རྗེས་གནང་བྱིན་རླབས་སྒོ་འབྱེད།

ཡང་ཟབ་དབྱངས་ཅན་ཐུགས་སྒྲུབ་ལས༔ རྗེས་གནང་བྱིན་རླབས་སྒོ་འབྱེད་བཞུགས༔

པྲཛྙཱ་དེ་ཝཱི་སིདྡྷི་ཧཱུྃ༔ དུས་གསུམ་རྒྱལ་བས་བསྔགས་པའི་ཡུམ༔ ཤེས་རབ་སྒྲ་དབྱངས་ལྷ་མོར་འདུད༔ དེ་ཡི་སྒྲུབ་པ་བྱེད་འདོད་ལ༔ རྗེས་གནང་བྱིན་རླབས་སྒོ་འཕར་འབྱེད༔ ས་མ་ཡཱ༔ དབེན་ཞིང་སྤྲོ་བ་འཕེལ་བའི་གནས༔ གོང་མས་བསྙེན་སྒྲུབ་བྱིན་བརླབས་ཤུལ༔ མཁས་པའི་བཞུགས་མལ་ས་ལ་ནི༔ དཀྱིལ་འཁོར་བློ་དང་འཚམས་པར་བྱ༔ ཐིག་ཚོན་འབྲིའམ་སྤྲོས་མེད་ལ༔འབྲུ་ཚོམ་ལྔ་བཀོད་དབུས་མ་ལ༔ དབྱངས་ཅན་སྐུ་དང་མདུན་དུ་ཐུགས༔ མར་མེ་གཡས་སུ་ཡོན་ཏན་བཤོས༔ རྒྱབ་ཏུ་གསུང་གཟུགས་གཡོན་ཕྲིན་ལས༔ མེ་ལོང་དྷཱི༔ཧྲཱིཿས་མཚན་པ་བཀོད༔ མཐའ་བསྐོར་ལྷོ་ནུབ་ནས་བརྩམས་ཏེ༔ བདུག་སྤོས་སྔོན་པོའི་ཉེར་སྤྱོད་བཤམས༔ སློབ་དཔོན་རང་ཉིད་མདུན་གྱི་རྫས༔ སྒྲུབ་གཞུང་ཇི་བཞིན་བསྙེན་པ་གསོ༔ སྒོམ་སྒྲུབ་དམིགས་པའི་སྲང་ལ་གཞུར༔ ལྷ་སྔགས་འོད་ཀྱིས་སྲིིད་ཞི་ཡི༔ དྭངས་བཅུད་མ་ལུས་ཐམས་ཅད་དང་༔ ཁྱད་པར་མཁས་པ་ཐམས་ཅད་དང་༔ ཤེས་བྱ་རིག་གནས་བཅུ་ཕྲག་སོགས༔ ཇི་སྙེད་བཀའ་བསྟན་འཆད་རྩོད་རྩོམ༔ ཀུན་ཀྱང་ཁབ་ལེན་ལྕགས་ཕྱེ་ལྟར༔ རང་དང་སྒྲུབ་རྫས་རྣམས་ལ་བསྟིམ༔ མཆོད་བསྟོད་ནོངས་པ་འདི་བཞིན་བཤགས༔ ཧྲཱིཿ ངག་གི་དབང་ཕྱུག་གཙོ་འཁོར་བསྟེན་པ་ལ༔ གཙང་སྦྲ་ཞན་ཅིང་བརྩོན་འགྲུས་ཆུང་བ་དང་༔ སྔགས་ཀྱི་སྐྱོན་ལ་མི་ཚིག་བར་བཅད་ནས༔ ཏིང་འཛིན་བྱིང་རྨུགས་ཉམས་ཆག་མ་ལུས་པ༔ མི་འཆབ་བཤགས་སོ་ཚངས་པའི་དངོས་གྲུབ་སྩོལ༔ ཡི་གེ་བརྒྱ་པ་ཉེར་གཅིག་གམ༔ ཡང་ན་བདུན་གྱིས་ལྷག་ཆད་སྐོང་༔གསོལ་བ་བཏབ་རྗེས་སྒྲུབ་རྫས་ནི༔ ལྷར་གསལ་དངོས་གྲུབ་ཚིག་འདིས་བསྐུལ༔ ཧྲཱིཿ སྨྲ་བའི་རྒྱལ་མོ་མཚོ་ལྡན་དབྱངས་ཀྱི་ལྷ༔ མཁྱེན་པའི་གཏེར་མཛོད་རྗེ་བཙུན་འཇམ་དཔལ་དབྱངས༔ མཚན་དཔེ་འགྱུར་མེད་སྐུ་ཡི་དངོས་གྲུབ་ཀྱིས༔ རྣལ་འབྱོར་ལུས་ལ་བྱིན་གྱིས་བརླབ་ཏུ་གསོལ༔ འགགས་མེད་ཚངས་དབྱངས་གསུང་གི་དངོས་གྲུབ་ཀྱིས༔ རྣལ་འབྱོར་ངག་ལ་བྱིན་གྱིས་བརླབ་ཏུ་གསོལ༔ འཁྲུལ་མེད་སྟོང་གསལ་ཐུགས་ཀྱི་དངོས་གྲུབ་ཀྱིས༔ རྣལ་འབྱོར་སེམས་ལ་བྱིན་གྱིས་བརླབ་ཏུ་གསོལ༔ རྡོ་རྗེ་ལྷ་མོ་བཅུ་དྲུག་ཤེས་རབ་དབྱིག༔ སྟོང་ཉིད་དགའ་བ་བཅུ་དྲུག་དངོས་གྲུབ་ཀྱིས༔ ཡོན་ཏན་འདོད་འབྱུང་བྱིན་རླབས་བདག་ལ་སྩོལ༔ གནས་མཆོག་སོ་གཉིས་ཞིང་བཞུགས་ཤེས་རབ་ལྷ༔ མཁྱེན་པའི་གཏེར་གྱི་ཚོགས་དྲུག་ཕར་ཕྱིན་བཅུའི༔ རང་རྩལ་འགགས་མེད་དཔའ་བོ་སུམ་ཅུ་གཉིས༔ ཕྲིན་ལས་ཐོགས་མེད་འགྲོ་འདུལ་དངོས་གྲུབ་ཀྱིས༔ རབ་འབྱམས་ལས་ཀུན་འགྲུབ་པར་བྱིན་གྱིས་རློབས༔ རྩ་སྔགས་ཤམ་བུར་དབྱངས་གསལ་མཐར༔ ཀཱ་ཡ་ཝཀྐ་ཙིཏྟ་གུ་ཎ་ཀརྨ་སརྦ་སིདྡྷི་ཕ་ལ་ཧཱུྃ༔ སྒྲུབ་རྫས་གནས་ལྔར་གཏུགས་བྱས་ཏེ༔ དངོས་གྲུབ་ཐམས་ཅད་ཐོབ་པར་བསམ༔ དེ་ནས་སློབ་མར་རྗེས་གནང་བས༔ ལྷ་ལ་སྙན་གསན་འདི་བཞིན་དབབ༔ ཨེ་མ་ཧོ༔ ཡི་དམ་ལྷ་མཆོག་འཕགས་མ་གཙོ་འཁོར་དགོངས༔ དེང་འདིར་ཤེས་རབ་ལྷ་མོ་སྒྲུབ་འདོད་པའི༔ སྐལ་ལྡན་རྣམས་ལ་རྗེས་གནང་བྱིན་རླབས་སྒོ༔ བརྩེ་བའི་ཐུགས་རྗེས་ཉེ་བར་བསྩལ་དུ་གསོལ༔ ལན་གསུམ༔ བདག་ཉིད་དམ་ཚིག་བྲན་གྱི་ཚུལ༔ ལྷ་ཉིད་རྗེ་བོར་མོས་པ་ཡི༔ ཞུས་དོན་འགྲུབ་བསམ་མི་དམིགས་བཞག༔ ལས་བུམ་རྡོ་རྗེ་རྣམ་འཇོམས་ཀྱི༔ གཟུངས་རིང་ལན་གསུམ་བཟླས་ཤིང་བསྒྲུབ༔ དེ་རྗེས་སློབ་མ་མདུན་དུ་འཁོད༔ རྡོ་རྗེ་རྣམ་འཇོམས་ཁྲུས་ནས་ཕྱུང་༔ བགེགས་ལ་གླུད་གཏོར་ཆབ་ཀྱིས་བྲན༔ སྭ་བྷ་ཝ་ཡི་སྔགས་ཀྱིས་སྦྱངས༔ འདོད་ཡོན་ལྔ་ལྡན་ཕུང་པོར་བསམ༔ གནོད་མཛེས་སྔགས་ཀྱིས་ཚིམས་པར་བསྔོ༔ རང་ཉིད་འཇིག་རྟེན་གསུམ་རྒྱལ་གྱི༔ སྙེམས་པས་མཐར་བསྐྲད་སྲུང་འཁོར་བསྒོམ༔ སྡིག་སྦྱང་ཏིལ་དང་མེ་ཆུ་བཤམས༔ སློབ་མའི་སྙིང་གར་སྡིག་སྒྲིབ་ནི༔ ཡི་གེ་ཀཾ་ཡིག་འཕྲེད་ཉལ་སྒོམ༔ ལྟེ་བར་བྱང་ཆུབ་སེམས་ཀྱི་མེ༔ གཏུམ་མོ་ཚ་ཞིང་ཕྲ་ལ་མྱུར༔ འབར་བས་ཀཾ་ཡིག་མགོ་གྱེན་བསྟན༔ རླུང་གིས་དེད་ཅིང་སྣ་བུག་གཡས༔ དུག་ལྔའི་ལས་དང་ལྷན་ཅིག་བུད༔ མདུན་དུ་མེ་ཡི་ངོ་བོ་ནི༔ རྡོ་རྗེ་ཌཱཀྐི་ཞལ་གདངས་པའི༔ ནང་དུ་ཏིལ་ལ་སྡིག་གཟུགས་ཀྱིས༔ ཐིམ་པ་ལྗགས་ཀྱི་མེ་ཡིས་བསྲེགས༔ བསྐལ་པའི་ཆུ་ཡིས་བཀྲུས་ཤིང་བཤལ༔ ཨོཾ་སརྦ་པ་པཾ་ཛྭ་ལ་རཾ་ཁཾ་བི་ཤུདྡྷེ་ཤྭ་དྷ་ན་ཡེ་སྭཱ་ཧཱ༔ འདི་ནི་གཏེར་གཞུང་དུ་མི་སྣང་ཡང་རང་བཟོས་བཞག མཆན། མཐར་ནི་སྦྱང་བྱ་སྦྱོང་བྱེད་ཀུན༔ མི་དམིགས་སྟོང་པའི་ངང་དུ་བཞག༔ སློབ་མས་ཤེལ་དང་མེ་ལོང་དང་༔ སྒྲ་སྙན་ལ་སོགས་ཤེས་རབ་ཀྱི༔ རྟེན་འབྲེལ་རྫས་ཀྱི་མཎྜལ་འབུལ༔ བླ་མས་ཆོས་ཀྱི་ཆེ་བ་དང་༔ ལས་འབྲེལ་མི་རྟག་ངེས་འབྱུང་གིས༔ རྒྱུད་བསྐུལ་ཡིད་རབ་ཚིམ་པར་བཤད༔ སློབ་མས་ཕྱག་འཚལ་གསོལ་གདབ་ནི༔ ཀྱེ༔ ངག་དབང་རྡོ་རྗེ་གླུ་མ་ཡི༔ སྨྲ་བའི་སྤོབས་པ་མཆོག་ཐོབ་ཕྱིར༔ རིགས་བདག་བླ་མ་མཁྱེན་པའི་གཏེར༔ ཤེས་རབ་ལྷ་མོའི་རྗེས་གནང་སྩོལ༔ ལན་གསུམ་ཞུས་རྗེས་བླ་མ་ཡིས༔ གནང་བ་སྩོལ་བའི་ཚིག་འདི་བསྒྲགས༔ ཧོ༔ སྔོན་ནས་ལས་ཀྱི་འཕྲོ་ལྡན་ཅིང་༔ ཐོས་བསམ་སྒོམ་ལ་བརྩོན་འདོད་ཅིང་༔ ཤེས་རབ་ལྷ་ལ་མོས་པའི་བུ༔ དེང་འདིར་བྱིན་རླབས་རྗེས་གནང་བྱ༔ མདུན་མཁར་ཚོགས་ཞིང་གསལ་གདབ་པའི༔ དམིགས་པ་འབོག་ཅིང་སྐྱབས་སེམས་ཀྱི༔ ལན་གསུམ་རྗེས་ཟློས་བྱ་རུ་གཞུག༔ སློབ་མའི་ཕུང་ཁམས་ཀྱིས་མཚོན་པའི༔ སྣོད་བཅུད་མི་དམིགས་སྟོང་པར་བསམ༔ སྟོང་པའི་ངང་ལས་སྐད་ཅིག་གིས༔ སློབ་མ་སྒྲ་དབྱངས་ལྷ་མོར་བསྐྱེད༔ སྙིང་ཁར་ཡེ་ཤེས་འཇམ་པའི་དབྱངས༔ དམར་སེར་བཀྲག་མདངས་ལྡན་པར་སྒོམ༔ དེ་ཡི་ཐུགས་ཀར་དྷཱིཿཡིག་ལས༔ འོད་འཕྲོས་སངས་རྒྱས་བྱང་སེམས་ཀུན༔ འཇམ་དབྱངས་ཡབ་ཡུམ་སྐུ་དང་སྔགས༔ ཕྱག་མཚན་བུ་ཡུག་འཚུབ་བཞིན་བྱོན༔ བསྐྱེད་པའི་སྐུ་དང་དབྱེར་མེད་བསམ༔ རོལ་མོ་འཁྲོལ་ཞིང་རྩ་སྔགས་བརྗོད༔ དམིགས་པ་ཡང་གསལ་ཕེབས་པའི་རྟགས༔ ལུས་འདར་དབུགས་འཚངས་སྣང་བ་བུན༔ ལེགས་སྦྱར་སྐད་སྨྲ་བདེ་སྟོང་འབར༔ ཏིཥྛའི་སྔགས་ཀྱིས་བརྟན་པར་བྱ༔ དེ་ནས་དངོས་གཞིར་རྣམ་གྲངས་ལྔའི༔ རྗེས་གནང་ཞུ་ཕྱིར་གསོལ་འདེབས་ནི༔ ཀྱེ་ཧོ་མཁྱེན་རབ་བདག་ཉིད་བླ་མ་རྗེ༔ མཁྱེན་པའི་གཏེར་ཆེན་སྨྲ་བའི་དབང་ཕྱུག་མའི༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ རྗེས་གནང་ཟབ་མོས་བདག་རྒྱུད་བྱིན་གྱིས་རློབས༔ དེ་ནས་རིགས་བདག་བླ་མ་ཡི༔ སྐུ་རྟེན་སྤྱི་བོར་བཞག་བྱས་ཏེ༔ ཨོཾ༔ ངག་གི་དབང་ཕྱུག་དབྱངས་ཅན་མའི༔ འགྱུར་མེད་སྐུ་ཡི་བྱིན་རླབས་མཐུས༔ སྐལ་ལྡན་ལུས་ལ་བྱིན་གྱིས་རློབས༔ མཚན་དཔེས་བརྒྱན་པའི་སྐུ་ཐོབ་ཤོག༔ རྩ་སྔགས་ཤམ་བུར་ཀཱ་ཡ་ཨ་བྷི་ཥིཉྩ་ཨོཾ༔ དེ་ཚེ་དཔོན་སློབ་གཉིས་ཀ་ཡིས༔ དམིགས་པ་སྐུ་རྟེན་དབྱངས་ཅན་མའི༔ སྤྱི་བོར་རྣམ་སྣང་སྐུ་མདོག་དཀར༔ འཁོར་ལོ་དྲིལ་འཛིན་སྤྱི་བོར་ཨོཾ༔ འོད་ཟེར་བུང་བའི་ཚོགས་འཕྲོས་པས༔ རྒྱལ་ཀུན་སྐུ་ཡི་རྩི་བཅུད་བསྡུས༔ སློབ་མའི་ལུས་ལ་ཐིམ་པ་ཡིས༔ མཚན་དཔེའི་སྐུ་ཡི་རྗེས་གནང་ཐོབ༔ དེ་མཐར་དེ་ཡི་དམ་ཚིག་ཏུ༔ གཟུགས་སྣང་ལྷ་སྐུའི་རོལ་པར་བསམ༔ གསུང་རྟེན་དབྱངས་གསལ་མགྲིན་པར་བཞག༔ ཨཱཿ གསུང་གི་ཉི་མ་དབྱངས་ཅན་མའི༔ འགགས་མེད་གསུང་གི་བྱིན་རླབས་མཐུས༔ སྐལ་ལྡན་ངག་ལ་བྱིན་གྱིས་རློབས༔ ཚངས་དབྱངས་དྲུག་ཅུའི་གསུང་ཐོབ་ཤོག༔ རྩ་སྔགས་ཤམ་བུར་ཝཀྐཱ་ཨ་བྷི་ཥིཉྩ་ཨཱཿ དེ་ཚེ་གཉིས་ཀས་དམིགས་པ་ནི༔ ལྷར་གསལ་མགྲིན་པར་སྣང་མཐའ་དམར༔ པདྨ་དྲིལ་འཛིན་མགྲིན་པར་ཨཱཿ འོད་ཟེར་གློག་ཞགས་མྱུར་འཕྲོས་པས༔ རྒྱལ་ཀུན་གསུང་གི་དངོས་གྲུབ་བསྡུས༔ སློབ་མའི་ངག་ལ་ཐིམ་པ་ཡིས༔ ཚངས་དབྱངས་གསུང་གི་རྗེས་གནང་ཐོབ༔ དེ་མཐར་དེ་ཡི་དམ་ཚིག་ཏུ༔ སྒྲ་གྲགས་སྔགས་ཀྱི་རོལ་པར་བསམ༔ ཐུགས་རྟེན་མར་མེ་སྙིང་ཁར་གཏུགས༔ ཧཱུྃ༔ སྨྲ་བའི་རྒྱལ་མོ་སྒྲ་ལྡན་མའི༔ འཁྲུལ་མེད་ཐུགས་ཀྱི་བྱིན་རླབས་མཐུས༔ སྐལ་ལྡན་སེམས་ལ་བྱིན་གྱིས་རློབས༔ མཁྱེན་གཉིས་བརྩེ་བའི་ཐུགས་ཐོབ་ཤོག༔ རྩ་སྔགས་ཤམ་བུར་ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་སློབ་དཔོན་དམིགས་པ་ནི༔ སྒྲུབ་རྫས་ལྷར་བསྐྱེད་སྙིང་ག་རུ༔ མི་བསྐྱོད་རྡོ་རྗེ་དྲིལ་འཛིན་མཐིང་༔ ཐུགས་ཀར་ཧཱུྃ་སྔོན་འོད་ཟེར་མཛེས༔ རྒྱལ་ཀུན་ཐུགས་ཀྱི་བཅུད་བསྡུས་ཤིང་༔ སློབ་བུའི་སྙིང་ཁར་ཐིམ་པ་ཡིས༔ མཁྱེན་གཉིས་ཐུགས་ཀྱི་རྗེས་གནང་ཐོབ༔ དེ་མཐར་དེ་ཡི་དམ་ཚིག་ཏུ༔ དྲན་རྟོག་མི་དམིགས་སྟོང་པའི་རྩལ༔ ཤར་ཚད་ཆོས་ཀྱི་ཚིག་དོན་གཞལ༔ ཡོན་ཏན་གཏོར་མ་ལྟེ་བར་བཞག༔ སྭ༔ ངག་གི་ལྷ་མོ་མཚོ་བྱུང་མའི༔ འདོད་འབྱུང་ཡོན་ཏན་བྱིན་རླབས་མཐུས༔ སྐལ་ལྡན་ཀུན་གཞིར་བྱིན་གྱིས་རློབས༔ མི་ཟད་ཡོན་ཏན་མཆོག་ཐོབ་ཤོག༔ རྩ་སྔགས་ཤམ་བུར། གུ་ཎ་ཨ་བྷི་ཥིཉྩ་སྭ༔ དེ་ཚེ་དེ་ཡི་དམིགས་པ་ནི༔ སྔར་བཞིན་ལྷ་བསྐྱེད་ལྟེ་བ་རུ༔ རིན་འབྱུང་སེར་པོ་རིན་ཆེན་དྲིལ༔ ལྟེ་བ་སྭ་སེར་གསེར་ཞུན་མདངས༔ འོད་འཕྲོས་རྒྱལ་ཀུན་ཡོན་ཏན་བཅུད༔ རབ་བསྡུས་སློབ་བུའི་ལྟེ་བར་བསྟིམ༔ མི་ཟད་ཡོན་ཏན་རྗེས་གནང་ཐོབ༔ དེ་ཡི་དམ་ཚིག་དུས་ཀུན་ཏུ༔ གཞན་ཕན་བློ་དང་མི་འབྲལ་བ༔ ཡོན་ཏན་འབྱུང་བའི་སྒོ་འཕར་ཕྱེ༔ ཕྲིན་ལས་མེ་ལོང་གསང་བར་བཞག༔ ཧཱ༔ ངག་དབང་ལྷ་མོ་རྒྱལ་ཡུམ་གྱི༔ རབ་འབྱམས་ཕྲིན་ལས་བྱིན་རླབས་མཐུས༔ སྐལ་ལྡན་ཚོགས་དྲུག་བྱིན་གྱིས་རློབས༔ འགྲོ་དོན་ཕྲིན་ལས་ཀུན་འགྲུབ་ཤོག༔ རྩ་སྔགས་ཤམ་བུར། ཀརྨ་ཨ་བྷི་ཥིཉྩ་ཧཱ༔ དེ་ཚེ་དཔོན་སློབ་དམིགས་པ་ནི༔ སྒྲུབ་པོ་ལྷར་གསལ་གསང་བ་རུ༔ དོན་གྲུབ་ལྗང་ཁུ་རྒྱ་གྲམ་དྲིལ༔ གསང་བར་ཧཿལྗང་རྗེས་ཆགས་འོད༔ རབ་འཕྲོས་རྒྱལ་ཀུན་ཕྲིན་ལས་བཞིའི༔ བཅུད་བསྡུས་སློབ་བུའི་གསང་བར་བསྟིམ༔ དེ་ཡི་དམ་ཚིག་ཚོགས་དྲུག་གི༔ དྲན་རྟོག་ཤར་དང་བྱ་བྱེད་ལ༔ མིག་གི་འབྱེད་འཛུམ་ལག་པ་ཡི༔ བརྐྱང་བསྐུམ་ཚུན་ཆད་དུས་རྟག་ཏུ༔ གཞན་ལ་ཕན་བདེ་འབྱུང་གནས་སུ༔ ཤེས་པས་དགེ་བཅུར་བརྩོན་འགྲུས་བརྩམ༔ ས་མ་ཡཱ༔ དེ་ལྟར་རྗེས་གནང་རྣམ་ལྔ་ལ༔ རྫས་དང་བསྐུལ་ཚིག་སྔགས་བྱང་དང་༔ ཕན་ཡོན་དམིགས་པ་དམ་ཚིག་དྲུག༔ མཚམས་སྦྱོར་སྤྱི་ཆིངས་ཤེས་པར་བྱ༔ དབྱངས་ཅན་རྗེས་གནང་ཟབ་མོ་འདི༔ ལྟ་སྤྱོད་ཟུང་འབྲེལ་སློབ་དཔོན་གྱིས༔ མོས་གུས་ཡིད་ཆེས་སློབ་མ་ལ༔ ཕན་ཚུན་རྟེན་འབྲེལ་མ་འཆུགས་པར༔ སྨོན་ལམ་གཏད་རྒྱ་སུས་ཐོབ་པ༔ སྔོན་ལས་ངན་པའི་སྒྲིབ་པ་ཡང་༔ རེ་ཞིག་སྲབ་པ་ལྟར་གྱུར་ན༔ འཕྲལ་རྐྱེན་བྱིང་རྨུགས་བརྗེད་ངེས་ཀྱིས༔ ཉེས་སྒྲིབ་འདགས་པར་སྨོས་ཅི་འཚལ༔ ཤེས་བྱ་ཆུང་བའི་གང་ཟག་ཀྱང་༔ ཤེས་རབ་དབྱར་མཚོ་ལྟར་འཕེལ་ནས༔ བསྟན་ལ་ཕན་པའི་འཆད་རྩོད་རྩོམ༔ ཐོགས་མེད་འབྱུང་བར་སོམ་ཉི་བྲལ༔ ཆོས་འདིར་དབང་བའི་གང་ཟག་བདུན༔ ཁྱད་པར་ལུང་ཟིན་སྐལ་ལྡན་གཉིས༔ མགྲིན་པར་སྨེ་བ་འདབ་བརྒྱད་དབྱིབས༔ གཞན་ལས་ཁྱད་འཕགས་གཟུངས་སྤོབས་ལྡན༔ དེ་ལྟ་བུ་ལ་འཕྲོད་པར་གྱིས༔ བཀའ་ཡི་སྲུང་མས་མེལ་ཚེ་མཛོད༔ ས་མ་ཡཱ༔ གུ་ཧྱ༔ ཞེས་པའང་དགོངས་གཏེར་དག་སྣང་ཟབ་མོའི་ཆོས་སྡེ་ལས་བྱུང་བ་བཞིན་ལུང་ཟིན་སྤྲུལ་པའི་གང་ཟག་གཞན་ལ་ཕན་དེས་བསྐུལ་ངོར་རྒྱལ་དབང་མཚོ་སྐྱེས་བླ་མའི་དབུགས་དབྱུང་ཐོབ་པའི་རིག་འཛིན་ལུང་རིག་གླིང་པས་ཕབ་པ་དགེའོ༔