འོད་ཟེར་ཅན་མའི་བརྒྱུད་འདེབས་ལས་ཅན་སྙིང་གི་དགའ་སྟོན།
༄༅།། འཕགས་མ་འོད་ཟེར་ཅན་མའི་བརྒྱུད་པའི་གསོལ་འདེབས་ལས་ཅན་སྙིང་གི་དགའ་སྟོན་ཞེས་བྱ་བ་བཞུགས། ཨོཾ་ཨཱ༔ཧཱུྃ༔ ཨཱརྱ་མ་རི་ཙཻ་སརྦ་སིདྡྷི་ཧཱུྃ༔ དཀྱིལ་འཁོར་ཀུན་གྱི་ཁྱབ་བདག་གདོད་མའི་མགོན། །རིགས་བརྒྱའི་མཛོད་འཆང་ལྔ་ལྡན་རྡོ་རྗེ་སེམས། །ཟབ་གསང་རྒྱུད་སྡེའི་སྡུད་པོ་གསང་བའི་བདག །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ལོག་འདྲེན་བདག་ལྟ་ཟིལ་གནོན་དུས་ཀྱི་དགྲ། །རྡུལ་བྲལ་འདྲེན་མཆོག་མཚོན་ཆའི་རྒྱལ་པོ་སྟེ། །སྐལ་བཟང་གདུལ་བྱའི་སྒྲོན་མེ་ཟས་གཙང་སྲས། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །རྒྱལ་ཀུན་བྱིན་ནུས་གཅིག་བསྡུས་ཐོད་ཕྲེང་རྩལ། །གངས་ཅན་བསྟན་པའི་གཞི་འཛིན་ལྷའི་མེ་ཏོག །བདེ་སྟོང་དགའ་བཞིའི་གར་མཁན་མཁར་ཆེན་བཟའ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ལྔ་རིག་སྨྲ་བའི་ཁྱུ་མཆོག་རྣམ་སྣང་མཛད། །ཟབ་གཏེར་ལུང་སྟོན་གྲུབ་དབང་ཆོས་ཀྱི་རྗེ། །སྨོན་ལམ་འཕྲོ་སད་སྐལ་ལྡན་ལུང་རིག་གླིང་། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །དྲན་པས་འཇིགས་པ་ཀུན་སྐྱོབ་རྒྱལ་བའི་ཡུམ། །བདུད་ལས་རྣམ་རྒྱལ་ལྷ་མོ་འོད་ཟེར་ཅན། །རིགས་བཞིའི་སེམས་མ་སྒོ་སྲུང་སྤྲུལ་པར་བཅས། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ངེས་འབྱུང་བློ་ཡིས་འཁོར་བར་ཡིད་དབྱུང་ནས། །རང་གཞན་དོན་ཀུན་ཐབས་དང་རྟེན་འབྲེལ་མཐུས། །སྒྲུབ་པའི་བརྩོན་པ་ནམ་ཡང་མི་འདོར་བས། །བྱང་ཆུབ་ལམ་ལ་ཚུལ་བཞིན་སློབ་པར་ཤོག །གཉིས་འཛིན་དབང་གིས་ཐག་ཁྲར་སྦྲུལ་མཐོང་བཞིན། །གདོད་ནས་གྲུབ་པ་མེད་པའི་ཆོས་ཉིད་ལ། །སྣ་ཚོགས་སྣང་བ་ཀུན་བརྟགས་གློ་བུར་དགྲ། །རང་བཞིན་མཉམ་པའི་དབྱིངས་སུ་སྒྲོལ་ནུས་ཤོག །མ་དག་ཕུང་པོ་ལྔ་ཡིས་བསྡུས་པ་ཡིས། །རང་བྱུང་དབྱིངས་ལ་སྒྲིབ་པའི་ལྕགས་ཀྱི་ཁམས། །སྨིན་བྱེད་དབང་བཞིའི་གདམས་པའི་གསེར་འགྱུར་རྩིས། །སྐུ་བཞིའི་ཡོན་ཏན་གཞལ་མེད་མྱུར་ཐོབ་ཤོག །མངོན་བྱང་ལྔ་ཡིས་བསྐྱེད་པ་ལྷའི་ཕྱག་རྒྱ། །གཡོ་ཐོབ་གོམས་བརྟན་བསྐྱེད་རིམ་མཐར་སོན་ནས། །ཐ་མལ་ལས་རླུང་འགྱུ་བ་དབྱིངས་སུ་དག །གཞོམ་མེད་རྡོ་རྗེའི་གསུང་ལ་དབང་འབྱོར་ཤོག །སྲུང་བའི་གོ་ཆ་རྡོ་རྗེའི་ཆོས་བདུན་ལྡན། །རྒོལ་ངན་མཚོན་ཆས་ནམ་ཡང་མི་ཚུགས་ཤིང་། །བཟློག་པའི་འཁྲུལ་འཁོར་གནམ་ལྕགས་འབར་བའི་མེས། །ལོག་འདྲེན་བྱད་མའི་ཀླད་པ་འགེམ་པར་ཤོག །རྨི་ལམ་ལས་བྱུང་དགྲ་གདོན་གཡུལ་ངོ་ལས། །རང་བཞིན་རྟོགས་པའི་དཔའ་བོ་རྣམ་པར་རྒྱལ། །རང་བབས་གཉུག་མ་ཤེས་རབ་དབྱིངས་ཀྱི་ཡུམ། །ཚེ་འདིར་མྱུར་འགྲུབ་དོན་གཉིས་མཐར་ཕྱིན་ཤོག །ཅེས་པ་འདི་ཡང་ཟབ་ཆོས་འདི་ཉིད་ལ་མི་ཕྱེད་པའི་དད་པ་དང་ལྡན་པ་སྔོན་ལས་ཀྱིས་ཉེ་བར་འབྲེལ་བའི་བཙུན་པ་ཀརྨ་སིདྡྷིས་བསྐུལ་ངོར་གྲུབ་དབང་རྫོགས་ཆེན་པ་ཡབ་སྲས་ཀྱི་བཀའ་དྲིན་ཁོ་ནའི་འཚོ་བ་རྒྱ་སྤྲུལ་མིང་གྱི་ན་བས་བྲིས་པ་དགེ་ལེགས་འཕེལ།དགེའོ།།