སྐྱབས་ཡུལ་གསལ་གདབ།
༄༅། །སྐྱབས་ཡུལ་ལྷ་ཚོགས་མདུན་གྱི་ནམ་མཁའ་ལ། །པདྨ་འདབ་བཞི་མུ་ཁྱུད་འདབ་བརྒྱད་མཛེས། །དེ་དབུས་ཉི་མ་ཟླ་བའི་གདན་གྱི་ཁར། །དཀྱིལ་འཁོར་གཙོ་མཆོག་ལྷ་མོ་འོད་ཟེར་ཅན། །འདབ་བཞིར་ལས་བཞིའི་དཀྱིལ་འཁོར་གདན་སྟེང་དུ། །རིགས་བཞིའི་མཁའ་འགྲོ་རང་མདོག་ཕྱག་མཚན་རྫོགས། །དེ་རྒྱབ་འདབ་བརྒྱད་མུ་ཁྱུད་མཛེས་པའི་སྟེང་། །མཁའ་འགྲོ་མ་བརྒྱད་ཞི་དྲག་གར་དགུའི་ཉམས། །ཕྱོགས་མདོག་རང་རྟགས་སྒེག་དཔའ་ཁྲོས་པའི་སྐུ། །སྒོ་བཞིར་ལས་བྱེད་མཁའ་འགྲོ་རིགས་བཞི་གསལ། །བར་མཚམས་དགུག་འཆིང་སྡོམ་དགྱེས་ལས་བྱེད་ཚོགས། །ཕྱོགས་བཅུར་ཆོས་སྐྱོང་མཁའ་འགྲོ་སྤྲིན་ལྟར་གཏིབས། །བརྩེ་བའི་ཐུགས་རྗེས་ཞལ་ཕྱོགས་མཁྱེན་པས་གཟིགས། །བདག་དང་བྱམས་པའི་ཕ་མ་སེམས་ཅན་རྣམས། །སྡང་བའི་དགྲ་བགེགས་གནོད་བྱེད་མ་ལུས་པ། །འདི་ནས་བཟུང་སྟེ་བྱང་ཆུབ་སྙིང་པོའི་བར། །མི་འབྲལ་ཐུགས་ཀྱིས་སྐྱབས་གནས་མཛད་དུ་གསོལ། །