བསྲུང་བ་རྡོ་རྗེའི་རྫོང་ཆེན།

ཡང་ཟབ་འཕགས་མའི་ཐུགས་སྒྲུབ་ལས༔ བསྲུང་བ་རྡོ་རྗེའི་རྫོང་ཆེན་བཞུགས༔

སྐུ་གསུམ་དབྱིངས་ཀྱི་མཁའ་འགྲོར་འདུད༔ སྒྲོལ་མ་འཇིགས་པ་བརྒྱད་སྐྱོབ་ཀྱི༔ རྣམ་པར་བརྩོན་པའི་གང་ཟག་གིས༔ རང་དང་གཞན་བསྲུང་དམིགས་པའི་གནད༔ པདྨའི་ཐུགས་བཅུད་གདམས་པ་སྟོན༔ ས་མ་ཡཱ༔ སྐྱབས་སེམས་སྔོན་སོང་ལས་གཞུང་བསྲང་༔ རྩ་བའི་བསྙེན་སྒྲུབ་གནད་དུ་བསྣུན༔ ཁྱད་པར་དམིགས་པ་འདི་བཞིན་བྱ༔ སྭ་བྷ་ཝ་ཡི་སྔགས་ཀྱིས་སྦྱངས༔ འཁོར་འདས་ཆོས་ཀུན་མི་དམིགས་སྟོང་པར་གྱུར༔ སྟོང་ཉིད་རྩལ་ལས་འགགས་མེད་སྙིང་རྗེའི་འཕྲུལ༔ ཟུང་འཇུག་རིག་པ་ཏཱཾཿཡིག་ལྗང་ཁུ་ལས༔ དབང་སྔོན་ལས་གྲུབ་རྣམ་རྒྱལ་མཆོད་རྟེན་གྱི༔ བུམ་པའི་ལྟོ་བ་ཡངས་ཤིང་རྒྱ་ཆེ་བ༔ པོ་ཊ་ལ་ཡི་གཞལ་ཡས་ཁང་པ་མཆོག༔ མཚན་ཉིད་རྒྱན་དང་བཀོད་པ་ཕུན་སུམ་ཚོགས༔ དེ་དབུས་འདབ་བཞི་ཕྱི་རིམ་པད་འདབ་བཅུ༔ ཉིས་རིམ་སྟེང་དུ་ཏཱཾ་ཡིག་ཉེར་གཅིག་ལས༔ གཙོ་འཁོར་ཡོངས་རྫོགས་མཁའ་ལ་འཇའ་ལྟར་ཤར༔ གཙོ་མོའི་ཐུགས་ཀྱི་ཙིཏྟ་རིན་པོ་ཆེ༔ རྡོ་རྗེ་ཕ་ལམ་བཻཌཱུར་རྩེ་ལྔ་བ༔ སྦུབས་སྟོང་ནང་དུ་ཏཱཾཿཡིག་ལྗང་གསལ་ནི༔ བལྟར་མི་བཟོད་པ་ཉི་མའི་དཀྱིལ་ལྟར་འཚེར༔ ཁོག་པར་རང་དང་བསྲུང་བྱའི་སྲོག་ཡིག་ནྲྀ༔ གསལ་འཚེར་སྤུས་བྲིས་ལྟ་བུ་ཡང་ཡང་གསལ༔ གཡས་སུ་བསྲུང་བྱ་ཕོ་རིགས་དེ་བཞིན་དུ༔ གཡོན་དུ་མོ་རིགས་རྒྱབ་ཏུ་བྲན་དང་གཡོག༔ འོག་ཏུ་ནོར་རྫས་ཀུན་ཀྱང་རང་རང་གི༔ མིང་ཡིག་དང་པོ་ཐིག་ལེས་མཚན་པར་དམིགས༔ གཞལ་ཡས་ཕྱི་རོལ་རྡོ་རྗེའི་གུར་ཆེན་པོ༔ སྟེང་འོག་རྒྱ་གྲམ་བར་མཚམས་ཀ་བ་དང་༔ རྩིག་པ་ཕྲ་མོ་བར་མཚམས་མེ་སྟག་འཁྲིགས༔ དེ་ཡི་ཕྱི་རོལ་ནོར་བུ་རིན་ཆེན་གུར༔ དེ་ཕྱིར་པདྨ་དེ་རྒྱབ་རལ་གྲིས་གཏམས༔ ཕྱི་རོལ་དབྱངས་གསལ་ཡིག་འབྲུ་རང་སྒྲར་བཅས༔ འབྲུག་སྟོང་ལྡིར་འདྲའི་སྔགས་ཀྱིས་སྟོང་ཁམས་གཡོ༔ དེ་ཡི་ཕྱི་རོལ་ཁྲོ་བོ་ཆེན་པོ་བཅུ༔ ཕྱོགས་སྐྱོང་ཕོ་མོ་བསྣོལ་བའི་གདན་ལ་འགྱིང་༔ ཕྱི་རིམ་བསྐལ་པ་དུས་མཐའི་མེ་དཔུང་འབར༔ བགེགས་དགྲ་ལོག་འདྲེན་མ་ལུས་གཞོབ་ཏུ་བསྲེག༔ གནོད་བྱེད་འབྱུང་པོས་ནམ་ཡང་གླགས་མི་རྙེད༔ རང་གཞན་སྒོ་གསུམ་ལྷ་སྔགས་རྡོ་རྗེའི་རྫོང་༔ ཡོངས་གྲུབ་རྒྱལ་བའི་དཀྱིལ་འཁོར་ཆེན་པོར་གྱུར༔ རང་སྲུང་སྔགས་ཀྱི་ཤམ་བུ་ནི༔ རྩ་བའི་སྔགས་ལ་འདི་བཏགས་བསྙེན༔ མ་མ་ཀཱ་ཝ་ཙི་རཀྵ་རཀྵ་བྷྲུཾ་སྭཱ་ཧཱ༔ གཞན་བསྲུང་སྔགས་ལ་འདི་བཞིན་བཏགས༔ དཱ་ན་པ་ཏི་ཀཱ་ཝ་ཙི་རཀྵ་རཀྵ་བྷྲུཾ་སྭཱ་ཧཱ༔ གཞན་ཡང་སྐྱེས་པ་བུད་མེད་དང་༔ བཙུན་པ་བྱིས་པ་ལ་སོགས་པ༔ གང་དམིགས་སྔགས་ཀྱིས་འཕྲུལ་ཤེས་བྱ༔ ས་མ་ཡཱ༔ རྒྱ་རྒྱ་རྒྱ༔ སྲུང་དམིགས་ཉི་ཟླའི་ག་འུ་ཞེས༔ གཞན་ལས་ཁྱད་འཕགས་གདམས་པ་ནི༔ ཧཱུྃ་ཧྲཱིཿ ཆོས་ཀུན་སྟོང་པའི་ངང་ལས་དྲན་རྫོགས་སུ༔ སྣང་སྲིད་ཐབས་ཤེས་སྣང་སྟོང་སྒྱུ་འཕྲུལ་ལས༔ རང་སེམས་ཏཱཾ་ཡིག་ལྗང་གུ་ལས་བྱུང་བའི༔ རྒྱལ་བའི་ཡུམ་མཆོག་འཇིགས་པ་བརྒྱད་སྒྲོལ་མ༔ མརྒད་མདོག་ཅན་ལོངས་སྤྱོད་རྫོགས་པའི་སྐུ༔ ཞི་འཛུམ་མཚན་དང་དཔེ་བྱད་ཡོན་ཏན་རྫོགས༔ ཕྱག་གཡས་མཆོག་སྦྱིན་ཕྱག་རྒྱས་དངོས་གྲུབ་སྩོལ༔ ཕྱག་གཡོན་སྐྱབས་སྦྱིན་འགྲོ་རྣམས་འཇིགས་ལས་སྐྱོབ༔ ཨུཏྤལ་ཕྱག་མཚན་སྲིད་ཞིའི་མཐའ་ལས་གྲོལ༔ གཡས་བརྐྱང་གཡོན་བསྐུམ་པད་ཟླའི་གདན་སྟེང་བཞུགས༔ ཟླ་བའི་རྒྱབ་ཡོལ་སྣང་མཐའ་དབུ་ལ་བརྒྱན༔ མཐའ་བསྐོར་སྒྲོལ་མ་ཉི་ཤུ་རྩ་གཅིག་དང་༔ སངས་རྒྱས་བྱང་སེམས་ཉན་རང་སྤྲིན་ལྟར་འཁྲིགས༔ ཐུགས་ཀར་ཨུཏྤལ་ལྟེ་བར་ཟླ་གདན་ལ༔ ཐུགས་སྲོག་ཏཱཾཿགྱི་ཟླ་ཚེས་ཐིག་ལེའི་དབུས༔ རང་གཞན་བླ་མ་སློབ་དཔོན་ཁོག་པ་རུ༔ རང་དང་བསྲུང་བྱའི་བླ་ཡིག་ཨཱཿདཀར་པོ༔ སྲོག་གི་དྭངས་མ་ཚེ་ཡིག་ནྲྀ་ལྗང་གསལ༔ གཡས་སུ་ཕོ་ཡི་སྲོག་ཡིག་གསལ་བྱེད་ཀ༔ གཡོན་དུ་མོ་ཡི་སྲོག་ཡིག་དབྱངས་དང་པོ༔ དཀར་དམར་བཀྲག་མདངས་རབ་འབར་རིང་ཆ་རུ༔ བྲན་དང་ཁོལ་པོའི་མིང་ཡིག་རྒྱབ་ཏུ་ནོར༔ བ་སྤུའི་ཡིག་འབྲུ་གསེར་མདངས་འོད་འབར་གསལ༔ འཕགས་མའི་ཐུགས་ལས་འོད་ཟེར་ཕྱོགས་བཅུར་འཕྲོས༔ འབྱུང་བཞིའི་བཅུད་དང་ལྷ་ཀླུ་མི་སོགས་ཀྱི༔ ཚེ་བསོད་བཀྲག་མདངས་རྒྱལ་ཀུན་གསང་གསུམ་གྱི༔ བྱིན་རླབས་ནུས་མཐུ་འབྲུ་གསུམ་རྣམ་པར་བསྡུས༔ རང་གཞན་བླ་ཚེའི་ཡིག་འབྲུ་རྣམས་ལ་བསྟིམས༔ མི་ཆོད་མི་ཤིགས་སྲ་བརྟན་རྡོ་རྗེའི་ཆོས༔ བདུན་དང་ལྡན་པས་འཆི་བདག་བདུད་ལ་སོགས༔ སྔོན་ལས་འཕྲལ་རྐྱེན་ནད་གདོན་བར་ཆད་ཚོགས༔ ཀུན་ལས་རྣམ་པར་རྒྱལ་བའི་བདག་ཉིད་ཆེ༔ འཕགས་མའི་གསང་བ་གསུམ་དང་དབྱེར་མེད་གྱུར༔ སླར་ཡང་འཕགས་མའི་ཐུགས་རྗེས་རྒྱལ་ཀུན་གྱི༔ བྱིན་རླབས་ཚུར་བསྡུས་ཉི་མའི་དཀྱིལ་འཁོར་དང་༔ ཁ་ཆོད་ཟླ་བའི་དཀྱིལ་འཁོར་གསལ་འཚེར་བའི༔ ག་འུ་ཡངས་པའི་དབུས་སུ་ཚུད་པ་ཡི༔ ཕྱི་རོལ་ལྷ་མོ་འོད་ཟེར་ཅན་མ་ནི༔ གསེར་མདོག་ཁབ་སྐུད་འཛིན་པ་དཔག་མེད་འཕྲོས༔ གླགས་ལྟ་བར་ཆད་རྩོམ་པའི་དགྲ་རྐུན་དང་༔ གདོན་བགེགས་ཀུན་གྱི་ཁ་མིག་བཙེམ་པ་ལ༔ རྡོ་རྗེའི་ཞལ་བས་ནམ་ཡང་ལྡང་མེད་བྱས༔ འཇིགས་པ་ཀུན་ལས་རང་ཉིད་རྒྱལ་བར་གྱུར༔ རྩ་སྔགས་ཡིག་འབྲུ་བཅུ་དྲུག་པའི༔ ཤམ་བུར་སྔགས་འདི་གདགས་པར་བྱ༔ མ་རི་ཙྱཻ་སུརྱ་ཙནྡྲ་རཀྵ་རཀྵ་ཧཾ༔ མ་མ་ཀཱ་ཡ་ཝཀྐ་ཙིཏྟ་རཀྵ་ཀུ་རུ་བྷྲུཾ་སྭཱ་ཧཱ༔ གཟུངས་སྔགས་རྒྱལ་པོ་བརྒྱ་སྟོང་གི༔ བསྙེན་པ་ཚད་དུ་འཁྱོལ་བ་ནི༔ རྡོ་རྗེའི་རྫོངས་སུ་ཚུད་དང་མཚུངས༔ འདོད་ལྷའི་རྒྱལ་པོས་གླགས་བལྟས་ཀྱང་༔ བསྲུང་བ་ཟབ་མོ་འདི་ལྡན་ན༔ བར་ཆད་བརྩམས་ཀྱང་མི་ཚུགས་ཕྱིར༔ དགྲ་འདྲེ་གཞན་ལ་སྨོས་ཅི་དགོས༔ གུ་ཧྱ༔ སྐུ་ཡི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ བཀའ་ཡི་སྲུང་མ་རལ་གཅིག་མས༔ ཆོས་འདིར་རྟག་ཏུ་མེལ་ཚེ་གྱིིས༔ ཐུན་མཚམས་ཕྱག་འཚལ་ཉེར་གཅིག་ནི༔ གྲངས་སུ་བསྟར་བ་མན་ངག་ཡིན༔