དབང་ཆོག་སྐུ་བཞིའི་རྒྱལ་སྲིད།
༄༅། བྲགམབྷིརཀཱིལཡསྱཙིཏྟསདྷནེབྷྱཿ ཨབྷིཥིཉྩབིདྷབིཏུརྒཱལརཱཛྱཾབིཧརཏིསྨ། མངྒལཾ།
༄༅། བྲ་གམབྷིརཀཱིལཡསྱཙིཏྟསདྷནེབྷྱཿ ཨབྷིཥིཉྩབིདྷབིཏུརྒཱལརཱཛྱཾབིཧརཏིསྨ། མངྒལཾ།
༄༅། ཡང་ཟབ་ཕུར་པའི་ཐུགས་སྒྲུབ་ལས༔ དབང་ཆོག་སྐུ་བཞིའི་རྒྱལ་སྲིད་བཞུགས༔
ཕྲིན་ལས་ཕུར་པའི་ལྷ་ལ་འདུད༔ གཞི་རྒྱུད་བདེ་གཤེགས་སྙིང་པོ་ལ༔ བསྐུར་ཐོབ་བྲལ་བ་གཞི་ཡི་དབང༔ སེམས་ཅན་ཀུན་གྱི་སྙིང་ལ་གནས༔ འགྲོ་དྲུག་མངོན་སངས་རྒྱས་པའི་རྒྱུ༔ ལམ་རྒྱུད་བསྐྱེད་རྫོགས་ཟུང་འཇུག་ལ༔ རྒྱུ་དྲུག་རྐྱེན་བཞིའི་བདག་ཉིད་ཀྱི༔ རྣམ་གྲངས་བཞི་ལྡན་ལམ་གྱི་དབང༔ མེད་མི་རུང་བའི་རྩ་བའོ༔ འབྲས་རྒྱུད་སྐུ་དང་ཡེ་ཤེས་ལ༔ དག་པ་ས་གསུམ་སེམས་དཔའ་ལ༔ འོད་ཟེར་ཆེན་པོས་དབུགས་དབྱུང་བ༔ འབྲས་བུ་དོན་གྱི་དབང་ཡིན་ནོ༔ ཁྱད་པར་དཔལ་ཆེན་ཕུར་པའི་ཆོས༔ འོག་མིན་དུར་ཁྲོད་ཆེན་པོ་དེར༔ རིག་པ་འཛིན་པའི་འཁོར་ཚོགས་ལ༔ གཙོ་བོ་རྡོ་རྗེ་གཞོན་ནུ་ཡིས༔ དགོངས་པས་བྱིན་རླབས་བརྡ་དབང་བསྐུར༔ གཙོ་བོ་ཉིད་དང་དབྱེར་མེད་པའི༔ གྲུབ་ཆེན་ཞི་བའི་སྙིང་པོ་ལས༔ རྒྱ་གར་མཁས་པ་པད་འབྱུང་གིས༔ གསུམ་ལྡན་སྙན་རྒྱུད་དབང་བསྐུར་ཞུས༔ ཆོས་དབྱིངས་སྐྱེ་མེད་ཤེས་རབ་ཡུམ༔ འགྲོ་བའི་དོན་དུ་དམན་པའི་ལུས༔ བདག་ཉིད་མཁར་ཆེན་མཚོ་རྒྱལ་གྱིས༔ བསམ་ཡས་མཆིམས་ཕུའི་དུར་ཁྲོད་དུ༔ ཨོ་རྒྱན་བླ་མ་པད་འབྱུང་ལ༔ སྒྲུབ་ཆེན་བཀའ་བརྒྱད་དབང་མནོས་ཚེ༔ ཕྲིན་ལས་ཕུར་པའི་དཀྱིལ་འཁོར་དུ༔ མེ་ཏོག་བབ་ཅིང་ཡི་དམ་ལྷ༔ ཚེ་འདིར་འགྲུབ་པའི་ལུང་བསྟན་ཐོབ༔ མོན་ཁ་ནེ་རིང་སེང་གེ་རྫོང༔ ཁྱད་པར་འཕགས་པའི་གནས་གསུམ་དུ༔ དེ་ཉིད་བསྒྲུབ་ཅིང་ལྷ་ཞལ་མཇལ༔ བསད་པའི་མི་རོ་བསླངས་བ་སོགས༔ རྫུ་འཕྲུལ་གཞན་སྣང་ཟིལ་གྱིས་མནན༔ རྩ་ཐིག་རླུང་གསུམ་གནས་དག་ནས༔ དངོས་སུ་མཁའ་སྤྱོད་བསྒྲོད་པ་ཡི༔ རང་སྣང་དབང་འདུས་གནས་གསུམ་གྱི༔ ཌཱཀྐི་ཡོངས་ཀྱི་རྗེ་མོར་གྱུར༔ ཕུར་པའི་རྒྱུད་དང་སྒྲུབ་ཐབས་རྣམས༔ ཕྱོགས་བཞི་དབུས་ལྔར་གཏེར་དུ་སྦས༔ ལས་འཕྲོ་ལྡན་པའི་གང་ཟག་གིས༔ གཏེར་ནས་བཏོན་ཅིང་འགྲོ་དོན་འཕེལ༔ ཡང་ཅིག་བདག་ཉིད་སྤྲུལ་པ་ནི༔ སེམས་ཅན་རྟོག་པའི་གྲངས་བཞིན་དུ༔ ཉི་རྡུལ་ལས་ཀྱང་མང་བ་ཞིག༔ མ་འོངས་རྕོད་ལྡན་དུས་སུ་འབྱུང༔ ཁྱད་པར་ལས་ཀྱི་འཕྲོ་ལྡན་པའི༔ ལུང་རིག་མིང་ཅན་གང་ཟག་ལ༔ དངོས་ཉམས་རྨི་ལམ་མ་ངེས་པར༔ མཚོ་རྒྱལ་བདག་གིས་རྗེས་བཟུང་ནས༔ དག་སྣང་ཆོས་ལ་དབང་བསྒྱུར་བར༔ ལུང་དུ་བསྟན་ཅིང་དབང་ཡང་བསྐུར༔ དེ་ཕྱིར་འགྲོ་དོན་དུས་བབས་ཚེ༔ དབང་ཆོག་སྐུ་བཞིའི་རྒྱལ་སྲིད་འདི༔ སྐལ་ལྡན་དོན་དུ་སྤེལ་བར་གདམས༔ ས་མ་ཡཱ༔ དེ་ཡང་དུར་ཁྲོད་ལ་སོགས་པ༔ དབེན་པའི་གནས་སུ་ཡོ་བྱད་བསགས༔ མཎྚལ་ནག་པོར་དུག་ཁྲག་བྱུག༔ ཐིག་ནས་དྲངས་ཤིང་འབྲུ་ཚོམ་འགོད༔ འཁོར་ལོ་རྩིབས་བཞི་རྩིབས་བཅུ་དང༔ ཁྱམས་དང་སྒོ་གྲུ་རྟ་བབས་སོགས༔ མཚན་ཉིད་ཚང་བར་བྲིས་པའི་དཀྱིལ༔ གྲུ་གསུམ་ནག་པོ་ཧཱུྃ་ཡིག་མཚན༔ དབུས་སུ་བུམ་པ་དམ་རྫས་ཀྱི༔ བཅུད་དང་ལྡན་པ་ལེགས་པར་འགོད༔ ཤར་དུ་སྐུ་ཡི་རྟེན་རྣམས་དང༔ ལྷོ་རུ་བྷནྡྷ་བདུད་རྩིས་བཀང༔ ནུབ་ཏུ་དྲིལ་བུ་དར་དམར་དཀྲིས༔ བྱང་དུ་སྒྲུབ་ཕུར་སྒྲོམ་དང་བཅས༔ མཚམས་བཞི་རྡོ་རྗེ་རྩེ་ལྔ་དང༔ དབུ་རྒྱན་དཔལ་ཆས་ཁ་ཊཱཾ་ཀ༔ སྨན་རཀ་གཏོར་མ་དང་བཅས་བཀོད༔ ཕྱི་ནང་མཆོད་པས་མཐའ་ནས་བསྐོར༔ སྤྱན་གཟིགས་ཚོགས་ཀྱི་ལོངས་སྤྱོད་དང༔ བཀའ་གཏེར་སྲུང་མའི་གཏོར་མ་སོགས༔ རྟེན་འབྲེལ་རྫས་རྣམས་མ་ལུས་པ༔ མ་ཚང་མེད་པར་འདུ་བྱས་ཏེ༔ ཡུལ་དེའི་གཉུག་མར་གནས་པ་ལ༔ དཀར་གསུམ་གཏོར་མ་གསེར་སྐྱེམས་འབུལ༔ བར་ཆད་བསྲུང་བའི་བཀའ་ཡང་བགོ༔ ལན་ཆགས་བླ་གླུད་སྔགས་ཀྱིས་བརླབས༔ ནག་ཕྱོགས་བདུད་རིགས་འབྱུང་པོ་ལ༔ སྦྱིན་ཅིང་བཀའ་བསྒོ་མཚམས་ཡང་བཅད༔ བདག་མདུན་རྫས་རྣམས་ལྷ་རུ་བསྒོམ༔ བསྙེན་པ་བརྒྱ་སྟོང་ཁྲི་འབུམ་སོགས༔ སློབ་དཔོན་དགོངས་པའི་ཚོད་དང་སྦྱར༔ ༧ ཁྱད་པར་བུམ་པ་དུར་ཁྲོད་ཀྱི༔ གཞལ་ཡས་ཁང་དུ་བསམ་པའི་ནང༔ དཔལ་ཆེན་རྡོ་རྗེ་གཞོན་ནུ་ཆེའི༔ གཙོ་འཁོར་སྤྲུལ་པ་མ་ལུས་ཀུན༔ བདེ་སྟོང་ཟུང་འཇུག་མཉམ་སྦྱོར་བའི༔ བདེ་བའི་སྒྲ་གདངས་སྔགས་ཀྱིས་བསྐུལ༔ བྱང་སེམས་བདུད་རྩིའི་འོ་རྒྱུན་བབས༔ བུམ་པ་ལྟེམ་གྱིས་གང་བར་དམིགས༔ གཟུངས་ཐག་གདགས་ཤིང་བསྙེན་པ་སྟོང༔ ཡེངས་མེད་ཏིང་འཛིན་ལྡན་པས་བཟླ༔ ལས་བུམ་བདུད་རྩི་འཁྱིལ་བ་བསྐྱེད༔ བསྙེན་པ་བཟླ་ཞིང་མཆོད་བསྟོད་དང༔ ལྷ་རྣམས་སྔགས་ཀྱིས་འོད་ཞུ་བྱ༔ བཀའ་གཏེར་སྲུང་མ་དམ་ཅན་ལ༔ གཏོར་མ་འབུལ་ཞིང་དཔོན་སློབ་རྣམས༔ བྱང་ཆུབ་སྙིང་པོའི་བར་དག་ཏུ༔ བསྲུང་སྐྱོབས་བྱེད་པར་ཕྲིན་ལས་བཅོལ༔ ཚོགས་ཀྱི་འཁོར་ལོས་ལྷ་རྣམས་ཀྱི༔ ཐུགས་དམ་བསྐང་ཞིང་ཉམས་ཆགས་བཤགས༔ དགྲ་བགེགས་གཟུགས་ལ་བཀུགས་བསྟིམ་ནས༔ བསྒྲལ་ལས་ཆོ་ག་གཞུང་བཞིན་བྱ༔ ལྔ་གསུམ་བདུན་ལས་མི་མང་བའི༔ ལས་སྐལ་ལྡན་པའི་སློབ་མ་ཡིས༔ དཀྱིལ་འཁོར་གཙོ་བོ་བླ་མ་ལ༔ གོ་མཚོན་ལ་སོགས་མཎྚལ་ཕུལ༔ གནས་ཁང་ཕྱི་རོལ་འདི་སྐད་ཞུ༔ ཀྱཻ་ཧོ༔ འཇིགས་བྱེད་འཇིགས་མཛད་དཔལ་ཆེན་ཧེ་རུ་ཀ༔ ལྷ་ཡི་ལྷ་མཆོག་རྡོ་རྗེ་གཞོན་ནུ་ཆེ༔ དཀྱིལ་འཁོར་བདག་པོ་རྡོ་རྗེ་འཛིན་པ་ཡིས༔ ཡང་ཟབ་གདམས་པའི་དབང་མཆོག་སྩལ་དུ་གསོལ༔ ཞེས་པས་ལན་གསུམ་གསོལ་བ་བཏབ་རྗེས་སུ༔ སློབ་མ་ཁྲུས་ནས་ཕྱུང་ཞིང་བགེགས་ཚོགས་རྣམས༔ ལན་ཆགས་གླུད་སྦྱིན་མེ་ཆུ་ཡུངས་ཐུན་བྲབ༔ ཕྱི་ནང་ལོག་འདྲེན་བསྲུང་ཕྱིར་མཚམས་ཡང་བཅད༔ ལས་ཀྱི་རྡོ་རྗེས་སློབ་བུ་ནང་དུ་ཁྲིད༔ གདོང་གཡོག་དམར་པོས་མིག་དགབ་མེ་ཏོག་གཏད༔ འཁོར་བར་ངེས་འབྱུང་མི་རྟག་རྒྱུ་འབྲས་སོགས༔ ཡང་དག་ཆོས་བཤད་ཁྱད་པར་གདམས་པ་འདིའི༔ ལོ་རྒྱུས་ངེས་ཤེས་རྒྱུད་ལ་འདྲོང་བར་བྱ༔ སླར་ཡང་མཎྚལ་དབུལ་ཞིང་གསོལ་གདབ་ནི༔ ཀྱཻ་ཧོ་བླ་མ་དཔལ་ཆེན་ཧེ་རུ་ཀ༔ ཐ་མལ་རྟོག་པས་བཅིངས་པའི་འཁོར་བ་འདིར༔ ལས་ཉོན་སྡུག་བསྔལ་རྦ་རླབས་འཁྲུགས་ཤིང་མནར༔ ཐར་བའི་གྲོང་ལ་མྱུར་དུ་གཞུག་ཏུ་གསོལ༔ དེ་སྐད་ལན་གསུམ་གསོལ་བ་བཏབ་རྗེས་སུ༔ རྡོ་རྗེ་བླ་མས་བརྩེ་བའི་ལན་འདི་བྱིན༔ ཨེ་མ་ཐར་པ་མཆོག་གི་གྲོང་དུ་འཇུག་འདོད་ན༔ ཐེག་ཆེན་བློ་ཡིས་དཀོན་མཆོག་རྣམ་གསུམ་ལ༔ སྐྱབས་སུ་འགྲོ་ཞིང་མཁའ་མཉམ་སེམས་ཅན་རྣམས༔ བྱང་ཆུབ་མཆོག་གི་ལམ་ལ་འགོད་ནུས་སམ༔ སླར་ཡང་སློབ་བུས་གུས་པས་འདི་སྐད་ཞུ༔ བཀའ་དྲིན་ཅན་གྱི་རྡོ་རྗེ་སློབ་དཔོན་ལགས༔ ཚེ་འདིར་གྲོལ་བའི་གདམས་ངག་མཆོག་སྦྱིན་ན༔ སྐྱབས་སུ་འགྲོ་ཞིང་བྱང་ཆུབ་སེམས་བསྐྱེད་ནས༔ ལམ་གྱི་རིམ་པ་ཚུལ་བཞིན་བསྒྲུབ་ནུས་སོ༔ དེ་རྗེས་དམ་ཚིག་རྡོ་རྗེའི་ཆུ་བླུད་ཅིང༔ ཧོ༔ སྔོན་ནས་ལས་འཕྲོ་ལྡན་པའི་གང་ཟག་རྣམས༔ ཆད་ལས་མ་འདའ་དམ་ཚིག་ཚུལ་བཞིན་སྲུང༔ སྤང་བླང་བགྱིས་ན་མཆོག་ཐུན་དངོས་གྲུབ་འགྲུབ༔ ཉམས་ན་རྡོ་རྗེའི་དམྱལ་བར་འཚོད་ཏ་རེ༔ སྔགས་ཀྱི་རྗེས་ཟློས་འདི་ཡང་བྱ༔ ཨོཾ་བཛྲ་ས་མ་ཡཱ་རཀྵན་དུ་ན་ར་ཀན༔ ལན་གསུམ་བརྗོད་ཅིང་སློབ་བུ་ཡིས༔ སྐྱབས་སུ་འགྲོ་ཞིང་སེམས་བསྐྱེད་དང༔ རྒྱུན་བཤགས་ཡན་ལག་བརྒྱད་པ་བྱ༔ སླར་ཡང་སྡོམ་པ་བཟུང་བ་ནི༔ དྲན་དང་ཤེས་བཞིན་དང་ལྡན་པས༔ སློབ་བུས་རྗེས་ཟློས་འདི་ལྟར་བགྱི༔ ཧོ༔ གསང་ཆེན་གསང་བ་ཟབ་མོའི་དཀྱིལ་འཁོར་འདིར༔ བདག་ཅག་སྐལ་ལྡན་རྗེས་སུ་འཇུག་པ་རྣམས༔ སོ་སོར་ཐར་དང་བྱང་ཆུབ་སེམས་དཔའ་དང༔ གསང་སྔགས་ཕྱི་ནང་སྡོམ་པ་མ་ལུས་ཀུན༔ བླ་མ་ལྷ་དང་རྡོ་རྗེ་སྤུན་གྲོགས་ཀྱི༔ སྐུ་གསུང་ཐུགས་དང་རྩ་བ་ཡན་ལག་གི༔ དམ་ཚིག་ཉིད་དུ་ཚུལ་བཞིན་བསྡུས་ཏེ་བསྲུང༔ དེ་སྐད་ལན་གསུམ་བརྗོད་པར་བྱ༔ དེ་ནས་དབང་གི་དངོས་གཞི་རུ༔ ཡེ་ཤེས་ལྷ་དང་ཉེ་བའི་ཕྱིར༔ བྱིན་ཆེན་དབབ་པའི་རིམ་པ་ནི༔ སློབ་བུས་ལུས་གནད་དྲང་པོར་བསྲང༔ ངག་གནད་འོག་རླུང་དྲག་ཏུ་བསྡམ༔ སྟེང་རླུང་ཅུང་ཟད་བསྐྱིལ་བྱས་ཏེ༔ མཉམ་པར་སྦྱོར་ཞིང་བུམ་ཅན་བཟུང༔ སེམས་གནད་དམིགས་པ་འདི་བཞིན་བྱ༔ ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཾ༔ འཁོར་འདས་མི་དམིགས་སྟོང་པར་གྱུར༔ སྟོང་པའི་ངང་ལས་སྐད་ཅིག་གིས༔ ཕྱི་སྣོད་དུར་ཁྲོད་གཞལ་ཡས་དབུས༔ རང་སེམས་ཧཱུྃ་ལྗང་འཕྲོ་འདུ་ལས༔ རྡོ་རྗེ་གཞོན་ནུའི་སྐུ་རུ་བསྐྱེད༔ གནས་གསུམ་ཡི་གེ་གསུམ་གྱིས་མཚན༔ ཁྱད་པར་ཙིཏྟ་བཻཌཱུརྱའི༔ རྡོ་རྗེ་རྩེ་ལྔའི་ལྟེ་བ་རུ༔ རྗེ་བཙུན་པདྨ་ཐོད་ཕྲེང་རྩལ༔ མཐིང་ནག་རྡོ་རྗེ་དྲིལ་བུ་འཛིན༔ ཟ་འོག་བེར་གོས་གར་སྟབས་མཛད༔ འཁོར་དུ་རིགས་བཞིའི་མཁའ་འགྲོ་བཞི༔ གཅེར་བུ་ལས་བཞིའི་ཕྱག་མཚན་ཅན༔ གར་སྟབས་འགྲན་ཅིང་འོད་ཟེར་འཕྲོས༔ རྔ་ཡབ་གླིང་དང་དག་པའི་ཞིང༔ གནས་ཡུལ་དུར་ཁྲོད་ཐམས་ཅད་ནས༔ རྩ་གསུམ་རྒྱལ་བ་སྲས་དང་བཅས༔ ཐུགས་དམ་དབང་གིས་རྒྱུད་བསྐུལ་ཏེ༔ དཔལ་ཆེན་རྡོ་རྗེ་གཞོན་ནུ་ཡི༔ སྐུ་ཡིག་ཕྱག་མཚན་རྣམ་པ་རུ༔ སློབ་བུའི་ལུས་ངག་ཡིད་གསུམ་ལ༔ དབྱེར་མེད་ཐིམ་པའི་མོས་འདུན་ནི༔ དཔོན་སློབ་གཉིས་ཀས་ཡང་ཡང་བྱ༔ ཐོད་རྔ་འཁྲོལ་ཞིང་བྱིན་འབེབས་དང༔ རྩ་གསུམ་སྔགས་ཚིག་དྲག་ཏུ་བརྗོད༔ སྤོས་དང་ཚིལ་ཆེན་དུད་པ་བདུག༔ དེ་ནས་བྱིན་ཆེན་དབབ་པའི་རྟགས༔ ལུས་ལ་བྱུང་ན་གར་སྟབས་འཁྲབ༔ ངག་ལ་བྱུང་ན་བརྡ་སྐད་སྒྲོགས༔ སེམས་ལ་བྱུང་ན་ཉམས་རྟོགས་འབར༔ དེ་ཚེ་ཡེ་ཤེས་ལྷ་ཚོགས་རྣམས༔ སློབ་མའི་ལུས་ངག་ཡིད་གསུམ་ལ༔ བྱང་ཆུབ་བར་དུ་བརྟན་པའི་ཕྱིར༔ བླ་མས་རྩ་བའི་སྔགས་ཤམ་དུ༔ ཏིཥྛ་བརྗོད་ཅིང་མེ་ཏོག་འཐོར༔ ས་མ་ཡཱ༔ དེ་ནས་མཆོག་ཐུན་ལས་བཞི་ཡི༔ དངོས་གྲུབ་བརྟག་བྱའི་དཀྱིལ་འཁོར་ལ༔ སློབ་བུས་ལྔ་ལྡན་མེ་ཏོག་དབུལ༔ ཧོ༔ རྡོ་རྗེ་གཞོན་ནུའི་དཀྱིལ་འཁོར་ཆེན་པོ་འདིར༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ ལས་བཞིའི་ཕྲིན་ལས་བདག་གིས་གང་བསྒྲུབ་པ༔ རིགས་ལྔའི་དཀྱིལ་འཁོར་གང་ཡིན་དེར་དབབ་ཤོག༔ པཉྩ་རཏྣ་པུཥྤེ་པྲ་ཏི་ཛ་ཧོ༔ དཀྱིལ་འཁོར་དབུས་སུ་བབ་པ་ན༔ གཙོ་བོ་ཉིད་དང་ཐ་མི་དད༔ མཆོག་གི་དངོས་གྲུབ་ཐོབ་པར་འགྱུར༔ ཕྱོགས་བཞིར་ལས་བཞིའི་ཕྲིན་ལས་དང༔ མཚམས་བཞིར་ཕྲན་ཚེགས་དངོས་གྲུབ་ཐོབ༔ མུན་སེལ་གསང་བའི་མིང་གདགས་པ༔ དབུས་སུ་རྡོ་རྗེ་གཞོན་ནུ་རྩལ༔ ཤར་ལྷོ་ནུབ་བྱང་ཕྱོགས་བཞི་རུ༔ བཛྲ་རཏྣ་པདྨ་དང༔ ཀརྨ་བཞད་པ་རྩལ་དུ་གདགས༔ མཚམས་སུ་རྡོ་རྗེ་རིན་པོ་ཆེ༔ པདྨ་ལས་རབ་མྱུ་གུ་རྩལ༔ མོ་ལ་དེ་བཞིན་དབྱིངས་ཕྱུག་མའི༔ མིང་མཐར་སྦྱར་དེ་གདགས་པར་བྱ༔ དཀྱིལ་འཁོར་ལྷ་ཞལ་མཇལ་བའི་ཕྱིར༔ བླ་མས་གསེར་གྱི་ཐུར་མ་ཐོགས༔ གདོང་གཡོག་བཀྲོལ་བ་འདི་སྐད་དོ༔ ཧོ༔ ཚེ་རབས་སྔོན་ནས་ཉོན་མོངས་བག་ཆགས་མཐུས༔ རང་རིག་སངས་རྒྱས་ཡིན་ཀྱང་ཞལ་མ་མཇལ༔ དཔལ་ཆེན་ཕྲིན་ལས་ཕུར་པའི་དཀྱིལ་འཁོར་དུ༔ སྒྲིབ་པ་བསལ་ཏེ་ལྷ་ཞལ་སྟོན་པར་བགྱི༔ ཛྙཱ་ན་ཙཀྵུ་པྲ་ཝེ་ཤ་ཡ་ཕཊ༔ དེ་ནས་བླ་མས་ཕྱག་ཤིང་ཐོགས༔ དཀྱིལ་འཁོར་བརྡ་དོན་འདི་བཞིན་བརྗོད༔ ཀྱེ་ཧོ༔ ཕྱི་སྣོད་ཀྱི་འཇིག་རྟེན་ཐམས་ཅད་གཞལ་ཡས་ཁང་དུ་མ་གྱུར་པ་མེད་ཀྱང༔ ལམ་དབང་ཟབ་མོ་འདིའི་སྐབས་སུ་སྒྲུབ་པ་ལས་ཀྱི་དཀྱིལ་འཁོར་འདིར༔ ཡང་དག་པའི་ལྷ་དང་མཇལ་དགོས་པའི་ཕྱིར༔ བརྡ་རྟགས་ཀྱི་རིམ་པ་འདི་རྣམས་དོན་དང་སྦྱར་དེ་ཚུལ་བཞིན་དུ་ཤེས་པར་གྱིས་ཤིག༔ ཡང་དཀྱིལ་འཁོར་གྱི་འོག་གཞི་ནག་པོར་བྱུང་བ་ནི་གདོད་ནས་ཆོས་ཀྱི་དབྱིངས་འཕོ་འགྱུར་མེད་པའི་རྟགས་སོ༔ དཀྱིལ་འཁོར་གྲུ་བཞིར་བྱུང་བ་ནི་ཚད་མེད་པ་བཞིའི་སྒོ་ནས་གདུལ་བྱའི་སེམས་ཅན་ལ་ཕན་གདགས་ཤིང་འཇུག་སྒོ་ཤིན་ཏུ་ཡངས་པའི་རྟགས་སོ༔ སྒོ་བཞིར་བྱུང་བ་ནི་རྒྱལ་བ་རྣམས་ཐབས་ལ་མཁས་པས་བསྡུ་དངོས་བཞིའི་སྒོ་ནས་གདུལ་བྱ་ཐར་པའི་སྒོར་ཁྲིད་པའི་རྟགས་སོ༔ ཕྱི་ཐོད་པ་སྐམ་རློན་རྙིད་པ་གསུམ་གྱི་རྩིག་པ་ཤིན་ཏུ་རྔམས་ཤིང་ནང་བཻཌཱུརྱ་ཞུན་མའི་རང་བཞིན་དུ་འདུག་པ་ནི་དོན་དམ་པར་སྟོང་པ་ཆེན་པོའི་དབྱིངས་གཅིག་ལས་གདུལ་བྱའི་བློ་རིམ་གསུམ་དང་སྦྱར་ཏེ་ཐེག་པ་གསུམ་གྱི་ཆོས་སྟོན་པའི་རྟགས་སོ༔ ཁྲག་ཁྱམས་དང་གསེར་ཁྱམས་ཀྱི་རིམ་པ་ཉིས་བརྩེགས་སུ་སྣང་བ་ནི་རྒྱུ་མཚན་ཉིད་དང་འབྲས་བུ་བླ་ན་མེད་པའི་འཇུག་སྒོ་ཐ་དད་དུ་སྟོན་པའི་རྟགས་སོ༔ རྟ་བབས་ཀྱི་རིམ་པ་བརྒྱད་དང་ལྡན་པ་ནི་རྣམ་པར་ཤེས་པ་ཚོགས་བརྒྱད་གནས་སུ་དག་པ་ལས་འཕགས་པའི་ལམ་ཡན་ལག་བརྒྱད་དང་རྣམ་པར་ཐར་པའི་སྒོ་བརྒྱད་དུ་སྣང་བའི་རྟགས་སོ༔ ཕྱོགས་བཞིར་མི་རོའི་རྒྱལ་མཚན་བཞི་དང་མཚམས་བཞིར་ཀེང་རུས་རྩེ་རྒྱན་བཞི་དང་བརྒྱད་དུ་སྣང་བ་ནི་ཁམས་བརྒྱད་ལས་དབང་ཕྱུག་གི་ཡོན་ཏན་བརྒྱད་དུ་སྣང་བའི་རྟགས་སོ༔ རྩེ་མོར་ཙིཏྟའི་ཏོག་དང་ཤིན་ཏུ་འཇིགས་པའི་གཅན་གཟན་གྱི་ལྤགས་པ་ལྷབ་ལྷུབ་ཏུ་འཕྱོ་བ་ནི་ཚད་མེད་པའི་སྙིང་རྗེ་ཆེན་པོས་གཏུམ་ཤིང་གདུལ་དཀའ་བའི་རིགས་ལ་དྲག་པོའི་བརྟུལ་ཞུགས་ཀྱིས་རྗེས་སུ་འཛིན་པའི་རྟགས་སོ༔ གཞན་ཡང་ཉི་ཟླའི་སྐར་ཁུང་དང་ཆུ་སྲིན་གྱི་ཕྲུ་གུའི་རྒྱལ་མཚན༔ སྦྲུལ་ཆུན་རུས་པའི་དྲྭ་ཕྱེད་དང་བཅས་པ་འཇིགས་པའི་རྒྱན་སྣ་ཚོགས་སུ་སྣང་བ་ནི་ཐབས་སྣ་ཚོགས་ཀྱིས་གདུལ་བྱ་ཐར་ལམ་དུ་འགོད་པའི་རྟགས་སོ༔ དཀྱིལ་འཁོར་གྱི་ནང་དུ་ཀླུ་བརྒྱད་ཀྱི་ཀ་གདན་བྱས་པ་ནི་གཏི་མུག་ལས་གྱུར་པའི་རྟོག་པ་རྣམས་མ་སྤང་གནས་སུ་དག་པའི་རྟགས་སོ༔ ལྷ་བརྒྱད་ཀྱི་ཀ་བ་བྱས་པ་ནི་ང་རྒྱལ་ལས་གྱུར་པའི་རྟོག་པ་རྣམས་མ་སྤང་གནས་སུ་དག་པའི་རྟགས་སོ༔ གཟའ་བརྒྱད་ཀྱི་ཀ་ཞུ་བྱས་པ་ནི་ཞེ་སྡང་ལས་གྱུར་པའི་རྟོག་པ་རྣམས་མ་སྤང་གནས་སུ་དག་པའི་རྟགས་སོ༔ རྒྱུ་སྐར་ཉེར་བརྒྱད་ཀྱི་དྲལ་ཕྱམ་དུ་བྱས་པ་ནི་ཉེ་བའི་ཉོན་མོངས་པའི་རྟོག་པ་ཐམས་ཅད་རང་བཞིན་ཤེས་པ་ཙམ་གྱིས་རང་སར་དུ་གྲོལ་བའི་རྟགས་སོ༔ དཀྱིལ་འཁོར་གྱི་དབུས་སུ་གྲུ་གསུམ་ནག་པོ་ཐོད་པའི་ར་བ་སུམ་རིམ་དང་བཅས་པའི་སྟེང་དུ་པདྨ་དང་ཟླ་ཉི་ལྷ་ཆེན་ཕོ་མོ་ཁ་སྦུབ་དང་གན་རྐྱལ་དུ་བསྣོལ་བ་ནི་དུག་གསུམ་གྱི་རྟོག་པ་ལམ་དུ་ཁྱེར་བས་གཟུང་འཛིན་རྩ་བ་ནས་གཅོད་པའི་རྟགས་སོ༔ དེའི་ཕྱི་རོལ་དུ་འཁོར་ལོ་རྩིབས་བཞིར་བྱུང་བ་ནི་གཟུང་འཛིན་ལས་གྱུར་པའི་རྟོག་པས་ལུས་དང་ངག་དང་ཡིད་དང་ཀུན་གཞིའི་རྣམ་པར་ཤེས་པ་སྟེ་འཁྲུལ་བའི་སྒོ་བཞི་རྩད་ནས་གཅོད་པའི་རྟགས་སོ༔ དེའི་ཕྱི་རོལ་དུ་འཁོར་ལོ་རྩིབས་བཅུར་བྱུང་བ་ནི་ཁོང་ཁྲོ་ལ་སོགས་པའི་མི་དགེ་བ་བཅུའི་རྒྱུ་རུ་གྱུར་པའི་ཉོན་མོངས་པའི་ཡིད་གནས་སུ་དག་པའི་རྟགས་སོ༔ དེའི་ཕྱི་རོལ་དུ་འཁོར་ལོ་རྩིབས་བཅུ་དྲུག་ཏུ་བྱུང་བ་ནི་ཉོན་ཡིད་ལས་གྱུར་པའི་སྒོ་ལྔའི་བག་ཆགས་རྟེན་བརྟེན་པ་དང་བཅས་པ་གནས་སུ་དག་པའི་རྟགས་སོ༔ དེ་ནས་དཀྱིལ་འཁོར་གྱི་ལྷའི་བརྡ་དོན་བཤད་པ་ནི༔ ཧོ༔ དཀྱིལ་འཁོར་དབུས་ཀྱི་དཔལ་ཆེན་པོ༔ ཡབ་ཡུམ་ཟུང་དུ་འབྲེལ་བ་ནི༔ ཀུན་གཞིའི་རྣམ་ཤེས་གནས་དག་རྟགས༔ ཀཱི་ལ་རིགས་བཞིར་སྣང་བ་ནི༔ དུག་ལྔའི་རྟོག་པ་གནས་དག་རྟགས༔ ཧཱུྃ་ཀར་ལ་སོགས་ཁྲོ་བོ་བཅུ༔ མི་དགེ་བཅུ་པོ་གནས་དག་རྟགས༔ སྒྲ་འབྱིན་ལ་སོགས་ཁྲོ་མོ་བཅུ༔ ཕ་རོལ་ཕྱིན་བཅུ་མཐར་ཕྱིན་རྟགས༔ ཟ་གསོད་ཁྲ་ཐབས་ཉི་ཤུ་ནི༔ ཉེ་ཉོན་ཉི་ཤུ་གནས་དག་རྟགས༔ དབང་ཕྱུག་ཉི་ཤུ་རྩ་བརྒྱད་ནི༔ ཉོན་མོངས་ཕྲ་རགས་གནས་དག་རྟགས༔ ཕོ་ཉ་དམ་ཅན་བཅུ་དྲུག་ནི༔ འཁྲུལ་རྟོག་མ་ལུས་གནས་དག་རྟགས༔ ཚད་མེད་སྒོ་མ་རྣམ་བཞི་ནི༔ འཁྲུལ་བའི་སྒོ་བཞི་གནས་དག་རྟགས༔ གཞན་ཡང་མཁའ་འགྲོ་སུམ་ཅུ་གཉིས༔ སྤྲུལ་དང་ཡང་སྤྲུལ་བྱེ་བ་འབུམ༔ ཞིང་གི་རྡུལ་སྙེད་སྣང་བ་ནི༔ ཉོན་མོངས་ཉེ་བའི་ཉོན་མོངས་པ༔ འཁྲུལ་དང་ཉིང་འཁྲུལ་བག་ཆགས་བཅས༔ ཡེ་ནས་གྲུབ་པ་མེད་པ་ལ༔ རྨི་ལམ་སྒྱུ་མའི་ཚུལ་སྣང་ཡང༔ གསང་ཆེན་ཐབས་ལམ་ཟབ་མོ་ཡིས༔ སྐད་ཅིག་ཉིད་ལ་གནས་དག་རྟགས༔ ཅེས་པས་སློབ་བུའི་རྟོག་པ་ཀུན༔ སྐུ་དང་ཡེ་ཤེས་རང་བཞིན་དུ༔ འབྲས་བུ་མངོན་དུ་བྱས་པ་ཡི༔ བརྡ་རྟགས་འབྲེལ་བའི་ངོ་སྤྲོད་བྱ༔ དེ་ནས་དབང་གི་དངོས་གཞི་ལ༔ འཇུག་ཕྱིར་རིན་ཆེན་མཎྚལ་ཕུལ༔ རྩེ་གཅིག་གསོལ་བ་འདི་བཞིན་གདབ༔ ཧོ༔ མ་རིག་ལོག་རྟོག་ལུས་དང་ངག་ཡིད་སེམས༔ མཐའ་མེད་འཁོར་བར་འཁྱམས་པའི་རྩ་བ་སྟེ༔ དོན་དམ་རྒྱལ་བའི་སྐུ་གསུང་ཐུགས་མཆོག་དང༔ ཡེ་ནས་འདུ་འབྲལ་མེད་པའི་དོན་སྟོན་ཕྱིར༔ བླ་མེད་གསང་ཆེན་ཕུར་པའི་དཀྱིལ་འཁོར་དུ༔ སྐུ་གསུང་ཐུགས་ཀྱི་དབང་མཆོག་བསྐུར་དུ་གསོལ༔ ཞེས་པས་ལན་གསུམ་གསོལ་བ་འདེབས༔ སློབ་དཔོན་གཙོ་བོའི་ང་རྒྱལ་གྱིས༔ དབྱིངས་ནས་དབང་ལྷ་སྤྱན་དྲངས་ཏེཿ མཆོད་བསྟོད་སློབ་མ་རྗེས་འཛིན་པའི༔ གསོལ་བཏབ་བུམ་དབང་འདི་བཞིན་བསྐུར༔ ཧོ༔ ཕྱི་སྣོད་རྣམ་དག་བུམ་པ་ལྷ་ཡི་ཞིང༔ ནང་བཅུད་ཡོངས་གྲོལ་སྐུ་གསུམ་འདུ་འབྲལ་མེད༔ ལུས་སྒྲིབ་དག་ཕྱིར་ཁྱོད་ལ་དབང་བསྐུར་བས༔ བསྐྱེད་རིམ་སྐུ་ཡི་དབང་མཆོག་ཐོབ་པ་དང༔ དཔལ་ཆེན་རྡོ་རྗེ་གཞོན་ནུའི་སྐུར་འགྲུབ་ནས༔ སྤྲུལ་པ་སྐུ་ཡི་དབང་མཆོག་ཐོབ་པར་ཤོག༔ རྩ་སྔགས་ཤམ་བུར་འདི་བཞིན་བརྗོད༔ ཀ་ལ་ཤ་ཀཱ་ཡ་ཨ་བྷི་ཥིཉྩ་ཨོཾ༔ བསྐྱེད་རིམ་འབོག་ཅིང་བརྡ་དོན་བཤད༔ དམ་ཚིག་སྐུ་ཡི་གསལ་སྣང་དང༔ འབྲལ་མེད་ལུས་ཀྱི་མི་དགེ་སྤངས༔ དེ་དང་རྗེས་འབྲེལ་ལྷ་རྣམས་ཀྱི༔ སྐུ་ཡི་དབང་མཆོག་བསྐུར་བ་ལ༔ དང་པོ་གཙོ་བོ་ཡབ་ཡུམ་སྐུ༔ མེ་ལོང་ངོས་བསྟན་དག་དྲན་དང༔ སློབ་མའི་མགོར་བཞག་འདི་སྐད་དོ༔ ཧཱུྃ༔ འཁོར་འདས་ཀུན་གྱི་སྤྱི་དཔལ་ཐོག་མའི་མགོན༔ ཁྲག་འཐུང་གཙོ་བོ་བཛྲ་ཀཱི་ལ་ཡ༔ གཉིས་མེད་ཡུམ་ཆེན་འཁོར་ལོ་རྒྱས་འདེབས་མ༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ བག་ཆགས་སྣ་ཚོགས་རྟེན་གྱུར་ཀུན་གཞི་དང༔ གསལ་ལ་མི་རྟོག་ཀུན་གཞིའི་རྣམ་པར་ཤེས༔ གནས་སུ་དག་ནས་གྲོལ་འཁྲུལ་ལས་འདས་པའི༔ རང་རིག་ཡེ་ཤེས་མངོན་དུ་འགྱུར་བར་ཤོག༔ གཙོ་བོའི་སྔགས་ཤམ་ཀཱ་ཡ་དང༔ ཨ་བྷི་ཥིཉྩ་ཧཱུྃ་ཞེས་བརྗོད༔ ཤར་གྱི་སྲས་མཆོག་ཀཱི་ལ་ཡའི༔ སྐུ་གཟུགས་མགོར་བཞག་འདི་སྐད་བརྗོད༔ ཧཱུྃ༔ འགྲོ་བའི་སེམས་ཀྱི་རྟོག་ཚོགས་ཚར་གཅོད་པའི༔ རྒྱལ་ཀུན་རྟོག་བྲལ་ཐུགས་ཀྱི་ཡེ་ཤེས་ལས༔ ཞེ་སྡང་གདོན་འདུལ་བཛྲ་ཀཱི་ལ་ཡ༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ སེམས་ཀྱི་འཁྲུལ་བའི་རྟོག་པ་གནས་དག་ནས༔ མཁྱེན་དང་བརྩེ་བའི་ཡེ་ཤེས་མངོན་གྱུར་ཤོག༔ ཨོཾ་བཛྲ་ཀྲོ་ཏ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ལྷོ་ཡི་སྲས་མཆོག་ཀཱི་ལ་ཡའི༔ སྐུ་གཟུགས་མགོར་བཞག་འདི་སྐད་བརྗོད༔ ཧཱུྃ༔ འགྲོ་དྲུག་ལུས་ཀྱི་བྱ་བྱེད་ཚར་གཅོད་པའི༔ རྒྱལ་ཀུན་འདོད་འབྱུང་ཡོན་ཏན་ཆོ་འཕྲུལ་ལས༔ ང་རྒྱལ་གདོན་འདུལ་རཏྣ་ཀཱི་ལ་ཡ༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ འཁྲུལ་རྟོག་ལུས་ཀྱི་བྱ་བྱེད་གནས་དག་ནས༔ འགྲོ་ཀུན་ཕན་བདེའི་གཞི་རུ་འགྱུར་བར་ཤོག༔ ཨོཾ་བཛྲ་ཀྲོ་ཏ་རཏྣ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ ནུབ་ཀྱི་སྲས་མཆོག་ཀཱི་ལ་ཡའི༔ སྐུ་གཟུགས་མགོར་བཞག་འདི་སྐད་བརྗོད༔ ཧཱུྃ༔ འགྲོ་དྲུག་འཁྲུལ་ངག་ཉོན་མོངས་ཚར་གཅོད་པའི༔ རྒྱལ་ཀུན་ཚངས་དབྱངས་གསུང་གི་བདག་ཉིད་མཆོག༔ འདོད་ཆགས་གདོན་འདུལ་པདྨ་ཀཱི་ལ་ཡ༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ ཉོན་མོངས་མི་དགེའི་སྒྲ་གདངས་གནས་དག་ནས༔ གཞན་ཕན་ཆོས་ཀྱི་གསུང་དབྱངས་ཐོབ་པར་ཤོག༔ ཨོཾ་བཛྲ་ཀྲོ་ཏ་པདྨ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ བྱང་གི་སྲས་མཆོག་ཀཱི་ལ་ཡའི༔ སྐུ་གཟུགས་མགོར་བཞག་འདི་སྐད་བརྗོད༔ ཧཱུྃ༔ འགྲོ་དྲུག་སྒོ་ལྔའི་རྣམ་ཤེས་ཚར་བཅད་ནས༔ ཡེ་ཤེས་ལྔ་ལྡན་སྤྲུལ་པའི་རང་གཟུགས་ལས༔ ཕྲག་དོག་གདོན་འདུལ་ཀརྨ་ཀཱི་ལ་ཡ༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ ཡུལ་ལྔར་འཛིན་པའི་འཁྲུལ་རྟོག་གནས་དག་ནས༔ ཡེ་ཤེས་ལྔ་ཡི་འགྲོ་དོན་མཐར་ཕྱིན་ཤོག༔ ཨོཾ་བཛྲ་ཀྲོ་ཏ་ཀརྨ་ཀཱི་ལི་ཀཱི་ལ་ཡ་ཧཱུྃ་ཕཊ༔ ཨ་བྷི་ཥིཉྩ་ཧཱུྃ༔ དེ་ནས་ཁྲོ་བཅུ་ཁྲ་ཐབས་ཀྱི༔ དབང་མཆོག་བསྐུར་བ་འདི་བཞིན་ནོ༔ སྟེང་ཕྱོགས་ཁྲོ་བོ་ཧཱུྃ་ཀཱ་རའི༔ སྐུ་གཟུགས་སློབ་བུའི་སྤྱི་བོར་བཞག༔ ཧཱུྃ༔ སྟེང་གདོན་ཉི་ཟླ་གཟའ་སྐར་ཚར་གཅོད་པའི༔ སྲོག་གཅོད་སྐྱོན་སྤངས་ཁྲོ་ཆེན་ཧཱུྃ་ཀཱ་ར༔ བཟོད་པའི་ཕར་ཕྱིན་སྒྲ་འབྱིན་མ་དང་འཁྲིལ༔ ཐབས་ཤེས་ཟ་གསོད་ཁྲ་ཐབས་སྤྲུལ་པར་བཅས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ ཉི་ཟླ་གཟའ་སྐར་གདོན་ལས་རྣམ་རྒྱལ་ནས༔ ཁྲོ་ཆེན་སྐུ་གསུང་ཐུགས་དང་གཉིས་མེད་ཤོག༔ ཨོཾ་བཛྲ་ཀྲོ་ཏ་ཧཱུྃ་ཀཱ་ར་ཧཱུྃ༔ གརྫ་གརྫ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ ཤར་ཕྱོགས་ཁྲོ་བོ་རྣམ་རྒྱལ་གྱི༔ སྐུ་གཟུགས་སློབ་བུའི་སྤྱི་བོར་བཞག༔ ཧཱུྃ༔ ཤར་ཕྱོགས་དྲི་ཟ་ཕོ་མོ་ཚར་གཅོད་པའི༔ རྐུ་ཕྲོག་སྐྱོན་སྤངས་ཁྲོ་ཆེན་རྣམ་པར་རྒྱལ༔ སྦྱིན་པའི་ཕར་ཕྱིན་སྙེམ་མ་ཡུམ་དང་འཁྲིལ༔ ཐབས་ཤེས་ཟ་གསོད་ཁྲ་ཐབས་སྤྲུལ་པར་བཅས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ ཤར་ཕྱོགས་དྲི་ཟའི་གདོན་ལས་རྣམ་རྒྱལ་ནས༔ ཁྲོ་ཆེན་སྐུ་གསུང་ཐུགས་དང་གཉིས་མེད་ཤོག༔ ཨོཾ་བཛྲ་ཀྲོ་ཏ་བཱི་ཛ་ཡ་ཧཱུྃ༔ ཧ་ན་ཧ་ན་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ ལྷོ་ཕྱོགས་ཁྲོ་བོ་གཤིན་རྗེ་གཤེད༔ སྐུ་གཟུགས་སློབ་བུའི་སྤྱི་བོར་བཞག༔ ཧཱུྃ༔ ལྷོ་གདོན་གཤིན་རྗེ་ཕོ་མོ་ཚར་གཅོད་པའི༔ ལོག་གཡེམ་སྐྱོན་སྤངས་ཁྲོ་ཆེན་གཤིན་རྗེ་གཤེད༔ ཚུལ་ཁྲིམས་ཕར་ཕྱིན་དུར་ཁྲོད་བདག་མོ་འཁྲིལ༔ ཐབས་ཤེས་ཟ་གསོད་ཁྲ་ཐབས་སྤྲུལ་པར་བཅས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ ལྷོ་ཕྱོགས་གཤིན་རྗེའི་གདོན་ཚོགས་ཚར་གཅོད་པའི༔ ཁྲོ་ཆེན་སྐུ་གསུང་ཐུགས་དང་གཉིས་མེད་ཤོག༔ ཨོཾ་བཛྲ་ཀྲོ་ཏ་ཡ་མནྟ་ཀ་ཧཱུྃ༔ པ་ཙ་པ་ཙ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ ནུབ་ཕྱོགས་ཁྲོ་བོ་རྟ་མཆོག་གི༔ སྐུ་གཟུགས་སློབ་བུའི་སྤྱི་བོར་བཞག༔ ཧཱུྃ༔ ནུབ་ཕྱོགས་ཀླུ་དབང་ཕོ་མོ་ཚར་གཅོད་པའི༔ རྫུན་གྱི་སྐྱོན་སྤངས་ཁྲོ་ཆེན་རྟ་མཆོག་རྒྱལ༔ སྨོན་ལམ་ཕར་ཕྱིན་གཏུམ་མོ་ཡུམ་དང་འཁྲིལ༔ ཐབས་ཤེས་ཟ་གསོད་ཁྲ་ཐབས་སྤྲུལ་པར་བཅས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ ནུབ་ཕྱོགས་ཀླུ་གདོན་གཡུལ་ལས་རྣམ་རྒྱལ་ནས༔ ཁྲོ་ཆེན་སྐུ་གསུང་ཐུགས་དང་གཉིས་མེད་ཤོག༔ ཨོཾ་བཛྲ་ཀྲོ་ཏ་ཧྱ་གྷྲྀ་ཝ་ཧཱུྃ༔ ཧུ་ལུ་ཧུ་ལུ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ བྱང་ཕྱོགས་ཁྲོ་བོ་བདུད་རྩི་འཁྱིལ༔ སྐུ་གཟུགས་སློབ་བུའི་སྤྱི་བོར་བཞག༔ ཧཱུྃ༔ བྱང་ཕྱོགས་གནོད་སྦྱིན་ཕོ་མོ་ཚར་གཅོད་པའི༔ ཕྲ་མའི་སྐྱོན་སྤངས་ཁྲོ་ཆེན་བདུད་རྩི་འཁྱིལ༔ ཐབས་ཀྱི་ཕར་ཕྱིན་རླུང་འབྱིན་མ་དང་འཁྲིལ༔ ཐབས་ཤེས་ཟ་གསོད་ཁྲ་ཐབས་སྤྲུལ་པར་བཅས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ བྱང་ཕྱོགས་གནོད་སྦྱིན་གདོན་ལས་རྣམ་རྒྱལ་ནས༔ ཁྲོ་ཆེན་སྐུ་གསུང་ཐུགས་དང་གཉིས་མེད་ཤོག༔ ཨོཾ་བཛྲ་ཀྲོ་ཏ་ཨ་མྲྀ་ཏ་ཀུཎྚ་ལི་ཧཱུྃ༔ ཚིནྡྷ་ཚིནྡྷ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ ཤར་ལྷོ་ཁྲོ་བོ་དབྱུག་སྔོན་རྒྱལ༔ སྐུ་གཟུགས་སློབ་བུའི་སྤྱི་བོར་བཞག༔ ཧཱུྃ༔ ཤར་ལྷོ་མེ་ལྷ་ཕོ་མོ་ཚར་གཅོད་པའི༔ ཚིག་རྩུབ་སྐྱོན་སྤངས་ཁྲོ་ཆེན་དབྱུག་སྔོན་རྒྱལ༔ སྟོབས་ཀྱི་ཕར་ཕྱིན་སྡེར་མོ་ཡུམ་དང་འཁྲིལ༔ ཐབས་ཤེས་ཟ་གསོད་ཁྲ་ཐབས་སྤྲུལ་པར་བཅས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ ཤར་ལྷོ་མེ་ལྷའི་གདོན་ལས་རྣམ་རྒྱལ་ནས༔ ཁྲོ་ཆེན་སྐུ་གསུང་ཐུགས་དང་གཉིས་མེད་ཤོག༔ ཨོཾ་བཛྲ་ཀྲོ་ཏ་ནི་ལ་ཏནྟྲ་ཧཱུྃ༔ ད་ཧ་ད་ཧ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ ལྷོ་ནུབ་ཁྲོ་བོ་མི་གཡོ་མགོན༔ སྐུ་གཟུགས་སློབ་བུའི་སྤྱི་བོར་བཞག༔ ཧཱུྃ༔ ལྷོ་ནུབ་སྲིན་པོའི་གདོན་ཚོགས་ཚར་གཅོད་པའི༔ ངག་འཁྱལ་སྐྱོན་སྤངས་ཁྲོ་ཆེན་མི་གཡོ་མགོན༔ བརྩོན་འགྲུས་ཕར་ཕྱིན་གཏུན་ཁུང་མ་དང་འཁྲིལ༔ ཐབས་ཤེས་ཟ་གསོད་ཁྲ་ཐབས་སྤྲུལ་པར་བཅས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ ལྷོ་ནུབ་སྲིན་པོའི་གདོན་ལས་རྣམ་རྒྱལ་ནས༔ ཁྲོ་ཆེན་སྐུ་གསུང་ཐུགས་དང་གཉིས་མེད་ཤོག༔ ཨོཾ་བཛྲ་ཀྲོ་ཏ་ཨཱརྱ་ཨ་ཙ་ལ་ཧཱུྃ༔ བྷནྡྷ་བྷནྡྷ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ ནུབ་བྱང་ཁྲོ་བོ་འདོད་པའི་རྒྱལ༔ སྐུ་གཟུགས་སློབ་བུའི་སྤྱི་བོར་བཞག༔ ཧཱུྃ༔ ནུབ་བྱང་རླུང་ལྷའི་གདོན་ཚོགས་ཚར་གཅོད་པའི༔ བརྣབ་སེམས་སྐྱོན་སྤངས་ཁྲོ་ཆེན་འདོད་པའི་རྒྱལ༔ ཡེ་ཤེས་ཕར་ཕྱིན་མདའ་སྙེམ་མ་དང་འཁྲིལ༔ ཐབས་ཤེས་ཟ་གསོད་ཁྲ་ཐབས་སྤྲུལ་པར་བཅས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ ནུབ་བྱང་རླུང་ལྷའི་གདོན་ལས་རྣམ་རྒྱལ་ནས༔ ཁྲོ་ཆེན་སྐུ་གསུང་ཐུགས་དང་གཉིས་མེད་ཤོག༔ ཨོཾ་བཛྲ་ཀྲོ་ཏ་ཨ་པ་ར་ཙིཏྟ་ཧཱུྃ༔ ཏིཥྛ་ཏིཥྛ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ བྱང་ཤར་ཁྲོ་ཆེན་ཁམས་གསུམ་རྒྱལ༔ སྐུ་གཟུགས་སློབ་བུའི་སྤྱི་བོར་བཞག༔ ཧཱུྃ༔ བྱང་ཤར་དབང་ལྡན་གདོན་ཚོགས་ཚར་གཅོད་པའི༔ གནོད་སེམས་སྐྱོན་སྤངས་ཁྲོ་ཆེན་ཁམས་གསུམ་རྒྱལ༔ ཤེས་རབ་ཕར་ཕྱིན་གསོད་བྱེད་ཡུམ་དང་འཁྲིལ༔ ཐབས་ཤེས་ཟ་གསོད་ཁྲ་ཐབས་སྤྲུལ་པར་བཅས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ བྱང་ཤར་དབང་ལྡན་གདོན་ལས་རྣམ་རྒྱལ་ནས༔ ཁྲོ་ཆེན་སྐུ་གསུང་ཐུགས་དང་གཉིས་མེད་ཤོག༔ ཨོཾ་བཛྲ་ཀྲོ་ཏ་ཏྲཻ་ལོ་ཀྱ་བི་ཛ་ཡ་ཧཱུྃ༔ བྷིནྡྷ་བྷིནྡྷ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ འོག་ཕྱོགས་ཁྲོ་བོ་སྟོབས་པོ་ཆེའི༔ སྐུ་གཟུགས་སློབ་བུའི་སྤྱི་བོར་བཞག༔ ཧཱུྃ༔ འོག་ཕྱོགས་ས་བདག་གདོན་ཚོགས་ཚར་གཅོད་པའི༔ ལོག་རྟོག་སྐྱོན་སྤངས་ཁྲོ་ཆེན་སྟོབས་པོ་ཆེ༔ ཡེ་ཤེས་ཕར་ཕྱིན་བསྐུལ་བྱེད་ཡུམ་དང་འཁྲིལ༔ ཐབས་ཤེས་ཟ་གསོད་ཁྲ་ཐབས་སྤྲུལ་པར་བཅས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ འོག་ཕྱོགས་ས་བདག་གདོན་ལས་རྣམ་རྒྱལ་ནས༔ ཁྲོ་ཆེན་སྐུ་གསུང་ཐུགས་དང་གཉིས་མེད་ཤོག༔ ཨོཾ་བཛྲ་ཀྲོ་ཏ་མ་ཧཱ་བྷ་ལ་ཧཱུྃ༔ སྥོ་ཊ་སྥོ་ཊ་ཧཱུྃ་ཕཊ༔ ཀཱ་ཡ་ཨ་བྷི་ཥིཉྩ་ཧཱུྃ༔ ཅེས་པས་ཁྲོ་བཅུ་གནས་བཅུར་བསྐུར༔ ཧཱུྃ་སྒྲ་བརྗོད་ཅིང་ལྟ་བའི་ངང༔ གདོན་བཅུ་འདུལ་བའི་དཔའ་གདེངས་བསྐྱེད༔ དེ་ནས་དཀྱིལ་འཁོར་ཆེན་པོ་ཡི༔ དབང་བསྐུར་མཐའ་རུ་ཕྱིན་པའི་ཕྱིར༔ ཡང་དག་ལྷ་འཁོར་བཅུ་དྲུག་ཀྱང༔ བསྐྱེད་པའི་སྐབས་སུ་ལོགས་ནས་སབ༔ རུ་ལུ་འབྲུ་བརྒྱད་སྔགས་ཀྱིས་སྒྲུབ༔ དམ་ལྡན་སྙིང་འདྲའི་སློབ་བུ་ལ༔ བསྐུར་ཚིག་གཞན་དང་མཐུན་པར་སྦྱར༔ དེ་ནས་ཚད་མེད་པ་བཞིའི་བདག་ཉིད་སྒོ་སྲུང་ཁྲོ་བོ་བཞིའི་དབང་བསྐུར་བ་འདི་ལ་བསམ་པའི་ཁྱད་པར་གདའ། དེ་ནས་སྒོ་སྲུང་རྣམ་པ་བཞིའི༔ ཤར་སྒོའི་བདག་པོའི་དབང་བསྐུར་ནི༔ ཧཱུྃ༔ ཚད་མེད་སྙིང་རྗེ་ཆེན་པོས་ལོག་འདྲེན་ཚོགས༔ འཁོར་བའི་གནས་ནས་འགུགས་པའི་ཕོ་ཉ་བ༔ ཤར་གྱི་སྒོ་བ་ལྕགས་ཀྱུ་ཡུམ་དང་འཁྲིལ༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་ཏ་ཨངྐུ་ཤ་ཛ༔ ཀཱ་ཡ་ཨ་བྷི་ཥིཉྩ་ཧཱུྃ༔ ལྷོ་སྒོའི་བདག་པོའི་དབང་བསྐུར་ནི༔ ཧཱུྃ༔ བྱམས་པ་ཆེན་པོས་འཁོར་བའི་སེམས་ཅན་རྣམས༔ ཡང་དག་ཐར་པའི་གནས་སུ་འཆིང་མཛད་པ༔ ལྷོ་ཡི་སྒོ་བ་ཞགས་པ་ཡུམ་དང་འཁྲིལ༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་ཏ་པཱ་ཤ་ཧཱུྃ༔ ཀཱ་ཡ་ཨ་བྷི་ཥིཉྩ་ཧཱུྃ༔ ནུབ་སྒོའི་བདག་པོའི་དབང་བསྐུར་ནི༔ ཧཱུྃ༔ དགའ་བ་ཆེན་པོས་འཁོར་བའི་སེམས་ཅན་རྣམས༔ ཐབས་ཤེས་སྒྲོག་གིས་མི་གཏོང་སྡོམ་མཛད་པའི༔ ནུས་ཀྱི་སྒོ་བ་ལྕགས་སྒྲོག་ཡུམ་དང་འཁྲིལ༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་ཏ་སྥོ་ཊ་བཾ༔ ཀཱ་ཡ་ཨ་བྷི་ཥིཉྩ་ཧཱུྃ༔ བྱང་སྒོའི་བདག་པོའི་དབང་བསྐུར་ནི༔ ཧཱུྃ༔ རྟོག་བྲལ་བཏང་སྙོམས་ཆེན་པོས་ལོག་རྟོག་འགྲོ༔ སྤྲོས་བྲལ་མཉམ་པའི་ངང་དུ་མྱོས་མཛད་པ༔ བྱང་གི་སྒོ་བ་དྲིལ་བུ་ཡུམ་དང་འཁྲིལ༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཨོཾ་བཛྲ་ཀྲོ་ཏ་གྷནྚེ་ཧོ༔ ཀཱ་ཡ་ཨ་བྷི་ཥིཉྩ་ཧཱུྃ༔ དེ་ནས་བུམ་དབང་མཐའ་རྟེན་བཅས༔ བསྐུར་བས་སློབ་བུའི་ལུས་སྒྲིབ་དག༔ བསྐྱེད་རིམ་སྤྲུལ་སྐུའི་རྒྱལ་སྲིད་ལ༔ མངོན་དུ་འགོད་པའི་ཐབས་ཡིན་ནོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་གསང་བའི་དབང་དོན་དུ༔ མཎྚལ་འབུལ་ཞིང་གསོལ་འདེབས་ནི༔ ཧོ་དཔལ་ཆེན་འདུས་པ་ཁྲག་འཐུང་ཧེ་རུ་ཀ༔ གསང་བའི་རྒྱལ་ཐབས་དབང་འབྱོར་བླ་མ་རྗེ༔ ལུས་ངག་དཀའ་བས་མ་བསྒྲུབ་ཚེ་གཅིག་ལ༔ མངོན་འཚང་རྒྱ་བའི་དབང་མཆོག་བསྐུར་དུ་གསོལ༔ དེ་སྐད་ལན་གསུམ་གསོལ་བཏབ་རྗེས༔ སྔོན་ནས་སྒྲུབ་རྫས་ལྷར་གསལ་ཡང༔ ཡང་གསལ་གདབ་པ་འདི་བཞིན་བྱ༔ བྷནྡྷ་ཕོ་བྲང་གཞལ་ཡས་དབུས༔ རྡོ་རྗེ་གཞོན་ནུ་ཡབ་དང་ཡུམ༔ མཉམ་སྦྱོར་བྱང་སེམས་བདུད་རྩིའི་རྒྱུན༔ སྔགས་ཀྱི་སྒྲ་དང་རླངས་པ་ཁོལ༔ བདེ་སྟོང་ལྟེམ་གྱིས་གང་བར་དམིགས༔ ཧཱུྃ༔ རང་བྱུང་བྷནྡྷ་ཡངས་པའི་སྣོད་མཆོག་ཏུ༔ དཔལ་ཆེན་ཡབ་ཡུམ་སྦྱོར་བའི་བདུད་རྩིའི་རྒྱུན༔ དུག་ལྔ་ཡེ་ཤེས་ལྔ་རུ་བསྒྱུར་བའི་རྫས༔ སྐལ་ལྡན་སྐྱེས་བུའི་ལྕེ་ལ་མྱང་བ་ཡིས༔ གཟུང་འཛིན་རོ་རྐྱང་གཉིས་སུ་རྒྱུ་བའི་རླུང༔ བརྗོད་བྲལ་དྷུ་ཏིའི་སྦུབས་སུ་གནས་དག་ནས༔ ཐ་མལ་ངག་གི་སྒྲིབ་པ་དབྱིངས་སུ་གྲོལ༔ ལྷུན་གྲུབ་ལོངས་སྤྱོད་རྫོགས་པའི་དབང་ཐོབ་ཤོག༔ དེ་ནས་རྩ་སྔགས་ཤམ་བུ་རུ༔ སརྦ་པཉྩ་ཨ་མྲྀ་ཏ་མ་ཧཱ་ཨ་ཡུརྫྙཱ་ན་ཨ་བྷི་ཥིཉྩ་ཧཱུྃ༔ དེ་ནས་དེ་དང་རྗེས་འབྲེལ་དུ༔ འཆད་སྤེལ་ནུས་པའི་སློབ་བུ་ལ༔ སྒྲུབ་ཡིག་ལག་ཏུ་དབང་བསྐུར་ནས༔ ཧཱུྃ༔ རྒྱུད་དང་མན་ངག་ཡང་ཟབ་གདམས་པའི་མཛོད༔ དགོངས་བརྡ་སྙན་རྒྱུད་བཀའ་བབས་ལུང་བསྟན་རྫོགས༔ སྨོན་ལམ་གཏད་རྒྱ་འགྲོ་དོན་དུས་བབས་ནས༔ ལུས་ངག་དཀའ་བས་མ་བསྒྲུབ་དགོངས་པའི་གཏེར༔ ཚེ་གཅིག་སངས་རྒྱས་བསྒྲུབ་པའི་ཡི་གེའི་དབང༔ སྐལ་ལྡན་སྙིང་གི་བུ་མཆོག་ཁྱོད་ལ་སྦྱིན༔ ཁྱོད་ཀྱང་སྣང་ཡུལ་ཞེན་པས་མ་རུལ་བར༔ ཡེ་ནས་སྒོ་གསུམ་སྐུ་གསུམ་རང་བཞིན་ལ༔ རྩ་རླུང་ཐིག་ལེའི་གདམས་པས་གནད་བསྐུལ་ནས༔ གྲུབ་འབྲས་ཚེ་འདིར་དོན་གཉིས་སྒྲུབ་པ་ལ༔ བརྩོན་པ་སྐྱེད་ཅིག་དམ་ཚིག་ས་མ་ཡཱ༔ གླེགས་བམ་མགོར་བཞག་ལག་ཏུ་གཏད༔ དེས་ཀྱང་སྒྲུབ་པའི་དམ་བཅའ་ཕུལ༔ མོས་སློབ་གཞན་ལ་དེ་ལྟ་མིན༔ དེས་ནི་ཐ་མལ་ངག་གི་རླུང༔ གནས་དག་ལོངས་སྐུའི་རྒྱལ་སྲིད་ལ༔ མངོན་དུ་སྒྲུབ་པའི་ཐབས་ཆེན་པོ༔ གསང་བའི་དབང་བསྐུར་ཨི་ཐི་རྒྱ༔ གསུམ་པ་ཤེས་རབ་དབང་བསྐུར་གྱིས༔ རང་སེམས་ལས་སུ་རུང་བའི་ཐབས༔ ཡིད་དངོས་གཏུམ་མོའི་ཕྱག་རྒྱ་གསུམ༔ ཚངས་སྤྱོད་ལྡན་ལ་དང་པོ་སྟེ༔ གྲོལ་ལམ་རྒྱལ་བའི་མཆོག་ཏུ་བསྔགས༔ མཎྚལ་འབུལ་ཞིང་གསོལ་འདེབས་ནི༔ རྗེས་ཟློས་ཚུལ་གྱིས་འདི་སྐད་ཞུ༔ ཀྱེ་མ་རིགས་མཆོག་རྡོ་རྗེ་འཛིན་པ་དགོངས༔ དུག་ལྔ་ཐབས་ཀྱིས་ཟིན་ན་ཡེ་ཤེས་ལྔར༔ ལྕགས་ཁམས་གསེར་འགྱུར་གདམས་པ་ཟབ་མོའི་བཅུད༔ ཤེས་རབ་དབང་གིས་བདག་རྒྱུད་སྨིན་པར་མཛོད༔ བླ་མས་ནུབ་ཀྱི་དྲིལ་བུ་དང༔ གཟུངས་མའི་གཟུགས་བརྙན་ལག་གཡོན་གཏད༔ དམིགས་པས་དཔོན་སློབ་གཉིས་ཀ་ཡི༔ སློབ་བུ་རྡོ་རྗེ་གཞོན་ནུ་ལ༔ དངོས་དང་གཟུགས་བརྙན་མཛའ་ན་མོ༔ འཁོར་ལོ་རྒྱས་འདེབས་ཡུམ་དུ་གསལ༔ མཁའ་གསང་ཕྱག་མཚན་ཟླ་ཉིའི་དབུས༔ ཨེ་ཝཾ་ཡི་གེའི་འཕྲོ་འདུ་ལས༔ མཉམ་སྦྱོར་བདེ་བའི་ཡེ་ཤེས་སྒྲས༔ རྒྱལ་མཆོད་སེམས་ཅན་ལས་སྒྲིབ་སྦྱངས༔ བྱང་སེམས་དཀར་དམར་དབབ་ལྡོག་གིས༔ དགའ་བཞིའི་རྟོག་བྲལ་དོན་ལ་བལྟ༔ འདོད་ཆགས་སོར་རྟོག་ཡེ་ཤེས་ལས༔ ཐ་མལ་སྣང་ཞེན་སྒྲིབ་ཅན་ཡིན༔ རྡོ་རྗེ་བླ་མས་ཚིག་འདིས་བསྐུལ༔ ཨེ་མ་ཧོ༔ ཡུལ་དྲུག་སྣང་བ་ཡུམ་གྱི་རང་བཞིན་ལ༔ རྣམ་ཤེས་ཚོགས་དྲུག་དཔའ་བོས་མཉམ་སྦྱོར་ནས༔ བདེ་གསལ་མི་རྟོག་སྟོང་པའི་ཡེ་ཤེས་ཆ༔ ད་ལྟ་མངོན་སངས་རྒྱས་པའི་ཐབས་ཟབ་མོ༔ བདག་གིས་དབང་བསྐུར་ཁྱོད་ཀྱིས་བརྩོན་པར་གྱིས༔ ཨ་ཧོ་མ་ཧཱ་སུ་ཁ་ཨ་བྷི་ཥིཉྩ་ཧཱུྃ༔ ཆགས་ཅན་ལ་ནི་དངོས་རིག་སྦྱིན༔ བརྟེན་ཚུལ་རྒྱུད་སྡེའི་གནད་ལས་ཤེས༔ དེས་ནི་སེམས་ཀྱི་སྒྲིབ་པ་དག༔ གསལ་སྟོང་ཆོས་སྐུའི་རྒྱལ་སྲིད་ལ༔ དཀའ་ཚེགས་འབད་རྩོལ་མ་ལྟོས་པར༔ རང་དབང་རང་ཐོབ་གདམས་པའོ༔ དེ་ནས་ཚིག་གི་དབང་ལ་ནི༔ སྒྲུབ་རྫས་མི་དགོས་མཉམ་བཞག་ངང༔ དཔོན་སློབ་གཉིས་ཀས་བཞག་པའི་དོན༔ གཉིས་འཛིན་བྲལ་བའི་རང་ཞལ་བལྟ༔ བླ་མས་དབྱངས་ཀྱིས་འདི་སྐད་བརྗོད༔ ཨེ་མ་ཨེ་མ༔ འཁོར་འདས་ཞེས་བྱ་བ་ནི་ངོ་བོ་གཅིག་པ་ལ༔ གཟུང་འཛིན་གྱི་དབང་གིས་ཐ་དད་དུ་སྣང་བའོ༔ ཀུན་གཞི་ནི་ཆོས་ཀྱི་སྐུ་དང་ཐ་མི་དད་ཀྱང་ཤིན་ཏུ་ཕྲ་བ་བག་ཆགས་སྣ་ཚོགས་པས་སེམས་ཅན་གྱི་འཁྲུལ་གཞིར་གྱུར་པའོ༔ ཀུན་གཞིའི་རྣམ་པར་ཤེས་པ་ནི་ལོངས་སྤྱོད་རྫོགས་པའི་ཡེ་ཤེས་དང་ཐ་མི་དད་ཀྱང༔ ཡུལ་ཤེས་པ་ཙམ་གྱི་གསལ་ཆ་དང་ལྡན་པས་གཟུགས་ཁམས་ཀྱི་བག་ཆགས་ཡོད་པའི་རྟེན་དུ་གྱུར་པའོ༔ ཉོན་ཡིད་སྒོ་ལྔའི་རྣམ་ཤེས་དང་བཅས་པ་སངས་རྒྱས་སྤྲུལ་པའི་སྐུ་དང་ཐ་མི་དད་ཀྱང་སྣང་ཡུལ་འཛིན་པས་བཅིང་བས་འགྲོ་དྲུག་གི་བག་ཆགས་སྣ་ཚོགས་ཡོད་པའོ༔ དེའི་ཕྱིར་ན་ཐམས་ཅད་རྟོག་བྲལ༔ མཉམ་ཉིད་བློ་འདས་འཛིན་མེད་གུ་ཡངས་རང་ཤར་རང་གྲོལ་གཏད་མེད་རང་ཡན་ཆེན་པོར་ལྷོད་ཅིག༔ ཅེས་དྲན་བསམ་གྱི་འཕྲོ་འདུ་དང་བྲལ་བའི་ངང་ནས་ངོ་འཕྲོད་པར་བྱའོ༔ ངོ་བོ་ཉིད་སྐུའི་རྒྱལ་སྲིད་ལ༔ དགོད་འདི་ཆོས་སྐུའི་ཁྱད་ཆོས་སྟེ༔ ད་ལྟ་གཞི་ནས་འབྲས་བུ་ནི༔ མངོན་དུ་བྱེད་པའི་ཐབས་མཆོག་གོ༔ དེ་ནས་རྡོ་རྗེ་སློབ་བུ་ལ༔ དཔལ་ཆས་ཡོངས་རྫོགས་སྦྱིན་པ་ལས༔ པདྨ་ཉི་ཟླ་རུ་ཏྲའི་གདན༔ ཚིག་འདིས་དབང་བསྐུར་གསལ་ཡང་གདབ༔ ཧཱུྃ༔ འདོད་ཆགས་རྟོག་པ་མ་སྤང་གེ་སར་སྟེང༔ ཞེ་སྡང་གཟུགས་ཁམས་གནས་དག་ཉི་ཟླའི་གདན༔ སྲིད་རྩེ་གཏི་མུག་ལྷ་ཆེན་ཕོ་མོ་བསྣོལ༔ དཔལ་ཆེན་ཆེ་མཆོག་དཔའ་བའི་གདན་དུ་རོལ༔ རྩ་སྔགས་ཤམ་བུར༔ པདྨ་སུརྱ་ཙནྟྲ་ཏི་ར་བམ་ཨ་བྷི་ཥིཉྩ་ཧཱུྃ༔ བགོ་བའི་གོས་གསུམ་ལུས་ལ་ཀླུབས༔ ཧཱུྃ༔ ཁྲོ་མཆོག་འདུས་པ་བཛྲ་ཀཱི་ལ་ཡ༔ འཇིགས་མཛད་དཔའ་བོ་རིག་པ་འཛིན་ཁྱོད་ལ༔ གླང་ཀོ་མི་ལྤགས་སྟག་ཤམས་འདི་གསོལ་བས༔ ཁམས་གསུམ་དྲེགས་པའི་ཚོགས་རྣམས་ཟིལ་མནན་ནས༔ སྐུ་གསུམ་ཡེ་ཤེས་མངོན་དུ་བྱེད་པར་ཤོག༔ ཧསྟི་ན་ར་བྱ་ཀྲི་ཝསྟྲི་ཨ་བྷི་ཥིཉྩ་ཧཱུྃ༔ བྱུག་པའི་རྫས་ཀྱིས་མངའ་གསོལ་ནི༔ ཧཱུྃ༔ ཐལ་ཆེན་ཚོམ་བུས་བྱད་མ་རྦོད་གཏོང་བཟློག༔ རཀྟའི་ཐིག་ལེས་མ་མོའི་རིམས་ནད་འཇོམས༔ ཞག་གི་ཟོ་རིས་འབྱུང་པོ་ཟིལ་གྱིས་གནོན༔ འཇིགས་མཛད་དཔའ་བོ་ཁྱོད་ལ་མངའ་གསོལ་བས༔ སྲིད་གསུམ་གདུག་པའི་ཚོགས་རྣམས་གཞོམ་པར་ཤོག༔ ཛྭ་ར་རཀྟ་ཀོ་རོ་ཙ་ན་ཨ་བྷི་ཥིཉྩ་ཧཱུྃ༔ གདགས་པའི་རྒྱན་གཉིས་སྦྱིན་པ་ནི༔ ཧཱུྃ༔ ཐོད་སྐམ་དབུ་རྒྱན་རྒྱལ་བས་མངའ་གསོལ་རྟགས༔ མགོ་རློན་དོ་ཤལ་འདུ་བྱེད་གནས་ནས་སྟོང༔ སྦྲུལ་ནག་ཆུན་པོས་ཞེ་སྡང་དབྱིངས་སུ་གྲོལ༔ འཇིགས་མཛད་དཔའ་བོ་ཁྱོད་ལ་མངའ་གསོལ་བས༔ མ་རུང་གདུག་པའི་ཚོགས་རྣམས་འདུལ་བར་ཤོག༔ ཀ་པཱ་ལ་བྷནྡྷ་མུ་ཀུ་ཊ་ནཱ་ག་པཉྩ་ཨ་བྷི་ཥིཉྩ་ཧཱུྃ༔ གཞན་ཡང་མེ་དཔུང་གཤོག་པ་སོགས༔ དཔལ་ཆས་རྣམས་ཀྱི་དབང་བསྐུར་ཏེ༔ ཧཱུྃ༔ རྡོ་རྗེའི་གཤོག་པ་དུས་གསུམ་འཕོ་འགྱུར་མེད༔ རིན་ཆེན་གཤོག་པ་དགོས་འདོད་རེ་བ་སྐོང༔ ཡེ་ཤེས་མེ་དཔུང་འཁོར་བའི་སྡུག་བསྔལ་བསྲེག༔ ཚད་མེད་མཆེ་བས་བདུད་བཞི་རྩད་ནས་གཅོད༔ བསེ་ཁྲབ་དམར་པོས་ཁམས་གསུམ་དབང་དུ་སྡུད༔ མི་སྐྲའི་ལན་ཚར་སྲིད་གསུམ་འབྱུང་པོ་འདུལ༔ འཇིགས་མཛད་དཔའ་བོ་ཁྱོད་ལ་མངའ་གསོལ་བས༔ ལས་ཉོན་འཁྲུལ་བའི་གདོན་ཚོགས་ཚར་གཅོད་ཤོག༔ ཨོཾ་བཛྲ་རཏྣ་ག་རུ་ཌ་ཛྭ་ལ་མེ་གྷ་ཝརྟི་ཨ་བྷི་ཥིཉྩ་ཧཱུྃ༔ རུས་རྒྱན་དྲུག་གི་དབང་བསྐུར་ནས༔ ཧཱུྃ༔ ཕྱག་ཞབས་གདུ་བུ་ཕྲེང་བ་དོ་ཤལ་དང༔ སྙན་རྒྱན་དྲྭ་ཕྱེད་འཕྱང་འཕྲུལ་མཆོད་ཕྱིར་ཐོགས༔ ཕ་རོལ་ཕྱིན་དྲུག་རྫོགས་པའི་རུས་རྒྱན་འདིས༔ འཇིགས་མཛད་དཔའ་བོ་ཁྱོད་ལ་དབང་བསྐུར་བས༔ འགྲོ་དྲུག་སྡུག་བསྔལ་གནས་ནས་འཇོམས་པར་ཤོག༔ རྩ་སྔགས་ཤམ་དུ༔ ཀིང་ནི་རི་ཏི་ཨ་ལཾ་ཀ་ཨ་བྷི་ཥིཉྩ་ཧཱུྃ༔ སློབ་བུ་གཙོ་བོའི་སྐུར་གསལ་ལ༔ ཕྱག་མཚན་རྟགས་ཀྱིས་མངའ་གསོལ་ནི༔ ཧཱུྃ༔ རྡོ་རྗེ་རྩེ་དགུས་ས་དགུའི་རྟོག་པ་འཇོམས༔ གྲི་གུག་འབར་བས་གཟུང་འཛིན་རྩད་ནས་གཅོད༔ ཁ་ཊཱཾ་རྩེ་གསུམ་དུག་གསུམ་གདོན་གསུམ་འདུལ༔ ཐོད་ཁྲག་འབར་བས་རྒྱུ་དྲུག་གནས་ནས་སྟོང༔ གནམ་ལྕགས་ཕུར་བས་དམ་སྲིའི་ཀླད་པ་འགེམ༔ འཇིགས་མཛད་དཔའ་བོ་ཁྱོད་ལ་མངའ་གསོལ་བས༔ ཕྱོགས་སྐྱོང་བཅུ་དང་རྒྱ་འདྲེ་འགོང་པོའི་གདོན༔ དྲག་ཤུལ་སྟོབས་ཀྱིས་འདུལ་བའི་དབང་ཐོབ་ཤོག༔ རྩ་སྔགས་ཤམ་བུར་ཨ་བྷི་ཥིཉྩ་ཧཱུྃ༔ དེ་ནས་བྱང་གི་ཕུར་སྒྲོམ་ནི༔ བླང་ནས་སློབ་བུའི་ལག་ཏུ་གཏད༔ ཧཱུྃ༔ མི་མོ་ཆེན་མོ་སྲིན་མོ་གཡག་གདོང་སོགས༔ རུ་ཏྲའི་སྲིང་མོ་སླས་དང་བྱན་མོར་བཅས༔ སྔོན་ཚེ་དཔལ་ཆེན་སྤྱན་སྔར་ཞལ་བཞེས་བཞིན༔ ཕུར་པ་སྒྲུབ་པའི་རིག་པ་འཛིན་འདི་ལ༔ ལས་བཞིའི་ཕྲིན་ལས་སྒྲུབ་པའི་མངག་གཞུག་གྱིས༔ དབང་ཕྱུག་ཉེར་བརྒྱ་སྔགས་ཤམ་དུ༔ ཨ་བྷི་ཥིཉྩ་ཧཱུྃ༔ དེ་ནས་ཕུར་སྲུང་བཅུ་དྲུག་གི༔ གཏོར་མ་སྨན་དང་རཀྟ་བྲན༔ ༼དཔལ་འབར་འཛུགས། མཆན།༽ དམ་ཅན་ཚོགས་རྣམས་སྤྱན་དྲངས་ཏེ༔ བྷ་ལིང་ཏ་དང་དབྱེར་མེད་བསམ༔ སློབ་བུའི་མགོར་བཞག་འདི་སྐད་བརྗོད༔ ཧཱུྃ་ཧཱུྃ༔ སྔོན་ཚེ་རྡོ་རྗེ་གཞོན་ནུའི་སྤྱན་སྔ་རུ༔ སྒྲུབ་པོའི་རྣལ་འབྱོར་སྐྱོང་བར་ཞལ་བཞེས་པའི༔ ཤྭ་ན་མུ་ཁ་ཆེན་མོ་མཆེད་སྡེ་བཞི༔ བདུད་གཟའ་ཀླུ་བཙན་བུ་མོ་ས་བདག་བཞི༔ འབྱུང་བཞིའི་ཁམས་ལ་དབང་བསྒྱུར་རེ་ཏི་བཞི༔ ཟ་གསོད་འཆིང་འདེབས་སྒྲོལ་གིང་སྐྱེས་བུ་བཞི༔ དམ་ལྡན་རྣལ་འབྱོར་སྒྲུབ་པོའི་གྲོགས་མཛོད་ལ༔ དམ་མེད་ལོག་འདྲེན་འབྱུང་པོ་ཆམ་ལ་ཕོབ༔ དམ་ཚིག་བཀའ་ལས་མ་འདའ་ས་མ་ཡཱ༔ འདས་ན་ཁྱོད་ཀྱང་བརླག་པར་གདོན་མི་ཟ༔ བཛྲ་ས་མ་ཡཱ་རཀྵན་ཏུ་ཨ་བྷི་ཥིཉྩ་ཧཱུྃ༔ གཞན་ཡང་བཀའ་བགོ་ཕྲིན་བཅོལ་བྱ༔ དམ་བསྲེས་སློབ་བུར་བདུད་རྩི་བྱིན༔ ས་མ་ཡཱ༔ མཐའ་རྟེན་བསྒྲལ་དབང་བསྐུར་བ་ནི༔ རུ་པ་བྱ་ཞིང་དགྲ་བགེགས་ནི༔ གཟུགས་ལ་དགུགས་ཤིང་བསྒྲལ་ལས་ཀྱི༔ རིམ་པ་བློ་མཐུན་ཕུར་བས་གདབས༔ སློབ་བུས་གསལ་བ་གསུམ་ལྡན་གྱིས༔ དྲགས་སྔགས་སོ་ལྔའི་མཚོན་ཐུན་གདབ༔ ཤ་ཁྲག་བདུད་རྩིར་བྱིན་རླབས་ཏེ༔ མདུན་བསྐྱེད་སྒྲུབ་གཏོར་ལྷར་གསལ་ལ༔ དབུལ་ཞིང་ལྷག་མ་རང་གིས་མྱང༔ ཆད་ཐོ་བསྒྲགས་ཤིང་བསྟན་མ་སྐྱོང༔ རྗེས་ཀྱི་ལས་རིམ་སྤྱི་ལྟར་བྱ༔ བླ་མར་གཏང་རག་མཎྚལ་དབུལ༔ དམ་ཚིག་ཁས་བླང་དགེ་བ་བསྔོ༔ ཤིས་བརྗོད་ཚོགས་ཀྱི་དགའ་སྟོན་བྱ༔ ས་མ་ཡཱ༔ ཨེ་མ་ཤིན་ཏུ་ཡང་ཟབ་པའི༔ ལྷ་བསྒོམ་སྔགས་བཟླས་ཕྲིན་ལས་སྒྲུབ༔ ཀུན་གྱི་རྩ་བ་དབང་ལ་རག༔ དབང་དོན་ཡེ་ཤེས་ངོ་འཕྲོད་ཚེ༔ ལམ་མཆོག་གཞན་ལ་མ་ལྟོས་པར༔ རྟེན་འདིར་གྲོལ་བ་གདོན་མི་ཟ༔ རྒྱལ་བ་དགོངས་རིག་རྣ་བར་བརྒྱུད༔ བཀའ་བབས་ལུང་བསྟན་སྨོན་ལམ་ཐོབ༔ འབྱུང་བ་ཕལ་གྱི་བཅུད་ལས་ལྷག༔ དགོངས་གཏེར་ཟབ་མོ་ཌཱཀྐིའི་སྲོག༔ གསང་སྔགས་མོས་གུས་ཅན་རྣམས་ཀྱི༔ སྤྱོད་ཡུལ་ཡིན་ཕྱིར་དག་སྣང་ཆོས༔ བདེ་གཤེགས་རྒྱལ་བའི་བཀའ་ཡིས་གནང༔ ལྷ་དང་བླ་མས་ལུང་དུ་བསྟན༔ ཤེས་རབ་ཅན་གྱི་རིག་པས་འགྲུབ༔ རྩོད་ལྡན་རྒུད་པ་སེལ་བའི་གཏེར༔ ཕུར་སྲུང་དམ་ཅན་གཉེར་ཁ་གྱིས༔ ལས་འཕྲོ་ལྡན་པའི་དཔལ་དུ་ཤོག༔ གུ་ཧྱ༔ སྤྲང་བན་ལུང་རིག་གླིང་པ་ཡིས༔ དག་སྣང་ཉམས་ཀྱི་སྣང་བ་རུ༔ ཤར་བཞིན་ཐོལ་བྱུང་ཚུལ་དུ་སྨྲས༔ སྐལ་ལྡན་གཞན་ལ་ཕན་པའི་མིང༔ ལུང་ཟིན་སྐྱེས་བུས་ཡི་གེར་ཕབ༔ དགེ་བས་བདག་དང་འགྲོ་བ་ཀུན༔ བར་ཆད་བདུད་བཞིའི་གཡུལ་ལས་རྒྱལ༔ དཔལ་ཆེན་རྡོ་རྗེ་གཞོན་ནུ་ཡི༔ གོ་འཕང་ཐོབ་པའི་རྒྱུར་གྱུར་ཅིག༔ སརྦ་ཛ་ཡནྟུ༔