རྒྱུན་ཁྱེར་སྙིང་པོའི་བཅུད་བསྡུས།
དབྱངས་ཅན་ཐུགས་སྒྲུབ་ཟབ་མོ་ལས༔ རྒྱུན་ཁྱེར་སྙིང་པོའི་བཅུད་བསྡུས་བཞུགས༔
ཤེས་རབ་རིག་པའི་ལྷ་མོར་འདུད༔ རྣལ་འབྱོར་སྤྲོས་མེད་རྒྱུན་ཁྱེར་དོན༔ ངག་གི་དབང་ཕྱུག་ལྷ་མོ་ཡི༔ རྒྱུན་ཁྱེར་སྙིང་པོ་དྲིལ་ཏེ་བཤད༔ ཤིན་ཏུ་དབེན་ཅིང་ཉམས་དགའ་བར༔ ཁྲུས་དང་གཙང་སྦྲ་སྔོན་སོང་བས༔ མདུན་མཁར་མཆོག་གསུམ་སྐྱབས་ཡུལ་དམིགས༔ ན་མོ༔ དེང་ནས་བཟུང་སྟེ་བྱང་ཆུབ་བར༔ དཀོན་མཆོག་གསུམ་གྱི་རང་བཞིན་ཅན༔ རྒྱལ་ཡུམ་ཤེས་རབ་ལྷ་མོ་ལ༔ སྐྱབས་སུ་མཆིའོ་མཁའ་མཉམ་འགྲོ༔ རྣམ་གྲོལ་ལ་འགོད་སེམས་བསྐྱེད་དོ༔ ལན་གསུམ་ཡན་ལག་བདུན་པ་ནི༔ མཆོག་གསུམ་སྐྱབས་ཡུལ་ལྷ་རྣམས་ལ༔ སྒོ་གསུམ་གུས་པས་ཕྱག་མཆོད་འབུལ༔ ཉམས་ཆག་བཤགས་ཤིང་དགེ་ལ་སྤྲོ༔ ཆོས་གསུང་བསྐུལ་ཞིང་བཞུགས་གསོལ་འདེབས༔ དགེ་ཚོགས་འགྲོ་ལ་ཡོངས་རྫོགས་བསྔོ༔ ཀུན་ཀྱང་རྣམ་གྲོལ་མཆོག་ཐོབ་ཤོག༔ ཚོགས་ཞིང་ཆོས་དབྱིངས་ཀློང་དུ་གཤེགས༔ དེ་ནི་སྔོན་འགྲོའི་རྒྱུད་སྦྱངས་ཡིན༔ དངོས་གཞི་ལྷ་ཡི་རྣལ་འབྱོར་ལ༔ བརྟེན་ནས་ཚོགས་གཉིས་རྫོགས་ཐབས་བསྟན༔ ཧྲཱིཿ ཆོས་ཀུན་རང་བཞིན་སྤྲོས་བྲལ་ཡང་༔ རྟེན་འབྲེལ་སྙིང་པོའི་རང་རྩལ་ལས༔ རང་སེམས་ཧྲཱིཿཡིག་དཀར་ལ་དྭངས༔ འོད་ཟེར་ཡར་འཕྲོས་རྒྱལ་ཀུན་མཆོད༔ མར་འཕྲོས་སེམས་ཅན་ལས་ཉོན་སྦྱངས༔ མཁས་རྣམས་ཤེས་བྱའི་དཔལ་ཡོན་བསྡུས༔ ཡོངས་གྱུར་པད་ཟླའི་གདན་གྱི་སྟེང་༔ ངག་གི་དབང་ཕྱུག་དབྱངས་ཅན་ལྷ༔ དཀར་ལ་སྔོ་བསངས་མཛེས་འཛུམ་ཞལ༔ ཕྱག་གཉིས་གླེགས་བམ་རྒྱུད་མངས་སྦྲེང་༔ ཕྱེད་སྐྱིལ་དར་གོས་རིན་ཆེན་བརྒྱན༔ མཛེས་སྒེག་ལང་ཚོ་ལྟ་ན་སྡུག༔ ནོར་བུའི་པྲོག་ཞུ་ཅོད་པན་འཕུར༔ མཁྱེན་གཉིས་སྤྱན་དཀྱུས་ཕྲ་ལ་རིང་༔ སྤྱི་བོར་རྒྱལ་ཀུན་མཁྱེན་པའི་གཏེར༔ འཇམ་དཔལ་གཞོན་ནུ་གུར་གུམ་མདོག༔ རལ་གྲི་པོ་ཏི་ཆོས་སྒྲ་སྒྲོག༔ དགྱེས་ཞལ་པད་ཟླའི་གདན་ལ་རོལ༔ སྤྱན་གཉིས་གཙོ་མོར་འཛུམ་བཅས་གཟིགས༔ མ་འགགས་གཙོ་བོ་ཡབ་ཡུམ་གྱི༔ ཐུགས་རྗེའི་རང་གདངས་སྤྲུལ་པའི་འཁོར༔ ཕྱི་རོལ་འདབ་མ་བཅུ་དྲུག་དང་༔ སུམ་ཅུ་རྩ་བཞིའི་གདན་གྱི་སྟེང་༔ པདྨ་ཟླ་གདན་མཛེས་པའི་ཁྲིར༔ རྡོ་རྗེའི་ལྷ་མོ་བཅུ་དྲུག་དང་༔ གནས་མཆོག་སོ་གཉིས་དཔའ་བོ་རྣམས༔ མཁྱེན་རབ་ལྷ་ཡི་རྣམ་རོལ་གར༔ དཀར་སེར་དམར་ལྗང་མཐིང་འོད་འབར༔ ཀུན་ཀྱང་ལྷ་བུ་གཞོན་ནུའི་ཉམས༔ མཆོད་པའི་གར་མཁན་རྣམས་ལ་ནི༔ དགྱེས་འཛུམ་ཆགས་པའི་སྤྱན་རས་གཡོ༔ བློ་ལྡན་ཕུར་བུ་དམར་གསལ་བཞད༔ ཕྱག་གཡས་དྲང་སྲོང་རྒྱལ་མཚན་ངོམ༔ གཡོན་པས་གཏེར་བུམ་གླེགས་བམ་མཚན༔ རྨ་བྱའི་ཁྲི་ལ་དགྱེས་པར་རོལ༔ དར་དང་རཏྣའི་རྒྱན་ཕྲེང་མཛེས༔ ཚངས་པ་གདོང་བཞི་གསེར་མདོག་སྒེག༔ ཞལ་བཞིས་རིག་བྱེད་རྣམ་བཞི་སྟོན༔ གསེར་གྱི་འཁོར་ལོའི་གདན་གྱི་སྟེང་༔ ངང་པའི་ཤིང་རྟ་དག་ལ་བཞུགས༔ གཡས་པས་རིག་བྱེད་གླེགས་བམ་དང་༔ གཡོན་པ་རྔ་ཡབ་ནོར་བུས་མཚན༔ ཞབས་གཉིས་ཙོག་པུའི་སྟབས་སུ་འགྱིང་༔ དར་གོས་རྒྱན་གྱིས་རབ་ཏུ་བརྒྱན༔ གཙོ་འཁོར་ཀུན་གྱི་གནས་གསུམ་དུ༔ ཨོཾ་ཨཱཿཧཱུྃ་གི་འོད་ཟེར་གྱིས༔ རིགས་ལྔ་ཡབ་ཡུམ་སྤྱན་དྲངས་ཏེ༔ ཡུམ་རྣམས་ཕྱག་གི་བུམ་པ་ཡིས༔ བདུད་རྩི་རྒྱུན་གྱི་ཁྲུས་བྱས་པས༔ སྒྲིབ་གཉིས་དག་སྟེ་ལྷ་རྣམས་ཀྱི༔ སྐུ་ཡི་གནས་ཀུན་བདུད་རྩིས་གང་༔ ཆུ་ལྷག་སྤྱི་བོར་བརྟན་པ་ལ༔ གཙོ་བོ་ཡབ་ཡུམ་སྤྱི་བོ་རུ༔ སྣང་བ་མཐའ་ཡས་པདྨ་དང་༔ གླེགས་བམ་བསྣམས་པས་དབུ་བརྒྱན་ཅིང་༔ འཁོར་རྣམས་རིགས་ལྔ་རང་རྟགས་རྒྱས༔ མཚན་པས་དབྱིངས་བཞུགས་ཡེ་ཤེས་ལྷ༔ མ་ལུས་འཁོར་བཅས་སྤྱན་དྲངས་གྱུར༔ སྤོས་རོལ་གདུང་བའི་དབྱངས་དང་བཅས༔ ཧྲཱིཿ རང་བྱུང་ཆོས་དབྱིངས་ཕོ་བྲང་དང་༔ ལྷོ་ཕྱོགས་ཚངས་པའི་ཞལ་གྱི་མཚོ༔ རི་བོ་རྩེ་ལྔ་གནས་ཡུལ་ནས༔ ངག་གི་ལྷ་མོ་སྤྲུལ་འཁོར་བཅས༔ དད་དང་དམ་ཚིག་གཉན་པོ་ཡིས༔ གནས་འདིར་བརྩེ་གདུང་མོས་པའི་བློས༔ སྤྱན་དྲངས་དམ་ཚིག་རྟེན་ལ་བཞུགས༔ ཨོཾ་པྲཛྙཱ་དེ་ཝཱི་མཉྫུ་ཤྲཱིི་བཛྲ་ས་མ་ཡཱ་ཛ༔ ས་མ་ཡཱ་ཏིཥྛ་ལྷན༔ ཕྱག་འཚལ་གུས་པས་བརྡ་ཕྱག་འཚལ༔ ཧྲཱིཿ རང་བྱུང་སྐྱེ་མེད་མཁའ་ཀློང་ལས༔ འགྲོ་བློའི་གཏི་མུག་མུན་སེལ་བ༔ མཁྱེན་རབ་ལྷ་མོ་སྤྲུལ་འཁོར་བཅས༔གུས་པའི་ཡིད་ཀྱིས་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོ༔ མཆོད་པའི་བྱེ་བྲག་འབུལ་བ་ནི༔ ཧྲཱིཿ དངོས་སུ་འབྱོར་དང་ཡིིད་ལས་སྤྲུལ༔ མེ་ཏོག་བདུག་སྤོས་མར་མེ་དྲི༔ ཞལ་ཟས་རོལ་མོའི་བྱེ་བྲག་གིས༔ ཤེས་རབ་ལྷ་མོ་འཁོར་བཅས་ཀྱིས༔ ཚོགས་དྲུག་སྲེད་ལེན་མི་མངའ་ཡང་༔ བདག་ཅག་ཚོགས་གཉིས་ཡོངས་རྫོགས་ཕྱིར༔ གུས་པས་འབུལ་ལོ་དགྱེས་པར་བཞེས༔ རྒྱལ་སྲིད་རིན་ཆེན་སྣ་བདུན་དང་༔ ཉེ་བའི་ལོངས་སྤྱོད་འདོད་ཡོན་ལྔ༔ གནས་དང་ཡོ་བྱད་འབྱོར་བའི་ཚོགས༔ ལྷ་དང་ཀླུ་ཡི་ཉེར་སྤྱོད་རྫས༔ འཕགས་པའི་ཞིང་དང་འཇིག་རྟེན་ཁམས༔ ཀུན་དུ་འགེངས་པའི་མཆོད་སྤྲིན་འབུལ༔ བཞེས་ནས་འགྲོ་རྣམས་ཐམས་ཅད་ཀྱི༔ ཚོགས་རྫོགས་གཏི་མུག་མུན་པ་སེལ༔ ཤེས་བྱ་ཀུན་མཁྱེན་དངོས་གྲུབ་སྩོལ༔ ཨོཾ་པྲཛྙཱ་དེ་ཝཱི་ས་པཱ་རི་ཝ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ཨཱཿཧཱུྃ༔ སྒོ་གསུམ་གུས་པས་འདི་བཞིན་བསྟོད༔ ཧྲཱིཿ གཏི་མུག་འཁོར་བའི་རྒྱ་མཚོ་ལས༔ རྟག་པར་འཁྲུལ་བའི་འགྲོ་བ་ཀུན༔ ཡང་དག་ལམ་ལ་སྒྲོལ་མཛད་མ༔ ལྷ་མོ་དབྱངས་ཅན་ཁྱོད་ལ་བསྟོད༔ ངོ་བོ་སྐྱེ་བ་མེད་པ་ལས༔ རྣམ་པ་གདུལ་བྱའི་འགྲོ་དོན་དུ༔ ཚངས་པའི་བུ་མོའི་རྣམ་པར་འཕྲུལ༔ ཆགས་མེད་ཆགས་པའི་སྒྱུ་ཐབས་ཅན༔ ཆགས་བྲལ་ཡེ་ཤེས་ལུས་འཆང་བ༔ འཇམ་དབྱངས་མཁྱེན་པའི་གཏེར་ཆེན་པོ༔ འཁོར་དང་སྤྲུལ་པའི་གར་བསྒྱུར་ཞིང་༔ འགྲོ་བློའི་མུན་པ་སེལ་ལ་བསྟོད༔ འཛབ་ཀྱི་དམིགས་བཟླས་འདི་ལྟར་བྱ༔ ཧྲཱིཿ རང་ཉིད་ངག་གི་དབང་ཕྱུག་མའི༔ ཐུགས་དབུས་དྭངས་ཤེལ་བུམ་པ་རུ༔ ཐབས་ཤེས་ཉི་ཟླའི་ག་འུའི་དཀྱིལ༔ ཐུགས་སྲོག་ཧྲཱིཿཡིག་གསལ་ལ་འཚེར༔ གཡས་བསྐོར་སྔགས་ཀྱི་ཕྲེང་བ་ནི༔ འོད་ལྔའི་ཁ་དོག་ཅན་དུ་འཁོར༔ ཨོཾ་པྲཛྙཱ་དེ་ཝཱི་མཉྫུ་ཤྲཱི་སརྦ་སིདྡྷི་ཕ་ལ་ཧཱུྃ༔ ཞེས་པ་འབུམ་ཕྲག་གསུམ་ལྔ་བདུན༔ གང་ཟག་བློ་དང་འཚམས་པར་བཟླས༔ ཐུན་མཐར་གསོལ་བ་འདེབས་པ་ནི༔ དྷཱིཿཧྲཱིཿ རྒྱལ་བ་ཀུན་གྱི་ཡུམ་གྱུར་མཆོག༔ མཁྱེན་གཉིས་ཡོན་ཏན་མཐར་ཕྱིན་པའི༔ ངག་གི་དབང་ཕྱུག་དབྱངས་ཅན་མ༔ བདག་ལ་གསན་ཅིང་དགོངས་སུ་གསོལ༔ བདག་ནི་ཚེ་རབས་ཐོག་མེད་ནས༔ ལས་ཉོན་བག་ཆགས་རྒྱ་མཚོར་བྱིང་༔ ཐོས་བསམ་སྒོམ་པའི་ནོར་དང་བྲལ༔ དོན་གཉིས་སྒྲུབ་པའི་བསམ་པ་སྟོར༔ རིགས་དྲུག་སྡུག་བསྔལ་རྦ་ལ་གཡེང༔ ཁྱེད་ལ་གདུང་བས་གསོལ་འདེབས་ན༔ མི་དགེའི་ལས་དང་སྡིག་པའི་གྲོགས༔ ཉོན་མོངས་རྟོག་པའི་ལྕགས་སྒྲོག་ལས༔ ད་ལྟ་ཉིད་དུ་ཐར་བར་མཛོད༔ ཐོས་པའི་མིག་གིས་ཡང་དག་ལམ༔ ཚུལ་བཞིན་མཐོང་བར་བྱིན་གྱིས་རློབས༔ བསམ་བྱའི་ཆོས་ཀུན་ཁོང་དུ་ཆུད༔ གོམས་པས་ཚེ་འདིར་བྱང་ཆུབ་ཆོས༔ མ་ལུས་རྒྱུད་ལ་ཡོངས་རྫོགས་ནས༔ དོན་གཉིས་འགྲུབ་པར་བྱིན་གྱིས་རློབས༔ རང་དོན་ཞི་མཐར་མི་ཞེན་པར༔ ཕན་བདེའི་རྩ་ལག་རྒྱལ་བའི་བསྟན༔ འཆད་རྩོད་རྩོམ་དང་བཤད་སྒྲུབ་ཀྱི༔ འཛིན་སྐྱོང་སྤེལ་བར་བྱིན་གྱིས་རློབས༔ དེ་ལྟར་གསོལ་བ་བཏབ་པའི་རྗེས༔ རང་སེམས་འཕྲོ་འདུས་བསྐྱེད་པའི་ལྷ༔ མི་དམིགས་སྟོང་པའི་ངང་དུ་བཞག༔ རྗེས་ཐོབ་དགེ་རྩ་འགྲོ་ལ་བསྔོ༔ དུས་གསུམ་ཤིས་པ་བརྗོད་པར་བྱ༔ བྱ་སླ་ཚེགས་ཆུང་དོན་ཆེ་བར༔ རྣལ་འབྱོར་ཀུན་གྱིས་ཉམས་ལེན་ཕྱིར༔ ཡང་ཟབ་དགོངས་པའི་གཏེར་དུ་གདམས༔ བློས་བྱས་རྟོག་གེའི་ཚིག་ལས་འདས༔ བློ་བྲལ་སྣང་བའི་བརྡ་རུ་འཆར༔ འགྲོ་དོན་གང་འབྲེལ་ཤེས་རབ་འཕེལ༔ གུ་ཧྱ༔ ཞེས་དམ་ཆོས་ཡང་ཟབ་པདྨའི་ཐུགས་ཐིག་གི་ཆ་ལག་དབྱངས་ཅན་མའི་རྒྱུན་ཁྱེར་བསྡུས་པ་གཞན་ལ་ཕན་པའི་གང་ཟག་མཆོག་དེས་བསྐུལ་ངོར༔ རང་བྱུང་རིག་པའི་རྩལ་ལས་ཤར་བ་དགོངས་པའི་གཏེར་དུ་ངེས་པ་རྙེད་དེ་བཅོས་བསླད་མེད་པར་རྒྱ་སྤྲུལ་མིང་པས་བྲིས་པ་ཛ་ཡནྟུ༔ དགེའོ༔