བསྐང་བསྡུས་ཡིད་བཞིན་ཆར་འབེབས།
སྒྲོལ་མའི་བསྐང་བསྡུས་ཡིད་བཞིན་ཆར་འབེབས་བཞུགས༔ ཧཱུྃ་ཧྲཱིཿ རབ་འབྱམས་དུས་གསུམ་རྒྱལ་བའི་ཡུམ་གཅིག་པུ༔ མཐའ་ཡས་སྐྱེ་དགུ་འཁོར་བའི་འཇིགས་ལས་སྒྲོལ༔ མཆོག་ཐུན་དངོས་གྲུབ་སྩོལ་མཛད་ལྷག་པའི་ལྷ༔ རྗེ་བཙུན་འཕགས་མ་སྒྲོལ་མའི་ཐུགས་དམ་བསྐང་༔ མེ་ཆུ་གཅན་གཟན་ལྕགས་སྒྲོག་དུག་སྦྲུལ་དང་༔ ཤ་ཟ་འབྱུང་པོ་རིམས་ནད་འཇིགས་ཀུན་ལས༔ མཚན་ཙམ་ཡིད་ལ་དྲན་པས་སྐྱོབ་མཛད་པ༔ སྒྲོལ་མ་ཉི་ཤུ་རྩ་གཅིག་ཐུགས་དམ་བསྐང་༔ སྨིན་གྲོལ་གདམས་པ་མཆོག་སྩོལ་བླ་མ་དང་༔ གང་འདོད་དངོས་གྲུབ་སྟེར་མཛད་ཡི་དམ་ལྷ༔ བར་ཆད་སེལ་མཛད་མཁའ་འགྲོ་ཆོས་སྐྱོང་སོགས༔ རྩ་གསུམ་དམ་ཅན་སྲུང་མའི་ཐུགས་དམ་བསྐང་༔ དེ་ལྟར་ཐུགས་དམ་བསྐངས་བའི་བྱིན་རླབས་ཀྱིས༔ སྡོམ་གསུམ་ཉམས་ཆག་ཉེས་ལྟུང་ཡོངས་དག་ནས༔ རྗེ་བཙུན་འཕགས་མའི་གསང་གསུམ་མངོན་གྱུར་ཏེ༔ མཐའ་ཡས་འགྲོ་བའི་དཔལ་དུ་འགྱུར་བར་ཤོག༔ ཅེས་པ་དད་ལྡན་གྱི་སློབ་བུས་བསྐུལ་ངོར་ཤཱཀྱའི་དགེ་སྦྱོང་རྒན་པོ་ཙི་ནའི་ནིརྨ་ཀའི་མིང་ཅན་གྱིས་སྨྲས་པ་དགེ་ལེགས་འཕེལ༔