ལས་ཀྱིས༔ སྒྲོལ་བའི་མཐའ་རྟེན་དང་བཅས་པ༔ བརྒྱུད་གསུམ་བླ་མས་བཀའ་གནང་ཞིང༔ འབྱུང་བཞིའི་བཅུད་ལ་ལྟོས་མིན་པར༔ རང་བྱུང་དགོངས་གཏེར་ཌཱཀྐིའི་སྲོག༔ འདི་ནི་ལན་གཅིག་ཐོབ་པས་ཀྱང༔ ཚེ་ཆོས་སྲིད་གེགས་ངེས་པར་སེལ༔ མཆོག་ཐུན་དངོས་གྲུབ་ཉེ་བར་འབྱུང༔ བརྩོན་པས་བསྒྲུབ་ན་མི་ཚེ་འདིར༔ དཔལ་ཆེན་དངོས་དང་མཉམ་པར་འགྱུར༔ གུ་ཧྱ༔ གཏེར་སྲུང་སྔགས་སྲུང་རལ་གཅིག་མས༔ སྐལ་མེད་གསང་སྔགས་འཆོལ་སྤྱོད་ལ༔ གཏད་རྒྱ་བྱས་ན་སྙིང་ཁྲག་འཐུང༔ ཆོས་བདག་སྐྱེས་བུར་རྟག་སྲུང་ཅིག༔ ས་མ་ཡཱ༔ རྒྱ་རྒྱ་རྒྱ༔ ཁོ་བོ་སྤྲུལ་མིང་ལུང་རིག་གླིང་པས་ཆོས་བདག་སྐྱེས་ཆེན་རྣམས་ཀྱི་བཀས་བསྐུལ་ངོར་རང་བྱུང་དབྱིངས་ཀྱི་ཆོས་མཛོད་ནས་སྤྱན་དྲངས་པའོ༔ དགེའོ། །དགེའོ། །དགེའོ།།