སྨན་གྱི་ལྷ་མོའི་གཏོར་འབུལ་སྨན་གྱི་སྐྱེད་ཚལ།
དབྱངས་ཅན་ཐུགས་ཀྱི་སྒྲུབ་པ་ལས༔ སྨན་གྱི་ལྷ་མོའི་གཏོར་འབུལ་སྨན་གྱི་སྐྱེད་ཚལ་ཞེས་བྱ་བ་བཞུགས་སོ༔
ཤེས་རབ་དབྱིངས་ཀྱི་རྗེ་མོར་འདུད༔ སྨན་གྱི་ལྷ་མོ་སྤུན་བདུན་ལ༔ ཚེས་བརྒྱད་ཉ་དང་གནམ་སྟོང་བཅུ༔ ཉེར་ལྔ་ལ་སོགས་དུས་བཟང་པོར༔ རྒྱུ་སྐར་རྒྱལ་དང་གཟའ་ཕུར་བུ༔ གཙང་སྦྲ་ལྡན་པས་མཆོད་གཏོར་བརྩམ༔ དངུལ་ལམ་ཟངས་དམར་སྣོད་གཙང་དུ༔ འབྲས་བཤོས་ཟླུམ་པོ་གཙོ་འཁོར་བདུན༔ ཤ་ཁྲག་སྒོག་ཙོང་མ་གོས་པར༔ དཀར་མངར་འོ་ཕུད་སྨན་འབྲུར་བཅས༔ སྤོས་བདུག་རོལ་མོ་སྙན་དབྱངས་ཀྱིས༔ རང་ཉིད་དབྱངས་ཅན་ལྷ་མོར་བསྒོམ༔ ཐུགས་ནས་འོད་ཟེར་ཟླ་ཤེལ་ལྟར༔ འཕྲོས་པས་སྨན་གྱི་ལྷ་མོ་བདུན༔ ལྷོ་ཕྱོགས་རྒྱ་མཚོའི་གླིང་འགྲམ་ནས༔ དགྱེས་ཤིང་མོས་པའི་ཐུགས་དང་བཅས༔ མདུན་མཁར་ཏ་ལེར་བྱོན་པ་ནི༔ པད་ཟླར་བཞེངས་ཏེ་བཞུགས་བསམ་ལ༔ མཆོད་རྫས་སྔགས་དྲུག་ཕྱག་རྒྱས་སྦྱངས༔ དེ་ནས་མཆོད་འབུལ་ཚིག་འདི་གྱེར༔ དྷཱིཿཧྲཱིཿ སྔོན་ཚེ་བཻཌཱུར་སྣང་བའི་གྲོང་ཁྱེར་དུ༔ འགྲོ་ཀུན་ནད་སེལ་སངས་རྒྱས་བཅོམ་ལྡན་འདས༔ སྨན་ལྷ་བདེ་གཤེགས་མཆེད་བརྒྱད་སྤྱན་སྔ་རུ༔ ལྷ་དང་དྲང་སྲོང་ཁྱད་པར་མཚོ་ལྡན་མའི༔ ཕྲིན་ལས་ཐོགས་མེད་སྒྲུབ་པར་ཞལ་བཞེས་པའི༔ སྨན་གྱི་ལྷ་མོ་སྤུན་བདུན་གནས་འདིར་གཤེགས༔ དྭངས་གསལ་པདྨ་དཀར་པོ་ཟླ་གདན་ལ༔ དགྱེས་ཤིང་བརྩེ་བའི་ཚུལ་གྱིས་མདུན་མཁར་བཞུགས༔ ཤེས་རབ་ལྷ་མོ་ཚུལ་བཞིན་བསྒྲུབ་པ་ལ༔ འབྱུང་འཁྲུགས་ནད་ཀུན་ཞི་ཕྱིར་གུས་ཕྱག་འཚལ༔ ཁྱེད་རྣམས་དགྱེས་པ་བསྐྱེད་པའི་མཆོད་རྫས་ནི༔ སྨན་ཤིང་མེ་ཏོག་ལོ་འདབ་འབྲས་བུར་བཅས༔ དྭངས་བསིལ་ཡན་ལག་བརྒྱད་ལྡན་ཁྲུས་ཀྱི་ཆབ༔ ཙནྡན་དཀར་དམར་བསྲེགས་པའི་བསུང་ཞིམ་དྲི༔ ཡིད་འོང་འབྲུ་མར་ཏིལ་གྱི་སྒྲོན་མེ་སྦར༔ དཀར་གསུམ་འབྲུ་སྨན་སྦྱར་བའི་ལྷ་ཡི་བཤོས༔ སིལ་སྙན་གླིང་བུ་འབུད་དཀྲོལ་རོལ་མོས་མཆོད༔ སྨན་གྱི་ལྷ་མོ་ཉོན་མོངས་གདུང་སེལ་མ༔ མ་ལུས་འཁོར་དང་བཅས་པའི་ཐུགས་དམ་བསྐང་༔ བདག་ཅག་ཤེས་རབ་མིག་དང་རབ་བྲལ་བས༔ མི་དགེ་བཅུ་སྤྱོད་ཉམས་གྲིབ་མཛེ་ཡུགས་གོས༔ གནས་མལ་མཆོད་རྫས་འབག་རྩོག་དྲི་མས་གོས༔ ཐམས་ཅད་མ་ལུས་མཐོལ་བཤགས་བཟོད་པར་བཞེས༔ ཧྲཱིཿ སྔོན་ཚེ་འཕགས་མའི་བཀའ་ཉན་རྒྱལ་པོའི་སྲས༔ བར་དུ་སྨན་གྱི་གཉེར་འཛིན་ནད་ཀུན་འཇོམས༔ ཐ་མ་དབྱངས་ཅན་ཤེས་རབ་མིག་འབྱེད་ལྷ༔ འགྲོ་བའི་སྐྱབས་གྱུར་སྨན་གྱི་ལྷ་མོར་བསྟོད༔ སྤྲུལ་པའི་རྣམ་རོལ་གཅིག་ཏུ་མ་ངེས་ཀྱང་༔ སྐུ་མདོག་དཀར་དམར་བཅུ་དྲུག་ན་ཚོད་ལ༔ ལང་ཚོའི་སྐྱོན་བྲལ་ལྟ་བས་ཆོག་མི་ཤེས༔ སྨན་གྱི་ལྗོན་པ་མེ་ཏོག་རྒྱས་པའི་ཚལ༔ ཡིད་འོང་གླིང་བུས་གཞན་ཡིད་ཚིམ་ལ་བསྟོད༔ དར་དང་རིན་ཆེན་ནོར་བུའི་དོ་ཤལ་དང་༔ རཏྣའི་སོར་གདུབ་སྙན་རྒྱན་གསེར་གཡུས་སྤྲས༔ མུ་ཏིག་སྣ་ཚོགས་འཕྱངས་འཕྲུལ་གདུ་བུ་འཁྲོལ༔ མཁའ་ལ་གར་བསྒྱུར་མངོན་ཤེས་སྟོན་ལ་བསྟོད༔ ཁྱོད་ལ་རྩེ་གཅིག་མཆོད་ཅིང་འདོད་གསོལ་ནི༔ རྒྱལ་བསྟན་བཤད་དང་སྒྲུབ་པས་འཛིན་པའི་སྡེ༔ མི་ཤེས་རྨོངས་པའི་མུན་པར་མི་འཕྱན་པར༔ ཤེས་རབ་གསལ་བའི་སྣང་བས་དབུགས་དབྱུང་མཛོད༔ ལོག་རྟོག་ཚིག་གི་དོན་ལ་རབ་རྨོངས་ཤིང་༔ སྡེབ་ལེགས་སྤེལ་མའི་ཕྲེང་མཛེས་མི་འཛིན་པར༔ རྟག་ཏུ་འཁྲུལ་བའི་ནོངས་པས་གོས་པ་རྣམས༔ སྒྲ་ཚད་རིག་པའི་རྒྱན་གྱིས་མཛེས་པར་མཛོད༔ འདུ་ཁམས་རྙོག་པའི་ནད་ཀྱིས་དཀྲུགས་པ་རྣམས༔ ཐུགས་བརྩེའི་སྨན་ཆེན་བདུད་རྩིས་གསོ་བར་མཛོད༔ བཟོ་རིག་འཕྲུལ་གྱི་ལྡེ་མིག་གིས་ཕྱེ་ནས༔ ཆུང་ངུའི་རིན་ཐང་ཆེན་པོར་སྤེལ་བར་མཛོད༔ ཁྱད་པར་རྒྱལ་གསུང་རང་བཞིན་བརྗོད་པ་དང་༔ ཕྱི་རོལ་དཔེ་སོགས་འཁྱོག་པོའི་བཤད་སྲོལ་ཀུན༔ བསླུ་མེད་བྱང་ཆུབ་སྙིང་པོའི་ལམ་མཆོག་ལ༔ སྐལ་ལྡན་རྣམས་ཀྱི་ཉམས་ལེན་འཕེལ་བར་མཛོད༔ ཅེས་བརྗོད་གཏོར་མ་མེ་ལ་བསྲེག༔ དམ་ཉམས་ཡུགས་མཛེ་དམེ་གྲིབ་འཛེམས༔ འདི་ནི་རིག་གནས་སྨན་ལ་སོགས༔ གང་བསླབ་བར་ཆད་མེད་པར་འགྱུར༔ མཚོ་རྒྱལ་དགོངས་པའི་གསང་མཛོད་ནས༔ འགྲོ་ལ་ཕན་ཕྱིར་སྐལ་ལྡན་གྱི༔ མིང་འཛིན་ཆོས་གཟུགས་པ་དེས་བྲིས༔ ཆོས་རྒྱུད་འཛིན་པའི་གྲོགས་སུ་ཤོག༔ ས་མ་ཡཱ༔ རྒྱ་རྒྱ་རྒྱ༔ སྐལ་ལྡན་ལུང་རིག་གླིང་པ། མཆན།