སྒྲོལ་མའི་ཐུགས་སྒྲུབ་འཇིགས་པ་བརྒྱད་སྐྱོབ།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ སྒྲོལ་མའི་ཐུགས་སྒྲུབ་འཇིགས་པ་བརྒྱད་སྐྱོབ་བཞུགས་སོ༔

ལྷ་དང་དྲང་སྲོང་རིག་པ་འཛིན༔ ཀུན་འདུས་རྗེ་བཙུན་འཕགས་མར་འདུད༔ སྤྲོས་མེད་གང་ཟག་ལུས་དཀྱིལ་དུ༔ སྒྲོལ་མ་འཇིགས་པ་བརྒྱད་སྐྱོབ་བསྟན༔ རང་རིག་གདོད་ནས་བྱང་ཆུབ་སེམས༔ ཚོགས་བརྒྱད་རང་གྲོལ་འཁོར་ཡིན་ལ༔ ཡོ་བྱད་ལོངས་སྤྱོད་མཆོད་པའི་རྫས༔ སྒྲ་གྲགས་སྔགས་ལ་དྲན་རྟོག་ཐུགས༔ ཡེ་ནས་འདུ་འབྲལ་མེད་པའི་ཕྱིར༔ ཡེངས་མེད་རྒྱུན་དུ་འདི་ལྟར་འབད༔ དེ་ཡང་སྔོན་འགྲོ་དངོས་གཞི་རྗེས༔ དང་པོ་སྐྱབས་སེམས་ཡན་ལག་བདུན༔ ཨེ་མ་ཧོ༔ ངོ་མཚར་རིག་པ་རང་བྱུང་དཀོན་མཆོག་གསུམ༔ རང་ངོ་ཤེས་པའི་ངང་ནས་སྐྱབས་སུ་མཆི༔ མཐའ་མེད་ལོག་རྟོག་འཁྲུལ་བའི་སེམས་ཅན་རྣམས༔ རྫོགས་སངས་རྒྱས་ཕྱིར་འཕགས་མའི་བསྒོམ་བཟླས་བྱ༔ སྒོ་གསུམ་ཆོས་དང་མཐུན་པའི་གུས་ཕྱག་འཚལ༔ དངོས་འཛིན་སྣང་སྲིད་མཆོད་པའི་ཕྱག་རྒྱར་འབུལ༔ ཉེས་ཀུན་སྐྱེ་འགག་བྲལ་བའི་ཀློང་དུ་བཤགས༔ སྐྱེ་འཕགས་དགེ་ལ་རྟག་ཏུ་རྗེས་ཡི་རང་༔ ཆོས་སྤྱོད་རྒྱུན་ཆད་མེད་པའི་འཁོར་ལོ་བསྐོར༔ རྒྱལ་ཀུན་འགྲོ་དོན་མི་གཡེལ་བཞུགས་གསོལ་འདེབས༔ དགེ་དེས་འགྲོ་ཀུན་གདོད་མའི་གཞིར་གྲོལ་ཕྱིར༔ དོན་དམ་འདུ་འབྲལ་མེད་པའི་ཀློང་དུ་བསྔོ༔ གཉིས་པ་ལྷ་སྔགས་ཏིང་འཛིན་ནི༔ ཏཱཾཿ འཁོར་འདས་བློ་བྲལ་ཆོས་དབྱིངས་སྟོང་པའི་ངང་༔ ཕྱི་སྣོད་གྲོང་ཁྱེར་གཡུ་ལོ་བཀོད་པའི་ཞིང་༔ བཀོད་ལེགས་ལྟ་ན་སྡུག་པའི་ཞིང་གི་དབུས༔ རང་བྱུང་སྐྱོན་བྲལ་པདྨ་ཟླ་བའི་སྟེང་༔ ཏཱཾཿཡིག་ལྗང་གུའི་འོད་ཀྱིས་འཁོར་འདས་ཁྱབ༔ འཕགས་མཆོད་བྱིན་རླབས་ཀུན་བསྡུས་འགྲོ་སྒྲིབ་སྦྱངས༔ ཡོངས་གྱུར་རང་ཉིད་འཇིགས་སྐྱོབ་རྗེ་བཙུན་མ༔ འཁོར་བ་ལས་སྒྲོལ་བྱམས་པའི་བདག་ཉིད་ཡུམ༔ ཨིནྡྲ་ནི་ལ་འོད་སྟོང་འཁྱུག་འདྲའི་སྐུ༔ ཞལ་གཅིག་ཞི་འཛུམ་ལང་ཚོས་སྒེག་པའི་ཉམས༔ ཕྱག་གཡས་མཆོག་སྦྱིན་མཁས་རྣམས་མགྲོན་དུ་འབོད༔ གཡོན་པས་དཀོན་མཆོག་གསུམ་མཚོན་སྐྱབས་སྦྱིན་རྒྱས༔ ཨུཏྤལ་འཁོར་ལོས་མཚན་པ་སྙན་ཐད་འཛིན༔ ཞབས་གཉིས་གཡས་བརྐྱངས་གཡོན་བསྐུམས་འགྱིང་ཚུལ་བཞུགས༔ རིན་ཆེན་སྙན་རྒྱན་ནོར་བུའི་ཅོད་པཎ་དང་༔ མུ་ཏིག་རྒྱན་ཕྲེང་དོ་ཤལ་ཕྱག་ཞབས་གདུབ༔ དར་སྔོན་སྟོད་གཡོགས་དམར་པོའི་ཤམ་ཐབས་དང་༔ དབུ་སྐྲ་ལྗང་ཁྲས་བཅིངས་པའི་ཟི་ལྡིར་ངོམ༔ སྐ་རགས་གསེར་མདོག་ལོངས་སྐུ་ཞི་བའི་ཆས༔ འོད་ཟེར་ལྔ་འཁྲིགས་ཟླ་རྒྱས་རྒྱབ་ཡོལ་མཛེས༔ ཕྱོགས་བཞིར་པད་ཟླའི་གདན་ལ་ཏཱཾ་ཡིག་ལས༔ མེ་ཆུ་ལྕགས་སྒྲོག་ཤ་ཟའི་འཇིགས་སྐྱོབ་པའི༔ འཕགས་མ་རིགས་བཞི་དཀར་སེར་དམར་ལྗང་མདོག༔ མཚམས་བཞིིར་རྐུན་པོ་དུག་སྦྲུལ་གླང་པོ་སེང་༔ འཇིགས་སྐྱོབ་སྒྲོལ་མ་དཀར་སྨུག་ནག་སྔོ་བཞད༔ གཡས་གཡོན་ཕྱག་རྒྱ་གཙོ་དང་མཚུངས་པ་ལ༔ རང་རྟགས་ཕྱག་མཚན་དེ་ཡིི་གཉེན་པོར་སྤྲུལ༔ བར་མཚམས་སངས་རྒྱས་བྱང་སེམས་རིག་པ་འཛིན༔ ལྷ་དང་དྲང་སྲོང་གྲུབ་པ་སྤྲིན་བཞིན་འཁྲིགས༔ ཕྱོགས་ཀྱི་སྒོ་སྐྱོང་དམ་ཅན་སྐར་ལྟར་བཀྲ༔ ཡེ་ཤེས་རང་གདངས་འོད་ལྔའི་ཀློང་དུ་གསལ༔ གནས་གསུམ་ཡི་གེ་ལས་བྱུང་འོད་ཟེར་གྱིས༔ དམ་ཚིག་ལྷ་ལ་དབྱིངས་ནས་ཡེ་ཤེས་པ༔ ཆར་ལྟར་བབས་ཏེ་དབྱེར་མེད་རོ་གཅིག་གྱུར༔ མ་ལུས་རྒྱལ་བའི་ཡུམ་ལ་རྟག་ཏུ་འདུད༔ ཕྱི་ཡི་ཡུལ་སྣང་འགགས་མེད་མཆོད་པའི་རྫས༔ མེ་ཏོག་སྤོས་སྤྲིན་སྣང་གསལ་བཟང་ལྡན་ཆབ༔ ལྷ་ཡི་རོ་བཅུད་སྙན་འཇེབས་རོལ་མོའི་སྒྲ༔ ཅིར་སྣང་དངོས་འབྱོར་ཡིད་སྤྲུལ་རང་བྱུང་རྫས༔ བློ་ཡིས་བླངས་ཏེ་ཀུན་བཟང་རྣམ་རོལ་གྱིས༔ རྗེ་བཙུན་སྒྲོལ་མ་སྐྱབས་གྱུར་སྤྲུལ་འཁོར་ལ༔ གུས་པས་འབུལ་ལོ་ཐུགས་རྗེས་བཞེས་སུ་གསོལ༔ འགྲོ་བའི་ཚོགས་རྫོགས་སྟོབས་བཅུའི་དཔལ་ཐོབ་ཤོག༔ ཨེ་མ་ཧོ༔ གང་སྐུ་ཨིནྡྲ་ནི་ལ་རྡུལ་བྲལ་ངོས༔ མཚན་དཔེའི་འོད་འབར་སྲིད་པའི་ཁེངས་པ་འཕྲོག༔ མཐོང་བ་ཙམ་གྱིས་འཁོར་བའི་འཇིགས་ལས་སྒྲོལ༔ རྗེ་བཙུན་འཕགས་མའི་སྐུ་ལ་ཕྱག་འཚལ་བསྟོད༔ རབ་སྙན་ཚངས་པའི་བུ་མོའི་གླུ་དབྱངས་ཀྱིས༔ བརྒྱད་ཁྲི་བཞི་སྟོང་ཆོས་ཕུང་ཅིག་ཅར་སྟོན༔ ཐོས་པས་སྲིད་པའི་སྡུག་བསྔལ་མིང་མེད་གཏོང་༔ རྗེ་བཙུན་འཕགས་མའི་གསུང་ལ་ཕྱག་འཚལ་བསྟོད༔ ཇི་སྙེད་ཤེས་བྱའི་ཆོས་ཁམས་མ་ལུས་པ༔ རྟོག་བྲལ་ངང་ནས་མ་འདྲེས་སོ་སོར་མཁྱེན༔ དམིགས་མེད་སྙིང་རྗེས་འགྲོ་ཀུན་བུ་བཞིན་སྐྱོང་༔ རྗེ་བཙུན་འཕགས་མའི་ཐུགས་ལ་ཕྱག་འཚལ་བསྟོད༔ དྲན་པ་ཙམ་གྱིས་འཇིགས་བརྒྱད་གཡུལ་ངོ་འཇོམས༔ མཚན་ཙམ་ཐོས་པས་འདོད་པའི་དོན་ཀུན་འགྲུབ༔ རྒྱལ་བ་སྲས་བཅས་ཕྲིན་ལས་སྒྲུབ་མཛད་མ༔ དཔག་མེད་ཡོན་ཏན་རྫོགས་ལ་ཕྱག་འཚལ་བསྟོད༔ རང་ཉིད་རྗེ་བཙུན་འཕགས་མར་གསལ་བ་ཡི༔ གཙོ་འཁོར་ཐུགས་ཀར་པདྨ་ཟླ་བའི་སྟེང་༔ ཏཱཾཿཡིག་རང་མདོག་མཐའ་ལ་ཡི་གེའི་ཕྲེང་༔ མུ་ཏིག་ལྗང་ཁུའི་ཕྲེང་མཛེས་བཞིན་དུ་བསྐོར༔ བཟླས་པས་འོད་འབར་གཡས་སུ་འཁོར་བར་དམིགས༔ ཨོཾ་ཏཱ་རེ་ཏུཏྟཱ་རེ་སྭཱ་ཧཱ༔ མ་ཡེངས་སེམས་འཛིན་བརྟན་པོས་འབྲུ་འབུམ་བཟླས༔ ལས་གྲུབ་གང་འདོད་དམིགས་པའི་འཁྲུལ་འཁོར་བྱ༔ རང་སྲོག་སྔགས་ལས་འོད་འཕྲོས་འཁོར་རྣམས་ཀྱི༔ ཐུགས་སྲོག་ལ་ཕོག་རང་མདོག་འོད་ཟེར་འཕྲོས༔ མེ་ཆུ་ལ་སོགས་འཇིགས་ཀུན་དབྱིངས་སུ་བསལ༔ འཁྲུལ་སྣང་སྒྱུ་མའི་རྫུན་ཁུང་རང་སར་རྡིབ༔ མེ་དང་ཆུ་ལ་ཏཱ་རེའི་སྔགས་ཤམ་དུ༔ སརྦ་ཛྭ་ལ་ཤནྟིཾ་ཀུ་རུ་ཡེ་སྭཱ་ཧཱ༔ སརྦ་མ་ཧཱ་པ་ཎི་ཤནྟིཾ་ཀུ་རུ་ཡེ་སྭཱ་ཧཱ༔ དེ་བཞིན་ལྕགས་སྒྲོག་ཤ་ཟ་ལ༔ སརྦ་སྥོ་ཊ་ཤནྟིཾ་ཀུ་རུ་ཡེ་སྭཱ་ཧཱ༔ སརྦ་ར་ཙ་ཤནྟིཾ་ཀུ་རུ་ཡེ་སྭཱ་ཧཱ༔ རྐུན་པོ་དུག་སྦྲུལ་འཇིགས་པ་ལ༔ སརྦ་ཙོ་ར་ཤནྟིཾ་ཀུ་རུ་ཡེ་སྭཱ་ཧཱ༔ སརྦ་བི་ཥ་ཀུནྜ་ལི་ཤནྟིཾ་ཀུ་རུ་ཡེ་སྭཱ་ཧཱ༔ དེ་བཞིན་གླང་པོ་དང་ནི་གདོང་ལྔ་ལ༔ སརྦ་ཙནྜ་ཧསྟི་ཤནྟིཾ་ཀུ་རུ་ཡེ་སྭཱ་ཧཱ༔ སརྦ་ཀྲོ་ཏ་སིངྷ་ཤནྟིཾ་ཀུ་རུ་ཡེ་སྭཱ་ཧཱ༔ ལས་སྔགས་སྟོང་ཕྲག་རེ་རེ་བཟླས༔ ས་མ་ཡཱ༔ མེ་ཡི་འཇིགས་པ་བྱུང་བ་ན༔ མདུན་གྱི་སྒྲོལ་མའི་ཕྱག་གཡས་ལས༔ སྤྲིན་སྔོན་ཆར་གྱི་རྒྱུན་བབས་ནས༔ མེ་ལྕེ་ཆིལ་གྱིས་བསད་ཞི་བསམ༔ ཆུ་ལ་ཕྱག་གཡས་ཆུའི་ལྷ་མོ༔ གྲུ་བསྣམས་ཆུ་ལས་བསྒྲལ་བར་བསམ༔ ལྕགས་སྒྲོག་ཕྱག་གཡས་ལྡེ་མིག་གིས༔ དཀྲོལ་ཞིང་དེ་བཞིན་རལ་གྲི་ཡིས༔ སོ་སོར་དུམ་བུར་བཅད་པར་བསམ་༔ ཤ་ཟའི་འཇིགས་ལ་ཕྱག་གཡས་ཀྱིས༔ ལྕགས་ཀྱུས་ཤ་ཟའི་སྙིང་དྲངས་བསམ༔ རྐུན་པོའི་འཇིགས་ལ་ཉི་ཟླ་ཡི༔ ཞགས་པས་བསྡམས་ཤིང་མྱོས་པར་བསམ༔ དུག་སྦྲུལ་ལ་ནི་སྨན་བུམ་གྱིས༔ གསོས་ཤིང་བྱམས་སེམས་ལྡན་པར་དམིགས༔ གླང་པོ་ལ་ནི་ལྕགས་ཀྱུ་ཡིས༔ དྲངས་ཤིང་སྤ་བཀོང་དབང་དུ་བསྡུས༔ སེང་གེས་འཇིགས་ལ་མེ་ལྕེ་དང་༔ ཤ་ར་བྷ་ཡིས་ཕྱིར་བསྐྲད་བསམ༔ འདི་ལ་རྩེ་གཅིག་འབད་པ་བྱ༔ འཇིགས་པ་བརྒྱད་དང་བཅུ་དྲུག་སོགས༔ འཁོར་བའི་འཇིགས་པ་མཐའ་དག་ལ༔ ངེས་པར་སྐྱོབ་ལ་སོམ་ཉི་བྲལ༔ ས་མ་ཡཱ༔ བསྙེན་པའི་ཚད་ནི་འབྲུ་འབུམ་དང་༔ ལས་སྦྱོར་སྔགས་ཤམ་ཁྲི་ཚོ་བཟླ༔ འགྲུབ་རྟགས་རབ་འབྲིང་ཐ་མ་ལ༔ རབ་ནི་དངོས་སུ་ལྷ་ཞལ་མཐོང་༔ འབྲིང་ནི་ཉམས་ལ་བདེ་གསལ་དང་༔ མི་རྟོག་ཏིང་འཛིན་རྒྱུད་ལ་སྐྱེ༔ སྐབས་སུ་མི་རྟག་སྐྱོ་ཤས་ངང་༔ ཆོས་ལ་ཡིད་ཆེས་ངེས་ཤེས་སྐྱེ༔ ཐ་མལ་རྨི་ལམ་དགེ་བའི་ལྟས༔ ཆུ་ལ་བརྒལ་དང་རི་རྩེར་ཕྱིན༔ ཉི་ཟླ་ཤར་དང་མཁའ་ལ་འཕུར༔ དེ་ལྟར་རྟགས་ཚད་གཏན་ལ་དབབ༔ རྗེས་སུ་མཆོད་པའི་ཡོ་བྱད་རྣམས༔ དངོས་སུ་འབྱོར་རམ་ཡིད་ཀྱིས་སྤྲུལ༔ འབུལ་ཚིག་དབྱངས་ཀྱིས་འདི་སྐད་དོ༔ ཨེ་མ་ཧོ༔ རྗེ་བཙུན་འཕགས་མའི་ལྷ་ཚོགས་འཁོར་བཅས་ལ༔ དངོས་སུ་བཤམས་པའི་མཆོད་སྤྲིན་འབུལ་བ་ནི༔ དྭངས་བསིལ་ཡིད་འོང་མཆོད་པའི་ཡོན་ཆབ་སྦྲེངས༔ ཕྱག་ཞབས་བསིལ་བའི་ཁྲུས་ཀྱི་རྒྱུན་བཟང་འབེབས༔ དཀར་སེར་དམར་ལྗང་མེ་ཏོག་འདབ་སྟོང་བཞད༔ ལྷན་སྐྱེས་སྦྱར་བྱུང་ཚུལ་ཁྲིམས་དྲི་བཟང་འཐུལ༔ ཉི་ཟླ་ནོར་བུའི་མདངས་འཕྲོག་སྣང་གསལ་སྦྱར༔ བཟང་པོ་དྲུག་དང་འདྲེས་པའི་དྲི་ཡི་ཆབ༔ ཁ་མངར་རོ་བརྒྱ་ལྡན་པའི་བཤོས་གཙང་དང་༔ སྙན་འཇེབས་སྒྲ་ལྡན་རྔ་སིལ་གླིང་བུ་སྙན༔ གདུགས་དང་རྒྱལ་མཚན་བླ་རེ་ཅོད་པཎ་དང་༔ གསེར་དངུལ་གཡུ་ཟངས་རིན་ཆེན་སྣ་ཚོགས་རིགས༔ ནས་འབྲས་གྲོ་ཏིལ་དཀར་ནག་འབྲུ་ཡི་རིགས༔ རྒྱུ་བཟང་བཤམས་ལེགས་བཀོད་ཅིང་བསྟར་བ་འདི༔ ཐུགས་རྗེ་ཆེ་ལྡན་འཁོར་བ་ལས་སྒྲོལ་མ༔ འཇིགས་པ་བརྒྱད་སྐྱོབ་འཕགས་མའི་ལྷ་ཚོགས་ལ༔ གུས་པས་འབུལ་ལོ་ཐུགས་བརྩེས་བཞེས་སུ་གསོལ༔ ཡིད་སྤྲུལ་ནི༔ ཨེ་མ་ཧོ༔ ཏིང་འཛིན་ཡིད་ཀྱིས་སྤྲུལ་པ་ལས་བྱུང་བའི༔ མཆོད་པའི་ལྷ་མོ་སྒེག་མཛེས་ཡིད་འོང་འཛུམ༔ ཟག་བྲལ་བདེ་སྟོང་ཕྱག་མཚན་མཆོད་པའི་རྫས༔ མེ་ཏོག་སྤོས་སྒྲོན་དྲི་ཆབ་ལྷ་ཡི་བཤོས༔ པི་ཝཾ་གླིང་བུ་མེ་ལོང་ཕྲེང་བ་གདུགས༔ རྒྱལ་མཚན་ལ་སོགས་ངོ་མཚར་བཀོད་པ་འདི༔ རྩ་གསུམ་ཡོངས་དྲིལ་འཕགས་མའི་ལྷ་ལ་འབུལ༔ བཞེས་ནས་བདག་ཅག་ལས་ངན་འཁྲུལ་བའི་འགྲོའི༔ སྒྲིབ་པ་གཉིས་དག་ཚོགས་གཉིས་རྫོགས་པ་དང་༔ གནས་སྐབས་རྐྱེན་སེལ་མཐར་ཐུག་མངོན་སངས་རྒྱས༔ དོན་གཉིས་ལྷུན་གྱིས་འགྲུབ་པའི་དཔལ་སྩོལ་ཅིག༔ དེ་རྗེས་གསང་གསུམ་ཡོན་ཏན་དྲན་པ་ཡི༔ གུས་པས་བསྟོད་དེ་འདོད་དོན་གསོལ་བ་ནི༔ ཨོཾ༔ རྒྱལ་བའི་སྐུ་ཡི་རང་བཞིན་མཚན་དཔེའི་དཔྱིད༔ བལྟ་བས་མི་ངོམས་མཛེས་སྡུག་ལྷ་མོའི་ཚུལ༔ མཐོང་བ་ཙམ་གྱིས་སྲིད་པའི་གདུང་བ་སེལ༔ རྗེ་བཙུན་འཕགས་མའི་སྐུ་ལ་ཕྱག་འཚལ་བསྟོད༔ ཨཱཿ རྒྱལ་བའི་གསུང་དབྱངས་ཡན་ལག་དྲུག་ཅུའི་སྒྲ༔ མཐའ་ཡས་ཞིང་དུ་འཕགས་ཚོགས་རྒྱ་མཚོ་ཡི༔ སྣང་ངོར་ཐོས་པས་གདུང་སེལ་ཆོས་སྒྲ་སྒྲོག༔ རྗེ་བཙུན་འཕགས་མའི་གསུང་ལ་ཕྱག་འཚལ་བསྟོད༔ ཧཱུྃ༔ རྒྱལ་ཀུན་ཐུགས་ཀྱི་མཁྱེན་བརྩེའི་གཏེར་མཛོད་འཆང་༔ དྲན་པས་འཁོར་འདས་གཉིས་ཀྱི་མཐའ་ལས་སྒྲོལ༔ འགྲོ་ལ་མ་ལྟར་དགོངས་ཤིང་བྱིན་གྱིས་རློབས༔ རྗེ་བཙུན་འཕགས་མའི་ཐུགས་ལ་ཕྱག་འཚལ་བསྟོད༔ དམིགས་མེད་ངང་ནས་ཡིད་བཞིན་ལྗོན་ཤིང་ལྟར༔ ཡོན་ཏན་མི་ཟད་རྒྱན་གྱི་འཁོར་ལོ་ཆེ༔གདུལ་བྱའི་དཔལ་དུ་ཅིར་ཡང་སྟོན་མཛད་པ༔ རྗེ་བཙུན་སྒྲོལ་མའི་གསང་གསུམ་གུས་པས་བསྟོད༔ ཀྱཻ་མ༔ དགོངས་ཤིག་ཐུགས་རྗེའི་མངའ་བདག་རྗེ་བཙུན་མ༔ རྒྱལ་ཡུམ་སྒྲོལ་མ་གནས་མཆོག་གང་ན་བཞུགས༔ བདག་ནི་ཚེ་རབས་སྐྱེ་བ་ཐོག་མེད་ནས༔ ཁམས་གསུམ་འཁོར་བའི་རྒྱ་མཚོ་ཆེན་པོ་འདིར༔ རིགས་དྲུག་སྡུག་བསྔལ་སྐྱེ་འཆིིའི་རྦ་ལ་གཡེངས༔ འཇིགས་ཆེན་བརྒྱད་དང་བཅུ་དྲུག་གྲངས་མེད་པས༔ རྟག་ཏུ་མནར་བ་འདི་རྣམས་མི་དགོངས་སམ༔ བདག་དང་ཕ་མ་འགྲོ་དྲུག་སེམས་ཅན་ལ༔ སྔོན་གྱི་ལས་དང་འཕྲལ་རྐྱེན་ངན་པའི་མཐུས༔ ཚེ་འདིར་མི་འདོད་རྐྱེན་ངན་སྣ་ཚོགས་དང་༔ ཁྱད་པར་སེང་གེ་གླང་ཆེན་མེ་དང་ཆུ༔ དུག་སྦྲུལ་རྒྱལ་པོའི་ཆད་པ་ཐོག་དང་མཛེ༔ ཤ་ཟ་རིམས་ནད་དྲག་པོ་དོན་ཉམས་སོགས༔ མཐའ་ཡས་འཇིགས་པའི་ཚོགས་ལས་བསྐྱབ་ཏུ་གསོལ༔ ཚེ་དང་བསོད་ནམས་དཔལ་དང་འབྱོར་པ་དང་༔ བུ་ནོར་གཟི་བརྗིད་སྟོབས་དང་མངའ་ཐང་དང་༔ ལུང་དང་རྟོགས་པའི་ཡོན་ཏན་མ་ལུས་པ༔ དབྱར་གྱི་ཆུ་བོའི་རྒྱུན་བཞིན་རྒྱས་པར་མཛོད༔ ཟས་ནོར་ལོངས་སྤྱོད་ཡིད་འོང་འདོད་རྒུའི་རྫས༔ རྒྱལ་བློན་བཙུན་པ་སྐྱེ་བོ་དམངས་ཕལ་པ༔ ལྷ་འདྲེ་ཕོ་མོ་མདོར་ན་བརྟན་གཡོ་ཀུན༔ ཁབ་ལེན་ལྕགས་བཞིན་དབང་དུ་འདུ་བར་མཛོད༔ དགྲ་འདྲེ་དམ་སྲི་དངོས་སམ་ལྐོག་ནས་སྡང་༔ བར་ཆད་བྱེད་པའི་ལོག་འདྲེན་འབྱུང་པོ་ཀུན༔ བྱམས་དང་སྙིང་རྗེའི་ཤུགས་ཀྱིས་རབ་བཏུལ་ནས༔ གནོད་བྱེད་མིིང་གི་ལྷག་མར་མཛད་དུ་གསོལ༔ ཕན་བདེ་མ་ལུས་འབྱུང་གནས་བྱང་ཆུབ་སེམས༔ དད་བརྩོན་དགེ་བའི་བཤེས་གཉེན་ལ་བསྟེན་ནས༔ མི་ཉམས་ཡིད་བཞིན་ལྗོན་ལྟར་རབ་འཕེལ་ཞིང་༔ ས་བཅུ་ལམ་ལྔ་ཐོགས་མེད་རབ་བགྲོད་ཤོག༔ མཐར་ཐུག་རང་དོན་ཆོས་སྐུ་མངོན་གྱུར་ནས༔ གཞན་དོན་འགྲོ་ལ་ཕན་བདེ་ཕུན་ཚོགས་པའི༔ དོན་གཉིས་ལྷུན་གྲུབ་ཆོས་ཀྱི་རྒྱལ་པོ་མཆོག༔ རྗེ་བཙུན་འཕགས་མའི་གོ་འཕང་མྱུར་ཐོབ་ཤོག༔ ཅེས་དང་ལྷར་སྣང་དབྱིངས་སུ་བསྡུ་བ་ནི༔ ཧཱུྃ་ཧྲཱིཿ རང་སྣང་ལྷ་ཡི་སྐུ་དང་སྔགས་ཀྱི་ཕྲེང་༔ ཞིང་ཁམས་གང་སྣང་སྟོང་པའི་དབྱིངས་སུ་བསྡུ༔ གདོད་མའི་སྟོང་ཆེན་སྤྲོས་པ་མེད་པའི་ཀློང་༔ བསལ་བཞག་བཅིང་གྲོལ་མེད་པའི་ངང་དུ་ཨཱཿ དུས་གསུམ་དགེ་ཚོགས་འགྲོ་ལ་བསྔོ་བ་ནི༔ ཨེ་མ་ཧོ༔ འདིས་མཚོན་དུས་གསུམ་བསགས་པའི་དགེ་ཚོགས་ཀུན༔ གཅིག་ཏུ་བསྡུས་ནས་རྫོགས་བྱང་ཐོབ་ཕྱིར་བསྔོ༔ དེ་མཐུས་རང་གཞན་ཚེ་རབས་ཐམས་ཅད་དུ༔ རྗེ་བཙུན་འཕགས་མས་རྩེ་གཅིག་རྗེས་འཛིན་ཤོག༔ གང་དུ་སྐྱེ་བའི་ཚེ་རབས་ཐམས་ཅད་དུ༔ ལྟ་སྒོམ་སྤྱོད་གསུམ་དམ་པའི་ཆོས་དང་མཐུན༔ དགེ་བའི་བཤེས་ཀུན་མཉེས་པ་གསུམ་གྱིས་བསྟེན༔ མཐར་ཐུག་རྒྱལ་བའི་གོ་འཕང་མངོན་གྱུར་ཤོག༔ མཐར་ཐུག་ཤིས་པ་བརྗོད་པས་མཐའ་བརྒྱན་ཅིང་༔ ཨེ་མ་ཧོ༔ སྙིང་རྗེས་སྲིད་ལ་མི་གནས་སྲིད་མཐར་སོན༔ ཤེས་རབ་ཞི་ལ་མི་གནས་ཞི་ལས་འདས༔ དུས་གསུམ་འགྲོ་ལ་དུས་ཀུན་བརྩེ་བས་དགོངས༔ རྗེ་བཙུན་འཕགས་མ་སྒྲོལ་མའི་བཀྲ་ཤིས་ཤོག༔ གང་མཚན་དྲན་པས་བདུད་བཞིའི་གཡུལ་ལས་རྒྱལ༔ མཐའ་ཡས་འགྲོ་ལ་བརྩེ་བས་བུ་བཞིན་དགོངས༔ ཚེ་རབས་ཀུན་ཏུ་ལྷག་པའི་ལྷར་གྱུར་པ༔ རྒྱལ་ཡུམ་སྒྲོལ་མ་དཔའ་མོའི་བཀྲ་ཤིས་ཤོག༔ འདི་ནི་རྒྱལ་ཡུམ་དཔའ་མོ་ཡི༔ ཐུགས་སྒྲུབ་རྩ་བའི་མན་ངག་སྟེ༔ བྱ་སླ་ཚེགས་ཆུང་རྒྱུན་ཁྱེར་སྙིང་གི་བཅུད༔ སྐལ་ལྡན་བུ་མཆོག་རྣམས་ཀྱིས་ཉམས་སུ་ལོངས༔ ས་མ་ཡཱ༔ རྒྱ་རྒྱ་རྒྱ༔ ལུང་རིག་གླིང་པའི་གཏེར་མའོ༔